الجمعة، 28 ديسمبر، 2012

برج الحظ 2013






ما شاء الله 

 جمنهور المستمعين الليلة دى كتير
 دنا لازم ألم فلوس بقى واستغل الموكيف..
طب مبدئيا كدا .. 
وكالعادة بخلى مسئوليتشى عن الآتى ذكره


يعنى الكلام الجاى مقتبس عن ناس تانية ومش كلامى ..

 فمحدش ياخده على قلبه وكدا .. 
وكان بودى ارغى
 واقول تفاصيل بس دا ولا ساعة لكل برج تكفى !!


وسنكتفى فقط بالكلام عن التوقعات .. 

والشخصيات ...
 والربط ما بينهم ... 
وبعديييين بقى نبقى نحكى بالتفصيلى المملى ...
 لما نروق 
وكدا

اللى عاوز ينام يا اخوننا يقرى بكرة عشان السهرة هتطوّل :)






 نبتدى الحلقة بغنوة لـ عمار 

وفرقة الإصدقاء عن الحظوظ




آه .. وحلقة النهاردة إهــداء لصديقة البورنامج ..

 الست دودو " @ashketromancya" عاشقة الرومانسية


انا حكايتى مع الأبراج قديمة ومش وقته نحكيها ..

بس الحقيقة انى بقتنع جدا بأن كل برج له مواصفات عامة 
وقواسم مشتركة بين ابناءه ومواليده


وصحيح أغلب المنجمين فشنك ودجالين وكدا 

بس فيه ناس مجتهدة بقالها سنين
 وكلامها بيتحط تحت المجهر ويصدقوا كتير 
ويخيبوا ساعات ..
منهم واحدة

والواحدة دى تبقى الست ماجى فرح اللبنانية

وأكيد قبل وبعد ما اقول أى كلام ..
" كذب المنجمون ولو صدقوا " 
وادينا بنتسلى





والحاجة دى بتابعها كل سنة ..

وكتير زى ما بيقولوا باللبنانى توقعاتها بتضبط معى ..
 انما جت من 3 سنين وهرتلت بكلام كدا 
وانا قولت ايه التخريف دا !
آل يا خويا تقولك ..
 سنة الإنقلابات والحروب وتزلزل العروش وابصر ايه كدا ...
والواحد استعجب ايه الست دى بتقول ايه .. ؟!!


وتدى مدى زمنى من سنة لتلاتة 

وفعلا بعدها بشوية تحصل ثورة تونس
وبعدها مصر وتكر باقى البكرة
 .. ورفعتلها شابوه من ساعتها



وطبعا هيا حبيبتشى 

وروحى روحى روحى
 وغالية عندى بس مش لدرجة انى اشترى كتابها
وادفع فلوس فيه يعنى
لييييه ..
فيه حاجات تانية أولى .. 



بس دا لا يمنع أتابع برضو قالت ايه ؟!!



والست الحقيقة نفِسها اتسدت يظهر م اللى جاى

 ومرضتيش السنة دى تقول كتير 
 غير ان لسه الدنيا هتولع كمان وكمان .. 
والعالم لسه هتقطع بعض يا بوحميد تانى



العالم هيشهد سخونة

واغتيالات واحداث ضخمة تزلزل زى احداث 11 سبتمبر
و فيما يخص مصر قالت بالحرف
هتحصل ثورة ع الثورة 
ومصر يمكن تنقسم دويلات
:(


عموما وانا مرتبة حالى.

لو انقسمنا هقعد مع الناس الحلوة السمحة الطيبة
 اللى بتحترم حريات الأخرين
يعنى الجنب المدنى 
مع المسيحيين والليبراليبن والعلمانين الكفرة ..
ان شاء الله


قصره ..

ماجى بتتوقع للأبراج كل واحد و حسب الشغل الفلكى بتاعها
 وحركات الكواكب بتنزل فين 
وبتسيب ايه 
ومتشغلوش بالكوا بالتفاصيل قوى









و هنبدأ ببرج الجــــدى ... 

واشهر مواليده ف التدوين
بت خيخة وأى كلام
وهنا ف توتير 
"@sotaita7sabo " حبيبتى 
وأبو حميد الغالى كمان



والست ماجى بتبشركم يا مواليد الجدى

 ان كل القرف اللى مريتوا بيه السنتين التلاتة اللى فاتوا
 هينقشع السنة دى ويروح لحاله 
وتجنوا ثمار الصبر قريبا


والحقيقة ان برج الجدى يا عيال

 فيه كم من الشخصيات اللى لما تسمعوا اساميها
 هتفهموا ليه الجدى دايما شايل الهم 
و بيتحمل الصعاب و مش قادر ينبسط !


يعنى يكفى اقول جمال عبدالناصر والسادات 

وبن بيلا و صلاح جاهين وماوتسى تونج
و الخديوى اسماعيل و انتونى هوبكنز 
و جبران خليل جبران وآل كابونى  .. 
يبقوا جدى !


مارتن لوثر كنج و جيم كارى و مارك انطونى

 ومحمود المليجى و خالد الأسلامبولى قاتل السادات
و زياد الرحبانى و الملك فؤاد ابو فاروق 
كلهم برج الجدى


الستات بقى خود عندك أم كلثوم و نادية لطفى و داليدا و كليوباتراااا

و نيللى ومرات اوباما الست ميشيل 
ومرات ساركزوى سابقا الاخت كارلا 
كلهن جدى


برج الجدى ..

 من أكثر الإبراج اجتهادااا وبيفضل ورا الهدف لحد ما يحققه ..
وبصة سريعة ع الأسماء السابقة تؤكد ذلك .. 
دى ناس بتعرف تروح لسكتها صح


وحتى لو فيهم ناس لاسعة .. زى آل كابونى يا ستوتى

 فدا بغض النظر بيقول ازاى هما بيعرفوا يديروا مؤسسات
 ويعملوا دولة 
وكأنهم روساء هما شطار فعلا


برج الجدى بإختصار ف كلمة واحدة .... 

الإجتهـــــــــــــــــــــــــــــــاد





... برج الدلو

واشهر حبايبى هنا .. شيماء الخولى ندى الياسمين :)
وياسمين انسانة 
والست ماغى بتقول للدلو ...

ان سنتك صعبة حبتين وهتتحط ف اكتر من اختبار
 ولازم تجمد كدا ..
 والانفراجة ع الصيف وعليكو خير :)


برج الدلو هوه برج التقلبات والمزاج..

و ناس كتير ممكن متحبش الدلو من اول نظرة وتسترخمه
 بس لما بتعرفه بشكل أقرب بتحبه جدا
 وتحترمه وتقدره بحق


فيلسوف ومتأمل اكتر من اللازم احيانا 

ومحاولة كنهه للأشياء احيانا بيأخره عن الإنجاز
والسخرية هيا سلاحه الدائم ف مواجهة قرف الدنيا 
وتعثر خطواته فيها


والغلاف اللى بيغلفوا بيه نفسهم دا 

بيكون غالبا القشرة اللى بتحميهم من الغير ..
 لكن بتوغلهم ف التجارب بينضجوا وبيلمعوا زى النجمة ف السما


يكفى نقول من مواليد الدلو

أديسون اللى كان بيتقال عليه طالب خايب ..
ونقول كمان جاليليو جاليلى
وطبعا مش هوضح ازاى ان الكل كدبه ف الاول 
ومخدهموش جد ... !


وخد عندك كمان ..

محمود حميدة ومحمد هنيدى وفاروق الفيشاوى 
وسمير غانم ودريد لحام (السخرية اهو)
ومن امريكا رؤسائها ريجان و روزفـلت ولينكولن


الحريمات بقى ..

 حبيبتىىىىىىى سعاد حسنى يا عيال :)
ليلى مراد ومارى منيب و لطيفة ونبيلة عبيد 
و باريس هيلتون الرخمممممة
 و ستيفانى اميرة موناكو


مى زيادة اللى عاشت تعيسة لأن محدش فاهمها 

كانت دلو
جنيفر انستون بطلة مسلسل الأصدقاء اللى اتطلقت من براد بيت
وأخيرا ومعرفش ازاى ولكن ... الاخت شاكيرا !


يا جماعة عاوزة ارتويت وارد عليكو ..

 بس عشان التويتات متخلصش
 ولسه قدامى كلام كتيييير ...
 هكمل بقى علطول وادوس بنزين .. معلش






ندخل على الحوت

ودول اعرف امى وابويا و بساكيتو بسكوتة
وعادل صليب و سالى رؤية
 وبيطرية ومش بإيدى ف التدوين 
وانجى احمد  ف تويتر


والست ماجى بتقولكم يا حوتيين السنة دى كويسة 

وحظوظكم احسن م اللى فات ..
 سواء بجوازة او ولادة او فلوس جاية ..
 يعنى ربنا هيجبر بخاطركم انشالله


برج الحوت هوه نموذج للشخصية العملية 

ورزقهم واسع خصوصا ف الفلوس لأنهم مدبرين
ومش بيامنوا لأى حد بسهولة وعندهم حرص من الاخر بالفطرة كدا


حساسين بشكل مرعب ويجيب مشاكل وخناقات بسبب كدا ..

وبيتقوقعوا على نفسهم قوى .. 
وأغلب الحوت بيتوتتين وبتوع الشغل والبيت والأسرة خصوصا الحريمات


عارفين سعاد وهيا بتغنى ..

عنده برود اعصاب
أهو الحوت ولا جراح بريطانى دا.. 
ودايما لازم ينجزوا الاول وبعدين يغضبوا على مهلهم بعديين اذا فضيوا


ونظرة بس سريعة على قايمة الحوت هتفهموا قصدى ..

محمود الجوهرى وعلى ومصطفى امين محمود الجندى
عبدالرحمن الشرقاوى محمد عبدالوهاب و بيرم التونسى


المفتى على جمعة حميد الشاعرى محمد صبحى 

رجب طيب أردوغان عادل أدهم
على سالم يورى جاجارين والبرت اينشتين
سيد درويش ومحمد نجيب اول رئيس لمصر !


نساء الحوت بقى

سامية جمال تحية كاريوكا اليزابيث تايلور 
سميرة موسى عالمة الذرة
 سمية الألفى سميحة أيوب 
والزغلولة الكبيرة بقى ... سوزان مبارك


ونظرة للأسامى دى مثلا هتلاقوها بيتجسد فيها تقوقع الحوت

وهروبه م الواقع لما بيحس بالضغط والفشل ...
حنان ترك - سهير رمزى - هويدا بنت صباح


وطبعا لن ننسى موزز البرج ...

الاخت سيرين عبدالنور
والاخت هيفاء وهبى
و اليزابيث تايلور ف عزها .. 
وشارون ستون ف تألقها كانوا قمرات


وقبل ما أنسى عشان مقولتش ف الاول ..

بعدين الحوت بينقمصوا
وانا ميخلثنيش زعلهم أبداااا ... 
الواد طاهر الغالى ... برج الحوت ونفتخر يعنى :)






اللى بعده .. البرىء الطيب الغلبان .. 

اللى مبيعملش حاجة خاااالث .. برج الحمل


الست ماجى معنونة توقعاتها لبرج الحمل

 بأن هذه هى سنة تحقيق الإحلام المؤجلة ..
يعنى كل حاجة طنشها الوقت اللى فات السنة دى مهيئة
 لكى يمضى فيها


هيصادفها شوية حاجات لازم ياخد فيها قرارات

ولو يفك علاقة موجودة او شراكة ف شغل .. 
المهم انه هيتخلص من كل همومه اللى تقلت خطوته كتير وينطلق


الحمل صحيح شكاى دايما 

و بيذل اللى بيحبهم بعطائه احيانا
و بيتكاسل اوقات و بيتراجع لحظات..
 لكنه يملك ميزة قلما توجد ف غيره وهى الجرأة المتهورة


يعنى ممكن تكون امكانياته ف توقيت لا تسمح بالتقدم ف شىء

 بس بيستجمع شجاعته ويتهور
 ويقدم على الخطوة بجرأة ويحقق النجاح بكدا
 بينما يجبن الباقين


و بلوجاتى سيد الابراج وهبقى اديكم اللينك ف الآخر عمل احصائية

 فلقى ان 40% من القادة العسكريين حمل
 و40% عقرب
وال20% الفاضلة من باقى الأبراج !


وعشان تفهموا قصدى شوفوا كدا ..

سعد الشاذلى ادولف هتلر تيمورلنك بسمارك احمد عرابى 
محمد الفاتح نيكيتا خرتشوف الملك شارلمان هيلموت كول .. حمل


الحمل كمان دول ..

ديكارت و مؤسس جوجل لارى بيج
 آل جور و ليوناردو دافنشى راسل كرو
كوفى عنان انطونى كوين و حسن فتحى 
و احمد رمزى و شمس بدران



يحيى الفخرانى و محمد القصبجى 

والغريب بقى دول برج واحد .. بس سبحان الله ..
محمد متولى الشعراوى .. ومحمد حسان وديت فلوسنا فين يا حرامى ؟!!!


ويجب الا ننسى ان رجالة الحمل بيعرفوا يعاملوا الست كويس ويبلفوها ..

 ونذكر بالخير بقى اشهر الحملان ..
 عمر الشريف ونزار قبانى .. 
واظن دولا كفاية يعنى
وقولنا احمد رمزى .. يعنى ماذا يقال بعد كل الذى قيل ؟!
نساء الحمل بقى ..

 اشهرهم اليزابيث التانية ملكة انجلترا ايما تومسون
 ماريا كارى سيلين ديون
نجوى ابراهيم امينة رزق اسعاد يونس سميرة احمد ..






والآن ... مع برج العظمااااااء الحلوين اللطاف

 اللى مفيش زيهم ابداااا ..
 برجى .. برج التور الجميل الغلبان بالقوى يا لوزة



والحقيقة الست ماجى

 بقالها 3 سنين بتقولى يا فطمطم هانت
 وبكرة وتحلى وهتتعدل 
واكيد السنة دى هتتجوزى هتتجوزى 
والحاجة ام فاتيما تستنى ولا يحصلش


قوم السنة دى كتر خيرها ..

 مرضتيش تسببلى أى انحباط ..
وقالتلى سنة التور مزدهرة 
وهيلم الغلة ماديا ومعنويا 
ويبقى بخير بس على نص السنة التانى



ومجبتش سيرة الجواز بقى ..

واصلا اساسا مكنتش هصدقها ف دى ..
يوه .. بقالى 3 سنين بتلدغ وانا مؤمنة بقى عيب كدااااا !


التور مشكلة حياته انه بيتشبث بالأشياء والناس

 لدرجة انه بيوصل لمرحلة ميعرفش يتراجع او يقف عند حد ..
 وكفاية اقول ان حسنى مبارك تور عشان أوضح !


رجالة البرج انجح من حريمه

بس ف المجمل لو يتشبهوا 
فهما الشجرة اللى جدرها ثابت ف الأرض
ومبيتزحزحش مهما عانى وشاف وعنادهم صحيح مؤلم وبيخسرهم


الا ان العناد دا بيصاحبه صبر كبير ..

واللى بيصبر ينول .. 
وهذا هو سبب تواجدهم كمركز لأحبائهم يتلموا حواليه ويرجعوله وقت الجد ...



رجالة التور بقى حبيبى آل باتشينو

و حبيبى برضك جاك نيكلسون 
نبيل الحلفاوى نور الشريف عبدالسلام النابلسى 
جمال الغيطانى يوسف ادريس صلاح ابو سيف


فيهم المادية بسبب الطبيعة الترابية وحب التملك

واشهر هولاء الاخ ميكافيلى تونى بلير تيودور هيرتزل
 قصى صدام حسين موشى دايان و لويس التاسع ..


ولأنهم محبين للجمال والنفس والبشر ..

هتلاقوا برج التور سيجموند فرويد.. وليم شكسبير
و طاغور سلفادور دالى و ماركونى بتاع الراديو وزكريا احمد


ف الحريمات

 مارى كوينى بربارا سترايسند المطربة شير
 وآصالة اودرى هيبورن ماجدة
 شيرلى ماكلين وسناء جميل منيرة المهدية
 والاخت العزيزة نانسى عجرم








الجوزاء بقى .. يعنى الأتنين ف بعض ..

يعنى اخويا الكبير هانى و الغالى هيثم السايس :)



والست ماجى بتقولك

 يلى اتعذبت كام سنة فاتوا انتا هتاخد علقة ف الأول
 وتفوق بعدها على انجاز مكنتش متوقعه زى الرجوع لقصة حب 



#آه_والنيعمة_قالت



الجوزاء أصلا السنتين اللى فاتوا كانوا داخلين على طلاق (المتجوز منهم)

وعلى انفصال (اللى خاطب وبيحب منهم) 
والسنة دى احتمالات الرجوع كبيرة :)


فخدوا بالكوا الست بتقولكم أصبروا .. وع النص التانى م السنة هتتعدل جدا ...



الجوزائى بإختصار وف كلمة واحدة ...

سيد الصراعات الداخلية ولا يبان عليه ! 



عنده قدرة على كسب ودك بخفة ظله ولماحيته وذكاءه و فلسفته للأشياء



عندهم لسعة كدا واحيانا تحس انهم اتنين ف بعض فعلا وبيتناقروا ..

وحتة اللسعان دى بتخليهم مبدعين ف شغلهم .. 
وتعساء للأسف ف حياتهم لا فيما ندر


وبص ع الأسماء هتشوفوا ازاى الجوزاء

 لما بيبقى النص المهروش فيه هوه اللى غالب بيطلعلنا منه واحد زى ..
 القذافى وعدى صدام حسين ومرتضى منصور!



اما النص الحلو لما بيغلب فبيطلعلنا منه محمود مرسى (حبيبىىىى)

يوسف السباعى احمد خالد توفيق عبدالحليم حافظ 
و حسين فهمى و محمود عبدالعزيز وفاجنر


يطلع من الجوزاء نجيب سرور (الحكمة اللاسعة بشدة )...

ومحمد البرادعى (الحكمة المتزنة بشددددة ) .. 
ولله ف خلقه شئون .. جوزاء ولا إعتراض بقى 
:)



والدبدوب الاخير سنتضموا للجوزاء

والاستاذ نبيل الحلفاوى اكد ف تويتة لصديقة البورنامج دودو ..
انه جوزااااااااء 
وليس برج التور لذا وجب التنويه



اما نساء الجوزاء هتلاقوا فيهم ..

فاتن حمامة وانجلينا جولى
و لاعبة التنس شتيفى جراف 
و بروك شيلدز بناظير بوتو 
واشهر جوزائية : مارلين مونرو






السرطان 

واشهر اللى اعرفه منهم هنا شيماء قهوة بالفانيليا
 و محمد عبدالرحمن 
وقلب القطة ف التدوين :)



والست ماجى بتقولكم .. هتعانوا من مشاكل وضغوط كبيرة ..

 هتزنقكم ف كورنر لفترة مؤقتة 
بس هتخرجوا منها سالمين وغانمين وحد مهم هيدخل حياتكم يغيرها


السرطان اكتر الأبراج اجتماعية والتصاقا بالناس ..

عشِرى وبيحب الصحبة والدوشة 
ويحب اهله رقم واحد قبل أى حاجة تانية و قبل الشغل والدنيا كلها


نساء السرطان حالمات رغم ما يبدو من شدتهم وعصبيتهم احيانا...

انما كل دا نتاج احباطهم من التوقعات
 التى لا تتحقق ف الواقع فبيغضبن ويحبطن ويتعبن



هما شطار ف شغلهم .. كلاسكيين وعندهم روتينية وبيحبوا الناس

فبالتالى بيحافظوا على شعرة معاوية
 ولا يتركوها تنقطع الا ف أضيق الحدود و لما يزهقوا



أشخاص سلسين وواضحين جدا للى قصادهم من اول نظرة

 وتقريبا هم كتاب مفتوح مهما تعمدوا العكس 
ولصبرهم حدود فلو حبايبك سرطان بلاش تلحس العسل كله


طموحاتهم اكبر من الامكانيات 

ولما بيلاقوها هتجبرهم على التنازل بيضربوا بالحلم عرض الحائط
وخلاص متشكرين على كدا ... 
يرجعوا لقواعدهم من تانى


واشهر الأمثلة لذلك ان عامر منيب الله يرحمه

 أشرف عبدالغفور عبدالوارث عسر صلاح قايبل
محمود الحدينى محمد ابو الحسن محسن صالح سرطان


بينما برضو امل دنقل و عباس محمود العقاد 

وبيير كاردان وسلفستر ستالونى
و كارلوس منعم و هانى سلامة 
ومهدى محمد عاكف و رامبرنت سرطانيين


وهتلاقى سرطان ف يوليوس قيصر 

و خليل مطران وعلى خامئنى 

ولحبهم للناس هتلاقى ف السرطان .. نيلسون مانديلا ...


اما منهم من يقبل بالبقاء ف الظل رغم مهاراته العالية فهتلاقى ..

 ان رأفت الهجان (الحقيقى طبعا ) 
وعمر سليمان من برج السرطان .. !!


اما السرطانيات بقى فخد عندك

هيلين كيلر الاميرة ديانا راقية ابراهيم
غادة عبرازق نيكول سابا 
ميريل ستريب زوزو نبيل
 ايميلدا ماركوس كريمة مختار


والمرشحة السابقه لرئاسة الجمهورية ... السيدة 

هياتم





ندخل بقى على برج وروح قلب ماما ..

برج الأسد 
واللى أسد ف تايملانى عارف نفسه بقى :)


وماجى فرح بتقول للأسد انها سنة المتغيرات وضعك هيتبدل كتير

 وهتقابل انتصارات و شوية سسبنس ف السكة 
وارتباط عاطفى وجايز تعمل عملية آخر السنة


ليه كدا بس ؟ :( .. طيب يمكن عملية لوز ولاّ حاجة ...

 نبص للجانب الإيجابى انها هتكون سنة خير ان شاء الله
ع الكل مش الأسد بس :) 
#يارب


والأسد من اسمه كدا اظن واضح ..

 ملك الغابة الكاريزما والجلالة والإهتمام ..
موقعه المتميز اللى بيحطه لنفسه 
ولو عاملته بأقل منه يحذفك من قاموسه



رجال البرج دا أرحم من ستاته ...

 لأن السيطرة والإحساس العالى بالذات مقبول ف الرجالة 
لكن ع الستات بيبقى منفر وزى ريحة التوم كدا .. بيطفّش


الأسد ف مجمله برج الجدعنة 

والضهر اللى تتسند عليه راجل ولا ست ..
وبرج ادارة الأعمال ..
 والمديرين بتوعكوا لو دققتوا فيهم هتلاقوا نصهم برج أسد


ونظرة سريعة على قايمة برج الأسد

 هتلاقوا واضحة يوسف بطرس غالى سيمون بولبفار نابليون بونابرت 
هيلاسيلاسى محمد بديع مقتدى الصدر و الفريد هيتشكوك


كاسترو يا عيال أسد والحبيب بورقيبة 

الملك محمد السادس بيل كلينتون الكسندر دوماس
 مناحم بيجين وليد جنبلاط موسولينى وحسام وابراهيم حسن :)


اما الأسديات بقى

سلاف فواخرى جينفر لوبيز كارول سماحة
 رزان مغربى ساندرا بولوك مديحة كامل
و هالى بيرى و الاخت الفاضلة أيقونة الغناء .. مادونا


و3 مديرات اشتغلت تحت ادراتهم فى اول شغل ليا ... 

وشفت منهم الويل وسواد الليل 
والحمدلله كل مديرينى رجالة دلوقتى :)








برج العذراء بقى

ودول هتلاقوا حبايبى فيهم كتيييير زى داليا ماى كورنر
 وجارة القمر وحفيدة عرابى وكنج توت 



الست ماجى بتقولكم

 نص السنة الاولانى حلو وورد وفل وياسمين
 اما النص التانى فمراجيح مولد النبى وقلق 
ولموا التعابين مع اللى هتتشاكلوا معاه وقتها


لأن السنة دى فيها أرتباط عاطفى ف الغالب

 هيكون هوه اللازقة اللى بغرا بقى ..
 فلموا التعابييين يا بنات العذراء ... ممكن ؟


العذراء هوه برج العاطفة بإمتياز ..

واللى عايزة راجل يعرف يحب .. تتجوز عذرائى .. 
ونساء البرج دا اطيب الامهات والطفهن بس يبطلوا العناد ف الأول


العذراء دايما خايف من اللى قصاده

 وقلقان من انه يندفع ف حبه او الارتباط بيه ..
 بيخاف ليتعلق بيه وبعدين يسيبوا ويمشى .. عندهم هلع م الحكاية دى


من كتر ما بيحبوا جدا .. بيتعلقوا جدا ...

وبيتعذبوا جدا بعدين لو اللى بيحبوه سابهم أو فارقهم لأى سبب
 ولو منطقى ومعقول ومقبول


لما بتسقط من نظرهم بتبقى القاضية ..

وهما ف المجمل ناس سلسين وسهلين 
وبساط جدا بس للى يفتحوله باب قلبهم ..
وبيكدبوا للأسف ف اوقات الضعف



مش سهل حد يحتويهم ...

 بس غالبا بيخرجوا همهم ف الإبداع وليس العنف او تدمير الذات ..
وهما احسن أبهات واطيب امهات وصديقات تلاقوهم ف الحياة


واشهر العذرائيين

 المشير الجمسى صالح سليم مايكل جاكسون 
عزت العلايلى السلطان عبدالحميد التانى
هشام عباس حسن مؤنس خالد النبوى و تومى لى جونز


كمان هتلاقوا العذراء 

ف زين العابدين بن على (كدب اهو)
وبشار الاسد (يا ليهوى!)
و شون كونرى (لأ كدا اتعدلوا) 
و كاظم الساهر (قشطططططة النحنحة وصلت اهى )



ونسيت أذكر ان دا برج الموززات يا عيال ..

 يعنى نساء العذراء انوثة ودلع .. 
وبصة ع الأسامى هتلاقوا راكيل وليش
 وصوفيا لورين 
وسلمى حايك عذراء !



العذرائيات برضو

 الام تيرزا الملكة فريدة و جيهان السادات 
رجاء الجداوى ذكرى سهير المرشدى
الملكة رانيا مرات ملك الاردن و جيهان فاضل وعبلة كامل


ومن مشاهير برج العذراء عندى ...

 الجميلة ... @NoRaaMaHdy





واخيرا واولا وف النص وف كل وقت .... 

احب عذرائى لقلبى .. 
محمد فوزى






ودلوقتى كله ياخدوله ساتر .. 

ويستخبى ف غيط الدرة عشان ضرب النار اللى هيحصل
 لما نتكلم عن برج الميزاااااان



وكل الميزان اللى أعرفهم مدونين

ولم ينتقل منهم ألى توتير هنا واعرفه 
الا الأستاذ العلامة الفهامة سى أحمد أفندى سعيد


الست ماجى بتقول للميزانى

 انك عانيت لسنوات من لخبطات وانقلابات ف حياتك
وحان الوقت لأنها تنصلح
 وفيه مشاريع مستنايك وارباح قادمة ف الطريق


وبالحرف بتقول انها سنة المفاجأت السعيدة

 و انك هتطوى صفحة المعاناة التى لازمتك لفترة
 ويبتسم لك الحظ وتعود لك ذكريات الماضى و تقابل حب قديم !


ويدخل حياتك ناس جديدة بسبب الحب دا ...

وحياتك هتتغير وتنفض عنك غبار الماضى .. 
والميزان من الابراج المحظوظة السنة دى ..
 كله ينّق بقى بذمة



طبعا مفيش داعى نتكلم عن موالدي بزج الميزان

عشان اللى عنده ضغط او سكر او اللى حامل 
او عندها عيال وعاوزينها ... 
ميتضايقوش وكدهون :)



انا بس هستعير مصطلح الأخ بلوجاتى لما وصف الميزان ف كلمتين 

ومفيش غيرهم قائلااا
" الراجل الداهية" ولامؤاخذة
 خليكوا معايا وانتوا تعرفوا ليه!!



نظرة سريعة لأسماء برج الميزان وانتوا تستخبوا منهم ف الشق ...

 بسبب ذكائهم وقدرتهم ع التأثير 
و الحمدلله مبيكملوش للآخردايما 
 والا كان العالم ضاع بقى


الميزان يعنى .. 

سليم الاول محمد حسنين هيكل احمد شوبير 
فلاديمير بوتن ايهود اولمرت نتيناهو
واسحاق شامير ايزنهاور حافظ الأسد والامام حسن البنا


عمرو موسى الفريد نوبل محى اسماعيل 

خالد يوسف ومحمد خاتمى وبن جوريون
جيمى كارتر سيد قطب وأنور وجدى
 و محمد منير و المهاتما غاندى .... !!!


واظن كدا واضح بقى انه برج مجرم ونبعد عنه احسن ..

واهو الست ماجى بتقوله هتشوف خير السنة دى ..
 وربنا يسهلّك يا عم :)





والعقرب ...

برج منامينو وميرا وومن وسامح عزت
ومهاب نجم وهبة الخولى  ف توتير 
و الجميلة شيرين سامى
 و برج الواد ماجد أخويا الصغنن وابنى البكرى



والست ماجى بتقول يا عقرب هذه السنة مصيرية بالنسبالك ..

هتواجه مشكلات شخصية مع شريك حياتك زوج 
او حبيب و هتمر بشوية قلق
 والوحيد هيتعرف بوليفه


بس الست ماجى بتقولكم ... 

ابعدوا عن المتجوزيييييييييييين والمخطوبيييييين ...
عشام المشاكل لأن واضح ان الأنجذاب هيكون ف المنطقة دى والله أعلم



طبعا مش محتاجة أتكلم عن العقرب

واقول انه برج القائد بلا مناصب ولا تكليف .. 
وانه بيعرف يلم الناس حواليه بذكائه وقدرته ع التخطيط والتنفيذ بدقة


وحتى العقربيات لو ف وسط شلة بنات هتلاقيها هيا اللى بتسيطر ع الهرجلة

وبتخطط لسير اليوم ومبتحبش تضيع وقت ولا مجهود ف الإرض


نساء العقرب .. امراءة وبتفكر زى الراجل

ولهذا تجدهن مهندسات وطبيبات وف المهن اللى فيها تحدى 
لأنهن بيعشقوا المنافسة والعقل بيخبى العاطفة شوية


العقرب راجل او ست معندوش حاجة اسمها حب ف المطلق كدا ..

دا بتاع الناس الخايبة اللى واخدة لطشة حب ..
 الحب عندهم لازم يعدى ع العقل الأول


لو حبينا نختصر العقرب ف صفتين هنقول .. ع الصعيد العملى ..

هم "الطموح" بعينه 
اما ع الصعيد الشخصى فهم " الإخلاص" بعينه


ذكائهم بيسبب لهم كأبات ..

 لما بيلاقوا ان محدش بيحتوى وبيقدر كفاية ..
 وبيدلقوا الكآبة دى ف الشغل اللى بيعوضهم 
ولذا هم أنجح الناس ف مجالاتهم



وزى ما قولنا ف برج الحمل كدا العقرب كتير منهم

بيكونوا عسكريين ناجحين لقدرتهم ع التخطيط والتنفيذ والإبداع
 ف وقت الزنقة بإستخدام الذكاء الحاد


واشهر العقارب

 عمر خيرت طه حسين بيكاسو احمد حلمى 
ومنى زكى محسن محى الدين
 محمد أبو تريكة محمود الخطيب و وديع الصافى 
و محمود رضا و مارادونا


واحمد زكى ... عبدالله جول ميزا حسن مؤسس البهائية

 شارل ديجول مونتجمرى فرانسوا ميتران
 السلطان قابوس محمد رضا بهلوى 
رفيق الحريرى و سمير جعجع


اما العقربيات

 انديرا غاندى جوليا روبرتس هيلارى كلينتوى
 مارى كورى هند رستم فيفى عبده
علا غانم ميج رايان سالى فيلد
 و العقربية الذكية بامتياز .... صباح






واخيراااا برج صاحبة الليلة دى

 واللى بسببها رغينا وصدعناكم برج القوس 
الست دودو عاشقة الرومانسية 
وسمعنى سلام اسكندرانى



واعرف كمان من القوسيات هنا على توتير

 آبى رحاب الفواخرى ... 
و نوران آخر أيام الخريف ..
واللى عارف نفسه قوس بقى ميحرجنييييش


أخلص القوس وارجع للميزان ... حاضر على عينى :)




الست ماجى بتقول للقوس انه خلاص بعد الضنى هيرتاح نفسيا

و الحظ هيدق بابه ومسمية السنة ف كلمتين 
راحة نفسية وحظ مطلق :)
 آه والنبى


وبتقوله كمان يخلى باله ف نص السنة لأنه هتيلقى عروض متعلقة بالشغل

 فلازم يدبرها كويس ويبص ويشوف الصالح فين
 عشان الحظ ميزهقش م التخبيط ويمشى !


ويركز كدا عشان الفرصة بنت جمييييييلة ...راكبة فسبا من غير نمر

ولازم نعكش اللى راكبها 
و نوقفه دحنا مستنييين بقالنا زمن يعنى .. !



والقوس أصله برج الكرم ... 

والشياكة والجدعنة رجالة وستات ...
بس الستات جدعنتهم تصرفات والرجالة جدعنتها فلوس وهدايا ..



مشكلة رجل القوس ف ان لما محدش يقدره ..

كبرياءه بينقح عليه ساعتها وتقلب بغم ..
 ودا بيخليه يخسر ناس ف مواقف ملهاش لازمة بسبب الحزقة دى للأسف


والقوسيات شرحو ..

 ام الكبرياء دا اللى عاملهم قلق ومشاكل طول الوقت
وبيخليهم يترددوا ف اظهار مشاعرهم 
ودايما شاكين ف اللى قصادهم يستاهل ولاّ ؟



القوس مبيحبش حد يستغله .. 

يبقى كريم معاك لحدود ما يلاقيك بيتستهبل بقى ..
فيروح قاطع عنك مية ونور
 ولو كنت ايه .. مبيحبش حد يستغفله


ليهم دماغ لوحدهم كدا و ميحبوش حد يدخلها 

يكسرلهم اللى متعودين عليه ..
 بيقلقوا قوى من فكرة ان حد يسيطر عليهم دى وبتعملهم كالوا ف دماغهم


عندهم عطف حقيقى ع الغلبان ..

وف بعضهم مسحة صوفية وتأمل لملكوت الله 
ويكفى أقولكم نموذج واحد لحد عظيم
 وبرج القوس بحق هوه عمنا نجيب محفوظ


القوس كمان هتلاقوه ف والت ديزنى :)



وهانى شاكر ومحمد سعد و خالد الصاوى

 و الجميل جميل راتب و رياض السنباطى
و البراتو موارفيا و على أحمد باكثير 
و جورجى زيدان .. كلهم قوس


بيتهوفن و ستيفن سبيلبرج و طلعت حرب 

و تشرشل و عبدالحكيم عامر و جاك شيراك
و براد بيت و كرم مطاوع
 وودى ألن ... برضو قوس


والجميــــــــل ... مصطفى محمود

وآن لبرج القوس أن يزغرط بقى .. 
عم نجيب ومصطفى محمود ف برج واحد ... 
حاجة تِفرح والله



اما القوسيات فخد عندك ...

شويكار ميرفت أمين مديحة يسرى نجلاء فتحى
وكاميليا و بوسى و فايزة أحمد و جيهان نصر 
و برتنى سبيرز وكيم باسنجر


والجميلة ..... ماجدة الرومى قوس



وشريهان قوس و جين فوندا


 و ... القوسية والبرج متفصّل عليها  ..  أسمهان




واخيرا عود إلى الميزان ... 

عشان دى برج على راسى من فوق والنيعمة
الميزان شبه اسمه ..
هذا الشخص المتأرجح دايما بين نقيضتين ... او قرارين .. او لحظتين




عقلانيته تغلب عاطفته بدرجة رهيبة ..

ووقت ما تيجى لحظة انحسار العقل شوية 
عشان يوسع للعاطفة بيكون غالبا الوقت فات


واذكر ف هذا أنور وجدى كمثال

الراجل دا حط لنفسه هدف عشان يتفوق ويوصل لمكانة معينة 
ولما وصلها كان خلاص ... الموت ازف
واللى بيحبهم بجد مش حواليه 
ومفيش وقت يصلح حاجة



الميزان متطرف فيما يتعلق بمبادئه واللى هوه شايفه صح ..

وممكن يوصل لأقصى حد
عشان يدعم وجهة نظره 
ونذكر هنا كل القادة السياسين اللى قولناهم


واللى عندهم من البلاغة والذكاء والقوة النفسية للتأثير ع اللى حواليهم 

لدرجة اقناعهم بشىء ..
وبعد شوية يقنعوهم بالعكس لو حبوا .. !


هم يمكلكون مس بس العقل والذكاء زى العقرب ...

 لأ هما يملكوا كمان التأثير النفسى 
والقدرة على جذب الناس 
و لكم ف نوارة نجم أسوة حسنة


الست ف سنتين عندها القدرة على انها تنقل اللى بيتبع خطاها 

من حال لحال عكسه تمامااا
وكل مرة تقنعهم انها صح وكانت عارفة
 الخ الخ 
هم يملكون فعلا .. فن التأثير ف الجماهير



والشىء الوحيد الذى يشفع لغالبيتهم ..

انهم يملكوا قلوب طيبة فعلا بس قلوب الاطفال ..
اللى عاوزة تغير الكون وتصحح المايل وشايفة الغلط ف الغير



هم رمز للعدالة واختيار الميزان أدق وصف لهم ..

لأنهم فعلا يملكوا من الذكاء والرحمة 
ما يؤهلهم للحكم ع الأشياء بتجرد (العقل) وبرحمة (العطف)



بيجننوا اللى يقرب منهم ف البدايات ... 

وف النهايات والله !!!



كم التناقضات اللى فيهم احيانا بتخليهم

 زى ما يكونوا مخلوقات فضائية خضرا بخمس عيون ...
بس بالقرب منهم بيتحولوا لأطفال بيبى عاوزين يتحضنوا وبس ..



اللى يقدرهم ... يأسر قلبهم ... 

واللى يجرحهم بيقابل بكبرياء عاصف وبتر من حياتهم ف ثانية
 وكأنك مكنتش موجود أصلاااا


مخلصين واباء وازواج هايلين وبيحبوا البيت 

وبيحبوا أشياءهم وحاجاتهم ... 
ولهم خصوصية مهما اقتربت منهم ..

الملخص 

هما كشخصيات ...
بيطلعوا عينك ف الاول ... 
وبعدين
بتتعود على كدا بقى
 :)

لكونى بعشق ميزان ...

 فشهادتى فيه مجروحة


وأقطع الإرسال يا بنى ... 

خلاص شطبنا



تصبحوا على ألف خير


Related Posts Plugin for WordPress, Blogger...
"حقوق الملكية والملوخية والمهلبية ... الخ
محفوظة للست شهرزاد وإياك حد يسرقها ويحاول يزعلها آغجر .. مفهوم ؟ "