الثلاثاء، 20 نوفمبر 2012

ميدان التحرير






نمتوا ولاّ لسه ... ؟!!!!




يا سلام رايقين وبتهزروا كمان .. 
طب عال عال عال ع
شان الليلة دى رحلة وهنتصرمح سوا ف انصاص الليالى ونهيص .. 
.. بس انا عندى شروط والشرط نور


الرحلة كعابى يعنى هنمشيها 

ومسمعش حس حد يشتكى 
ويقولى تعبت يا ابلة وعاوزة اروح الحمام والأفلام دى ...



ومش عاوزة خناقات

 وحبوا بعضشيكوا دى رحلة ومتنكدوش علينا ..
وأخص بالذكر الست عاشقة الرومانسية قطتى الحلوة 
وسى منص الشهير بأسامة الازهرى
يعنى نظام دا شدلى شعرى يا ميس
 ودى خدت شاندوتشى يا ابلة 
و الشمس ناقحة فوق نافوخنا والحركات دى ... مش هتاكل معايا ..


إيدكو ف إيدين بعض .. 

وهبتدى الرحلة 
بس أحكى الاول حدوتة صغنتوتة
فتح انطلاقة وتمهيد .. 
عن واحد ابن حلال قوووى اسمه الامير قوصونالمملوكى




طاه الناس اللى هتعمل شاى تخلص بسرعة

 واللى هيخش الحمام يسرع الله يكرمكم
واللى مش موجود مبدئيا يخليه مش موجود لحد ما أرجع :) 
#فاصل_قصير
واسمعوا الست الحلوة دى ...

http://www.youtube.com/watch?v=umlJJFVgYVI





قولنا هنجيب ف سيرة امير مملوكى اسمه قوصون ..

 وقوصون دا يا جماعة كان حتة بياع سريح جه من بلده بخارى
شايل بضاعته عشان يبعها ف اسواق القاهرة





والظاهر كان حِرك وشاطر اتصاحب ع التجار بسرعة 

وعرفوا يوصلوه لأسطبل الملك الناصر 
حاكم مصر وقتها ..
وعمل معاهم شغل كويس راحوا ضمينه لرجالتهم


وفضل يتنّطق من منصب لمنصب 

و من سلمة لسلمة لحد ما وصل للناصر
ودخل ف زوارقه.. 
والراجل اعتمد عليه لدرجة انه عينه نايب للسلطنة 
يعنى 
الرجل الثانى
نظام رشدى اباظة وكدا 


ويديله اراضى ويمسكه سلطات ويثق فيه ..

 و تروح الأيام وتيجى الأيام
والناصر المرض يشتد عليه
 فيبعت لقوصون ويأمنه على ولاده الصغيرين
ويعينه وصى
وقوصون يقوله العيال ف عينيا يا حاج 
اتكل انتا بس على الله ومتشغلش بالك ...
فالناصر يطمن ويطلع السر الإلهى .. 
فقوصون طبعا يعمل اييييييييييه ... ؟؟


اوعى حد يقولى هيعمل بالوصية .. ازعل منكو بقى 

... انتوا خلاص
المفروض هارشين .. 
مماليك .. يعنى الغدر يعنى الخيانة يعنى قلة الاصل
وكدهون


الناصر كان عنده ولاد أكبرهم ابن 16 سنة 

فدا قوصون قلق منه راح باعته ع الشام زى منفى كدا
عشان يخلص من دوشته وقعد أصغر الولاد ع الكرسى
وحكم من وراه
وتقريبا يبقى الرجل الاول والأخير
 ويمسك زمام مصر ويحكم ما بداله
ويتملك أراضى و يغرف م الخير اكوام اكوام ..
 بس اللى خلّف ما متش زى
ما بيقولوا




أحمد .. ابن الملك الناصر 

المنفى ف أرض الشام يعمل اتصالات 
ويتفق مع الأمرا هناك وف مصر انهم يساندوه لإسترداد عرش أبوه .. 
ويلاقى ناس مستعدة تأيده فعلا


قوصون كان منشفها عليهم

وبينهب لوحده ... 
ثم ان جزء منهم كان ولائه للناصر كبير
ولسه فيهم اللى صاين العهد مش هيبقوا كلهم اوغاد يعنى
و اللى زاد وغطى ان قوصون لما وصلته اخبار المؤامرة قتل الملك الأشرف
ابن السلطان .. العيل 


آه .. قيل انه قتل العيل الصغير .. 

بس انكر طبعا ..
 وقال انه مات موتة ربنا ف قوص
وانا مليش دعوة .. 
وسجن باقى عيال الناصر الصغار
 وقعد هوه ع الكرسى
جاب م الآخر 
عشان يمسكها وش يعنى .. من غير ستارة يستخبى وراها 
واللى عاجبه .. !!


وحاول يستميل المماليك المناصرين لأحمد ...

ويغريهم بالمال والمناصب ..
والنتيجة كانت الفشل 
والملخص عشان مطلوش عليكم حصلت معارك بين الطرفين


أولى المعارك قوصون ومماليكه انتصروا 

وهرب احمد بالمماليك الناصرية
عشان يستجمع شتاته 
وف الجولة التانية كان النصر حليفه لأنه راح عقر دار قوصون
وهوه الأسطبل بتاع خيله 
واللى انتشرت شائعات انه مخبى فيه الدهب والجواهر بتاعته
 و الأسلحة كمان ودارت هناك المعركة لحد ما قوصون قال ... 
انا عيل


ورجالة احمد خدوه هوه ورجالته 

وحبسوهم ف اسكندرية 
حيث دايما ينسجن المماليك المقبوض عليهم
 تمهيدا لقتلهم ... 
وينقطع ذكر قوصون من دنيا الحكم


الراجل دا مكنش سهل

 وزى ما تقولوا كدا خيرت الشاطر بتاع زمانه بالنوسبة للجماعة ..
يعنى حط ايده على اراضى و مواشى متتعدش
 وبنى زرايب وكان بيتاجر


وفلوسه كانت متتعدش 

لدرجة انه خبى جزء منها ف اسطبلات الخيل بتاعته
.. ويوم القبض عليه اتنهبت كل حاجة
 وبرضو فضل فيه ممتلكات 
ويحكى ان ...





الجدع بنى لنفسه جامع ف القلعة ..

 واسمه الأصلى قيسون بس كان بينطق قوصون
وكعادة كل الأمرا والمماليك كان قلبهم حاسس
 انهم هيدخلوا جهنم ف موكب رئاسى ..
 فكانوا بيبنوا جوامع عشان الناس تدخل تصلى وتدعيلهم بالمغفرة


ولو ع الجامع كنا سكتنا

دا  الباشا المتربح من وظيفته بنى وكالة 
واشتهرت ببيع ياميش رمضان دونا عن غيرها يعنى احتكر الياميش
وسبحان العاطى الوهاب .. بعد الشبشب والقبقاب !!






دا غير ان التجار اللى جايين م الشام ببضايعهم 

كانوا بينزلوا ف الوكالة دى وينفعوه جامد ..
 يعنى سياسة اشتغل .. تجارة اشتغل
 ومخلاش ف نفسه حاجة


تقولولى يا فاتيما بطلى حقد ع الراجل

 ايه يعنى لما يبقى معاه السلطة والسياسة ويلعب بمصر لعب ..
أقولكم معلش مهو مات موتة تليق بيه ..


ومش غاوية اجيب ف سيرة الناس وأقطع ف فروتهم يعنى . 

بس قوصون  دا مربط الفرس
لأن سعادته كان يملك اسطبل
 وزرايب مواشى أستقطعها لنفسه وهوه ف السلطة


ومن ضمن هذه الزرايب اللى بيتربى فيها العجول والمواشى

 زريبة مشهورة جدا أتعرف ايامها بزريبة قوصون 
وقولوا كان مطرحها فين ياعيااااااااااال ؟؟؟
 #يلا_إسألونى





أيوه 

ميدان التحرير .. !!
ميدان التحرير ف الأصل
كان أرض طرح البحر زى ما بيقولوا 
وكان فيه برك ومستنقعات 
وكانت تعتبر على طرف القاهرة المحروسة .. فإنعمل فيها زريبة


وفضلت كدا أرض مهملة ومحدش بيسكنها غير العالم الوقيع .. 

وجت الحملة الفرنسية برضو الوضع متغيرش كتير





لحد ما جه محمد على

ونضفها شوية بسيطة 
وبنى لبنته الاميرة "نازلى" قصر بيبص ع النهر
 واتسمى بقصر النيل ...
واللى اتهد لكن فضل اسمه
 و بقى فيه كوبرى وشارع بهذا الأسم رغم اندثار الأثر



وبعد محمد على توالى سلسال العيلة

 والأرض دى شبه خراب ومبتعمرش ..
لحد ما جه سعيد 
وقرر يبنى فيها ثكنات للجنود بتوعه واهو يبقوا قريبن م القلعة




وأدى الثكنات أهى سنة 1902 على شمال الصورة

ويعنى قعدنا نهتف ف الميدان ...
ونقول للعسكر 
ارجعوا يلا على ثكناتكم .. ارجعوا يلا على ثكناتكم 
و طلعت هيا اصلا كانت ف التحرير .. !!





ودى الثكنات من جوا ... 

وفضل الحال كدا لحد ما جه الخديوى اسماعيل
والمنظر اتغير تماماااااااا




سى سماعين زى منتوا عارفين 

كان عنده أحلام عظيمة ورؤية لمصر
والقاهرة مختلفة .. وقرر يبنى قاهرة اوروبية على ذوقه هوه ...






ووقتها سمعنا لأول مرة عن حى الإسماعيلية ... 

اللى الميدان دا كان جزء
منه لا يتجزأ ومنه اتفرعت الشوارع والبلوكات ..



ركزوا معايا  .. 

لأن الميدان كان ف الأول اسمه ميدان الكوبرى
 نسبة الى كوبرى قصر النيل بأعتباره اشهر المعالم وقتها





وبعدين بقى اسمه ميدان قصر النيل .. 

وبعدين ميدان الإسماعيلية ..
وبعدين ميدان الخديوى اسماعيل .. 
وبعدين ميدان الحرية
 ثم ميدان التحرير





وبعد مقتل السادات اتسمى بميدان انور السادت

 بس محدش استخدم التسمية
دى ولا عبرها ... 
الناس ما صدقت خلصت من وشه يعنى ....



المهم ان الميدان اتغيرت مسمياته بتغير الاحداث ..

 و نظرا لكبر مساحة الميدان خليكوا معايا واحدة واحدة
 عشان منتوهشى من بعضشينا ... ماشى؟






البداية هتكون من هنا ...

 كوبرى قصر النيل اللى يعتبر الجسر اللى بسببه زريبة قوصون
بقالها سعر وتمن ومقام وتاريخ


الكوبرى كان همزة الوصل بين مكانين وعالمين ...

 وادينا هنعدى مع اللى بيعدوا ...
وخلوا بالكوا م العربيات يا عيال






اول ما الكوبرى هيخلص هنبص على اليمين ..

 نلاقى قصر كبييييير اللى بسببه اتسمى الحى بالأسم دا .. 
سراية الأسماعيلية






والسراية دى حضرتكم بناها الخديوى اسماعيل عشان تسكنها مراته

 الست جشم افت هانم .. 
ودا أسم تقابل بيه ربنا برضو ... يلا معلش!




والست جشم هانم دى تبقى مراته التالتة بقى

 وآخر عنقود الزوجات وبتتدلع
ومش طايقة ضرتيها
 فقالت عاوزة اسكن لوحدى راح بانيلها السراية ف الحتة دى





والسراية دى فضلت ف موقعها لحد ما اتهدت ف التلاتينات 

عشان يتبنى مطرحها مجمع التحرير ... 
ودى صورة للهدم





ومجمع التحرير فكرته وبناه تم ف عهد الملك فاروق .. 

بس الراجل يا نضرى ملحقش يفتتحه
وقامت الثورة


وجنب مجمع التحرير كان فيه جامع ..

 اسمه جامع العبيط ....
 وله قصة غريبة قوى







بيقولك يا سيدى آل كان فيه مجذوب ومخه على قده أيام محمد على ..

 فسى محمد كان بيدسه وسط الناس والعامة 
وبعدين يبعتله يساله ..
نظام بصاص ولا يعلمش ..  
والمجذوب كان بيخّر بالاخبار علطول .. 
يلف ويدور بين الناس لحد ما مات ف البقعة دى
 فراحوا دافنينه فيها وعملوله مقام 
وبنوا جامع ... و سموه جامع العبيط





وروح يا زمان وتعالى يا زمان 

 وييجى الملك فاروق 
ويقرر يبنى مجمع للمصالح الحكومية 
وشئون الدولة
ويقرر يحط تمثال لجده الخديوى اسماعيل قصاده ...


فيعنى ايه ان شاء الله يتحط تمثال للخديوى بجلالة قدره

 .. قصاد جامع اسمه جامع العبيط ...
ايه .. بتلقحوا على جدو الباشا ولاّ ايه ؟؟؟





بس وعنها طلع قرار بهد الجامع ...

 واتبنى مطرحه  .. 
جامع عمر مكرم
وطبعا غنى عن التعريف هوه ايه .. وصاحب الإسم مين .. 
ودا التحرير من مئذنته :)






بس كدا نسيب الحتة اليمين 
ونبص قصادها الناحية التانية علطول عشان
نلاقى قصر تانى برضو كان لواحد خواجة اسمه نستور جناكليس

 


والخواجة كان تاجر دخان وغنى وميسور الحال .. 

بنى سرايته ف الحتة دى 
وفيها معمل للدخان واشتهر المطرح بسراية جناكليس





ولما يحتاسوا ف مكان تبتدى فيه 

الجامعة المصرية محاضرتها ف أوائل القرن اللى فات
ميلاقوش غير سرايته يأجروها ويدرسوا فيها 
وبعدين تنباع وتتنقل من أيد لأيد
ومن حاجة لحاجة لحد ما ف النهاية 
تبقى المقر الرسمى للجامعة الامريكية ف مصر





المنطقة الوسطانية بقى 

فحكايتها مرتبطة بحى الأسماعيلية..






 اللى اسماعيل لما بناه كان تحفة وصفها على مبارك ف خططه بإنه ..

"من أبهج أخطاط القاهرة وأعمرها وسكنها الامراء والاغنياء"






الأول كانت الحتة دى عبارة عن فيلات وقصور متناثرة .. 

وكانت متخططة لبلوكات وقطع محددة
 لكن الوضع كان كالأتى
حى الأسماعيلية كان لحد 1874 عبارة عن
 30% طرق ...
 13% مبانى
... وباقى المساحة حدائق حول المبانى ..





والخديوى اسماعيل بدأ يعرض المساحات للبيع 

مشترطاً على شاريها 
ان المنشأة لا يقل تكلفتها عن 2000 جنيه
ودا كان رقم يضمنله انها هتكون فخمة وشيك





وقبل ما نسيب الجنب اليمين م الميدان 

فاضل مكان أخير ..
 هوه قصر واحدة اسمها قوت القلوب الدمرداشية





والست دى كانت اديبة 

ومن بنات المجتمع الراقى وغنية جدا 
بس كمانابوها كان شيخ من شيوخ الطريقة الدمرداشية
وهذا الرجل تبرع لبناء مستشفى عمومى لخدمة الفقراء من المرضى
واتسمى على اسمه ..
 مستشفى الدمرداش وكلكم أكيد تسمعوا عنها






والست قوت كانت الجرايد قارشة ملحتها 
اكمنها وارثة عن ابوها مبلغ معتبر
 وبصوا ف آخر المقالة دى وانتوا تعرفوا قصدى :)


القصر بتاع الست قوت القلوب فضل موجود لحد سنة 1966 

وبعدين هدوه متفهموش ليه 
وحاليا مكانه النزولة 
 اللى من كوبرى قصر النيل و رايحة عبدالمنعم رياض



نروح شمال بقى ؟؟؟

 نلاقى الثكنات .. فاكرينها ... اللى بناها سعيد
 ونقل عساكره فيها وفضلت كدا لحد ما دخل الانجليز مصر






وقرر الانجليز يكسروا الجيش المصرى اللى قاتلهم ف التل الكبير ..

وراحوا محتلين ثكناته ف قلب حى الأسماعيلية 
وبقت الثكنات دى مقر لقوات الاحتلال
هتلاقوها ف خلفية الصورة
لأول احتفال بعيد ثورة يوليو ... 



والثكنات دى فضلت ف مكانها

 والأنجليز يطلعولنا لسانهم منها ويعملوا تدريبات فيها
ويسيطروا على أى اضطرابات تحصل ف العاصمة عن طريقها 




لحد 1946 لما خرجوا منها 

وراح الملك فاروق بنفسه يرفع العلم المصرى على سطحها ...
 بعد عقود من الاحتلال الأنجليزى لمصر
 واللى قعد فيها الجيش المصرى كام سنة بعد ثورة يوليو 
 وبعدين اتنقلوا لمعسكرات العباسية





ودا المتحف المصرى 

وغنى عن التعريف وان كانله حكاية هوه كمان زىكل حتة ف الميدان
 ونبقى نحكيها بعديييين بقى ف حدوتة لوحدها .. 






دا الميدان وهوه بيعدى فيه جمل .. 

بس دا جمل تانى خااااااالص ... 
غيرالجمال اياها بتاعت 2 فبراير






دا موكب الملك فؤاد 1931 وهوه راجع من افتتاح جلسة البرلمان

 ودا جزء من سور سراية الأسماعيلية ظاهر ف المشهد
قبل ما تتهد بكام سنة يا دوب




وموكب بموكب بقى ... 

دا موكب انور السادات بعد خطاب النصر ف حرب أكتوبر
 ومفيش حد احسن من حد .. هه





ودا التحرير ف كرت بوستال

وهوه رايق ... 
وهادى ... 
ونضيف ... 
واخضرانى ..
 و قبل مترو الأنفاق ما يعفرته ..






ودى صورة للتحرير برضو ف السبعينات 
وحد يسألنى ايه البتاعة اللى ف النص زى الخازوق دى يا طمطومة ؟
.. إسالونى يلا :)) 


محدش سأل ...

ماشى
بس انا هجاوب 
عشان البتاعة دى ليها قصة غريبة قوى
... آل دى تبقى قاعدة تمثال حضراتكم ... طب وايه اللى جابها هنا  ؟




أقولكم اللى جابها الملك فاروق

 اللى كان ف باله يحط تمثال لجده اسماعين باشا
ف وسط ميدانه اللى بناه وله الفضل الأول ف وجوده بعد ربنا ماشى ؟





قوم التمثال دا فكرته تلقفها الجالية الايطالية 

ف اسكنكرية المارية ام تراب زعفران ..
ومن حبهم ف الراجل يبعتوا ايطاليا يصبوا التمثال على حسابهم






وفعلا التمثال يتعمل ويرجع مصر اهداء من الجالية الأيطالية 

وف يوم مشهود يتحط ف المطرح 
اللى موجود فيه قبر الجندى المجهول
 ف كورنيش اسكندرية .. حاليا 



ولما يقرب مجمع المصالح الحكومية يخلص

 يقرر الملك فاروق انه يحط التمثال ف وسط الميدان
ويخلى الحاج اسماعين يبص بوشه ...  ناحية قصرعابدين 
 #يختشى_روقان


قوم الثورة تقوم


والتمثال ف اسكندرية لسه ! 
.. وحكومة ثورة يوليو تمسح بأستيكة كل ما ينتمى للأسرة العلوية
 والملكية ف مصر فيقوموا عاملين ايه ؟


يبعتوا لمحافظ اسكندرية وقتها اللى ينفذ الاوامر 

ويروح ناقل التمثال من مطرحه
ويخلى مكانه النصب التذكارى للجندى المجهول ..
ويبعت التمثال المخازن


ويقعد التمثال متهان ومتبهدل

 والفيران بتلعب استغماية على قفاه ...
وياريتها جت على كدا وبس كانت تبقى اتعشت ...

دا مصلحة سك العملة .. تنشن عليه 

وتتقدم بطلبات واحد ورا التانى عشان تاخده تسيحه
وتعمل منه عملات وأهى توفر ف ميزانية الدولة .. 
شوف الندالة !!!



الحكومة الإيطالية تشم خبر بالموضوع دا 

وان فيه نية مبيتة من الحرامية بتوع القطاع العام لسرقة التمثال
 عينى عينك كدا .. فتتقدم بطلب رسمى لشرائه
وتفضح مصر ف المحافل الثكافية 
وتقولهم شايفين بيعملوا ايه ف التراث ..
ودا أصلام تمثالنا ومستعدين ندفع تمنه للمرة التانية ... وكدهون






قوم شغل التسييح يجيب نتيجة

 والحكومة المصرية ترجعه المخازن تانى ..
لحد اوائل التسعينات لما يخرجوه ويقرووا يحطوه ف كوم الدكة





والقاعدة الموكوسة المهجورة تفضل قاعدة ف مطرحها كدا ..

 لحد ما يبتدى الشغل ف مترو الانفاق فيشيلوها ...





وفيما يخص صينية التحرير

 أو الكعكة الحجرية كما يطيب لأمل دنقل ان يسميها ...
 فانوجدت ف عهد فؤاد
 واتوسع قطرها ف عهد فاروق





حتة الأرض الفاضية دى اللى اتبنى عليها فندق سميراميس حاليا ...

والمنزل اللى ورا دا .. 
كان مكانه قصر قوت القلوب الدمرداشية
 زى ما حكينا






وتقوم الثورة ... 
ودى يا عيال ... 
اجمل صورة شافتها عينيا للميدان ....
مهما تيجى بعده صور و أيام ومليونيات






ومش حقيقى ان التلات كان باكورة المليونيات ..
 زمان ف شهر نوفمبر 1951 
بقلب الميدان اتلم الشعب
 وخرجت منه الجماهير الغفيرة .. على قصر عابدين





دى واحدة من الأحتفالات ايام ثورة يوليو 

والتحرير كان مطرحها ...





 

والحتة دى زمان كانت أرض للتدريبات القوات الاحتلال البريطانى 
ولما مشيوا بقت موقف للعربيات والاتوبيسات
 لحد حادثة عبدالمنعم الرياض الشهيرة  ... 
 فأتنقل الموقف






ودى صورة كمان لقاعدة التمثال 

عشان خاطر عيون مصطفى سيف الغالى





ويصعب عليا ان حتة الأرض دى






 بكل تاريخها و عزها ومجدها ...






اللى لمّت الشامى ع المغربى على هدف واحد ...

 يتفرقوا :(





ويصعب عليا كمان ان الجيش اللى ثكنات قصر النيل

 كانت مقره ..
 ييجى يوم
 و ناس منه ... تسحل ست البنات





ع الأرض دى ... 

الشهدا اترموا ف الزبالة :(



لكن ..





 الأرض اللى سال عليها دم شهيد .. 

واتسحل برىء .. 
وصلى ملايين .. 
وحرستها قلوب ..
واندفع فيها الروح والدم والعيون




أكيد .. اكيد .. 

هترجع تشوف أيام عزة وكرامة تانى ...





 زى جمعة رحيل المخلوع .. 

وجمعة الاحتفال بغوارنه ... وغيرها 





وعمار يا مصر ...

 من حتة زريبة وبرك ومواشى ...
 لميدان تحرير شعب



وتوتة توتة ...

 كل يروح بيته الوقت إتأخر ... 
نرتوت منشناتكم بقى



 وتصبحوا على ألف خير




Related Posts Plugin for WordPress, Blogger...
"حقوق الملكية والملوخية والمهلبية ... الخ
محفوظة للست شهرزاد وإياك حد يسرقها ويحاول يزعلها آغجر .. مفهوم ؟ "