الخميس، 28 مارس، 2013

المنيــــل وجــزيــرة الروضــــة






النهاردة حكاية مكان
ف يوم من ذات الأيام قرر عمر بن الخطاب
انه يبعت جنده إلى مصر بقيادة عمرو بن العاص
اللى وصل لحد حصن بابليون حيث يقطن المقوقس حاكم مصر





ولما المقوقس بانله بأس المسلمين واصرارهم على الإقتحام ...

خد بعضه و باقى حرسه
و سابوا الحصن يسقط ف يد عمرو بن العاص
 وهربوا لمكان تانى







وهذا المكان اللى لجأله المقوقس بعساكره

 واحتمى فيه كان جزيرة الروضة ..
 مكاننا النهاردة واللى السهم بيشاور عليها



جزيرة الروضة دى بقى تعتبر من أقدم الجزر

اللى ف الوسط بين القاهرة والجيزة .. 
وبينها وبين المحافظتين دول كذا كوبرى ومعبر ...



وتحكى الكتب انه لما عمرو بن العاص والمقوقس

تم بينهم الصلح عمرو أدى الامان لأهل مصر ف كل شىء
 وبقت الجزيرة محل اهتمام الولاة اللى جم بعده



واتبنى فيها دار لصناعة السفن الحربية والتجارية ...

ف عهد مسلمة بن مخلد الأنصارى ..
 والرجل إبتدت تاخد عليها






وف عهد احمد بن طولون ..

هتلعب الجزيرة دور تانى غير مجرد دار للسفن وبتاع ..
 وكنا حكينا زمان عن الراجل دا ازاى كان طموح و مفترى وقادر



وصل لحكم مصر واحدة واحدة كدا ..

عن طريق المصاهرة والقرابة
واول ما اتمكن .. ابتدى يوطد نفوذه
ويحكم قبضته ع البلاد ودا طبعا معجبش العباسيين !



ف الزمن دا كان الخليفة العباسى هوه .. المعتمد

والاخ معتمد اخوه كان طمعان ف العرش ياخده بدل ابن المعتمد
 فالراجل قال بسيطة .. نقسمها !!
نقسم الحكم بين الابن "المفوض" والاخو " الموفق " 


قصره يعنى ... اللى كانت مصر وشئونها من نصيبه كان المعتمد  

بس مين اللى طمع وكان عينه فيها ؟؟؟
 أيوه ... الموفق أفندى


الموفق كان بيستغل ان المعتمد اخوه عايش مع نفسه

 وغرقان مع الجوارى والدلع وليالى ألف ليلة
وكان بيحشر مناخيره ف أمور مصر 
قوم ابن طولون اتنرفز



وف مرة الموافق بعت يطلب منه خراج وحاجات كدا ..

 فطولون قاله ملكش فيه
 والمعتمد هوه المسئول بموجب اتفاق تقسيم السلطة بينكم ... 
وروح لأمك !!



المعتمد يعرف بالحاصل دا

 فيبعت من ورا اخوه جوابات لطولون
 يقوله الموفق اخويا بيتجسس عليك
وعنده اعوان وبتاع
 فيتحرى ابن طولون
 ويلاقى الكلام صح !



فيروح لامم الجواسيس دول ويعدمهم ...

 قوم الموفق يوصله الحكاية فيتغاظ
ويبعت حملة عسكرية بقيادة موسى بن بغا
 عشان تحارب طولون وتعزله عن العرش



الاخ موسى كان لسانه طويل قوى وقليل الادب

 بعت لأبن طولون يهدده 
ويقوله هجيبك من حواجبك
 وهقتل ولادك وهعمل حاجات مش كويسة ف الحريم بتوعك !



ابن طولون اتهز شوية م التهديد

 وبعدين يعنى دول عسكر الخليفة اللى داخلين عليه
 فلازم يحتاط قوم يعمل اييييه ؟؟
 الحل ...
جزيرة الروضة طبعا






راح بانى حصن ف جزيرة الروضة

ونقل الحريم والعيال والفلوس والكنوز
 وكل الغالى والنفيس وخلى الحصن قلعة مدججة بالسلاح بتاع أياميها



وعمل تحصينات على مدخل النيل عند دمياط

واستعد قدر الممكن يعنى انتظارا لسى موسى لما يهل ويشرف
 عشان يتقاتلوا بقى بس موسى إتاخر 
ومجاش



عشان ف وسط الطريق بن بغا جه ف الشام

ومتفهموش حصله ايه ...
ومات فجأة 
والظاهر حريم بن طولون دعوا عليه ف ساعة مغربية بذمة ولاّ ايه ؟



ويا بن المحظوظة يا احمد ...

عدوك مات موتة ربنا
ونجيت من الهجمة الشرسة
 بس تفتكروا الموفق الحقودى هيسكت ... ؟!!!




لأ طبعا .. هيقرر ان اللى معرفش يعمله بالعسكر والسلاح والدم

هيعمله بالحيلة وقد كان
 ف احدى الليالى المقمرة 
وطولون كان ف حصنه بجزيرة الروضة



والقمر بدر والجو جميل واحدى محظياته بتغنى

 و بعد العشا بقى يحلى الهزار وباقى الغنوة وكدا
وينام الحاج ابن طولون بعد ذلك مطمئنا 
ولا ف باله



ويصحى تانى يوم عادى بيحط رجله ف اللامؤاخذة الشبشب

 (النعل بأدبيات الزمن الماضى) ميلقيهوش
ويلاقى مكانه رسالة من الخليفة الموفق 
نصها كالأتى

"كلفنى الحصول على هذا النعل 50 ألف درهم

 ولو أردت قتلك لفعلت بنفس المبلغ ... " 


يا بن القديمة يا موفق و بيت مامتك !!!

 ابن طولون اللى بيقول


طبعا ابن طولون فهم ان الحكاية واسعة قوى وكدا مينفعش ...

وبعد مفاوضات وغتاتة من الطرفين
 تم التصالح 
وكل واحد لم تعابينه
 وانتهت القصة على كدا



وبعدها رجع ابن طولون لقصره اللى كان بانيه قصاد الجامع

 بتاعه ف قلب مدينة القطائع
 اللى كانت عاصمة مصر وقتها 
وحكم ابنه وحفيده بعد كدا ...



جزيرة الروضة فضلت منطقة هادية

 مفيهاش سكان كتير ودوشة
و ف عهد الفاطميين لما حكم الآمر باحكام الله 
بنى فيها قصر لزوجته البدوية عالية



واتسمى القصر دا بالهودج

 وف جزيرة الروضة انقتل الآمر غدر
 وهوه رايح يزور المدام ... 
قتلوه أنصار عمه نزار اللى كان طامح للحكم





وراح الفاطميين وجه صلاح الدين الايوبى

وجزيرة الروضة ف زمن الايوبيين تتحول لحتة أرض
 ملك لأحد قرايب السلطان
 وكان اسمه تقى الدين بن شاهنشاه



ابن شاهنشاه كان ابن اخ صلاح الدين قعد ف الجزيرة

 واستولى على قصر تغريد مرات المعز لدين الله
وام العزيز بالله
 وعاش حياته شوية ... كدا



وبعدين لقى عمه صلاح الدين بيستدعيه للرجوع للشام

 فبن شاهنشاه يفكر هيعمل ايه ف القصر ؟
 وبعدين قرر يقلبه مدرسة 
 #طيب_يا_بنى_كلك_ذوق






وخلى الجزيرة بكامل ريعها وقف لصالح المدرسة

اللى انعرفت بأسمه "المدرسة التقية"
وفضل بنى أيوب يتوارثوا الحكم لحد ما وصلنا للصالح نجم الدين



نجم الدين بقى ...

 الله يسامحه ع اللى عمله ف مصر وفينا
 لما مسك راح مصادر الجزيرة وخلاها ملك له
هوه بلا شعب بلا بتاع 
وقرر يبنى قلعة حصينة




حد يسالنى ويقولى طب راحت فين قلعة بن طولون يا ست فاتيما ؟

 أقولكم مهو العباسيين لما دخلوا مصر
قاصدين يقضوا ع الدولة الطولونية هدموا الحصن دا
زى ما هدموا كل حاجة تخص دولة بنى طولون
فيما عدا الجامع




 المهم ... نجم الدين هدم مساجد وبيوت وقصور

 وأى حاجة وقفت ف سكته 
عشان يبنى قلعة
ويعنى اشمعنى صلاح الدين بنى قلعة انا مبنيش قلعة؟
واشمعنى هوه عنده قلعة وانا لأه ؟
وتيجى نحط قلعتك جنب قلعتى ونشوف مين قلعته احسن وكدا !



وراح هادد ييجى 30 جامع ومعاهم بيوت وقصور بالعبيط
وصرف فلوس بالهبل
وبنى قلعة متحاوطة ب60 برج رخام 
والاحجار اتلطشت من المعابد الفرعونية ف الجنوب !!



ويقال انه قطع ألف نخلة عشان يوسع للأبراج

واتسمت القلعة بقلعة الروضة اللى على أسمها بقت هذه الجزيرة
 معروفة بـ "جزيرة الروضة " إلى يومنا هذا



ويا ريتها جت ع الفشخرة والترف والبهرجة

كنا قولنا ماشى حاكم وبياكل ف آتة محلولة
زى كل حكامنا وعادى
 انما القلعة دى كان لها دور وشأن تانى






لأن نجم الدين اشتهر بشراء المماليك وتربيتهم

هيقرر يلمهم ف القلعة دى هما وكل حريمهم واموالهم
 ويتحولوا لمراكز قوى 
وينعرفوا بالمماليك البحرية


واللى هيخرج منهم بعدين حكام وسلاطين

 يركبوا على أنفاس البلد ويقرفونا
 قصره عشان نذكرله حقه كاملا
 يعنى الراجل اتفشخر واتعايق وبنى قلعة الروضة



وبعدين يموت قبل ما البنا يخلص ف القلعة كما أراد

 والست شجر الدر تنقل جثمان جوزها نجم الدين
 من قلعة صلاح الدين لقلعة الروضة ف سرية تااااامة








وميلحقش يتهنى بالقلعة بتاعته سبحان الله

 يعنى بس كتر خير إدارة المترو عملتله محطة بحالها بأسمه ...
ولاد أصول الصراحة



بعد نجم الدين ...

 هيمسك ابنه وبعده علطول شجر الدر
 وبعدها أيبك والمنصور ابن ايبك
ثم قطز ... 
وف النهاية تقع ف حجر الظاهر بيبرس أفندى



وبيبرس كان من المماليك البحرية

وقلعة الروضة دى زى كليته الحربية كدا ولاّ حاجة
فلما مسك السلطنة اهتم بيها وبالجزيرة 
وبمصر عموما الحق يقال


الشاب عمل نهضة عمرانية واجتماعية 
وابقوا فكرونا نحكى عن الراجل دا
 عشان فعلا سيرته مثيرة ومتناقضة ومشوقة وغريبة وموحية 
وفيها كل حاجة ....



المهم بيبرس جدد القلعة واستكمل الناقص فيها

 و شدد الأحتياطات الأمنية
 وفضلت القلعة دى رمز لدولة المماليك 
ولم تتوقف فيها الصراعات ...



وبرضو زيهم زى سلطانهم راحوا وراحت ايامهم

 ومفضلش منها غير السيرة
 وميدان وشاره ف الحتة دى
 اسمهم ميدان وشارع المماليك البحرية






وعلى رأى حنان ... ف الشارع دا مدرستى

 أيوه مدرستى الأبتدائى كانت ف الحتة دى
 وليا فيها ذكريااااات الطفولة المشردة بقى دى عاوزالها ليلة لوحدها



المهممممم قلعة الروضة بسبب الصراعات

وآفول نفوذ المماليك البحرية بعد كدا
هتتعرض للأهمال والتجاهل والنسيان لحد ما يدخل بنى عثمان مصر ...



وسليم زفت الاول يعدم حبيبى طومان باى شنقا على باب زويلة

 والهى يشنقوك يوماتى ف جهنم يا سليم با بن ام سليم
 المهم يختار سليم القلعة ويسكنها



بين الحين والآخر يتردد عليها مناصفة مع القلعة

 وف جولة من جولاته يتعرض لمحاولة اغتيال
من احد أنصار طومان باى وتفشل المحاولة للأسف
 :(



وسبحان من له الدوام

وكما استلمنا العثمانلية من المماليك
يسلمونا برضو للى جاى بعدهم ... حاجة قرف
 قصره .. يدخل الفرنساوية مصر




ومؤرخى الحملة وهما بيوصفوا مصر اثناء الغزو

يجيبوا سيرة قلعة الروضة بأسم "سرايا نجم الدين"
فيقولوا ان حالتها كانت سيئة 
واغلبها متهدم ..



وتندثر السرايا او القلعة واللى بانيها

 والمماليك
وميبقاش غير السيرة والأسامى
لكن الجزيرة نفسها تعمر 
ويبقالها معالم و شوارع و حكايات 



ف جزيرة الروضة أشهر شوارعها ...

المنيل





وأشهر معالمها ...

 مقياس النيل اللى شارك ف بنائه وتجديده
واعادة بنائه اكتر من خليفة ووالى وسلطان وملك 








ومقياس النيل حدوتة لوحده

ومكانه دخل ف نطاق قصر المانسترلى
احد رجالات الخديوى عباس حلمى الاول المهروش بتاع العباسية





ويقال ان المانسترلى باشا اللى كان والى مصر ف عهد عباس

هدم جامع المقياس القديم
وبنى مكانه جامع جديد جنب القصر






ف جزيرة الروضة كمان قصر المنيل

واللى لوحده تحفة معمارية ملهاش حل
وانا زمان كنت بفتكره من ايام المماليك بسبب طرازه



القصر حديث مش قديم بناه بدأ من 1901

وطبعا اخد وقت وجهد وفلوس ياما يانا يا هبة ...
يخربيتوهم يعنى فلوسنا يا غجررررر





واللى بنى القصر ... كان ف الأصل ... حلوانى

والنيعمة ماينفع ينقال عليه غير كدا
:) 








صاحب القصر يبقى محمد على توفيق

ابن الخديوى توفيق بن اسماعيل
وبصوا ف شجرة العيلة يا عيال هتلاقوه




بيقولوا ان سى محمد كان وليا للعهد

 حسب قانون الوارثة الملكى بتاع الخديوى اسماعيل
حتى بعد ما الملك فؤاد مسك 





فضل محمد على توفيق ولى العهد

 وطمعان ف العرش حتى بعد ما اتولد فاروق
 و اللى لما مات أبوه كان لسه صغير ف السن 
وجابوه يمسك العرش فورا








محمد على توفيق كان مولع بالأبهة

وكان عنده أمل يا عينى انه ف أى وقت يمسك العرش
فأشيع انه بنى ف قصر المنيل قاعة مخصوص .. سماها قاعة العرش !!



وقعد محمد على توفيق يستنى فؤاد يموت

 فلما مات جه فاروق وقعدوه
ولما خلف فاروق بنات بس انتعشت اماله ف الحكم من تانى 





بس لما فاروق طلق فريدة

واتجوز ناريمان وخلفلته ولى العهد
ذهبت الأحلام التوفيقية أدراج الرياح
 بس سبحان الله الثورة قامت بعدها بسنة والكل بلا استثناء خد صابونة !
ومحمد على توفيق مات سنة 1954 برا مصر 



كفاية تعملوا سيرش على جوجل عن قصر المنيل

 خصوصا بالعنجليزى عشان تشوفوا الصور التحففففففة للقصر
وقاعاته







والأبواب والجناين ولاّ الأبراج ... الأبرااااج

مش اللعنة خالص ع دى أبراج والنيعمة حاجة كدا أبهة وأخر شياكة 









والسلم دا يا عيال

كان دايما ييجى ف الأفلام بتاعت زمان
والقيشانى الازرق الجميل ... آخراااابى ع الروعة




شارع المنيل أطول واشهر شوارع جزيرة الروضة

 فيه حتت يعرفها الناس اللى كانوا بيتسنكحوا زى حالاتى هناك
 زى الجوكى بتاع الأيس كريم 
:)








سينما فاتن حمامة حاليا كانت زمان سينما ربع لبة

(مش فاكرة الأسم القديم للأسف)
وكانت ملتقى الطبقات الشعبية والطلبة
آه ... 
علا من غزة قالتلى ف منشن 
ان المنيل فيه ذكريات طفولتها هيا كمان 
و ان باباها فاكر الأسم كويس
وفكرتنى بيه ...
كان اسمها سينما ميرندا 
:)))




وبابايا انا بقى حكالى عنها قصة معرفش دقيقة ولاّ لأ

انها هيا دى اللى كانت السينما اللى أنور السادات
حضر فيها فيلم ليلة قيام الثورة للتموية وكدا 




اما الراجل اللى ف الصورة دى

فكان أول نقيب للمحامين
واتسمى شارع ف المنيل ومحطة بأسمه 
وهوه ابراهيم الهلباوى



والاخ ابراهيم كان من اسرة مغربية بسيطة جت مصر

 واستوطنت الشارع اللى كان يعتبر أصل المنيل
 واشتغل الهلباوى ف القطن وتجارته 
ولم فلوس كتير



وساب دراسته ف الازهر

 بعد ما تتلمذ لفترة على ايد جمال الدين الأفغانى
 وبعد ما التجارة زهزهت معاه
 بنى لنفسه قصر ف قرية ف الدلتا اسمها العطفة



الهلباوى كان لسانه حلو وشاطر ف الخطابة

وف زمانه مكنش لازم عشان تشتغل محامى تبقى خريج الحقوق
فالجدع اشتغل محامى مستغلا شطارته ونبوغه




وعادى يعنى زمان مش لازم تبقى محامى عشان تشتغل محامى

ما دلوقتى برضو نفس النوظام
اومال الحاج مرتضى دا يبقى ايه يعنى ... مهو شرحو !!!!



المهممممممممم الهلباوى ذاع صيته

والناس عرفته من شرق لغرب لشمال وجنوب
 لدرجة ان الفتوات كانوا بيقولوا هنقتل ونجيب ..  الهلباوى 
يطلعهم منها يعنى



الله .. طب انا مغلطتش اهو ...

 الطينة م العجينة بقى 
ومن زمان اهون !!
 المهممممممم
 الراجل اشتهر وتلميذ الافغانى 
والناس رفعته ع الأكتاف وفجأتن







تحصل حادثة دنشواى 

والبلد كلها تتروق
 وكعادة المحتل الاجنبى ... هيقتلك هيقتلك
بس كله بالقانوووووون فمين يتطوع ؟؟




الهلباوى بيه

يقرر يتقدم للدفاع
بس مش عن الفلاحين الغلابة ... أبدااااا
 دا محامى الأنجليز حضرتك اللى هيوصل للدفاع عنهم إلى أبعد مدى ممكن




هيقعد يهلفط بكلام من عينة أصل الفلاحين اعتدوا الاول

 وهما اصطادوا حمام والحمام برى مش بتاع حد
عشان نتهم الانجليز أن هما اللى ابتدوا بالشر



والأنجليز كانوا ف حالهم طلع عليهم الفلاحين هاجموهم

وشوية شوية كانوا هيقولوا
 ايه اللى ودى الفلاحة اللى انقتلت هناك ؟!!!



وعمل مرافعة فُللى قوى جابت حكم الأعدام لفلاحين

 وسجن لفلاحين تانيين ...
 واتنصبت المشنقة وأزهقت الاوراح ف يوم مشئوم



وطبعا الحكم كان انتصار للمحتل وهزيمة لمصر

 ورجع الهلباوى القاهرة فاكر انه حقق نصر جديد لنفسه
فؤجى بلقب هيلتصق بيه للأبد
 هوه "جلاد دنشواى"


وفاق من نشوة النصر القانونى إلى الخزى المجتمعى

واتعامل معاملة الكلاب الجربانة من الشعب والبسطاء ف الشوارع
 زى ما اتعامل م النخبة كمان






ورغم محاولاته بعد كدا لتصحيح هذه"الخطيئة" اللى أرتكبها

الا ان الناس منستيش الواقعة دى
 اللى الحقت العار بالبلد كلها !



الهلباوى تطوع بعد سنيييين

 للدفاع عن قاتل "بطرس غالى" اللى كان رئيس محكمة دنشواى
 اللى اصدر الحكم ع الفلاحين الغلابة 
ومع ذلك دا مغسلش سمعته !



وتلامذته بعد سنوات لما قرروا يعملوا نقابة للمحامين

اختاروه تأذبا وتقديرا لشطارته القانونية يكون اول نقيب للمحامين
ومع ذلك برضو محدش نسى






والاديب يحيى حقى

ذكر ف احدى مقالاته واقعة شهيرة
وازاى ان ابراهيم الهلباوى دعى لحضور حفل عملوه الأحرار الدستوريين


والحفل كان ف ذكرى الزعيم محمد فريد

والهلباوى مسك المايك بقى ولعلع
وقعد يرص ف خطبة بليغة وحماسية 
خلت الحضور كلهم يصقفوا لما ايديهم وجعتهم



وبعد ما ساد الصمت بعد انتهاء من الخطاب

فجأة سمع صوت جاى من آخر القاعة
بيقول يسقط يسقط حكم العسكر
 ويسقط يسقط حكم المرشد 
ويسقط جلاد دنشواى
 :)







وردد الشباب الهتاف

وهما بيهتفوا بسقوط جلاد دنشواى اطلقوا حمام أبيض
بقى بيرفرف ف القاعة ...
 تخيلوا !!!! 



ورجع الهلباوى بيته بعد هذه الليلة منكسرا

وانعزل لحد ما مات
 والمفروض إدى درس لكل واحد جاى بعده ازاى ميكلش ناسه
عشان التاريخ مبيرحمش بس مين يتعلم؟!





المنيل وجزيرة الروضة فيهم معالم وشوارع

 وحكايات كتير حلوة
وانا شخصيا بفتكر ذكريات الطفولة والمدرسة الأبتدائى 
وايام البراءة ... المشردة 
:)



مدرستى كانت خاصة يا عيال

وف زمنى كانت المدارس الخاصة بتاعت العيال الضايعة
مش زى دلوقتى خصوصا مدارس كمال سليمان كانلها سمعة نيلة
كان ساكن على أيامى ف المنيل كمال الشناوى
 وسماح انور وشريف منير كانوا ف فرع مدرسة من مدارس كمال سليمان
 وكانت سمعتهم ف الشقاوة واصلانا





اجمل أيامى لما الأتوبيس يفوتنى فأروح معدية الكورنيش

 واركب المعدية من مصر القديمة للروضة
 ف مركب هلكانة
كان ركوبها قمة المتعة والسعادة 
:))


وكانت اجمل لحظاتى لما اختلس فرصة

 وانزل الحوش واتشعلق ع السور بتاع المدرسة
 وانده الراجل بتاع الدوم والحرنكش عشان اشترى منه 
#أياااااااام


وقتها كان أحلك لحظاتى لما اتعكش ف مصيبة

 ويقولولى أفتحى إيدددددددك
 وكانت اسعد لحظاتى والأبلة بتقولى
 أضربى الجرس يا فاطمة
 الحصة خلصت :)



الهوا والنيل كانوا شكلهم مختلف عن دلوقتى

اشجار النبق وام الشعور
و هدوء شوارع المنيل الداخلية القاتل الممتع 
والتابعى بتاع الفول
وميدان الباشا 
والراجل بتاع شرايك الكاسيت اللى ف اول المنيل 
الأدوات المدرسية والكتب الخارجية من مكتبة كمال 
و قصر الأليزيه بتاع الحلويات والجاتوه 
ولارين ف زمن أحدث شوية 



شارع المنيل ف الأعياد وزحمة شرا الهدوم

 وحاجة المدارس وحاجات رمضان
 ومولد النبى وبتاع الجرايد اللى من عنده نجيب ميكى وسمير وماجد وغيرهم



كلُّ شيء صار مُرَّاً في فمي ... بعدما أصبحتُ بالدنيا عليما 

آه مَن يأخذ عمري كلَّهُ ..... و يُعيدُ الطفلَ والجهلَ القديما؟ 
.#ابراهيم_ناجى

الله يمسيك بالخير ف الجنة بقى يا عم إبراهيم يا طيب ...





ولا ملاحظات غير حاجة واحدة بس

والسؤال اللى ملقتش اجابته رغم الدعبسة والتدوير
ليه سموه "المنيل " هل اشتقاقا م النيل يعنى ؟! 
#اممكن؟


وتصبحوا على ألف خير 

#طولنا_عليك_معلشى

Related Posts Plugin for WordPress, Blogger...
"حقوق الملكية والملوخية والمهلبية ... الخ
محفوظة للست شهرزاد وإياك حد يسرقها ويحاول يزعلها آغجر .. مفهوم ؟ "