الجمعة، 29 مارس 2013

اوروبا يا خااااااينة








كمان شوية حدوتة
وهيا إهداء لخاطر عيون موهى
" mohap_20@ " اللى نفسه
 ف حكايات مفيهاش دم وعذاب وغم وكدهون :)



واضح ان الكل مشغول بباسم يوسف
 طيب بادىء ذى بدء مش عاوزة تقفيل دماغ وتعصب
 عشان الحدوتة من أساطير اليونان وفيها آلهة وبيحبوا بشر وكدا






والحدتوة بتبدأ من طيارة بتحلق فوق قارة
واحد من ركابها بيبص من الشباك
لقى جبل الاولمب وسمع جاره بيحكى للى جنبه 
حكاية عجيبة عن هذا المكان




اللطيف ان اللى بيحكى كان بيتكلم بلغة
واللى بيسمع بيتكلم بلغة تانية
 فالمضيفة وقفت تترجم من دا لدا عشان يفهموا بعض :) 




مين سمعهم ؟ 
صاحب المقالة اللى هقول سمع ايه ... حالااااااااا






كان يا ما كان ف سالف العصر والأوان
كان آله الألهة وعمهم كلهم الحاج (زيوس) على سن و رمح
كان زهقان فقرر يعمل حاجة 



الحاج زيوس كان زهقان وعنده حالة ملل فقرر ان يصنع شيئا
 قال للأرض اطلعى وانزلى 
فعملت جبال ووديان 



وهتف للمطرة والسيول تملى الاحواض فبقت انهار ومحيطات
 وأمر الرياح تجرى والبرق يبرق والرعد برعد
 والحياة بقالها حس وصوت 



ولمس السما هنا وهناك
 فنقطة كانت الشمس ونقطة كان القمر
ومن بين صوابعه نتر النجوم ... عشان تلالى ف الفراغ الواسع 
وتونس السهران



و البشر كانوا مخلوق واحد ذكر وانثى سوا
 (مش شيمين والعياذ بالله)
وقسمهم نصين عشان كل نص يفضل يدور على نصه التانى 
وهوه وحظه بقى !!



وخلق الوحوش والحيوانات والحشرات والطيور والسمك
 و ... الأرض اتملت بيهم
 وبدأ كل المخلوقات تتكامل عشان تعمرهذا المكان الوسيع
 وتزرع و تعيش




وقعد زيوس بعد كل هذا المجهود يستريح وياخد نفسه
وفجأة أصابه الملل من تانى !!
 طب وبعدين يعنى هيفضل قاعد كدا ... ؟!!!
 لأ طبعااااا




الست (هيرا) مراته كانت ست شرانية ونكدية
وبوزها يقطع الخميرة م السما
وهوه مكنش طايقها ومتجوزها تخليص دين
 فيعمل ايه عشان يطفش من وشها ؟





فقالك يا واد يا زيسو طب متنزل الأرض اللى انتا عملتها دى
 واهو فرصة تتفرج ع الدنيا ماشية ازاى
وفرصة تغور من وش الغرابة هيرا شويتين ... ؟!!



المهم مخدش وادى وراح حاجز ف أول قطر أسبانى نازل ع الأرض
 واللى كان وضعها كالآتى
حتة أرض كبيرة
 وانقمست لحتتين .. افريقيا واسيا ومفيش تانى!




نزل الاول على افريقيا ولقى الغابات والأشجار والبحيرات والنيل وكدا
زهق م المنظر وقرر يشد الرحال على اسيا
لعل وعسى يلاقى فيها تسلية




وفعلااااا اسيا كانت دوشة ومليانة ناس وعمرانة اكتر
 وفيها حروب وصراعات وهيصة
 وكمان كان فيها سحر وجمال وبنات حلوة 
وهنبتدى الخلبصة اهو




أيوه خلبص يخلبص اذن فهو خلبوص كبيييييير
 ونسوانجى كما يقول الاخوة ف لبنان اللى هيا ليها حق عرب
 ف حكاياتنا الليلة عشان فيها بلد اسمها صور ...





صور كان بيحكمها راجل اسمه أجينور
كانت صور حتة م الجنة
 ومراعيها الخضرة على مدد الشوف ... وبناتها زى القمر :)







وف يوم زيوس كان قاعد بيتفرج ع البنى آدمين دول
وهما عايشين كدا
 فلقى شوية بنات بيجروا ويرقصوا ويضحكوا ف احد المراعى 



ولمح بينهم بنوتة زى القمررررر لما شافها انبهر
 وانبسط بنفسه قوى ازاى هوه ساهم ف صنع مخلوقة
 بهذا الجمال والكمال وبدأ يتنصت ع الكلام الداير



سمع من طراطيش الكلام بين البنات ان اسمها "اوروبا"
وانها تبقى بسلامتها أميرة
وابوها هوه حاكم مدينة صور سخصيا
 يعنى حسب ونسب وجمال وكله



ومنير بيقول كل المفروض مرفوض
ومش مفروض آله يحب بشر
 انما زيوس كان بيسمع منير ساعتها 
وقرر ينفذ نصيحته ... بالحرررررف



طبعا لازم يرتب الحكاية
مش هيخش ع البت كدا فجأة يقولها بحبك وعاوز اتجوزك
 وانا زيوس
 لأ دا لازم يضبط التظابيط ويراقب الموقف كويس !!




كل يوم بقى يستناها لما تيجى المرعى مع البنات
ويقعد يراقبها ويبص عليها ويبصبص وكدا
 وهيا مش شايفاه طبعا اكمنه غير مرئى
 #وعيب_كدا_أيصحش



المهم يوم ورا يوم ...
اكتشف حاجة مكنتش ع البال ولا ع الخاطر
 الست أوروبا مكنش قلبها خالى 
وكان فيه حبيب بيشغله
 والحبيب دا اسمه آندوس



وآندوس كان بيبادل الاميرة الحب
 صمتا ليه يا اندوس كدا ؟
عشان الغلبان يبقى راعى على قد حاله
 وقاعد ف المرعى اللى اوروبا بتجيله مع صاحبتها !



آندوس بيحب الاميرة وساكت
وأوروبا بتحب الراعى آندوس وساكتة
بس كل يوم تزور المطرح
 وكل واحد فيهم يبص ع التانى ويختلس نظرة 
وبس كدا متشكرين !!!




حد يقولى يا فطمطم طب يعنى محدش فيهم نطق ليه يا اوختشى واتكلم ؟
أقولكم يعنى الجدع حتة راعى على باب الله 
وهيا اميرة بنت حاكم البلاد .. فإيه؟!!



ثم هيا كمان روخرا هتعمل ايه اكتر من انها تلمحله
 وتستنى لما يعدى من تحت الشباك مرة
وتحدف على دماغه القلة فتلفت نظره ويبص فوق 



يعنى كانت بتروحله لعل وعسى عقدة لسانه تتفك ف يوم
وهوه كان بيكتفى انه يشوفها ويملى عينه من جمالها كل يوم
 وميعرفوش بقى المستخبى لهم يا نضرى


زيوس قرر ان اوروبا تبقى بتاعته يعنى تبقى بتاعته
واصلا هوه مالك المكان والأرض واللى فيها
 آندوس مين دا اللى هيوقفله ف اللقمة بقى !!



وقرر يعمل خطة ... يوصل بيها لأوروبا
وتكونله هوه للأبد 
ويتخلص من آندوس 
فيعمل ايييييييييييييه ... ؟!!!!



آندوس كان بيرعى قطيع من الثيران السودة
وف يوم من ذوات الأيام
 الاميرة أوروبا حضرت كالعادة ومعاها صديقاتها والوصيفات
 و بيتمشوا ف المرعى



وتعدى من جنب آندوس وكأنه عادى يعنى مش قصدها وكدا ...
 فآندوس اللى كان عامل نفسه مش واخد باله برضو
ينتبه ويقف لتحيتها 
واستعباط ف استعباط بقى



فإذ فجأتننننن ف هذه اللحظة المرتبكة
 يشق جموع التيرات السودة ثور لونها أبيض شاهق
 ويتجه بسرعة ناحية أوروبا فالكل يتخض 
ويصرخ الحقى يا مولاتى



أوروبا متلحقش تركز ولا آندوس
 لكن التور الابيض ييجى لحد مسافة متر
ويروح واقف قصاد الاميرة 
و الدنيا تهدى بعد توتر ... دام لثوانى




ولسه آندوس بيقول لمولاته سلامتك
كان التور بيتحرك خطوة كمان
 وبيوطى
 فالبنات قالوا لأوروبا دا عاوزك تركبيه !!




اوروبا ضحكت وقالتلهم التور دا لطيف قوى
 هاتوا الورود عشان نعمله تاج ونلبسهوله
 وقعدت تدلع فيه نظام ياتى كميلة وكدا





كل دا وآندوس متغاظ ومتوجس خيفة
 وبيسأل روحه
هوه التور الأبيض دا جه منين .. اول مرة اشوفه ؟!!!
 طبعا انا وانتم عارفين الإجابة ... صح ؟



أينعم التور الابيض يبقى سى زيوس
 الزهقان 
العشقان 
هوه بعينه 
متنكرا
ومخططا لشىء ما محدش كان يعرفه ساعتها 






المهم 
وطى التور قصاد الاميرة
 فقررت تركبه بمنتهى البساطة ولا ف دماغها عادى
 واخدت كام لفة ف المرعى .. عادى برضو



وبس هيا كانت الطلعة يا معلم
وكل سنة وانتوا طيبين
 التور خد أوروبا وجرى بيها
 افتكرته بيجرى عادى يعنى فتحمست
لكن بعد شوية الموضوع وسع





التور جرى بيها ناحية البحر فسكتت تصورا انه مش هيدخل بيها
 يعنى هوه فيه تور بيعوم ... !!! 
لكن المصيبة انهم ما عمش
 دا مشى فوق المية !!!



دبدوب الدبدوب @mazforever
عوضى على الله فى الألياذة اللى قريتها
 وأنا لسه دبدوب صغنن ...ها وبعدين !!؟؟؟



بس وخدها ع المية وجرى واهو دا اللى عدى البحر ولا أتبلش
فعلا عشان لما حد يسألكم بعد كدا
تبقوا عارفين الإجابة .. هه 





كل دا واوروبا بتصرخ وتنده على حبيب القلب آندوس
 اللى يا نضرى على ما أستوعب الصدمة
 كان التور بالاميرة ف عرض البحر
 وهوه لسه على الشط واقف !



التور حاليا (زيوس) سابقا لمحه واقف ع الشط
 راح مرفصّ برجله فعمل موجة عالية
على ما وصلت الشط كانت عملت تسونامى 
غرقت آندوس البائس ف ثانية !!




كل دا وأوروبا على ضهر التور بتصرخ وتعيط
وتنادى على أى حد ينقذها متلقيش
 لحد ما شافت التور بيطلع بيها من فوق البحر ع السما 
ساعتها سكتت خالص





خلاص بقى طالعين على فوق 
هتنده على مين
 ومين يلحقها
 عوضنا عليك يارب





بس ولقت روحها طالعة فوق
 والتور متجه بيها نحو القمر ... حدف
و لا تقولى صواريخ وعلم وهندسة وناسا ومذاكرة ووجع قلب 



ف السكة لقت آلهة السماء بتشاورلها
وكيوبيد بيحدف عليها سهم من بتوعه بشقاوة
 والتور بيخور بلطف وكأنه بيقولها .. متخافيش 






متخفشى .. !!! 
دنتا خاطفها من كوكب يا بنى
 مش خاطفها من اهلها وحبيبها بس
 وطالع القمر دا لو مجالهاش استبحس ابقى انا غلطانة ؟!! 
آل متخافيش آل






قصره وصلوا القمر ف قطر سبعة ونص
والبت أوروبا نزلت من على ضهر التور مذعورة
وقعدت تدور على مكان تستخبى فيه
 فلقت معبد 




جريت عليه واستخبت فيه
وفجأة الدخان تصاعد من حواليها
ومن وسطه لقت شاب جاى من بعيد
 بتدقق ف ملامحه لقته مين تفتكروا ... ؟!!



لقته آندوس ... حبيب القلب الاولانى
 ومكنتش عرفت طبعا انه غرق ف المالح
 بضربة قدم من زيوس الجبار 
اول لما شافته جريت عليه وحضنته وباسته





وطبعا بعد فاصل من البوس 
والأحضان الملتهبة
يطلع آندوس مش آندوس
وانه زيوس ويحكيلها الحكاية كلها من اولها 



ويفهماها ازاى انه وقع ف غرامها
ومكنش يقدر يتخلى عن حبه دا ويسيبها لحد تانى
وانه معرفش يلفت نظرها الا بالطريقة دى !!! 





وانه اكراما لهذه الليلة هيعملها أرض بأسمها ف كوكب الأرض
وحسب الأسطورة هتبقى اللى هيا قارة أوربا حاليا 
 أى هجص وكدا 



وسامحينى لأنى معرفتش أخطف قلبك غير بالطريقة دى
 بس البت ياخويا بصت حواليها لقت مفيش فايدة من المقاومة
راحت موافقة .. !





ونسيتى آندوس يا وغدة يا خاينة  ؟!
 يالهوى على غدر الحريم
كل دا عشان معبد وحتتتين صيغة و قارة هيكتبها بأسمك .. !!!
ايش حال مكنتى بنت حاكم وشبعانة 
#أخص



وبس كدا اتهببت اتجوزت زيوس
وخلفت منه 3 عيال ..
والست هيرا مراته الاولانية طبعا عرفت وطينت عيشته
والدهن ف العتاقى 
يستاااااااااااااهل البعيد





ودى كانت أسطورة أوروبا
وليه القارة اتسمت كدا
والحدوتة دى ألهمت فنانين كتير عبر الزمان
وعبر العالم كمان ف تمثيل ولوحات





وممكن تتفرجوا على بعض التماثيل واللوحات دى
 هنا
بس عندى سؤال 
هوه ليه البعض بيتصور ان الفن يعنى قلة أدب وقلع هدوم وكدا ؟!





 الست اتخطفت بهدومها ومحدش لمسها يعنى
 قوم النحات هنا يقلعها ليه.. ؟
 قلة أدب وخلاص
 هما ناس غريبة وانا دقة قديمة



طبعا القصة كلها هجص وخيال
بس الأساطير دى بعشقها من صغرى من كتر الخيال
والألهام اللى فيها وأوروبا دى وصلتلنا مصر 
واحنا منعرفش ... تخيلوا ؟





 انا اول مرة اعرف النهاردة
 وانا بدعبس ف الأسطورة دى ان التمثال اللى عند مكتبة اسكندرية
عن اوروبا .. ! 



التمثال دا اللى نحته الفنان فتحى محمود
واللى اتعرض لعوامل الجو واتكسر فيه حتت
ورمموه قريب بعد حملة ف الأعلام





المعلومة المثيرة اكتر بقى ان فتحى محمود
هذا الفنان اللى يعتبر من تلامذة محمود مختار ف النحت ..
قولوا طلع ايه ... ؟؟




طلع هوه اللى عامل تمثال طلعت حرب ف وسط البلد 







وواحد اخوه ف مدينة الزقازيق بالشرقية









وفتحى محمود طلع كمان اللى عامل التمثال بتاع شهداء الجامعة
 اللى كل خريجى جامعة القاهرة أكيد ... يعرفوه كويس 





الراجل دا كان فنان نحت وخزف على مستوى مش عادى
واحنا عندنا ناس ومنعرفش فعلا قيمتهم ... الا صدفة من كترهم
 #مصر_بقى




واخيرا الصحفى اللى سمع الأسطورة من احد الركاب ف طيارة
 كان الله يرحمه كمال الملاخ





والصورة دى عجبتنى قوى عن الأتحاد الاوروبى
 مستلهما اللى راسمها الأسطورة اياها
 :)


واخيرا خالص بقى ... اقول ملاحظاااااااااااااتى
 وهترفق بالبت أووربا قدر امكانى
 الواحد ميعرفش ظروف الناس برضو







اهم ملاحظة ان اوروبا دى طلعت بتاعتنا
 مش اتعملت عشان الاميرة
 والاميرة كانت من صور
 وصور من لبنان
ولبنان تبعنا 
يبقى قارة اوروبا تبعنا ..!



ثانيا
 ايه يا خويا طفاسة الرجالة دى ... !
يعنى عندك كل اللى عندك دا كله
وتروح تبص لآندوس الغلبان ف حتة اللقمة الموزة بتاعته
 #اخص



ثم يعنى خطفت منه البت
 قوم بدل ما تسيبه ف حاله يمكن يحب غيرها
 تقوم تخطف حياته كمان
ايه يا شييييخ هوه لا منك ولا كفاية شرك ؟؟



ثم انتى يا ست اوروبا
خلاص كدا قلبك حجر
مفيش دمعتين على فراق الواد الغلبان اللى جرى عشان ينقذك دا
 وقوام قوام وافقتى ع الموكوس زيوس !!



معاكى ان الأغراءات كانت كتير ولا تكاوووم
بس يعنى أعملى أى منظر عشان التاريخ
 وعشان لما اجى احكى حكايتك الاقى كلمتين كويسين اقولهم ف حقك !



ويعنى قيل على هامش الاسطورة ان الحاج أجنيور أبو الاميرة
 حاكم صور يعنى قعد هوه وولاده يدوروا ع البت اللى اتخطفت
ف سلقط ف ملقط ملقوهاش تانى


طب اهلك يا مفترية متبعتيش تلغراف يطمنهم
 بدل اللف ف الشوارع ومصاريف الميكروباس
 وشاى امين الشرطة بتاع القسم وعلب الكلينيكس لزوم العياط 
#اخص_تانى 



عموما يا ست آوروبا
 أحب أقولك ربنا يهنى الوغد بالوغدة
والندل بالندلة
 وآندوس دا غرق صحيح
 بس برقبة جوزك واللى يتشدلله .. هه



وخلاص كدا
 توتة توتة نخلص الحدوتة
عشان دمى فار وقططى نايمة 
ومش فاضيين يجروا وراه يصطادوه



ويارب تكون عجبتك الحدوتة
 يا موهى :)



Related Posts Plugin for WordPress, Blogger...
"حقوق الملكية والملوخية والمهلبية ... الخ
محفوظة للست شهرزاد وإياك حد يسرقها ويحاول يزعلها آغجر .. مفهوم ؟ "