الأحد، 28 أبريل، 2013

مصر فى كرت بوستال



كمان شوية ... تمشية بالعين .. وبس
حد عارف مين دا ؟
دا تمثال سليمان باشا الفرنساوى


ودا كان مكانه الأصلى ...
 ميدان سليمان باشا ... طلعت حرب حاليا .. وسط البلد 


دول فرق أفراح الفلاحين والغلابة بتاعت زمان


ودول برضو بتوع أفراح ..
بس شكلهم مدى على ريا وسكينة وحصب الله وباقى فريق عمل المسلسل
 و .. مش منظر فرقة بتغنى خالص ! 


حريم مصر الجدعة ف الفلاحين


ودول حريم مصر الجدعة ف القاهرة ..
عند سبيل محمد على بيقولوا فتاح يا عليم
 وعشا الغلابة عليك يارب


كارتيته البك او الباشا ... والسايس ... والأمشجية


الناس بتملى القدور بالمية ... من الحنفية العمومية


اللى بتكتب الرسايل .. من الحبيب للغالى
 يمكن القلب يطمن وربنا يقرب البعيد


ف عز مجدها وتمثال الملكة فيكتوريا على شط القنال


قطر اسكندرية القاهرة


ابو الهول


يمكن تكون حتة مشهورة دلوقتى ف المريوطية ؟




اللى م الزقازيق يقولنا .. الشوارع دى لسه موجود منها حاجة ؟


مسجد السلطان برقوق


مسجدا الرفاعى ... والسلطان حسن


طنطا وشالله يا سيد يا بدوى
 بس مش بتاع الوفد الوغد


والمدد يا طاهرة ... مسجد السيدة زينب


وهل تعلمون ان العتبة الخضرا كان اسمها أصلاااا
 .. العتبة الزرقا ؟


ويا عطارين دلونى ... الصبر اجيبه منين ؟
#اسكندرية_الماريا 




قلب القاهرة النابض بالاحداث والفتن والمؤامرات
 .. لقرون خلت .. القلعة


القنال


ايه اللى جاب القلعة جنب البحر
وايه اللى جاب النيل جنب الهرم
اهو جه زمان  وبدل ما نتفسح على يومين ونصرف
 نحط تمن الخلاط دا ف ده
 وأكننا مدفعناش حاجة


مينا اسكندرية 


مدخل الموسكى لا زحمة ولا قرف 


شارع باب الحديد 


الخليج المصرى 
سكن امراء المماليك والأغنيا والأعيان ع النيل


بياع السكاكين والحديد والخردة ..


السويس


بورسعيد 


بورسعيد تانى


بورسعيد تالت 


تمثال دييليسبس قبل أن يصبح أثرا بعد عين ..


كان واقف هنا


ف اسكندرية ... تمثال نوبار باشا .. الراجل الداهية


ثكنات قصر النيل
 كانت ف ميدان التحرير ومبقلهاش أى أثر
غير السيرة والحكاية وبس


خان الخليلى 


دار الكتب الخديوية .. بناها على مبارك ..
 والمعروفة حاليا 
 بدار الكتب المصرية بباب الخلق


ميدان الرميلة سابقا ... صلاح الدين حاليا
وقصاد القلعة دائما كان فيه سوق وتجارة وبيع وشرا و دنيا


شارع البورصة .... ف طنطا


شارع البورصة ف طنطا .. تاااانى ايه الجمال دا ؟
طنطا كانت حلوة قوى يا عيال
فيه حاجة لسه فاضلة م الحاجات دى ؟


شارع السيد البدوى ... طنطا 
والجامع باين من بعيد اهو


دا شارع عبد العزيز .. ؟!!!
حد يسلفنى مسدسه عشان انتحر 
وابقى ارجعهوله تانى #يالهوى


ودا شارع نوبار ف عابدين ... 
لأ انا كدا هعيط والنيعمة !!!


 طريق المريوطية


دا مش رجوع المحمل ... لأ لأ 
دا غالباااااا كان ف احد الموالد ودا الموكب بتاعه والله أعلم


و أبو ودان طويلة يحييكم من أمام قصر عابدين 
أصل  ف البلد وصوه يوصل السلام لمولانا 
ويمشى علطول ميقعدش


جزء تانى من قصر عابدين


فندق كونتينيتال ... بميدان الاوبرا
 #فندق_كنت_نينتك_ازاى_يعنى؟ 


احنا ما زلنا ف الاوبرا ... ف جنب منها .. عند الأزبكية
 اللى مفضلش منها غير الاسم
وحتة من الجنينة 


دا ميدان الازبكية ...
لأ انا هعيط بجد محدش يحوشنى


لوقتى هنروح الناحية التانية ... عند دار الاوبرا الخديوية
(اللى اتحرقت وربنا يحرقهم اللى حرقوها) 
و باقى تمثال ابراهيم باشا


 ميدان الاوبرا ... تانى


 ميدان الاوبرا ... تالت


 ميدان الاوبرا ... رابع 


شبرد ف جنب من ميدان الأوبرا 


قصر الخديوى اسماعيل على نيل الزمالك .. قصر الجزيرة
اللى بقى فندق عمر الخيام
 ثم الماريوت حاليا


دا قصر الجزيرة .. باين م الشط التانى
 وع الضفة التانية بلدنا بتغسل هدومها ف النيل يا سمعة


ومرة سمعوا السادات ف برنامج بيقول انه كان بيقعد ع الشط
اوقات يعد ف السفن اللى معدية الكنال آه والنيعمة


قهوة بلدى .. اسمها المؤيد
 تبقى اكييييد ف القاهرة الفاطمية وجنب باب زويلة
 #محاولة_للفكاكة_وكدا


كازينو الكورسال دا
كما تذكر المصادر انه كان ف شارع عماد الدين 


دا كوبرى قصر النيل القديم يا عيال
اللى عمله الخديوى اسماعيل وكان بينفتح 
وتعدى منه المراكب وكدا .. اهو


كوبرى قصر النيل .. 2


كوبرى قصر النيل .. 3


كوبرى قصر النيل ... المدخل وأسود أبو السباع 


ودى أول مرة بصراحة
 اشوف حد مصور او راسم كوبرى قصر النيل 
من الزاوية دى حلوة الصورة ومختلفة


مسجد النبى دانيال ... اسكنكرية الماريا


تمثال محمد على اللى ف اسكندرية
مش محتاجين طبعا اقول فين !!


دى والله أعلم كدا محطة القطر ف السويس ... وحد يصححلى 


دى مش محتاجة تصحيح بقى دى محطة مصر حضراتكم
باب الحديد سابقا ورمسيس حاليااااا


محطة مصر تانى .... كادر أوسع


محطة مصر .. تالت


مزيكا بيعزفها الجيش لرواد جنينة الازبكية .. آه والنيعمة
 الجيش زمان كان بيمزكنا
مش بيفشخنا


جامع سلار وسنجر الجاولى
وكنا حكينا حكايتهم قبل كدا فاكرينها ولاّ أجيب العصايا ؟!!!


مسجد الاخ محمد على باشا ... ف القلعة 


ودا منظره من بعيد 
بس سؤال جه ف بالى فورا .
هيا القباب بتاعته كانت خضرا زمان ولاّ ايه ؟


مدافع القلعة


ولو وقفنا جنبها هنشوف المنظر زمان كان كدا ... فاااااضى


وبما اننا جبنا سيرة الباشا الكبير ..
. فتخيلوا ان دى صورة محمد على .. ف شبابه 
#كان_قمر_الصراحة_وهبتدى_احبه_كدا 


متهيألى مصر الجديدة من أقل الاماكن اتغيرت ف معالمها
 دا اسمه شارع عباس
 جايز الاسم اتغير لما راح الخديوى
 لكن المكان لأ 


هيليوبولبس ايام ما كانت صحرا بقى .. وبيقولوا عليها واحة :) 


معرفش المكان دا ولا عندى معلومات عن حى مصر الجديدة
 بس سكانها أدرى بالمطرح وتغيراته 


نيل القاهرة ... زمان لا سور يحوشك
ولا حد يمنعك تتنسم هوا وتستمع بالمنظر 


طب الصورة دى اوحت لى ان اجد حلا لأزمة السولار
 اللى طلعت نفسية
 احنا نرجع نركب الكارو 
حتى ركوبة رومانسية والكل هيقعد جنب الشبابيك
 ومحدش هيتخنق من سيجارة ولا حاجة .. !


يا أسماعلاويييييية ... هذه بحيرة التمساح ... ! 


اسماعيلية تانى ....
تقريبا دا يبقى حاليا الشارع اللى ف مدخل اسماعيلية
 اللى قبل المحافظة عند بيت ديليسبس والله أعلم 


مكتوب ع الكرت .. المنصورة بس شكلها ثكنة عسكرية


قصر البارون امبان 


ودا قصر السكاكينى باشا .. ف الضاهر
اللى ف النص بعيد


دا مدفن الخديوى توفيق
 الظاهر الصورة دى كانت بعد موته علطول
 عشان المباخر والاهتمام والدلع ... #قُطع_وقطعت_سيرته 


دا مشهد عام
بس الملاحظ ان مئذنة الجامع الأزهر كانت بعافية حبتين !! 


المتحف المصرى .. قبل الأسوار والحراسة والهلما
 الناس ماشية قصاده عادى اهو جرى ايه ! 


بتوع الفوانيس وشادر زمان .. شبه بتاع دلوقتى !


واخيرا عشان نفسيتى تعبت 
 لما شفت كل الحاجات الحلوة دى ...
واللى بقت خراب  لكن فيه بارقة أمل
لأستعادة هذا المجد من تانى ... يعنى


بما ان اعادة اعمار البلد محتاج فلوس ..
والفلوس عشان تيجى لازم عجلة الانتاج تدور 
والسياحة ترجع ويبقى معانا ميزنية 
فأنى اقترح


تنشيطا للسياحة ... نرجع تانى نعمل كروت شيك ..
 وجميلة كدا توصف حال البلد 
وتشجع الأوجانب ييجوا يتفرجوا ع الاملة اللى احنا فيها
قوم عشان نعمل كروت مينفعش نكدب بقى
 يعنى هنصور حاجات مش موجودة ..
 ونعمل فوتو شوب ونزيف والحركات دى
ميصحش سمعتنا تبوظ كدا !!


احنا نصور حاجات واقعية .
من قلب النهضة كدا علطوووول
وانى لأقترح بما ان زماااان كانوا بيحطوا البشر العاديين ف الكروت موديلات وكدا ..
زى ما بيحطوا الفلاح .. والعسكرى .. وبياع الخضار .
. وحتى العيال احنا نحط صورة الريس ... 
عشان نعمل اكبر دعاية لمصر وللسياحة 


ومحدش يقول لأ
ومحدش يقول ميصحش
ومحدش يقول محدش هيشترى كرت زى دا 
ويبعته لحد ..
 الا يتسرع ويجيله جلطة !
 لأ خااااالص مش حقيقى 
وعيب عليكوا ...
طب الكلام دا حصل فعلا ... 
وبالدليل أدى واحد اشترى كرت زى كدا زمااان .. 
وانا مش بفترى على حد بقى هه


ahmedsaeed @ahmed__saeed
 دى بورسعيد , والهيئه باينه فى آخر الصورة


رَشا نُعمان @Elameera28 28 Apr
 بورسعيد بيوت الاجانب دي زي ماهي


رَشا نُعمان @Elameera28 28 Apr
 المشهد دة لسة موجود حتى الان مع اختلاف الزمن


mina gergis @minagergis
 الشارع ده دلوقتي زي شارع الشواربي كدا..
وطبعا متفيش اي حاجة من المباني دي لسة موجودة.. كلها بقت كتل اسمنت



Related Posts Plugin for WordPress, Blogger...
"حقوق الملكية والملوخية والمهلبية ... الخ
محفوظة للست شهرزاد وإياك حد يسرقها ويحاول يزعلها آغجر .. مفهوم ؟ "