الأحد، 2 يونيو 2013

الصمّة وريا والـ 100 جمل





الحدوتة النهاردة عاتيفية ولأصحاب القلوب الرحيمة
 اما بتوع السياسة والتاريخ فيمتنعون
ويخليهم ف الدسطورية وحكمها
 براحتهم مش طالبة نكد


حكايتنا واحدة من قصص الحب الكئيبة اياها
اللى بتبتدى بالحب والغرام والهيام
وتنتهى بغم وموت
يتخللهم شوية شعر وغزل وحلويات ف الوسط كدا 
تشرح القلب



والبطل شاعر وحبيب وفارس من قبيلة قشير
 اللى حكينا عنها قبل كدا بتاعت الحريم الجدعة
والرجالة بتوع عيب اما تسيبنى قاعد وتقولى حمشى انا



وزى اغلب العرب بقى ...
المساحات ضيقة والدنيا كلها قد ايه
ومحدش بيلاقى واحدة يحبها الا غالبا بنت عمه .. !
وبطل الحدوتة كان اسمه .. الصمة


ومحدش يقولى ليه كدا
 ابوه وامه اللى سموه مش انا 
#سموه_مش_سمموه



المهم الصمة كعادة شباب العرب
 حب بنت عمه
الأنسة ريا العامرية 
وغرق ف الحب لشوشته
ولأنها قصة مبتدية منذ الطفولة اول ما رجله شالته
راح لعمه علطول



- يا عمى جوزنى ريا وانا هشيلها ف عينينا
 العم بصله شزرا وجّز على سنانه وقاله
 - اومال ابوك مجاش معاك ليه ؟؟!!


ولنا .. هنا .. وقفة
عشان الظاهر والله اعلم ان الأخوين
ابو الصمة وعمه كانوا قارشين ملحة بعض
وفيه بينهم مشاكل متعرفوش ايه وليه وازاى ..



قوم العم لما شاف ابن اخوه جاى يطلب ايد بنته
جاتله الفرصة ع الطبطاب يقرف ف الاخ
عن طريق ابنه
والصمة يا نضرى مكنش فاهم ف الاول القصة دى!



المهم الصمة بكل براءة قال للعم انا جاى فتح كلام
 واشوف طلباتك بس بابا جاى معايا النوبة الجاية
وهوه ونينة ... عادى يعنى
 #غلبان_يا_صمة



العم قاله ماشى 
عاوز مهر للبت مش عارفة كام جمل كدا .. تقريبا 100
 قوم الصمة سكت لحظة
 وبعدين قاله حاضر
 وخرج من عنده راح للأب ف لهمفة


وحكاله انه راح يطلب بنت عمه
وسأل العم اللى قاله ع المهر
طبعا الاب انفجر ف وش ابنه وقاله 100 ناقة ليه
 وبتاع ايه ولأ مش موافق ع الجوازة دى !


الصمة مسكتشى طبعا
وراح يسوق على الاب كل المعارف والاحباب
وقصة حبه لريا كانت معروفة ف كل حتة
والناس متعاطفة معاه 
كلهم راحوا للأب يقنعوه


بعد جدال ومناقرة .. قال مش هدفع الا 50 ناقة بس
 وان كان عاجب
 اهل الصمة واصحابه اتلموا
وقرروا يكملوا ال50 ناقة التانين وكتر خيرهم 
#ناس_كومل





القصد
الصمة لم الـ100 ناقة وراح لعمه وكله فرحة وسعادة
وقاله يا عمى الابل اهى زى ما طلبت
 وهندخل امتى وكدا ؟ 


العم شاف الأبل اتعفرت وقعد يدور على اى حاجة يقولها
 أصل الناقة دى حولانة
والناقة دى لونها اصفر فحلوقى
والناقة دى بتبصلى بصة مش حلوة .. الخ
المهم قعد يطلع ف المهر المطلوب القطط الفاطسة
و قاله ابوك عنده ناقة شكلها مش عارف ايه
 وبدلها بواحدة من دول 
الواد راح للأب اللى رفض طبعا


وقعدوا بالمنظر دا ايام واسابيع
يلعبوا بالصمة الكورة
وكل طرف يغتت ع التانى
ومش مهتمين بمشاعر الغلبان العشقان الولهان 
اللى طق من جنابه



وف يوم جاب آخره معاهم راح فاكك سراح الأبل
 وخد ف وشه
 وهج على ثغر من الثغور البعيدة


- ارجع يا صمة عيب عليك
- لأ مش راجع وخلينى هنا ف حالى
احسن ما ألعب ف وش ابويا وعمى بمفك
واغلط معاهم وسيبونى ف حالى


وفعلا سابوه لحد ما يهدى


وبعد شوية .. غضبه انقشع
وفجأة ريا وحشته قوى
 وقرر يرجع يلم التعابين
 ويصر على ان قصة حبه دى تكمل مهما كانت العراقيل  وهتجوزها يعنى هتجوزها !



حننت إلى ريّا ونفسك باعدت
 مكانك من ريّا وشعباكما معا
فما حسنٌ أن تأتي الأمر طائعا
 وتجزع إن داعي الصبابة أوجعا



وقرر الصمة يلم الدور ويرجع
 بس مخدش باله من حاجتين مهمين جدااا
 اولهم ان عمه راجل رخم ومش هيسكت
 وتانيهم .. ريا نفسها اللى هج وسابها فجأة



والحاجتين دول كان مربوطين ببعض
 لأن الروايات بتقول ان الأخت ريا
الظاهر شالت ف نفسيتها ان الصمة طفش كدا وهج
 من غير إحم ولا دستور ولا حاجة


بس ريا كان مقدور على زعلها
 انما المشكلة كانت ف الكهين السوسة غراب البين أبوها
.. اللى قرر ف غياب الصمة
 انه يجوزها لواحد اسمه عامر ..!


ومنعرفش عن العريس دا غير ان اسمه عامر بن بشر
وانه كان قصير ومش مسمسم يعنى .
هذا والله اعلممممممم



لأن اللى هيقولنا على مواصفاته
الصمة نفسه اللى ف لحظة تجلى ريا هتوحشه
 ويقرر يرجع عشان يكمل مشروع الجوازة
اللى ابتداه مع عمه وابوه !


وراجع الشاب لا بيه ولا عليه
وداخل ع القبيلة بتاعته
وبيسأل عن ريا
 قالوله اتجوزت حضرتك
والولا كان هيسقط من طوله كمداااااااا


وبقى هيتجنن طبعا
 وازاى عمى يعمل كدا
وابويا سكت ليه
 ومحدش قالى ليه .. الخ الخ
 - وجوزوها مين ؟
 - واحد اسمه عامر 
راح الصمة فاقعه بيت معتبر


فإن تنكحوها عامراً لاطلاعكم ... إليه يدهدهكم برجليه عامرو


البيت بيلقح على عامر
 وممكن جدا زى ما الكتاب اللى بقرالكم منه ما بيقول
 لا يكون عامر دا قصير ولا حاجة
غيرش بس قلب الصمة المولع من الغيظ والحزن



وطبعا عامر مش هيقعد يتهزأ كتير ف المنطقشة
راح واخد ريا مراته وساب القبيلة كلها وقعد بعيد
 الصمة اتجنن اكتر ومبقاش عارف يعمل ايه !!



وابوه حاول يصلح الموقف
 وهوه والام والعشيرة جوزوه لواحدة اسمها جبرة
لكن الست جبرة كما يقول الكتاب
 مجبرتش قلبه المكسور بما يكفى
 ويمكن العكس!


تحصل بينهم مشاكل للسما ويتخانقوا طول الوقت
ويكتبلها : ..
 كلى التمر حتى تهرم النخل واضفرى
 خطامك ما تدرين ما اليوم من أمس 

#يا_ساتر_عليك



وبما انه هربانجى أصيل ... يقرر يهرب ع الشام
ويطفش من كل حاجة ويقعد بقى هايم على وجهه
 يشعر ف الست ريا الحبيبة المفقودة 


وقعد يغنى ع الأطلال ويحب ف ريا 
والمغنيين ياخدوه شعره



بنفسي تلـك الأرض ما أطيـب الربـا
وما أحـسـن المصطاف والمتربعا

وأذكـــر أيـــام الـحمى ثم أنثـني
على كبـدي من خشيـة أن تصـدعـا

فليـسـت عشيات الـحمى برواجع
 علـيـك ولكن خـل عيـنـيـك تـدمـعـا

 أمـا وجلال الله لو تذكـريـنـنـي
كذكريـك مـا كفـكـفـت للعـين أدمـعـا

لعمـري ولقـد نـادى مـنـادي فراقـنـا
 بتشتـيـتـنـا فــــي كــــل واد فـأسـمـعـا

 ولحد آخر بيت اللى يوجع كل قلب
 فارق حبيبه بجد ...


كأنا خـلـقـنــا للنوى وكأنمــا
 حــرام عــلى الأيام أن نـتـجمعـــــا 


وست الحزن والجمال غنتها ف موشحاتها الاندلسية
 مع انها لشاعر من العصر الاموى
ومعرفش ليه ؟
بس قولى يا فيروز واشجينا
هنا 


والوقت يعدى والصمة هيتجنن على ريا
وعاوز يشوفها
ويعرف أخبارها ويكتب أشعار
وتتغنى 
ويتمنى لو انها بتوصلها 
#يا_حرام_اتشحتف_قوى



شُهُورٌ يَنْقَضِينَ وما شَعَرْنَا .... بَأنْصَافٍ لَهُنَّ ولا سَرَارِ
فأما ليلهن فخير ليل .......  وأقصر ما يكون من النهار



وزى الشعرا ف زمانه وقبل منه ومن بعده
 ينقهر اكتر واكتر ويقطع زاد ومية
 لحد ما يلاقوه ف جنينة ف حالة يرثى لها 
وبيطلع ف الروح 
:(



ويموت
و محدش قالنا بقى ريا لما عرفت بموت ابن عمها
 حزنا على فراقها
هل يا ترى زعلت عليه ولا عادى ف المعادى ؟!!



فوا حسرتي لم أقض منك لبانة .. ولم أتمتع بالجوار وبالقرب
 يقولون هذا آخر العهد منهم .. فقلت وهذا آخر العهد من قلبي



وتوتة توتة خلصت الحدوتة
 وطبعااااااااا ليا ملاحظات 
وبالهبل 
أصل انا احب ألاحظ قوى
 :)



1) بادىء ذى بدء .. اهل الصمة وريا دول 
عاوزين الدبح الحقيقة
طب انتا وهوه متخانقين وغلاويين ...
 العيال طيب ذنبهم ايه والنبى ؟؟؟
#ومنكو_لله_جننتوا_الولا





2) 100 ناقة مهر .. لييييييييه
هيتجوز بنت رئيس مراجيح مولد النبى
ايش حال ما كان ابن اخوك يا وغد
ويا ترى طلبتهم من عامر ودفعهم بقى 
ولا القرف دا كان لناس وناس ... ؟




3) العرب زمان كانوا رزلين قوى بجد
يعنى يرفض يجوزها لشاعرعشان قال فيها شعر
او رافض لأى سبب
 وبعدين يجوزها لحد غيره
 فيكسر قلبين واكتر



الحدوتة دى شبه قصة قيس لبنى
 وكثير عزة
 وعروة وعفرا وعشرات غيرهم
كل واحد معرفش يتجوز حبيبته وافترقوا
 قوم كل نفر أتعس اللى اقترن بيه بعد كدا
يعنى الست جبرة اللى اتجوزها الصمة
ذنبها ايه .. تتعذب بحب جوزها لواحدة غيرها 
وذنبها ايه نقرى بيت يتكلم عنها بالوحاشة دى ؟؟؟



ولا الولد عاش وكمل حياته بشكل طبيعى
 ولا البنت حياتها استقامت
وفيه قصص كتير الحبيبات لما عرفوا بموت العاشق
 ماتوا حزنا عليه 
#لييييييه
ليه ام الغلاسة دى صحيح .. ؟!!!


4) وكلاكيت العشرتاشر مرة
صلاح نظمى بتاع كل فيلم دا اللى ييجى يتقدم للبنت
وحكايتها اصلا الدنيا كلها عارفاها
وانها بتحب ابن عمها 
وبيحبها !
يا رخم يا غتيت يا عامر يا بن بشر
يلى عارف انها مش بتحبك وبتحب الصمة
بتتقدم لها ف اللحظة الزفت دى ليه
و بتتجوزها ليه ... كنا ناقصينك ؟!!!



يعنى جبرة وغلبانة
وجوزوها غصب عنها الصمة 
انما انتا عذرك ايه ... يا سُهن يا ابو دم يلطش 
وتستاهل البيت اللى هزأك فيه العاشق بتاعنا !!


وصحيح الحب بهدلة كما يقول العلامة شكوكو
بس البهدلة بتاعت الحبيّبة دى جت بفايدة
وتخليد واشعار زى الفل والورد والياسمين 
#آه_والله



وبيت الشعر بتاع

 كأنا خـلـقـنا للنوى وكأنما .... حـرام على الأيام أن نتجمعـــــا

 ... من اروع ما الواحد قرى 
وعاش كمان



وافتكروا وانتوا بتسمعوا الغنوة بتاعت فيروز
 من هنا ورايح بقى
 ان الكام بيت دول مش جايين ببلاش
 دول متعوب فيهم
 ومدفوع فيهم روح وعذاب ولوعة


وتوتة توتة


آه قبل ما أنسى حدوتة الليلة دى
 من كتاب "مجانين الحب العربى " لأحمد سويلم



تصبحوا على ألف خير ...

Related Posts Plugin for WordPress, Blogger...
"حقوق الملكية والملوخية والمهلبية ... الخ
محفوظة للست شهرزاد وإياك حد يسرقها ويحاول يزعلها آغجر .. مفهوم ؟ "