السبت، 15 يونيو، 2013

ســـلو بـلــــدهم كــــدا .. !!!!





نبتدى 
بس بادىء ذى بدء
أحب أنوه ان حدوتة النهاردة لـ +177
والأصغر من كدا ميقراش بقى عشان الروقابة



والحكاية تندرج تحت قصص الحب الكئيبة
 اللى بتحفكم بيها من حين لآخر
بتاعت الشعرا المهاويس والحب اللى مبيكملش دا
ويشحتف قلبنا وهكذا



والقصة من كتاب الأغانى
 بتاع الحاج أبو الفرج الأصفهانى
 اللى مليان حكايات فُللى قوى
لو يتعمل منها مسلسل هيقش كل مسلسلات رمضان 
من الهلس اللى فيه والنيعمة !!



والحكاية هتبدأ من قبيلة بنى شيبان
 اللى سكنوا قرب البحرين (حاليا) 
واستوطنوها وكان منهم الوثنى
ومنهم النصرانى 
وكان فيهم شعرا كتير
زى الأعشى و طرفة بن العبد
وعمرو بن قميئة والمرقش الأكبر و المرقش الأصغر
 والأتنين الآخرانين دول اللى يهمونا ف القصة
المرقش الاكبر 
والأصغر



المرقش الاكبر دا كان شاعر قيمة وسيمة
وفارس همام مرة خرج وقتل أسد ونمر
 ورجع بجلدهم على كتافه
قوم لقبوه بالمرقش نسبة للون جلد النمر يعنى


طب عنى نفهم من القصة دى انه كان راجل وجدع
 وكعادة الشعراء الحبيبة هام ف بنت عمه اسماء
وابوها شأن كل الأبهات وقتها غلس وغتت وبوظ الجوازة


والمرقش مات صريع العشق
بعد ما حبيبته جوزوها لغيره بعد ما خدعوه اهلها واهله
 وقالوله ماتت أفلام كدا زرقا 
المهم الراجل مات حبا
 ماشى؟



قوم ابن اخوه .. كان شاعر برضو
ونسبة لعمه سموه المرقش الأصغر
الواد كان شاعر متين
 وكان ابن حسب ونسب وفارس
  وزى القمر وحليوة وكدهون



روح يا زمان وتعالى يا زمان
والمرقش الأصغر كان بيرعى الابل بتاعته
شاف بنية وسألها
 - اسمك ايه
 - هند بنت العجلان
 - تحبينى 
- احبك 
- اذن هيا بنا 
وبس  خلصت !



وغرق الجوز ف بحور العسل
المرقش وكان واثق من نفسه فارس وشاعر وكدا
اما هند فكانت جارية
و بالتالى محدش وقفله من اهلها ... وغتت كالعادة



بس وقعدنا كدا شهور هند بتحب المرقش
 والمرقش بيحب هند
ومش بس كدا دا هنودة كانت بتعزمه احيانا
عندها يبات ويريح العضمتين اذا إراد يعنى 
#حب_فول_اوبشن


وهتسألونى بتعزمه فين دى ؟
 هقولكم أنا سعيدة انكم سألتونى السؤال دا
 عشان كدا هنقفز إلى الشخصية التالتة ف حكاية الليلة
 وهى الأنسة فاطمة



هند كانت جارية عند المزامزيل فاطمة
فاطمة مين ؟
فاطمة بنت المنذر ؟
المنذر مين ؟
ملك الحيرة رقم 17 ؟
 فين الحيرة دى 
ف العراق حضراتكم 


والمناذرة دول اللى المنذر الملك السبعأشر منهم
حكموا لسنوات طويلة ابنا عن أب عن أخ عن أبن عم
لحد ما بقوا 20 ملك ودخلوا حروب وهلما كدا


 المنذر ملك الحيرة دا كان عنده بنت اسمها فاطمة
 وفاطمة كانلها قصر ف كاظمة مخصوص تقعد فيه
 وابوها كان مشدد عليها قوى قوى قوى خالص


وبيقولك آل الراجل يا خويا كان محرج عليها
 حد يخش وحد يخرج
 ولا فيش نفر له الأمكانية دى غير مين ؟
أيون ..
الاخت هند بن العجلان جاريتها
حلو ؟



الأب الملك كان حاطط حراسة مشددة ع القصر
 ومفيش راجل غريب يقدر يخش من تحت مناخيرهم
 ويوصل لمخدع الأميرة فاطمة 
اما الجوارى بقى
 فبراحتهم !!



وصحيح هند كان عايشة قصة حب مع المرقش الأصغر
 بس هيا كانت عايشة حياتها عموما معاه ومع غيره
 وكان عادى انها تعزم أى حد عندها 
عشان تروق شوية
والحراس واخدين على كدا
والمزامزيل فاطمة كمان متعودة على كدا


قوم ف ليلة من ذوات الليالى هند عزمت المرقش
ييجى يبات عندها
 والجدع جه متأخرشى
والليلة خلصت والشاب خد واجبه وروح من عندها
وهند دخلت لستها فاطمة شكلها مش نايم ومرهئة
 وباين انها مش تمام
فسألتها مالك ؟؟؟



هند ردت .. أصل البوى فريند بتاعى
كان سهران معايا
فاطمة قعدت تضحك وبعدين قالتلها تعالى جنبى
 واحكيلى عنه 
هند راحت قاعدة وحاكية كل حاجة !!


حكت عن وسامته وجماله وشياكته وفروسيته
ونسبه وسط العرب
 وحكت كمان عن شعره وقصايده اللى كتبها فيها
وحكت بالمرة عن امكانياته ف الحب والغزل والذى منه !


طبعا حد دلوقتى هيقولى ان المزمزايل فاطمة اكيد
هتنكسف ووشها يجيب ألوان
 وتتخض وتتخرع وكدا
أقولكم ابدااااااااااا
 وانتوا ناس طيبين والنبى !



دا فاطمة بنت المنذر وشها مكشوف
وهتكمل فاصل الشغف
وتانى يوم لما المرقش الأصغر هيزور هند
هترجع هند لستها بحكاية جديدة عنه
وفاطمة وقتها هتتهبل رسمى !


وتقولها يا هند .. انا عاوزة اشوف الشاب دا بأى طريقة
 واتصرفى !!
 ولنا ... هنا .. وقفتين 
مش وقفة واحدة 
ماشى ؟


أول وقفة ...
ان فاطمة بكل بجاحة بتطلب الطلب دا من هند
 يعنى ادينى حبيبك يا ست عادى كدا
 ايه هوه بصلاية هنستلفها من عند الجيران مثلا .. ؟!!!



تانى وقفة بقى
 ان الأخت هند برضك عادى خالص كدا اتنازلت عنه
وتلاقيها قالت اكل العيش مّر
ولو رفضت هنطرد او اتحبس فالطيب أحسن
 واجيبهاولها ماشى .. وانشالله تطفحه !



المهم ان الموقف الآن كالتالى
فاطمة بنت الملك المنذر عاوزة تشوف المرقش الاصغر
 والقصر عليه حراس
 ومينفعش حد غريب يدخله والا الملك المنذر عرف
ومينفعش فاطمة تخرج برضو
والا ابوها عرف
فيبقى ايه العمل ؟


العمل كان عمل هند .. يخربيت ابوها الله يرحمه بقى
مطرح ما راح 
عشان هتعمل خطة عجب
وانا بقراها مقدرتش أبعد عن ذهنى لحظة مشهد
 تهريب الفرسان التلاتة لفيليب ولى العهد
 ف الفيلم دا





فاكرينه ؟
 لما اتنكر واحد فيهم ف زى راهب
ولف جثة حوالين وسطه ودخل لفيليب
ولفه حوالين جسمه برضو
 وخرج بيه قصاد الحراس فاكرين الحكاية دى ؟


أهو هند عملت كدا بالمللى .. آه والنبى
 راحت للمرقش وقالتله ستى عاوزة تقابلك
مقلتش طبعا ان عينها منه ولا نيلة
قالت بس .. عاوزة تتعرف عليك
ومنقدرش ندخل قصاد الحراس عشان ابوها
والنوظام دا
 وايه رأيك ؟



حد يسالنى بقى
ما هو موقف المرقش الأصغر من طلب الاميرة ؟
 أقولكم احنا ف العصر الجاهلى دلوقتى خلوا بالكم
زائد ان صاحبة الدعوة بنت ملك ..



وبنت الملك باعتله مرسال وبتقوله
 يا سمباتيك خالص يا مهندم .. اسمح وزورنى الليلة يا فندم
 قوم المفروض يزورها الراجل بقى 
ولا ميزورشى ؟؟؟


طبعا يزور ورجله فوق رقبته .. هوه يطول ؟!!
 المهم الست هنودة خدته عند القصر
وقبل الأبواب راحت شايلاه على ضهرها
ومغطيها بالعباية وداخلة !!


الحراس شافوها .. مخدوش وادوا
غير انهم اتريقوا شوية انها كلبظت حبتين
 واكل القصور بان عليها وبس كدا 
#جاتكو_خيبة_على_خيبتكوا



وبس عبر المرقش الأصغر
من بوابة القصر الالكترونية من غير ما تصفر
 :)
ودخلت هند بيه على مخدع الاميرة فاطمة
 وبعدين خرجت وسابتهم
 #تيييييييييت_ومش_هعلق_بقى



وبس مفيش داعى أكمل ماذا حدث
اذ ان المزمزايل فاطمة بنت الحسب والأصول
 استقبلت المرقش الأصغر أيما استقبال سبع نجوم ودلع 


والمرقش الأصغر ما صدق وبقى معاها ومتدلع
 فقعد يستخدم كل جاذبيته
 وقعد يقول ف شعرطول الليل مدّح
طول الليل يشعر لما انقطع نفسه 
#بيتعبوا_الشعرا_دول



والصبحية يا خويا جت ست هند
 وشالت الشاب بنفس الطريقة السابق ذكرها
وخرجت بيه من تحت مناخير الحراس
 وعاتى خالص ولا الهوا 



وطبعا اللى لقى مسخرة ومتمسخرشى .. يبقى حرام عليه
اللقاءات دى اتكررت
وفاطمة والمرقش وقعوا ف الغرام لشوشتهم
وهند بتقوم بشغلانة المواصلاتى


والملك المنذر الغلبان اللى قاعد ف قصره
 كل يوم يبعت مرسال يسأل الحراس الواقفين ع الأبواب
مين دخل ومين خرج
يقولوله مفيش غير هند بس 
o.O


واللطيف بقى ف الحكاية دى
 ان الحراس بلغوه ان هند تخنت حبتين
وان أثر رجلها ف الرملة بقت غويطة
 فالمنذر قالهم لازم حملت من ورانا ولا حاجة
 #هع_هع
الراجل دا صعبان عليا والنيعمة
مسكيييين



 قصره الليالى الحمراء توالت
والمرقش وفاطمة زى الورد ع الفل
والشاعر بقى يغيب عن الرعى لأيام وليالى
أعز أصدقائه كان اسمه عمرو بن مالك .. استعوقه
ولما قابله سأله انتا بتروح فين يا عم ؟
 المرقش كان بيثق فيه جدا 
وبيعتبره تؤام روحه
 فراح حاكيله



المرقش وعمرو كان أعز اصدقاء زى ما قولنا
وكانوا شبه بعض جدا ف الشكل
واحيانا الناس مكنتش بتفرقهم عن بعض
 عمرو لما سمع الحكاية قعد يضحكككككك


المرقش قاله بتضحك على ايه
عمرو رد انه مش مصدقه
وازاى بنت ملك الحيرة شخصيا تبصلك انتا
وتروحلها اوضة نومها كماااان ؟!! 
وانتا شارب ايه حليب الناقة كان حمضان الظاهر 
وقعد يتريقأ بقى


قوم المرقش الأصغر أتغاظ جدا
وقاله اخليك تصدق ازاى ؟
عمرو قاله بسيطة :
انا شبهك ومحدش بيفرقنا عن بعض سبنى اروحلها بدالك
ومحدش هيعرف !!


حد طبعا من آخر توتير هيزعق بعلو صوته دلوقتى
ويقولى بكل ثقة ايه المسخرة دى
أكيد المرقش موافقشى
وغزّ عمرو دا بمطوة ف جنبه 
او ف حتة حساسة ولاّ حاجة!



هرجع تانى وأقولكم انتوا ناس طيبييييييييييييين والنيعمة
هوه الشهادة لله
وكما يذكر الأصفهانى .. المرقش تردد
حلوة #تردد دى
 شديدة جامد يعنى



وبعدين تحت ضغط والحاح عمرو صديق العمر
 انضطر يوافق عشان بس
 يثبت لصاحبه ان واد حبيّب
 وحبيبته تبقى بنت ملك
ومحدش هيعرف غيرهم وكدا 
#شوف_ازاى



وبعتت فطومة للمرقش تقوله وحشتنى
و تعالالى الليلة دى يا قشقش
مستلطخا الحرس كالعادة وهند هتساعدك زى كل مرة  


والمرقش قبل المعاد ادى هدومه لعمرو صديقه
عشان يلبسها 
وخلاه يخبى جزء من وشه 
وراح عمرو ف المكان اللى المفروض
 المرقش يستنى فيه هند
 وفعلا لقاها منتظراه
واول ما شافته قالتله يلا .. تعالى 
وشالته على ضهرها كالعادة 
-.-


وبس قالك قشطة كدا
هند دى معرفتنيش .. عقبال ستها فاطمة بقى !
 وراحت هند بالحمولة ع القصر وعدت البوابة
وراحت بالمخفى على اوضة الاميرة 


ودخل عمرو متخفيا ف ملابس المرقش الأصغر
 على فاطمة اللى كانت موطية نور الشمعة شوية
وضوءها كان خافت
#رومانسية_ومسخرة_وكدا 
وقالتله تعالى جنبى ..


وسى عمرو ف لحظة نسى كل حاجة
نسى صديق عمره المرقش
ونسى العهود والمواثيق
ونسى نفسه قصاد جمال فاطمة
وراح طالع جنبها ع السرير
وعادى خالص !!!



وبس تعالى ف حضنى ..
حاضر يا ستى بس الصبر لحد ما أقلع العباية
والبلاوى اللى تحتها
وزى زيبة ف سنبل بعد المليون
قلع ميت حاجة لابسها
 وياريته ما قلع !!


لأنه كان عامل زى الاخ حسين فهمى من غير قميص
عمرو كان عنده شعر كتير وغابات السافانا كتير كتير كتير
 فطبعا الموكوس المرقش مكنش شرحو
فاطمة شافت المنظر 
 أتخرعت وراحت مصوتة !!!!



ومعرفش جابت منين النيفس الحقيقة بس
قالت ف لحظتها:
 قبحك الله يا كذوب وقبح ... سرا كان بيني وبني غادر
 ألا قبحاً لخادع ومخدوع ... ومغدور و غادر


وطبعا مرضتيتش تسيح لنفسها وتنده الحراس
 راحت نادهة لهند وقالتلها تعالى شيليه من هنا
 تشيل مين ؟
سى عمرو اللى كان متكوم زى الفار المذعور ف ركن !



وقام زى الكلب وشه ف الأرض
 وخرج على ضهر هند لحد برا
واول ما وصل لمكان آمن جرى بسرعة على صديق العمر 
المرقش الأصغر اللى اول ما شافه فهم علطول الفولة!



يعنى راجع بعد كام ساعة .. يبقى انكشف وعرفوه
والمرقش الأصغر بيقولوا عض صباعه
وقطعه من شدة الموقف
عارفين الجملة البليغة اياها  دى ... بتاعت 
وعض بنان الندم


طبعا مفيش داعى أقول ان فاطمة بعد الموقف دا
قطشعت علاقتشها بالمرقش الأصغر
والجدع بقى هيتجنن عشان يصالحها 
وهيا تقول أبضنننننننننننننن


وقعد المرقش بقى يكتب ف الشعر ويسترضيها
 ويطلب السماح وهيا متربسة ولا يمكن
ملهاش حق أخص عليها ازاى صحيح كدا ..!! #دلع_حريم_مرىء



أفاطِمَ إنَّ الحُبَّ يَعْفُوعن القِلى ويُجْشِمُ 
ذا العِرْضِ الكرِيم المَجاشِما
ألا يا اسْلَمي ثمَّ اعْلَمِي أَنَّ 
حاجَتِي إليكِ فَرُدِّي مِنْ نَوالِكِ فاطِما
أَفاطِــــمَ لَوْ أَنَّ النِّســــاءَ بِبَــــلْدَةٍ
وأَنْتِ بأُخْــرَى لاتَّبَعْتُكِ هائِمــــــــــا 
#المرقش_الأصغر


بس وقعد يقول ف شعر وهيا تنفضلّه
 لحد ما أبوها سمع بالأشعار دى
والدم جرى ف عروقه
 آل ازاى الوغد دا يقول ف بنتى شعر ويشبب بيها وكدهون !!


ويشبب بيها ايه بس يا حاج اللى زعلان منها دى
 دا الشاب عمل حاجات أنيل من كدا
 بس انتا اللى مش واخد بالك
يلا سيبوه محدش يقوله حاجة أحسن !


وملك بقى وميصحش كدا
ولا يسلم الشرف الروفيع من اللى اسمه دا .. الأذى
وهاتولى المرقش دا عشان هدبحه
المرقش الأصغر سمع التهديدات راح مزوغ بعيييييييد


والملك المنذر مات بعد القصة دى بشوية
وخلاص الموضوع وقف على كدا
 والمرقش الأصغر رجع تانى بعد الخطر ما زال
وحد يسالنى فطومة جرالها ايه؟
أقولكم معرفش .. المصادر مجبتش سيرتها
ولا قالت جرالها ايه بعد القصة دى
بس يعنى واضح انها قادرة
وميهمهاش حاجة وانا سخصيا مش قلقانة عليها !



ودايما الراويات بيبقالها شخصية محورية
تدور حواليها الاحداث
والمرقش الأصغر كان هوه الأهم بالنسبة للأصفهانى وغيره


وتوتة توتة خلصنا الحدوتة 
وندخل ع الملاحظاااااااااااااات بقى



1) الحدوتة دى من العصر الجاهلى
 فمعلش مش هنركز قوى ف أخلاقيات الناس
اللى كان بأستك دى .. عشان يبدو ان دا كان سلو بلدهم !!!


2) وواضح فعلا انه سلو بلدهم لأن الجارية هند
كانت عايشة حياتها والحراس شايفين وموافقين وساكتين
 ومحدش جه جنبها ولا عكنن عليها خالص البتة 
حتى الملك نفسه ... !!


3) يا ختشى طب سلو بلدهم وهنعديها
بس  دا كمان ماشى على بنات الملوك برضك ؟!!
 يعنى المزمزايل فاطمة عملت كدا ليه ؟
 مفيش عرسان 
مفيش أدب 
مفيش خشا
مفيش احترام لأبوها طيب ؟


ودا هيقودنا لرقم
4)
 أبوها الحاج المنذر لما عمل فتك وحبس البت ف قصرها 
متصورا انه بيحميها
 لأ وموقف حراس و بيبص ف الأثر ف الرملة
طب أدى الحكاية جت بالعكس اهى !
ويا أخ منذر اللى عاوز يعمل حاجة بيعملها !





ويحضرنى هنا قول الخالة نوسة 
لحاتم عن أخته
البت دى ملهاش ف الحبسة .. لو انحبست هتتعب



5) بالنوسبة للاخت هند ..
أنا والله متفهمة موقفها
هيا أصلا محبتوش ومش فارق معاها
بس اللى مستغرباله الاخ المرقش نفسه
 اللى نقل من واحدة لواحدة دون أن يرف له جفن ... !!


طب الجارية وبتروق نفسها ف أوقات الفراغ
 انتا سعادتك كشاعر ومبهدلنا شعر وحب وكلام فخيم كدا
 موقفى يبقى ايه لما أعرف ان كله هجايص ف هجايص ؟!!!
ودا هينقلنى لرقم


6)
 آل انا لما شفت بيت الشعر وفيه اسمى انشكحت قوى
 وقولت يااااه حد بيتغزل فيا
قوم لما أدعبس الاقى مناسبة القصيدة نيلة وهباب  كدا ؟!
#منك_لله_آوغد



7) هما العرب مالهم مواثيقهم وعهودهم كانت احيانا
على حاجات ضد الأخلاق كدا ؟!
 دى تانى قصة الاقى فيه اتفاق رجالة .. 
وميطلعش رجالة خالص !!


يعنى ايه تدخل صاحبك على حبيبتك
 وأصلها مش هتاخد بالها
 ليه يا بابا فاقدة الأهلية
ولا أنثى الغوريلا ف موسم التزاوج
ومش هيفرق معاها أى ذكر معّدى ف المنتشقة ..  ؟!! 
طب حتى الحيوانات بيعرفوا بعض بالريحة يا أخى .. !
#مش_فهماك


8) الاخ عمرو دا ايه ؟
ايه كم السفالة والأنحطاط دا ؟!
ايشال ما كان دا صديق عمرك يا نطع
وهوه صحيح الغلطة مش غلطتك
 بس تستغل الموقف للدرجة دى #يا_اخى_كن_حقيرا_ولا_تكن_حقيرا_جدا



9)الحيرة ف زمن المناذرة كانت قبلة الشعراء والادباء
 وكانت زاهرة و بديعة
لكن زى كل الممالك والدول انهارت
وفاطمة .. أبوها كان من اواخر العهد دا


وانهيار الدول فعلا مرتبط بأنهيار أخلاقها
 خصوصا اخلاق الملوك
ومن ف قصور الملوك بالتبعية
 اللى لما هما كدا فما بالك بالرعية 
#واذا_كان_رب_البيت


وهييييييييييه
يلا بخاطرها امك 



وتصبحوا على ألف خير



==========================


خواطر شابة @nacnajiba 
 ايه الناس اللارج دول
 من الاب للبنت للحبيب للحراس للجارية للصديق
 يا قلب لا تحزن


Ghadoshhhhhhh @BellaDonna59 
 احب انا الستات المنفتحه هههههههههههههه


Related Posts Plugin for WordPress, Blogger...
"حقوق الملكية والملوخية والمهلبية ... الخ
محفوظة للست شهرزاد وإياك حد يسرقها ويحاول يزعلها آغجر .. مفهوم ؟ "