الأربعاء، 5 يونيو، 2013

الظــافـــر و خلفــــاء آخــــر زمــن







حكاية النهاردة فيها تفاصيل كتير صحيح
 بس كل حاجة مربوطة ببعضها
وكل حاجة بتقول حاجة 
هتؤدى إلى حاجة
 حد فاهم حاجة ؟



طيب
الحكاية فاططميى
وكلها مؤامرات ودسايس وقتل
 وحاجات م اللى قلبكوا يحبها دى 
:))




وكنا حكينا زماااااان عن واحد من سلسال الفاطميين
 واسمه .. الآمر بأحكام الله
وقولنا قصته
هنا





وحكينا كمان ازاى إنقتل ومسكوا ابنه الرضيع مطرحه
 وخلوا ابن عم الآمر .. هوه الوصى على الولد
وبعد شوية قتله 
وحكم هوه



وابن العم دا بقى اسمه .. الحافظ لدين الله
والراجل عمله الأسود قعدله ف ولاده
 ابنه حسن قرفه ف عيشته عشان يورثه
راح الحافظ اضطر لقتله !!




وبرضوووو كنا حكينا القصة كلها
 هنا
وابقوا اقروها براحتكم وعلى مهلكم 





والملخص يعنى الحافظ بعد ما قتل ابنه حسن
مات بعدها بشهور
 ومسك من بعده ابنه الاصغر كان اسمه اسماعين
 ولقبوه بــ ... الظافر بالله




الظافر دا بقى هوه احد أبطال قصتنا الليلة
ونوارتنا والله
 :)
عشان الولا كعادة أغلب ولاد الحكام قديما وحديثا
كان قليل الادب 
ومش متربى !



الظافر أفندى مسك الحكم عنده ييجى 17 سنة كدا وشوية
 طايش بقى واهوج وأرعن
 ومش هامه حد لا كبير ولا صغير
وبتاع سهر و دلع و مجون وفيه كل العبر




ويااااااريت كانت جت على قلة الادب والسفالة والاستهتار
دا الولا كان كمان لامؤاخذة لامؤاخذة
والبنات تودى وشها الناحية التانية .. هه




الظافر لما مسك مصر
كان ف زمن نهايات العصر الفاطمى ف مصر
 و كانوا الوزراء هما اللى واكلين التايجر و مسيطرين
وهما القصة بينما الخلفاء مناظر




الظافر فجأة لقى واحد شديد وقوى طلعله كدا زى الخازوق
 اسمه بن سلار الملقب بالعادل
 والوزير العادل دا جه
 ومسك الوزارة عافية و بلطجة ولوى دراع




واستقوى برجالته وانصاره ودخل ع القاهرة عاوز يقتحمها
ويبعتر كرامة الظافر
 قوم الظافر لم الدور
ومسكه الوزارة 
لكن فضل اللى ف القلب ف القلب




الاتنين عملوا اتفاق جنتلمان العادل قاله سيبلى البلد امشيها
وانا هسيبك تعيث فسادا مع نفسك
ومليش دعوة بأفعالك المشينة 
قشطة ياعم ؟
 فالظافر وافق


بس طبعا وافق ظاهريا وقعد يرتب من تحت لتحت
 ازاى يخلص من العادل دا بأى طريقة
لحد ما جت ف حجره 
و من بيت العادل نفسه
 قولولى ازاى ؟




العادل كان متجوز ست مغربية من قبيلة كبيرة
وعظيمة ف بلدها
اتجوزها واستقوى بنفوذ اهلها المغاربة
 اللى ليهم وضعهم ف البلاط الفاطمى ف مصر والمغرب





الست دى كان عندها ولد من جوازة سابقة
واسمه عباس كان شاب ومتجوز صغير
المهم العادل ربى عباس ف بيته
وكل ما العادل يكبر يكبره معاه ويمسكه منصب !




قوم الناس مش تحمد ربنا بقى ع النعمة دى
 لأ طبعاااا
وعباس اللى اتجوز من خير العادل
 خلف ولد اسمه نصر 
ونصر كان واد حليوة و زى القمر




وعشان محدش يتوه منى ... نقول تانى
 العادل الوزير كان عنده ابن مراته .. عباس
وعباس دا كان مخلف نصر .. الشاب الحليوة 
ماشى كدا ؟





قوم يروح الزمان وييجى
وعباس بحكم علاقته بالوزير العادل يدخل القصر الفاطمى
 ويبقى من رجالة البلاط
وطبعا يجر معاه ف رجليه مين ؟ 
ابنه نصر طبعا




مين بقى هيشوف نصر الحليوة اللى زى القمر
 ويزوغ ف عينيه ويقرر يعمل معاه علاقات .... كاملة ؟
 والبنات متجاوبش 
ويودوا وشهم الناحية التانية قولنا




محدش جاوب ... ؟
ما شاء الله الفولورز بتوعى بينكسفوا
:) 
طيب اقول انا 



 هيشوفه الخليفة الظافر الزعيم الفخيم ابو عيون جريئة
وطويل العمر يطول عمره 
ويزهزه عصره
وينصره على من يعاديه هاااااااااى هىء مىء شخاليل دا


الظافر يعنى لما يشوف نصر هـ "يقربه" منه 
ويبقوا أنتيم وكدا
وسهر بقى ومياصة وقلة أدب
والخبر يوصل طبعا للوزير العادل
اللى صحيح كان هارش عيب الظافر الرهيب
بس مكنش متخيل ان الحكاية هتوصل لأهل بيته !




وبس عنها وراح باعت لعباس .. ابن المودام
 وهزأه تهزىء السنيييين
ولم ابنك نصر
وخليه يبعد عن الظافر
 والكلام دا 
عباس طبعا اترعب وقرر يتصرف !!





ناس هتقولى .. طبعا أكييييد عباس راح لأبنه
 وكان هيدبحه
وقاله عيب عليك
وابعد عن الظافر عشان اللى بيطلبه دا عيييييب وحرام
 والقصص دى
 #لأ_خالص





الحاج عباس .. كان طمعان ف السلطة
ولو على حساب جوز ماما
وجاتله الفرصة عشان ينط على كرسى الوزارة
ونصر ابنه كان الطعم المناسب لصيد المنصب




وبدل ما يقوله نعالجك او نجوزك او نقتلك
 اى حاجة من الحاجات دى يعنى
 قاله بص احنا نقتل عمك العادل الرخم دا
 لحسن كدا مش كيويس خاااالث خالث



واتلموا الجوز .. عباس وولده نصر
 وبمساعدة صديق تالت اسمه اسامة بن منقذ
وراحوا مدبرين الخطة لقتل الوزير العادل 
بمباركة مين ؟



صحيح المكيدة اللى هيدبرها عباس ونصر
بس طبعا نصر هيروح يعيط ف حضن الخليفة
قوم الخليفة يقوله سد يا روحى سد 
ومتزعلش
وعادل ايه دا اللى هيقف قصاد قصة حبنااااا #قصة_حب_ميرفت_و_عيلاء
خلاص نموتوه ونفسحوه 
ولا يهمك حاجة خالص يعنى 


وفعلااااا
عباس سافر الشام وقتها وقعد يدبر ف المسألة
وبعت اعوانه بموافقة الظافر
 وكمنوا للوزير بن السلار العادل
وراحوا قاتلينه يا نضرى سنة 1153 م




وبسرعة بسرعة بعد ما وصل الخبر لعباس
راح راكب الناقة وشارخ على القاهرة
عشان يركب على كرسى الوزارة
 والظافر يقوله ماشى مهو ابو حبيب القلب بقى!




وخلصت يا ظافر من عدوك اللدود العادل
استلقى وعدك بقى يا حبيبى من التعابين
اللى انتا مقعدها ف حجرك
وف حضنك 



وهما شوية وعباس توحش وتغول
وبقى يمشى البلد على كيفه
 ولا يعملش حساب للظافر اطلاقا ف أى حاجة
وياخد القرارت من غير حتى ما يقوله عليها



والظافر اتخنق يعنى قتل العادل ليه؟
عشان يجيله عادل تانى بس بأسم مختلف .. ؟
لأ طبعا
 ومش هيتحمل المنظر
 راح باعت اعوانه ودسوا السم ف اكل عباس
 بس كان مكتوبله عمر ومامتشى



بس طبعا عبس قبض على الخدام اللى دسله السم
واعترف على انه الظافر هوه اللى وزه يعمل كدا
 عباس فهم ان حياته بقت ف خطر رهيب
 وقرر يتصرف 



وزى ما استخدم ابنه نصر عشان يوصل للظافر
 هيستخدمه تانى برضو بس المرة دى بالعكس تماما
 وف ليلة هينده للواد
ويقعد يكلمه راجل لــ لامؤاخذة رجل



وطبعا مش هيقوله علطول
عاوزين نقتل الظافر زى ما قتلنا العادل
 لأ طبعا لأنه كان عارف
ان نصر والظافر بينهم اللى بينهم بقى
و مش هيطلبها علطول




الواد نصر اول ما دخل على ابوه
راح عباس علطول اتهمه انه كان عاوز يقتله
عشان يخلاله الجو مع الخليفة ويبقى هوه الوزير بدل أبوه
طبعا الواد أنكر


وقاله وحياة امى ما انا
ومحصلشى وازاى الظافر يبقى عاوز يقتلك
وازاى تفتكر انى هوافق على كدا
ولأ انا انصدمت ف ظاظا .. الوحش دا يع يع !





طبعا نصر بقى تايه وف مرحلة الصدمة
ودفاع عن نفسه ف جريمة معملهاش
 المهم عباس راح منتهز الفرصة
 وقاله خلاص نتغدى بالظافر قبل ما يتعشى بينا !!





ولازم نقتله .. وانتا اللى هتقوم بالمهمة دى يا نصر
لو عاوز تثبتلى انك بتحبنى
ومكنتش متفق مع الظافر على قتلى !!
الواد طبعا وافق علطوووول




وحد يقولى يا فطمطم بقى يصح كدا يعنى
 نصر يتخلى عن قصة حبه ببساطة
أقولكم معلش الواد كان صغنن ابن 20 سنة
 وبيلعبوا ف دماغه واشياء آخرى
 فعدوها



المهمممممممم الولد خرج من عند ابوه شايل ومعبى
ورتب الخطوات
 وطبعا بالاستعانة بخبرعباس
اللى استاذ ورئيس قسم الدسائس تخصص مؤامرت
وقاله تعمل ايه مين ازاى وعشان ايه .. وكدهون





وكانت الخطة كالآتى نصر يستدرج الظافر
 ف بيت عباس ف السيوفية
ويقتله هناك 
وبعدين الخطوات الآخرى تتوالى




وفعلا بعت نصر للخليفة الظافر يدعوه ف عرض رقيق
لأحتساء قدحا من النسكافية يتبعه قضاء ليلة حمرا شفتشى
 ف منزله الكائن بشارع المعز حالياااا
ورجاء عدم اصطحاب الاطفال !





الظافر طبعا مش مدى خوانة
ولبس واتعطر وخد معاه اتنين من حراسه مش اكتر
وتحت ستار الليل
راح ف المعاد والمكان الموعودين وخبط ع الباب ودخل




وقعد الظافر مع نصر ف قعدة فرفشة
 والليلة خمر وغناء ومسخرة و ضحك
وزى ما بيقول عبمنعم مدبولى ف ريا وسكينة #آخر_ضحكة_هتضحكها_ف_حياتها




وينام الظافر ملء جفونه 
و بعد ما نام نوم العوافى يا خوياااا
راح نصر مطلع السكينة
 وف ذات الوقت كان عباس مع رجالته
بيقتلوا الحراس الواقفين برا



وبس السكينة انغرزت ف رقبة الظافر
 وتبعها عدة طعنات
وبتخيل نصر وهوه مع كل طعنة بيقوله يا خاين
 يا ويحش
 يا شرير
 يلى كنت عاوز تقتل بابا وكدا





وكدا بقى عندنا حضرتك 3 جثث
وحصب الله هيدفن مين ولاّ مين ؟
 المهم نصر وعباس واعوانهم قعدوا يحفروا
 لحد ما دفنوا الميتين 
وبعدين انفض المولد ع الصبح



واعوان عباس مشيوا
و نصر دخل ياخد شاور بعد الدم ما طرطش عليه
 وعباس خد بعضه وراح ع القصر زى كل يوم عادى !



وداخل عليهم م البوابة بيصبح
وبعدين دخل على الديوان وبكل براءة بيسأل .. الله !
اومال فين الظافر النهاردة مش باين يعنى ؟!
راحوا باصينله بخبث



ولأ يا جماعة بجد ... مولانا  فين ؟
 راح واحد فيهم ملقح كلمتين وقاله :
عاوز تعرف الظافر فين
ابقى روح لصلاح عبمقصود وهوه يقولك !!




يوه مقصدشىىىىى
 قصدى قالوله اسأل ابنك ... اسأل ابنك
عباس انكتم وسكت
 وكام ساعة والظافر وحراسه مظهروش
 فالكل قلق وابتدى الموقف يشتعل





عباس قرر يضرب ع الحديد وهوه سخن
وراح باعت الحرس يقبضوا على اخوات الظافر
 كان عنده اخين رجالة يوسف وجبريل
و عيسى ابن الظافرطفل صغير



جبريل ويوسف 
هما اللى كانوا كبش الفدا
وعباس راح قاتلهم ف قاعة العرش
من غير ما يلحقوا ينطقوا حتى ويسالوا احنا عملنا ايييييه ؟؟





وبعدين راح شايل عيسى العيل الصغير
 وكان عمره 5 سنين ومصادر بتقول 3
المهم كان طفل جدا جدا يعنى
 وراح لامم رجالة البلاط كلهم 



وشال على كتفه عيسى ابن الظافر
 وقال لرجالة القصر الظافر انقتل
واللى قتلوه اخواته اللى جثتهم مرمية هناك دى
 على سرير الملك 
وانا خدت بتاره!
وعيسى .. يبقى خليفتكم 
 ووطوا يا غجر
وبايعوا الامام الجديد
وراح حاطط عيسى ع السرير 
وكان يوووووم اسووووخ 
ليه؟




عشان الولد عيل عيل يعنى بنقول5 سنين ويمكن 3 كمان
 وفجأة يحطوه جنب جثتى عمامه الأتنين الغرقانة دم
وطبعا الولد اتخض 
واتسرع 
وجاله صرع !!



جاه صرع فعلا ومش بهزار من هول الموقف
 ويقال ان نوبات الصرع دى لازمته لحد ما مات بسببها
بعد كام سنة .. المسكين
 :(




المهم دلوقتى ...
 نركب طيارة هيلكوبتر زى بتاعت الجيش كدا
ونطلع نستكشف الموقف من أعلى 
وهنلاقى ايه ؟؟




هنلاقى .. الظافر الخليفة اختفى ومش لاقين جثته
ونصر قتله ولزم بيته
وعباس المحرض راح وعمل بالو وغلوشة وشبورة
ومسك ابن الظافر وبقى وصى عليه
واحتفظ بمنصب الوزير كمان !




طبعا عباس افتكر انه كدا خلاص بقى
 بقى هوه الآمر الناهى
والعيل اللى بقى خليفة دا وكأنه عروسة لعبة بالضبط
و انتهينا 
ومكنش عارف المستخبى !!





ميعرفش ان اذا كان رجالة القصر الفاطمى كانوا أى كلام
 فستاته مكنوش كدا
 واخوات الظافر البنات
 واهل البيت الفاطمى هيقرروا ميستكوش ع اللى حصل !!



ستات البيت الفاطمى هيبصوا حواليهم يا عينى
 ميلقوش ف القصر رجالة
قوم يدوروا ويبحثوا
ويوصلوا لراجل كان ف جيش الخليفة  من زمان 
وله سمعته



الراجل دا التحق بقى من رجالة الآمر
 وبعدين كبر ف المناصب
 وزى ما عندنا بيمسكوا اللواءات المحافظات دايما 
 زمان كان شرحو 
ومسكوا الجدع حتة ف الصعيد



وفيه ناس بتقول اشمون والبهنسا
وناس بتقول قوص
 وناس بتقول الصعيد كله
أى كان المطرح يعنى
 فالراجل دا وهوه حكاية لوحده اصلا كان اسمه 
طلائع بن رزيك



وسى طلائع كان عنده تاتش دروايشى كدا
 ومحبة لآل البيت
ويقال انه بنى مسجده الشهير مخصوص
عشان يندفن فيه راس سيدنا الحسين لما توصل مصر !








بس الراس الشريفة لما وصلت القاهرة
الخليفة وقتها طمع ف الشرف دا
ورفض تندفن ف مسجد طلائع اللى صرف عليه ياما





والخليفة عمل مدفن وضريخ مخصوص للراس الشريفة
 وبعدييين جه صلاح الدين الايوبى
 وعمل المسجد حواليه اللى موجود دلوقتى
ويعرف بــ ...  مسجد سيدنا الحسين





المهم ظلائع وقتها بيقولوا انه كاد يموت غيظا
 لأنه كان عاوز ينول المكانة دى
 و ندم انه صرف ع المسجد ببذخ
 و الظاهر انه من يومه كان غاوى زعامة !





نرجع مرجوعنا لموضوعنا تانى
الظافر انقتل
 وعباس لم البلد ف عبه
وحريم القصر قرروا ياخدوا بتار قتيلهم
 قاموا سمعوا عن طلائع و قزحته 
فعملوا ايه ؟



بسيطة
 راحوا قاصين شعورهم
ولموها ف صرة
وبعتوها لطلائع
واستنجدوا بيه ييجى ياخد بتار ابنهم المقتول .. غدرا وغيلة
#واطلائعااااه






ودا نفس المشهد اللى عملوه بعض الستات المصريات
 ف ميدان التحرير يوما ما
بس للأسف مكنش عندهم طلائع يومها
 يستاهل يتقصله الشعر دا
 #بلا_وكسة_ع_الكل_كليلة



القصد الشعر يوصل ف البؤجة لطلائع
 اللى كان بيجهز جيش ف منطقته
وبيلم رجالته من كل حتة
وكدا خد الاوكيه الفاطمى 
ويلا بينا نحرق هالمدينة !




طبعا الخبر وصل لعباس ونصر
ان طلائع جالكم وخبوا عيالكم
راحوا بكل رجولة ونخوة واباء وشممممم
واخدين ف وشهم 
وهرباااان زوغاااان ع الشام



ودخل طلائع القاهرة 
بشعور نساء الخليفة على أسنة رماحه
و بدون ادنى مقاومة تذكر الحقيقة
 مين اللى هيقاوم
 دول ما صدقوا خلصوا من عباس وقرفه اصلاا !
وظهر الرجل القوى الجديد ف القصر




اول حاجة عملها طلائع انه لم رجالة عبا
س اللى فضلوا وملحقوش يهربوا
 واعترفوا على مكان جثة الظافر وحراسه
 وراح طلائع بنفسه لبيت عباس وابنه




والمشهد بتاع ريا وسكينة .. المسلسل بقى بالمللى
 راحوا ونبشوا الأرضية 
وشالوا البلاط
واللى تحت البلاط لحد ما طلعوا جتت الكل
 الظافر وحراسه



واتعملت جنازة مهيبة للظافر كما كان يجب
وادفن ف مدافن الخلفاء الفاطميين كالعادة
وطلائع عمل حاجة لطيفة جدا وقتها
 انه هد موقع الجريمة



يعنى هد بيت عباس ونصر
وكانت مساحته كبيرة جزء
واتقسم حتت واتبنى عليه بيوت
 وجزء اتبنى عليه جامع الأفخر
أو كما سمى بعدين
 الجامع الظافرى 







والجامع دا بعد كدا اتغير اسمه
 وبقى اسمه جامع الفكهانى
وله قصة لطيفة نبقى نحكيها لو فضل ليميت :)
 لكن اللى يخش الجامع دا ف يوم 
يا ريت يفتكر







ان تحت هذه الأرض اللى بيصلوا عليها دى
 ف يوم ما اندفن حاكم البلاد بحاله
زيه زى أى قطة داستها عربية
والموت مبيفرقش




وكدا نرجع م الهيلكوبتر نرى الوضع كالآتى
1) طلائع بن رزيك دخل القصر
واتعين وزير .. للخليفة الصغنن عيسى ابن الظافر
واللى اتسمى الفائز لنصر الله

2) طلعنا القتيل الحمدلله ودفناه بما يرضى الله
 وحرمة الموت
والبيت الفاطمى هدى وانبط وناره بدرت حبة صغننة كدا
 فاضل رقم 3) 
واهم حاجة ف الموضوع
القتيل فين حقه .. من القاتل
والقاتل كان ف طريقه للشام عباس ونصر



بينما من القاهرة اخوات القتيل بيبعتوا مراسيل
 للفرنجة ف الشام
وبيعرضوا عليهم مبالغ مالية مقابل انهم يسلموا عباس ونص
ر اول ما يوصلوا عندهم
وبلاش نظام اللجوء السياسى
ودول ضيوفنا والأفلام دى 
والمال تحدث



ولما المال تحدث .. صمت كل شىء
 والفرنجة مفرقش عندهم زيد ولا عبيد
وعرفوا طبعا ان عباس ونصر ملهمش قيمة
ولا يستحقوا عناء معادة الفاطميين دلوقتى
و راحوا باعتين جنودهم
 قطعوا الطريق على عباس ونصر
ورجالتهم كانوا طبعا شايلين من مصر
 كل ما خف وزنه غلا ثمنه
لطشوا كل دا 
وعباس قاتلهم وانقتل



 اما نصر .. فضل حى بعد ما انجرح 
راحوا باعتينه على القاهرة ف قفص
وطبعا مقولكوش ع اللى عملوه حريم القصر فيه ! 
#مهازل



طبعا الأول عذبوه .. بما يرضى الله
 قطعوا جتت من جسمه وحرقوها قصاده
واكلوه منها وبعدين ضربوه بالقباقيب والعصيان
وعلقوه حى على باب زويلة




وسابوه متعلق ومصلوب هناك يشوفه الرايح والجاى
 لحد ما مات
وربنا رحمه من العذاب 
 #و_زعلهم_وحش_قوى_حريم_القصور_دول



وبس كدا خلصت حكاية الظافر وعباس ونصر
 وكان بودى أنهى الحكاية بأنى اطمنكم ع البلد وقتها
 بس للأسف مش هينفع 
عشان طلائع .. هيطلع مش زى ما نتمنى



وهيستبد بالبلد وبحكم البلد
ولما يموت الخليفة الفائز ..
 العيل اللى جالع صرع من هول الصدمة دا
 طلائع هييجى ف اللحظة الحرجة دى 
ويستهبل بقى



وطبق الأصل .. مشهد عباس اياه هيتكرر
 وهيقف طلائع بن رزيك بعد موت الفائز
ويقول الخليفة القادم هوه .. فلان الفلانى 
والخليفة الفايز قالى !!!!
#الخليفة_العيل_هه_اخدينلى_بالكو!



مين بقى فلان الفلانى ؟
 فاكرين لما عباس قتل اخوات الظافر يوسف وجبريل
 واتهمهم بقتل الظافر ؟
 اهو يوسف دا كان عنده ابن شاب 
ويبقى ابن عم الفائز




هو اللى طلائع جابه
وفجأة .. هيحول توريث الحكم من فرع الفائز
الى فرع عمه وابن عمه


وعادى كان ممكن نعديها 
ونقول طيب
 مهو هيجيب منين الفايز وكان عيل !!
ولا عندوش ولاد يوروثوا وبتاع
فعادى ندور على أى حد ف الأسرة وكدا



 بس طلائع لو كان اختار أى حد غير الشاب دا
كنت احترمته 
ليه بقى ؟؟؟



عشان ببساطة الشاب دا اللى يبقى ابن عم الفائز
يبقى كمااااان جوز بنت طلائع حضراتكم
والأخ كان مجوزه بنته 
ومحوشه ليوم زى دا 
شوف ازااااى ؟!!



طبعا الواد طوع امر حماه وتحت رجليه
 وحماه قعده على كرسى العرش
وسماه العاضد
 وحريم القصر اللى كانوا فرحانين بطلائع
 هيقلبوا عليه قلبة زرقا
وانتوا عارفين قلبة الحريم .مش هتكلم


يعنى احنا
 جايبنك عشان الظلم يتاخر
تروح تجيبلنا ظلم آخر .. ! 
#واستلقى_وعدك_يا_طلعوئة




واحدى عمات الخليفة العاضد واخت الفائز
 هتلملم اعوانها وتتفق مع احد الأمرا
ويخشوا ف ليلة على طلائع بن رزيك وابنه
 ويحاصروهم وينقتل طلائع !!





وابن طلائع بن رزيك .. وكان اسمه على اسم جده
زريك بن طلائع زى عثمان احمد عثمان كدا
:) 
هيهرب منصاب ومتعور 
ويرجع بعد شفائه يطالب بحق ابوه




والبلد بعد قتل طلائع تتهز
 ويطلع كل المنافسين القدام
 وتحصل اضطرابات
وقتل ف الشوارع بين الجنود والأمرا
 فالبيت الفاطمى يقرر يمسك رزيك 
مكان ابوه حقنا للدماء




وعمة العاضد اللى شاركت ف قتل طلائع
تيجى قدام ابنه وتقول هذه التهم انكرها كاملتنننن
 فرزيك يلم الدور ويسامحها 
ويقول عفا الله عما سلف
وما دام هتوزرونى وتقعدونى مكان بابا .. يبقى قشطة
الحى ابقى م الميت
وخلاص مات هنموت وراه 
وبلاش خوتة .. هه



وطبعا هيطلعله خازوق بعد شوية يطمع ف منصبه
 وهكذا دواليك نقعد ف الموال الاسود الحزين دا كتير
لحد ما ييجوا الأيوبين
ونبدأ من جديد اللعبة



وتوتة توتة 
وقبل ما أقول تصبحوا على خير
 الملاحظات المعتادة
 واولها فيما يخص نصر
فعلا فعلا جاتها نيلة اللى عاوزة خلف !!
و #60_نيلة_كمان




ثانيا 
تعبير انا ربيت تعبان ف بيتى دى
افتكرتها قوى لما قريت ازاى الوزير العادل ربى عباس
كأنه ابنه واذا بيه يقتله ف لحظة غدر بشعة !




ثالثا
 كما تدين تدان 
من بدرى بدرى الحافظ سرق الخلافة من ابن الآمر
 وبعدين الحافظ قتل ابنه حسن ونفد
فأتردله كل دا ف مقتل ابنه الأصغر الظافر



وزى ما الحافظ سرق العرش من ابن عمه
جه اليوم اللى ابن عم يسرق العرش من حفيده !! 
#دنيا




رابعا
 الستات عموما زعلهم ويحش
بس انتقام ستات القصور مضروب ف اتنين
تلاتة اضعاف ع الأقل
 وقلبتهم زفت ونيلة 
#محدش_يزعل_أم_احمد_و_باكينام_بقى



خامسا
 قتل الناس ماله ايام الفاطميين
 كان زى اللب والفيشار كدا ؟؟
 يعنى القتل كان سهل ف رجالة الصف الاول
من وزير وطالع لحد الخليفة 
#ايه_الناس_الغريبة_دهّين؟



سادسا .. بنا المساجد دا سبحان الله كله عظة وعبر
وقصور العالم دى والابهة كلها راحت
 وتقريبا مفضلش غير بيوت ربنا 
وياريتهم كانوا اتعظوا وقتها !

سابعا بقى 
ودى اهم نقطة ف الحكاية كلها الحقيقة
طبعا نصر كان غلبان
وصغنن 
وفتنوه 
وانضحك عليه وابوه مشاه .. الخ الخ 
ومش هتكلم
بس يعنى الاخوة بتوع الشيعة
 كانوا حلوين اهو ومش فارق معاهم الخليفة بتاعهم
يبقى اسمه ايه استغفر الله العظيم يعنى
 اومال ليه كدا .. ؟!!!



لما انتوا ولارج وسبور كدا اومال قايمين ليه يا خويا
 على وزير التعليم الايرانى
 اكمنه زنق الموزة ف الأسانسير
 وكان عاوز يقولها كلمة ف بوقها !




اذا كان ف يوم ما الخليفة الفاطمى
 والحاصل على لقب الاماااااام
كان بيزنق مش الموزز مش ف الأسانسيرات
 وكنتوا موافقين 
جت ع الغلبان دا يعنى!
#ايران_دى_نمكية_قوووى



ثامنا
 مسجد طلائع اللى اتبنى مخصوص
لأستقبال رأس سيدنا الحسين
 يعتبر من أقدم المساجد المعلقة
ومعنى ..  معلق لأنه بناء مرتفع عن الأرض شوية 




تاسعا 
العسكر عسكر ولو كانوا ايه !!
 طلائع مقدرش يخبى استبداده مهما زوق ف شكله ومنظره
وعمل سمعة وبنى جامع واظهر الولاء 
برضو شهوة السلطة تغلب




والكلام دا للى بيجرى ورا حلم ان الجيش ضرورى ينزل
وهما اللى هيقدروا يلحقوا الوطن والهجص دا
لأن هما فعلا يقدروا يلحقوا الوطن
 بس عشان يحطوه ف جيبهم !!




واخيرااااا ...
وف سياق منفصل ولكنه متصل .. الله يخربيت سنينك
 انتا وجماعتك يا مرسى
 ويورينا فيكم يوم زى ايام الظافر وعباس ونصر كدا
 #قولوا_آمين

و العاضد اللى مسك اخيرا كان هوه آخر خلفاء الفاطميين
وجم الأيوبيين وابتدى العهد الجديد
و الظافر و عباس و طلائع 
غيره هما دول خلفاء
 و وزراء
و زعماء آخر زمن 
اللى بمجييهم
بتعرف خلاص كدا اننا قربنا ع النهايات 
وممالكهه وعروشهم بتتهاوى 
وفاضلها تكة 
وعقبالك يا وش النحس 



وتصبحوا على ألف خير 






 @Yasminemz 
 ايه الناس السيكي ميكي خالص دي؟


 @ImanBadawi
 اخص - ملعون ابو الكراسى والسلطة من قديم الازل 
وليوم الدين



 @General_Pikachu 




 @General_Pikachu
 هو نصر ده علي ما فهمت يبقي احمد بن سبايدر الفاطمي؟
 صح؟



 @General_Pikachu
 فينك يا نصر RT @G4S90: “اللوردات البريطاني” يوافق على زواج المثليين بأغلبية 390 صوتا مقابل 148



 @ImanBadawi
 تصدقى فكرة حكاية الفلوس دى ناخد بيها حق الشهداء
طالما معندناش دولة ولا قانون


 @ImanBadawi
 حتى انت يا طلائع ورايح يبنى مسجد
وعامل فيها بتاع ربنا -احنا مكتوب علينا الاشكال دى


Related Posts Plugin for WordPress, Blogger...
"حقوق الملكية والملوخية والمهلبية ... الخ
محفوظة للست شهرزاد وإياك حد يسرقها ويحاول يزعلها آغجر .. مفهوم ؟ "