الجمعة، 7 يونيو 2013

العــود دمشـــقى يـا تـنـكــــز







حكاية النهاردة مماليكى
 من اياهم


واياهم للى متابعينى من بدرى 
هيعرفوا اللى فيها وما أقصد لما أقول من إياهم .. !


مماليكى يعنى دم وغدر وسلطة وانعدام الدين والمبدأ
وسياسة ف أعفن واقذر أشكالها
و رحمة ف غير موضعها
 وقسوة رهيبة ووحوش ف أشكال بشر ..الخ الخ





وأبطال القصة 3 أشخاص
ومكان
والمكان هوه مدينة دمشق الكائنة منذ القدم
 بـ سوريا الجميلة العظيمة .. الحرة ان شاء الله



وانتوا عارفين اكيد .. ان ف زمن المماليك
وما قبلهم بكتيييير ومصير مصر والشام واحد تقريبا
مفصلهمش غير الاستعمار قريبا




ف زمن المماليك كان السلطان
 اللى عاوز يطمن على حكمه يسيطر على الشام
 ضمانة لأمنه وبقاء ملكه
 ودا حصل وفضل يحصل 
وسلطان مصر كانله نايب ف الشام



النايب دا كان مقره الرسمى ف الغالب .. دمشق
ومنها يمشى كل حاجة
 ويبعت للسلطان المملوكى أول باول الاخبار
والعكس كان بيحصل



سلاطين المماليك .. اللى كانوا بيقعدوا
ومينقتلوش بدرى بدرى كانوا بيحرصوا يعمل اصلاحات
وشغل ف الشام 
واول واحد بدأ الفعل دا كان الظاهر بيبرس


ومنشأت المماليك ف الشام أيام الحكم المصرى لها
 كتير
ونسيب دمشق والشام دلوقتى
ونرجع على مصر عشان نبدأ المعمعة من اولها
 ونحكى



كنا حكينا زمان عن الحاج قلاوون الله يرحمه
اللى مسك مصر وبعد كدا ورثها لولاده واحفاده
وقعدت العيلة القلاوونية دى تحكم بتاع قرن من الزمن



الحاج قلاوون الكبير كان راجل شديد وجامد
 سيطر ع الدنيا وعلى عكس اللى كان ماشى وقتها من غدر
 وامرا يتقاتلوا ع العرش 
ومكنش فيه حاجة اسمها وراثة


قلاوون غير الحكاية دى ف عهده
وقبل ما يموت ضبط الدنيا وجاب أقرب امرائه له
 ووصاهم ان ابنه الكبير يمسك بداله 
والامرا وقتها قالوا حاضر



وبعد موته الكرسى زاغ ف عينهم
وكادوا يتقاتلوا مع بعض
وكنا حكينا التفاصيل قبل كدا
 ومش هدوشكم بس ف النهاية هكتب اللينكات كلها ...



الملخص عشان التوهان ابن قلاوون الأكبر
 حكم شوية وقتلوه
وبعدين جابو اخوه .. أحمد وسموه الناصر
ومسكوه وحكموا من خلاله
 لأنه كان عيل وقتها



والناصر دا قصته غريبة وملهمة
والمختصر انه ساب كرسى العرش مرتين
 ورجع مرة تالتة واخيرة
 عشان يقعد ف الحكم وما يمشيش تانى لحد ما مات !



ويقال ان التعبير المصرى الشائع بتاع
#التالتة_تابتة
ينسب اليه لأنه راح ورجع
 وراح ورجع
 وف المرة التالتة تبت ف العرش
 وقعد :)



الكلام دا حصل حضراتكم ف السنوات الأتية
الاول مشى ف 1293
و رجع 1299
و مشى ف 1309
 و رجع 1310
و بعدين فضل ف العرش لحد ما مات سنة 1341



طبعا فترات حكمه الاولى والتانية دول مكنوش حاجة
 ولا ينحسبوا لأنه كان عيل وقتها
وداخل ع المراهقة بعدها 
انما آخر مرة كان هيا اللى فيها الزُبد



لأنه قعد تقريبا 31 سنة
و كان راجع شاب قوى وعنده خبرة
وعرف ازاى لما يرجع يلم كل الواغش
 اللى قرفوه ف عيشته لسنوات 
و بصراحة انا اتخضيت!



عندى كتاب لطيف قوى عن مصادرة الأملاك
 ف عصر سلاطين المماليك
الكتاب مرعب لما تقروا كم المصادرات
 اللى حصلت لأمراء وسلاطين المماليك وقتها !



وتستغربوا لما تلاقوا أسم الامير من دولا
 بيتكرر ف اكتر من عهد 
ويقبضوا عليه
 ويخرجوه 
وبعدين يرجع تانى
 وينقبض عليه
 و كأنهم بتسع ترواح فعلا



ولاّ الفلوس أو الثورات المتصادرة بقى .. يا ليهووووووى
 ايه دا
 دا المماليك دول لو بياكلوا الفلوس والجواهر دى اكل
مش هيبقى كدا يعنى ؟!!!



قصره السلطان الناصر .. اكمنه قعد ف الحكم مدة كبيرة
ودى ف عرف المماليك تعتبر من النوادر فعلا
 متكررتش الا قليل بعدين ف زمن قايتباى يمكن 
بس !


الناصر بقى صادر املاك ياما وأتخلص من امرا ياما
وعدى عليه اشكال وألوان
وكلهم كانوا طمعانين يخلصوا منه
ويزحزحوه زى المرتين اللى فاتوا !




والصراحة هوه برضو قرب من أشكال تعّر
وكنا حكينا عن واحد فيهم زمان
 واسمه .. النشو هتلاقوا قصته 
هنا




وبنظرة سريعة غير متأنية منى على الراجل دا
(الناصريعنى) أقدر أقول بكل براءة
ان الأخ دا كان كويس ف حاجات
 ومهبب ف حاجات
 لكنننننننننننننننننن


السلطة مهلكة وعاملة زى الرمال المتحركة كدا
 ناعمة وشكلها مغرى تدوس فيها
وأول ما تدوس .. تغرز .. وتسحبك .. وتغرقّك ف الآخر



الناصر كان ماشى زى الفل والسكينة ف الحلاوة ..ف الأول
 كان عنده عيب منيل وبستين نيلة
 لكن كان مسيطر
 بس اما كبر وتوغل ف السلطة ..
 تغول وافترى


افترى بلا قصد .. يمكن ؟
 بس معلش دا اللى بيقولوله دلوقتى بتوع أسفين يا ريس
ودا مش مبرر ابدا من وجهة نظرى
بس الناصر ابن زمنه وعصره 
فمعلش


خلصنا من الشخصية الأولى ... السلطان الناصر
ندخل بقى ع الشخصية التانية ف حكاية الليلة
 وهو الامير ... سيف الدين تنكز
 واسمه كدا تنكز



ومحدش يقولى ليه وازاى وعشان ايه
بس لما يستنكر مرسى الزناتى قائلا
انا عارف بيجيبولنا الأسامى دى منين ؟!!! 
#نرد_نقول_آه_نعرف



الأخ تنكز .. زيه زى كل المماليك كان طفل صغنن
مخطوف ومتباع ف سوق النخاسة
 اشتراه واحد وباعه لقصر السلطان قلاوون الكبير
 واتربى هناك


وبقى من مماليك السلطان ونشأ على الولاء لسيده قلاوون
ولما اتنقل الحكم للناصر 
وزهقوه ف عيشته
وطفش على الشام يغير جو 
خد معاه سيف الدين تنكز



الناصر وتنكز كان سنهم قريب من بعض
 وتنكز اختار يروح معاه وميقعدش ف مصر
 لما لقى امرا المماليك الديناصورات بيتصارعوا
 وفضل يقعد مع ابن سيده


وفضل تحت امرته كدا ... لحد ما جت آخر مرة
ورجع الناصر استرد عرشه
وقرر يكافىء تنكز
ومسكه نيابة الشام بحالها 
وطبعا دى كانت حاجة هايلة



كل الامرا وقتها بصوله فيها وكانوا متغاظين جدا
لأن اذا كانت الصين حلوة ... فالشام احلى واحلى
وكلها خير ودلع 
وتنكز باضتله ف القفص فعلا !



ف هذا التوقيت .. نائب السلطان ف الشام كان مقره دمشق
وفيها قعد الأمير تنكز 
يحكم تحت امرة الناصر كام سنة بقى ؟



28 سنة بحالهم ودا رقم مش سهل 
ولا قليل
 ولا بيحصل كتير ان أمير مملوكى يعمر المدة دى
 وخصوصا مع الناصر اللى اخد الأمرا فحت وردم
طول مدة حكمه!



بس الظاهر والله اعلم ان الأمير تنكز كان راجل كويس
 مقارنة بغيره من الامرا
واهل الشام حبوه
 ومكنتش بتيجى شكاوى منه الا فيما ندر 
عشان كدا عمّر



وبتقول المصادر انه حارب كتف بكتف مع السلطان الناصر
 ف معاركه وانه كان عنده ولاء رهيب للبيت السلطانى
 اللى اتربى فيه 
ويحكى انه ...



السلطان الناصر عمل اصلاحات
وعمل كمان منشأت ف الشام زى ما عمل ف مصر
 وطبعا كلف النايب بتاعه ف الشام
 قوم تنكز دا هتلاقى اسمه ف كذا مطرح منهم





جامع شهير ف دمشق اسمه .. جامع تنكز
ومسجده كان ملحق بمدرسة و خانقاه و دار للعجزة
 وكبار السن والايتام



الجامع دا كان حاجة أبهة جدا واتبنى ف سنة ونص بس
واتعرض لحريق وهدم ..
وتقليص ف مساحته اكتر من مرة لحد ما صغر ف الحجم






والفرنساوية حرقوه ف هجوم على المدينة
واتعاد بناه من تانى بشكل أى كلام طبعا
 ومفضلش منه غير المئذنة 
هيا الأصلية





حاجة كمان سابها تنكز ف دمشق اثناء مدة حكمه
 ف ضهر الجامع
وهيا دار لتحفيظ القرآن وتعليم الحديث





والدار دى كانت ضمن أوقاف تنكز
اخدها واحد تانى وجددها
وبدل ما يسيبها بأسم صاحبها الأصلى ..
 سماها على اسم اهله





وكتب على بابها اللى هتشوفوه ف الصورة
وكتر خيره مشلش اليافطة اللى عليها اسم تنكز 
كله ذوق يعنى
وبقدرة قادر كدا تحولت دار تنكز ..
 للمدرسة الكاملية نسبة للراجل اللى جددها .. !





ولحد دلوقتى كل دى منشئات عادية جدا
كل امرا المماليك عملوها عادى
 لكن اهمهم ع الاطلاق كانت المدرسة التنكزية 



والمدرسة دى رغم انها بدت وكأنها تقليدية ف وقتها
واشتهرت بالضخامة والأتساع
والصرف الكويس على مرتاديها
 الا انها كانت مهمة لسبب تانى خااالص





لأن المدرسة دى حضراتكم ...
 بناها الأمير سيف الدين تنكز ف القدس
 بالقرب من المسجد الاقصى عند باب السلسلة
والمدرسة دى مئذنتها هتعمل كالو للأسرائيلين ف دماغهم
 تخليهم يستولوا عليها عشان يامنوا نفسهم من أى خطر
ييجى من ناحيتها 



والمدرسة اللى بناها تنكز ضمن شوية حاجات تانية
 زى سوق القطانين
 وحمام العين والشفاء
وخان تنكز بالقدس القديمة





واللى ف عصور لاحقة هتتحول لمحكمة شرعية
ودار للقضاة هييجى الاحتلال الاسرائيلى ف 1969
وياخدها غصب ويحولوها لثكنة عسكرية 
يضرب منها الفلسطنيين


وتفضل تحت ايدهم
 لحد ما يحولوها سنة 2006 لمتحف
 ومزار دينى وبيستهبلوا طبعا ويقولوا انها بتاعتهم
 زى ما بيقولوا على كل فلسطين .. بتاعتهم !!



ونرجع مرجوعنا للأمير تنكز 
صاحب كل هذه الهلمة
 اللى قعد 28 سنة يبنى فيها بأمر الناصر
 وتحت مشورته 
ويقال انهم كانوا حبايب واصدقاء



و فجأة يظهر ف الصورة
 الشخصية رقم 3 ف حدوتة الليلة
وركزوا معايا بقى عشان اسمه معروف لينا اكيد
 بس حكايته تقرف الكلب الحزين .. هه



الأخ دا يبقى اسمه سيف الدين برضو
بس مش تنكز 
لأ سيف الدين بشتاك 
وسيف عن سيف يفرق !



سى بشتاك دا أكاااااااااد اجزم انه هوه السبب
ف المصطلح اللى بنستخدمه حاليا بتاع هشك بشك
وهوه اللى غنتله شهيرة 
هشتكتك بالهشتاكة متهشتكتشششش !



ليه بتقولى كدا يا فطمطم ؟؟
 اقولكم عشان الولا دا مضايقنى
 من ساعة ما قريت سيرته الذاتية القصيرة العميقة
 اللى زعلتنى من الناصر قوى 
لييييه ؟



عشان المصادر بتحكى انه كان من مماليك أمير
اسمه بقتمر الساقى
 ماشى
 و بقتمر دا مات
فالاخ بشتاك ورثه ف كل حاجة البيوت
 والفلوس والحريم والجوارى
كويس ؟


قوم ف مرة السلطان الناصر بيكلم واحد من رجالته
 وبيقوله انا عاوزك تجيبلى مملوك
يكون كدا شبه امير التتار
فالجدع قاله حاضر 
o.O


فالأخ الموكل بالمهمة دور ف وسط المماليك
 لحد ما لقى بشتاك
 وكما تصفه المصادر :
كان شكلاً تاماً أهيف القامة حلو الوجه 
#نعممممم_بقى!


قوم ايه ؟
السلطان الناصر قربه منه وكان بيحبه ويعطف عليه .. ؟! #وحياة_طنط!



المهم ... عشان فيه بنات قاعدة لن أسهب ف الموضوع دا
الا  ف الملاحظات بقى
هه 
الملخص بشتاك دا كانت كل مؤهلاته .. شكله 
ومشوها شكله !


لكن الولا كان قليل الادب ومنحل واخلاقه زبالة
 ولا له ف الفروسية ولا الملوخية
 ويقال انه مكنش بيعتق لا جارية ولا حتى فلاحة
وياما العوام اشتكوا


والواد يظهر كان واخد وضعه كويس
فكمنش بيهمه وكان ساعات بيخبى فلوس على الناصر
 ومرة م المرات حد فتن عليه 
وضربه مهموز عند السلطان


بشتاك كان ف الشرقية بيتابع املاكه اللى اخدها
من بقتمر سيده السابق
وبيعيث فسادا مع الفلاحات هناك كالعادة
وجاله خبر ان السلطان غصبان وعاوزك


ف الاحوال العادية
 أى امير يسمع كلمة ان السلطان غضبان وعايزك دى
 معناه انه ليلته بقت سودة 
وممكن يبل الاض تحتيه ف ثانية !


ويبقى حاجة م الاتنين 
يا يروح ويتسلقى وعده والعقاب
 يا يهرب بعمره على أى حتة
واقرب مكان بيبقى الشام أو الصعيد 
بشتاك بقى عمل ايه ؟؟



ولا حاجة لا راح الصعيد ولا الشام
 لملم حاجاته وراح ع الحجاز حج وروق واستجم
وصرف فلوس واشترى هدايا وسبح وسجاجيد صلاة وكدا
 وتنه راجع على مصر


طبعا الناصر لما عرف انه طفش .. ع الحجاز
مش هيبعت حد وراه بقى دى أرض مقدسة .. هيعمله ايه ؟
 قال خلاص يغور ف داهية 
ونسيه من دماغه شوية


هما كام اسبوع و قاعد الناصر ف مجلسه
ودخل عليه كام امير بيبص ف وسطهم
 لقى بشتاك طالع
وبيقوله انا جايلك بنفسى اهو 
واعمل فيا ما بدالك يا مولانا !


طبعا الناصر .. أغرورقت عيناه بالبكاااااء
 وسامحه وقاله خلاص يا بشتوكة
بس متزعلنيش تانى وكدهون 
#أحيه_ع_السلاطين_العرر



بس وقعد سى بشتاك على حجر الناصر
يوه قصدى على حس الناصر مروق ومطمن والدنيا حلوة
 لحد ما ف يوم أزرق قرر الأمير تنكز يزور مصر
 #المسكين



ليه بقول مسكين ؟ 
عشان الامير تنكز .. اللى لبس اللى ع الحبل
 ولملم من خيرات الشام اللى انتوا عارفينها بقى
حرير وفواكه وجواهر وعطور الخ الخ



لما دخل على السلطان الناصر نافش ريشه بالهدايا
والدلع كله قوم الناصر انشكح واستقبله احسن استقبال
وقعده ف دار سعادة بالدرب الاحمر 
وروقه قوى



وازيك يا تنكوزة
ازيك انتا يا نصنص
 اخبار الشام ايه
كويسة على حسك
ومش عاوزين حاجة 
عاوزين سلامتك 
والنوظام دا



المهم الزيارة كانت لطيفة ومفيهاش مشاكل
واخبار الشام عجبت الناصر
 فقرر يدى تنكز مبلغ مليون درهم يعمل بيه شوية حاجات
وطبعا الاخبار اتنتورت


ووقعت ف حجر الأمرا اللى قعدوا ينفسنوا
وياكلوا ف روحهم ومتغاظين
 ازاى الناصر يدى المبلغ دا لتنكز
واحنا نتعصر عشان نديله فلوس !!!



غير بقى ان الاخ تنكز غلبان يا عينى بقى
وجاى م الشام اللى اهلها طيبين
ومش ف دماغهم الحقد المملوكى المتين دا بتاع مصر
 الراجل اتصرف بتلقائية


يعنى ايه يعنى مثلا يجيب معاه زوجاته وحريمه
اللى عدو رقم 7 بخدمهم وجواريهم وشنطهم وحاجتهم
وقعدهم معاه وكان مدلعهم ع الآخر
 ايه يعنى ؟؟!!



الامرا كانوا هيتجننوا من انه عايش بالبذخ دا
وبعيد عن ايد السلطان
وغرقان ف الفتة الشامى 
وما ادراك ما الفتة الشامى بقى
 #يم_يم



قصره .. الأمير تنكز مشى من هنا
وشغل الخزوقة ابتدى من هنا
وقعدوا لابدينله ف الدرة
ومنتظرين الفرصة المناسبة عشان يقلبوا الناصر عليه ..!


والحقيقة ان كل امير فيهم كان بيقول يا حيطة دارينى
اكمن الناصر كان شرانى وقلبته وحشة قوى
والزيارة السودة دى كانت سنة 1333 او بعدها بسنة


وروح يا زماااااان وتعالى يا زمااااااااان
والامير تنكز يكبر ف النفوذ
ويوسع ف املاكه
و ثروته تتضخم
 ومش دول اللى يكبروا سنه كمان
 :(


وليه بكشر كدا ؟؟؟
عشان الراجل الكبرة المحترم دا هيبتدى خلقه يضيق
ويتخنق من أى كلمة تنقاله
 ويثور لأتفه سبب
 ويعاقب على أبسط خطأ يحصل قصاده !


ويجيله حالة كدا .. لدرجة انه يشوف خيالات
 لبشر احيانا ميكونوش موجودين
 والحالة تتفاقم 
وتوصل لدرجة انه يقرر يعلن الحرب ع التتار .. !


طبعا الاخبار تتسرب للناصر ف مصر
 اللى كان ساكت على زلات نايبه قدر الامكان
 لكن توصل لأعلان حرب
وهما ما صدقوا لموا الدور مع التتر
 لأ بقى !


وقال انا هبعتله ييجى ونتكلم
وفعلا بعتله المرسال
الكلام دا سنة 1340 الامير تنكز اتاخد شوية وقلق
طبعا من الأستدعا دا
 ومنفذش الأمر السلطانى


الناصر وصله خبر تنطيش تنكز .. بقى هيتجنن
وازاى يعمل كدا
 قوم من وسط المماليك يطلعله مين
عشان يقوله سيبلى انا الطلعة دى يا مولانا ؟؟؟



أينعم ... الامير بشتاك
اللى كانت عينه هتطلع على منصب تنكز
وقالك ف باله يخلص منه ويورث املاكه
 زى ما ورث بقتمر 
ماهى كانت عادة الظاهر !


المهم طلبها من الناصر
 والناصر وافق وقاله ماشى
روح هاتلى تنكز بقى من حواجبه
وطلعت الحملة بقيادة بشتاك وشوية امرا معاه 


وراحوا ع دمشق
وطلعوا على قصر تنكز اللى كان قرب الجامع بتاعه
وحاصروه والراجل مش وش بهدلة
وخاف على عمره واهله راح مسلم نفسه 
وخدوه على مصر


وقبل ما يطلعوا ع القلعة
بعت بشتاك اتنين من مماليك تنكز
 يعتبروا دراعه اليمين والشمال اسمهم طغاي وجنغاي
 واتوسطوا واتجرسوا ف الشوارع


والتوسيط لمن لا يعلم يعنى بيقعدوا المحكوم عليه المسكين
على حمار
 ويربطوا رجليه ف ناحية
وايديه ف ناحية بعدين يقسموه من وسطه نصين


فأحشائه تتدلى كدا من جسمه وتقع
ومنظرها طبعا يبقى بشع
ويلفوا بجثة الغلبان دا ف الشوارع
عشان يكون عبرة وعظة 
#ربنا_ياخدهم_كمان_و_كمان



قصره جوز المماليك دول اتوسطوا
 وطلع بشتاك بالامير تنكز ع الناصر
اللى سمعه كلمتين
وبعدين سأل بشتاك أهم سؤال ف حياة أى سلطان مملوكى ..


والسؤال هو :
لقيتوا عنده كام وقد ايه من ثروة ... ؟!!!
ودا أصلا مربط الفرس
وكما قال سقراط قديما
 قالك الفلوس الفلوس كل شىء ييبجى بالفلوس



طبعا بشتاك كانت عنده الإجابة فورا
وهنقلكم الأرقام من كتاب مصادرة الاملاك دا
عشان الدقة ومفيش تقريبا 
هيا مكتوبة كدا


276,000 دينار
 2,600,000 درهم
 9,102,500 درهم
 10,838,000 درهم
 8000 حمل جواهر ولألىء ودهب وحرير
دا غير الاملاك التى لم تحصر بعد 
#يا_دين_النبى




قالك ايه بقى الأملاك دى وفين .. ؟
 ف مصر وصفد 
وعجلون والقدس 
ونابلس والرملة وجلجولية
#وانا_دوخت_


طبعا الناصر سمع الأرقام
 راح ناده لرجالته علطوووووول
وقالهم خدو الحاج تنكز ضايفوه
 وفسحوه 
وروقوه 
ودلعوه 
وهشتكوه
 وخدمة خمس نجوم وكدا


وبسرعة نفذ الحراس الامر وخدوا الغلبان تنكز
اللى اول ما سمع كلمة .. السجن قعد يصرخ
 ويقول يا مولانا الرحمة دنا حبيبك و الراجل بتاعك 
الخ الخ



طبعا الناس اللى حضرت معايا قصص المماليك
 ممكن تتخيل الاخ تنكز ماذا حدث له من مآسى
بس الملخص انه راح على سجن اسكندرية 
واسكندرية يعنى ايه؟


اسكندرية يعنى اللى يروح ينسجن فيها
مبيرجعش غير جثة هامدة وفقط
وهذا ما حدث للأمير تنكز اللى مات بعد القبض عليه
 بحوالى 40 يوم تقريبا



وحد يسالنى 40 يوم ليه ؟
اقولكم محنا خلاص بقينا خبرة ف المماليك بقى
 المدة دى غالبا كانوا بيقرروه فيها
عشان يقول باقى ثروته مخبيها فين ؟؟


وانا شخصيا ممكن أتخيل ال40 يوم دول يا كبدى
 تنكز شاف فيهم ويل قد ايه
 واظنه تمنى الموت كل لحظة ف كل يوم فيهم #الله_يرحمنا_جميعا


ومات نتكز سنة 1341
وبعد موته ب4 أيام اندفن ف مقابر الصدقة ف اسكندرية
وصلى عليه اللى يعرفوه ف البلد
 والناصر أفرج عن اهل بيته ولاده وبنته


البنت دى كانت احدى زوجات خليل الاخ الاكبر للناصر
اللى مسك قبل منه وانقتل
كانت من اهل القصر يعنى
وطبعا خرست خالص ومقدرتش تتشفع لأبوها


خلوا بالكم احنا دلوقتى سنة 1341
وبعد موت تنكز بشوية صغيرة قوى
 الناصر هيمرض مرض شديد
ويأتى ملك الموت عشان يقبض روحه
وف آخر لحظة يبعت لأمرائه



وكان المقربين له ف التوقيت دا
 الامير قوصون .. والامير بشتاك
وكان والجوز متخانقين .. فهيصالحهم على بعض
وهيوصى بأحد اولاده يمسك من بعده



ويموت الناصر من هنا .. ويرجعوا يتخانقوا من هنا
 وكل واحد هيبقى عاوز يبقى هوه السلطان
وقوصون بحركة صياعة يفوت الفرصة على بشتاك 
وغيره


ويتفقوا يمسكوا ابو بكر ابن الناصر
ويسموه المنصور
وبس خلاص كدا المفروض اتفقوا
والمنصور سلطان 



ويقرر بشتاك يطلب نيابة الشام من المنصور !
المنصور يوافق
ويديهاله بشتاك يتجنن م الفرحة
ويروح يحضر ف حاجاته استعدادا للسفر إلى دمشق
 والقعاد ف مطرح الأمير تنكز ..
 حلو ؟


لأ مش حلو طبعا عشان الفرحة الشديدة هتنسيه
ان عدوه اللدود قوصون كان مرقدله
وبعتله واحد من الأمرا استناه
وهوه خارج م القلعة مودعا السلطان


والامير كان اسمه قطلوبغا الفخرى
 طلع هوه ومساعدينه على بشتاك
واتكاتروا عليه بالسيوف وقتلوه 
#ويخربيتك_يا_فخرى



ف رواية اخرى بتقول انه ما متشى واتصاب بس
وخدوه على اسكندرية
 و هناك قعد كام شهر .. ومات ف الحبس 
#سبحان_الله_بجد_بجد_يعنى


و التلاتة ماتوا
مات الامير تنكز .. والسلطان الناصر ... والامير بشتاك
 تقريبا ف سنة واحدة !! 
#شوف_الزمن


وتخلص الحدوتة وتبدأ الملاحظات
واولها عن تنكز نفسه
الراجل دا كان كويس ولاّ تربح من وظيفته ؟ 
الاجابة
 #لا_أعتقد


لأن الفلوس اللى قبضوا عليه وهيا معاه مش كتير
مقارنة ب 28 سنة يعنى
والراجل كان عنده اوقاف وريع منها سنوى محترم
 زائد انه ..


الحرامى عامل زى الأكل الفاسد كدا
ريحته بتطلع
والراجل دا لو كان فاسد .. كان انعرف
وندى مثل الاخ النشو 
اللى كان برضو ف زمن الناصر روخر
النشو دا كان فاسد فساد السنين
وابقوا اقروا قصته على رواقة
 النشو دا كان أصول انه يلم شيوخ المنصر
ويديهم دروس الحقيقة



وبموناسبة النشو بقى 
وبما اننا جبنا السيرة
 النشو دا كان حليوة وأمور وطول بعرض وافلام كدا
زى ما بيتقال على نيلة سخامة الامير بشتاك
فإيه يعنى بقى النظام
والناصر دا بيزعلنى منه كدا
وآل عاوز مملوك شبه معرفش مين .. عاوز ايه الراجل دا ؟#دا_سؤال_استنكاااارى_ومحدش_يجاوووب



حكاية كل وقت وعصر وزمن
السلطة اللى بعد شوية بتاكل ف البشر
 وتخلى شخصيتهم تنمحى وتتآكل
وميبقاش غير الكرسى والكرسى فقط لا غير


الناصر انظلم ف صغره
 وشاف الويل على ما أسترد عرشه
وعمل أعمال هايلة ف البلد رغم الصعاب اللى مرت علي
ه لكن بعد فترة ما ..
 توحد وهوه والكرسى



ولو فرضنا انه كان بيعجبه الشباب الملاح
وهوه لامؤاخذة مزاجه كدا
 فكان ف البداية بيعرف يسيطر
لكن ف النهايات بقوا هما اللى بيمشوه 
وخلوه مسخرة


وصحيح 
الامير تنكز مات موتة زى النيلة
واندفن ف مقابر صدقة زى أى حد غلبان
رغم كل اللى عمله ف دمشق والشام من اعمال عظيمة
 لكنننننن
ربنا كتبله انه يرجع بعد كام سنة
ويندفن ف الجامع بتاعه
 لما بنته هتتشفع عند السلطان الجديد
 انه يسمحلها تنقل جثمان ابوها لدمشق
 ووافق




واندفن الأمير سيف الدين تنكز ف الجامع بتاعه
تحت قبة ضريحه رقد ف سكينة
والناس كل يوم بتصلى هناك
وبينوله اكيد من دعاهم والمحبة نصيب
ومن مقابر الصدقة .. لمسجدك ومطرحك 
والعود دمشقى يا تنكز




جامع تنكز تحول إلى ثكنة عسكرية
ايام ابراهيم باشا بن محمد على ما راح الشام
وبعد شوية تقلصت مساحة الجامع شوية بشوية
 لحد ما بقى يا دوب كدا




والمئذنة بتاعته ما زالت بتزين الصور
ومكن نتعرف عليها بسهولة ف كروت البوستال القديمة
شوفوا الجمال يا ربى






و حاجة كمان 
يعنى كون حد يجدد مبنى عتيق
 فهل دا يديله المبرر انه يسرق اسم صاحبه الأصلى
هوه شغل اللطش دا الناس هتبطله امتى .. ؟ 




والمدرسة من جوا دهنوها بالزيت 
وبهدلوها
 يعنى مش بس مصر
سوريا كمان أثارها متبهدلة اهو



الامير تنكز كان محبوب من اهل الشام
 و حفيده بعدين مسك منصب كويس
وعمل تجديدات ف الجامع والضريح
 والراجل فعلا مكتوبله يتخلد واسمه ميروحش



وكما تدين تدان
 بشتاك حفر الحفرة .. وتصور انه خلص من تنكز
قوم سبحان الله يموت ف نفس السنة وف نفس السجن !!





وطبعا قصره الشهير
قصر الامير بشتاك من أشهر المعالم ف شارع المعز 





وملحقشى يتهنى 
لا بقصره هنا
ولا قصر تنكز هناك .. ف الشام 
وسبحان من له الدوام



واخيرا عشان دى معلومة ملفتة
الامير تنكز هوه تقريبا النائب الوحيد
 اللى قعد المدة دى كلها
 28 سنة 
بينما اللى جه قبله وبعده قعدوا سنة واحدة بس


والغالبية العظمى من النواب قعدوا فترات قصيرة
 ويا بيموتوا مقتولين
 يا ينعزلوا وبعدين ينقتلوا
ونفر قليل ماتوا موتة ربنا يعنى ف سريرهم


تنكز كان استثناء
 زى ما سلطانه الناصر كان برضو استثناء
 وسط السلاطين المماليك الشيك الرومانتيك
وتوتة توتة
 خلصت الحدوتة


===================


 @ahmed__saeed
 امراء المماليك دول كانوا هما العلَقه
 اللى سلاطين المماليك بيربوها فى مزارع عندهم
علشان تمص دم الشعب والسلاطين يعصروها بعد كدة


 @Fatoma999
السلطة دى بتفكرنى بفيلم(the mask)
اللى يلبس المسك يبين اللى جواه
لو خير او شر
,المشكلة فى الشخص نفسه مش فى السلطة




 @ahmed__saeed
 لأ ... بيسندوة على جماد
ويشقوة من وسطه نصين بضربه واحدة من سيف ضخم 


@ahmed__saeed انا قريت حكاية الحمار دى
 ف كام حتة كدا ... يمكن كانوا بيتفننوا ف الطرق بقى !


 @ahmed__saeed
يمكن مكانوش مصدقينها او مش عاوزين يحكوها 
عموما فيه مشاهدات متواترة لمماليك
 بيشقوا طور من وسطه نصين D:


Related Posts Plugin for WordPress, Blogger...
"حقوق الملكية والملوخية والمهلبية ... الخ
محفوظة للست شهرزاد وإياك حد يسرقها ويحاول يزعلها آغجر .. مفهوم ؟ "