الجمعة، 5 يوليو، 2013

أحمد سيف الدين .. المليونير الحافى








حكاية النهاردة م الأسرة العلوية وعجايبها

ولا تخلو من خناقات واحوال شخصية
ودم ورصاص ومؤامرات وفلوس بالهبل 
وهبل و جنان بالزوفة




نفتكر سوا كدا شجرة العيلة

 بتاعت المرحوم محمد على باشا
وازاى خلف عيال كتير
وفرع ابنه ابراهيم هوه اللى قشّ الحكم ف الآخر 
بدءا من اسماعيل





اسماعيل جه الحكم صدفة

 بموت ولى العهد الامير أحمد رفعت
اللى كان عليه الدور
 بعد سعيد وربنا افتكره ف حادثة قطر
قيل انها مدبرة بس  محدش أثبت كدا




قوم بعد موت الوالى سعيد باشا .. حكم اسماعيل باشا

فخرج الحكم من عيلة احمد رفعت
 وأولاده من بعده واحفاده طبعا 
وراح لولاد واحفاد اسماعيل





والملخص .. حكم اسماعيل وبعده ابنه توفيق

 ثم انتقل الحكم لعباس حلمى التانى
 ومنه راح لحسين كامل اللى قعد 3 سنين
وفيص




بعد موت حسين كامل

كان المفروض العرش يتنقل لأبنه كمال الدين 
كمال رفض 
وقال على جزمتى
 قوم الانجليز بعتوا لواحد مكنش على بال أى حد اطلاقااا




الحد دا مين ؟

طبعا تعرفوه 
بس هنحكى حكايته م الاول
هوه وشخصيتين كمان هما أبطال حدوتة الليلة
 اللى لو اتعملت فيلم تغلب افلام حسن الامام !!




الشخصية رقم واحد 
تبقى الملك أحمد فؤاد 

اللى يبقى واحد من ولاد الخديوى اسماعيل
وسافر معاه المنفى ف أواخر ايامه







أحمد فؤاد كان شاب تلفان وبايظ وسمعته سبقاه

من وهوه برا بيتعلم وبيكبر ف أوربا
 ابوه سفره عشان يتعلم
 فإتعلم القمار والسهر والصياعة على أصولها




ولما الخديوى اسماعيل الأنجليز شالوه

وجابوا ابنه توفيق مكانه قرروا نفيه برا مصر
خرج ومعاه كام حد من عيلته كان منهم فؤاد 
 وعاشوا ف ضيق




أغلب فلوس اسماعيل تم التحفظ عليها لتسديد القروض اللى عملها 
وعاش هوه واللى معاه ف زنقة

 لحد ما مات الأب
 وخد فؤاد ورثه ونزل مصر يعيث فسادا 





كل اللى ورثه من ابوه كانوا حسب الروايات
 800 فدان

ودول يعتبروا ايه يا عينى ..؟!
 #كلام_فارغ_طشبعن
 المهم الواد قعد يبدر ف المال يمين وشمال بهبل

كان قومرتى يركب وياكل ويسهر
وميدفعش اللى عليه للخدم بتوعه وعليه ديون لكل الناس
 ومقضيها صعلكة لدرجة انه لما بقى ملك .. 
الشعب سماه الملك القارح !




ف سنة 1895 الديوان اتركمت عليه

فولاد الحلال اقترحوا عليه يتجوز
وشاورلوه على اميرة من الاسرة المالكة
 ومعاها فلوس كتير اسمها شيوي كار





الانسة شيوى كار وبنقولها احنا المصراوة "شويكار" 

كانت من فرع الامير احمد رفعت واولاده
 اللى كانوا اغنيا وبالتالى احفاده بالتبعية
وكما تذكر الروايات ان فلوس فرع ابراهيم باشا

كان بعيد عن مغامرات اسماعيل المالية
فورثته احتفظوا بثرواتهم
واشهرهم ... الأمير يوسف كمال
اللى كان من الأغنيا بإفتنااااا 





المهم .. فؤاد ابن ال 27 عاما اللى كان صايع

ومقطع شادر سمك بحاله
رمى شباكه على شويكار القطة المغمضة
وقالها نتجوز يا شوشو 
شوشو وافقت طبعا





كانت بنت اصول والظاهر حبته قوى

وهوه عرف يغطى على مصايبه واخلاقه النيلة
وفضايحه لدرجة انه لما قالها مهرك 10 الاف جنيه
بس هتاخديهم حين ميسرة 
الست معترضتش






واتجوزوا 1895 ف حفلة ع الضيق كدا

 ف قصر البستان اللى ف باب اللوق
 وكتبوا الكتاب هناك
وقالها تسيبى قصر أهلك ف الدوبارة
وتيجى بيتى 
عش الزوجية دا كان فين ؟
يبقى ف قصر الزعفران 





وبس يا سيدى سابت العروسة شويكار بيت اهلها

امها نجوان واخوتها الأتنين
سيف الدين ووحيد الدين ف الدوبارة
 وراحت على قصر جوزها ف الزعفران 
حلو ؟
لاااااا مش حلو 

عشان البت هتروح من هنا
وتبدأ المشاكل من هنا فؤاد كان بيسيبها ويطفش
ويروح قصر البستان يقعد هناك
 ويبرطع براحته ويخونها 
ومش بس كدا






كان بيسهر ف كلوب محمد على يسكر

ويلعب قمار ويضيع فلوسه
وقصر البستان ف باب اللوق كان جنب الكلوب
اللى ف شارع قصر النيل







ويسيبها بالايام ومش بس كدا

 كان مبيصرفش عليها 
وسايبها تدفع فلوس الخدم والقصر ومصاريفه
واللى زاد وغطى انها عملتله توكيل
 فكان بياخد من فلوسها عشان يقامر ويهيص 
 يعنى كان مستف الاونطة جوا الشنطة ومسكنيص
حاجة عنب العنب




بس مجراش حاجة ... 
يعنى كل ست ممكن بختها يميل عادى

 الست اتحملت وخلفت اول عيل ..
 كان ولد سموه اسماعيل
 وبعدين ربنا افتكره بعدها بشوية
وخلفت تانى منه بنت .. سموها فوقية
 ولحد كدا الدنيا كانت ماشية
لولا ان ست الحاجة نينة ام فؤاد 
تدخلت ف الحكاية
وربنا ما يوريكم ف حمواتكم يارب 





ام فؤاد كانت ست صعبة 

تركية تركية على أصوله 
ومحدش بيطيقها
ويتفاتلها بلاد 
كانت معتبرة نفسها سيدة القصر
 والبت شويكار دى رقم تلاتة خمسة ف البيت 





ف يوم كدا صاحيين الصبح لا بينا ولا علينا

ويا نينة هنطبخ شركسية بالفراخ النهاردة
راحت ام فؤاد قايلة لأ .. هنطبخ ملوخية 
 شويكار أصرت 
حماتها تربست 
وكلامى انا اللى يمشى لأ كلامى انا 
كلمة ف شخطة ف زعيقة 
 ولعت يا معلم





فؤاد مكنش موجود والخناقة شعللت

 الحماة هزأتها والموضوع وسع 
 شويكار قالتلها مش قاعدلك
ولمت بؤجتها وما صدقتيا ختشى 
وجررررى على قصر الدوبارة 
عند أمها واخوتها





وراحت البونية على بيت اهلها غضبانة

وهنا هتظهر الشخصية رقم 3
بعد فؤاد .. وشويكار
 وهوه الامير أحمد سيف الدين




الامير احمد كان دماغه خفيفة حبة

ومعروف عنه انه مضطرب ومش مضبوط 
وكان بيحب اميرة ف العيلة وهيا لأ
 فكان بيسكر عشان ينساها 
 افلام كدا 
المهم
البت رايحة بيت ابوها معيطة
وشايلة الشنطة بالعفش بالنملية

 مالك يا فوزية .. ؟
قالتلهم ..  حططونى الاول
 خدوا منها البؤجة
وقعدت تحكيلهم على كل حاجة
والخناقة من اولها لأخرها 
وقطع فؤاد وام فؤاد وأم اللى جابوا أُمين فؤاد 
#هه




ونشرت الغسيل المتسخ كله 
ومبيصرفشى عليا

وبياخد فلوسى 
ومبيقعدشى ف البيت
وبيهلس ف الليالى والسهرات 
 وسايبنى مع امه اللى خانقنى
وانا مش عاوزة ارجع الخ 
 كل دا وأخوها احمد شايط ومتنرفز جدا




المهم بعد ما خلصت عياط

 قالولها خليكى هنا
ومترجعيش
 قصر ابوكى اولى بيكى
اقعدى وكلى لقمة وارمى عشرة
 لحد ما فؤاد يعرف قيمتك وييجى يرجعك !




شوفوا احنا لحد دلوقتى

 حلوين ومؤدبين وكويسين
وولاد ناس ومغلطناش ف الجدع اهو 
 البت مقموصة هييجى يصالحها
كل المطلوب لحفظ ماء الوجه انه يتهبب ييجى 
 بوسة على جبينها و حقك عليا 
وخلصنا .. صح ؟؟



لأ مش صح

عشان اللى هيحصل عكس كدا خااااالص
 سى فؤاد باشا البرنس ابن الخديوى
هيرجع قصر الزعفران يبص على كيس المخدة
اللى راميها دى 
ميلقيهاش!






ويسأل راحت فين ؟

تروح الست ام فؤاد منقية أحلى كلام وتقوله
وتديله ف حقن وتسخنه
قوم يخرج من عندها بيولع نار ويطق شرار




وراح فؤاد على قصر الدوبارة عند عيلة مراته

شويكار كانت بتتمشى ف الجونينة مع اخوها أحمد
 اللى قعد يهدى فيها ويروقها 
فؤاد شافهم راح طالع ع القصر




دخلوه وقال للخدم اندهوا ستكم شويكار

قولولها جوزك منتظرك ف الصالون
نزلت واحدة من الخدم تندهها
 شويكار طلعت ودخلت ع الباشا 
وكانت دخلة فحلوقى



احمد أخوها دخل وراها الصالون ..

 اول ما فؤاد شافه قاله انا طلبت اشوفها لوحدها
 أحمد اتكسف وراح خارج علطول
وقعد جوز العسافير يتكلموا





دلوقتى حد هيقولى انه جه جنبها

 وراح حاضنها وبايس راسها
 وقالها متزعليش
ونينة دى هنبقى نحطلها زرنيخ ف الشركسية
ونخلص منها وحقك عليا
وطلع المعلقة وكل بعقلها حلاوة 
ومشى حالك يا فؤش 





غلابة والله .. !

عشان اول ما الست قعدت 
اتفتح فؤاد كالماترليوس
ف وشها وادى ف رصاص 
وكله ضرب ضرب مفيش شتيمة 
 سبتى البيت ليه يا روح مامتك 
 ازاى تخرجى من غير اذنى 
نينة تقول اللى يعجبها 
انتى ولا حاجة 
وهترجعى والجزمة فوق رقبتك !





طبعا شويكار مقعدتش ساكتة

وراحت رادة
انا مش جاريتك
و لأ مش راجعة
انا تعبت من غيابك وعمايلك
 انتا مبتقعدش معايا
 وامك تخينة قوى قوى يا ممتاز
 ومش هرجع تانى هناك ابدااا




فؤاد مسكتش وراح شاتمها وشاتم امها

راحت قايلله امك وأمين امك
وابوك قتل جدى عشان ياخد العرش 
وتنابزوا هما الجوز بالعائلات والأصول العاااائلية 
وطلقنى يا ابن المبقعة ... 
وهوبااااااااااا 
 الكلام كبر 





فؤاد بكل عصبية قال 

 لأ هترجعى وراح شاددها بالعافية
راحت مصرخة .. اخوها احمد سمعها من برا
راح داخل عليهم الصالون
وبينقذها من ايد فؤاد
راح فؤاد زاقه لورا 
احمد قام مديله بوكس ف وشه اذ فجأتن!







طبعا كانت حركة جنان صرفة

عشان لوشفنا صورة احمد العصفورة
مقارنة بفؤاد الوحش
مفيش داعى اشرح الباقى بقى
فؤاد بعد اللوكمية اللى خدها فجأة

 راح مدى لاحمد اتنين تلاتة زيهم
 وأبشع
 احمد أتكوم ع الارض
 فؤاد راح مقومه ومكمل عليه
 أحمد لقى نفسه هيموت
راح جارى من قصاده ليقتله
 فؤاد قعد يزعق ويصرخ ويشتم
وراح لافف يدور على شويكار
اللى كانت يا عينى متكومة ف ركن من الذعر
 وراح جايبها من شعرها





وجرها ع السلم بتاع القصر لحد برا

وحطها ف العربية اللى كان جاى بيها
 وخدها على قصره الزعفران دون أدنى مقاومة
من حد... ابن اصول مصفى !!!




بس وحبسها هناك زى الكلبة بقى

 ومنع اى حد لا اخوها احمد ولا امها
 ولا جنس حد م العيلة
 انه يهوب ناحيتها 
ولا يقابلها 




وقعدنا كدا شوية كتير
شويكار مخطوفة ومحتجزة رهينة ف بيت جوزها
حد يقولى يا شوشوحرام عليكى

طب دا تلاقيه بيحبها خالث مالص بالص
شافها بتبعد
 فأتجنن ولاّ حاجة !!




أقولكم أبضنننننننننن
دا صنف مبيعرفش يحب الا نفسه وفقط

وكل ما هنالك انهم ف وسط الخناقة
 شويكار برطمت بكلام عن انها هتلغى توكيلها له
فاتجنن عشان كدا
هوه أصلا متجوزها عشان الفلوس

ولما تسحب التوكيل بالتصرف ف أملاكها
مش هيعرف يغرف من الفتة دى براحته
وطبعا مش هيسمح ان بير الفلوس يجف 
أنتوا بتهرجوا ؟!!




الأم والاخ قعدوا يوسطوا كل الناس

 بما فيهم الخديوى عباس حلمى نفسه
لكن محدش قدر عليه 
عُصبجى متأصل 



وشويكار بقت تبعت لأخوها جوابات

وتقول كلام من عينة انها مبترضاش تاكل
ليكون فؤاد حططلها سم ف الاكل عشان تموت ويورثها
وانها خايفة وانها تعبانة وانها حاسة انها هتموت قريب 
:(



طبعا اخوها اصلا كانت أعصابه خفيفة

واللى قراه جننه أكتر
 وقرر بعد ما أتسدت كل السكك ف وشه انه يتصرف
 هتعمل ايه يا حمادة ؟!!!



خلوا بالكم ان القصة دى حصلت سنة 1898

يعنى بعد جوازهم ب3 سنين
 وكان فؤاد لسه حتة البرنس الصايع
اللى الناس بتقول عليه شمام .. من فلسه واخلاقة النيلة
ولسه مبقاش الملك ولا حاجة !




الامير احمد سيف الدين قرر ينتقم من فؤاد

 اللى ذالل أخته كدا وحابسها وبيهددها ف حياتها
وراح اشترى مسدس وحطه تحت باطه
وطلع على كلوب محمد على




الكلوب دا كان عبارة عن نادى

عملوه بالاكتتاب للباشوات وكبار رجالات البلد
 اهو بدل ما يقعدوا ع القهاوى يشربوا شاى وشيشة 
مع العامة والدهماء اشكالنا وكدا




احمد كان عارف ان فؤاد بيصرمح هناك كالعادة

وبيستعد لسهرة ولعبة قمار جديدة من بتوعه
راح متجه للكلوب




الغريب بقى ان فؤاد كان قاعد ف البلكونة

 اللى ع الناصية دى
وشايف احمد جاى من بعيد
ولما شافه قال لصديقه نقولا صباغ بهزار:
 دا شكله جاى يقتلنى !




ومهتمش للحكاية وراح داخل على صالة القمار

 عشان يبتدى اللعب
الامير أحمد وصل لباب الكلوب
وسأل عن فؤاد قالوله ف الدور الأول حضرتك 
راح طالعله




فؤاد قرر يلعب بلياردو شوية قبل ما يكمل السهرة

دخل عليه الامير احمد سيف الدين بعنف
 وراح مطلع مسدسه 
وزى أفلام الابيض واسود بقى تمام
 :))



قاعة البلياردو كان فيها وزير الحربية ووزير المالية

واحد كان بيشرب قهوته والتانى بيقرى جرايد
لما وزير الحربية شاف الامير أحمد 
قام له احتراما




وبعدين التلاتة .. فؤاد والوزيرين اتفاجئوا

لما الامير احمد طلع مسدسه
وراح قايل لفؤاد هقتلك ..!
 فؤاد الجبان استخبى ورا الواقفين 
وبعدين هرب




ولسه بيجرى ناحية باب القاعة

عشان يهرب خالص من وشه
راح الامير أحمد دايس ع المسدس
وطلع منه تلات رصاصات ف اماكن متفرقة
فؤاد وقع ع الأرض
رصاصة جت ف فخده

والتانية بالقرب من وشه
والتالتة ف بطنه من تحت ودخلت ع الكبد
 وراحت جنب القلب
 قصره 
فؤاد أتشخرم ع الآخر وكان تقريبا بيموت !




انما لا مات ولا نيلة برضو فضل فيه الرمق

 وقعد يبرطم ف الكلام نظام انا بموت خلاص
لقد قتلنى الحنش
 انا قتلت واتقتلت 





الأمير أحمد سمعه لسه بيتكلم راح
ضاغط ع الزناد تانى

 لقى الرصاص اللى ف المسدس خلص
اللى حواليه فهموا فحاصروه 
وقالوله ادينا المسدس يا قناوى
عنجوزك هنومة خلاص 



الامير أحمد دون ادنى مقاومة راح مديهم المسدس

 وفورا جت الحراسة بتاعت الكلوب
وبلغوا قسم عابدين اللى جم
 واخدوا الأمير عشان ياخدوه يفسحوه



طبعا الدنيا هاجت والأسعاف
والقصر والصحافة وأفلام 

 بينما البائس الأمير احمد يقبع ف السجن
تحت الحراسة
 واتحول لمحكمة خاصة بالعيلة المالكة
أصلهم كانوا عاملين لروحهم محكمة خصوصى
اكمن قضايا العيلة خصوصيتها مينفعش تبقى مشاع
ويروحوا يقفوا على باب زنانيرى
 يشدوا ف شعر بعض وكدا
ميصحش !




طبعا الكل توقع ان فؤاد هيموت

انما الحقيقة انه قعد ف المستشفى مدة لحد ما تعافى
 وخرج زى القرد ولا الهوا
فؤاد كان من النوع اللى بيحافظ على صحته جداااا

 بس يقال ان احدى الرصاصات جت بالقرب من حنجرته
 وهيا اللى خلت صوته مبحوح 
ومحشرج لبقية حياته .. !




المهم .. الحادثة دى حصلت

وطبعا الدنيا كلها عرفت وردود الافعال اختلفت
العيلة المالكة اتضايقوا بس مستغربوش
عشان عارفين طبع فؤاد الزفت !
ومستغربوش كمان من فعل الامير احمد فؤاد

اكمن دماغه كانت خفيفة زى ما قولنالكم
ثم انه كان بيدافع عن أخته اللى اتبهدلت 
وحس بالخطر الفعلى على حياتها 
وكمان مستغربوش من رد فعل شويكار شخصيا

 اللى ضميرها وجعها لعشر دقايق بعد ما سمعت الخبر
 وبعدين راحت قايلة
 "ف 60 داهية" 
حسب ما قيل ف مذكراتها





وبعدين 
الموقف أتنيل جدا

 الامير احمد سيف الدين ف الحبس
ومعرض لعقوبة كبيرة
وفؤاد ف المستشفى بيتعافى وسايق العوج
وشويكار متعلقة وعاوزة تخلص
وتطلب الطلاق من فؤاد اللى لما خرج من المستشفى

استوعب انه مينفعش يعيش معاها تانى
 دا المرة الجاية هتحطه ف أكياس .. 
خلاص يعنى مفهمومة





وراح مطلقها 
لكنننننننن

قرر ينتقم منها هيا واخوها أشد انتقام عن طريق القضية
اللى بقت موجودة بينه كمجنى عليه 
وبين الجانى .. الامير احمد !
المحكمة قررت ان الامير احمد مختل عقليا

وقرروا يبعتوه مصحة ف انجلترا
والشكل من برا انه رايح يتعالج
بينما كان دا عقابه الحقيقى 
والبشع 




اللورد كرومر ساعد ف تنفيذ المهمة دى

بضغط من فؤاد وعلاقاته الممتازة بالانجليز من بدرى بدرى
 مستغلا العلاقة الزفت بين كرومر 
وعباس حلمى التانى



لو حكيت تفاصيل محاكمة الراجل دا

تذهلوا من كم ما فيها من بشاعات
 بس مختصرها عشان وجع القلب
 انه اتسجن ف الاول
واشتغل ف ورشة النجارة ف سجنه
وعانى الأمرين بصفته ابن عيلة وامير
من معاملة الزملاء ف الحبس
 لكن الحقيقة ان زمايله ف السجن
كانوا ارحم ألف مرة م الناس اللى برا
 :((
عشان بدأت كما كتب وقتها "حرب الأمراء"

 وكل طرف من الخصومة ابتدى يستخدم نفوذه وعلاقاته
ويظهر أحقر ما عنده 
عشان يدوس ع التانى ويحطمه





الأنجليز اتدخلوا ف القصة كيدا ف الخديوى

والخديوى مقدرش يتجاهل الجريمة
وفؤاد توحش وتغول اكتر
 وشويكار واخوها انطحنوا ف النص
القصة ف الاول والآخر 
كانت قصة فلوس

 ودا هيتضح بعد ما يقدم الأمير احمد ألتماس
 فيقرروا انه مجنون
ويبعتوه انجلترا يتعالج 
وفلوسه يتحفظوا عليها
والمجلس الحسبى سنة 1900
يتحفظ على امواله
ويحطها تحت اشراف ابن اخوه اللى كان حرامى
وأكلتى وفيه كل العبر
والامير احمد يتعفن حرفيااا ف مصحة العلاج بأنجلترا

قولولى كام سنة ؟
 25 سنة 
25 سنة يا اهل الخير 
......................
ولا تعليق 







وكل ما يعدى وقت لعلعا تُفرج 
لكن من سنة 1900 لحد سنة 1925

كانت الدنيا اتغيرت للأسوأ
 للأسف
فؤاد مسك الحكم سنة 1917 بس قبل كدا
 كانت كل محاولات شويكار لأطلاق سراح اخوها بتفشل
الام قبل شويكار ...

أم الامير أحمد عملت كل اللى يعمل
ورفعت قضايا والتماسات حتى لملكة انجلترا
عشان يخرجوا ابنها من المصحة 
ويتأكدوا انه عاقل
بس طبعا الاخوة الرابضين على كرسى العرش

واحد ورا التانى مكنش من مصلحته
ان الامير أحمد يرجع أبدااا




 ليه كل دا 
عشان الفلوس ؟!! 
أقولكم أيوه
يكفى أقولكم ان طلعت حرب سنة 1920

لما حب يعمل قايمة بأغنى عشر أشخاص ف مصر
احتفالا بأنشاء بنك مصر
كان الأامير احمد سيف الدين رقم (2) ف القايمة
بعد الأمير عمر طوسون ... !!!




الامير احمد 
كان تانى أغنى انسان ف مصر

كان مليونير بس سبحان الله .. ع الورق وبس
ومشفش ولا مليم م النعم دى كلها
 اللى كانت عنده ولا بيشم ريحتها حتى !!
كان دخل أراضيه وريع ممتلكاته سنويا 
بس ...  حوالى 120 ألف جنيه
بينما هوه بيوصله ف السنة 4 الاف جنيه فقط .. !
الباقى بقى 
بيروح فييييييييين ؟؟؟!!
مفيش داعى أقول بقى ان فؤاد من اول ما قعد ع العرش

 وهوه بيغرف من الفلوس دى
 ومحدش بيقوله تلت التلاتة كام
والأسم ان فلوس الامير تحت تحفظ الدولة




شويكار وامها جريوا ف كل حتة

 عشان يخرجوا الشاب ومقدروش ابدا
واستعانوا بمحامين كبار منهم مصطفى النحاس 







والقصر استغل الحكاية دى ف انه يظهر النحاس

وكأنه جشع وبيجرى ورا الألوف من الجنيهات
ومعرفش ايه حركات وقصص كدا
المختصر المفيد 
ان الدنيا ادربكت
وكل خرابة بقى يطلع فيها عفريت 
والقضاء النزيييييه وقتها موقفش ف صفهم
رغم انهم جابوله شهادات من دكاترة ومن لجان
 بأن الامير احمد بقى زى الفل
وخف خلاص 
ولكن ... لا حياة لمن تنادى !!




وف النهاية لما شويكار وامها لقوا الدنيا نيلة كدا

 والأمير احمد صحته بتتدهور
 راحوا مديين للحراس بتوعه رشاوى ومبالغ معتبرة
وهربوه من المصحة !




ومن المصحة على تركيا

اللى قعد فيها شوية هوه وامه وشويكار
وبعدين خبر هروبه وصل مصر
 وفؤاد اتجنن واتشال واتحط وبعت للخارجية الانجليزية




الجرايد هناك قالت لازم الناس تحقق ..

 الداخلية الانجليزية قالت هوه خرج خلاص من عندنا
 الأم والابن والاخت
هربوا جميعا على فرنسا وبعدين ايطاليا
وهما متنكرين عشان محدش يقفشهم 





واستقروا ف النهاية ف تركيا زى ما قولنا

ف قصر
كانوا الأم وشويكا اشتروه على البسفور 
وقعدوا يطببوا فيه ويخرجوه من حالته المتردية
 بعد ما خرج من المصحة عمره خمسين
لكن كأنه عنده 150 سنة 
ويمكن اكتر







كان ف اول بدايات قعاده ف المصحة كويس

 وحالته المعنوية مرتفعة وعنده أمل يخرج
 لكن بمرور الزمن .. انكسر
وقعدوا يدوه ف ادوية 
ويشرب ف سجاير ومكيفات عشان ينسى 
لحد ما انهك تماما



حد يقولى الملك فؤاد عمل ايه؟

أقولكم عمله اسود ومنيل
كان هيتجنن عشان خايف ع الملايين لتطير منه
وبعت للقيم على الامير احمد 
وربط معاه تانى
وطبعا قرار رجوع الامير أحمد كان مستحيل
وبالعكس
كان الغلبان عامل حراسه عليه هوه وامه واخته
 خوفا من رجالة فؤاد لتقتله .. 
منتهى البؤس 
:(



وفضلنا على هذا الحال الامير أحمد وامه واخته

يبعتوا التماس بزيادة نصيبه السنوى من الفلوس
 اللى بتوصله 
والملك فؤاد يتعنت ويقرفه ويعاديه !







وفؤاد يتوحش ... لحد ما ربنا يكرم البلد

ويقرر يريحنا منه ويموت سنة 1936
ف داهية الله يجحمه
ويموت الامير أحمد بعده بسنة واحدة بس
وميلحقش يرجع يعيش ف مصر
ولا يطول مليم من ثروته كما كان يجب







يموت الامير احمد أغنى شباب المحروسة

كما كان يطلق عليه
يموت سنة 1937 بعد فؤاد بسنة واحدة 
وشويكار 
هيا اللى تورث كل الثروة دى ! 








وتوتة توتة ... خلصت الحدوتة

ونقول الملاحظات 




1) لما قريت قصة الراجل دا

عرفت فعلا معنى المثل الشعبى بتاع .. 
من ماله ولا يهناله !



2) ايه اخلاق العربجية دى ؟!

 والله فؤاد دا اكدلى الحكاية بتاعت ان
الراجل الواطى بيفضل واطى
 واخلاقه نيلة 
امير كان ولا غفير




3) الرجالة مالها يا جماعة ؟؟؟
الست من دول تتدلع على جوزها
عشان يصالحها قوم يضربها .. !!
 ليه لما بييجى يصالح الست بتاعته
 مبيعملش زى الافلام ويبقى لطيف 
بدل ما يشد شعر ام اولاده
ويجرجرها من ع السلالم .. !



4)كما تدين تدان
والكلاكيع اللى عملها فؤاد ف نفسية شويكار

 طلعت على ابنه فاروق بعدين
ويقال ان شويكار كانت بتتعمد تفسد اخلاقه
 انتقاما من ابوه




5) محدش يقول ان شويكار مفترية
وملمتش التعابين ليه يمكن كان انصلح حاله .. ؟

عشان الموقف دا اتكرر بالنص مع نازلى 
العروسة رقم 2 اللى اتجوزها فؤاد 
عشان يجيب منها ولى العهد .. الملك فاروق 
والست اتبهدلت معاه بهدلة السنين بسبب طباعه الزفت دى





6) ف نفس السنة اللى فؤاد اتجوز فيها 
شويكار... الزوجة الاولى 

كانت 
الملكة نازلى ... الزوجة التانية 
لسه بتتولد وبتخرج من بطن امها
 ميلودى تتحدى الملل




7) بغض النظر عن ان القتل جريمة

بس فؤاد يستاهل
لكن الشاب احمد يا كبدى اتبهدل قوى قوى
سجن ومصحات وهروب وفقر ومرض
 ومشفش يوم عدل لحد ما مات تقريبا




8) ايه الدنيا الغريبة دى

 مليونير ومن أغنى أثرياء مصر
وقاعد ف اوضة محبوسوسط المختلين 
لا يملك انه يروح الحمام حتى من غير أذن حراسه 
 #دنيا_عجب





 آه ...
(9
 فؤاد دا عاوزله دور ف جهنم لوحده
ويتفتح فيه الشقق على بعض
 ومحدش يقعد معاه خالص ...
 يتشوى لوحده كدا 
ويقولك ملكنا ومولانا وزف
الشمحطجى دا  كان ملك مصر يا سادة 
وادى اللى بيجيلنا م التوريث 
وسنينه !!




10) و يعنى يعنى اللى يخطط لجريمة قتل  

مش يضبط التظابيط
3 رصاصات ف المسدس بس يا احمد ؟؟
طب اهو ممتشى 
وقعدنلنا ف أرابيز البلد كلها 
لما طلع عينينا 
مش كنت تعمر المسدس يا شيييخ ؟!!




11) شويكار الاميرة بنت الامرا اتمرمطت كدا 

عشان تقولنا نحن الحريم 
ان الرجالة الأوغاد ف كل مكان وزمان
ولما نتعرض لموقف مماثل 
منزعلش ونفتكر انها  بتحصل ف أحسن العااااااااائلات





12)  وبعدين الأمير احمد مكنش يضايق نفسه
رصاص ايه ودم ايه وبتاع ايه
كانت شويكار تندهلنا بس وتقول يا جزرررر
وكنا جبنا اكياسنا وسواطيرنا
وتقمصنا جميعا دور نبيلة عبيد 
وعملنا الأصول وروقنا فؤش الروقان كله 




13) كل الهرى دا عشان الفلوس وسنينها

طب اهو شويكار ماتت بعد 10 سنين تقريبا
 من موت اخوها 1947 
وكام سنة والثورة قامت
والفلوس دخلت لخزينة الدولة
ولا حد انبسط 
 ولا خد معاه حاجة ف قبره !




14) لأ خلاص مفيش حاجة تانى

 بس بخصوص الملايين اللى عملت كل البلاوى دى
 اطلعلى يا بنى 
بمشهد حسين رياض ف أى فيلم قديم
 وهوه بيقول
 ليست السعادة ف المااااال .. يا آماااال




ف القصة دى تحديدا 

كان عنده حق 
وتصبحوا على ألف خير :)




----------------------------




ahmedsaeed @ahmed__saeed 

 دا وزير الحربيه اللي هرب
 :-D


ahmedsalah750® @ahmedsalah750 

الموت مابيلمش



™الدبدوب ® @mazforever 

بتحكى حدوتة من غيرى !!!؟؟؟ خيااااااانة





Related Posts Plugin for WordPress, Blogger...
"حقوق الملكية والملوخية والمهلبية ... الخ
محفوظة للست شهرزاد وإياك حد يسرقها ويحاول يزعلها آغجر .. مفهوم ؟ "