الأحد، 8 سبتمبر، 2013

ليلى وتوبة وابن الأذلع




كمان شوية حدوتة 
عن اللى يقطعه الحب والحبيبة واللى بيحببوا عليه ...




الناس اللى متابعة شهرزاد
 عارفين اللى فيها بقى
 حكايات العشاق
والحبيبة بتوع زمان الحلوين دول
اللى بيحبوا لحد ما الحب يقصف عمرهم 



وعلى غير العادة
 القصة النهاردة بطلتها الست مش الراجل
والحبيبة مش الحبيب
اللى عادة كان شاعر ومشهور
والمحبوبة مجرد اسم عرفناه عن طريقه وبس



حدوتة الليلة دى بطلتها هيا ليلى الاخيلية
شاعرة ف عصرها صدر الأسلام يعنى 
وكان يشار اليها بالبنان
ويستقبلها الحكام والولاة 
ويحلف بشعرها اولاد كارها من الشعراء



والست ليلى عمرّت وعاشت زمن عمر بن الخطاب
 ودخلت على عصر عثمان
وكتبت شعر ف رثائه
 لكن كانت اخر مرة تكتب ف السياسة
وبعد كدا ركزت ف الشعر العذرى



ليلى كمان عاشت ف زمن معاوية بنى ابى سفيان
 وفضلت لحد ما مسك ابنه وحفيده ..
وعشان سنها و شيبتها كان ليها مكانة
وسهل تشوط ف أى حد 
ويسكتولها
 :)



ولوّلا بقى وهيا شابة صغنونة
زيها زى كل بنات العرب حبت شاب قريبها من بعيد
اسمه توبة بن الحمير
وغرقوا ف بحر الحب سوا
 لحد ما جت اللحظة اياه



اللى هيا انه الاخ يكتب فيها شعر
ويسيحلها وسط القبائل
وامة لا اله الا الله تعرف ان توبة بيحب ليلى
وليلى بتحب توبة 
ويا ريت جت على كدا وبس



دا لحظهم الدكر ان ليلى شاعرة
وقعدت الست تهيم وتحب فيه
وتقول ف قصايد
وياخدوها المغنيات ويغنوها
 يعنى الفضيحة كانت بالدوبل 
والدنيا اتعكت



وراح توبة كعادة كل عريس يتقدم لأبوها
وجوزنى بنتك يا عم الحاج
 راح عم الحاج طارده من الخيمة
 وقاله لأ بعد ما فضحتنا ويحك وثكلتك مامتك وكدا



العادة وقتها ان اللى يقول شعر ف واحدة يبقى فضحها
وان فيه بينهم استغفر الله العظيم بقى
 ولو الأب وافق على جوازهم 
يبقى بيدارى ع المسائل 
فبيرفض



وعادى ينكسر قلب جوز العصافير
ويفضلوا يحبوا ف بعض ويتقابلوا
 لحد ما يظهر هادم اللذات ومفرق الحبيبة
يتقدم عريس لليلى 
عشان يتجوزها غتاتة غلاسة



وبقول غتاتة غلاسة عشان حاجة قرف يعنى
لما تبقى قصة حب البت والواد مغرقة الدنيا
وتيجى انتا يا عم تقول اخدها انا
وعشان تزود ف نكدهم نكد
 #بكرهك_انا



المهم ابو ليلى ما صدق وراح مجوزها للعريس
 اللى اسمه ايه بقى
 ابن الأذلع آه
والله دا اسمه وزمبقولك كدا #وانا_عارف_بيجيبولنا_الاسامى_دى_منين؟




المهم ليلى عملت مناحة 
ومش عاوزاه
ومبحبوش وبحب توبة
 الأب طبعا سمع كل الكلام دا من ودن
وخرجه من الودن التانية 
وقالها هتتجوزيه ورجلك فوق رقبتك
#مقطع_من_اى_فيلم_عربى_قديم



توبة راخر حاول كل المحاولات
 وساق على أبوها كل اللى يعرفوه
 لكن الأب تربس
وفعلا جوزها لأبن الأذلع ف ليلة زرقا
 تفتكروا خلصنا على كدا .. ؟!!




لأ طبعا لأن ليلى وتوبة فضلوا برضو يقابلوا بعض
والحقيقة المصدر اللى قريت
منه بيتعجب جدا م الحكاية دى
 لأن جوز ليلى كان غيور جدا عليها ...
كان بيشيط لو حد باصلها او عاكسها او زارهم
وابدى انه من معجبينها ومحبى شعرها
كان بيغير بجنون
 فازاى حصلت المقابلات بين ليلى وتوبة 
وعدت عادى ؟



هوه جايز كان ف الاول بتتم ف السر
 لكن يوما ما اتعرفت والخبر راح لجوز ليلى وابوها
 فبدال ما يقتلوها راحوا رايحين ع الوالى 
واخدوا منه فتوى
الفتوى كانت باختصار .. اهدار دم توبة
واللى يشوفه يقتله عشان ميصحش يقابل واحدة متجوزة
 ويفضحها .. الخ الخ 
وفعلا صدرت الفتوى وليلى اتجننت




كانت متعودة تقابل توبة ف مكان يخصهم
 محدش يعرفه غيرهم فقررت تحذره
وخرجت مع شوية صديقات عشان جوزها ميشكش فيها
ويراقبها لو خرجت لوحدها .. !





وف الطريق المعتاد لمكانهم اياه
اول ما لقت توبة جاى على الجمل من بعيد
 راحت رافعة البرقع بتاعها
 اول ما توبة شاف وشها مكشوف فهم ان فيه خطر






لأن المعتاد ان ليلى و أى بنت بدوية تغطى وشها
 لما شافها كدا عرف ان فيه خطر
 راح مغير سكته
وهرب
ونجا من القتل


بس الحقيقة ان الهروب دا مستمرش كتير
لأن توبة اللى كان مشهور بالفروسية والطيش
دخل ف معركة بينه وبين شباب احدى القبائل
اللى اغار عليها 
وانقتل



لما وصل الخبر لليلى كان يوم مطلعتلوش شمس
وانقهرت عليه
وفضلت تقول فيه شعر لحد يوم ما ربنا افتكرها
 واشتهرت بين العرب بأنها حبيبة توبة !!




ليلى كانت دايما ف وضع مقارنة بينها وبين الخنساء
لكن ليلى كانت أقرب لقلوب الناس
لأن شعرها كان فيه غزل ورثائه قليل
مكنتش نكدية يعنى زى الخنساء



وكان الحكام زى ما حكينا بيعزموها ف مجالسهم
 ويسمعولها ومنهم معاوية بن ابى سفيان
اللى كان بيستغرب من حبها لتوبة
 والشعر الفظيع اللى بتكتبه عنه





معاوية كان بيوصف توبة بأنه عاهرا خاربا
فلما مرة ليلى كانت ف مجلسه 
سألها انتى شايفاه ازاى ... ؟
فردت : يا أمير المؤمنين سبط البنان حديد اللسان
 شجى للأقران كريم المختبر عفيف المئزر جميل المنظر
 فيرد معاوية : ويحك يا ليلى جزت بتوبة قدره
فترد الست : والله يا امير المؤمنين لو رأيته وخبرته
 لعرفت انى مقصرة فى نعته
وانى لا ابلغ كنه ما هو أهله 
#يا_عينى_ع_الحب
شوفوا الجمال 



وكان كليث الغاب يحمى عرينه 
 وترضى به اشباله وحلائله
غضوب حليم حين يطلب حلمه
وسم زعاف لا تصاب مقاتله




معاوية على غروره وكبريائه لكن كان بيعجبه شعر ليلى
ويقبل انه يسمع راجل تانى يتمدح ف حضرته
وكان عاجبه قصة الحب دى 
رغم ان رأيه ف توبة انه واد صايع وحاجة نيلة





لكن الوضع دا اختلف ف زمن حفيده مروان
لما كبرت ليلى وبقت مسنة
وراحت لعاتكة زوجة الخليفة
ودخل عليهم مروان 
سمع شعرها فعرفها علطول 
وسألها تانى
انتى ليلى صاحبة توبة؟
وازاى تقولى فيه كل الصفات الحلوة دى
 وسيبتلنا ايه يا ست انتى ؟!!
راحت ليلى خارجة من عنده غضبانة
 ورزعته قصيدة كالآتى



أعاتك لو رأيت غداة بنا
عزاء النفس عنكم واعتزامى
أأجعل مثل توبة فى نداه
أبا الذُبان فوه الدهر الدامى




ومجمل الكلام يعنى انها مش داخلهم قصر تانى
 و مين اللى اقارنه بتوبة اللى بيتساقط منه الندى
وايش ييجى جنبه سى مراون دا 
اللى الدبان ملوم حوالين بوقه!




إخراشى دى غلطت ف الخليفة ذات شخصيا ..!
 هتقولولى وسابوها يا فاتيما بعد القصيدة دى ؟!!
 أقولكم اه سابوها
 الست عضمة كبيرة 
هيتشطروا عليها متبقاش اخلاق ملوك يعنى ..  ؟!



ثم انه .. يعنى متخلوناش نفتق يعنى
ونجيب الدفاتر القديمة
ماهى الست عاتكة مرات الخليفة نفسها
اللى جوزها اتشتم دى
 هيا كمان حبت شاعر وحبها
وكتب فيها شعر و سيحلها روخر
ولولا ابوها معاوية لم التعابين كانت الدنيا اتنيلت
فلا تعايرنى يا عاتكة ولا اعايرك ..هه
هنا 



مش بس معاوية وحفيده اللى استقبلوها ف قصرالخلافة
كمان الحجاج بن يوسف الثقفى
 المفترى دا كان بيحبها
وكانت بتقول فيه شعر
 وتمدحه 
وتخش مجلسه وتقعد ..



وكانت بيتطول لسانها عليه احيانا بشعرها
فمرة أمر بقطع لسانها راحت عاملة عيشة
ورجعت تمدحه
فعفا عنها 
وهوه اللى وصفها بأنها "ليلى صاحبة توبة"



وانتوا عارفين دماغ الحجاج اللى مش نضيفة بقى
 ف مرة خدها على جنب
وقالها سرك ف بير بس قوليلى
صحيح محصلش بينك وبين توبة أى حاجة لا سمح الله ؟!!
اصل مش معقول كل الحب دا والشعر دا والمقابلات دى
 وكنتوا اخوات يعنى ؟!
 فالست حلفتله بأغلظ الأيمانات
 ان مكنش بينهم غير الحب والشعر و.. بس



وحد يقولى .. كيس الجوافة ابن الأذلع اخباره ايه
 اقولكم بعد موت توبة طبعا ناره بردت
 وسابها تقول شعر براحتها 
 خلاص غريمه مات وخلصنا ..!



وفضلت ليلى الأخيلية محل احترام ومحبة قومها
 ومجتمع الشعر والشعراء وحتى الحكام
 لحد ما ف يوم كانت مسافرة مع المخفى جوزها 
وف الطريق مروا بمقابر
وعرفت ان قبر توبة حبيبها ف الحتة دى
وقررت تنزل تقف شوية تبكى وتنتحب
جوزها حاول يمنعها 
ادته م المنقى خيار
 وراحت رايحة عند القبر




ووقفت تفتكر شعر كان قاله ف مرة توبة
.............
ولو أن ليلى الأخيلية سلمـت علـي
ودوني تربـة وصـفائح
لسلمت تسليم البشاشة أو صاح
إليها صدى من جانب القبر صائح


والبيتين ببساطة فيما معناه
ان ليلى لو وقفت على قبرى 
وندهتنى هرد عليها السلام 
#إليهوى_يا_جرعان




طبعا ليلى افتكرت الشعر دا
فقعدت تعييييط
وتقول مردتش السلام ليه يا توبة ..
دنتا عمرك ما كدبت عليا
 واهىء إهىء ونهنهة بقى 
جوزها سمعها
اتغاظ جدا وقالها يلا يا ست هاااانم خلصينا
راحت ماشية من قصاد القبر 
وركبت الهودج بتاعها






وهيا بتركب كان فيه بومة راقدة جنب قبر توبة
سمعت صوت الهودج اتخضت
طارت ف وش الجمل 
الجمل اتخض
راح موقع ليلى ع الأرض




ليلى وقعت راسها اتخبطت ف حجر
ماتت ف ساعتها
آه والنيعمة زى ما بقولكم كدهون ..
الفيلم الهندى دا حصل كما حكاه ابو الفرج الأصفهانى !!




ابو الأذلع جوزها اتخرع
 وراح دافنها ف قبر ملاصق لقبر توبة
عشان حس اآل ايه ان لأ بقى
 الموتة دى ف الحتة دى مينفعش تبقى صدفة وكدا !



الكلام دا كان سنة 85 هـ
 وبس يا سيدى توتة توتة
خلصت حدوتة ليلى الاخيلية وتوبة بن الحمير
 بموت العاشقين 
مفترقين 
متعذبين
 واجعين قلبنا عليهم



ونقول بقى الملاحظات بتاعتنا


 1) آه يانى آه يانى آه يانى ع الحب واللى بيحبوا ...



2) ملحوظة كل قصة حب كئيبة
 ابن الأذلع وامثاله ف كل قصة
 اللى بيبرشطواعلى أى قصة حب ويبوظوها دول
 ايه نظامهم 
يعنى مولودين كدا 
ولاّ دا مرض نفسى دا ولا ايه ؟؟




يعنى انتا عارف ان البت بتحب واحد غيرك وبجنون
والمرة دى البطلة شاعرة
يعنى الشعر رايح جاى بين الطرفين
ايه معندكش دم 
معندكش احساس
 مفيش نخوة !




ثم ان امة لا اله الا الله عارفة ان ليلة بتحب توبة
والواد بيحبها
والحجاج كان بيقدمها للحاضرين ف مجلسه بإنها
 ليلى صاحبة توبة 
فنعممممم ؟!!
منظرك انتا ايه خصوصا بعد الجواز
 والست كانت بتقابله برضو وتقول فيه شعر !
ثم ايه اسم الاذلع دا .. دى اسامى تقابلوا بيها ربنا .. ؟؟!!





3) الاهالى بتوع زمان وبتوع دلوقتى برضك ...
مالها العالم دى رزلة وثقيلة كدا
 اتنين وبيحبوا بعض ..
 ايه الرخامة بتاعتكو دى متجوزوهم لبعض !!



متسيبوهم يتجوزوا ويعرفوا ان الله حق
وقصة الحب دى هتخلص مع الزمن الازرق
ايه لازمته تكسروا قلبهم
 متسيبوهم يكسروه لوحديهم
 :) 
#فاتيما_الشوريرة




4) توبة واضح من سيرته انه كان واد صايع
 وبيغير ع القبائل
 وشوية شوية ابو الفرج كان هيقولنا ان كان ليه ملف
ف مديرية امن الجيزة .. ! 
بس تقولوا ايه
عين المحب والعاشق بتشوف حبيبه خالى من أى عيوب
او بمعنى ادق بتشوف حسناته
وتتعامى عن أى نواقص
قوم الحياة تبقى محتملة 
وتلاقى دايما حد بيستحمل قرفك وعيوبك 
وعلى قلبه زى العسل 
وآخخخخ
اومال هوه الحب حلو من شوية ؟!



5) يختى الحكام بتوع زمان كانوا حاجة فُللى قوى
وسبهللة خالص
الحجاج بيكلم الست ليلى ف خصوصياتها عادى كدا
 ومعاوية كمان بيسيبها تحب على روحها
ومروان حفيد معاوية بيتشتم ويتبعتر بكرامته الأرض
عادى
 بس فالحين ف المدارس زمان يفهمونا
 ان الخلفاء والخلافة الاسلامية دى كانت رعب وبتاع !!



ما العالم دى كانت رايقة وغاوية شعر
وبيعزموا النساء الشاعرات ف مجالسهم
 ومكنش فيه أى تشدد ولا حواجز
ولا نظام حرام وعيب وبلاش وكدا !


6) سؤال ويؤرقنى الحقيقة عادات وتقاليد ونيلة ايه
 البت راحت تقابل الواد بعد الجواز حضرتك
 فانتوا روحتوا للوالى
 تطلعوا فتوى بأهدار دمه
و...  نعممم ؟!!




ثم يعنى جاتلكم الشجاعة تتقابلوا يا ليلى وتوبة
 بعد جوازها وتجيبوا لروحكم مصيبة
طب ما كنتوا تهربوا سوا وتتجوزوا يا عيال
واللى يحصل يحصل ..!




7) على جنب بقى 
طب معاوية وكنتى بتحضرى مجلسه ماشى وهنعديها
لكن بتمدحى الحجاج يا لوّلا .. 
الحجاج دا صنف ف البشرية ينفع  يتمدح .. ؟!!
اخص عليكى 
لأ 
بجد إخص 



واخيرا
8) نصيحة من أخت لما تكونوا ف هودج
وبتركبوه بصوا ف المرايات كويس 
لتكون بومة معدية ولا حاجة
تحصل حادثة 
واحنا مش ناقصييييين
 :)



وراحت ليلى
 اللى الفرزدق فضلها على نفسه
 وأبو نواس ردد قصائدها
وأبو تمام الذي ضرب بشعرها المثل
وأبو العلاء المعري الذي وصف شعرها بأنه حسن
وفضلتلنا قصة حبها 
وشعرها
 وتوتة توتة خلصت الحدوتة



---------------------------------------




hfekry @fekry_ahmed 
أذلع أذلع طيب ماله 
و الله ذالعونه سر جماله
 :)



Ahmed Rageh @Ahmed_Rageh101 
 متقوليليش انها قالت البيتين دول
 راح توبة قايم منفض التراب ومسلم عليها



™الدبدوب ® @mazforever 
هم عالطول بيموتوا كده ..
تعددت الأسماء والعشق واحد والنهاية واحدة


hfekry @fekry_ahmed 
فعلا و بدل شعر الغزل هيبقي هجاء بسبب مصروف البيت
 و أقساط المدرسة
 و خروف العيد 
واللي ما يشتري يتفرج
 :)


مـيرڤـت ☺ @MervatSa3ed 
ولا اسلامية اسلامية :))

Related Posts Plugin for WordPress, Blogger...
"حقوق الملكية والملوخية والمهلبية ... الخ
محفوظة للست شهرزاد وإياك حد يسرقها ويحاول يزعلها آغجر .. مفهوم ؟ "