الخميس، 28 نوفمبر 2013

حكايات مصرية 5



Embedded image permalink


النهاردة حكايات مصرية متفرقة من تاريخ البلد دى
 وعن ناسها 
واللى جرالها



حدوتة رقم (1)


عن هل تعلم ان مصر معرفتش لقب (سلطان) دا
الا بمجى صلاح الدين الايوبى
 وقبل كدا
 لأه
كلا البتة


لقب سلطان دا اتنقل من السلاجقة والغزنويين والاتراك
ووصل لبلاد العرب
واترمى ف حجر صلاح الدين
 اللى ف الاول محدش كتبه ف الأوراق والوثائق 
لكن جرى اللفظ على لسان الناس وقتها واتنادى بيه
فأصبح السلطان
 ومعنى الكلمة لغويا سلطان يعنى :
"الحجة" أو الفارق بين شخصين 


واتنقل اللقب بعدها بين الحكام التاليين
بس قبل صلاح الدين والأيوبيين
كان اللى يحكم مصر من المسلمين اما
"والى" أو "أمير" أو "حاكم"
 اما بعد صلاح الدين والأيوبيين 
فالمماليك استلطنوا



وفضلوا يتناقلوا اللقب لحد طومان باى أخر سلاطينهم
اللى لما جه السلطان سليم الاول من تركيا شنقه
 وقرر ميبقاش فيه سلطان غيره 
واتشال اللقب
ومصر بقت ولاية عثمانية
ولا سلطان الا سليم ومن تبعه



وتاولى الولاة التابعين للعثمانلية على حكم مصر
واخدوا ألقاب زى ...
زى على بك الكبير كدا اللى خد لقب "شيخ البلد"
يعنى أكبر راس فيها
ولحد ما جت الحملة الفرنسية
ثم محمد على اللى أخد لقب والى ... 
و فضلنا كدا


لحد ما جه اسماعيل 
وحب يتميز
واستصدر لقب خديو مصر من الباب العالى
واخد اللقب ابنه توفيق 
ثم عباس حلمى التانى





وبعدها الانجليز عزلوه 
وجابوا ..
الحاج حسين كامل اللى بمجييه رجع لقب سلطان
ومصر بقت سلطنة
 وهما 3 سنين حكم والراجل مات
 وجه بعده فؤاد الاول 
اللى دخل ف صفقة مع الانجليز
بموجبها مصر بقت مملكة بدل سلطنة
 وبقى حضرته الملك مش سلطان
ومن بعده فاروق ملك
 ثم بعد كدا لقب سلطان اختفى من تاريخ مصر



وبس كدا
 الدروس المستفادة من الحوار دا
 1) سلطان ولا ملك ولا أمير ولا أى بتاع
الناس زمان كانت شاغلة بالها قوى بالالقاب كدا ليه
ومش مركزة ف الأفعال  ؟



2) رغم هذا الحرص على اللقب
أصلا كلكوا كنتوا تحت أحتلال
 اما أجنبى فرنسى انجليزى تركى
 فعملنا ايه بالألقاب دى ان شاء الله فرقت ف ايه يعنى
وانتوا كنتوا مهزأين ع الآخر؟



3) كل واحد دماغه تاعبه معلش
المهم انا باعته يجيب فول امبارح
واديته حاجة يشيل فيها فـ ..


مش بتاعتنا معلش ... 



القصة رقم (2)


ملف:Saladin the Victorious.jpg


 بما اننا جبنا سيرة الحاج صلاح الدين القليوبى
 فبالصدفة اكتشفت معلومة
 ان الأخ كان عامل حركة توريث معتبرة 
وانا منعرفشىىىىى
الراجل اخواته اللى كان ماسك اليمن
واللى مسك بعلبك
واللى اتولى اسكندرية
وكلهم بأسماء وألقاب فخيمة كدا
نور الدولة
 شمس الدولة
 حتى لهم اخت سموها ست الشام



وكلهم كوم واخوه الصغنن خالث كوم ..
كان اسمه تاج الملوك



 آه والنيعمة
بيكنج باودر بقى وللناس اللى بيحبوك وبتاع
الواد تاج الملوك بورى 
اسمه كدا
ويقال بورى معناها (الذئب) والله أعلم
كان واد فارس ومقاتل وزينة الشباب حقا
شارك ف المعارك مع اخوه بهمة
وبتحكى عنه ليه يا فطمطم .. أقولكم
أصل الواد كان شاعر وقويل وبيحب مصر
 وكتبلها شعر
أصله كان بيحب واحدة من حدانا ومعذباه يا عينى 
:)


أأحبابنا فى مِصر والبعدُ بيننا
وللدّهر أحكام علىَّ تحيف
أحِنُّ على بُعد الدِّيار إليكم 
وغَيرُ عجيبٍ أن يحنَّ ألوف




أسُكَّان مصَر الزمان علىّ بقُربكم جائدُ
أما تذكرون فتى شوقه إلى وصلكم أبداً زائدُ
 جريحاً مريضاً يمَلُّ الطبيبَ ويسأمُ من فقده العائِدُ




الولا كان محبا هائما
 وكان فارس مغوار
ولما صلاح الدين دخل ف عركة مع عماد الدين زنكى
وعماد تحصن بحلب
 وقرر ميسلمش 
 صلاح الدين قرر يحاصر حلب
ومرضيش يدخل ف قتال مع عماد الدين
ابنه سيده نور الدين
فبعت صلاح جنوده وحاصروا حلب
وكان من بينهم تاج الملوك بورى أخو السلطان ...



الواد كان شباب ودمه حامى وبيفرك زى الثوار
على الدخول ف مواجهات
 هوه وكتيبته احتكوا ببعض عسكر عماد الدين
حصلت معركة ع الضيق 
واتصاب تاج
أخد طعنة بالرمح ف فخده ونقلوه على المعسكر
 ف نفس التوقيت اللى كان صلاح الدين فيه
بيهادن عماد الدين زنكى
ودخل معاه ف اتفاق فعلا
 وعملوا وليمة معتبرة



وقاعد صلاح مع ضيفه عدو الأمس حليف اليوم
دخل عليه احد مساعديه
وهمس ف ودنه
 تاج الملوك تعيش انتا متأثرا بجراحه 
وصلاح الدين وشه قلب
ثم يذكرون ف الكتب انه مرضيش يبدى الحزن
 وتجلد وكمل القعدة عادى
 وبعد ما الضيوف مشيوا بكى
 وقال «ما أخذنا حلب رخيصة بقتل تاج الملوك».



والشاب مات عن عمر 23 سنة
وبنظرة سريعة على ديوانه وأشعاره
هتلاقوه كان فعلا قويل
ولو كان عاش كان هيبقى من الفطاحل 


شربت من الفرات ونيل مصر
أحب إلي من شط الفرات
ولي في مصر من أصبو إليه
ومن في قربه أبداً حياتي

#البيت دا عامل زى مشربتش من نيلها كدا

الدروس المستفادة بقى 
 أى كان صلاح الدين وما عليه من ملاحظات
 الراجل خسر ف صراعه برضو
مش زى ناس قعدت ع الكراسى 
وخدت وعمرها ما أدت



ملحوظة تانية لبتوع التاريخ الاسلامى الفزيع الخ الخ
الواد تاج قال بيتين شعر
كان ممكن يتقام عليه الحد بسببهم
ومع ذلك محصلشى
ولا حد طلع بوشه المكفهر ع الفضائيات ينعق ف وشن
وقال حراااااام زنديق ... وكدا 



يا غزالاً يميت طوراً ويحيي
 وهو برء السقام سقم الصحيح
 هذه المعجزات ليست لظبي
إنما هذه فعال المسيح 


اتفضلوا
اهو قال كلام كبير
الواد كان بيوصف الموزة بتاعته ببساطة
 وقال تشبيه مرعب حبتين
 بس محدش ليه ساعتها قال بيغلط ف الرسل يعنى
وعيب 
كانوا مركزين ف اعلاء شأن الدولة 
وحفظ حقوق مواطنيها 
مش مركزين ف الكلام الفارغ 
الدنيا كانت أبسط من كدا




القصة رقم (3)



 من زمن الفاطميين
وتحديدا عن اللى بنى القاهرة بجلالة قدرها
 الأخ القائد جوهر الصقلى
هل تعلم اننا منعرفش مدفنه لحد دلوقتى فين ؟؟!



الناس كانت فاكرة ولحد وقت قريب
انه مدفون ف مدرسة شرق الجامع الازهر
لكن القبر الموجود هناك كان لجوهر
بس جوهر تانى 




المدفون ف القبر اللى جنب الأزهر
 هوه (جوهر القنقبائى)
 احد الأمرا ف زمن الأشرف برسباى
كان الخازندار بتاعه مسئول عن خزاينه يعنى
وطبعا كان غنى
وبنى مدرسة وكتاب جنب الازهر
 وعاش لزمن السلطان جقمق
ولما مات دفنوه ف مدرسته
وبعد فترة الناس افتكرت ان دا قبر القائد جوهر الصقلى
 بينما دا خطأ



كتب التاريخ بتحكى ان جوهر الصقلى
كان دراع المعز لدين الله أول حاكم فاطمى لمصر
وكان قائده العسكرى الأثير
 وبعد موت المعز مسك ابنه العزيز
العزيز كان راجل كويس وبيحفظ للناس أقدارها
 واحترم جوهر وتمسك بيه اكتر
 وكان بيحبه جدا لدرجة انه لما مات(جوهر)
عمله جنازة عجب 
واسمعوا الجاى بقى



قال بيقولك العزيز بالله أمر بتكفين جوهر القائد
 بـ 70 ثوب مثقل وموشى بالذهب
 O.O
وخلع على ابنه حسين اللقب
 وخلاه القائد بدل بابا وكدهون ...




وعباس الطرابيلى ف كتابه بيسال مستغربا
أصل الفاطميين كانلهم عادات خاصة بيهم ف كل شىء
 ايه اللى خلى العزيز يعمل كدا
ويكفن الميت بالأتواب الكتير دى 
فـ هل تأثر بالفراعنة مثلا ؟




وانا بدورى أقول الملاحظات بتاعتشى
1) العزة لله وحده
ونحاول نشوف الحكمة 
من ان بانى القاهرة الرهيبة دى مينعرفش مكان قبره فين؟!



2) ال70 توب موشى بالدهب دول
اكيد اتسرقوا ف الشدة المستنصرية
أصل يحكى ان الناس وقتها فتحت قبور الفاطميين
وسرقتها 
تلاقيهم عملوا كدا ف قبر جوهر
 وطمسوا معالمه بالمرة 
#دا_تحليلى_ف_القضية_الصراحة


3) الفاطميين كانوا بيجيبوا ام الفلوس دى كلها منين
 .. هاه .. منين ؟
 انا عندى تفسير علمى للظاهرة دى
 أكيد كان بيسحروا
 آه ملهاش حل تانى!



4) العزيز بالله كان ابن أصول وحفظ لجوهر قدره
 ومسك ابنه من بعده
 بس بعد العزيز ما مات حكم ابنه الحاكم بآمر الله
اللى راح قاتل حسين ابن جوهر
وبعدين الحاكم بأمر الله نفسه انقتل ..
وكنا حكينا القصة كاملة 
هنا
الملخص ان حظوظ الابناء كانت غير حظوظ الأباء خالص



القصة رقم (4)





من زمن محمد على الدقرم السوسة
اللى أول ما مسك الحكم كان منفتح ع الغرب
وأى اجنبى ييجى يستقبله 
ويشوف ممكن يستفيد منه ايه 



قوم جه مساعدينه وقالوله
يا حاج محمد الفرنجة اخترعوا حاجة كدا
تطلعلك صورتك كما الحقيقة
مش مرسومة
والمصوراتى عاوز يتشرف بتصويرك جنابك ممكن ؟




محمد على قالهم ماشى .. هاتوه
 جه المصور هوه وصديق له اسمهما :
 رسماين فيرنيه وجوبيل فسيكيه
ومعاهم البتاعة دى





البتاعة دى كان اسمها جهاز داجير
وفيرنيه بيحكى الموقف بالتفصيل
انهم اتقبل طلبهم
وييجوا لأتمام المهمة
 ومحمد على وافق خلاص ...
ف اليوم المحدد
والساعة 7 الصبح كانوا ف القلعة 
بيختاروا المطرح المناسب فين
وهنوقف ازاى .. الخ 


وبعدين ظهر الباشا محمد على
 وبرطم بكام كلمة كدا
 لما قالوله حضرتك عاوزين أوضة ضلمة
عشان مينفعشى نصور ف النور
وفعلا دخلوا ف ركن مظلم
وقعد محمد على وروحه ف مناخيره
 ومبقاش غير يحطوا الكليشيه ..
ونظام يا بنى انا طالع عندك ؟





وأضحك يا ميدو عشان الصورة تطلع حلوة
 وهما ببيدوسوا
طلع صوت للكبريتة الكيميائية اللى بقت الفلاش بعد كدا
وعملت ضوء ف عيون الباشا فجأة
اول ما محمد على شاف الوميض بينط ف وشه
 اتخض وقلما كان يحدث هذا يعنى
 وراح قايم ومزعق بأعلى صوته بالتركى
فيما معناه 
هذا من عمل الشيطان
وراح سايب المطرح كله وماشى فورا 
والصورة متاخدتشى .. !


 وملاحظاتى الوحيدة بقى
 للأخوة المصورين دول يحمدوا ربنا ألف مرة
 الراجل اول ما البتاعة
عملت طش ف وشه حط ايده على سيفه
ف توقيت آخر كان ممكن يدبحهم ف ساعتها
لكن اكمنهم أجانب
وهوه مزاجه وقتها كان رايق الله اعلم كان جرالهم ايه!




الحكاية رقم(5)




ما دمنا جبنا سيرة محمد على بقى
فلازم نقول حكاية احد احفاده المخاليل
وما اكثرهم ف العيلة الفللى دى



والمذكور يبقى الأمير ..
حسين كامل الصغير
 اه عشان دا يفرق عن حسين كامل الكبير
 اللى هيبقى سلطان مصر 1913-1917
 حسين الصغير دا
يبقى ابن ابن اسماعيل كامل
 وكنا حكينا عنه زمان



اب الأب  .. اسماعيل كامل
 كان واد قليل الرباية والادب
بعته محمد على السوادن ف حتة
 اسمها الفاشر عشان يشتريله عبيد 
ينفعوا ف الحرب والقتال
قوم ايه
الولا بدل ما يتفاوض مع "النمر"
 شيخ منصر التجارة دى بالحسنى راح لطشه قلم
بعترله كرامته
خرج النمر من عنده متأبطا شرا 
وراح باعت بلطجيته 
بليل



راحوا حارقين الكوخ اللى كان نايم فيه اسماعيل كامل
 مع الحراس بتوعه
ومات المحروق بسبب غطرسته وقلة أدبه
ومحمد على بعت تجريدة ولعت الدنيا بعدها 
وانتقم لمقتل أبنه شر انتقام



 الملخص
 الحاج اسماعيل كامل كانله ولد اسمه محمد على الصغير
خلف ولد اسمه حسين 
حسين دا بقى عاش 
ف زمن الخديوى توفيق ...
وقرروا يسفروه أوربا يتعلم
الواد أول ما سافر موظفى الديوان الخديوى ف باريس
 اخدوه فسحوه وروقوه وبسطوه
وحضروله مقر للأقامة وكله بقى تمام 
حلو؟



لا مش حلو 
عشان بعد شوية
الولا هيعيث فسادا ويطلب فلوس كتير بالهبل
بحجة المصاريف وفضايحه توصل القاهرة
 فيقرر الخديوى انه يرجعه مصر تانى !



والعهدة على الراوى اللى من قلب القصر الخديوى
 بيقول ان الأمير حسين كامل الصغير
 كان جميل الملامح
وغاوى يتزين كالنساء 
ويقف ف الشبابيك يتعاكس!



آه كان بيتزوق زى الحريم ويقف ورا الشباك
فالناس تفتكره واحدة ست فيعاكسوه
 O.O السنين بقى
 وبيقولوا جوزوه 3 ستات شركسيات زى القمررر
بس الظاهر
مكنش فيه فايدة



 والملاحظات الاولى والاخيرة
 سؤال محدد 
 ايه يا محمد يا على يلى كنت أسد  ومرعب
.. العيال الشمال دى جت ف عيلتك ازاى يا حاج 
فهمنا الله يكرمك ؟!!





شجرة العيلة المهلبية
 #دوس_للتكبير
السهم على اسماعيل كامل اللى مات محروق
وعلامة × على حسين كامل الكبير
اللى اتسمى الولا "الصغير" للتفرقة عنه






الحكاية رقم (6)



ف زمن محمد على برضو
هل تعلم كل بنت اسمها فاطمة
انها كانت ذات حيثية أكبر واهم من أى وزير صحة .. ؟!
 قولولى ازاى يا فطمطم !
أقولكم 
زمان كان المبثور
 "اللى بيطلعله فثافيث ف عينه او وشه او خلافه"
 كان بيصحى الصبح
 ويروح لافف على البيوت
 ويشحت حتة عيش من الستات
 بس مش أى ستات




لازم تكون ست اسمها فاطمة بس
هيا اللى تديه كسرة الخبز دى
والكبير كبير
والنص نص نص نص
وأى اسم تانى منعرفووووش .. آه 





ومش بس اللى اسمهن فاطمة وفقط
لأ دول لازم يبقوا 7 بالعدد والا ميخفش .. !
يختشىىىىى
 العلاج زمان كان حاجة حلوة قوى





طبعا اللى هيتريقأ
ويسالنى هل كانوا بيخفوا يا فاطمة بعد التهريج دا
أقوله حضرتك دنا مش عايزة اقولك
 ان كان فيه طرق تانية
أبشع من كدا 
يعنى ناهيك عن طريقة اخرى
الا وهى ان المبثور ينزل يشحت من 7 قبور
من الشمال لليمين
 كان فيه طريقة تانية بقى
 كانت الهنا كله
 للعيان بالرمد او ف عينه عموما



قالك ايه ان اللى عيان بالرمد 
كان بيتوصفله يحط قطنة ف طرف عصاية
ويغمسها ف الحوض اللى بيعمل فيه الكلاب
لامؤاخذة بيبي 
وبعدين يمسح بيها عينه العيانة 
#قلبى_قلبى



والملاحظات ع الحدوتة دى
 1) احمدوا ربنا اننا مش عايشين ف الزمن دا
2) كل واحد يخلى باله من عينه
3)احترمونى بالقوى بقى
 انا طلعت عندى قدرة ع علاج المرضى اهو
 وانا معرفشى 
:)




الحدوتة رقم (7)

 تقريبا ف أدبيات اللغة بتاعت المصريين زمان
كلمات لها معانى غير الواقع خالص
 بس بنقولها 
واحنا منعلمشى
 زى كلمة "الوعد" حضرتشك




الوعد مكنش معناها القسم أو العهد
كان معناها "الدعارة" اللى كانت مهنة مرخصة
و لها مؤسسات وكدهون
#طول_عمرهك_دولة_مؤسسات_يا_مصر
قوم ايه بقى ...







واتارى البت من دول كانت تطلع ف أى فيلم
 لـ حسن الامام
فيسألها ابن الباشا ايه اللى وصلك لكدا
فترد تقوله الوعد 
وانا مكنتش فاهمة قصدها ايه البت دى .. 
اتارى الموضوع كبير كبير كبير 




واتارى كمان حبيبى محمد فوزى
لما غنى السعد واعدنى 
كان محدد ودقيق وواااااضح
قالك السعد اللى واعدنى مش أى حاجة تانية
 آه
دى فيها سمعة ناس 


آخر حاجة 

بقى عشان الليمت
ونسيبكوا تناموا
الحكاية من كتاب الخيانة
 لحد ف زمن الحملة الفرنسية كان ساكن ف مصر
 قبل مجييهم بزمان وبياكل من خيرها



اللى بنحكى عنه يبقى بارثيملو ينى الرومى
 كان من الأروام 
واستوطن مصر
واشتغل عند محمد الالفى كان طوبجى
 يعنى بيوقف ع المدفع 
وكدا



بس الطوبجية مكنتش مهنته الأولى
اول ما جه مصر كان أرزقى
 وبعدين فتح محل بائس لبيع القوارير الزجاجية
 الازايز يعنى 
وكان شخصية سقيلة جداااا
كان مشهور ببنيانه الجسدى الضخم وعنفوانه
واثارته للمشاكل
بلطجى م الآخر 
قوم محمد الالفى حب يستفيد منه
وضمه لجنده جت الحملة الفرنسية
 بارثيملو لقاها فرصة



المؤرخين كتبوا اسمه برطملين
لكن المصريين سموه .. فرط الرمان
عشان وشه الابيض لما بيتنرفز كان بيبك دم
ويبقى أحمر
 بلون الرمان لما يبك عصيره !



سى فرط الرمان بقى اول ما جت الفرنساوية
ودخلوا القاهرة عرض عليهم خدماته على الفور
 وتخلى عن سيده الالفى
 وراح محتل دار كاشف اسمه يحيى .. 
يحيى الكبير دا كان كاشف القاهرة
وكان عنده دار فسيحة ف عابدين
قتلوه الفرنساوية راح فرط الرمان داخل علي الدار
واخدها بلى فيها من عفش 
وجوارى



وجرى تحت رجلين بونابرت اللى عينه كتخدا مستحفظان
يعنى ايه يا طمطم انتى بتشتمينا
 أقولكم لأ والنبى دى فرقة اتعملت لحفظ القلاع والحصون
وأغلب عمل الفرقة بتاعت لقب كتخدا مستحفظان دى
كان حفظ الأمن ف الأماكن اللى برا المدن
وغالبا كان القتال بيدور مع العربان 
وقصره الاخ فرط بقى كتخدا



والمؤرخين بيحكوا انه نابليون لما عينه
كان فرط الرمان
 تحت أمرة الجنرال"دبوى" قومندان القاهرة ف التوقيت دا
  فرط كان شرانى ودموى 
وفاهم الشغلانة غلط
 قوم ايه
كان بيقبض على أى حد ف أى حتة
ورغم ان شغلانته أساسا
هيا مطاردة العربان اللى قرفوا الفرنساوية
 ف تقدمهم لاحتلال المدن المصرية 
الا انه كان بيشوط ف أى حد
ويقال انه اوقات لما مكنش بيلاقى عربان يقتلهم
كان بيقتل أى مجموعة فلاحين غلابة ف سكته
ويقطع روسهم ويروح يسلمها للفرنساوية



ويحكى انه مرة كان دبوى
عامل عزومة لضباطه وكبار جنده
فجأة دخل عليه المساعدين وهما بيقولوا فرط الرمان برا
 ومصمم يقابل سعادتك 
قالهم طيب دخلوه




الناس قاعدين مع دبوى ع السفرة
 والشوكة والسكينة والفوطة الخ الخ
 لقوا فرط داخل عليهم بشوال
ومستناش دبوى يسأله عاوز ايه
راح دالق محتوى الشوال ع الأرض
ايه بقى .. 
كان مجموعة من رؤوس الغلابة
 اللى حظهم التعس وقعهم ف سكته ف اليوم دا
 -.- 
طبعا دبوى الشكولاتاية البسكوتاية وضيوفه 
امتعضوا جدااااا
وراح مزعق لفرط وقاله كدا موعت نفسنا يا بعيد
وامشى من وشى الساعة دى 
#ياحراااااام
كانوا بيتعبوا قوى الفرنساوية دول يا عينى 
عذبناهم قوى واحنا بنموت 




وحد يسالنى طبعا بعد فاصل الامتعاض الفزيع دا
اكيد استغنوا عن خدماته 
اكمنه جرح محاسيسهم الروهيفين وكدا 
أكيد اقولكم طيبين والنبى بالعكس تمسكوا بيه اكتر 




لأن بونابرت اللى كان حريص يأكل الشعب الاونطة
 ويعمل فيها متحضر وبتاع
 كان محتاج النوعية دى من الأعوان
عشان ينفذوله الاعمال القذرة دى ..
زى الامريكان كدا ما بيعملوا
وتيجى تسأل يقولك مش أنا دى اختشى منى !
 المصريين كرهوا فرط الرمان دا جدااا
وللأسف منعرفش مات 
ازاى بس أوعدكم أدعبس وراه الكلب الخاين دا




ويكفى بس أقولكم ان فرط الرمان دا
هوه النجس الواطى
اللى نفذ عملية حرق ايد البطل سليبمان الحلبى
 وهوه اللى قعده ع الخازوق
ورفض يشربه بوق مية لما طلب يشرب
آل عشان ميموتش بسرعة ويتعذب أكتر
وزى ما بيقول مصطفى ابراهيم :
 الرصاص تلته للعدو وتلتينه للخاين #فعلا




والملاحظة الوحيدة المتبقية ع الحكاية دى
موجهة ف شكل سؤال
من هو يا ترى فرط الرمان ف النظام الحالى
وفرط رمان نظام مرسى
 وفرط رمان نظام طنطاوى 
ونظام مبارك ونظام السادات وعبناصر 
واللى قبله واللى قبله  ...  الخ الخ




واخيرا خلصنا
 تصبحوا على ألف خير


---------------------------
-----------------------------------------------



البريتور المصرى. @alpretor 
 انتى بتهزرى صح!


إحـــكى يا شهـــرزاد @ro7albmama2 
والله مكتوب كدا ف كتاب ادوارد لين الرحالة الانجليزى
عن عادات المصريين المحدثين وتقاليدهم .. بالحرف




ShM.MSK @Sh_Msk_R 
 انا قريت ان الافراح زمان
كان فيها واحد بيطلع مصارينه على صينيه فضه
ويرجعها تانى عشان ياخد نقطه من المعازيم


NadiaKhairy @Cafe_Noire 
 الداخلية البلطجية


ΞĠỜŠ @Egyptos_ 
الداخلية طبعا 



إحـــكى يا شهـــرزاد @ro7albmama2 
بص ممكن يكون اصلا كان بنت
ودخل سكة الرجالة غلط
وطبعا مكنش فيه عمليات وقتها والحوار دا
يا عم بيقولك كان زى القمر وتشوفه ست لما يتزين




إحـــكى يا شهـــرزاد @ro7albmama2 
الحكاية بتاعت القطنة ف بيبى الكلاب دى
مش تهريج على فكرة
 انا سنة 2001 واحدة زميلتى ف المدرسة
 اللى كنت شغالة فيها وكانت مدرسة عربى ودين كمان
لما اتجوزت واتأخر الحمل (شهرين شهرييييين)
حسبما قالت انه كدا إتأخر
امها قالتلها تعالى أقعدى على الحتة دى
عشان تحملى
ايه الحتة دى بقى ؟
دى الكنبة .. كان نايم عليها ابن اختها الرضيع
 ذو ال 5 أشهر ومكنوش ملبسينه البامبرز
 فعمل بيبى ع الكنبة
 وتعالى يا بنتى أقعدى ع المطرح كدا هتحبلى
انا طبعا وهيا بتحكيلى
مسكت نفسى لأقصى درجات ضبط النفس
خصوصا على ملامح وشى
 عشان ميبنش عليا الأنذهال ومضحكشى
كانت بتتكلم جد
 وسمعت كلام أمها
ولما سالتها انتى مقتنعة ف الحاجات دى
قالتلى دى وصفات مجربة .. !
فمردتش أتناقش بقى
لكنى تحسرت على مصير العيال اللى هيا هتدرسلهم
على مر السنين القادمة 



ناهيك بقى عن نصايح
 ان العريس يلبس هدومه الداخلية بالعكس يوم الفرح
عشان سهام الحسد لا تخترقها



ومرة ست كبيرة لما طلعلى سنطة ف كف ايدى
 نصحتنى أدفن حاجة
مش فاكرة هيا ايه ف غيط على الحرف
وقالتلى بكل يقين انى لو عملت كدا السنطة هتخف .. !
ومش فاكرة تقريبا كانت قايلة فلوس او حاجة قديمة ..
والله ما فاكرة



الأحد، 24 نوفمبر 2013

الأيبك والتعلب





حكاية النهاردة أيوبى على مملوكى
على عربى على غربى على وطنية
على طمع على ثورة على انقلاب
على غيرة على جنان على اغتيالات على كله ...
وطبعا وكالعادة مسرح كل هذه الاحداث
هوه الغلبانة #مصر 
المطمع والمطمح
النعمة والخلود للى بيحبها
والمقبرة والمزبلة لكل اللى عاوز يركبها مطية




وف فترة 10 سنين بس هتلاقوها (البلد يعنى)
 ركبت المراجيح حرفيا
 والحكاية النهاردة بطليها اتنين رجالة صحيح
 لكن اللى حواليهم 
كل واحد قصة لوحده




نبتدى الاول بالشخصية رقم (1) 
وكلنا عارفينها كويس
 لأمير عاش ف زمن الملك الصالح نجم الدين
 أحد أشهر سلاطين الدولة الأيوبية
 وأغلبنا عارفه
الراجل دا ف صراعه على كرسى الحكم
أتخذل كثيرا من جنوده المرتزقة اللى كان مستجلبهم
عشان يحاربوا معاه ف المعارك
قوم قرر يغير خطته 
قال أنا أركب دقن وأشترى مماليك لروحى
من وهما عيال وأربيهم زى ولادى
 يكبروا على حجرى وف حضنى ويسمعوا كلامى
 ومحدش فيهم يسوق العوج عليا بعدين !





وفعلا دا اللى حصل والتاريخ بيحسبله او بيحسب عليه
 انه اول واحد خلى للمماليك شأن و وضع
كان بيشتريهم باعداد كبيرة من تجار الرقيق 
ويربيهم بنظام
وكان بيتعملهم زى ثكنات ونظام أكل وتربية وتعليم دينى
و زى مدرسة داخلية بس بتربية عسكرية
يكبروا بعدها جنود مدربين
 ويبتدوا يترقوا ف المناصب
وكان بيعتمد عليهم ف إدارة شئون البلد
ويديهم أراضى واقطاعيات
وطبعا كانوا بيدينو له بالولاء التام
 لأنه كان زى أبوهم الروحى وشغل الطلاينة دا




من ضمن هولاء مماليك السلطان
الذى إشتهر بلقب الملك الصالح ...
جدع اسمرانى تركمانى معجبانى
واسمه .. عز الدين أيبك 
الشهير
 بعماد حمدى يا نينة




الاخ أيبك بقى ابتدى ف بلاط السلطان منذ الصغر
كان من الأمراء المحبوبين للشعب
اكمنه مكنش شرانى زى الباقيين مش أكتر 




الشاب كبر وهوه فارس
وإتنطق ف المناصب
 كان الجاشنكير يعنى اللى بيدوق أكل السلطان وكدا
 ليطلع فيه سم 
وبعدين خاض الحروب مع باقى المماليك
وف فترة ما
 ودى اول مرة أسمع فيها القصة دى بصراحة .
كان والى على مدينة ف الشام
 اسمها "يبنى" او "يبنة" أو "يبنا"
أى كانت الكتابة 
والصالح عينه عليها




المصدر بيقول
ان "يبنى" او "يبنا" او "يبنة" تبع محافظة الرملة
عند غزة 
 فلسطين الطيبة
والمدينة محتلة حاليا للأسف 



الملك الصالح لما بسط نفوذه على الحدود مع الشام
 بعت عز الدين أيبك يكون والى
والراجل أخد مراته اللى كان متجوزها ساعتها
 وراح على هناك 
وقعد



وروح يا زمان وتعالى يا زمان
والقصر السلطانى ف القاهرة بعتاله .. راح مسافر
 وساب مراته ف قلعة الحكم ف يبنى
حلو الكلام ؟



لا مش حلو عشان المخسوف لما يخلص مهمته
 ويرجع على يبنى
هيدور على المودام ف سلقط ف ملقط ميلاقيهاش
لما يسأل عنها 
الحراس تبلغه انها أتخطشفت حضرتك


مين اللى خطفها يا غجررررر ؟!!!
 القراصنة وطاروا بيها على قبرص يا فندم
 الحكاية دى كما تقول الرواية كانت منتشرة جدا وقتها
أيبك أتغم جداااااا
منظره بقى ويحش قوى
 يعنى ايه مرات والى يبنى تنخطف من قصرها
هوه كيس جوافة ولاّ ايه؟
 ولازم يتصرف
بس لو اتعامل بشكل رسمى يبقى فتح على نفسه فتحة
فضايح وخناقات بين حكام ومرمطة
والموضوع هيكبر ولازم يلمه



المهم حضر نفسه و خرج متخفيا
وعدى البحر لقبرص اللى هيا النجمة ع الخريطة
 لمن لا يعلم
وصل صاحبنا قبرص فعلا
واتعرف على راجل كبرة هناك بالصدفة
وأطمنله وحكاله حكايته
 الراجل كانله ولد بيشتغل حارس ف أحد القصو
ر ووعده يسأله المدام أين خطفت؟




وراح الولد ورجع وجابلهم الخبر اليقين
 مراتك يا كابتن أيبك
 نائمة ف قصر مرصود لأحد النبلاء هنا
 اشتراها من القراصنة
 وهيا حية 
وممكن اوصلك ليها والباقى عليك
طبعا أيبك انشكح جدا
 الست لسه عايشة وممكن يتعامل مع النبيل
ويشتريها تانى
أو ياخدها بالحيلة يهربها ويرجع بيها على يبنى
 ويا دار ما دخلك شر



الحارس عرف يدبرله معاد معاها فعلا
 ف ستار الليل ف قصر النبيل
اول ما شفته قالتله
لأ ميرسى يا بيبى
 ومش راجعة معاك يا حبى 
انا مبسوطة هنا :))



طبعا التصرف المنطقى بعد الذهول والإنبهار ...
 انه يشدها من شعرها او يغّزها بمطواة ويمشى
 بس كل دا كان هيصحى النايمين 
ويروح ف خبر كان
 راح ايه؟
راح واخد بعضه من سكات وخارج
وهوه مبين انه خلاص مش مهم وبراحتك يا جميل
وخرج من عندها يضمر شرا انه يقتلها
ويقتل الراجل 
اللى هيا جاريته ومحظيته




الرواية بتقول ان دا حصل فعلا
 الراجل اللى أيبك اتعرف عليه ساعده ف اتمام المهمة دى
 وبنجاح وهربوا الاتنين
أيبك رجع لـ يبنى 
والراجل على مصر
وقعد وسط قبائل العرب ف سينا لفترة طويلة
 عشان محدش يطوله
وفضل أيبك بيعامل القبائل العربية هناك أحسن معاملة
على حس الحكاية دى 
والدنيا لطيفة وحلوة لحد ايه ؟؟؟



لحد ما وصل سعادته إلى كرسى السلطنة
 وكنا حكينا الحكاية دى بالتفصيل ف التدوينة دى ...



الملك الصالح لما مات
شجر الدر أرملته المصونة قعدت تحكم مصر
وتخبى خبر موته لما يقرب من ال3 شهور
 لحد ما تخلص المعارك مع الصليبين ف المنصورة
والموقف فضل متجمد لحد ما بعتت لأبن الملك الصالح
ووريثه على العرش .. تورانشاه
والواد كان زى ما حكينا قليل الادب ومناكف 
وبدل ما يلم التعابين
قعد يناكف ف مرات ابوه الست شجر
لحد ما طفشها من مصر وقررت تتامر عليه
مع مماليك جوزها لحد ما قتلوه حرقا وغرقا






وبقت ع العرش لوحدها
 فالخليفة العباسى سمعهم الجملة الشهيرة
بتاعت انتوا معندكوش رجالة الظاهر
ولو معندكوش نبعتلكم من عندنا
يعنى على غرار
 أصل السيسى يترشح عشان مفيش غيره كدا




الست رغم كل محاولاتها للحكم
لكن فهمت انها متقدرش مهما عملت
فعملت المشاورات والترتيبات
وانتهت بنتيجة انها تتجوز عز الدين أيبك .. دونا عن غيره
وامراء المماليك المنافسين والطمعانين
 وافقوا على اختيارها مش حبا وكرامة
لأ عشان كما قالوا بالحرف
 "متى أردنا صرفه أمكننا ذلك لعدم شوكته ... "



وتقريبا هوه نفس قبول شجر الجوازة
اكمنها ست قوية مفترية
كما ذكر احد مؤرخى زمنها
" امراءة صعبة الخلق شديدة الغيرة ذات شهامة زائدة وحرمة وافرة سكرانة من التيه والعجب "



كانت عاوزة حد تتحكم فيه و تحكم معاه
 وطبعا أنتوا شفتوا الفيلم
وازاىأيبك أذهلها واذهل البشرية كلها
وبعد ما أتمسكن
... أتمكن







على فكرة الفيلم دا مليان أخطاء لكن مفيش مانع
ان فيها حاجات كتير صح
 بس الفترات الزمنية أهم حاجة
عشان أيبك حكم 7 سنين
 بينما ف الفيلم كروتونا ف كام مشهد 


أيبك صعد إلى كرسى العرش 1250م
وقعدت جنبه السلطانة شجر الدر
واول ما مسك طلعله أعداء فورا
عشان يشاكسوه
وهنا هتبتدى حكاية البطل رقم (2)







وهو يبقى 
الأمير حصن الدين بن فخر الدين بن ثعلب
كان أمير من الاشراف
ويرجع نسبه لستنا زينب بنت سيدنا على بن ابى طالب
واختصارا حصن الدين ثعلب



حصن الدين كان زى ما قولنا من الأشراف ف الصعيد
 وقبيلته كانت من القبائل اللى جت مصر
بعد الفتح العربى لها
 وكانله وضع ومكانة من أيام أبوه
أبو الامير حصن الدين ...
الحاج فخر الدين يعنى كان من كبارات الصعيد
والعربان عموما
 وكان له أيادى بيضاء على البلد ايام الملك العادل
المقريزى بيقول انه مصر حصل فيها قحط ومجاعة
 والناس كانت بتموت ف الشوارع متلقيش كفن
ولولا بن ثعلب ودعمه 
 كانت ناس كتير ماتت أكتر



ورغم ان فيه قبائل عربية كتير
كانت بتعمل مشاكل للحكام والولاة
بسبب رغبتهم ف تحسين وضعهم
وبسبب خروجهم من الحياة العسكرية والجيش الا انه ...
الامير فخر الدين دا وابنه من بعده
كانوا مخلصين للدولة الايوبية
 وكانوا بيخدموهم ويدينوا ليهم بالطاعة
 ومعملوش مشاكل 
بالعكس زى ما شوفنا 
ساعدوهم




وروح يا زمان وتعالى يا زمان
ويوصل أيبك لكرسى السلطنة
 قوم الامير حصن الدين ثعلب يتحمق ويطقله عرق
ويقول ايه التهريج دا
 دا مش رئيسى
 اين الشرعية



حصن الدين واللى معاه من قبائل العرب
 كانوا بيعتبروا المماليك خدم ومستجلبين
(هما كانوا كدا فعلا)
ورفض يحكم البلد ناس كدا 
وقال أنا أولى .. !
بالحرف اهو 
"أنا أحق بالملك من المماليك 
وقد كفى أنا خدمنا بني أيوب
وهم خوارج خرجوا على البلاد
وأنفوا من خدمة الترك ، وقالوا إنما هم عبيد للخوارج "




أوباااااا حصن الدين كان معتبر الأيوبين 
اصلااا خرجوا على الفاطميين 
ومكنوش شرعيين
قوم كبر العربان دماغهم واعتبروهم شرعيين
فإذا هم الشرعية
 ييجى بقىأيبك والأمراء المماليك 
ويخرجوا ع الشرعية دى
اذن بقوا خوراج فقتالهم حلال وكدا ...



واعتبر نفسه هوه العربى الأقدم بجذوره عنهم
من أهل البلاد وأولى بحكمها
 وقعد يطرطش كلام كدا عن ان أيبك مسه الرق
ولا ممكن يسيبوه يتهنى بالكرسى
والنقلاب هيترنح ان شاء الله 



بس بقى وعنها وعمل قعر مجلس حرب
واتجمعت القبايل العربية حواليه
حصن الدين ثعلب كان مطرحه ف :
دهروط - مغاغة - المنيا






فورا والحكاية ف حموتها
 وأيبك بيحضر احتفالات تنصيبه وتسلم الأيادى
وبيحلف اليمين الدستورى
كان حصن الدين لامم أنصاره
وحصل تمرد ف شوية أماكن ع الخريطة
فجأة أيبك لقى القبايل ف بلبيس و سخا
ودمنهور وسنهور و الفيوم ودهروط
يعنى الدلتا والصعيد قايمين عليه قومة واحدة 




مركزش قوى
بس شوية وجاتله الاخبار
ان الفلاحين ف بعض القرى مساندة الحكاية
اكمن حصن اتكلم عن توزيع الأرض ع الفلاحين
والأرض لنا وكلام كبير كدا ألهم القلوب
وألهبها 
وكمان سمع ان حصن الدين اتخذ من سربام ف الفيوم
 مقر للحكم
واستقل عن الدولة 
حاجة زى جمهورية زفتى كدا 
بيجمع ف الأنصار بالسلاح والعتاد
وزاحفين ع القاهرة!
 آىىى لأ بقى كدا العملية كبيرة يا بكبك 
ولازم تتصرف!



أيبك جاله خبر تانى
ان حصن الدين بن ثعلب مجمع جيش قوامه 12 ألف فارس
كلهم عربان مش شباب ورجالة القبائل طبعا
وانضملهم مصريين ف السطة 
وراحوا بلبيس شرقية



واشمعنى بلبيس ؟
يقال ان أكبر تجمع للقبائل العربية من عهد الراشدين
وبعدهم الأمويين كانت هناك
 قصره أيبك راح لامم 5الاف مملوك من بتوعه
 وباعتهم ..



هيبعتهم لوحديهم كدا؟
 لأ طبعا
 بعتهم بقيادة استغفر الله العظيم وربنا يحفظنا من كل شر
 الامير فارس الذين أقطاي الجمدار
 الشهير بمحمود المليجى





طبعا محمود المليجى أقطاى أبو ناب أزرق
نفذ الامر فورا
راح واخد العيال وطالع على بلبيس
اتقابل الجمعان وابتدت المطحنة
وقعدوا نهار بحاله يتقاتلوا
 الامير حصن الدين وقع من على حصانه
ف وسط المعركة فأتلموا حواليه الفرسان يحموه 
وانقتل 400 ف ظرف دقايق عشان ينقذوه !!



ويادوب وصل لحد حصانه وركبه تانى
وهات يا فكيك وهرب من المكان
 بعد ما تكشفله ان المعركة مش ف صالحهم
وان جيشه متدهول دهولة السنين يا فخرى !!




حد يقولى انتى تهرجين يا طمطومة بقى ال5 الاف
 يغلبوا ال12 ألف
ازاى يعنى ؟
أقولكم 5 الاف مقاتل حارب جيوش الصليبين
وعنده خبرة ولا الاف اصعاف من العربان ..؟


العرب أصلا كانت صلتهم بالقتال انتهت
من زمن العباسيين لما أسقطوا العرب من ديوان الجند
واقتصر ع الاتراك
 ساعتها الكفة مالت للُغرب مش العرب



ساعتها العرب اختلطوا بالمصريين
واشتغلوا ف الزراعة جنب الرعى
وف أوقات الفتن والقرف وما اكثرها
كانوا بيقطعوا الطرق ويقتلوا بالاجر
ويساعدوا ف أوقات الحرب ف حفظ الامن أحيانا 
واستقبال الجيوش 
او محاربتها زى ما عملوا وقت الحملة الفرنسية على مصر
لما كانوا بيدبحوا الفرنساوية 
 #كدا



المهم ان آخر معرفتهم بالقتال كان ولا حاجة من زمن
 طبعا قصاد المماليك المتمرسين
 اللى دى شغلتهم ف الحياة ...
كان لازم كفة المماليك ترجح #منطق_الأشياء





طيب دلوقتى الموقف ايه ؟
أقولكم حصن الدين واللى نجوا من اعوانه
هربوا وتراجعوا
 المماليك مسيطرين ونازلين دبح ومتقدمين
حصن الدين طلب المدد
و ف الوقت اللى كانفيه  بيستعد لجولة تانية
كان المماليك باوامر أيبك
بتزحف على سخا ودمنهور وبلبيس
 وتقتل ف الرجال وتسبى الحريم والدنيا زفت




حصن الدين قبل ما يبتدى العركة دى
كان باعت لوالى دمشق يطلب مساعدته
 فطبعا الراجل مردش
 بص حصن للى حواليه لقاهم ألف نفر 
مش أكتر 
وطبعا وصله أخبار مرمطة القبايل الموالية ليه
 على يد السلطان فقرر يلم الليلة 
ويحقن الدماء
ويعرف حجمه 
ويسمع النصح
 ويعمل مصالحة .. !!





ولأنه عارف ان أيبك قلقان من الملك الناصر
 والبيت الايوبى فى الشام ليحاربه
ويحاول يسترد العرش
فحصن الدين تصور انه ممكن يساوم ع النقطة دى
وفعلا بعت المراسيل لأيبك
 وقاله انتا محتاجنى عشان تواجه البيت الايوبى
وحقنا للدماء وقف عملياتك الدموية ضد رجالتى
وافرج عن المعتقلين الخ الخ 
 #ديجافو _والنبى




الراجل فهم انه مش قد الليلة
فراح لامم التعابين ...
أيبك بقى
على رأس الست شجر الدر
 أيبك اللطيف .. الوديع ... الحونين بالقوى 
وافق طبعا جدا



وبعتله واداله الامان قوم ايه؟؟
أول ما خرج مسلم سلاحه ..
 راح عسكر المماليك قافشينه ساجنينه
 وعلقوا المشانق ع الطريق لألف نفر 
:(((((

آه للأسف دا اللى حصل
 أيبك أدى الامر بقتل كل اللى باقى
من جيش حصن الدين تعلب
وأوشك يقتله هوه شخصيا
 بس تراجع خوفا من مزيد من الثورات عليه من العربان



وراح باعته مع أقطاى على اسكندرية ..
اللى أقطاى كان بيتحكم فيها وتحت إدارته
 اتسجن حصن الدين ثعلب هناك
وانقطعت اخباره الكلام دا كان 1253 م
وكانت الضربة القوية للعرب كلهم 
اللى ايبك بهدلهم وكسر شوكتهم 
والمقريزى بيقول واصفا ذلك 
 و بيحكى المؤرخ المقريزى
 "و أمر المعز بزيادة القطيعة على العرب
 و بزيادة القود المأخوذ منهم ومعاملتهم بالعسف والقهر
فذلوا وقلوا، حتى صار أمرهم على ما هو عليه الحال"




وخلاص كدا أيبك تنفس الصعداء
وارتاح مفيش حاجة تقرفه ولا تعكنن عليه
 غير انه يوطد ملكه
بس ربك بقى لما يحب يعاقب ويقرف 
ويدى كل واحد اللى يستاهله
بدل ما يقعد يروق و يشرب الشاى من بلكونة القصر
ف العصارى طلعله نزنازين
اولهم كان أقطاى الغريم
 وتانيهم شجر الدر الحريم
 وما ادراك ما الحريم



اقطاى كان اول عقدة ..
 كان محتقر أيبك ومعتبره واخد الحكم غلطة كدا
وشايف نفسه الاحق 
وحب يلعبها صح
 فقرر يتجوز اميرة من البيت الايوبى
وبكدا يناسب الايوبيين ويتحالف معاهم
 و يساندوه لما يحب يتخلص من أيبك ويقعد مكانه
وفعلا بعت أقطاى خطب بنت حاكم "حماة"
 والراجل وافق طبعاااا




وقاعد سى أيبك ف قاعة الحكم ولا بيه ولا عليه
 دخل عليه اقطاى
وندهه بأسمه عادى كدا من غير سلطان
 زى ما كان متعود يهزأه 
ويقلل من شأنه 
وبعدين رمى القنبلة ف وشه
 انا عتجوز بنت حاكم حماة
 ومينفعش تقعد الا ف القلعة دى بنت ملوك
والراجل وافق على هذا الأساس
 وهع هع هع قول لأه بقى يا بيبى وفرجنى .. !!




كياد ...
 كياد المليجى دا والله
 طبعا أيبك كتم ف نفسيه وقاله آه وماله يا قطقط
 دنتا اخويا وعروستك ف عينينا
تشرف اهلا وسهلا
 دا حتى شجر هتحبها قوى



وخرج أقطاى من عنده وكانت الخروجة الاخيرة
لأن بعدها قرر أيبك يقتله عمل خطة
 ولأول مرة
انا شخصيا هكتشف ان احد منفذيها
كان سيف الدين قطز
 وليه كدا يا بنى؟





الفيلم سرح بينا وقال ان شجر الدر اللى تآمرت
وورطت أيبك ف الجريمة دى
لكن المصادر بتقول غير كدا
وان أيبك قتله عامدا متعمدا بمساعدة قطز
اللى استدرجه وقطع رقبته مع أخرين 
رموا براسه من سور القلعة ... 
o.O


وينقتل أقطاى ويهرب مماليكه
 ومنهم بيبرس ع الشام
وتهدى الامور مؤقتا لحد اما تولع تانى 
 وأيبك اللى ظن ان الوضع بقى هادى
ومبقاش يناكفه بس غير شجر الدر مراته
 اللى كانت بتحشر مناخيره ف كل الأمور
كانت كمان بتغير على أيبك من مراته الاولانية
 ام المنصور واكمنها مخلتفش منه (شجر يعنى)
 فكانت دايما حاسة بالتهديد
 وف وسط كل دا بقى
 ييجى الموكوس




الموكوس مين .. أيبك طبعا
ويعجبه فكرة النسب من البيت الايوبى بتاعت أقطاى دى
ويقرر يتجوز من بنت حاكم الموصل بدر الدين لؤلؤ
ويخطبها فعلا !
الخبر يوصل لشجر الدر اللى تولع نار
 أكتر ما هى والعة وتبعت لبدر الدين لؤلؤ
رسالة شديدة الراجل يتخرع
ويبعت لأيبك يقوله خلى بالك م الست دى






أيبك ميهتمش بالتحذيرات
وف خضم خناقة مع ست شجر
 يرزعها القلم المتين بتاع واإسلاماه
 اللى تقرر بعده انها تقتله
 وترتب الخطة فعلا 
وتتنفذ بالحرف ...
ويترن أيبك علقة الموت المعتبرة بالقباقيب ف الحمام
على إيد اعوان مراته
وهوب ينكشف الملعوب
وهوب يقبض قطز على شجر 
ويحبسها ف البرج الاحمر بالقلعة
وهوب ينصب الأمرا ابن أيبك (المنصور) سلطان
 وكان شاب صغار
فيبقى قطز الكل ف الكل
وهوب تنقتل شجر الدر على ايد جوارى أم المنصور 
وهوب يطمع قطز ف العرش
 بس يلاقى الوقت مش مناسب ويستنى شوية
وهوب بعدين لما يقرب التتار
 يخلع المنصور من العرش بصنعة لطافة 
ويحبسه مع أمه واخواته




وإذ اخيرا يبقى قطز السلطان 1260
يعنى بع 10 سنين من تولى سيده أيبك الحكم 1250
 ويزحف التتار ع الشام
ويرجع بيبرس ينضم لقطز ف المعركة .. مؤقتا
وبقول مؤقتا لأن بيبرس
معتبر قطز قاتل لأستاذه ومعلمه (اقطاى) وبينهم تار
 بس هوه قرر يأجله لأن الخطر الاكبر كان التتار
 وهما الاولى بالمواجهة





وبعد ما يهزم جيش مصر جيش التتار
 يقتل بيبرس قطز ف طريق الرجوع من الشام
ويبقى هوه السلطان
ويلقب بالظاهر





وتفضل شجر الدر اللى فتحت السكة
وأيبك وابنه وقطز محطات
 لحد ما توصل لحد ما يبقى الظاهر بيبرس
ويكون المؤسس الفعلى لدولة المماليك ف مصر والشام



وقبل ما أنهى ..
أحب أقولكم ان حصن الدين تعلب
عاش ف سجنه ف الأسكندرية 7 سنين بحالهم
لأن أيبك خاف يقتله ويقلب عليه القبائل 
وبعد أيبك ابنه المنصور مكنلوش حول ولا قوة



بس لما مسك قطز وقرر يحارب التتار
خرجه من سجنه عشان يساعدهم ف القتال
 وفعلا خرج حصن الدين وشارك ف العركة
 لكن ...
بعد ما بقى بيبرس السلطان
وابتدى يرتب الأحوال على طريقته 
 رفض حصن الدين ينضوى تحت جناحه
وتربس معاه
والظاهر التربسة كانت كبيرة 
فالظاهر بيبرس حكم عليه بالموت 
واتشنق حصن الدين تعلب
بعد تولى الظاهر بيبرس الحكم بمفيش ...
و المركب ام ريسين تغرق
ويظهر انه معرفش يقدر التقديرات كويس 
ودا بيفكرنى بناس
بيقدروا قوتهم يمكن
لكن مبيقدروش قوة اللى قصادهم كويس
وتكون النتيجة خساير فادحة ..
مينفعش تتعوض أبدا 
مفيش داعى أفسر هما عارفين روحهم 
وكفاية اللى هما فيه 



وتوتة توتة ...
 نقول الملاحظات
 وهى كثيرة مريرة .. بالهبل


 1) اللى بيقول ان مصر شعبها خانع وعمره ما ثار
يراجع نفسه لو سمحتو



2)كل حكم جديد كان بييجى كانله ناس بتقوم عليه وبترفضه
وما اكتر الدول اللى قامت ف مصر
وما اكثر من قام ضدها 
بس احنا ندعبس ف تاريخنا شوية



3) بخصوص حوار أيبك مع مراته الاولانية
اللى قبل أم على
وبعدين مشاكله مع شجر الدر روخرا
 ايه الحكاية 
الراجل دا الستات كانوا كارهين عيشته ليه؟؟







4) حد يستجرى يزعل تحية كاريوكا برضك؟
امتى الرجالة هتفهم ان فيه ستات مستعدة
تحصل على لقب ارملة قاتلة ولا تحصلش على لقب ضرة ؟!! #لموا_الدور





5) آه وايه نظام اميرات البيت الايوبى ؟
 قدمهم وحش ليه وكل ما حد يقرر يخطب منهم
رقبته تطير
يمكن اكمن بنات الشام قمرات بقى 
وخطيرين علينا 
وكدا 
#يمكن



6)اللى تحسبه عماد حمدى يطلع فرعون
 ايه اللى بيحصل للبشر اول ما تقعد على الكرسى 
بتتحول كدا ليه بجد؟
 ما حد يفك التنجيد بتاعه
 ويشوفلنا فيه عمل محطوط جوا ولا ايه؟!!




7)محدش يجيبلى سيرة أم الشرعية بقى
شرعية ايه والبلد دى من قديم الازل
و كلها انقلابات
 والحكم لمن غلبا
 وكله مستف الاونطة جوا الشنطة اهو .. !



و عموما 
وف رأيى المتواضع 
الشرعية ف أى زمان ومكان 
حاجة من تلاتة 
يا شرعية القوة
يا شرعية الشعب ف صفك
يا شرعية الأتنين سوا 
احسبها وانتا تعرف 
انقلاب ولا ثورة ... #بسيطة


ثم دا حصن الدين تعلب نفسه
اللى معتبر ان الأيوبين مكنوش شرعيين وعداها 
ثم اعتبر المماليك عبيد
 وملهمش حق ف السلطة
هوه نفسه لو طبقنا عليه المبدأ بقى
ميعتبرش مصرى أصلى 
والاحق بالحكم انذاك بقى ...  واحد قبطى .. !



كله بيحفر ورا كله عشان يثبت انه الاحق
بغض النظر عن اذا كان يصلح للحكم ولاّ لأ
 طب حصن الدين تعلب
هل كان قد فكرة الخروج على أيبك 
ولاّ ضيع اللى مشيوا وراه وصدقوه ... 
12 ألف ما بين قتيل وجريح وهربان غير اللى اتسبوا 
من الحريم وضياع حقوق وهم ما يتلم ...
وكل دا بقرار متهور بمواجهة خصم انتا مش قده 
ومعرفتش تقرى المشهد ع الأرض ... 
صح ولا انا ببالغ ؟ 



8) أيبك اللطيف الوديع شنق ألف نفر ف غمضة عين
 يعنى قطعا يستاهل ضرب القبايب
ولا بتوع مجلس حقوق الرجل عيعترضوا ؟!!
#اعترضوا بقى أعترضوا



9) ذنب ناس بتخلصه ناس
وأيبك دفع تمن جرايمه زى أقطاى ما دفعها
وزى قطز ما دفعها .. وشجر الدر ... الخ الخ
كما تدين تدان
 يمكن بيبرس اللى فلت
ومعرفش ليه فلت .. بس لأنه كان رجل دولة فعلا
ومكتوبله دور يكمله 
ولأنه أسس لأمبراطورية 
ورغم ان هواه ف الشام
 لكن عمل ف مصر اعمال كبيرة 
خلته بطل الشعبى
 وبقاله سيرة


10) ام المنصور اللى بسببها اخترعت "اكلة ام على"
 بعد كل الهيصة دى انتهت ف الحبس
 مع ابنها السلطان المنصور بعد ما قطز عزله عن الحكم
#دنيا



11)البلد ف فترة 10 سنين
 1250-1260 لحد التتار ما جم
عدى عليها 5 حكام
3 انقتلوا (شجر - أيبك -قطز)
والمنصور اتشال 
وبيبرس جه ف الآخر 
يعنى ..
الأخوة اللى طول الوقت يعيطوا عشان الأستقرار
وعاوزين نهدى والبلد بتضشييييع يا دويع
يهدوا وينبطوا شوية احنا لسه قدامنا وقت 
على ما دا يحصل




12) واخيرا وليس بأخر يعنى ماشى أيبك عنده خلل
وزعل الست تحية كاريوكا وعديناها
بس حد برضو يا قطز يزعل رشدى أباظة
ويقتل معلمه واستاذه ويفتكر روحه هيفلت ...  ؟؟





على الهامش بقى حكاية أيبك مع مراته الاولانية
اللى رفضت ترجعله دى وحبت عدوه
فكرتنى بقصة حصان طروادة ف بعض تفاصيلها 




القباقيب ... لمن يستحقها




البرج الاحمر اللى حبسوا فيه شجرة الدر
وانقتلت فيه واترمت منه على الخرابة تحته شبه عارية
#الزمن 





فارس مملوكى




:) 






وأخيرا وطول العمر بقى
هيفضل
التردد .. التردد يا عزيزى أيبك مرض الجنس البشرى
 الله يرحمك يا ست الكل
 #حكم_عبر_أخر_فل 



-----------------------------

Related Posts Plugin for WordPress, Blogger...
"حقوق الملكية والملوخية والمهلبية ... الخ
محفوظة للست شهرزاد وإياك حد يسرقها ويحاول يزعلها آغجر .. مفهوم ؟ "