السبت، 7 ديسمبر 2013

حكايات مصرية ... 6







 نبتدى الحكاية الأولى عن مقولة اترددت زمان
واخدها كاتب مسرحى حديث وعمل بالتيمة بتاعتها مسرحية 
وسماها 
"يا سلام سلم الحيطة بتتكلم"




والمؤلف هوه سعد الدين وهبة كتبها سنة 1974
وأنصحكم بقرايتها ممتعة حقا
 وبتحكى القصة (الأصلية) 
انه ف زمن السلطان برقوق
ظهرت حكاية عجيبة 
عن راجل بسيط اسمه ابن الفيشى
 وساكن ف بيت غلبان جنب الجامع الأزهر 
وف يوم ...
راجع بيته آخر الليل وفجأة سمع صوت فخيم
جاى من ورا احدى حوايط البيت
 وبيقرب منها سمع الجملة دى :
 إتق الله وعاشر زوجتك بالمعروف .. !




طبعا ابن الفيشى اتخض واتخرع
وقعد يبسمل ويحوقل
وافتكر ان فيه جنى
وطبعا قال لروحه ألم نفسى واختشى
وبقى كويس مع مراته ليتأذى
بس بعدها طبعا مقدرش يمسك روحه
 وحكاية الجدار انعرفت
راح حكى لأصحابه
 واصحابه حكوا لأصحابهم
وصحاب صحابهم





 وهوب الخبر انتشر
 وهوب لقى الناس جاية تزور الجدار
 وكأنه مقام وجايبين معاهم شىء وشويات .. !
وكل اللى عنده مظلمة 
او طلب 
ييجى يسأل الحيطة
والحيطة ترد اعمل كذا
ومتعملشى كذا
والموضوع وصل لقصر السلطان
وقالهم شوفولى ايه النظام يا ولاد ؟!!




محتسب القاهرة محمود العجمي
هوه اللى كان موكل اليه بالمهمة دى
وطول ما هوه ف السكة لبيت ابن الفيشى
مكنش بيسمع غير الجملة اياها ومفيش غيرها
يا سلام سلم الحيطة بتتكلم .. !!
المهم المحتسب كان راجل كويس
وسمعته نضيفة استأذن ابن الفيشى
 ودخل ع الحيطة 
وسالها فبقت ترد على الأسئلة .. !





المحتسب استغرب 
والكلام دا مدخلش دماغه
وقال لرجالته هدوا الجدار لما نشوف ايه اللى وراه
 وهدوه ف ساعتها لقوا وراه فاضى ! 
فمشى وقفاه يقمر عيش



وفات يوم والتانى وبعت المحتسب رجالته
بناء على طلب السلطان
يشوفوا الناس بطلت تجيب ف سيرة الجدار
 ولاّ لسه مدرويشين بيه 
فالأعوان قالوله لسه
فأتنكد قوى وصمم يعرف ايه الحكاية
 فراح باعت لأبن الفيشى صاحب البيت
اللى فيه الحيطة 
وراح متككككك عليه
فأعترف بقى بكل حاجة 
وان الموضوع كالآتى




السيدة المصونة موادم ابن الفيشى
 كانت بتتخانق معاه طول الوقت
وهوه منكد ع اللى جابوها
شأنه شأن أى زوج ورجل مصرى أصيييل
 قوم ايييه ؟؟
قوم الست استغلت فرصة ان الحيطة فيها فجوة
وبقت تتكلم منها فالصوت يبقى عميق
 وقالت تشتغله بقى
 وتخليه يعاملها كويس بالخوف
 ما دام الادب مش نافع!



فلما اتعدل معاها وبقى كويس
 والناس ابتدت تيجى بالهدايا والفلوس
 راحت زى الشطورة كدا معتيرفله بكل حاجة
 قام قالها قشطة
 خلي الحيطة تتكلم علطول
وبس خدوا الموضوع تجارة وشطارة
والناس بقت تتعبد عند الحيطة من كتر الوله


العجمى طبعا رفع الموضوع للسلطان
 فحكم عليهم بالضرب بالمقارع والعصى
وبعدين اتسمروا كل نفر على جمل
 وإتلف بيهم القاهرة ف جرسة وتسييح مفيش كدا
ورغم ذلك المقريزى بيقول ان كان فيه ناس ف الشوارع
بتدعى ع السلطان !
وان العوام والبسطاء مكنوش مصدقين
 ان الراجل ومراته نصابين
ومصرين ان السلطان ورجالته هما اللى وحشين
وتوتة توتة اول حكاية خلصت
الدروس المستفادة بقى



1) خليكوا حلوين مع الحريم وبطلوا رخامة
 عشان من ايام المماليك وانتوا مخلينا داخلين ف الشق
 والحيطة نطقت م الزولم ..



2) يا سلام سلم الحيطة فعلا بتتكلم
اومال كل الجرافيتى اللى ف شوارع مصر دا كان ايه ؟؟







وف مسرحية سعد الدين وهبة كان مخلى البطلة
 اللى بتتكلم من ورا الحيطة .. 
عملت كدا
عشان تدفع الناس للثورة على السطان الظالم
وللأسف حبت السلطان .. فالثورة باظت
:)
المهم ان وهبة مكنش عارف ان بعد سنين كلامه هيتحقق
 ومش بس الحيطة هتتكلم
 دى هتنفعل وتحكى
وتفكّر الناس بالحقوق والشهدا
وهتقوم ثورة



وبموناسبة الثورات بقى تدخل ع






الحكاية رقم (2)

ودى حصلت ف حتة مش بعيدة عن الحيطة برضو
 واتخذت موقع ف الجامع الازهر 


والقصة تبدأ من أحد نواب السلطان
وكان اسمه "حسين باى"
 والاخ كان كعادة أمراء المماليك مفترى وظالم
وغشيم ف القوة 


ف يوم إتأخر راتبه من عند السلطان
 راح نازل السوق وحب يلم مرتبه بنفسه من الغلابة
وراح داخل على بيت واحد من الدروايش
ولامم كل اللى فيه .. كله


والدرويش دا كان غلبان اصلا
يا دوب عفش بسيط وعند حريمه حبة مصاغ أى كلام كدا
حسين باى راح واخدهم هما كمان ومخلاش
 وخرج من هنا والدنيا هاجت من هنا
 والخلق اتجمعوا ياما
- ايه اللى حصل يا ولاد؟
 - نهبوا بيت الدرويش يا خلق .. هتسكتوا ؟
 - لأ طبعا




وبس بقت مظاهرة من رجالة وستات وعيال ... 
وواحد مخبر من حبابينا
يميل على حد م الماشيين ويساله :
- هيا المسيرة دى راحة فين يا كابتشن
 فيرد المتظاهر:
- طالعين ع الازهر
ويوصل الجمع الازهر
 ويملى صحنه ع الاخر
وما حوله ويطلع شاب ع المئذنة
ويهتف ويسخن الجموع
ويقول فيما معناه : فلنشبر لهم كما شنبروا لنا !!
لأ قال دى
"غدا صباحا نحشد الناس فى بولاق ومصرعتيقة
وغيرها ولنغير على بيوت الأمراء لننهبها
كمان نهبوا بيوتنا ونموت شهداء واما ينصرنا الله "
#نفس_المعنى_برضو



المهم الخبر انتشر
وشيخ الطريقة البيومية اللى كان مجاور لسيدنا الحسين
انضم للمشهد ثائرا هوه كمان ونادى اتباعه للإنضمام
 وبس العملية وسعت
الامرا وصلهم الخبر وكان ممكن يعدوا الهوجة دى
 لولا انهم لاحظوا ان المشايخ انضموا للعامة
ودا بالنسبالهم كان نذير خطر 
فراحوا لحسين باى ...
وعملوا قعر مجلس



انتا هتودينا ف داهية
 لميت الواغش علينا
بكرة هيدخلوا علينا الكومباوندات يدبحونا
 واحنا منهارين 




الحاج حسين لقى الموقف جلل
ولجنة الحكماء جايله لحد عنده
وعاوزين يلموا الثورة ف عبهم قبل ما توسع
 راح موافق
وزى الكلب رجع الحاجة للدرويش
 وخلاص كدا الناس هديت 
والدروس المستفادة بقى من القصة


1) هما دول اللى مثل (يخاف ميختشيش)
ينطبق عليهم بالحرف


 2) المماليك كانوا نتنين صحيح
 بس توصل لدرجة انك تدخل ع الناس بيوتها
وتسرق العفش وبتاخد مصاغ الست ... !!

واذ اننا بنتكلم عن النتانة ف التصرفات
 فلازم ندخل على







الحكاية رقم (3)


 عن الحاج برسباى
وكان مملوكى برضو
 وقولولى ماله دا يا فطمطم مزعلك ليه؟
أقولكم عشان عادة السلاطين ومن فى حكمهم
كانوا بيجيبوا موظفين كبار يعملوا الشغل القذر
 عشان هما ميبقوش ف الصورة
ويقبضوا من خلالهم ويبقوا ف السليم



وزى ما مبارك وعياله خلوا عز يحتكر الحديد
 بس أصلا كان بزنس مباركى بحت
 برسباى بقى جاب م الآخر
 وقالك مديش حد سمسرته حتى 
وقرر يحتكر السكر ..
يعنى احتكر انتاجه وتوزيعه
و بسبب كدا انقفلت كل مصانع السكر ف زمنه
فلسوا اهل الصنعة دى يا عينى
 واتشردوا العمال والصنايعية الشطار
وبرسباى شفط ف كرشه المكاسب كلها
وبسببه صناعة الحلوى اتدهورت
والناس كانت بتدعى عليه



وأنا اظن والله واعلم ان غنوة الست سمام العدلى
 بتاعت السكرغلى دى
اتعملت وقتها
 :)
والدروس المستفادة م القصة دى


1) الستات تحمد ربنا 
انها مش ف زمن برسباى
 عشان وقتها مكنتش هتعرف تزعل رجالتها
وتنكد عليهم وترجع تصالحهم ... #كانت_هتبقى_مشكلة





والملحوظة 2)
هتقولها الست سماسم للدلعدى يا سى برسباى
 اختشى على دمك مش كفاية علينا مظالم المماليك وساكتين
كمان غليت السكر 
ومررت عيشة الناس يا وغد!
#عرر_السلاطين_والله








القصة رقم(4)


ف زمن الفرنسيس اللى نورونا 3 سنين ف مصر
 والأخوة الافاضل
الفرنساوية الأفاضل جم بجيشهم وأسلحتهم ومطبعتهم
وكمان .. عاهراتهم !




الكتب بتقول ان نابليون ف البداية
كان مركز هوه وعسكره على الأحتلال
ومش فاضيين
 بس بعد شوية الجنود اشتكت
فراح باعت يستقدم لامؤاخذات من فرنسا





الفرنساويات اللى جم
 منهم اللى فتح مسرح وبارات لأستقبال الجنود
وطبعا العدد مكنش كفاية
فأبتدى العساكر تختلط بالمصريات



طبعا سيدات وفتيات الطبقة الوسطى والعليا 
بعدوا بطبيعة الحال عن المسخرة دى
 بس الطبقات الوضيعة
ومنها العوالم والهىء مىء .. الخ الخ 
قدموا خدماتهم
ونظرا لأن البلد حصل فيها انفلات
فزادت بيوت الدعارة وزاد اقبال العساكر عليها
وكانوا تحت سمع وبصر المحتل
اللى مكنش عنده مشكلة ف كدا ... والعكس !




بس بقى ورحبت البنات بالمحتل وبفلوسه
والمحتل يدفع ويستنفع ومعترضشى
 والشعب شايف المسخرة وهيطق من جنابه
 والقيادات ف الجيش الفرنسى ساكتة ومطنشة
لحد ما ربك بقى لما يحب يدى كل واحد نصيبه



الأمراض الجنسية انتشرت بين الفرنساوية
زى ..  الزهرى
واتحجز عدد كبير ف المستشفيات اللى زادت ...
لدرجة ان الجنرال مينو أمر ببناء مستشفى
جنب كل مركز قيادة
وكان فيه مخاوف من الطاعون وانتشاره
 بسبب الحالة العامة الزفت دى 
فيعملوا ايه طيب ف المصيبة دى ؟



مينو بعت لأعضاء الديوان
 يسألهم المساعدة ف حكاية الدعارة دى
 الشيوخ ردوا بان دى فسق
 واحنا دى مش عادتنا اصلا جنودكم سببها
واعمل اللى تشوفه لمنعها 
 الراجل سمع كدا 
و..راح مدى اوامر لعساكره
بعدم الاختلاط بالجوارى والزنجيات وبنات الهوى
 وادى أمر لأغا الانكشارية
يعمل ايه ؟؟؟




قالوه لملى البنات اللى لامؤاخذة دول واتخلص منهم
راح الأغا قابض على 400 بنت
وحط كل بنت ف شوال
ومغرقهن جميعا ف النيل السعيد ! 
#ناس_طيبين_قوى



وبس محدش اتكلم ولا زعل عليهم
 ولا جاب سيرتهم الا بعدييين بقى ف الكتب 
والفرنساوية مشيوا ف نفس السنة
غير مأسوف عليهم 
وتوتة توتة الدروس المستفادة م القصة 

1) غير ان المشى البطال وحش
فالفرنساوية اللى هلكونا وقتها بحقوق الانسان
 والتحضر والمدنية .. الخ
محدش قالهم ان اغواء البنات ف النوع دا من "التصرفات"
 كان سبب ومشاركة ضمنية ف جريمة قتلهم بعدين !


2) طب قتلتوا البنات وكانهم فراخ ..
مقتلتوش الرجالة ليه ولا هما عادى ينقلوا المرض
او يتعالجوا ويخفوا 
عشان هما صنف تانى م البشر وكدا .. ؟
#عنصرية_و_قذارة


3) قالك نابليون بعت يستقدم غانيات فرنسيات
ليكن ف خدمة جيش الجمهورية اثناء قيامه بواجبه
 يا صلاة العيد ... دا جهاد النكاح من زمان بقى !


جاتهم نيلة .. ندخل ع






 القصة رقم (5)


طبعا كلنا عارفين منارة الأسكندرية
ودى المعلومات التقليدية عنها .. هنا 
المنارة اتعملت لأرشاد السفن
وكانت أعلى بناء ف عصرها
وصلت لأكتر من 120 متر





ودى صورة تخيلية ليه






المنارة دى كانت مبنية ف جزيرة فاروس .. 







 واللى مكانها حاليا قلعة قايتباى
المنارة اتعرضت للأهمال على مر عصورها
 وكذا حد حاول يرمم اللى يقدر عليه
 بس زلزال حصل ف القرن الـ14
 ف عهد الناصر بن قلاوون 
وهيا بقت خرابة
لحد ما جه قايتباى قرر يشيل يبنى مكانها القلعة بتاعته
 عشان تكون حصن ضد الغزاة
ويقال ان كتير من الأحجار اللى مستخدمة ف القلعة
 متاخدة من بقايا المنارة




وكل دا لا يعنينى لكن اللى يهمنى الجزئية بتاعت طولون
أيوه
احمد بن طولون لما قعد على كرسى الحكم
عمل جملة اصلاحات ف البلد 
وكان منها المنارة
اهتم بيها ورممها
وزى ما قريتوا الوصف بتاعها وتصميمها
كان فيه اماكن لسكن العمال والموظفين الادرايين
 وكان عددهم مش قليل 
قوم ايه ؟




الحاج طولون ف زيارة من زيارته لأسكندرية وللمنارة
 قرر يبنى جامع فيها عشان اللى قاعدين ف المنارة
يصلوا فيه 
وقعد المسجد دا عمر طويل ..
لحد ما جم المماليك ومسك الظاهر بيبرس
 جدد المسجد ويبنى قبة خشبية يقعد فيها لما يزور المكان
كل دا إندثر بعدين ف زمن قلاوون 
زى ما قولنا


الدروس المستفادة اولها واهمها

1)الحكام لما بيبقوا كويسين وعاوزين يعملوا حاجة
بيعملوها
 طولون وبيبرس مسكوا بعد فترة اضطرابات 
و متحججوش بقى !!
مقالوش الانفلات الأمنى زى كل نظام جه !
 مقالوش اصل الكل كان ضدنا زى سخام مرسى ما قال !
مقالوش الاخوان السبب ف كل حاجة زى النظام الحالى !
اللى عاوز ينجز بينجز
والتاريخ بيخلده
وهذا هيقودنى الى رقم


 2) لما حد يتنك عليك ويقولك عندى ف بلدى أعلى مبنى
 اعلى ساعة 
اعلى معرفش ايه ..
إتنك انتا عليه وبالقوى
وقوله ان أعلى أقدم مسجد ف العالم .. كان عندنا
ف زمن طولون
كان عندنا مسجد منارة الاسكندرية
وكانوا المصريين والمسلمين بيصلوا فيه بعلو 120 متر !
والكلام دا من اكتر من 1200 سنة يا بشر ..






القصة رقم (6)


 بتحكى عن موقف تعرض له أحد الرسامين
 اللى جم مصر بعد الحملة الفرنسية
 ف زمن محمد على تحديدااا



الفنان دا كان اسكتلندى
 واسمه ديفيد روبرتس
 ونزل مصر وقابل محمد على واخد إذنه يتجول ف البلد
 عشان يرسم لوحاته 
محمد على قاله اتفضل يا ضنايا
بس طبعا مقلش اتفضل 
وسكت ..
بعت وراه ناس تراقبه
برضو محمد على مكنش بيامن لأبوه
المهم ديفيد اتنصح بحاجة من المقربين 






قالوله 
يا مستر ديفيد المصريين
ذكرياتهم عن الاجانب من بعد رحيل الفرنساوية
مزعلاهم شويتين
(عرفنا ليه بقى من القصة اعلاه)
 فالأفضل تلبس زى عربى
عشان تنقلك بالبدلة هيستفز الناس
وممكن تتعرض لأذى
الراجل رحب بالفكرة وقال ماشى
ولبس فعلا زى عربى
وخرج يتمشى 




رجله خدته لمسجد قايتباى البديع ..
لقى الناس بتقلع الجزم
 راح قالع 
ودخل
وهوه منبهر بجمال المكان
 وبيبص لقى مجموعة من الناس ملمومة على قماش
 فقرب منهم
ولقى القماش اللى بيخيطوا فيه شكله حلو قوى قوى
 فراح موطى كدا عشان يلمسه
 ولسه بيمد ايده راحوا اللى قاعدين لامحينه وشاهقين



فاكرين وعارفين المشهد دا
لما شويكار شدت كرسى المرحومة
عشان تقعد
 فالكل شهق
وفؤاد المهندس سألها ... 



 - فيه حاجة يا اوسة ؟



فردت ..
 - مفيش يا ابو الفضل 




أهو دا اللى حصل
 الناس اللى قاعدين كانوا بيشتغلوا ف كسوة الكعبة
 فاختاروا مسجد قايتباى للمهمة دى
لأسباب منعرفهاش
 قوم ايه .. ؟
شافوا الراجل بيقرب وبصوا ف وشه كويس
عرفوا انه اجنبى
فازاى واحد اجنبى يلمس الكسوة الشريفة دى
والمفروض اللى يلمسها او يمسكها يكون متوضى !





طبعا الراجل ملحقش ينطق
ولقى الناس اتلمت عليه
وفيهم اللى عاوز ياخده برا المسجد
عشان يعرفه غلطه #بالمحببببة 
وديفيد بقى عرقه مرقه ..
فأيه ؟




فجأة تنشق الارض 
ويطلعلهم واحد من رجالة محمد على
 اللى يشرحلهم ويقولهم دا ضيف الوالى
وميعرفش عوايدنا 
والغريب اعمى ولو كان بصير .. الخ الخ
فالناس طبعا بعد الشرح هديت
 وسكتت
وسابوه يتابع الحكاية بس برضو من بعيد
:)




دى تدوينة عن كسوة الكعبة .. بتفاصيل اكتر
وديفيد روبرتس دا أنا بحبه جدااااا 
عشان رسم مصر بعيون صافية وشفافة وحلوة
ولو بصيتوا ف لوحاته 
هتفهموا قصدى ايه ..
هنا 
عيشوا 






الحكاية رقم (7)

وآخر حدوتة بقى
عشان الناس اللى عاوزة تنام #خخخخ
عن ضريح موجود بالقرب من ميدان لاظوغلى
معروف بانه ضريح الشيخ يوسف 
والميدان قصاده اتسمى بأسمه والشارع كمان
والناس لحد دلوقتى كتير منهم
فاكر ان الشيخ يوسف دا ولى وله كرامات
ولهذا بنى ضريحه ف الحتة دى
ومحدش فكر يشيله
 اتارى القصة حاجة تانية خااالص





الشيخ يوسف دا حضراتكم كان فرد ف تشكيل عصابى
مكون من 3 تنفار
 هوه وواحد اسمه صالح
والتالت عباس الطرابيلى ف كتابه "شوارع لها تاريخ"
مقلش أسمه!
المهم ان الأخ المجهول رقم 3 دهون
كان بيقعد على ناصية شارع الخليج
اللى هوه شارع بورسعيد حاليا
ولما يعدى عليه حد يروح مزعق بعلو صوته 
يا واااااحد ...



قوم صالح ويوسف يعرفوا ان اللى جاى دا لوحده
ومعهوش حد
 يروحوا هاجمين عليه هما التلاتة
 ضاربينه وسارقينه وقاتلينه .. ! 
#شوف_الانسانية!



وطبعا القصة اتكررت .. ريا وسكينة بقى وكدا
 قوم حصل ذعر
والجهات الأمنية والدولة العميقة لازم تتصرف
راحوا مراقبين الجو
 لحد ما كشفوا الملعوب
وفعلا مسكوا الأخ اللى بيقعد ع الناصية وفين يوجعك
لحد ما أعترف بماذا فعل منذ يوم ولادته
 حتى يوم القبض عليه 
وقال على شركاته صالح ويوسف #هع_هع



انا ضحكت ف التويتة اللى فاتت عشان هعيط بعد كدا
ليه يا طمطم؟
 اقولكو عشان بتوع الُتمن مسكوا صالح
وحطوه ف الحديد
 فجاله حالة خرس مفاجىء ..
اما يوسف فهرب من المطاردات
راح فيييين ؟
راح حضراتكم لـ لاظ اوغلى بك ..
 واللى كان أيام محمد على كتخدا
 يعنى تقريبا نايب الوالى
 وحاجة عظيمة




لاظوغلى هوه اللى خطط لمدبحة القلعة بتاعت المماليك
ومن بعدها محمد على كان معتمد عليه
 ف القبض بيد من حديد على الامور الأمنية
والراجل كان سداد
حد يقولى طب يوسف المفروض يهرب منه بالمشوار
 فيروحله ليه ؟
أقولكم انا راحله ليه ؟
 عشان القصة القديمة اياها 
بتاعت الداخلية والبلطجية أيد واحدة
الاتنين ميستغنوش عن خدمات بعض 
وشيلنى وأشيلك
ودا اللى حصل ويوسف كان متأكد منه
عشان كدا لما جرى على بيت لاظوغلى
 واتحامى فيه 
وطلب العفو ايه؟
ايه ؟
 اخص عليكو اللى هيقول لأه عضربه
 عفا عنه طبعاااااا
 وسابه يروح
آه والنيعمة سابه يروح
 ومش بس كدا 
دا لما مات بناله الضريح اياه .. !




حد يقولى بتهرجى أقولكو لا والنبى
 ما الضريح اهو موجود وشاهد! 
اللطيف ان لاظوغلى نفسه
 لما مات سنة 1828 
دفنوه ف ضريح ملاصق لضريح يوسف !
دفنوهم جنب بعضشيهم .. هع هع
والله الاتنين من توب بعض يستاهلوا




طب دا واحد 
والأتنين التانين عملوا فيهم ايه ... ؟؟
الشريك التانى كان اسمه صالح
 اللى حطوه ف الكلابشات
 وجاله خرس
لاظوغلى برضو أفرج عنه
 وخدته واحدة رقاصة صاحبته عندها البيت 
واستفادت منه أيما استفادة




واصل الناس زمان كانت بتتبارك بالمرضى 
والمذهولين
والدراويش الخ الخ
طلع على صالح لقب "صالح ابو حديد"
 وبقى شيخ والناس تزوره وتتبرك وتجيبله هدايا وأكل
ويقعدوا يسالوه نعمل ايه ونسوى ايه
 (زى الحيطة كدا) فيشاور بأيده او يهز راسه
الرقاصة تقعد تفسر على مزاجها
 تقول طلبك يجاب
لا مش هيحصل 
كدا
وطبعا لمت فلوس من ورا الشغلانة دى
ومحدش يعرف كان صالح ابو حديد دا بيستعبط
ولا هوه فعلا انخرس 
ورقد ف السرير م الخضة فعلا .. !





 اللطيف بقى ...
انه لما مات اتعمله ضريح
 ولما جه الخديوى اسماعيل راح بانيله جامع كبير
 ف السيدة زينب يعرف بجامع الشيخ صالح ابو حديد
 موجود لحد دلوقتى ..!






وعلى مبارك ف الخطط التوفيقية
 كتب وهوه متغاظ وبيغلى وبيقول
انه شخص لا يستحق مسجد بأسمه
بينما هناك علماء أفاضل كثر ويستاهلوا ..
ولكنها عادات وتقاليد المصريين البغيضة
اللى كان عندهم ولع بالغيبيات
 ويعملوا أضرحة لمن لا يستحق
وطبعا على مبارك 
مقلش الكلام دا للخديوى اسماعيل ف وشه
استنى لما مات وكتبه ف الخطط التوفيقية ايام توفيق
:)



بس المثير ان صالح اتسمى بـ "أبو حديد " دى
نسبة للقيود اللى اتحطت ف ايده
 لما اتقبض عليه !
ولزقت ف اسمه
 وبقت على الجامع كمان
:)





حد يسألنى عن الشريك التالت ف العصابة
 راح فين وجراله ايه ؟
 أقولكم محدش عرف
 بس واضح انه الغلبان اللى ملوش ضهر 
واللى شال الليلة كلها
والأتنين التانين كل واحد نفِد بجلده ..
عشان هيا أرزاق
 وآل اللى يعدى جنب الضريح يفتكر ان تحت القبة شيخ
اتاريه شيخ منصر! 
#حقا_و_صدقا




وابقوا فكرونا نحكى
عن تمثال لاظوغلى ال*#$@@× الله يرحمممممه
عشان دا تمثاله ومش تمثاله
والحتة دى كلها اتنجست بحبايبنا الحلوين
 انتوا عارفين هما مييين 
 :)



وبس خلاص كفاية كدا ..
اللى نام بكرة يقرى الحدوتة كاملة هنا
 أو ف المدونة 
تصبحوا على الف خير





---------------------------------


Mohamed Emam ‏@memam8 
 http://www.davidrobertslithographs.com/Egypt2.html 




مـيرڤـت @MervaTsa3ed 
 حتي الحيطان نطقت من جبروتهم مع الستات :D



-Hope = Faith @HendMAbdelaziz 
الزولم ده زى مزاهرات شريط الاخبار




-Ahmed Rageh @Ahmed_Rageh101 
 ايه ده انا منبهر الحقيقة



Related Posts Plugin for WordPress, Blogger...
"حقوق الملكية والملوخية والمهلبية ... الخ
محفوظة للست شهرزاد وإياك حد يسرقها ويحاول يزعلها آغجر .. مفهوم ؟ "