السبت، 14 ديسمبر، 2013

زرافتنا فى أرض الفرنسيس








طيب  
اولا
 حكاية الليلة اهداء للجميلة العسل المصفى
 ست البنات كلهن .. ميرفت
 " @MervaTsa3ed "





وبادىء ذى بدء بما ان النهاردة الجيمعة
عتقمص دور محمود سلطان
وهقدم حلقة من حلقات برنامج عالم الحيوان 






وحلقة اليوم من البرنامج
هنتحدث فيها عن حيوان لطيف ظريف
 اسمه الزرافة
وهنتكلم عنها شوية
واستحملونا بقى .. هه




قبل ما نتعرف على هذا المخلوق الظريف
لازم نعرف اسمه جه منين
 يعنى ليه سموا الزرافة زرافة
ومسمهواش أى حاجة تانية 
وعبمجيد الصحاح بيقوووول
ان الزرافة معناها مجموعة زرافات يعنى مجموعات
واكمن الأنسة زرافة العرب بيعتبروها خليط
من عدة حيوانات تبقى زرافة 
عشان حيوان متجمع وكدا
والحيوانات المختلفة دى هيا
الجمل ف تكوينها
والنمر ف لون جلدها
والفهد ف سرعتها
والبقرة اكمنها نباتية يعنى الملخص هيا ف نظرهم كدا ..



الزمخشرى بقى واخواته بيقولك ان "زرف" فى كلامه
 يعنى زاد وأطال ف الحديث
 يبقى اكمن الأنسة زرافة رقبتها طويلة وعالية
 اذن فهى تسمى .. زرافة



وفيه ناس تانية ف اللغة برضو بيقولولك
 اَزْرَفَ في المشي: أي أسرع
 وناقةٌ زَروفٌ ومِزْرافٌ
 أي سريعةٌ وقد زَرَفَتْ 
قصره نفهم من كدا ان الزرافة يعنى الدابة السريعة



وفى معجم العين
قالك هذه ناقةٌ زَرُوفٌ يعنى طويلة الرِّجْلين 
وبالتالى واسعة الخطو





والفراعنة سبقوا الكل
وكان لازم يبقالهم كلمة ف الحكاية دى
والزرافة ف رسوماتهم كان اسمها (سريو)
بمعنى العلو والارتفاع



 القصد بعد كل الشرح دا
 ان معانى الزرافة كلها تقريبا واحد
كلها معناها الدابة الطويلة العنق 
المرتفعة 
السريعة
 واسعة الخطى
 واللى تشبه مجموعة حيوانات
خلاص كدا نخش ع اللى بعده 
صفاتها بقى 
وطباعها




الزرافة بعد انقراض اليناصورات
 بقت هيا أطول الحيوانات
وطولها من 3 -4 متر
وبتعيش ف افريقيا ف جماعات
 ودا موطنها الاصلى 
الزرافة ف أى مكان ف الكوكب
بلد المنشأ بتاعها قارة افريقيا وفقط




وصحيح رقبتها طويييييلة
 بس هيا 6 فقرات بس بس مشدودين حبة 
وعمرها مبيعديش الربع قرن 
ولو كملت بعد كدا لـ 28 سنة يبقى خير وبركة





قلبها كبير فعلا وقولا ورنه بيعدى الـ 10 كيلو
عشان يعرف يضخ الدم كويس للجسم الممشوق دا
وتعتبر حيوان سريع وفوريرة




هيا مخلوق نباتى
لكن تعتبر وجبة مميزة لمخلوقات اخرى مفترسة
 زى الأسد عدوها اللدود
 اللى بيخش معاها ف سباقات عشان يصطادها 



قوتها الحقيقة ربنا خالقهالها ف رجلها
 بتدى ضربات عنيفة ورفسات برجلها
وحوافرها بتخلى الأسود تبقى قطط متخرشمة وقت الهجوم



الضربات دى ممكن تصيب جمجمة الأسد
 او عموده الفقرى وتجيبله شلل ف ساعتها ولحظتها
يعنى الأنسة زرافة الوديعة دى مش سهلة 
وحدش يستهتر بيها يعنى





وشوف بقى أخلاق الحيوانات اللى مش موجودة عند البشر
 الزرافة رغم قوتها دى لما بتتخانق مع زرافة تانية
مبترفسهاش كدا بنفس الطريقة بتاعت الأسد
عشان عارفة ان الضربة مؤذية ومميتة 
قوم لما زرافتين بيتخانقوا على قيادة القطيع ولا حاجة
بيضربوا بعض بالرقبة صراع العنق
ومبيستخدموش الرجلين
 عشان الاخلاق بتاعتهم متسمحش بكدا !!



بتنام كدا مش واقفة




 وبتكتفى غالبا من المية
 اللى ف ورق الأشجار اللى بتاكلها 
لكن لما بتعطش قوى بتشرب ... كدا




وبتنضف وشها بلسانها الطويل كدا 
وربنا مطول فيه عشان يساعدها 
تبعد الحشرات
وتهشها 






مدة حملها 15 شهر
وبتخلف وهيا واقفة
والبيبى بيقع من على ارتفاع 2 متر وينزل سليم ..
 سبحان الله
وهيا ام حنونة جدااااا


وبعد ما البيبى يشد حيله بيفضل لازق لمامته
لحد ما يشتد عوده
ونهاره ازرق اللى يقرب منه ويأذيه
 وقتها بتبقى زيها زى كل امهات الكون يعنى
 ممكن تصور قتيل








الزرافة كائن لطيف فعلا 
فعشان كدا وراد جدا
تلاقوها بتصاحب أى حد تطمنله





حتى لو كان مش زرافة زيها





ومش بس الحيوانات
دى ف كينيا مصاحبة اسرة





دى بتروح تفطر معاهم ! 





وكدا خلصنا حلقة عالم الحيوان دى
عشان ندخل على الفقرة التانية
وهى برنامج حياتى
ومشكلة النهاردة اللى بعتتها ز.ز.أ للبرنامج 
بتقول انه ...



ف نهار مشمش غير نهارنا ف مصر خالص
وف احدى الأراضى الأفريقية
وبوسط أدغالها بأشجارها ببابا غنوجها
ف جو رومانصى فظيع اتعرف زراف على زرافاية




المهم حبوا بعض
والظاهر الواد زراف كان قصده غير شريف
 شرب الزرافة حاجة أصفرة
صحيت م النوم لقت نفسها حامل
 #وهات_البندجة_يا_هريدى_العار_والتار_وكدا




البت انهارت فالمهم ولاد الحلال قعدوا يقنعوه
يصلح غلطته ف ييجى خمآشر شهر
 اللى هما مدة حمل الزراف زى ما قولنا
المهم الوغد اعترف بالمولود 
وجه معاد الطلق






واتولدت الكتكوتة الزروفة العسولة دى
 بصحة جيدة 
وهتسموها ايه يا جماعة ؟ 
أرد انا 
انا اللى هسميها يا غجر
انا اللى بحكى حكايتها 






انا سميتها فوفو 
وفوفو هتتساب من ابوها
كعادة كل أباء الحيوانات بيفلسعوا بعد الولادة
وغالبا قبلها كمان 
ويسبيوا العيل ف رعاية الأم وبس



بس وكبرت فوفو ف الغابة
وقعدت تنطنط جنب مامتها
وهما الأتنين ميعرفوش المستخبى والقادم من الايام
 وكدا نخلص برنامج حياتى



وهندخل على فيلم مغامرات حربى اجتماعى اطفال
ليه بقى
عشان قبل فوفو ما تتولد
كانت الطفلة البريئة متراقبة
وحد قاعد مستنيها عشان يصطادها !!


مين دا يا طمطومة 
الوغد اللى قعد لعيلة صغننة زى دى
وعاوز ياخدها من مامتها ؟؟
 أقولكم الحاج الوالى محمد على بتاعنا 





والحكاية جايبهالكم من كتاب زرافة محمد علي
تأليف مايكل ألين
ترجمة مجدي شرشر
 والعرض الملخص للكتاب 
بقلم الجميل : د.أيمن الجندي



والحكاية بتقول ان سى محمد باشا على
كان قاعد ف القلعة
 وفجأة قرر يبعت بهدايا لملوك اوربا
عشان يخليهم يتلموا عنه شوية ويشترى خاطرهم
قوم طلعت ف دماغه يبعتلهم هدايا غريبة ونادرة ومميزة
وقرر يبتدى بشارل العاشر ملك فرنسا ف هذا التوقيت
وقرر يبعتله زرافة هدية ..! 
#ليه_يا_حاج؟



قالك عشان الزرافة كانت مخلوق نادر مش معروف
 غير ف افريقيا وبس
اللى عاوز يشوفه كان لازم يجيله
او يبص عليه ف الرسومات او يقرى اوصافه


محمد على بقى طلعت ف دماغه
يجيب زرافة ويسفرها اوربا عشان يعملهم حالة ابهار
 ودا اللى حصل فعلا
 بس الاول أصدر فرمان بأصطياد الزرافة ..!





 لما محمد على اصدر فرمانه سنة 1826
مكنتش فوفو لسه انولدت اصلا
المرسوم بأصطيادها راح ع الخرطوم لرجالته ف شهرين
الرجالة هناك ادوا الامر للصيادين
اللى استنوا على موسم الامطار ما خلص ف الجنوب
 وابتدوا يدوروا ع الزرافة الموعودة 
وكان لازم تبقى طفلة



ليه؟
عشان يقال ان الزرافة البالغة بتقاوم جامد
ولما بتتأسر بتحزن على روحها
وبترفض تاكل وبتموت ف الحبسة بعد فترة قصيرة
فكان القرار اصطياد طفلة
وترويضها على التكيف مع الأسر من صغرها 



الصيادين نشنوا على ام فوفو
وهيا حامل اوشكت ع الولادة
 واستنوا اللحظة المناسبة بعد ما ولدت
 ويقال انهم غالبا قتلوا الام عشان يعرفوا ياخدوا البنت
 :((




فوفو ملحقتش تلعب ولا تجرى ف الأدغال
زى باقى الزراف
وخدوها فورا م الدار للنار
وحطوها على مركب عشان يسافروا بيها مصر


وقت صيدها كان عندها شهرين يا دوب
 قصننة وبريئة وطبعا رجالة محمد على كما تروى القصة
كانوا بيعاملوها احسن معاملة 
وخايفين عليها خوفهم على حياتهم
كانت شهيتها ضعيفة
وبترضع أقل القليل من لبن البقر
اللى جايبنهولها مخصوص
وكانوا مرعوبين لتموت فمحمد على يطين عيشتهم! 




كان معاها ف الرحلة دى كام بقرة للرضاعة
ومعاها اتنين حراس هنسمع اسمهم تانى كتير هما
 (حسن) و(عطير) اللى هيكوننوا رعاتها لزمن طويل ...





ف الاول نقلوها على الجمال
وبعدين لما وصلوا للنيل
طلعت فوفو المركب اللى عليها 12 بحار
 وكانوا عند كل شلال يقفوا شوية
يقفوا عشان ينزلوها البر تلعب وتاكل م الشجر
وتغير جو الا تزهق يعنى ونفسيتها متبقاش حلوة !
وكانوا عاملينلها مظلة ف المركب عشان الشمس وكدا



وصلت المركب الخرطوم وهناك نزلوها
وقالوا تقعد شوية
وقعدت الأنسة فوفو 16 شهر لحد ما استوى عودها
 وخراط الزرافات خرطها 


وثم صدر الأمر بالسفر للمحروسة
وركبت فوفو مركب أكبر من اللى فاتت
ومن نيل السوادن لنيل مصر
ومن ترعة المحمودية وصلت اسكندرية
وقعدت هناك 3 شهور ضيفة على شرف محمد على


وبعت محمد على لفرنسا يقولهم
- فيه هدية منى للمك شارل واستعدوا
ردوا
- باعتلنا ايه ؟
قالهم زرافة 
- ايه ؟
- زرافـــــة 
- قول والمصحف !!



اصلا اصلا دى وحسبما يقول المؤرخين
تبقى اول زرافة تخش فرنسا ف تاريخها تخيلوا ... !
يعنى احنا المصريين لامؤاخذة اللى عرفنا الفرنساوية الزراف!




طبعا شارل العاشر انهبل اول ما سمع الحكاية دى
وكان عنده فضول رهيب يشوفها
ومصدقش اصلا ان حد يبعتله حيوان طوييييل كدا
وهيبعته ف البحر كمان ؟؟



طبعا قبل الهدية فورا
وبالتنسيق مع القنصل الفرنساوى ف اسكندرية
خلصت كل الترتيبات
والأنسة فوفو زرافتنا الجميلة هتركب المركبة
 بأعتبارها سفير !!!





ايوه المركب هيعلق العلم المصرى والعلم الفرنساوى
وهتسافر فوفو عليه بعد تجهيزات
 ومراسم عسكرية
 واحتفال رسمى !


قائد المركب عمل فتحة للزرافة
عشان تمد منها رقبتها العالية
وبطن الفتح دى بالقش عشان متتعورش
 لو التقلبات خلت السفينة تتحرك شمال ويمين .. !
وبعدين اتعملها غطا مناسب عشان يغطوها بيها
 ف حالة البرد خصوصا ليلا
 وصدرت التعليمات بالحفاظ عليها ف مزاج كويس
 وأكل كفاية 
وحسن وعطير معاها



كان مصاحب ليها ف الرحلة غير حسن وعطير حراسها
 واللى بيراعوها
كان فيه بقرتين عشان اللبن
وكمان زوج من الظباء
عشان آل متحسش بأنها غريبة وسط البشر.. !






والمركبة اتحركت ف شهر 9  من اسكندرية
و على اخر 10 كانت ف مرسيليا ف جنوب فرنسا
وهناك استقبلها العمدة ذات نفسه


وقعدت الزرافة فوفو ف الحجر الصحى
حسب القانون الفرنسى 10 ايام
وبعدين ابتدوا يحضروا الطريق عشان سعادتها تنزل ع البر
وتبدأ رحلة وصولها لباريس



الاول نزلت البقرات الحلوبات ف النهار
وبعدهم ف الليل والأنوار مزينة الشوارع
 خرجت فوفو لاول مرة 
تدوس برجلها على الاراضى الفرنسية




لما عمدة مرسيليا شافها لأول مرة انذهل
 وكتب لوزير الداخلية يقوله ف خطاب رسمى انها
 "المصرية الجميلة الأنثى بمعنى الكلمة والكنز الثمين "




الناس وقفت ع الصفين تبص عليها ومنبهرة
اول مرة يشوفوا زرافة اصلااا
 وفوفو كانت لطيفة صحيح 
 بس كانت بتخاف لما حد يلمسها



كانت بتنكسف تشرب اللبن قصاد العيون الغريبة
وبس تكتفى بحسن وعطير حراسها
وكانت بتحاول تتصاحب ع البقرتين ..
 بس كانوا رخمين ومطنشينها ! 
:))



الجو كان ازرق زى الأيام اللى احنا فيها دى ف باريس
 قوم حاكم مرسيليا استنى شوية لما الدنيا راقت
 وبعدين قرر يشوف حد
 يوصلها لحد باريس سالمة
فجأة لقى ف وشها واحد اسمه بوليتو
بيعرض خدماته ف نقلها
بس الحاكم حس انه حلنجى ونصاب
وقرر يشغل الفهامة وقالهم هاتولى راجل 
قصدى هاتولى عالم



راحوا مساعدينه شوية ورجعوا جايبنله ف ايدهم واحد
 اسمه جيوفرى سان هيلير
 ودا كان أصغر عالم عينوه لنبوغه أستاذ
ف المتحف الوطني للتاريخ الطبيعي



هيلير كان عالم يعنى بيفهم وبيعرف
الأول قعد 3 ايام يدرس ف تاريخ المخلوقة دى
عشان يعرف اولها من اخرها
وبعدين اصدر اوامره
 بالأتى 



1) امر بعمل احذية للزرافة عشان يمنع حوافرها من التآكل
 اكمن الرحلة لباريس طويلة


) عمل معطف من الصوف لحمايتها م البرد


ولبست فوفو المعطف والأحذية
وابتدت المسيرة الى باريس
كام المسافة بقى حضرتك لحد هناك ؟؟
 لأ بسيطة خالص
 800 كيلو بس !


Embedded image permalink


نعممم ؟
800 كيلو تشرب وتاكل وتنام وتمشى
 ومحدش يضايقها ولا يأذيها ازاى ؟
 لأ متخافوش هيكون معاها حراسة
 وف كل حتة هيتوفرلها المطلوب كله 
عيب دى ضيفة الملك وضيفتنا !





بس وابتدينا الرحلة
والزرافة كل ما تمر بمكان الناس تتلم
وتقف تتفرج غ المخلوق العجيب دا بشغف
 ويرسموها ف اللوحات للذكرى
ولما تعدى فوفو جنب الكنايس يدقولها الاجراس
تكريما لمرورها



وطبعا سان هيلير وعطير وحسن كانوا بيشوفوا الويل
طول الوقت ف رعايتها
لأنهم كانوا يمشوا قد ما يمشوا
وييجوا اخر الليل يحتاسوا ف انهم يلاقوا اسطبل مناسب
بعلو مناسب عشان رقبة الزرافة الطويلة 
واستغلال المزراعين عذبهم 
كمان فضول الغرباء والكبار بتوع كل بلد
اللى بيبقوا عاوزين يتفرجوا عليها
 ويقطعوا عليها ساعات نومها
وافلام كدا لحد ما الجدعان اتمرمطوا خالص



وكل دا والانسة فوفو ولا ف بالها بالمرة
كانت بتعدى ف أى حتة
 وتاكل من الشجر اللى تلاقيه قصادها عادى خالص
 ولا تزعل نفسها 
ولا تشيل هم !
 :)



وف المحطة الاخيرة مدينة ليون
اتجمع ع الطريق فوق ال30 ألف نفر يشوفوها وهيا معدية
وهى خلاص اتعودت ع البشر
فبقت تبصلهم بعيونها الناعسات وتأسرهم






وخلاص داخلين على باريس
حيث قصر الملك شارل العاشر
اللى كان هيموت م الغيظ لسبيين
 اولهم انه اخر واحد هيشوفها 
ثانياااا
انه لما الزرافة وصلت باريس
كان عاوز يروح يشوفها
لكن الملكة مراته منعته
 آل ايه دى هدية من والى عدمان
ومرتبته وضيعة بالنسبالك 
والهدية تجيلك مش انتا اللى تروحلها 
وميصحش تعمل كدا !!





وبس ونقعتله هدوم الخروج كلها ف البانيو
وقفلت عليه باب القصر من برا بالمفتاح
 قوم المخسوف قعد ومخرجش يشوف الزرافة ! 



وخلاص يا ختشى مشيتى كلامك ؟؟
خلاص خلِصنا
وبعت شارل لـ سان هيلير يقوله
 هات الزرافة بتاعتشى القصر عايز اشوفها بقى 





وخدله سان هيلير الزرافة وشافها الملك
 وهيا بتجرى قصاده ف حديقة القصر
وهام ف حبها لدرجة رهيبة
وبقت لعبته يوماتى 
#كان_هايف_قوى_واضح_جدااا




صدرت الاوامر بنقل فوفو لجنينة حيوانات باريس
 وهناك بقى الملك شارل كل يوم يروحلها
ويتفرج عليها ويلاعبها ويدلعها 




وانشغل بيها لدرجة ان خصومه السياسين
بقوا يتريقوا عليها ويطالبوه يخلى باله من شعبه شوية كدا
قد ما بياخد باله من زرافته






مش كدا بس دا ظهر مثل فرنسى عامى شائع
وقتها بالمناسبة دى بيقول
 "انه يمشط الزرافة"
 وبقى يستخدم للتعبير عن اهمال الشخص لشغله
وانهماكه ف تفاهات



بس على فكرة مش الملك بس اللى انبهر بالزرافة
 بقية الشعب الفرنسى كمان
 وبقت موضة وصرعة استمرت لسنوات
الزرافة المصرية بلونها ووداعتها بقت ايقونة !




يعنى يقال ان اول سنة قعاد ف حديقة حيوان باريس
 زار الزرافة حوالى 600 الف زائر
 من كافة انحاء فرنسا
بكل الطبقات





الستات لبست فساتين بلون جلدها
وحطت رسمتها على المراوح




وعملوا تسريحة قرون الزرافة موضة 





الرجالة عملت كرافتات بلون الزرافة ونقشة جلدها
 واتحطت رسمتها على الاطباق
والاثاث والكتب واسماء الشوارع والاغانى الخ
وزى ما بقى فيه
شكولاتة السيسى وباتيه رابعة على رأى باسم يوسف
 بقى فيه حلوى الزرافة
والأطفال اتهبلت على شراها طول الوقت 
انتوا عارفين الفرنساوية بقى والتقاليع 
هما أهلها اصلا 
:)



المهم الزرافة بقت موضة قعدت كتير
 والزرافة فوفو نفسها عاشت ف فرنسا معززة مكرمة
 18 سنة بعد الحكاية دى
وطبعا فضلت عذراء الربيع والخريف والفصول الأربعة 
لأنهم هيجيبولها ذكر يتجوزها منين ان شاء الله
 دى هيا جت القارة دى غلط اصلا 
وسبحان من وصلها سليمة عشان ليها عمر ونصيب ...!









وبعد موتها احتفظوا بيها
 واتحطت ف متحف الطبيعيات الفرنسي
 في باريس





اما حراسها
حسن متحملش الغربة ورجع مصر سنة 1827
 اما عطير فقعد لحد سنة 1838
يعنى طول شوية معاها
 اما الزرافة نفسها فعاشت 18 سنة بعدها
 ودا هايل
ليه ؟
عشان متوسط عمر الزرافة 25 سنة
 لما تبقى حلوة ومبسوطة
 وكون فوفو وصلت لسن العشرين وحيدة
ف بلد غريب عن طبيعتها والبيئة الأصلية بتاعتها 
 فدا معناه انها اتعاملت كويس جدا
مش زى الغلبانة روكا 
:(



د. ايمن الجندى بقى ف عرضه
اشار لنقطة ف منتهى الذكاء
الا وهى ان محمد على لما بعت الزرافة هدية لملك فرنسا
كان بيتمحلسله وعاوز يكسب وده
بس الحقيقة 
بعد وصول الهدية الى باريس بشوية صغننة
 ملك فرنسا دا ضرب محمد على صرمة
ووقع مع باقى ملوك اوربا اتفاقية
 كانت اول مسمار ف نعش محمد على وهيلمانه 



ومحمد على اللى بعت زرافة لملك فرنسا
وزرافة زيها لملك انجلترا وواحدة تالتة لأمبراطور النمسا
وكلهم باعوك يا حاج 
وهداياك راحت ف الوبا




ومش بالهدايا ومسح الجوخ
كله وقت المصالح هيتصالح ضدك
مهما كنت بتهادى بإيه
وانا تقريبا اوشكت انهى الحكاية 
ونقول الملاحظات ...




1) فوفو عملت رحلة بنت ستين بوبى
 من الخرطوم لمصر لفرنسا ومشيت مسافات رهيبة
ومع ذلك عاشت وعمرت كمان
عشان اتعاملت المعاملة اللايقة بيها كحيوان رقيق
 له روح وكيان وقيمة





بينما الغلبانة البائسة روكا
 اللى ف جنينة قتل الحيوانات بتاعتنا
تموت موتة الكلاب وتنتحر من كتر القهرة 
#يانضرى 







لو روكا سمعت حكاية زرافة محمد على
كان زمانها اتمنت تنولد ف زمنه
أرحم من هذا الزمن الاغبر من الأغبر 
ولو بأيدينا دلوقتى 
كنا ادينا كل حيواناتنا الجنسية الفرنسية
عشان نرحمهم من المصير الأزرق بتاع روكا 
وما قد يأتى ...




وسخرية القدربتعبر عن حالة مصر
متمثلة ف مصير كل من روكا وفوفو
مع اختلاف الظروف والزمن 
لكن دا بيقول حاجة 
اننا بقينا ف الدرك الاسفل حقا 




2) رغم اختلافى مع محمد على
 الا ان الراجل برضو كانله حاجات عجب
 يعنى يكفينى اعرف ان اول زرافة تروح فرنسا
كانت من عندنا احنا وبفلوسنا 
وهذا سبب يدعو للبهجة!




3) سبب اخر للبهجة
 الا وهو ان اسم (giraffe) وكل مشتقاته ف اللغات الأخرى
كله منقول من الأسم العربى زرافة
 يعنى البت بنتنا اسما وفعلا وتاريخا ..







4) بيقولك لما مسكوا نخنوخ لقوا ف حديقة قصره
 حيوانات مفترسة ولقوا زرافة
طب ليه ؟؟؟ 
ومحمد على زمانه بيتقلب ف تربته دلوقتشى



5) آل بيقولك لغويا العرب زماااااااان
كان بيشبهوا الست الجميلة بالزرافة
خصوصا اللواتى يمتلكن عنقا جميلا 
نعمممم ؟
يعنى زمان بدل ما يعاكسوا 
ويقولوا 
يا جميل يلى ماشى 
يا قمر 
يا عسل 
يقولولها 
يا زراف انتا يا حلو .. !!!




6) ف التعبير العامى "اظرفه بكلمتين" دا
هل له علاقة بالزرافة
اكمن معناها زود ف الكلام او السرعة 
فتفتكروا ليها علاقة ؟؟؟


7) وعايزة اقول ان مصر عرفت الزرافات
 من ايام الفراعنة
وف زمن الدولة الطولونية خمارويه ابن طولون
 كان مربي زراف ف قصره يعنى ...




احنا الزراف عندنا على أرضنا من ألف سنة
 قبل تاريخ وصوله لفرنسا
وبألاف السنين من ايام الفراعنة
 فمعلش احنا بنتكلم يعنى







واخيرا احب أوضح
ان اللى حصل لمحمد على من تقلص نفوذ وبهدلة اوربية
 فلأن فوفو بتقوله :
كل دا عشان انتا اخدتنى من ماما.. 




وخلاص توتة توتة 
تصبحوا على ألف خير




 يا رب الحدوتة تكون عجبتك يا جميلة
وميرسى ع الصورة الحلوة 
@MervaTsa3ed



---------------------------------------



Ahmed Rageh @Ahmed_Rageh101 
 الزمخشري كده بيستزرف


Ahmed Rageh @Ahmed_Rageh101 
 متجمع في الوكالة


حسبي الله @ayman_latif 
 فالحرفيين ياباشا :)




فكري @fekry_ahmed 
 ده كدا بقى القناة الأولى مش تويتر :))))


مـيرڤـت @MervaTsa3ed 
 كلنا مش روكا بس :/




Related Posts Plugin for WordPress, Blogger...
"حقوق الملكية والملوخية والمهلبية ... الخ
محفوظة للست شهرزاد وإياك حد يسرقها ويحاول يزعلها آغجر .. مفهوم ؟ "