الخميس، 2 يناير 2014

حـــكايات مصــرية 7








كمان دقايق حكايات قصيرة عن مصر البهية
 اللى المنيلة بنيلة 
وواجعة قلبنا
حكايات النهاردة متفرقة عن مدن
 وشوارع
وناس وعجب العجاب



حدوتة رقم (1)








عن مثل شعبى اتعودنا نقوله

ومنعرفش أصله ايه 
وهنعرف اهو حالااااا
والموضوع يرجع لأيام محمد على
وتحديداااا يوم مذبحة القلعة 1811
واللى تفاصيلها هتلاقوها هنا
وكلنا نفتكر ازاى الحاج محمد على ابو طوسون
 كان قاعد منجعص كدا ف قاعته ف القلعة
وبيسمع صوت المماليك 
وهما بيندبحوا كما الفرااااخ






ساعة ما رجالة محمد على قفلوا باب العزب
على المماليك وحبسوهم جوا القلعة
وبدأت المطحنة
 ويقال انه انقتل يومها ف القلعة بس قرب الـ 500 نفر .. !



المؤسف بقى ان مش بس امراء المماليك اللى انقتلوا

دا فيه ناس كمان اتاخدت ف الرجلين بالغلط
من ضمنهم صاحبنا اياه 
اللى كان شغال كاتب عند امير
واسمه "زعلوك"
والأخ كان شغال تحديدا موظف حسابات عند امير
راح يومها يحضر احتفال القلعة
وكلهم لا بيهم ولا عليهم 
وإذ فجأتن الغدر اشتغل





وانقتل زعلوك وسط المعمعة

 وانقطعت راسه ضمن الرؤوس اللى اتلمت ف شولة
واتحطت تحت رجلين الكتخدا
 قوم بعدييين ف الروقان
بيحصروا الاسماء ويشوفوا مين مات ومين لسه عايش
 وعايز حش رقبته ؟
 لقوا راس الشيخ زعلوك دا بين القتلى
 وبلغوا محمد على





اللى اول ما عرف بالقصة دى

انعم على الورثة بتوع زعلوك بأفدنة
وأراضى ف دسوق عشان يراضيهم يعنى
ويشترى خاطرهم





ولما انتشر الخبر بين العوام
 بقوا يتصعبوا ع الراجل اللى مات فطيس
ويقولوا "تروح فين يا زعلوك بين الملوك"
وبعد شوية بقت "زعلوك"
"تتقال "صعلوك" !



وبس خلاص كدا 

الدروس المستفادة

1) أخر خدمة المماليك .. دبحة


2) متنكروش ان محمد على كان حنين وعاتشفى

وعوّض الورثة برضو بلى مكنوش هيورثوه عن ابوهم
 ولو قعد يشتغل ميت سنة
 #الدبح_حلو_برضو
ودا يقودنا لـ 3


3) إلى كل زعلوك ف هذا البلد

متروحش تنقتل بدل حد او مع حد الا لما تتأكد
ان محمد على الحالى هيعوض اهلك
متعملش زى شهداء ثورتنا الغلابة يا بنى






الحكاية رقم (2)





عن شارع كان زمان جزء من الازبكية 

 اللى كانت كلها أرض فيها بركة ومستنقعات
وسكنها احد امراء المماليك
 وعمرها وخلاها جنة



وف حتة قريبة م المنطقة دى 

كان فيه قنطرة
اسمها "قنطرة الموسكى" 
ومنسوبة لأحد الامراء
اسمه عزالدين موسك 
وكانله قصر عظيم ف الحتة دى وقصاد البركة
وعمل قنطرة للناس تعدى عليها خدمة لله يعنى
 وكان راجل طيب وبيحب العلم
وملوش ف السياسة وقرفها
قوم الناس سمت المنطقة على اسمه .. الموسكى






وروح يا زمان وتعالى يا زمان
 وجه محمد على وقرر يردم بركة الأزبكية
ويوضب المنطقة بلى حواليها
فقرر يشق شارع ف الموسكى





الموسكى كان واقع

بين الغورية والسيوفية والخيامية والأزهر
وقرب الحسين والحمزاوى
وكان لازم شارع عشان يربط كل شوارع التجارة 
المهمين دول ببعض





وف كتاب شوارع لها تاريخ لعباس الطرابيلى
 بيحكى ان الاخ محمد على
 كانت علاقته بالأجانب كويسة
 والتجارة زادت ف منطقة الموسكى والازبكية جدا
واغلب سكان المنطقة دى كانوا من اليهود والأجانب
والناس الاغنيا وكانوا بيمشوا بعربياتهم الحنطور
 ف الأزقة والحوارى وشغلهم يتعطل 
فأشتكوا للباشا



فمحمد على اصدر فرمان

اشترى بيه كل الأملاك ف الحتة دى
 وكلف قلم الهندسة بتخطيط الشارع
وبدأ شقه من اول القنطرة
واتشالت المطاطب واتوسع المطرح واتوضب
واتفتح سنة 1849
وعلى مبارك ف الخطط التوفيقية بيحكى ازاى
 انهم لما جم يشقوا الشارع سألوا أهل العلم
 ف وسع الشارع يا ترى يا هل ترى عرضه يكون قد ايه ؟ 





فأفتوهم بأيه بقى ؟

قالولهم الشارع لازم يعدى منهم جملين 
محملين بالتبن بلا مشكلة او تململ
او تضييق على المحال الجانبية والمارة الماشيين 




ودا يعنى بالحساب والهندسة يعنى الشارع عرضه 8 متر
 والحاج على مبارك ايام الخديوى توفيق 
يعنى بعد سنة الف تمنماية حاجة وتمانين 
كان مستنكر جدا 
و شايف الرقم دا قليل ومش نافع .. تخيلوا ؟!!




المهم ان اللى جم بعد محمد على كملوا الشغل كويس
عباس مد ف طول الشارع
اسماعيل مده زيادة
توفيق بلطه وعمل رصيف ع الجانبين 






وبقى الموسكى شارع التجارة الاول لحد عهد مش بعيد
وحاليا هوه مشهور بأنه شارع الخردوات
 وشارع العرايس
 وأى عروسة بتشترى منه لوازمها كلها



والشارع اتقفل قصاد العربيات وممنوع تدخله
 لأنه اصلا مش مستحمل مش جمل يمشى فيه ...
 دا مش مستحمل ناموسة تعدى



والدروس المستفادة 

1) يروح الزمن وييجى
وتتفتح محلات ومولات وماركات وبتاع
بس العروسة اللى متجبش حاجة من الموسكى
متتعدش عروسة ف نظرى الصراحة 
#هه_دقة_قديمة_انا_معلشى


2) والله امراء زمان مكنوش وحشين كلهم

اهو وفيهم ناس كانت خيرة
و أصل لما ربنا يخلد اسمهم بعد مئات السنين
على شوارع واحياء 
يبقوا لازم فيهم خير !

3) اساليب القياس زمان كنت لطيفة قوى 
آل جملين محملين بالتبن ... 
#ناس_فُللى_والنيعمة





القصة رقم (3)




عن قاهرة الدنيا 
وبيقولوا لما جوهر الصقلى جه يبنى عاصمة للدولة الفاطمية 
وكانت ... القاهرة
استعان بالمنجمين
 اكمن الفاطميين كانوا بيهتموا بالحاجات دى قوى يعنى
وإبن ظهيرة ف
 "الفضائل الباهره في محاسن مصر و القاهره"
بيقول المشهد بدقة 
وازاى جوهر استشار المنجمين
عن المعاد المناسب عشان الطالع يبقى خير






فالمنجمين قالوله اعمل قوايم خشب 

وعلق حبال بين كل قايمة والتانية
وعلق فيهم أجراس
واول ما الأجراس ترن ارموا الطين والحجارة 
وابتدوا بنا ... حلو!




لا مش حلو ... عشان جوهر أمر البنائين بكدا
 والناس عملت المطلوب
 وعلقت أجراس ع الحبل
واستنوا 
وإذ فجأتن وقف غراب على احدى الحبال
 فالاجراس رنت 
راح البنايين قايمين
وراحوا راميين الطوب والطينة
وابتدوا الشغل ف الأسوار
وجه المنجمين مذعورين يستفسروا
ايه اللى هبتتوه دا يا أغبيا ؟!!




البنايين قالولهم انتوا مش قولتوا لما الجرس يرن .. نشتغل !
ادينا عملنا اللى انطلب مننا 
نعم بقى 
عاوزين ايه ؟!
وبس محدش نطق 
لأن محدش غِلط يعنى دا الغراب السبب
وابن ظهيرة بيقولك الشغل استمر
لكن دا كان نذير شؤم وبلاء
لأن المعاد كان مش مناسب البتة
والقاهرة اتبنت غلطة واهو اللى حصل بقى ... !! 







وقال بالحرف
"لهذا السبب لا تنقطع الدماء والقتال والنزاع والفتن
والفساد عن القاهرة المعزية التى سميت بهذا الاسم
 لوضع اساسها ف طالع المريخ "





والدروس المستفادة


1) خلاص يا ولاد احنا عرفنا ليه مصر موكوسة كدا

آل وانا كنت فاكرة ان معمولها عمل
 ومدفون جنب سور القاهرة
 ومش عارفين نلاقيه بس مش اكتر 
اتارى بعيد عنكم 
السور
 باللى بنى السور
بالمعاد اللى اتعمل فيه السور بالبلد كلها عمنول
كان كله غلط × غلط 
وانتوا السبب يا فاطميييين
#حسبى الله ونعم الوكيل فيك يا فخرى 







2) سؤال بس حد يجاوبنى الغراب بس لوحده 
اللى وقف ع الحبل وهزه 
وجابلنا النصيبة دى
ولاّ كان واقف معاه بومة .. ؟!!




وما دمنا جبنا سيرة الفاطميين
وما سببوه من نحس ع القاهرة
 الزاهرة العامرة المبهدلانا دى نقول اللى لينا
واللى علينا برضو ف



 القصة رقم (4)




ف زمن العزيز بالله ..

ابن المعز لدين الله العزيز كان تانى خليفة فاطمى
 وكان راجل كويس فيما يبدو من كتب التاريخ
وايامه كانت حلوة وشيك قوى



الواد كان خليفة بن خليفة وابن عز ومتربى وشبعان
وكان بيحب الناس
 وكان بيقول آل ايه يا خويا 
يارب بلدى والمجتمع والناس 




لأ بجد كان بيقول ايه ؟
 " انى أحب ان أرى النعم عند الناس ظاهرة
وأرى علهم الذهب والفضة والجوهر
ولهم الخيل واللباس والضياع العقار 
و ..
"وان يكون ذلك كله من عندى "
شاخدينلى بالكوا من آخر جملة دى .. ؟!!
 الجدع بيقولك بحب اشوف الناس كويسة ومبسوطة وبخير
واكون انا السبب ف كدا
 O.O




والحقيقة انه قال ونفذ

مضرباش تصرحات فقاعية شأن كل السياسين والروساء
ف عالمنا العربى
ومع السلامة مشفناش من وشه امه حاجة .. !! 
#لأ_فشر


العزيز ف زمنه الرحالة اللى جم زارو مصر
ووصفوها ف كتبهم قالوا عنها أعاجيب
وازاى القاهرة كانت واسعة ونضيفة
وفيها كل حاجة م الأبرة للصاروخ
وفواكه الشتا والصيف سوا ف موسم واحد
 وكل انواع الاقمشة والتحف والخير كله
وبيقولك البيوت كانت طوابق فوق بعضها
 احيانا توصل لـ 14 دور
 #وش_مزبهل



والبيوت كانت نضيفة وفاتحة لدرجة

انك متتصورش انها معمولة من طوب عادى
والمسافات بين البيوت واسعة وفيه جناين حوالين البيوت .. ! 
#عاااااااا



والعزيز بنى بيوت للناس وبقى يأجرلهم الوحدات دى
بمبلغ زهيد ف الشهر يحصله القصر
كام عددهم يا طمطومة البيوت دى .. مية خمسماية ؟؟
 لأ
دول 8000 بيت حضرتك !



يعنى مصر عرفت المساكن الشعبية
من أكتر من ألف سنة اهو
 وناصر خسرو بيقول انه جرت العادة ان بيوت القاهرة
تبقى من 6 او سبع ادوار
 وقال ايه كمان ؟؟
بيقولك الناس كانوا متعودين
 يحطوا أصص الورد فوق الاسطح
ويعملوا جناين فوق البيوت
 O.O




ومش بس كدا استنوا استنووووا
دا حكى عن راجل كبرت ف دماغه
وجاب عجل صغير ورباه فوق سطح البيت
ولما كبر بناله ساقية
 وخلاه يدورها 
ليييه ؟؟






قالك عشان يجيب مية من بير محفور

 ف حديقة المنزل تحت
ويرفع بالساقية دى المية عشان يسقى الزرع
 اللى قرر يزرعه فوق السطوح !!
 زرع ايه ؟
بيقولوا زرع فوق السطح شجر النارنج 
والموز
 والورد والريحان والزهور
وعادى خالص
وحدث بالفعل
وحد يناولنى المسدس يا ولاد
مش هعمل حاجة متخافوش
انا هفرغه بكل رصاصته ف نافوخى بس







الدروس المستفادة

 1) المصرى معروف بجبروته #نقطة




2) المصريين عرفوا زراعة الأسطح من الف سنة

 ويعنى البلد دى محتاجة شوية احترام
 مش كل تاريخنا خضوع وقهر وقرف
 احنا كنا حلوين برضو



3) احنا عاوزين حد زى العزيز بالله يحكمنا
 الراجل بيقولك عاوز اشوف الناس مبسوطة
ومن فلوسى
أصيل يا عزو
وشوفوا اسمه حتى موحى 
#العزيز 
اسم على مسمى والله




القصة رقم(5)




خلصنا م الفاطميين

 المقرشين
 ولاد الاصول
نخش بقى على ولاد الهرمة اللى شفطونا
والحدوتة من زمن السلطان قايتباى واحد مماليكه





والموقف بأختصار بيحكى عن ابن بلد

وحب بنت أصول واهلها أغنيا
والحب كلبش ف قلبه وقلبها
وعارف اهلها هيرفضوا
 فماذا عساه الولهان العاشق يفعل؟ 






قالك بسيطة انا اركب دقن
 واعمل نفسى تركى
وابقى من مماليك السلطان قايتباى
 واهو راجل بيصرف كتير ويبنى ويعمر
وأكيد بيفشخر على مماليكه 
وعنده خير كتير اغرف منه انا ... واتجوز 




بس وراح الشام ووقّع نفسه بنفسه ف الاسر
واستعبط وعمل نفسه مش مصرى
دخلت ع التاجر بتاع الرقيق
اخده مصر
وباعه للقصر السلطانى





قايتباى اشتراه مع غيره 
واتصرف عليه كويس زى غيره
والولا يا دوب قضى مدة التدريب
واخد اللى فيه القسمة من فلوس واقطاعيات
وهوب بيبصوا ملقهوش!!
راح فين الموكوس ؟؟
اتاريه نزل م الطباق ف القلعة
جررررى على اهل حبيبته
وقدم نفسه كمملوك من رجال السلطان
 طبعا الناس رحبت بيه وجوزوه بنتهم فوراااا



المسئول عنه قعد يدور ف سلقط ف ملقط

 لحد ما عرف طريقه وراح جايبه من حضن العروسة
 وخده ع الأوبرج
عشان يخليه يقضى الميساء والسهرة 
ويتروق 
:)



وخلوا بالكم ..

انه  لحد ما اتقبض عليه
 كانوا فاكرينه مملوك هارب من اداء الخدمة
او حرامى وسرق الحاجة من مولاه ومش عاوز يشتغل
لكن لما ابتدوا يعذبوه ..
الولا استغاث وقال يا سيدة نفيسة الحقينى !!
فشكوا ف امره
اكمن التراكوة 
ف العادة كان ليهم نداءات واستغاثات تانية خاااالص
وقت التعذيب والضرب
#آه_للتعذيبى_أصول_برضك







ورفعوا امره للسلطان قايتباى اللى هرش المقلب علطول
 وعرف انه مصرى زقاقى من حوارى القاهرة
وانه لبسهم الاونطة .. !!
وحد هيقولى السلطان لازم طيّر رقبته علطول
 اقولكم عيب اخص عليكم أزعل كدا منكم
 دا قايتباى الحونين كاظم الساهر زمانه 
دا الجدع بتاع الذل كله



السلطان بعد وصلة تعذيب محترمة للواد ..

راح مجرده من كل حاجة
وأمر الحراس ياخدوه يبعتوه حلب
 للتاجر اللى جابه
 وقالهم مولانا بيبلغكم امر
 وهو
بيعوا الشاب دا تانى لأى حد ف مكان بعيد
عشان ميرجعش مصر تانى أبدااااا
وطبعا هيبع عبد مش مملوك يعنى هيشوف مرمطة السنين


وبس 

الدروس المستفادة

1) الحمدلله متولدناش ف زمن المماليك 

#دعوة_كل_حكاية



2) الواد دا غبى قوى يعنى يوم ما يعمل ناصح

ملقاش الا قايتباى اللى يتنصح عليه .. ؟؟!!
 بس معلش
 مسكين كان بيحب وعاشق ومتيم
و #الحب_بهدلة



واذا كان قايتباى كان مشهور بالقسوة والشدة

فهنروح للى جه من بعده ..
 ف الحكاية رقم كام دى يا عيال .. ؟





القصة رقم (6)






 خليفة قايتباى ف الملاعب السلطانية

 الحاج السلطان قنصوه الغورى
والجدع دا لما تقروا سيرته على مدار حكمه
 هتلاقوه يستحق لقب السلطان النتن عن جدارة واستحقاق
 الحاج مكنش بيسيب أى مصدر يتجاب منه فلوس
 ويسيبه !!



ودايما كان بيفرض غرامات
 ويحصل من الامرا والكبرات
وأى حد معدى ف السكة فلوس
وتسمع غرامات مكونة من 5 أرقام دايما
وقليلا ما يكون أقل من كدا !
يعنى فلان اتصادر منه 60 ألف وفلان 20 الف .. الخ
واحيانا تقرى كلمة تحّصل على "موجوده"
 يعنى أى حاجة تخص المأسوف عليه صاحب المصادرة
الفلوس والتحف والجوارى وحتى ساعات الزوجة
كله بيخش بيت الديب 
وميخرجشى






وبقى كل ما قنصوه يتزنق .. يصادر 
لدرجة انه بلغ من الوضاعة
ف مرة لما فرض غرامة على واحدة ست .. 
تبقى مين بقى ؟؟
الست "هيفة اللذيذة"
واحياة ابويا اسمها كدا مجبتش حاجة من عندى
 الست هيفة ومهنتها رئيسة المغانى
 اتفرض عليها غرامة وقدرها 1500 دينار .. !



والست كانت واقفة ف أمان الله بترقص وأشياء اخرى
 راحوا قافشينها وقالولها عليكى فلوس لمولانا السلطان
 الست اتخرعت
- انا عملت ايه ؟
ردوا يقال انك بتكسبى ومعاكى فلوس كتير
ومولانا بيقولك عليكى فِردة
وفين حق الوطشن يا فاجرة ... 
#انا_بتخيل_الحيوار



ولأ والنبى مظلومة ودول حسادى والمنكادين منى
وانا غلبانة
والمهم شمال يمين قدروا الغرامة ب1500 دينار
 وشفختن بيك يا رمضان 
قسطوها عليها !!
فالست هتعمل ايه ... رضخت للامر الواقع
ودفعت الفلوس اقساط اقساط ف بنك ناصر السلطانى
وطبعا كل قسط كانت بتدعى ع المخسوف
قنصوه الهى ما يكسب ولا يربح 
ويا رب يصرفهم ف المرض !



والحقيقة ان ربنا استجاب لدعاها هيا 

وكل المظاليم ف زمنه
اللى قشقشهم وفقرهم
والجدع مات ف معركته مع العثمانلية
وملقوش حتى جثته عشان يدفنوه
ولا بقاله قبر يلم جثته حد يقراله عنده الفاتحة
 ولا خد معاه حاجة
 واختفى م الوجود ف لحظة ... ! 
#الطمع_والدناوة_وحشين



والدروس المستفادة


1) قنصوه رغم الوضاعة كان عنده نظر برضو
 يعنى اخد م الامرا ارقام وقدرها
بينما الاخت هيفة غرمها ف مبلغ صغنن 
ودا ليه ؟
عشان الست بتبسط الشعب وتريحه 
والأصول نوّجب معاها 
و #آحنين_ع_الغلابة_آآقنص



2) ايه ياختشى السلاطين العرر دول ... ؟!!

 دا مسبش حتى الرقاصات ف حالهم
ومفيش طبقة ولا حد ومسلكش منه مصلحة 
ومش بالمناصب اصلها عموما
بس ف كل الاحوال 
#أخص


وآخر حدوتة بقى من الزمن الحديث



القصة رقم (7)







ومن المذكرات الشخصية لأحد الكتاب المشهورين 

واقصد بيه 
الأديب ... عبد الحميد جودة السحار






اللى بيحكى عن فترة طفولته ايام ما جده اتوفى
 وراحوا قعدوا ف مع جدتهم
وكانت ساكنة ف الضاهر قرب جامع الظاهر بيبرس
وبيحكى ازاى عن بيت وراهم لازق ف ضهر بيت الجدة
وجم ناس سكنوه كان شكلهم مش اللى هيوه
وطلعوا ناس لامؤاخذة ..
 يعنى بيشتغلوا ف اللامؤاخذة



كانوا مختارين البيت بالقصد دور اول

وشبابيكه بتطل على جنينة
وكل ليلة كان صوت الضحك والمسخرة بتوصل للجيران
من الأشراف فيبرطموا م الغضب !!
وكانت الاسرة اللامؤاخذة عندهم ولدين اشقيا ومجرمين
وكانوا بيلموا العيال على ناصية حارة بعيدة عن حيهم
ويشتروا خمرة ويعلموا العيال تشرب زيهم



وعبدالحميد بيقول انهم كانوا بيندهوا بنات اليهود

 اللى كانوا اهاليهم بينزلوهم الشارع عادى يلعبوا
(عكس البنات التانية عائلات محافظة وكدا)
وكانوا بيندهوا للولاد 
ويعلموهم لعبة عريس وعروسة
وكأنهم بيدربوهم عشان يجيبوهم لما يكبروا 
ويبقوا زبادين لبيت العائلة الكريمة اياها ... !!



المهم
عبدالحميد كان بيقرف منهم ومن عمايلهم
لكن الفضول بتاع الاطفال كان بيشده
والكل ف الشارع كل متضرر
 بس مبيعملوش حاجة لحد ما ف يوم ما كدا ...
عبحميد لاحظ وجود مخبرين ف الشارع
وعرفهم عشان كانوا بيلبسوا جلاليب فوق لبسهم العادى
 والجزمة الميرى كانت واضحة 
كان شكلهم مفضوح قوى 
النموذج التقليدى ف افلام زمان بالمللى 
:))



قوم ف ليلة بعد ظهور المخبرين بشوية

الناس صحيت على صوت رزع وصريخ
وناس بتنط م الشبابيك ع الجنينة
 وتهرب
وجملة "امسك .. امسك " بتتكرر 
والصوت عالى 




عبدالحميد بيقول ان جدته قامت مذعورة
وقعدت تقفل ف كل الشبابيك والبيبان
عشان الأصوات والألفاظ الخارجة متوصلش لأسماعهم
وبعدين كانت بتدعى بقى
وتقول "ربنا يستر على ولايانا .. ربنا يستر ع الولايا"
 وراحت معيطة !! 
كانت ست حنينة واضح 
:))
وبس الليلة خلصت
 وتانى يوم عبدالحميد واخوه واصدقائه
كانوا عاملين جولة تفقدية للبيت اللى وراهم
 بعد ما خلى من سكانه 
وبيحكى انهم شافوا حاجات
مكنوش فاهمين هيا ايه وبتستخدم ف ايه
 وكفاية مش هكمل واختشوا عشان فيه بنات قاعدة
 :) 


والدروس المستفادة 

تتلخص ف الآتى ...


1) بيوت الدعارة بعد الغائها كمهنة

 كان اسمها "البيت السرى"
ودى التسمية اللى عبدالحميد سمعها بتتكرر
وهما بيقفشوا البيت وسكانه
 #معلومة_لا_تهمك



2) غالبا اهل البيت دا كانوا غُشم
عشان راحوا سكنوا ف مكان محترم
وطبيعى يبقوا مثار ضيق للسكان حواليهم
اكيد حد بلغ عنهم 
او يمكن مكنوش بيدوا للمخبرين الشاى بتاعهم



3) لو كانوا ف أيامنا الحالية 
هما كانوا يشخشخوا جيبهم بس
 ولو عاوزين يعملوا بيتهم جنب وزارة الداخلية
ولا حد هيهوب ناحيتهم
ومش بعيد ابداااا
لو حصلت عليهم كبسة ام رز ولحمة بموت فيها ...
يلاقوا اللى يقولهّم




واخيرا عبدالحميد جودة السحار عندى
يعنى روايات 
وأفلام ...  ام العروسة ..  
والحفيد
اللى كل مرة اشوفه اعيط زى الهبلة
لما مدبولى يدى البيبى لنور الشريف
ويقوله 


حلقاته برجالاته .... يوم ورا يوم يبقى شنبات

 يتجوز على قد حالاته ... ويخلف صبيان وبنات
 #مدبولى_بيغنى
و#ميرفت امين بتعيط 
#وانا بعيط
 اسمعوها معايا بقى ... هنا 




والناس اللى بتسأل عن الاشياء الاخرى 
 خليكوا ف حالكم قولنا فيه بنات قاعدة !
هاتوا الكتاب واقروه يا جماعة
هيعجبكم بتفاصيله الجميلة وحكاياته
اسمه "هذه حياتى" عبدالحميد جودة السحار نهضة مصر




وبس خلاص خلصنا
تصبحوا على ألف خير
 :)




--------------------------------------------


Yasmine @Yasminemz
 مفيش امير من الأمراء دول يتبني اي حتة في القاهرة
 و يعملها جنة :D



Ahmed Rageh @Ahmed_Rageh101 
 عشان كده القاهرة حالها مايل



tarek momen @tarekmomen 

 واسعة دي شوية



فكري @fekry_ahmed 

 اوعي يكون في حمام سباحة كمان!!!!



tarek momen @tarekmomen 
 خشخاش طبعا


tarek momen @tarekmomen 
ظلمتهم..استغفر الله العظيم



Ahmed Rageh @Ahmed_Rageh101 
 بزبس مان



مـيرڤـت @frikeko 
دي نصاحة :D




Yasmine @Yasminemz 
الة زمن و نرجع البني ادم ده : D




Mohammad Diab @som3amasrawy 
 أشياء اخرى اللى هى إيه عدم اللا مؤاخذة ؟




tarek momen @tarekmomen 
عقبال اللي في بالي



Ahmed Rageh @Ahmed_Rageh101 

 هيفة دي طلعت وظيفة مش اسم



Ahmed Rageh @Ahmed_Rageh101 
 يستاهل اللي يجي على هيفة مايكسبش




Ahmed Rageh @Ahmed_Rageh101 
 طب اوصفي الحاجات دي
 واحنا هنعرف لواحدنا



Ahmed Rageh @Ahmed_Rageh101 

 ديفاين لامؤاخذة





Related Posts Plugin for WordPress, Blogger...
"حقوق الملكية والملوخية والمهلبية ... الخ
محفوظة للست شهرزاد وإياك حد يسرقها ويحاول يزعلها آغجر .. مفهوم ؟ "