الثلاثاء، 25 مارس، 2014

حكايات مصرية ... 8






نبتدى .. 
الحكايات النهاردة عن ناس
شخوص واماكن وكلمات ... 


حكاية رقم (1)




لما واحدة تبقى مزعجة وكئيبة ونكدية ومحدش طايقها
ويشوفوها جاية من بعيييد فيقولوا لبعض أم قويق جاية اهى
فهل تعلمممم أن
إن (قويق) دى معناها صغير البومة ..
وأصلها فرعونى اتنقل للغة القبطية
وبقينا نستعمله من ساعتها
واحنا منعرفش ليه ؟






وبالتالى فالمنطق يحتم علينا ان نوضح بما ان (قويق )
يبقى صغير البومة ..
يبقى بالتبعية أم قويق هى مدام بومة شخصيا 




وكلمة كلنا بننده بيها العيال الشقية المجرمة
 ونقولهم يلا يا خلبووووص
 فهل تعلم عزيزى المواطن أن الخلبوص دا
ف زمن المماليك كان مهنة 
وليس وصف؟


و(الخلبوص) ف زمن المماليك
كان الأخ اللى بيشتغل ورا الست الرقاصة
عشان يلملها النقوط
بإختصار الخلبوص هوه .. صبى العالمة





وممكن لما حضرتك تستحضر ف ذهنك
مثلا شخصية محمود الجندى ف فيلم شفيقة ومتولى
او شخصية فاروق فلوكس ف الراقصة والطبال وغيرهم
فبالتالى وجب عليك
ولازم تفكر ألف مرة تانى قبل ما تقول الكلمة دى 
لأى لحد من عيالك!




والدروس المستفادة من القصة 
 اولا: متقولش كلمة خلبوص دى تاااانى أبداااااا 




ثانيا : انا دلوقتى عرفت البومة ليه مكشرة كدا ..
شوف بقالنا كام سنة يا مؤمن واحنا بنستخدمها كشتيمة ..
عشان نتريقأ
 الست معذروة تبصلنا بقرف الصراحة 


الحكاية رقم (2)




من زمن المماليك عن السلطان برسباى المهروش
 كنا حكينا عنه قبل كدا
الراجل اللى احتكر صناعة السكر 
عشان يمرر عيشة البشرية دا !
بيقولك يا سيدى ف أواخر ايام حكمه النيل منسوبه قّل
وحصل قحط و مجاعة وطاعون بالمرة
والناس بقت تموت جوعا ومرضا
فالسلطان برسباى مبقاش عارف يفرض ضرايب
عليهم ويذل ابدانهم 
 #يا ضينايا
#احنا_بنضايق_الزعماء_ونعكنن_عليهم



والقصد حصل هرج وانفيلات أمنى
والجند مبقوش عاوزين يشتغلوا
عشان مبيقبضوش رواتبهم 
فالراجل اتعذر وملقاش  جزر
ومكنش فيه على ايامه
دولتى السعودية والامارات الشقيقتين عشام تسلفه 
وتفك زنقته 
قوم يعمل ايه؟



كان فيه اشاعات ان الحاكم بأمر الله الفاطمى
 اللى مات من زمااان
كان مخبى كنز ف الجامع بتاعه اللى مليان عواميد





فالمهم انها كانت اشاعة
بس برسباى كان مزنوق قوى لدرجة انه قال لحاشيته
نزلونى جولة لحد هناك اشوف ايه الحكاية
وفعلا نزل سعادته ووصل الجامع وطاف فيه
كانت حالته زى ما شوفتوا ف الرسمة بائسة
بس السؤال المحير اللى تصدر المشهد كان
هوه الحاكم بأمر الله دفن الكنز تحت أنهى عامود ؟؟ #نهون_نهين؟



برسباى وقف ف وسط الجامع وهوه متلخفن
وبعدين قال :
احنا نحفر تحت كل عامود بقى
فرد عليه الحاضرين بأنه كدا الجامع هيقع تماما 
ويتهد يا مولانا !!
وطالما هديت الجامع يبقى لازم تعيد بناه
والا يقولوا عليك بتهدم بيوت الله
 ! برسباى هرش ف دماغه
وحسبها لقاها خسرانة
قال الخبيئة دى او الكنز يعنى
عقبال ما أصرف منه على بنى الجامع
مش هيفضلى منه حاجة
لأ 
خلاص 
بلاش 
مليش فيه
 وراح ماشى





وتعليقى بقى ع القصة رقم 2 هو
اولا برسباى مجنون اكيد
طالما سلطان وقعد على كرسى مصر .. يبقى خد الختم
 :) 
ثانيا بقى احنا نجيب صعايدة
ونروح الصبح اول ناس ندغدغ العواميد دى عامود عامود
لحد ما نلاقى الكنز
ونصلح حال البلد عشان تبقى آآآآآآآد الدنيا



الحكاية رقم (3)




عن واحد مجنون برضو من نفس العينة الهباب دى
وكان هيعمل عملته دى برضو
وعن الكابتشن ابراهيم باشا أتحدث
انتوا عارفينه كان مهروش مهروش يعنى
وبيؤمن بالخرفات والنبؤات
وكان بييجى اجانب كتير يزوروا الاهرامات
وطلعت اشاعة ان الهرم الاكبر فيه ممرات سرية
وبالصدفة كان فيه ساحر افريقى ف زيارة
وأقنع ابراهيم باشا ان الهرم فيه بير
جواه مية 
بتطول العمر
وترجع العجوزة صبية





ابراهيم باشا وقتها كان نايب محمد على
وهيموت عشان يحكم وابوه قاعد ومتبت ف الكرسى
 مش عاوز يقووم ولا يموت 
قوم ايييه قالك اطّول ف عمرى انا وكدامفيش حل تانى !



وبس اختمرت الفكرة ف ذهنه اللوذعى
وقرر يملى الهرم من جوا بالبارود
ويفجره عشان يوصل للبير اياه
o.O 
وكااااد أن يفعلها لولا أن حد ابن حلال اتدخل
مين ابن الحلال دا  ؟
الاخ قنصل البندقية .. فينيسا الجميلة حبيبتى



الجدع كان صديق مقرب لأبراهيم باشا
فخده بالراحة كدا على جنب وقعد يقنعه
وقاله لو فجّرت الهرم مش بعيد
 تتسبب بدمار للقاهرة والجيزة
ويحصل مشاكل احنا ف غنى عنها
وطولة العمر ليك يا هيمة 
وبكرة بابا يموت وتورثه واستهدى بالله كدا
 :)



وطبعا ابراهيم افتكر بابا فتراجع خوفا
من انه يتفتح عليه باب مينقفلش
لو فعلا حصل للعاصمة حاجة لما يتفجر الهرم .. ! #موشكرين_يا_حاج_دا_العشم



تحبى تعلقى بإيه يا فاتيما على القصة رقم 3 دى
ولا حاجة احب بس أقول ان ابراهيم 
جرى جرى الوحوش
وف النهاية مات قبل أبوه 
وعمل قرد وراح تركيا 
وخد تفويض بالحكم من الباب العالى
لكن برضو رجع ومات قبل ما يقعد ع الكرسى
وبرضو محكمشى ف الآخر ..
عشان النصيب والقدر
بس النصيب والقدر خلى ابنه من بعده
وكل سلساله يحكم مصر لحد ما قامت ثورة يوليو 1952
يعنى مخدتهاش يا ابراهيم عيالك واحفادك اخدوها اتهد بقى





آه وأحب كمان أقول كلمة واحدة للحاج محمد على ...
انا زعلانة منك جدا يا دودو 
بقى دى أشكال تخلفوها ؟؟
آه  كمان واحب اقوله  .. #إبنك_مجنون_يا_حاج



الحكاية رقم (4)




ودى اجابة عن سؤال حد م الناس الحلوة هنا
طلب يعرف اجابته
عن شخصية على الزيبق
وايه حكايته بالضبط 
دا بجد ولا مجرد خيال شعبى؟





وبشوية دعبسة وتدوير على قدى
اكتشفت ان الشخصية دى حقيقية .. 
بس برضو مش حقيقية
 ازاى ؟
يعنى الزيبق حقيقى بس مكنش بطل ولا مصرى 



وحكايته الواقعية بتبدأ من العراق
حيث الخلافة العباسية
والخليفة اللى اسمه .. القائم بأمر الله
وطبعا كان وارثها عن اهله ابا عن جد 
ومش تعبان فيها 





وساعتها كان العباسيين بدأت دولتهم ف التفكك والانهيار
والدولة مترهلة 
 فجأة كدا قامت عركة بين الشيعة والسنة
ف حتة اسمها الكرخ 
والعملية سخنت قوى وحصل هوجة
وصلت لحد بغداد ومقر الخليفة 



الشيعة والسنة اتخانقوا على حاجة فارغة
واتطورت الخناقة وبقى فيها دم
هوبا بقت فتنة والشيعة يظهر كان كعبهم الاعلى وقتها
فعملوا قلق جامد
 #ايران_طول_عمرها_رخمة



والعملية وسعت وبقى فيه اصرار على ان المذهب الشيعى
 يبقى المسيطر والإدان يبقى فيه اسم سيدنا على
والجوامع بقت مكان للصراعات
 المهم ف وسط دا كله
ظهر صاحبنا (على الزيبق)
وكان معاه واحد كمان اسمه (الطقطقى)
مالهم دولا يا طمطومة اكيد بقى جايين يسعوا ف المصالحة
وكدهون .. صح ؟ 



أقولكم لأ هىء كان على عينى ..
دول حضرتكم كانوا من طبقى العيار والشطار
اللى هما بالبلدى كدا الحرامية وقطاعين الطرق
والعصبجية بتوع زمان !
الاتنين البهوات استغلوا الفوضى
وان البلد مفيهاش إستيكرار والانفيلات على ودنه
وراحوا طالعين برجالتهم 
وقرروا يخرجوا على الخليفة العباسى




وفعلا رجالة الزيبق والطقطقى بقوا يعملوا ملاعيبهم
ويحاربوا ف الشرطة وقتها اللى هيا القوة النظامية للدولة
وقعدوا يعاكسوا ف بعض شوية 
إلى حين ما استعاد القائم بأمر الله توازنه
واستعان بجند من الاتراك وبعض من مؤيديه
 ونزلوا طربقوا الدنيا وجابوا الزيبق وصاحبه من حواجبهم 
وانتهت القصة


يعنى بالمختصر المفيد الزيبق مش بتاعنا
دا تبع الاخوة ف العراق الشقيق
بس احنا عجبتنا حكاياته وملاعيبه
اكمنه وقف ضد السلطة اللى بتدبحنا
فقررنا نعمله بطل شعبى عندنا
واتعملتله سيرة زى السير الشعبية التانية
السيرة الهلالية والظاهر بيبرس وغيرها




واللطيف بقى ان فيه كمان شخصية تانية 
ف الحدوتة المصرية
هيا كمان حقيقية ومش حقيقة
 شخصية دليلة اللى عملتها جميلة الجميلات
ليلى فوزى دى حضراتكم كانت موجودة ف بغداد فعلا 
وكان اسمها (دالة المحتالة)
وكانت من طبقة النصابين
والمسعودى حكى عنها
وشوف سبحان الله الوعى المصرى
عملها ف السيرة الشعبية .. واجهة الدولة 
:)


وتحبى تقولى حاجة يا فطمطم
عن القصة رقم 4 دى
 آه أحب أقول المصريين دول ولاد جنية .. حقا
خصوصا لما بيمزجوا الواقع بالخيال والفن 
 #بس



الحكاية رقم (5)




دى درس ف الاخلاااااق
من عند الجماعة الخواجااااات 
وكيف ان النفاق آية من الآيات
يبنى المدن ويعمل تمثالات .. آت .. آت
الحدوتة عن اسم النبى حارسه .. الأوزأز ديليسبس




ماله ديليسبس بقى هتغلطى ف الراجل ليه
 اقولكم وانا أستجرررى دا بيسو
دا مدرسة 
دا الفن واللعب والهندسة #لامؤاخذة_يازملكاوية





الجدع زى منتو عارفين كان صاحب مشروع
حفر قناة السويس
ونجح انه يقنع الوالى سعيد بيه
وفعلا بلفه وكروته 





وبالفعل بدأ الشغل على خفيف
وقرر ديليسبس يبنى مدينة عن مدخل القناة
وسماها (بورسعيد) محلسة للوالى عشان المشروع يمشى !







شوية وسعيد اتكل ع الله وجه مكانه اسماعيل
 اللى تحمس جدا للفكرة
وبعدين ديليسبس عزمه 1863 على حفلة
 برضو من باب المحلسة وكانت ف مدينة التمساح







المدينة دى كانت عبارة عن أكشاك وعشش
وبلد فقيرة جداا زى باقى مصر وقتها
بس سموها كدا عشان كانت بتطل على بحيرة التمساح 





قوم ديلسيبس ف الحفلة قال كلمة قصاد الحاضرين
وملخصها ان الوالى سعيد له فضل
فعملنا مدينة بإسمه
لكن اسماعيل كمان أولى 
ولهذا قررت الشركة ان تطلق اسمه على مدينة التمساح
لتصبح مدينة 
الاسماعيلية
وسمعنى تصفيق حااااااااد 
وسماعين وشه ف الارض م الخجل وكدا






نفس المحلسة دى حصلت بعد اسماعيل ما مشى
واتسلم ابنه توفيق الحكم وقتها
برضو الشركة بتاعت القناة كملت فاصل النفاق
وعملت حركة مشابهة
وقرروا يسموا المدينة السكنية
اللى انشئت للعاملين بالشركة وقتها .. 
بورتوفيق
يختشى حلوين شاطرين




وشوية ومات توفيق 
وجه ابنه
وبعدين اتخلع من عرشه
وجه حسين كامل
ثم مسك أحمد فؤاد
قوم بتوع الشركة قرروا يسموا الشط التانى من بورسعيد
 بورفؤاد




حد يقولى لأ .. بتهرجى ..
اكيد مش قصدهم دى صدفة بحتتتتتتة !
آه فعلا دول ناس طيبين قوى ولا ف دماغهم خااالص 
انا اللى ضميرى وحش 



القصد 
تعليقى على الحكاية دى
 غالبا مش هيكون غير ..
المحلسة كنز لا يفنى والاجانب هرشونا
وعرفوا ان الحاكم اللى بيقعد على كرسى عرش هذا البلد
 روحه وحياته ف النفاااااااق
فداسوا بنزين عشان المصلحة تمشى 
واهو المحلسة تقضّى المصلحة 
قال يافرعون مين فرعنك ؟



وعلى هامش القصة 




دى ... بورسعيد




دى .. اسماعيلية 
ومكاتب شركة القناة
 #ثوانى_ابكى 





تمثال الحاج بيسو ..
ديليسبس المعلم الأسطى الكبير على مدخل القناة
ومرة ان شاء الله نبقى نحكى حكايته 
وحكاية تمثاله 




آه كى لا أنسى 
القصة دى مقتبسة من الكتاب اعلاه 
 .. ممتع جدا 
اشتروه ومش هتندموا بعد قرايته 
من اصدارات الهيئة العامة لقصور الثقافة 
بخمسة جنيه ولا حاجة 





 الحكاية رقم(6)





ودى بقى من مذكرات المخرج محمد كريم
 الجدع كان راجع من اروبا وعايش الدور قوى
وقرر يعمل فيلم عن قصة (زينب) بتاع هيكل




كانت اول رواية مصرية
والمؤلف كتبها عن قصة حقيقية
قوم طلعت ف دماغ كريم يروح البلد الأصلى
 ويسمع التفاصيل بنفسه ويصور الفيلم كله هناك ..!




اللى الناس متعرفوش بقى
ان الفيلم اللى بنشوفه ف الفضائيات دا نسخة تانية
النسخة الاولى كانت بأبطال مختلفين تماما 
المهم ان كريم كان بيدور على بطلة مناسبة
فشاف صورة لبنت غلى غلاف مجلة بعتلها
وعرض عليها الدور وافقت
وهى : بهيجة حافظ 
والست بهيجة دى حكاية لوحدها كانت مؤلفة موسيقى
ومثقفة وعندها روح مغامرة ...
كانت ست شغلانة المهم اتعاقد معاها كريم تمثل
وتعمل موسيقى الفيلم
وابتدى التصوير
كريم كان موته وسمه التخن
مكنش بيحب الممثلة التخينة عشان التصوير وكدا
فكان فارض عليها ريجيم قاسى
وهيا مشيت عليه لحد ما ابتدى التصوير




وكان اللى بيمثل دور جوزها
واللى خطفها من ابراهيم حبيبها البطل الأول ..
زكى رستم كان عامل دور جوز زينب
وكان فيه مشهد هيا عيانة وهوه بيشيلها
المشهد يوم تصويره جه والممثلين جاهزين
واكشن يا بنى والأستاذ زكى رستم راح
عشان يشيل الست بهيجة اللى اترمت ع الأرض
عاملة مغمن عليها 
قوم ايه ؟




جه يشيل الجتة .. شالها بصعوبة
 ورفعها بمأساة والمشهد معجبش محمد كريم
وقاله نعيد عادوه برضو الموضوع اتكرر
وزكى رستم بقى يتصبب عرقا من التعب



فجأة كريم اتنرفز وقال استوب
 وراح واخد رستم على جنب وقاله مالك
فيه ايه ما تشيل الست انتا مش عارف تمثل كويس
 زكى رستم اتغاظ منه قوى قوى




وقاله اه انا مش عارف اشيلها .. ورينى انتا شطارتك ؟
وفعلا اتعاد المشهد
وكريم وقف مكان زكى رستم
بهيجة سخسخت ع الأرض 
جه كريم يشيل
 معرفشى
 :)
وزكى رستم قعد يضحككك
اتارى الست بهيجة كانت بتاكل محشى وبط وفطير
من كتر القعدة ف الفلاحين
ووزنها زاد لدرجة الفضايح دى !







وطبعا كريم رمى معاد تصوير المشهد لقدام
لحين ما تخس البطلة
وتعليقك يا فاتيما ع المسخرة دى ؟
هع هع
 زكى رستم كان بطال كمال أجسام زى الصورة
وانا بقرى القصة دى افتكرت سونيا ف تخاريف
 وهيا بتقول لمرسى جوزها 
مش قادر تشيلنى طب طلقنى
 :))




وهلى هامش القصة
 .. دا زكى رستم ف شبابه يا عيال
وثوانى ترانى اروح اجيب رشاش وافرغه ف نفسى #يخربيت_ام_الرجالة_الحلوة_وكلهم_هيبة



القصة رقم (7)




وسبتها للآخر عشان اختم بيها
 وهى إهداء لكل الغجر اللى شغالين ليل نهار كآبة
وشتيمة ف البلد دى وهما ميعرفوش قيمتها 
ولا يستهلوها



 آخر حكاية عن الحاج داريوس ملك بلاد فارس
اللى قرر يعمل خدمة بريد ف بلاده
ونظرا لأنه الركوبة اللى كانت بتستعمل ايامها
ف تنقل حاملى الرسايل اللى هما البوسطجية يعنى
كانوا بيركبوا الحمير فداريوس اصدر قرار بتخصيصهم
قرر يخصص عدد من الحمير
ولا تستعمل الا ف توصيل الرسايل
وميزهم بانه امر بقطع ديلهم عشان اللى يشوفهم م السلطة
يعرفهم فورا ويمنع استعمالهم ف أى اعمال آخرى 
غير الدليفرى
:)




ومن هنا جاءت لفظة (بريد)
اللى يقال انها كلمة فارسية الأصل معناها :
مقطوع الذنب كناية عن الحمار المميز اللى بيوصل الرسايل 







اول دولة ف العالم استخدمت الطوابع هيا انجلترا
وكلنا نعرف المعلومة دى
اول طابع كان عليه الملكة بتاعتهم الأخت فيكتوريا 
وتانى دولة ف العالم كانت ألمانيا ..
اما اللى كتير ميعرفوهوش بقى
ان تالت دولة ف العالم عملت طابع بريد .. كانت مصر
ف زمن الخديوى اسماعيل







ودا حصل ف 1863
لما اشترى امتياز شركة البوستة الأوروبية
وعمل البوستة المصرية
وعين موتسى بك الايطالى اول مدير لمصلحة البريد 
وطبعا زى أى حاجة اتعملت وقتها ..
الأجانب مسكوها ف البداية عشان يشغلوها
لحد شوية بشوية ما بقت مصرية خالصة
اتمصرت بالبلدى يعنى




دا اول طابع بريد مصرى .. عربى .. اسلامى
ولأن مصر كانت تبع الدولة العثمانية
فأنكتب عليه بالتركى






وانعمل منه فئات مختلفة




وبعدين ابتدت تظهر اشكال
ويأرخوا بيها آثار البلد ويمصرو الطابع اكتر
والكلام دا شوف من امتى




 ولو عندى تعليق ع القصة دى
فهيكون كتير .. ومؤسف .. ومدعاة للفخر كمان 
المؤسف ان محدش بيقدر
احنا كنا الاوائل ف حاجات كتير قوى
وفكرونى اعمل ليلة عن الحكاية دى
حتى لو كان ماضى وانتهى
لكن دى حاجات مبتروحش مهما حصل 
التاريخ مبيموتش



المدعاة للفخر كمان ان اسماعيل بعد ما خد الخديوية
واستقل عن الباب العالى نوعا ما
كان ممكن يعمل طابع يحط عليه صورته
وابنه كمان لما مسك
 او حفيده او اللى جه بعده
 لكنننن




الأسرة العلوية قعدت متفكرش تحط صور افرادها ع الطوابع
 لحد ما جه المخسوف احمد فؤاد شوف امتى بقى 
بعد 1917 ويمكن بعدها بشوية 
وقرر يحط صورته على طابع 
لكن قبل منه لأ
الانا عند فؤاد كانت متضخمة 
وعاوز يثبت انه ملك 
لكن اسماعيل مكنش عنده جنون العظمة دا فعلا



الراجل  كان كويس 
رغم كل عيوبه والإسراف الخ الخ
لكن عمل بنية تحتية لمصر عايشين بيها بقالنا 150 سنة
ولسه مكملين 
الانجازات جنب العيوب .. تغلب
كان ممكن يحط صورته ع الطابع زى الملكة فيكتوريا
وحقه
 لكن فين وفيييين لما اتحطتله صورة 
الا بعديييين 



ودا يقودنى الى الأسى

لأن مفيش حاجة ف الدنيا دى ببلاش
احنا كنا زمان حلوين ف حاجات كتير
 بس دفعنا تمنها
الأجيال وقتها دفعت تمنها والشعب مكنش مهيص يعنى!



احنا دلوقتى بندفع تمن ان البلد تتغير وتبقى احسن ..
بس عمالين نشتكى ونتململ ونلعن ونسب الدين
مع اننا لو بصينالها 
هنلاقيها مجرد اتمان مؤقتة
واللى مش عاوز يدفع .. ميدفعش يا جماعة
محدش بيضربه على ايده
بس لو عاوز يغير فعلا ميقعدش يزايد ع البلد
بلى بيعانيه لأنه اختار .. مكنش مسير
طالما عنده حق الاختيار يبقى مش مسير 



أى حد ممكن يسافر
 او يهاجر حتى وهوه جوا البلد
يكفى انه لا يبالى ويكبر دماغه ويقول يلا نفسى
بس ميرجعش يعايرنا 
ولا يقول أف دى بلد وسخة بنت كلب



احنا بندفع تمن زى اللى راحوا ما دفعوه
ولسه الجاى هيدفع تمن لمكاسب تاني
وهيا كدا على بعضها شروة واحدة يا تشيلوها يا تسيبوها
وتكبروا الدماغ



والكلام دا للكل كليلة لبتوع مرسى
وبتوع السيسى 
وبتوع الثورة
وبتوع اللى ملهمش دعوة بدول ولا دول ولا دول
 على فكرة :) 





واخيرااااااااااا
الحكاية النهاردة اهداء للغالى (محمود)
زوج حسنا حبيبتى اللى بيحب الحكايات القصيرة
كل عيد جواز 
وانتوا طيبين وسوا 
وزى الفل ع الورد ع الياسمين
وعقبال عيد الجواز الفضى والدهبى والماسى كمان
 :* 



وتصبحوا على ألف خير ..
نرتوت المنشنات الحلوة قدر الممكن بقى
قبل الليميت ما يداهمنى
وياريت محدش يزعل من كلامى #اختكو_الكبيرة_صاحبة_عيا_وكدا



--------------------------------------

Mohammad Diab @som3amasrawy 
 ربنا يكرم أصله :) 
كان هيضيع مننا الهرم ابن اللذين


Heba Khafagy @Nefro 
حفيده ومراته كانوا ف
 real housewives of new york :count and countess وفخوربن بروحهم اوي!


لعله خير @Fatoma999 
 اكيد الست بهيجة دى نفسيتها كانت وحشة اوى
,,اتنين ما عرفوش يشيلوها
:(



لعله خير @Fatoma999 
 ومصر تانى دولة بعد انجلترا تعمل خط سكة حديد
,والتانية بعد فرنسا فى عمل فن المسرح..
عمار يا مصر


john gabriel @johngabrie 
اسماعيل اتظلم



أشرف فوزي @ashraf1974108 
@Hany_Zaky @ro7albmama2 https://t.co/kWhyFDxKOg





جابرُ عثراتِ الكِرام @JaberAl3atharat 
 قوق في العربية لها معان كثيرة،
 "القوقة" مثلا هي الفرس طويلة القوائم،
وهي لفظة مستخدمة في العامية،
وكنت أظن "أم قويق" مشتقة منها


 @Hany_Zaky 
كما يقول أشرف فوزى: محاكاة صوتية :-) @ashraf1974108





هناك تعليقان (2):

  1. شكرا لكى علشان بتعرفينه حكايات انا معرفهش وانا كتيربحبك ونفسه اعرفك

    ردحذف
  2. غير معرف
    -----------

    كتر ألف خيرك
    شكرا ليك على ذوقك

    ردحذف

Related Posts Plugin for WordPress, Blogger...
"حقوق الملكية والملوخية والمهلبية ... الخ
محفوظة للست شهرزاد وإياك حد يسرقها ويحاول يزعلها آغجر .. مفهوم ؟ "