الاثنين، 31 مارس، 2014

بشـــار أبو لســان منشـــار






الحدوتة النهاردة خارج سياق تاريخ مصر ..
بس مش بعيدة قوى برضو
وعن شاعر غرق ف الحب لشوشته
وطلعوا الكراسات عشان حصة النصوص بدأت


الحكاية عن بشار وعبدة .. 
جوز العصافير
صيو صيو صيو
والأخ الحبيب يبقى الشاعر الهمام بشار بن برد
وحبيبته تبقى الأنسة المصونة عبدة
بشار بن برد للى ميعرفوش قوى
يبقى شاعر من التقال قوى
اللى عاصر الدولة الاموية ف نهايتها
وحضر مجى العباسيين للحكم 
واصله كان فارسى للأسف





ليه بقول للأسف ؟
عشان عقدة الاصل بتاعته دى
هتخليه طول الوقت عنده نعرة
بتاعت انا باكينااا وانا واثكة ف نفسى
والعرب دول اجلاف وصيع 
وانا ابن حضارة وهما جرابيع




جدود الاخ بشار كانوا من بلاد فارس
لكنه اتربى ف بنى عقيل
واخد من الثقافة العربية
 وبقى لهلوبة فيها 
وبيقول شعر يطاول بيه الفطاحل وقتها جرير وغيره
وف زمن الامويين كانت أى أعجمى مثار سخرية وتهكم
لكن لما جم العباسيين استعانوا بالعجم
وبقى فيه شكل تانى للمعاملة 




بشار بقى مكنتش عقدته بس الاصل
العقدة التانية كانت انه اتولد كفيف ولم يبصر
وعاش كدا قرب الـ 70 سنة
وكان حسب وصف من عاصروه
أسمر غليظ الملامح ضخم الجثة عريض المنكبين شلولخ
فتخيلوا شاعر المفروض بيقول كلام حلو وبتاع
يبقى مش شبه حسين فهمى ولا حتى مصطفى اخوه
ويطلع شبه على الشريف
طيب احنا موافقين بس برضو فيه مشكلة أنيل 




انه كان قليل الادب
ولسانه 7 متر طول × 7 متر عرض
منشار مبرد سكينة مطوة قرن غزال .. أى حاجة 
المهم انه كان بيستعمل لسانه كسلاح 
يقتل بيه خصمه فورا 
وميترددش 
وكان صبره قليل
ودايما يشتكى
ومش عاجبه أى حاجة
واللى يدوسله على طرف يفرمه 
حاجة قرف كدا



وكان عصبى بيتنرفز بسرعة
وينفعل من هنا يقوم راقع اللى قصاده من هنا
كام بيت يجيبوه الأرض
فالناس كانت بتتحاشاه قد ما تقدر



وكان بسبب عجز البصر بيتعيش من الشعر
كان بيمدح وياخد عطاء على شعره
ونهاره ازرق اللى ميقدرش بقى 
زى ما حصل مع الخليفة المهدى
اللى امتنع عن العطاء له بسبب قباحته 
فخد شعر م اللى فيه القسمة


 زائد انه كان فعلا شاعر كبير ومتمكن
والناس ف زمانه اندهشوا ازاى كان بيوصف
ويقول تشبيهات ف شعره لحاجات عمره ما شافها ف حياته ؟
ودى كانت عبقرية منه محدش قدر ينكرها عليه
لكن الحلو ميكملشى #للأسف




سيبك من النعرة الفارسية
والشكل القاسى والملامح
والأخلاق الصعبة 
وكل دا ..
بشابيشو كان غاوى هجاء
ودا اللى وداه ف داهية زى ما هنحكى 
كان بيهجوا أى حد مش عاجبه
أى حد من عامة الناس والبسطاء والكبراء والقادة والرؤساء
حتى الخليفة المهدي ووزيره 
مسلموش من لسانه الزفر




ومش بس دول حتى كمان ولاد كاره
والنخبة الادبية والعلماء زى الأصمعي وسيبويه
والأخفش وواصل بن عطاء وغيرهم
صراحة مسبش ف نفِسه حاجة وكتمها !



بس دول كلهم ييجوا على جنب
وربنا هيسلط عليه واحد شبهه كدا شاعر برضو
اسمه حماد بن عجرود
نفس طولة اللسان وقلة الادب 
وهيخشوا لبعض ف مبارزة
المصادر بتقول ان بشار هوه الأظلم
وهوه اللى بدأ بالهجاء
قوم حماد رد عليه :

لو طليـت جلدته عنبرا ... لنتـنّت جلدته العنبرا
أو طليت مسكا ذكيا .... إذا تحول المسك عليه خـرا




قوم بشار رد بأبيات مينفعش اكتبها هنا خاااالص
بس تقدروا تقروها هناك براحتكم
بس ملخصها 
ان بشار بهدل حماد ع الآخر
والأتنين قعدوا يردحوا لبعض بالنحوى
ويجيبوا ف سيرة اماكن حساسة ف جسم كليهما
وجابوا كمان سيرة الأمهات وكما لو أن سيرهم كان بطال
وحاجات كدا على نفس المنوال 
متتقلش ابداااااااا





وهتستعجبوا ازاى ان الشتايم المستخدمة دلوقتى
كانت موجودة ف شعر بشار وغيره
اقروا الأبيات والنبى 
هتزبهلوا ازبهلال السنيييين 



المهم ان العركة خلصت بإنتصار حماد ف النهاية
والراجل (حماد) هينقتل بعدين بسبب قلة ادبه 
وخلاص كدا


نرجع بقى لسى بشار أفندى 
المؤدب المهذب الراجل الكومّل
مينفعش نقول عن بشار ان عينه كانت زايغة
 لأنه مكنش بيشوف اصلا
 :)
بس نقدر نقول وبكل أريحية
انه كان مقطع السمكة وديلها وراسها والجناب كمان
قولولى ازى ؟؟





اقولكم بالشعر وانسوا بقى كل ما سبق ذكره من قباحة
وتعالولى ف الوسعاية
احكيلكم عن بشار العاتفى حساس الجيل
 لما كان بيرمصن يعنى يديها رومانصية




الواد كان حبيبّ بتقفيلة بلاده ..
وكان عامل زى صالون ثقافى ف بيته
وكانوا الناس بتحضرله تسمعه
ومنهن الحريمات اللى بتحب شعره 
ومش كدا بس
دا يحكى ان 5 ستات ماتلهم عزيز
فجم يطلبوا منه شعر يقولوه
وهما بينوحوا ع الفقيد بدل يا سبعى وجملى وبعلى والجو دا
فبشار عزم عليهم
وقالهم مش هديكم الشعر الا لما تاكلوا من طبيخى



كان حونين مع الحريم شيكله
بس ف نفس الوقت كان حاضر بالرد
لما واحدة مرة قالتله انتا مخوّف الناس ليه
وانتا شكلك مش ولابد يعنى 
فرد
ليس من حسنه يهاب الأسد #بشار_بن_برد




ولما واحدة تانية قالتله شعركّ ابيّض
ومش لايق على سمار لونك خالص
فرد
أما علمت أن بيض البزاة أثمن من سود الغربان
 #هزأها_بالذوق





فالست مسكتتش وقالتله طب وفيها ايه
لما يبقى شكلك كويس زى ما كلامك كويس ؟!!
فبشار احرج جدا وقال :
محدش كبسنى زى الست دى !
 #حريم_جدعة_طول_عمرنا




وكان بيحب المغنى والجوارى وعايش حياته
وف مرة سألوه فيما معناه
انتا بتحب الشاب الحليوة يا كابتشن
فرد بكل تواضع وقال : 
لا ولكن تعجبنى أمه



ولما سالوه برضو ايه اكتر حاجة تحبها ف الدنيا وتبسطك
 فقال :
طعام مز، وشراب مر، وبنت عشرين بكر
 #ابن_حلاااااال_قوى




قصره عشان كدا 
احنا نشرنا غسيل الجدع الموش أوضيف كله 
 (على راى يوسف ابنى) 
فندخل على كصة حب ميرفت وعيلااااء
ونحكى عن الأنسة عبدة بقى
والست عبدة كانت زى اسمها ..
احدى جوارى واحد من وجهاء البلد
وزيها زى غيرها سمعت عن بشار بن برد
وحبت تسمع شعره
 وراحت مع صاحبة ليها لحد لبيته تسمعه




خدت قعدتها وبعد ما خلص بشار الإلقاء
راحت تسلم عليه
قام الجدع سمع صوتها وقع ف غرامها
واندلق دلقة السنييين 
وخرجت من عنده مشقلبة كيانه


يا عبد حبك شفني شـفـا ... والحب داء يورث الحتفا
والحب يخفيه المحب لكي ... لا يستراب به وما يخفى




بس وشاع الخبر ف البلد
بشار بن برد بيحب عبدة جارية فلان
 ونظرا لأن البنية مش حرة فعادى
 يقول شعر ويشبب بيها ملهاش اهل يبهدلوه وكدا  #عادى




وقعد يكتبلها وهيا تطنشه وتتقل
والمغنيات يغنوا الأشعار دى ف الليالى والأفراح


عبد يا قرة عيني ... أنصفي روحي فداك
عاشق ليس له ذكر .... ولا هـم سواك




عبد إني إليك بالأشواق لتلاق ... وكيف لـي بـالـتـلاقـي
أنا والله أشتهي سحر عـينيك ... وأخشى مصارع العشاق 



المهم قعدنا كدا يكتبلها والناس تتغنى بشعره
والأنسة عبدة مطنشة
لحد ما الجدع صُعب على سيد عبدة نفسه
وراح قايلها 
لو عاوزة تتجوزيه اجوزهولك !




والروايات بتقول ان عبدة رفضت
وبعدها بفترة اتجوزت واحد تانى
وسافرت معاه بعيد
وفضل بشار يبعتلها ف أشعار
وهيا تاخده على قد عقله وتشكره ع الكلام الحلو وبس !



يا أطْيَبَ الناس رِيقاً غيرَ مختَبرِ
إلاَّ شهادةَ أطرافِ المساويكِ
قد زُرْتِنا مرةً في الدهر واحـدةً 
ثَنِّي ولا تجعليها بَـيَضةَ الـدَيكِ





وبس خلاص الست اتجوزت وانتهينا
وجالك الموت يا تارك الصلاة
الاخ بشار قعد ف اللهو والعبث والمجون لفترة
وقعد يهجو ف الكبرات 
لحد ما خبط ف الخليفة
اللى بعتله يمنعه من الهجاء 
وسب الناس
والخوض ف الأعراض
 فبشار تظاهر بالموافقة
 وخرج من عنده رقع ابيات هجاء جديدة عادى
فالخليفة اتغاظ جداااا




زائد ان بشار بقى يتباهى عادى بإحتقاره للثقافة العربية
ويدخل الدين ف الحكاية
وكتب ابيات بيتريقأ ويجيب سيرة ابليس
وكأنهم اصدقاء الطفولة
والظاهر انه استفز المجتمع وقتها بحريته الرهيبة 
واهماله لمشاعر الآخرين للدرجة دى 
قوم الناس اللى مبتحبوش وما أكثرهم يعنى
اتهمته بالشعوبية والزندقة
وطالبوا الخليفة بإقامة الحد عليه
والخليفة ما صدق هوه راخر وبعت رجالته 
دخلوا عليه داره وقتلوه !!!



ومات بشار بن برد شهيد طولة لسانه وسوء طبعه
 بعد ما قرب ع السبعين
والمؤسف بقى ان الخليفة المهدى مكتفاش بقتله
وبس 
دا كمان لما دفنه 
قرر ان بشار بن برد يندفن ف قبر 
مجاور لقبر مييييين تفتكروا  ؟
أيون 
حماد بن عجرود 
الغريم القديم وعدوه اللدود 
وشوف الزمن !!!




وقبل ما اخلص واقول الملاحظات
احب اقول بس ان بشار فعلا كان شاعر عظيم
ويكفى ان ابيات من أجمل ابيات الشعر العربى
كانت بتاعته وأقصد التالى



إذا كنت في كلّ الأمور معاتباً .. صديقك لم تلق الذي لا تعاتبه


عش واحداً أو صل أخاك فـإنـه 
مقارف ذنب مرة ومجانـبه
إذا أنت لم تسر مراراً على القذى 
ظمئت وأى الناس تصفو مشاربه
 #بشار_بن_برد




وذَات دَلٍّ كانَّ البدر صورتُها
باتت تغنِّي عميدَ القلب سكرانا


إِنَّ العيونَ التي في طَرْفِها حَوَرٌ  
قتلننا ثم لم يحيين قتلانا


فقُلْتُ أحسنْتِ يا سؤْلي ويا أَمَلِي  
فأسمعيني جزاكِ الله إحسانا
يا حبذا جبلُ الرَّيَّان من جبل  
وحبذا ساكن الريان مَنْ كانا
قالت فَهَلاَّ فدَتْكَ النفس أَحْسنَ مِن هذا 
لمن كان صبّ القلبِ حيرانا

ياقومِ أذْنِي لِبْعضِ الحيِّ عاشقة ٌ  
والأُذْنُ تَعْشَقُ قبل العَين أَحْيانا
 #بشار_بن_برد




والبيت دا يا عيال ... تحففففة
بتاع

 ان العيون التي في طرفها حور .. قتلننا ثم لم يحيين قتلانا 
نقلع عن الشاعر جرير 
وحطه ف قصيدته 
كانوا بيبارزوا بعض بالأشعار 
ويقتبسوا من بعض 
#شكرا_للى_لفتت_نظرى_ف_المنشنات



وغيرها من قصايد
وكان بسبب سنه وانفعاله بالاحداث غزير الانتاج
 القصد .. الراجل كان بيتكلم عن الحب
واللى حواليه يكدبوه 
ويقولوا ازاى ؟
ازاى تحب وتهيم بواحدة وانتا مشفتهاش
فطلع بيت الشعر العبقرى الحقيقى دا
بتاع القلب بيعشق قبل العين
 #حقيقة



ولما اللى بيشتمهم كانوا بيحبوا يضايقوه
فيعايروه بكف البصر كان بيرد عليهم بأنها نعمة
و... ( انها تحجب عني رؤية ما اكره )
 #كيااااد_وسهنة



ونقول الملاحظات
واستحملونا



1) الحدوتة الليلة دى مصدرها الاساسى كتاب
 (الحب فى صدر الأسلام) لأقبال بركة
وبعض مواقع النت المتعلقة بالحكاية والشخصية وكدهون



2) مش قادرة ازعل من عبدة
عشان رفضت حب بشار #خالص
من حقها تخاف منه الراجل
صراحة كان قليل الادب
 وصحيح عيب يا زينهم لما تشتم جيرانك بألفاظ بسيئة



هيا انبهرت بموهبته وشعره
لكن اكيد لما لاقته بيحّط على كل الناس
بلا تمييز كبير وضعير كدا
اكيد اتخرعت وقالت لروحها وانا مالى يامّه 
لمرة نتخانق بقى
يروح هابدنى كام بيت
 يفضحنى فضيحة السمكة ف طاسة القلية
 وعلى ايه البهدلة دى
 ثم انه كان هلاس وفلاتى وملوش كاسر
 #لأ_البت_معذورة_ياجماعة





3) بشار ينطبق عليه نظريات علم النفس
بتاعت تعويض المفقود بالشوشرة ف مجال آخر
والراجل استخدم بلاغته وموهبته ف اظهار وجوده
وفرض شخصيته 
لكننن
ودا اللى مزعلنى منه الحقيقة
لما ربنا يدى حد موهبة لكن يمرمغها ف الأض كدا ؟
يعنى الشعر والادب والغنا والرسم
و كل حاجة جميلة زى دى
 المفروض
ترقى ذوق الناس وتعلمهم الشياكة .. مش العكس
 وكان فيها ايه لو ملك نفسه عنده الغضب
 وكان كتب حاجات حلوة بس متجبلوش الموت ف الآخر ؟!!




4) واللى مزعلنى اكتر بقى
ان سوء طباعه وموته وحيد شريد كدا
خلاه يندفن جنب آآآآخر واحد يحب يندفن جنبه !
حماد اللى شتمه وبعترله كرامته
مش لو كان كويس كانت نهايته تكون أكرم من كدا ؟
 :((



وهذا يقودنى لرقم
5) 
والخليفة المهدى لعبها صح وكان كياد هوه كمان 
بغض النظر عن استغلال نفوذه 
وافقاد الآخر حياته  وكمان الآخر كان كفيف ..!
بس يعنى انا بتكلم عن
ان الانتقام طبق يؤكل بارد 
والخليفة عرف يعمل كدا فعلا 




6) واهم حااااااجة ف القصة دى
الناس زمان مكنش عندها #توتير
قوم لما كانوا بيتعصبوا ع الخليفة ولاّ الوزير
فكانوا بيرقعوه قصيدة 
#مساكين
#غلابة



لو كانوا عايشين زماننا كانوا يدخلوا هشتاجات 
ويبهدلوا الامهات
بتاعت السادة ف الانتخابات 
وعادى جدااا


ثم انه يعنى بخصوص حوار الأدب والألفاظ
ييجوا السادة بتوع دلوقتى
يبصوا بصة كدا سريعة على الشعر العربى القديم
ويشوفوا الألفاظ
والله ممكن يجيلهم جلطة
 لو اكتفوا بأشعار بشار بن برد بس 
ثم انه الكلمة اللى ف هشتاج #انتخبوا_العرص دى
ومزعلكوا
حد يعرف انها لغة عربية فصحى
واسالونى معناها ايه يا فطمطم 
وانا اقولكم



كلمة (عرصة) فى اللغة العربية
هى كل أرض لا يوجد عليها بناء
واللى هيا بالبلدى الفسحة أو الحوش 
او الوسعاية اللى ف البيوت القديمة دى
 #عارفينها ؟



ولحد وقت قريب ف الشام الاخوة
بيقولوها على أى ارض فضاء
وعندهم قانون بيميز الأرض دى
عن الأرض المبنى عليها دار او أى منشأة وكدا




اذن 
العرب زمان استعملوا اللفظ للدلالة ع المكان الفاضى
اللى كانوا بيتجمعوا فيه ويلعبوا ويسهروا الخ الخ



وبرضو لغويا كلمة العرص يعنى النشيط
وكمان العرص يعنى المتحرك او المضطرب
واللى مش ثابت على حال
وعرص البرق .. يعنى اضطرب





 قوم ف النهاية نفهم ايه م الحوار دا
لما حد يقولك انتخب السخصية الفلانية دى لأنه كذا
يبقى مش بيشتم ولا حاجة
دا بيقول لحرتك
ان سعادته راجل نشييييط 
عاوز ياخدنا يفسحنا 
ويروقنا  لحد ما نضطرب 
حتى لو بصينا ف الصورة اعلاه 
هنلاقي ف الخلفية الحديقة 
اللى هيلاعبونا فيها ويبسطونا وكدا
والراجل كان ممكن ياخدنا ورا مصنع الكراسى
ومحدش هيستجرى يفتح بوقه
لكن كتر الف خيره هياخدنا الجونينة ونشّبك ايدينا




ولما حد يزعل عشان هشتاج
 #انتخبوا_العرص
ويقولك شتيمة وعيب ميصحش
قوله انتا متعرفش 
ان العرص يعنى : النشيط
يعنى دا مدح 
وانتوا بس شايلين ومعبيين ومنفسنين 
ودايما كدا ضميركو ويحش .. !



وتوتة توتة كدا خلصنا 
تصبحوا على ألف خير


-------------------------



إحـــكى يا شهـــرزاد 
@tarekmomen انا كتبتها م السرعة غلط يا طارق
 الشعوبية يعنى كراهية العرب
والتمييز بأصول اخرى وحبة زندقة كمان فوق البيعة
 :)


-Gina @GeenzGi 
دي الكلمة مأصلة بقى :)


-Ahmed Rageh @Ahmed_Rageh101 
ربنا بيسلط ابدان على ابدان




-tarek momen @tarekmomen 
 طيب كان بيعمل هاشتاج للحاكم في عصره



-john gabriel @johngabriel18 
 الاخ كان عايش حياتة:)


-Ahmed Rageh @Ahmed_Rageh101 
 قتلوه من الباب للطاق كده
ده ايه الغشم ده
 طب مش يحاكموه محاكمة صورية الاول


القرموطى @elkarmoooty 
 زى عم أحمد فؤاد نجم فى ناس كدة الهجاء فى دمها


-tarek momen @tarekmomen 
بصراحة احنا بالنسبة لهم غاية في الادب..
دي كانت ناس لسانها متبري منها



™الدبدوب ® @mazforever 
هي الكلمة دي طلع ليها جذور تاريخية برضه ؟؟؟ 
عمار يا مصر



-Cindy @CindyJanabi 
ببغداد يوجد حي اسمه العرصات يعني جمع عرصة


-Ahmed Rageh @Ahmed_Rageh101 
لا بلاش ياخدنا ويفسحنا دي



-Hany Zaky @Hany_Zaky 
هى فصحى لكن خدت رحلة فى العامية
 المرحلة الوسطى كانت تطلق على عتبة باب البيت
 وبعدين قعد عليها مسئول التسويق فى كفر الخبيزة


-tarek momen @tarekmomen 
هو ماعرفتيش ان المصريين
كانوا بيطلقوها علي الشرطي المسئول عن التفتيش
 علي الرخص في دور البغاء


nabilah ‏@nabali2013

لا البيت دا مش لبشار ابحثي في قوقل 
ولا الابيات اللي قبل كمان



ليست هناك تعليقات:

إرسال تعليق

Related Posts Plugin for WordPress, Blogger...
"حقوق الملكية والملوخية والمهلبية ... الخ
محفوظة للست شهرزاد وإياك حد يسرقها ويحاول يزعلها آغجر .. مفهوم ؟ "