الأربعاء، 30 أبريل 2014

حـــكـــايـــات مصـــريــة .... 11






مئذنة جامع ابن طولون



العواف عليكم ...

كمان شوية حكايات مصرية قصيرة ...
من مواقف وشخصيات من أزمان مختلفة ف هذا البلد
نبتدى ونقوووول



 حدوتة رقم (1)



مسجد الست مسكة


 فاكرين زمااااان حكينا عن جامع السلطان حسن
وقولنا حكايته من العرش الى الأختفاء 
هنا
وللى محضرناش نحكى بسرعة كدا
عن الامير قلاوون اللى جه بمنطق القوة لمن غلبا
وقعد على كرسى العرش
 وورث الحكم لولاده واحفاده كمان ...




وقعدت اسرة قلاوون دى تحكم قرب الـ 100 سنة
من تاريخ مصر
قلاوون كان عنده 6 عيال ولاد
وطبعا كانوا تحت وصاية اكبر راس ف الجيش وقتها
حسن .. تحديدا كانله قصة مميزة
اقروها على مهلكم لكن اللى نفتكره كويس
انه اتحبس ف الحريم .. اكتر من 3 سنين
زى المحجور عليه كدا




وقتها اللى سيطر ع الحكم كان الامير طاز

جوز اخت حسن
وغالبا بسبب الرابطة دى طاز مقتلش حسن
خلعه بس ورماه ف الحريم
قوم ايه ؟؟


طلعتله ست وراحت هابة فيه

وقالتله ازاى تعمل ف السلطان كدا؟؟
قالها مش عاجبك
قالتله ايوه قالها امشى من وشى لأحبسك
قالتله موافقة احبسنى معاه !
وقولتيها ونولتيها يا حاجة


فعلا راحت الست دى الحريم

وقعدت تخدم ف السلطان المخلوع حسن
طول مدة حبسته لحد ما خرجوا امراء تانيين
راحوا قالبين على طاز 
وخرجوا حسنوله 
ورجعوه الحكم



مين الست دى اللى بميت ألف راجل ؟؟

اسمها الست مسكة
وكانت كهرمانة زوجة السلطان قلاوون الأب
اللى كانها اصلها مغولى
وقلاوون اتجوز المغولية 
واخدها بجواريها ... للقلعة 




الجارية كان اسمها "جلشانة"

ومعناه .. رائحة الورد او العطر
فسموها .. مسكة
اسهل ف النطق ومحبة وكرامة


الست مسكة بقى كانت قمر اربعاتشر

عاشت شبابها ف قصر قلاوون الأب
وربتله عياله
وبعدين بعد موته فضلت تخدم ف اولاده
ثم الاحفاد
وبيقولوا كان ليها سطوة ونفوذ وشنة ورنة
وكانت غنية بس كمان كنت كريمة وايدها فرطة
وبتحب الخير 
ولما ربنا وسعها عليها
بنت مسجد ف حتة خلا ومفيهاش ونس
وبعدين الناس اتشجعت وبنت حوالين المسجد
فالمكان اتعمر بسببها





السلطان حسن لما رجع للحكم تانى

أحسن اليها
ومن بعده ابنه عمل زى الأب
وقعدت الست مسكة كتيييير
لحد ما بلغت من العمر أرذله لدرجة ان
بقى لما حد يحب يقول على واحدة انها كبرت قوى ...
يقول دى مرضعة قلاوون
والست مسكة دى بقى هيا صاحبة التسمية اياها
:)



وتعليقى الوحيد .. ع القصة دى

أى ست عندها ابن او زوج او أخ أو حبيب
معتقل او سجين بحس ان ربنا بيسندها
مش عشانها هيا
لكن عشان اللى ف عتمة الزنزانة دا
يفضل صامد بصمودها
والحريم جدعان والله
بس السجان دايما غبى .. مبيفهمش




القصة رقم (2)





عن تحليل موقف ازرق مدوحس

بيتعرضله عديد من الشوباب ف ليلة الزفاف
وما بعدها حتى يحدث الطلاق
وقولولى ليه يا فطمطم كدا بس 
قوم أحكيلكم
لما تيجى ام العروسة تانى يوم .. الصبحية وكدا
فتسأل بنتها فالبت تسّيح للعريس بقى
وتقولى محصلشى
والموضوع يوسع ويكبر فيقولوا أصله مربوط .. !



ايه حكاية مربوط دى بقى ؟

أصلها ايه يعنى ؟؟
قالك زمان كان فيه اعتقاد شعبى كدا
ان العريس وهوه بيحط ايده ف ايد حماه
وبيكتبوا الكتاب
ساعات حد ويحش وحقود منفسن
يبقى عاوز يعكنن ع العصفورين السعيدين
فيقوم جايب "دوبارة"
خيط بس سميك شوية عن العادى
واثناء ما المأذون بيعقد العقد
وبيقول قول زوجتك ابنتى وبتاع
الاخ المنفسن أو الأخت ..
أى كان اللى دماغه فيها خرم ومتوضايق يعنى
كل ما المأذون يقول جملة
يروح عاقد عقدة ف الدوبارة
ويقرى شوية حاجات غتاتة طلاسم و كلام



وبس يدخل العريس على عروسته

ميحصلش المفروض اللى يحصل فيقضوها تعارف وبس 
 والأهل يفهموا ان الولاد مربوط
ولازم يفكوا العمل الاسود دا بأى شكل
وبيقولك لازم اللى يفك العمل
يقعد يقرى ف حاجات
ويا حبذااااااا لو لقوا الدوبارة المعقودة دى
وفكوها بنفسهم وكدا 



دا على اساس ان اللى عقدها

مش هيروح يرميها من فوق جبل المقطم
او ف قاع النيل مثلا ؟!!
المهم الاهل يتصرفوا عشان الجوازة تتم
والواد مش هيترن علقة كل يوم
نجيبك منين يا صحة ؟!!
وربنا ما يفضح حد
:)





اللطيف بقى ان المعتقدات دى لسه موجودة عند البعض

ولسه لحد دلوقتى
فاكرة ابن خالتى الله يرحمه
لما جه يتجوز
كان عند عروسته دادة نوبية عجوزة 
م الناس القيامة الحلوة بتاعت زمان دى 
والست دى لما ابن خالتى دخل يلبس بدلة الفرح
خدته على جنب بجدية شديدة كدا
وكأنه اجتماع مجلس أركان حرب
وقالتله لما تلبس هدومك الداخلية
ابقى البسها بالمقلوب
سألها ليه يا دادة ؟؟
قالتلها عشان سهام الحسد لما تصيبك .. ترتد
ومتدخلشى جوا !!!
#جوا_فيييين
#سلطان_السكرى_ستايل
شوف ازاااااى !!





اللطيف أكتر ان ابن خالتى
وكان مهندس قد الدنيا ومتدين ولا يؤمن بهذه الشيشاء
بس عشان ميزعلهاش
ويفرحها انه سمع كلامها
راح منفذ طلبها فعلا 
:))



وتعليقى على القصة بتاعت الدوبارة دى

ولا حاجة
بس لو كل مشكلة بين الزوجين ف هذا الاطار
هتسبب قلق
بسيطة
نقفل كل مصانع الدوبارة ف العالم



ثانيا

نشيل التخصص دا من كلية الطب
واهو نوفر برضو مصاريف ومدرجات وكتب
ودروس خصوصية وكدهون




ثالثا بقى .. الأفراح دى ولا ليها أى تلاتين لازمة

بس لو حبكت
يبقى المعازيم تتفتش .. آه
دا مستقبل ناس وفضايح وكدا






القصة رقم (3)




فاكرين العملة اياها اللى ظهرت ايام الوالى سعيد

ام هلال ونجمة ووردة دى
سعيد كان فرحان بروحه فعملها





العملة كان شكلها غريب
والناس كانت متعودة ع العملات تبقى فضة او دهب
المهم الجدع اتكل على الله
وجه الخديوى اسماعيل
سماعين بقى كان داهية بص للعملة دى وقال ايه دا ؟
دى معليهاش اسم السلطان مولانا ف الآستانة
ازاى الكلام دا ؟؟؟؟ 




الباشا كان بيرسم لبعيد

وعاوز يخلى العرش وراثى ف عيلته
قام اتمحلس للسلطان العثمانى
وقال خلاص احنا نبعت العملات دى تتسيح
ونعيد ضربها من تانى
بس المرة دى نحط عليها اسم مولانا السلطان .. #احلاااوة


مصر كان فيها دار للضرب وكدا

بس اسماعيل كان عاوز حاجة شيك ودلع وكدا
قوم ايه ؟؟
بعدت شحنة العملات السعيدية دى باريس ...
اتسيحت واتعمل عملات جديدة بدالها
ومنقوشة باسم السلطان
ورجعت مصر وانتشرت ف الاسواق للتدوال
فالناس سموها "باريزة"






وباريزة .. نسبة الى باريز .. او باريس

ومن يومها بقينا نستعمل الكلمة دى ... ف نقودنا
واخيرااا الحمدلله يا رب 
عشت لحد ما عرفت تسمية باريزة جت منين !!




القصة رقم (4)






عن واحد بحبه قوى

توفيق الحكيم
اللى كان مشهور بعدواته للحريم
وهوه ف الحقيقة مكنش كدا ! 
زمايله ف اخبار اليوم واللى عرفوه عن قرب
بيقولوا انه كان دايما قاعد ف أوضة المحررات
وكان لطيف جدا مع الستات
وبس بق ع الفاضى وبتاع
:))
والمقربين بيقولوا كمان ان هوه
اللى كان بيطلع اشاعات على روحه  بالقصد
يعنى يدعى البخل عشان يبعد المتطفلين عنه
يدعى السرحان عشان يهرب من ملل محدثيه
وكان بيدعى كرهه للمرأة عشان يبعد عنه المعجبات
ويعرف يتفرغ للكتابة :)



واللى يقرى اعماله او بعضها
هيلاقيه بينصف الست على فكرة
انا شخصيا كفاية عندى مسرحية "ايزيس"
عشان اعرف قد ايه هوه كان بيبص للست بصة هايلة
ملحمية وبطولية كدا
مش بس عادية




المهمممم 
كل دا الأشاعات واحترام المرأة ف أعماله وكدا
لن ينفى انه قعد مضرب عن الجواز فترة طويلة من عمره
ومصر الحاحاااا ميتجوزش
لحد ما جت واحدة ست جدعة كدا ودخلت حياته
اسمها سيادات
#اخدلى_بالك_يا_حاج_محمد_م _الإسم


الست دى هتجبره طوعا
على انهاء حالة الإضراب عن الزواج
بس هوه هيحاول يعمل فيها فلوطة
وآل يعنى واد رِقم وحويط
فراح مشترط عليها شوية اشتراطات
وعملها ورقة من 25 بند تمضى عليها الاول
قبل عقد الجواز !



البنود كانت غريبة وعجيبة
واللى وصلنا منها مثلا
بند ان محدش يعرف بالجوازة دى !
وانها متطلبش منه ف يوم يشترى عربية !
وانها متطلبشى مصروف بيت ف الشهر
الا ف حدود مبلغ معين ميزيدش عنه !
وقالها تمضى قصاد كل بند بالعلم
والموافقة #كان_وكيل_نيابة_وحركات



الجميل ان الست سيادات وافقت على الشروط
ومضت بالعلم والموافقة
وفعلا التزمت بكل المذكور اعلاه
لدرجة ان محدش عرف بالجوازة دى الا صدفة
بس طبعا بعد كدا ولا الهوا
 الراجل عاش سعيدا معاها وخلف منها ولد وبنت
الولد .. اسماعيل .. طلع بيحب المزيكا
وعمل فرقة موسيقية


لكن ..
الام .. سيادات الجميلة دى
هتموت سنة 1977 وبعدها بسنة واحدة هيموت الأبن
وتوفيق الحكيم ينقهر عليهم حزنا
وميفضلوش غير البنت زينب
اللى هتلازمه حتى الممات




وتعليقى على القصة دى يتلخص ف الآتى
ان فيه ستات كدا ربنا مديهم نعمة الشوفان
يعنى فيه ست تشوف ف الراجل
اللى بيحاول يخيبه عن كل الناس ...



ويبقى الأخ من اياهم يدعى القسوة البخل الانانية الهيافة
 معرفش ايه المهم أى حاجة تطفّش اللى قدامه وخلاص
بينما هوه ف الحقيقة مش كدا !
الست سيادات كانت من هولاء النسوة
اللى شافت ف توفيق الحكيم مميزات وخصال طيبة
تخليها متقفش عند حركات المعيلة والكلاكيع بتاعته 
بتاعت العقد والبنود وخلافه
وتكمل وتتحمله عشان عارفة
انه زى بعض الرجال .. يهدوا الدنيا ادعاءات
بينما هما ف النهاية غلابة
وابقاق 
وشكرا



القصة رقم (5)




زمن ابن طولون
انتوا عارفينه الجدع دا كان حمش
وجامد وايده طارشة الخ
ف بدايات سيطرته على مصر
ومحاولة الاستقلال بيها عن بنى عباس




احمد بن طولون كان عنده كاتب .. مقرب له
كان اسمه ابن دشومو
الأسم لوحده تهمة اهو
المهم ابن طولون كان ضميره بيوجعه
كل ما يعمل مصايب
ويحاول يستغفر ربنا ويعمل أعمال خير
ف سنة من السنين ف خناقته مع المعتمد
موداش الخراج السنوى اياه
كان 100 ألف دينار
فقرر حاجة ...



قال انا اعمل بيهم حاجة لله
ونده لكاتبه ابن دشومة وقاله ايه رأيك ؟؟
ابن دشومة كان بخيل 
ورخم
وايده ناشفة
ورزيل
قاله ادينى الامان الاول !



ابن طولون قاله ماشى .. ماشى .. اتنيل عاوز تقول ايه !
رد ابن دشومة فيما معناه ان الدنيا والآخرة
كل حاجة لوحدها
وانتا راجل متجبر ولولا كدا كان ضاع حكمك
والفلوس دى مش هتفرق ..
م الآخر نظام انتا مهما عملت مفيش فايدة
الفلوس واقعة ف الأرض !!
ابن طولون طبعا اتنكد جدا 
وبعد الأستشارة الزفت دى بكام يوم
شاف منام لواحد من الزهاد اللى كان يعرفهم
جاله ف الحلم
وقاله اصرف الدنانير دى
وربنا هيعوضك باحسن منها




ابن طولون صحى منشرح
وبعت لابن دشومة
وقاله حلمت بكذا كذا
فالسقيل قاله
والله يا مولانا انتا عندك واحد ف الحلم
وواحد ف الواقع اعمل ما بدالك !
ابن طولون قاله خلاص .. هبنى مسجد




وفعلا صرف المبلغ كله ف الحكاية دى
وبعد فترة معدى ف مطرح ف الصحراء
اتكعبل ف خبيئة كنز مدفون يعنى !!
الناس وقتها لما الخبر انتشر قدروا تمن محتوياته
من دهب وخلافه .. بمليون دينار
ورقم مرعب طبعا ومبالغ فيه
بس المهم انه بيه كمل طولون بنا مسجده




وسبحان الله .. جامع ابن طولون دا
يعتبر تانى أقدم جامع ف القاهرة ومصر كلها
بعد جامع عمرو
وهوه الوحيد اللى فضل من أثار الدولة الطولونية
بعد ما دخل جيش العباسيين القطائع 
عشان يقضى على نفوذ احفاد ابن طولون



واللطيف بقى ان ابن دشومة الكئيب
الواقف ف الشر مش الخير دا
بعد شوية الناس هتشتكيه لابن طولون
اللى ما صدق وهيروح حابسه
فيموت ف الحبس
:))
#تستاهل



وتعليقى ع القصة دى
انا مبسوطة طبعااا
انه مسمعش كلام ابن دشومة
يعنى الجامع بقاله فوق الـ 1100 سنة عايش
والناس بتدخله
وكل ركعة طولون بياخد ثوابها 
#ان_شاء_الله




زائد انه خبيئة مش خبيئة الجامع دا فلوسه حلال
وربنا مبارك فيه فعلا
والا مكنش قعد لحد النهاردة
وصمد امام الزمن والغزاة وايامه السودة 
وما أكترها ف مصر 



ومش بس كدا .. دا بسببه
الجامع يعنى
طولون بقى مخّلد ويستعمل يومياااا
وبيدخل جيوب كل المصريين يوميا
بواسطة الــ ....




دى :))) #إعمل_الخير_مش_هتندم_ابدا





القصة رقم (6)




غنيت لقطر الندى
من كتر ما غنيت
شقت جفون اللي نام
رمت صبية وغلام
املوا علينا الصرخة
املوا علينا الكلام 
املوا علينا الفرحة
قليلة يوم الانتقام
قليل ما قلنا يا ريت
بكيت مسحت دموعي
بامسح دموعي بكيت
املوا علينا البيت #فؤاد_حداد




ومن لبنان من بلد صغننة قرب بيروت اسمها .. عبية
هييجى سليم أمين حداد
بعد ما تخرج من جامعة ف بيروت
وييجى على مصر بعد الحرب العالمية الاولى
ويتعين مدرس ف كلية التجارة بالجامعة المصرية
وف نفس الوقت يشتغل ف بنك من البنوك الكبيرة
ويبقولوا ان سليم
هيكون هوه العضو رقم (1) ف نقابة التجاريين




وركزوا معايا بقى
عشان هقول كلام مهم جداااااا دلوقتى
سليم كان مسيحى بروتستانتى
فهيتجوز واحدة سورية .. كاثوليكية
ويخلف 3 ولاد منها
هيخلف .. عادل وتوفيق .. وفؤاد ... حداد
اللى اتولد سنة 1927
واتأخر ف النطق 3 سنين
بس او ما نطق بقى لبلب ومعرفوش بعدها يسكتوه
:))




الجميل بقى أن الأب سليم حداد
كان بيعشق اللغة العربية وقراية الادب والشعر
وكان بيحب يسمع القرآن
وكان بيخلى ولاده يسمعوه عشان يتقنوا العربية !
ويمكن دا اللى خلى فؤاد
بعدين ف غمرة التمرد على كل شىء وظيفة وغيره
يقرر كمان يتمرد على تابوه الدين
ويبقى مسلم ويسيب المسيحية



وتخيلوا ازاى ان اللى عمل المسحراتى
اللى حببنا ف رمضان والصيام من واحنا عيال
يبقى مصرى لبنانى سورى
مسلم مسيحى بروتستانت كاتوليك ! #فؤاد_حداد



أنا الأديب وأبو الأدبا اسمي بإذن الله خالد
وشعري مفرود الرقبة زي الألف ورقم واحد 


وتعليقى ايه ع القصة دى .. ؟
ولا حاجة مصر فعلا بلد الأضداد
وست كل الجنان والجمال اللى ف الدنيا
وفؤاد حداد الجميل خير مثال
#اه_والله


القصة رقم (7)



دى بقى من ملفات المخنبرات الناصرية اللوذعية
بتاعت العسكر الحلوين
وازاى لما بيمسكوا الحكم بيبقوا عساسيل
القصة على عهدة الراوى الجميل .. فتحى غانم




قالك لما الثورة قامت ع الأكطيااااع وبتاع
احنا لسه هنسمح للأعلام والصحافة تكتب
وتعتيرض احنا نسيطر عليهم
عشان ميبوظوش علينا السبوبة
قوم ايه ؟؟
جم وراحوا مسيطرين على المؤسسات الصحفية الخاصة
خدوها من اصحابها وملاكها
وبقت تبع الدولة
وبعدين ابتدوا يتحكموا بقى 
ويقرفوا ف الناس اللى منهم احسان عبدالقدوس
اللى كان يا عينى متحمس للظبابيط
ورغم انهم اخدوا منه روز اليوسف
وسابوله ديون عليه يسددها هوه مع نفسه 
والراجل سكت وقال فدا البلد 
الا انه هيفضل عنده امل وحلم انهم بيعملوا الصح
عشان ينكذوا البلد وكدا



المهمممم التضييق ع الصحفيين كتر
وبقوا يراقبوهم يا نضرى ف الراحة والجاية
فتحى غانم ..
بتاع زينب والعرش وتلك الأيام وحكاية تو يا عيال
وغيرهم كان وقتها .. رئيس تحرير مجلة صباح الخير 
ومنكش عاجبه طبعا جو اللبش اللى عامله عبناصر
وشايفه قمع للحريات
وانه لا اشتراكية ولا ملوخية دا استبداد رسمى
المهم كان بيشاغب على خفيف كدا





سنة 1960 الكلام دا كان فتحى غانم ف بيته
صحى بدرى على غير عادته
قالك الله النهاردة شمس وحلو اما اروح نادى الجزيرة
اشرب قهوة الصباح هناك
وقام الراجل يا خويا لبس ونزل وراح النادى
وقعد ف ركن ف المتدارى كدا وبيشرب قهوته
بص لقى الجرسون فوق نافوخه بيقوله تلافون لسعادتك .. !




فتحى استغرب قوى .. مين يعرف انى هنا
اذا كنت انا اصلا مكنتش أعرف انى هبقى هنا النهاردة
مهياش عادة وكل الحكاية انه صحى بدرى
وكانت مش مترتبة!
المهم الفضول قتله
وراح يرد يشوف مين اللى متصل بيه دا ؟؟
بيقول ألو
لقاه الاخ منير حافظ مساعد سامى شر
سكرتير جمال عبناصر سخصيااااا



ونعم
المتصل قاله تعالى فورا للرياسة
الريس عامل اجتماع طارىء
طب ولو فيها رزالة عرفتوا منين انى هنا ؟
رد لو عاوزين نوصلك .. هنعرف نوصلك !
#أىىىىى



القصد
راح فتحى الإجتماع لقى زملاء المهنة قاعدين
ولا كأنهم ف سرادق عزا
كان كبار الصحفيين وقتها زى مصطفى امين
وعلى اخوه وفكرى اباظة وغيرهم
وكل واحد على وشه سواد كدا
ولسه بيقول دا أربعين مين يا جماعة
لقوا على صبرى داخل عليهم
وبيقرى قرار بتأميم دور الصحف والمؤسسات
وتعيين رقيب
وكان المنظر بايدن هباب من اوله اهو 




وبعد كام شهر من الواقعة دى
عملوا اجتماع تانى للصحفيين
بس المرة دى كان عبدالناصر شخصيا حاضره
وكان ف قمة الغضب
فتحى غانم بيحكى ان عبناصر قفش عليهم قفشة سودة
وبدأ الهجوم بأن الدولة عملت تأميم للصحف
مش افلاسا منها ولا هيا مزنوقة ف كام عمارة وبتاع
زى ما وصله ف التقارير المخابراتية 
ان الصحفيين الاوغاد بعضهم اتريقأ على تأميم الصحف
وقاله النظام مزنوق ف قرشين وكدا 
:))
#طول_عمرهم_لسانهم_طويل_الصحفيين_الويحشين_دولم




وقعد يرزع كلام من نوعية
ان النظام قوى وثابت الاركان ولا توجد قوة تقدر تهزه
وكانوا عاوزين يناقشوه .. فرفض
وقال انا ببلغكوا بالمطلوب منكم ازاء الخطر اللى بيواجهنا
وانكم لازم تكتبوا كذا ومتكتبوش كذا
وترجعولنا ف نشر أى خبر .. الخ الخ


احد الحاضرين غلط يا كبدى
وقال كدا حضرتك خطر على فن الصحافة
وشوية شوية الصحف هتتحول الى نشرات غير مقروءة
والناس هتبطل تشترى جرايد !
عبدالناصر انفعل جداااا
وراح مزعق وقال دى صحافة بتبتاع بالدعارة !





وبعدين راح ملقح كلام على فتحى غانم
اللى كان ريئس تحرير صباخ الخير زى ما قولنا
وقال المجلة دى مثلااا
بتنشر كاريكاتير لواحد اسمه حجازى !





وآل ايه .. حجازى بيطلع الستات بمقاييس غلط
نظام صدرهم عامل ازاى والارداف ازاى
وزى هيفاء وهبى وغادة عبرازق وكدا ميصحش ! 
وانه ... حجازى يعنى
اوقات بيطلع الست مخبية عشيق تحت السرير
او ف الدولاب
ففتحى لسه بيقوله دا فن السخرية وعادى
عبناصر زعق قائلا ف لهجة خطبية واضحة:
مصر ليست النساء المطلقات ف نادى الجزيرة
مصر هى كفر البطيخ




بسسسسسس والكلمة لزقت يا مؤمن
والحاضرين الاجتماع خرجوا رددوهها
وبقت تريقة من ناس
وناس تانية خدتها بجد طبعااااا
المنافقين عملوا تحقيقات صحفية كتييير 
وسافروا كفر البطيخ دى
وسعد الدين وهبة عمل مسرحية بالاسم دا
اما المعارضين بقى
فنزلوا تريقة للصبح وطلعت نكت وقفشات زى دلوقتى




وكالعادة .. التطبيل صوته كان أعلى
وفتحى غانم كتب مقالة بعدها بيقول فيها
"ان الثورة التى لا تغير أسلوبها ف الحكم
ولا تحول قواها الثائرة الى تقاليد ثابتة
تصبح طغيانا مكروها من الجميع ... "
وهذا ما حدث بعدين


وتعليقى ع الواقعة دى .. مفيش غير
انه ما اشبه الليلة بالبارحة .. #للأسف




ثانيا انا عمرى ما دخلت نادى الجزيرة ولا أعرفه
بس انا من المطلقات حضرتك
مالهم بقى المطلقات ؟؟
ومالهم مطلقات نادى الجزيرة
وميبقوش مصر كلها ماشى موافقة 
بس ميبقوش جزء منها ليه
عبناصر كان منفسن قوى قوى قوى بصراحة !!


ثالثا ودا اهم حاجة .. 

انتا تغلط ف الصحافة ونادى الجزيرة والمطلقات ماشى 
لكن تغلط ف حجازى الفنان 
اهو دا اللى لا يغتفر ابداااااااا
حجازى ينغلط ف فنه 
وحريمه اللى بيرسمهم 
دول البصة عليهم ف أى رسماية
يعمل اكتفاء أمن غذائى ذاتى يا مفترى !!



ورابعا
ليه السلطة دايما عندها مشكلة مع السخرية
الله يرحمه صلاح جاهين 
وانا الأراجوز ... خفتوا منى ليه فعلا ... ؟!!





القصة رقم (8)





دى من أيام الروقان والناس الحلوة
اللى مبتزعلش نفسها دى وتتعكنن
سياسة ما سياسة دماغى ومزاجى واياكش تولع .. !





الشاب .. محمد يونس القاضى
صاحب نشيد بلادى بلادى يا ولاد
كان شاعر اغانى معتبر
وشيطان الشعر جاله ف يوم بغنوة ..
الناس الحلوة الخبيرة ف المزيكا
تبقى تصلحى المعلومة دى
بس يقال ان الطقطوقة ..
أصلها لغوية هيا القطقوطة
يعنى الغنوة الشقية المكتوبة بخفة
واتحرفت من قطقوطة .. لـ طقطوقة





المهم يونس كتب كلمات طقطوقة

وراح  بيها على عوامة سلطانة الطرب والمغنى وقتها
منيرة المهدية 
وقالها ... يا سلطانة معايا كلمات عاوز اسمعهالك
فمنيرة اتعنطزت
وقالتله مش دلوقتى يا يونس
بعدين بعدين وراحت مزحلقاه






لما لقاها مش مهتمة

راح طالع على عوامة الست .. نعيمة المصرية
كانت مطربة الباشوات والبكوات والعمد والأعيان 
وقال برضو ... 
يا ست نعيمة معايا طقطوقة تستاهل صوتك
الست روخرا اتبغددت
وقالتله بعدين بعدين مش دلوقتى يا يونس
راح خارج من عندها
يزهق وكدا ؟
ابضنننننن





هيطلع على شارع عماد الدين 

شارع المغنى والطرب والفن 
ويقعد على قهوة بيقعد فيها
سى الأستاذ عبد اللطيف افندى البنا
وقعد منتظره .. ف دخلته واهلا وازيك وسلامات
يونس القاضى قاله الجملة اياها
عندى طقطوقة تستاهل تغنيها يا سى عبلطيف
تحب تسمع ؟؟؟





البنا قاله سمعنى كدا اما نشوف

وفعلا بدأ القاضى يقول :
أرخى الستارة اللى ف ريحنا
لحسن جيرانك تجرحنا 
يا فرحانين يامبسوطين
يا مفرفشين يامزقططين
بالقوى يا احنا
وكمل بقية الكلام
عبد اللطيف انشكح وقاله هغنيها طبعا
وانتشرت الغنوة كالنار ف الهشيم






وسمعت عنها منيرة المهدية .. اتجننت

وقالت لازم أغنيها دى بتاعتى !
وراحت لشركة بيضافون
ودخلت ع الخواجة صاحبها وقالتله لازم اسجلها فورااااا
يا اما مش هسجلك أى اسطوانات تانى !
الراجل اتخض وقالها طيب حاضر اللى تشوفه خبيبى
وطبعا مقلهاش
ان قبلها بساعة واحدة بس 
كانت نعيمة المصرية سابقها
وف مكتبه وبتتفق عشان تسجل الغنوة دى بصوتها
وبرضو قالت انها بتاعتها
الخواجة صاحب الشركة
قال زيادة الخير خيرين



وكانت منتشرة الحكاية ى

ان اللى يصحى الصبح بدرى قبل حد تانى يغنى
يبقى صاحب الغنوة
المهمممم سجلت نعيمة ومنيرة الغنوة
وشوية وسمع عبلطيف البنا بالحكاية دى
فراح لصاحب بيضافون
اللى قاله اسجلك الغنوة طبعا مفيش مانع
واتسلطن سى عبلطيف البنا
وطلعت غنوة الستارة ف هذا الوقت
بـ3 اسطوانات بـ3 اصوات
وبقت غنوة الأفراح الاولى
وكسرت الدنيا وفشر سوسو طرب
مطربة المليون شريط
وصاحب الشركة يبيع
ويكسب يبيع ويكسب




وانا تعليقى ع القصة دى بعد ما تسمعوا الغنوة

هنا
بصوت الست منيرة المهدية
ام بحة مضروبة بسكينة ف زورها دى 
احب اقول ان كلمات الاغانى زمان
كانت حاجة هجايص وفضايح
وخوض ف الأعراض رسمى فهمى نظمى
وغنوة الستارة دى خير مثال
ومعلش عشان انا ضميرى وحش بصراحة 
وعاوزة أفهم
الناس دى كانت بتعمل ايه ورا الستارة
لدرجة الخوف ان حد يجرحهم
والهانم بتطلب انهم يقوموا يغيروا قعدتهم كمان #استغفر_الله_العظيييم




ثم ايه حالة الابتهاج الرهيبة اللى الناس زمان
كانت فيها دى
يعنى
يا فرحانين
يا مبسوطين
يا مزقططين
يا مفرفشين
وبالقوى كمان #نعممممم
ايه يعنى بيغيظونا مثلااا 





وجايين يقولوا على ايامينا

هيا اللى قليلة الادب آل ...
طاه دى الغنوة دى لوحدها
عاوزة بوليس الآداب يحاصر المسرح
وهيا بتتغنى أشاسا .. !!!



وبس كدا خلصنا
توتة توتة
نشوفكو الحلقة الجاية
:)


-----------------------------------------



hasan @tantalos2 
١- ذكر فتحي غانم هذه الحكاية
في مجموعة مقالات (١٤ مقالة) نشرها سنة ١٩٩٥
تحت عنوان معركة بين الدولة والمثقفين
ونُشرت مؤخرا



إحـــكى يا شهـــرزاد @ro7albmama2
تمااااام دا الكتاب اللى بحكى منه فعلا :))


سها المنياوي @morgana00m 
اول مرة اختلف معاكي ياشهر
مش في المعلومات لكن في انطباعك انا مع الحرية
جدا طبعا لكن عبدالناصر كان عنده مشروع عايز ينفذه
تختلفي وتتفقي معاه هو عايو ينفذ مشروعه
عارفه زي اللي بيقفل الاوضة علي نفسه
عشان يذاكر او ينظف الاوضه وماشابه


Ahmed Rageh @Ahmed_Rageh101 
 هم كلهم ساكنين في عوامات


الشيخ سيد درويش @SayedDarwish01 
يونس القاضي كان شاعر مسف
ونشيد بلادي ليس من كلماته
واثبتنا بالوثائق انه نسب كثير من اعمال سيد درويش لنفسه!
وقد فضحه بيرم وبديع




طز BIG @Fatoma999 
 عمل زى جورج سيدهم فى فيلم غريب فى بيتى
لما باع الشقة ب3 عقود ل3 افراد... اشوفكم امس :)



مِـيرْڤَـتْ @frikeko 
التايم لاين فيه اطفال بقي -_-


amr salem @amrosalim2001 
هههههههههههههههههههههههههههههههههههههههه
الناس ما بتسبش حد في حالها يا فاتيما
يعني كانو بيلعبو سلطح عادي مفيهاش حاجة



مِـيرْڤَـتْ @frikeko 
ماكنش عندهم حرب ع الارهاب يا ستي :/




الهي تنشك في معاميعك @loulouibrahim 
في حاجة كمان بيعملوها للعروسة
انا شخصيا عملتها علشان ما ازعلش امي
وهي انهم بيشبكوا في اللفستان شبكة صياد قد الكف كده
ولازم الشبكة تكون شبكة صياد ابن صياد اصلي
والفكرة فيها انها تصطاد كل نظرة عين وحشة
وكل الكلام الوحش
بس كده :)




Middle of Nowhere... @WIZARD_Mohamed 
 و ده العقدة ولا العريس...!!!




amr salem @amrosalim2001 
 انا عاوز من دي يا حزومبل انا عاوز من دي
عاوزين نستنسخ منها 10مليون ولا حاجة الست دي
دي فله




m. hasan @tantalos2 
 الحقيقة الحكيم كتب كتير بعد
وفاة اسماعيل وزوجته كتابات يبدي فيها ندما شديدا
على معاملته الجافة جدا لمراته
ويتمني لو لم يفعل




Ahmed Rageh @Ahmed_Rageh101 
 من الاخر قاله انت كده كده رايح في داهي
 روح اسكر بالفلوس احسن



Ahmed Rageh @Ahmed_Rageh101 
 ممشيين وراه مخبر ده فكيك اوي



Middle of Nowhere... @WIZARD_Mohamed 
 الكبير مبيقولش انا كبير
الكبير تصرفاته هي الي بتخليه كبير...
والكلام ده معناه ان النظام ساعتها كان في اضعف حالاته..!!



مِـيرْڤَـتْ @frikeko 
 اسمعيها يا حُب :) 
https://t.co/ZG5LEDxMbJ




إحـــكى يا شهـــرزاد @ro7albmama2 
@IBNNASA جوزها برضو يا مفترى ؟؟؟ :)))
Details 15 : 59




إحـــكى يا شهـــرزاد @ro7albmama2 
 ف النص الأصلى
لحسن جيرانك تجرحنا ولا حد شافنى 
دى رايحاله بيته يا أستاذ


ليست هناك تعليقات:

إرسال تعليق

Related Posts Plugin for WordPress, Blogger...
"حقوق الملكية والملوخية والمهلبية ... الخ
محفوظة للست شهرزاد وإياك حد يسرقها ويحاول يزعلها آغجر .. مفهوم ؟ "