الأحد، 20 أبريل، 2014

مصــر فى صـــور






حدوتة النهاردة بالصور 
متاخدة م النت طبعا والمواقع 
فـ حبة اخدتهم وحبة عملتهم على قدى كدا 
 وف النهاية هباصيلكم لينك حلو لصور قديمة 
ومميز جدا


 بس ملحوظة الأول 
أى صورة صغننة دوس عليها 
عشان تشوفها بوضوح ... 



 نبدأ بفريق الموزز بقى 
 جميلات السينما من وجهة نظرى السخصية 
ولكم كل الإعتراض طبعا 
بس أى أعتراضات هتنضربوا
 دا ميمنعشى ويتماشى مع الديموقراطية وحقوق الانسان
#عاتى





 أمينة رزق .. 
عذراء الربيع والخريف والفصول الأربعة
 اتخطبت كام مرة 
وانكتب كتابها مرة 
واتطلقت بسرعة شغفا بالفن والحرية

 



القمراية رغم تقل دمها اللى يلطش .. 
زوزو شكيب 
بحب المكياج بتاع الفترة دى وملامح الوش دا قوى انا 
كانت غرام نجيب الريحانى لفترة من الوقت




ست الستات وخفة الدم واللطافة والخفافة 

والجمال والشياكة والألاجة وكل حاجة 
لما تتجمع ف بنى أدمة تبقى 
ليلى مراد 








الست دى كنت بخاف منها وانا صغيرة معرفش ليه ؟؟ 
يمكن عشان كانت بتزعل محمد فوزى 
ف الزوجة السابعة ؟؟ #يمكن 
مارى كوينى





خالتى حموقة ماتت محروقة 
ومارلين مونرو بتاعتنا الغزالون .. يهبلن 
والجمال الشاهق اللى بيموت بدرى بمأساة .. 
كاميليا

 
وسعّ يا بنى لجوز القمامير ف لقطة واحدة .. 
لحسن الشاشة عتنفجررر اهى 
لا تقولى أخوان 
ولا دولة عميكة 
غشدى اباظة  وهند غوستم يا اوحى يا اوحى 
ومشهد من فيلم "لا أنام "

وما دام جبنا سيرة مارلين .. 
يا لهوى ع النظرة بتاعتها دى
 اتهببت عملت ايه يا منيل ؟؟؟




طل هل تعلم ان وش الست دى 
يعتبر مثالى بمقاييس بتوع الجمال
 يعنى هيا حلوة الحلاوة اللى على أصلها حرفيا 
مديحة كامل






لأصحاب القلوب الضعيفة ميبصوش ع الصورة دى
حرصا على صحتهم 
وانا حذررررت 
إنها ...... ميرفت أمين






بنت الملك فؤاد واخت الملك فاروق 
 والاميرة اللى بقت بعد جوازها إمبراطورة إيران ..
 صاحبة الجمال الحزين
 الاميرة فوزية



خلاص كدا انبسطنا 

وهيصنا 
واتفرجنا ع الموزز 
وعاكسناهم واتحسرنا الخ الخ 
ندخل بقى على الصور اللى تزعل 
مصر .. قبل .. 
وبعد نبتدى من اسكندرية




الأسكندرانية يحضرونا بقى 

يقال ان المشهد دا على ناصية شارع فؤاد .. 
مع شارع شريف



لقطة تانية برضو من نفس المطرح 

 ناصية شارع فؤاد - اسكندرية 






المكان الذى كان فيه 
مبنى "البورصة" بإسكندرية
اللى جمعت ف عزها تجار من كل حدب وصوب
وياما اغتنى فيها ناس وفلّس ناس 







تمثال محمد على ... اسكندرية .. زمان ودلوقتى
اتبهدلت معانا قوى يا ابو ابراهيم والله .. معلش 



النصب التذكارى دا 

كان معمول عشان تمثال اسماعيل باشا
 وكان هدية من الجالية الأيطالية ف اسكندرية 
ثم أتلطش بعد الثورة 
 وشالوا تمثال اسماعيل رموه ف المخازن 
وطرمخوا عليه وكانوا عاوزين يطلعوه ايام السادات 
عشان يسيحوه ويعملوه عملات 
فالأيطاليين اعترضوا 
ومنعوا الموضوع الحمدلله قبل ما يتم 







عامود السوارى اللى يقال ان اسكندرية 
كان فيها منه ييجى 400 عامود مختلف ف الطول والحجم
وكلهم راحوا ف الوبا
#تخيلوا!!
وديتوا ال399 عامود التانيين فين 
يا غجرررررررررر !! 





محطة الرمل .. اسكندرية الله يخربيت كدا !





محطة القطر ... اسكندرية





مسجد العطارين ... اسكندرية





قصاد المتحف المصرى ...

 آه يا براح عمال بيضيق 
ويزداد قبحا





شارع محمد فريد ... وسط البلد






عمارة دوس - شارع فؤاد - وسط البلد






ناصية شارع شريف مع قصر النيل
 البورصة الخديوية 
البورصة المصرية 
ثم أصبح البنك المركزى





ناصية شارع شريف مع قصر النيل برضو .. 
الناحية التانية عمارة الإيموبيليا




ناصية شارع شريف مع شارع قصر النيل 
من كورنر تالت 
فاضل كورنر الشبراويشى 
عشان المربع يكمل





ميدان الاوبرا ...
تمثال ابراهيم باشا بيشاور 
والكتب بتقول انه بيشاور لإتجاه الشام 
عشان محدش يبقى يتوه تانى بقى





فندق الكونتينتال ... 

كان بينزل فيه الملوك وكبار الشخصيات .. 
شوفوا حاله بقى ازاى !
ممر الكونتينتال اللى ف شارع عدلى 
متسمى على اسمه يا عيال 
لأنه ف الخلف منه تماما 
غالبا كان المكان اللى بيطلع من الموظفين والخدم وكدا





عمر أفندى عبعزيززززززز 
 ولما خده الراجل الخليجى دهنوه وبتاع 
والله لو كانوا لبسوه قميص نوم كان يبقى أشيك




الاوبرا الخديوية بعد ما أهملوها وحرقوها .. 
قالوا يبنوا مطرحها جراج
 فعلا صحيح كل واحد بيعمل بمقامه



محل الأمريكين ... 
ناصية شارع فؤاد مع شارع عماد الدين
 ييجوا اللى خططوا يشوفوا المطرح دا دلوقتى
هيولعوا ف روحهم والله





شارع عماد الدين 
على فكرة الشارع دا من القلائل
 اللى احتفظوا بهويتهم المعمارية ف وسط البلد
 حتى المحلات شكلها قديم






العمارات الخديوية - شارع عماد الدين 
 بجد المصورين لازم يلحقوا يصوروا معالم الشارع
 قبل ما تنطمس 
 الفرجة فيه متعة 
لسه محتفظ بعبق التاريخ نوعا ما 
وهتلاقوا يفط بعض المحلات لسه زى ما هيا 
 اصحابها مغيروهاش 







عمارة تيرنج ... ميدان العتبة

 المكان بقى سويقة بالمعنى الحرفى
 واللى يدخله فيه بليل تحديدا 
لو عرف يخرج يبقى عمل معجزة





دار القضاء العالى ..
 شارع فؤاد دا بقى مش سويقة .. دا كاراخانة





ميدان طلعت حرب ... ميدان سليمان سابقا .. وسط البلد
  



تمثال طلعت باشا حرب
اللى اتنصب ف مركز الميدان 
مكان تمثال سليمان باشا الفرنساوى ..
 وبالتالى أتغير اسم الميدان





ميدان مصطفى كامل .. 

سوارس سابقا .. 
البدرون سابق سابقا




ميدان مصطفى كامل .. 
قبل التمثال
وبعده 





ناصية شارع عدلى ومحمد فريد
 وعلى بعد خطوات من المعبد اليهودى 
كان فندق 
ودلوقتى دا حاله 
 :((




سينما ديانا .. 

ف احد الشوارع المتفرعة من شارع عماد الدين





مدخل مسرح وسينما راديو ... 
شارع طلعت حرب
 اللى بيصور فيه باسم يوسف برنامجه





 سبيل أم محمد على (الصغير) .. ميدان رمسيس 
قصاد جامع الفتح يا عيال 
 الباعة الجائلين بيعلقوا عليه اللانجيرى دلوقتى



قصر السكاكينى ...






فندق شيبرد .. 
وشيبرد القديم اللى اتبنى مكانه فندق سميراميس


فندق شيبرد



بيت ديليسبس - اسماعيلية




جامعة القاهرة
ومعلش لما شفت الصورة القديمة .. 
فعلا مقدرتش امسك نفسى إنى أقارنها بما إستجد



واخيرا .. شوية بشر اتظلموا ف حياتهم
 واتنفوا واتبهدلوا ف آخرها ..
 لكن التاريخ أنصفهم
 ولو بعد حين




محمد نجيب .. 
اول رئيس لجمهورية مصر العربية
اتحبس حبسة الكلاب 
ومسحوا اسمه بأستيكة
وبهدلوا اسرته 
ومات من غير ما يتردله حقه



الفريق سعد الشاذلى ... 
واحد من أصحاب نصر اكتوبر الحقيقيين 
واللى ظلموا ف عهدين 
 وربنا انصفه ف يوم موته بخلع مبارك





الزعيم أحمد عرابى 
ويا لهوى ع البصة اللى بيبصهالنا دى 
هل بت ما السبب انه عاوز ينط ف كرشنا 
عشان سخناه ع الثورة 
ولبسها لوحده ! 
:) 




واخيرا ... حليب قلبى وروحى الخديوى اسماعيل 
 واللى بسبب أسود كوبرى قصر النيل بتاعه 
بقى كل واحد اسمه اسماعيل 
يتدلع بأبو السباع
 

أول صورتين وهوه ف الحكم ... 

التالتة بعد ما سافر للمنفى علطول .. 
والتالتة قبل موته بشوية بسيطة 
واتوفى عن عمر 65 سنة 
واللى يشوفه يقول 95 سنة ع الأقل 
كان نفسه يموت ف مصر 
ومقدرش
 :(
اسماعيل كان برج الجدى يا ولاد 
ودا برج الزعماء والرؤساء
ويكفى اقولكم ان عبدالناصر كان جدى 
والسادات كان جدى 
عشان نفهم ان دى عالم مثابرة 
وبتاعت شغل
ولما بتركز ف حاجة بتكملها ... 



واخيرا ..  الصفحة دى فيها كمية صور قديمة روعة فعلا 
ابقوا انكشوا فيها براحتكم 
عتنبسطوا 
وإدعوا لصاحبها 



وخلاص كدا خلصنا ...

#تصبحوا_على_ألف_خير


----------------------------

 

Mohammad Diab @som3amasrawy 
السبعينات و ما ادراك ما السبعينات



™الدبدوب ® @mazforever 
الفيلم ده لوحده فيه ثلث تراث السينما المصرية



طز BIG @Fatoma999 
مش بتوع الجمال بس اللى شايفيين كده 
,هناك اجماع شعبى
 :)




طز BIG @Fatoma999
اذا كانوا الناس فى الزمنيين اتغيروا شكلا وثقافةً وخلقاً..
المبانى مش هتتغير!!!



Ahmed Rageh @Ahmed_Rageh101 
 انت بتغرغري بينا يا فاتيما 
:)

 Walid @welsalam
الست دي لازم تستنسخ



طز BIG @Fatoma999
مش فى حاجات كده بيسموها قصة صعود 
,قصة كفاح.... اللى بتعرضيه ده قصص انهيار !!!



sally soliman @sasosall
وردموا #الفسطاط
 https://t.co/wkHu15truP

هناك 3 تعليقات:

  1. الله عليكي ياشهر زاد
    ياللي حكاياتك حكلها حقيقية
    من الواقع والتاريخ اصلية
    شكرا للمجهود الروعة
    وبانتظار المزيد والف الف الف شكر جهد خارق للعادة

    ردحذف
  2. الله عليكي ياشهر زاد
    ياللي حكاياتك حكلها حقيقية
    من الواقع والتاريخ اصلية
    شكرا للمجهود الروعة
    وبانتظار المزيد والف الف الف شكر جهد خارق للعادة

    ردحذف
  3. لم أجد مكان للتعليق في صفحة حديقة الازبكية، لهذا سأعلق هنا. الناس كانت بتعمل بيبي في الحديقة من زمان، أنا كان عمري 5 سنين في 1961 وأتذكر كنا ندخل الحديقة من طرف ونخرج من الطرف الاخر ورائحة البيبي من العيار الثقيل والخفيف تحت الشجر في كل مكان! الغريب ان الشغالة كانت تأخذني للازبكية من اجل الترفيه وشم الهواء حيث كنا نسكن قريب من ميدان الاوبرا.

    ردحذف

Related Posts Plugin for WordPress, Blogger...
"حقوق الملكية والملوخية والمهلبية ... الخ
محفوظة للست شهرزاد وإياك حد يسرقها ويحاول يزعلها آغجر .. مفهوم ؟ "