الأحد، 6 أبريل 2014

حكــايات مصــرية ... 9





نبتدى ؟


القصة رقم (1)




طيب نبتدى بالغتيت السقيل اللى انا مبحبووووش
 وشمتانة ف اللى خلفوه .. #الملك أحمد فؤاد الاول
اللى مسك حكم البلاد من 1917 - 1936
لأسباب كثيرة لا داعى لذكرها حاليا
الاخ كان شخصية متغطرسة بتحب روحها
 وحكينا ازاى لما جت شركة قناة السويس
تبنى مساكن لموظفيها ع الشط التانى
من بورسعيد فراحت متمحلسة للملك
وسمتها بور فؤاد
ومش بس كدا دول بعتوا لفرنسا
لمثال شاطر يعملهم تمثال للمسخوط فؤاد
عشان يتحط ف مدخل المدينة



وبعدين انتوا عارفين الفنانين والغزالة بتاعتهم
التمثال على ما خلص كنا بقينا سنة 1951
لما ابتدت الجرايد تعلن عنه 
وانه جلالة الملك فاروق هيروح بنفسه
يحضر حفل تنصيب التمثال وكدا قوم ايه ؟
حصلت الأزمات السياسية المعروفة
والعمليات الفدائية اشتعلت
 وحصل اضرابات من عمال الهيئة تضامنا
وشوية وحريق القاهرة




وطبعا البلد كلها ولعت
وتمثال ايه ونيلة ايه اللى فاروق هيروح يحضر حفلته دا
والموضوع إتأجل
وقالوا نخليها شوية 
نخليها شوية دى حضرتك مبقتش شوية 
دى بقت ييجى 50 شوية ولا حاجة ... 



عشان هيا سنة وهتقوم ثورة الضباط
 وطبعا أى ذكر لأى فرد من الاسرة المالكة
او تمثاله او خياله او اول حرف من اسمه حتى
كان مرفوض ومكروه شرعااااا

فالتمثال اتركن ف مخازن الشركة اللى بعد شوية
بعد التأميم بقت الهيئة ..
وفضل التمثال بتاع فؤاد ف المخازن
 يلهو مع الفئران والعناكب زمن



وبس محدش جاب سيرة التمثال ولا أفتكره
لحد ما احد الموظفين وكان عاشق للتاريخ والفن
شافه صدفة فرفع الموضوع لأحد نواب مجلس الشعب
اللى اتقدم لمجلس المدينة 
والمحافظ بطلب ان التمثال يخرج من المخزن
ويتنصب ف المكان اللى كان متحددله ف مدخل بؤرفؤاد
والكلام دا كان سنة 2002
وبعد نقاشات تمت الموافقة على الطلب فعلا






وخرجوا التمثال الحزين من التكهين
بعد نصف قرن من الركنة
وعملوله عمرة شاملة وترميم اتكلف حوالى 20 ألف جنيه 
وحطوه ف مدخل بورفؤاد فعلا
 :)



وهما عشرة تيام يا مؤمن والتمثال اتشال من مطرحه
ورجع المخازن تانى !
ليه يا جماعة كدا ؟
قالوا البدرى فرغلى 
وكان عضو مجلس شعب وقتها عمل هوليلة
قالك انتوا هترجعونا للملكية تانى
وعلى الحظ والصدف
 التمثال اتحط ف دخلة الاحتفال بذكرى ثورة يوليو
قوم الموضوع عمل قفلة 
وكان المعاد مش اللى هيوه يعنى 
ومعلش بقى يا فوفو اصلها مسألة  قِرف وأعتاب




وبس المحافظ وقتها قال انتوا هتصدعونى ليه .. شيلوه
راحوا شايلينه مرجعينه مكانه القديم
وسط الفيران والعناكب والتعابين 
ومن ساعتها غطس ولا قبّش



وموقع فاروق مصر اللى فيه المقالة
صاحبه بيستنكر جدا ما حدث
وازاى جزء من تاريخ مصر يضيع
 وأطلعوا بالتمثال يا غجر ! 


وخلاص خلصنا كدا اعلق بقى





1) مش دا التمثال الوحيد لاحمد فؤاد ..
فيه كمان واحد تانى
ومش عارفة الاقى مصدر يقول فين مكانه
باينه راح ف الوبا مع هنادى 



2) كله سلف ودين يا فؤش
عشان بسلامته الملك لما اتعمل تمثال مصطفى كامل
وقالوه ننصبه ف ميدان
فؤاد قال مفيش تماثيل تتحط لأى حد الا من عيلتى 
ف ميادين الكاهررررة 
ماهى كانت عزبة ابوه وجده اصلها 



قوم تلف الأيام وكما تدين تدان
 وتمثال مصطفى كامل يتحط ف قلب القاهرة
 وانتا لأ
وتمثال محمد على يتحط ف اسكندرية ويستنى
 وانتا لأ
وتمثال ابراهيم باشا يتقام ف ميدان الاوبرا ويستنى 
وانتا لأ 
وحتى تمثال الخديوى اسماعيل 
اللى اتشال من مكانه واتخزن لزمن 
 رجع اتحط ف مكان تانى ف اسكندرية 
وانتا لأ برضو  
#كُبة
القصد 
من غتت ف نصب تماثيل لغيره ..
اتشال تمثاله خالص مالص بالص 



3) ودى أهم .. يا ريت حكام مصر تحاول على قد ما تقدر
تنضّف نفسيتها بقى عشان ربنا يباركلها ف صحتها
وعافيتها وسمعتها وكمااااان 
.. #تماثيلها





القصة رقم (2)




عن سبب المثل ..
بيقولوا زماااان ولحد وقت مش بعيد
وهتلاقوه اكتر ف الصعيد
والحتت اللى لسه محافظة ع التقاليد لما حد بيموتله ميت
المفروض يعمل الإجراءات المعتادة
وبعد ما يروحوا يدفنوه ويرجعوا وياخدوا العزا
يقعدوا بقى مع نفسيهم كدا يعيطوا براحتهم 





لااااا زمان مبيحصلش الكلام دا
دول كانوا بيعملوا زفة ف الطريق للمدافن بس سوكيتى يعنى
انما ليها نظام وقواعد 
وحد ف اول الموكب 
وحد ف آخره
ومنشدين طول السكة ..
وسقايين بيتأجروا عشان المشيعين تشرب لما تعطش
ومبخراتى وطقوس كدا
والرحالة بيحكوا ازاى وانتا ماشى ف شوارع القاهرة
ان ممكن تلاقى زفة عروسة فجأة
ف سكتها تصادف موكب جنازة ..
فاللى بيرقصوا ويغنوا يسكتوا احتراما للميت
ويستنوه لما يعدى
وبعدين يرجعوا يهيصوا تانى
 O.o



المشكلة بقى مش ف الموكب وتكاليفه ..
المأساة الحقيقية بتحصل بعد دفن الميت
والرجوع للبيت
ساعتها بيكون لزاما على اهله اقامة الولايم والسرادقات
عشان الناس اللى جاية تعزى دى تاكل وتنبسط وتحلّى
وقول يوم اتنين تلاتة .. مجراش حاجة
 اهو يتقضوا .. 
لااااااااا 
لا يا بابا لااااااااااا
الفيلم دا بيستمر لحد الاربعين
و5 خمسان كل خميس ينطح خميس
والموائد تمد والفلوس تنصرف
 لحد ما اهل الميت يقولوا جاااااااى
ومن هنا ظهر المثل الشائع بتاع
 "موت وخراب ديار "





وتعليقى مش هيبقى كتير قوى غير بس
انى لو كنت عايشة ف الزمن دا وماتلى حد
 ببساطة 
كنت هتبرى منه
#ايه_ياختشى_العالم_تشى !





القصة رقم (3)




من الدرر اللى كانت بتطلع من نافوخ محمد على باشا
مؤسس ميصر الحديثة حبيبى
وروحى روحى روحى 




والحكاية هتبدأ من الهفة اللى جت لسى محمد
 لما بعت ابنه ابراهيم يناطح بجيوشه الدولة العثمانية
ف محاولة من الباشا للأستقلال بعرش مصر 
وفعلاااا



ابراهيم مش هيكدب ظن ابوه
ويعمل شغل عالى ويروح بعساكره
يتوغل وينتشر ويستمر ويستمر
لحد ما هيقرب على عقر دار العثمانلية 




وقتها كان قائد الأسطول العثمانى
فيه مشاكل بينه وبين السلطان ..
فراح واخد بعضه بالسفن وراح رايح على مصر
 مسلمهم لمحمد على 
:)
 #خيانة_على_ابوه_اهو




الكلام دا كان سنة 1839
بعد ما ابراهيم باشا كان عامل جو ومجال
والدنيا مكهربة بين الطرفين
محمد على طبعا عمل هيصة وافراح بسبب الحركة دى
 #غياظ
وبعدين طبعا شال الأميرالاى أحمد باشا على راسه من فوق
 وقعده ف اسكندرية جنب السفن بتاعته
وخلصنا على كدا
شوية وحصل مصالحة بين المتصارعين #عادى



الباب العالى بعد ما اتراضى مع محمد على وكدا
قعدوا يصروا ألحاحااا
ان الباشا يسلمهم الاميرالاى الخائن
عشان يعملوا معاه الدنيئة 
محمد على رفض
وقعدوا يلحوا وهوه يرفض
يلحوا وهوه يقول تؤتؤ .. اربع سنين بحالهم
وف الآخر ابتدى الباشا يضعف
ويرضخ تحت الضغوط ومبقاش زى الاول 
وايد اوربا تقلت عليه 
قوم اييييه ؟



ايه ؟
هيسلمهم الراجل المخلص الذى اظهر له كل الولاء
وجابله الأسطول العثمانى لحد عنده .. معقول ؟
يعنى يسلمهم الجدع يقتلوه
 بعد ما يقرروه ؟
آه مهو طبعا هيخدوه يفسحوه الاول
قبل ما يقتلوه بتهمة الخيانة العظمى .. منطقى جدا
محمد على الحنين بقى كانله رأى آخر
 وبعت لمحافظ اسكندرية 



المحافظ كان اسمه زكى أفندى اللى بعت لأحمد باشا
دعوة يتفضل عنده ف مكتبه للحديث ف أمر هام
والأميرالاى لبى الدعوة فورا
اذ ان المحافظ لازم عاوزه ف امر هام فعلا 



ودخل الاميرالاى وصباحك شريف يا زكى افندى
يرد التانى بأحلى تحية ويقوله اتفضل يا باشا
وبعدين يبدأ الكلام بالجمل الآتية
 "يا سيدى انتا تعلم ان الدنيا فانية فهى مجرد نقطة عبور
 ونحن جميعا نذعن لإرادة الله .. "
ويسكت
فيفهم احمد باشا علطوووول ويقوله
: "عندك حق .. ولكن ليا طلب .. "




زكى افندى بصله متوجسا وسأله خير ؟
فالاميرالاى يقوله عاوز سجادة صلاة !
فيجابوهاله فعلا والراجل يقوم ويصلى
 واول ما هيقوم من الارض هيسمع كلمة ... قهووووة



ويقعد الأميرالاى وييجى المملوك بفنجان القهوة "المحّوج"
ويقدمه للباشا اللى يقعد يشرب فيه على دفعات
ببطء قدر امكانه ويتجاذب اطراف الحديث !
مع مضيفه زكى افندى اللى بيكلمه عادى
واستمرت المقابلة الودية لحد ما خلصت
والراجل ودع الاميرالاى
ووصله لحد باب الكارتة بتاعته تكريما 
ومن باب الاتيكيت والذوق والأصول أصول برضو



ويروح الجدع على بيته وييجى الخبر تانى يوم
انه مات بالسكتة الدماغية
ويوقف المحافظ ف السرداق تانى يوم ياخد العزا
ف رجل عظيييييم خدم ميصرررر
وواليها محمد على بأخلاص
# آه_يا_ولاد_القديمة



وبس كدا تعليقى بقى



1) محدش يشرب قهوة ابدااااا عند أى محافظ ف مكتبه
 ... ف بيته ممكن
ف النادى ماشى
لكن مكتبه أوعو بتوع البوفيه هناك
 مبيغسلوش الفناجين كويس فبتجيب سكتات دماغية 
انا حذرتكم اهو 




2) محمد على راجل أصيل والنيعمة ...
صبر على الاميرالى دا 4 سنين بحالهم .. بحالهم
شوف انتا السنة فيها كام يوم واضرب ف أربعة .. 
حرام يعنى
عداك العيب آحاج


3) كلمة الغدر ف قاموس السياسة
عاملة كدا زى كلمة أزيك صباح الخير عندنا
احنا الناس العادية
ومفيش حاجة اسمها اخلاق ولا مرؤة ف دنيا السياسة
فيه المصلحة والعرش والوساخة 
وبس



القصة رقم (4)




ودى حاجة فللى كدا
من سجلات المحاكم الشرعية ف اسكندرية
 إبان الحكم العثمانى حضرتك ...
ف قضايا الجواز والطلاق وما شابه





المؤلفة بتاعت الكتاب دا 
عملت دراسة وافية
ودعبست ف سجلات المحاكم وقتها
 واكتشفت مهازلللل حدثت بأسم الشرع والقانون 


بتقولك ياسيدى آل ايه ..
يحكى ان ف العصر العثمانى ف مصر
 كانت بعض الطبقات الغنية او حتى المتدنية ..
بيعملوا جواز المحلل اللى بنشوفه ف الافلام
يعنى الست من دول تتطلق من جوزها 3 مرات
فتروح تجيب حد يتجوزها
وبعدين يطلقها
عشان ترجع لطليقها الاولانى
قوم اييييه ؟ 


الأسباب هتختلف بين الحريم 
ستات الطبقة العليوى او المترفة مثلا
كانوا بيعملوا كدا
عشان يرجعوا لجوزاتهم اللى اتطلقوا منهم
ف لحظات طيش وعصبية

 .. اما الطبقات المتدنية بقى
فكانوا الستات اللى بيشتغلوا لامؤاخذة
وعاوزين يبقوا ف عصمة أى راجل وخلاص
وبيقعدوا يتنقلوا من واحد للتانى
كـ محظيات وغيره 
واهو الملخص ان السبب حاجة قرف برضو




المهم ان الهوانم دول
يا ريت كانوا بيكتفوا بتاجير واحد يتجوزوه فك زنقة وبس
 دول كانوا بيتجوزوا مراهقين كمان
آه ست تتجوز مراهق يا دوب بلغ اول امبارح
وطبعا الواد مكنش بيفهم ولا له أى وضع
وابوه كان هوه الولى بتاعه ومسئول عنه
وكان بيتفق مع الزبونة
ويعمل كل الإجراءات من الألف للياء
 ازاى ؟




الست كانت بتيجى قصاد القاضى
ومعاها الفتى وابوه يكتبوا الكتاب ف ساعتها
وبعدين الأب يقبض المعلوم
ويثبت ف السجلات بتاعت المحكمة ان العقد حصل
تانى يوم بقى تيجى العروسة الننوسة
وييجى الاب ساحب البهيمة قصدى الأبن
ويقف التلاتة قصاد قاضى تانى غير الاولانى
 ويتم الطلاق ويثبت ف السجلات!



اللى يغيظ بقى ان الهاااااانم بتروح ف نفس اليوم
للقاضى الاولانى اللى جوزها (امبارح)
وترجع لعصمة طليقها الاولانى
اللى طلقها 3 مرات دا 
فاكرينه!




حد يقولى مخولتينا يا ست اقولكم والنيعمة دا اللى حصل
ومثبت وموثق
 بس ازاى تتجوز وتتطلق وترجع لطليقها الاولانى
 بسرعة كدا ؟!! 
هقولكم اهو



 الطلاق كان بيتم ع المذهب المالكى لأنه سهل
 ومفيهوش عدة للمراهق ولا انتظار 3 شهور 
اما الجواز كان بيبقى ع المذهب الشافعى
 .. لأن فيه برضو مرونة وسهولة وكدا


فركزوا معايا الهانم دى عملت ايه دلوقتى ...

الأستاذة بتتطلق من الاولانى .. مالكى
تتجوز المراهق المحلل .. شافعى
تتطلق منه .. مالكى
فترجع لطليقها .. شافعى 
#و_ثوانى_انتشحر_وأرجع




طبعا الحوار دا كان احيانا يتم ف يوم واحد #ُفُجر
وساعات كان يتم على يومين تلاتة أسبوع
دا لو عندهم دم يعنى
وكدا كدا كان قاضى الجواز غير قاضى الطلاق
والمؤلفة مزبهلة وانا معاها الحقيقة
من حوار ان المراهق ملوش عدة دا ..
طب لما هوه كدا بيجوزوه ليه م الأصل
لما هوه كيس جوافة كدا ؟



ثم ان الاب بقى 
يا ليهوى ع الاب اللى هوه #نخاس على أعلى مستوى
الأبهات كانت بتستنفع من الشغلانة دى
 زى اللى بيجوزوا بناتهم ف البدرشين وغيرها
لأثرياء عرب وكدا 
المخجل ان فيه أب ف احدى الوقائع ...
لما وقف قصاد القاضى طلب منه يثبت ف الورق بتاعه
ان الطلاق تم بعد الدخول والإصابة !! 
#طب_ماذا_اقول_يا_ربى_دلوقتى



والمؤسف ان التلاعب بالشرع والتنطيط بين المذاهب دا
كان بيتم عادى ومحدش بيشتكى
والست وطليقها كانوا بيختاروا المراهقين
عشان يبقى الطلاق سهل
وعشان لو فرضنا .. فرضا فرضا حصل جواز فعلى .
 ميحصلش حمل وشغلانة
م الآخر دى كانت نصباية عشان الواحدة من دول
 ترجع لطليقها 
او تلاقيلها قرنى على درجة ... زوج 



واحب اقول حاجتين تعليقا ع القصة دى :
1) ناهيك عن الوضاعة والدناءة الفجة
ف محاولة الضحك على ربنا
والأخلاق الواطية والتلاعب بالأعراض والشرف
والاستهبال ف الجسد والحرمات
فالأبوة نعمة 
وساعات الحيوانات بتعرف قيمتها عن بعض البشر



2) الحمدلله انى معشتش ف الزمن الاسوخ دا ....
الف حمد وشكر ليك يارب




القصة رقم (5)





عن الشيخ سيد درويش 
على سن ورمح
 لما ساب اسكنكرية وجه المحروسة
 وقعد ف الازبكية
 وراح على شارع عماد الدين وعاش حياته




واتعرف على الفنان نجيب الريحانى
اللى آمن بموهبته واشتغلوا سوا ف كذا حاجة
وأشهرها (العشرة الطيبة) 




ومتفهموش حصل ايه الأتنين ف مرة شدوا مع بعض
وحصلت خناقة جامدة والشيخ سيد كان مزاجى جدا
وكرامته على طرطوفة مناخيره 
راح سايب الشغلانة وماشى
الريحانى حس انه مزودها
خصوصا انه عارف طبع سيد وقزحته دى
فحاول يصالحه ويراضيه لا يمكن ..
سيد تربس وقال مش مكمل




الريحانى قعد يحرك ويفرك ويسوق عليه المعارف
وغًلب غلبه لحد ما ف الآخر
جه على باله محمد بك شاهين
ودا كان من كبرات اسكندرية وعين اعيانها
وكانله دلال ع الشيخ سيد
 وكان قاعد  ف بيته ف العتبة ف هذا التوقيت 
نجيب راحله وقاله صالحنى ع الشيخ سيد ..
شاهين بك قاله اللى فيه الخير يقدمه ربنا
تعالى عندى يوم كذا
وانا هعزمه ونحاول نصلح الحال




 وفعلا عزم البك .. شيخ سيد
وسيد جه ف المعاد ودخل قعد ف الصالون
 ومكنش يعرف ان حد جاى شوية
وجرس الباب رن
ولقى نجيب داخل عليه ومعاه شريكه وصديق عمره 
بديع خيرى 



وطبعا سيد قلب وشه وبوّز
ونجيب حاول يتكلم راحوا متعاركين تانى
والحكاية سخنت
وحاول شاهين بك وبديع خيرى يطفوا الحريقة




وفجأة ف وسط الزعيق .. سيد درويش سمع صوت
 ..راح قايلهم هسسسس اسكتوا
فسكتوا وسمعوا صوت عصفور كناريا بيغرد 





شاهين بك متعرفوش
 كان مربى عصافير ف الأوضة التانية
ولاّ كانوا واقفين ف البلكونة
المهم ان الشيخ سيد سمع الزقزقات
زى ما يكون نزل عليه سهم الله
وقال لصاحب البيت طفولى نور الصالون ..
واقعدوا ساكتين
نجيب طبعا قعد زى البوبى وجنبه خيرى وشاهين
ومسك الشيخ سيد عوده 
واداها وصلة عزف ودندنة


بس وقعدوا كدا ف حضرة الموسيقى
وروايع سى سيد لحد ما خلص كل الإلهام
وبعدها بصوا لبعض بعد جلسة الغسيل الروحى دى
وقرروا ميتكلموش ف الزعل تانى
 :)






واقول ايه ف القصة دى ؟
 ولا حاجة غير اننا
محتاجينلنا بتاع 90 مليون عصفور كناريا من دول
عشان يحلوا مشاكل البلد دى
بس


2) ودا عن تجربة ف هذه الدنيا بتاع 40 سنة اهو ...
الناس اللى بتزعل بسرعة دى
ونظام بتتخنق وكبرياء وبتاع
بيبقوا فعلا اطفال ف مشاعرهم وحبهم 
وقلبهم قلب خساية
 :)
#ابقوا_فوّتولهم_يا_عيال



ومن الشيخ سيد درويش جلب الازهر الجميل
لشيخ تانى برضو من مشايخ الازهر و



الحكاية رقم (6) 





اللى هتبدأ من الفيوم حيث يسكن الأخ أحمد صقر
واحمد دا انا حبيته خلاص بعد ما عرفت حكايته
وقولولى ليه يا فطمطم ؟
أقولكم لأنه كان شاب عادى من قبيلة مزربان
اللى جت بعد الفتح العربى لمصر 
واستوطنت الفيوم


والشاب أحمد بيقولوا شاف منام
وفيه واحدة جاية ناحيته ماسكة ف ايدها قنديل
ومن وسط كل شباب القبيلة كلهم اختارته 
وراحت مدياهوله هوه



أحمد صحى م النوم راح على شيخ القبيلة
يساله عن تفسيرلت الحلم
 .. معرفش لا هوه ولا كل الكبار
بس شاروا عليه ينزل القاهرة 
ويزور الأوليا لعله يهتدى لشىء





وشد احمد الرحال على مصر ام الدنيا
وراح على السيدة زينب #شالله يا طاهرة 
ومنها على باقى الاضرحة
 وف آخر اليوم جاى يروّح بعد ما نفسيته هديت وراقت
ف الطريق لقى اتنين بيتخانقوا
وواحد فيهم باين من هدومه انه شيخ ازهرى
والتانى الظاهر كان واد قليل الادب
ومستفز
 احمد اتغاظ منه وحاول يمنعه من التطاول ع الشيخ
الولا مقتصرش احمد اتفقع منه 
وراح رافع نبوته
ومدى الواد قليل الرباية وفين يوجعك
والناس وقفت تصقفله
والشيخ الازهرى اتشكرله
وقاله لازم تتعشى معانا
ويا عيب الشوم نسيبك تمشى الخ الخ 
وفعلا روّح معاه
وكان هيا المرواحة يا عيال ...


الشيخ الأزهرى كان اسمه الجندى
وكان عالم جليل وجاب لأحمد شغلانة ف الأزهر
وكمان جوزه بنت من عيلة تركية طيبة
 :)
وحملت مرات احمد ..
وخلفت ولد بس قبل السبوع بتاعه ما ييجى ..
كان ربنا افتكره برحمته ومات
 :(



حزن الاب والام وعادوا الكرة عشان يجيبوا ذرية
قوم تانى ولد .. برضو ربنا افتكره بعد كام يوم
وقعد الموقف دا يتكرر كام مرة تفتكروا ... 
قولوا كدا ؟
مرتين ... الأخ بيقول خمسة ..
اللى وراه بيقول عشرة ..
اللى ف آخر توتير هنااااك دا بيقول خمآشر
#قلبكوا أبيض
دا هيتكرر 21 مرة
.. #ازبهلوا



ازبهليتوا ؟
ايوه 21 مرة الست هتحمل وتخلف
والبيبى ييجى فيموت قبل السبوع
لما الأب قرب ع الـ 65 خريفا
وكاااااد ان يتملكه اليأس
 :)
قوم الست حملت للمرة الـ 22
وبعد ما خلفت .. ولد .. احمد بصله كدا
وقال لأ .. مش هسميه زى اخواته بأى اسم
منا عارف انه هيموت
وسابه ومشى وهوه مش مدى أى خوانة انه هيعيش !




بس الولد رقم (22) دا كان متقدرله يكمل ف الدنيا
وهيعيش لبعد السبوع
فأبوه يسميه زكريا على اسم النبى عليه السلام
 :)) 
ثم يكبر الفتى
ويروح الازهر ويخرج منه
ويعشق المغنى
ويبقى واحد من اسطوات التلحين والطرب ف مصر
ونعرفه احنا بأسم الشيخ .. 
زكريا أحمد




وتعليقى ع الحكاية دى بصراحة جنب اعجابى بالأبن
 بس انا معجبة اكتر بالأب
يعنى الراجل قعد 22 مرة يجرى ورا حلم الابوة
ولم ييأس من رحمة ربنا
لا هوه ولا مراته كمان ..
ولا راح اتجوز عليها مثلا ..
ولا قال خلاص مش عاوز خلفة الخ الخ
وبحاول اتخيل لو اى اتنين ف الزمن الحالى شافوا نص دا
هل كانوا هيفضلوا سوا ولاّ هيتطلقوا بعد تانى عيل يموت
 او الاخ بسلامته يتجوز عليها
او يجيلهم اكتئاب وينفصلوا
او أى حاجة غير انهم يسلموا بأمر الله والقدر ؟






الراجل بقى أب ف عمر متآخر صحيح
بس عرف يربى
وفعلا المنام اتحقق
والشيخ زكريا كان قنديل
وفرح قلوب كتير بمزيكته والبهجة اللى فيها 
وللى يتتبع سيرة حياته باين انه
زى ما كان فنان عظيم كان كمان انسان عظيم
وكان حبوب ولطيف وبيشع بهجة وخفة دم
وابوه معرفش يجيبله اخوات يمكن عشان أرذل العمر 
بس كان كل اصدقائه اخواته



والدنيا فيها قصص احيانا أغرب من الخيال ...
بس 22 عيل ؟
يا طولة بالكم وصبركم ومعنوياتكم وصحكتم
ومن غير ما احتاج اعرف ولا أسال ولا حاجة 
أكيد طبعا
 #سمنة_بلدى_دى_وانقلاب



وتوتة توتة .. خلصنا خلاص
 نرتوت المنشنات الخفافة اللطافة بقى
 :)


--------------------------------


Middle of Nowhere... @WIZARD_Mohamed 
طيب هو الناس دي معندهاش شوية أحمر..
تاريخنا يا ولاد الهبلة متخزن و شايلينه تحت البلاطة
.. يا جدعان بكرة يتحرق 
ويقولك ماس كهربا..



طز BIG @Fatoma999 
ده موت وخراب ديار:) واستنطاع كمان:)



Middle of Nowhere... @WIZARD_Mohamed 
#الاصول_اصول برده..
#زمن_الاخلاق_الجميلة... دلوقتي لو الميت بنت
 ممكن يتحرشو بيها..!!!
O.o
#احيييه #ههااااحححح



مِـيرْڤَـتْ @frikeko 
كدا يبقى خراب رسمي
اعرف انهم بيساعدوا اهله بفلوس
مش يقعدوا ياكلوا لحد الأربعين :D



tarek momen @tarekmomen 
 الدنيئة دي تفرق كتير عن الجلاشة ؟؟؟؟
و اللا شبهها ؟؟؟؟..
معلهش اصل انا مش من هنا



Ahmed Rageh @Ahmed_Rageh101 
مكنتش اعرف ان القهوة ليها اثار جانبية خطيرة كده



tarek momen @tarekmomen 
 اهو برضه ارحم من الخازوق بتاع العثمانلية..
موتة مستكيفة


طز BIG @Fatoma999 
,,من اعان ظالما,سلطه الله عليه,,(حديث شريف)


سها المنياوي ‏@morgana00m 

مكانتش بالياسمين ياختييييييييي


Ahmed Rageh @Ahmed_Rageh101 
لابد ان يدخل بها



tarek momen @tarekmomen 
و لا فهمت اي حاجة..مالكي و اللا شافعي..فين العدة ؟؟؟؟


 Middle of Nowhere... ‏@WIZARD_Mohamed  
ههههههههههه
عاجبني قوي حوار الدخلة البلدي الموثقة 
بمحضر المحكمة دي....
#احلى_من_الشرف_مفيش..!!
#قلبي_الصغير_لا_يتحمل..!!


 HALAH ◔̯◔ ‏@RandomHalaH  
شعب متدين بطبعه طول عمره


 طز BIG ‏@Fatoma999  
 هو مش نفس الزمن اه
,بس فى تحايل على الدين باشكال تانية
وفى حاجات تانية فى زمنا ده ,ربنا يعافينا



 سها المنياوي ‏@morgana00m  
 دة لو حد عرف كدة دلوقتي
 مكانتش قري بحالها في العياط تبيع لحمها رخيص 
كانت باعت اللحمة البتلو الذكر


Ahmed Rageh @Ahmed_Rageh101 
 احنا محتاجين طائر الرخ



الشيخ سيد درويش @SayedDarwish01 
غنيتلهم في شرع مين.....
ولما فتحوا النور كانت عيوني كلها دموع من التأثر
:)



طز BIG ‏@Fatoma999  
طب سيد درويش مرهف وحساس يروق بصوت كناريا,,
احنا بقى نروق بايه:))


 مِـيرْڤَـتْ ‏@frikeko  
 جه ف بالي برضه .. 22 مرة ولادة !!
يا قلبها :)


 tarek momen ‏@tarekmomen  
لا يأس مع الحياة و لا حياة مع اليأس



نشوي Elbahrawy @Nashwa14 
انا بقرا وفاتحه بوقي اساسا فين الرجاله دي ااااوختشي



 كاركشندى زعيم نفسى ‏@ahmeddjnh  
@Nashwa14 @ro7albmama2 كتشير والنعمه
 بس انت بصى كويس



هناك تعليقان (2):

  1. اولا : عايز اقولك بعد طول غياب منى من على البلوجات انك فجأتينى بقصصك الوهمية دى
    ثانيا: احسنتى صنعا بجد حاجه حلوة قوووى
    ثالثا ياريت تقولي مصادر الحكاوى دى عشان نجيب الكتب وتبقى مرجع ليا نحتفظ بيه
    يارب تكونى فاكرة عمود نور

    ردحذف
  2. محمد فؤاد (صاحب عمود النور)
    --------------------------------

    اولا : ازيك انتا يا محمد ويارب تكون دايما بخير
    انا بطمن عليك من بسكوتة
    وانشالله دايما متهنى وبخير يارب

    ثانيا
    منحرمشى منك
    ويارب دايما الحكايات تعجبك
    :)

    ثالثا
    بخصوص المصادر بقى
    لو الحكاية واحدة بقول المصدر غالبا
    كتاب او اتنين او موقع حتى ..
    لكن الحكايات الكتيرة سوا دى بيبقى صعب عليا اكتب
    الا لو المصدر واحد وحيد

    هحاول ان شاء الله ف مرة اكتب قايمة بكل الكتب والمصادر والمواقع
    واعملها ف بوست عشنا الكل يستفيد قد الممكن
    :))

    نورتنى
    ويارب دايما بخير

    ردحذف

Related Posts Plugin for WordPress, Blogger...
"حقوق الملكية والملوخية والمهلبية ... الخ
محفوظة للست شهرزاد وإياك حد يسرقها ويحاول يزعلها آغجر .. مفهوم ؟ "