السبت، 26 أبريل، 2014

شـــاور : نيـــرون الفســـطـاط




 تمثال صلاح الدين الايوبى



الحدوتة عن لحظة فارقة
ف تاريخ البلد الغلبانة دى
لحظة مصر فيها كانت ف النص 
ف صراع بين دولتين ..  
وخرجت من الصراع دا 
من وصاية دولة .. لـ دولة تانية 
فبقت بين دولتين برضو 
:)





وقصتنا كلها معتمدة على سردها وتفاصيلها 
من كتاب .. 
"فى تاريخ الأيوبيين والمماليك"
لـ قاسم عبده قاسم

  بصراحة الراجل حكايها ولا اروع من كدا .. 
 نبتدى وتركزوا معايا
 عشان فيها تفاصيل كتير .. 



 
والقصة أحداثها الأساسية .. مصر 
اللى وقتها كانت تحت السيادة الفاطمية 
لكن هنروح للشام ثوانى ف السريع
عشان نعرف كيف كان الحال وقتها يا حضرات 






قالك الأخوة ف أوربا زاغت ف عيونهم 
ثروات الشرق وشمسه الحارقة 
وحبوا ييجوا يعملوا عندنا تان وينبسطوا
قام ف دماغهم يحتلونا
وعملوا شوية حملات عرفت تاريخيا 
بالحملات الصليبية .. الخ 




الحملة الصليبية الاولى 1099 نجحت نجاح مفاجىء
ومربك ومرعب وعمل قلق للمسلمين
والعرب ف الشام 
وفجأة بقى فيه خازوق ف وسط المنطقة كدا 








وزى ما هو باين م الخريطة
وعشان منرغيش ف تفاصيل مملة 
الملخص ان كان فيه امارة بيت المقدس وامارة الرها
وكان فيه الأتراك والدولة الزنكية
اما الفاطميين فتقلص نفوذهم ف الشام 
وتراجع بسبب تدهور الاحوال ف مصر
لحد ما بقى آخرهم عسقلان ف الجنوب من فلسطين
وشكرا





اما الشام
فبقى فيها صراع
بين الفرنجة ف الشرق متمثلة ف امارة بيت المقدس 
متزعمها امالريك او مّرى او عمورى كلهم صح 
وبين ابن عماد الدين زنكى 
وابنه من بعده ...  نور الدين محمود الشهيد








الحروب دارت بين الجوز دول وأباءهم
كل فريق عاوز يسيطر ع الشام
عشان ميديش فرصه لغريمه يغلبه
ومصر فضلت بعيدة عن شنبهم 
الى ان جدت ف الامور أمور



 
ف مصر 
كان الموقف كالآتى ... 
محاولات من بلدوين امير امارة الرها لغزو مصر 
وانتهت بموته
ثم التفاوض مع وزير الفاطميين
الصالح طلائع على أتاوة
مصر دلوقتى ف آخر زمن الفاطميين 
مسكها الوزير اللى حكينا عنه كذا مرة 
اللى كان نفوذه قوى 
فنصب الفايز الطفل خليفة
وبعدين جه من بعده خليفة جديد 
كان اسمه العاضد


 
كعادة الوزراء ف هذا الزمن المعروف تاريخيا 
بـ زمن الوزراء العظام 
الوزير الصالح طلائع بن رزيك استهبل 
فخصومه قتلوه 
ومسك ابنه من بعده .. 
المذكور ... رزيك بن طلائع




رزيك زى ابوه
.. عمل طيب ولطيف ف البداية 
وبعد شوية تجبر وسيطر
وراح معامل العاضد الخليفة اسوأ معاملة ..
فالعاضد قلب عليه ...
وراح باعت لواحد من الامراء 
كان قاعد ف الصعيد 
وتذكروا هذا الموقف كويس جدا 



الاخ كان اسمه شاور بن مجير السعدى
وضاضو العاضد يعنى
قاله الحقنى
شاور .. يادوب العاضد شاورله 
راح لامم الاضيشه ورجالته والأوغاد والعالم 
وجه جرى ع القاهرة وعملوا شغل الحواة 
وقبضوا على رزيك بن طلائع
وبعدين وهوه ف عهدتهم متقيد ومتسلسل
حاول يهرب راح ابن شاور
وكان اسمه "طىء" قاتله .. رزيك يعنى 
وانتهينا على كدا 



وراح شاور للعاضد مبتهجا ...
وانا قبضتلك ع اللى منكد عليك
طاه موشكرين عاوز ايه يا بنى 
ولا حاجة عيننى وزيرك !
العاضد ضربها ف نافوخه العيالى 
وقالك وماله
وخلاه الوزير
ولسوف يندم أشد الندم على هذوها القرار ... 
بس بعد ما تطلع عينه وعينينا وعين البلد كلها 
للأسف 




   

القصد شاور كان من أصل عربى 
وله علاقات بالقبائل والعربان وفارس
زائد انه معروف لجند الفاطميين والامراء 
كان زميلهم ودفعة وبتاع 
المهم سيطر ع المنطشقة
وبعدين كعادة كل الشبعانين بعد جوعة .. 
بدأ يتملعن
ويفرد قلوعه ع العاضد 
ويعمل تصرفات مش اللى هيا مع الناس 
فكرهوه وقرفوا منه



 ف التوقيت دا عمورى امير بيت المقدس 
طمع ف مصر 
راح خارج بعساكره ..
وصل لحد بلبيس 
وبعدين جند الفاطميين من الاتراك والسوادنين تحديدا 
وقفوله فأنهزم وخرج جرى رجع لبلاده 
سمع بالحكاية دى ميييين ؟؟




 

نور الدين محمود
الجدع كبير الدولة النورية سمع بالحكاية وقلق 
وخاف من دخول الفرنجة مصر .. 
كدا هيبقى بين فكى كماشة
ودا خطر جداااا



ف اللحظة المهببة دى ..
هيطلعلنا واحد من الماضى اسمه .. 
ابو الاشبال ضرغام 
كان من اتباع رزيك الوزير المقتول 
وكان رئيس لجند طلائع الخاصة المعروفة ... بالبرقية
ضرغام هيستغل كراهية الناس والعاضد لشاور
بعد ما استوزر ..
وهييجى مع عساكره والاتباع 
ويخش ف عركة كبيرة مع شاور
لحد ما يزحزه من كرسيه .. !










ضاضو الشهير بالعاضد الخليفة الفاطمى ..
مكنش طايق شاور
اصلا اول ما لقى كعب ضرغام ف المعارك أعلى
ولقاه انتصر 
راح معينه مكان شاور علطول 
وبصوا احنا هنقعد ف لعبة الكراسى الموسيقية دى كتير
فمفيش حد ينكسف انه متلخبط وكدا 
عادى 



دلوقتى الموقف ان ضرغام غلب شاور
وشاله من الوزارة
وقعد مكانه بمباركة العاضد .. 
فتفتكروا شاور يسكت ؟؟؟
لأ طشبعن 
هياخد بعضه هاربا من الايام
ويروح على الشام عند نور الدين محمود
عشان يستعين بيه



 
ويدخل شاور المخلوع على نور الدين 
ويقوله مصر ليك و.. : 
" أكون نائبك بها 
وأقنع بما تعين لي من الضياع والباقي لك "
نور الدين عجبته الفكرة .. 
مصر اصلا كانت ف دماغه من بدرى 
بس مكنتش الفرصة جت 
واهى جاتله على طبق من فضة 
راح مدي لشاور العهد والأتفاق




 
وبعت نور الدين لقائده .. اسد الدين شيركوه
يقوله حضر روحك هتروح مصر 
واستعد شيركوه فعلا 
ولأول مرة عنسمع اسم ابن اخوه صلاح الدين الأيوبى
صلاح كان وقتها شاب ف اواخر العشرينات 
والمصدر بيقول ان صلوحة آل 
مكنش عاوز يطلع الطلعة دى :
" خرجت مع عمى كارها وانا كمن يقاد الى ذبح "
ليه يا بابا كدا هوه احنا كنا عملنالك حاجة .. ؟!! 
ولا جينا جنبه وقتها اصلا 
بس بعدين هتشوفوا جراله ايه 
وجرالنا ايه 




القصد شيركوه وصلاح استعدوا 
وتحركوا لمصر
ومعاهم زفت الطين شاور .. 
اللى فيما يبدو كان متضايق من شيركوه
بس غصبن عنه اتحمله 
و الحملة بتاعت نور الدين 
ومن يحكم .. يملك
القاعدة كدا




 
نرجع لمصر بقى .. 
ف الوقت دا كان ضرغام بقى الوزير بدل شاور .. 
هنشوف ايام حلوة ولطيفة وكدا بقى صح ؟؟
لأ مكنش يتعز دا 
ومتذمش ف اللى راح قبل ما تشوف اللى جاى
هيطلع أضل وألعن م اللى قبله


 
احد المعاصرين وصف ضرغام قائلا :
"كان فارساً جميل الصورة لطيف فى حضوره 
إلا أنه سريع التهيج ينتقم لأقل سيئة من أصحابه " 
كان ودنى يعنى وسماوى
ونابه ازرق وشكاك سىء الظن 
اول ما سمع وشاية بأن شوية من زمايله ف البرقية 
عاوزين يجيبوا شاور تانى
راح مدور فيهم الدبح وقتل 70 أمير !!!
وبعدين  احنا لسه هنحقق ونعمل محاكم وافلام
اللى قلق منه بقى يقتله فورا 
وسريعا اول ما يحس بس
انه ممكن يبقى خطر على حياته او منصبه .. !


 
ابن الأثير بيوصف المشهد : 
" .. فأختلت الدولة بقتل رجالها وذهاب فرسانها " 
يا حوستى يامه 
دا مصطلح انهيار مؤششات الدولة من زمان اهو ... !
#اخراشى





ف هذه الأثناء جيش نور الدين بقيادة شيركوه 
وابن اخوه صلوحة كان ف الطريق 
ومعاهم شاور 
الاخبار وصلت لضرغام 
يعمل ايه يهبب ايه 
راح باعت للفرنجة








وايوه زى ما قريتوا كدا
الباشا وزير الدولة الفاطمى اللى بيحكم مصر 
راح باعت لعدو الدولة الفاطمية الاول وعدو مصر 
.. عمورى يقوله تعالى الحقنى شوف اللى جراااالى
واتفق معاه انه هيخلى مصر ولاية تابعة للفرنجة
شرط يخلصه من الثنائى .. نور الدين وشاور
اللى جايين يخلعوه من كرسيه 
بيس وقشطة كدا .. ؟!!


 
طبعا حد يسالنى
وكيس الجوافة اللى قاعد ف قصر الخلافة دا 
وضعه ايه ف الأيام السودة دى ؟؟ 
أقولكم الجدع أتسدممم 
قاله لروحه






وطبعا مبقاش عارف يعمل أى منظر 
والقوة كلها ف إيد ضرغام
اللى لما بعت لعمورى حاكم بيت المقدس وافق علطول 
وقاله انا جاى 
وغلاوتك جاااااى لكن طبعا جيش نور الدين كان الأسرع وصولا .. 






وف بلبيس كانت القتال على ودنه 
بين شيركوه وصلاح الدين 
وبين حسام اخو ضرغام





وبيقول المقريزى ان طيور البطائق 
وصلت لضرغام برسالة عن :
" وصول شاور واسد الدين شيركوه
ومعهما من الاتراك خلق كثير .."



جيش نور الدين بهدل عسكر ضرغام 
اللى هرب 
واللى نجى منهم زاغ على القاهرة 
وف السكة ارتكبوا فظائع وهتايك
خلت العربان والفلاحين يبعتروهم ويقتلوهم
خبر هزيمة الجنود وصل لضرغام 
فاتغاظ قوى 
بس اتغاظ اكتر من ان المصريين قتلوا ف جنوده
اثناء رجوعهم 
قام واقف كدا .. ومقرر 
" يحرق مصر على اهلها من أجل انهم مكنوا شاوراً 
من دخول البلاد وباعوا عليه وعلى من معه " 
وياخويا مقدرتش ع الحمار ف بلبيس
جاى تشرب بيريل وتسترجل علينا احنا .. !









طب الاخ العاضد اللى قاعد ف قصر الخلافة دا
مش هييجى يضربله طلقتين ف الفرح  ولا حاجة .. ؟ 
لأ ميصحش
ضاضو هيشوف ضرغام اتجنن
فياخد موقف
وابو شيماء هيتهور
ويأمر الرماة ف الأبراج على الأسوار 
محدش يضرب 
ووقفوا أى قتال يا عيال 
اصيل يا حاج

 
ويوصل الخبر لشاور .. 
ان العاضد قلب على ضرغام ومبقاش طايقه 
راح زى السوسة كدا باعت للخليفة 
وقاله أجى
فالعاضد وافق 
وسمحله بالرجوع !


 
ف دخلة شاور ورجالته القاهرة 
ضرغام اتشقلب كيانه 
وجرى على قصر الخليفة ف بين القصرين
لقى باب الدهب مقفول ف وشه 
وقف معاه 500 فارس يطلب المدد والعون
العاضد سابه يتنقح ف الشمس 
وبعدين راح راميله الرد : 
"نحن نعرفك أيها الملك 
لأنه لم يبق فيك ظل إلا صلاة العصر
فأنج بنفسك إن قدرت والسلام .. "


طيب واضحة خالص اهى 
الراجل بيقول لضرغام مع نفسك يا معلم 
ومليش دعوة بيك ولو عرفت تلحق روحك .. 
فطريقك اخضر وسكتك كورنيش .. عداه العيب وقزح !


 
طب الموقف وصل لايه دلوقتى ؟؟ 
طبعا الـ 500 فارس اللى حواليه بعد شوية 
صفصفوا على 30 نفر 
وضرغام اللى كان عامل اسد 
وهنحارب هنحااااارب وكدا
راح لافف وراجع تانى 
وطالع من باب زويلة 
قوم ايييه ؟؟ 
شافوه المصريين وعرفوه 
راحوا مزعقين ولموا عليه الدنيا 
جم رجالة شاور ع الصوت .. 
شافوا ضرغام 
راحوا قاتلينه !




 
المقريزى بيوصف المشهد 
اللى حصل بدقة : 
"فمر ضرغام على وجهه إلى باب زويلة 
فتخّطف الناس من معه وعطعطوا عليه ولعنوه 
فادركه بعض الشاميين فى غلمان شاور وطعنه
فأرداه ونزل اليه واحتز رأسه 
بالقرب من مشهد السيدة نفيسة "



 
بس وانقتل ضرغام .. 
واتنين من اخواته كانوا معاه
وانتهى ذكره من وزارة مصر بعد 9 شهور 
نكد وهم ودم وتحالف مع الأعداء


والمؤلف اللى بحكى من كتابه
بيفكرنا هنا ان المصريين 
مكنوش عايشين ف دور المتفرج طول الوقت 
كرهوا ضرغام عشان حط ايده ف ايد العدو 
فلما جت فرصة يتخلصوا منه عملوها بطريقتهم

 
وضرغام مات 
وعمورى العدو قالك منيش لاعب 
وشاور رجعتله الوزارة 
والعاضد عاصر لمون عليه 
أظن كدا الدنيا استقرت 
لأ ...





 
شرشر شاور رجع للوزارة 
والمفروض يتلم ويعى الدرس
انما تقول ايه ف العوجان لما يبقى طبع 
الأوستاذ رجع لسيرته الاولى 
وحسب وصف معاصريه كان 
" وكان خبيثًا سفاكًا للدماء "

زائد ان اسد الدين شيركوه 
وصلاح الدين اللى جم بعساكرهم من الشام 
فكروه بأن فيه اتفاق بينه وبين نور الدين 
فعمل عيشة وطنش واستهبل ع الآخر







صلاح الدين كان واعى وصايع 
قال لعمه شيركوه تعالى نرجع بجنودنا من القاهرة
نروح على بلبيس 
احسن انا مش مطمن لغدر شاور دا .. 
شيركوه سمع كلام ابن اخوه
وبعد ما رجعوا بلبيس بعتوا لشاور يطلبوا نفقات للجند 
.. شاور ماطل 
وقال لأ
راحوا باعتين لنور الدين يقولوله 
نعمل ايه ف السخصية الوثخة دى بقى ؟!!


 
الحقيقة قبل رد نور الدين ما يوصلهم يعملوا ايه
كان شاور نفسه بيبعتلهم يقولهم 
اكسوا برا من البلد كفاية كدا متشكرين .. ! #نعممممممم_يا_روح_طنط
الا كل العالم دى خارجة بحصانتها واسلحتها 
وتقتل وتنقتل عشان سعادتك ترجع لكرسى الوزارة 
وبعد كدا يروحوا عند امهم فاضيين ؟
#بتهرج_صح؟؟


 
وجت الاوامر من عند نور الدين .. 
هاتولى الواد دا من قفاه ولازم يتربى !
فهل شاور عندئذ هيسكت 
ولا هيعمل فينا خازوق من بتوعه ؟؟
 دلوقتى شاور عاوز يخلص من شيركوه وابن اخوه 
ومن وعده لنور الدين فيعمل ايه ؟؟
تخيلوا انتوا
الباشا هيبعت لعمورى ف بيت المقدس
يقوله الحقنى !
ومش فاهمة انا ايه الحاج عمورى دا 
اللى قاعد ورا الباب زى المقشة بحطة ايدهم
كل ما يتزنقوا يبعتوله ولا كأنه جوز اختهم ؟!! 




 

المهم الوغد شاور هيقوله
تعالى يا عدو بلادى الاول 
وانا أروقك بس خلصنى من العالم الغتيتة دى
اللى انا جيبتهم عشان يرجعونى مكانى









آه بيتكلم جد 
وأبو شامة وصف بدقة قائلا: 
" فلما أرسل أليهم شاور يستنجدهم 
أن يساعدوه على اخراج اسد الدين من البلاد
جاءهم فرج لم يحتسبوه .."

وحليف الامس بقى عدو اليوم ..
وعدو الامس بقى حليف اليوم 
وأى حد أى كلب معدى يدخل عادى 
طالما مصلحتى تتقضى 
وانشالله تموتوا كلكم يا شيخ 



طبعا عمورى هيمسك ف الفرصة 
وييجى بعساكره من بيت المقدس
الكلام دا سنة 1164 
ويعسكر ف فاقوس .. شرقية
وكل حاجة على حساب صاخب المخل .
شيركوه وصلاح الدين كانوا وقتها ف بلبيس 
متحصنين ومتمركزين 
دخل معاهم عمورى ف قتال 
والجيشان كل جيش قعد للتانى على شط النيل




 
وبقى كل عمورى ما يحاول يبنى جسر 
يعدى عليه عساكره للناحية التانية 
عشان يفتكوا بالجيش النورى 
شيركوه ورجالته يهدوه ويحرقوه ..
وقعدنا كدا القوى متكافئة 
ومحدش بيهزم حد 50 يوم بحالهم 
لحد ما شيركوه جاب م الآخر 
وطلب التفاوض
وعمورى راخر وافق 
على ان تكون صيغة الاتفاق
الطرفان يخرجا من مصر ومحدش يقعد فيها ... 



حد يقولى شيركوه تنازل وعمل قطة مش أسد 
أقولكم ابدا .. 
هوه بس حسبها صح 
ونور الدين ف الشام ساعده
لما لقى عمورى ضاغط عليهم ف مصر .. 
نور الدين ف الشام عمل كام غارة على مواقع صليبية
المهم عمل توازن كدا 
وحركات دهاء خلت الطرف التانى ينخّ

 
والأتنين .. النوريين والفرنجة 
خرجوا من مصر خسرانين 
وخلاص كدا شاور الكلب قاعد برضو مفيش فايدة 
ومكمل ف تصرفاته النجسة 
من ظلم وتجبر وافترا

 
بعد شيركوه ما رجع الشام ..
قعد يلح ع السلطان نور الدين انه يرجع مصر تانى 
وقاله موقعها واهميتها وخيرها 
والواغش اللى حاكمينها ضعاف ... 
كله هيصب ف صالحنا
واحنا اولى بيها 
عشان نقطع ع الصليبين أى فرصة لهزيمتنا
الكلام عجب نور الدين فوافقه 
وحضروا جيش تانى ينزلوا بيه على مصر 
و بقينا مصيف بقى



 
وطبعا شيركوه مش هييجى لوحده 
لازم معاه ابن اخوه الشاب الهمام صلاح الدين القليوبى 
اللى اول ما اتحركوا
عمورى عرف فورا 
وبعت لشاور يبلغه
شرشر طبعا .. هيفكر نفس التفكير الوثخ اياه 
وهيقول لعمورى تعالى .. انجدنى وانا عينيا ليك 
اللى تطلبه من فلوس 
عمورى جاله جرى 
وعسكر ف الجيزة
والمصادر بتقول ان العاضد .. ياااااااه افتكرناه اهو 
الأخ ضاضو لما نور الدين ابتدى بالغزو المرة دى 
خاف وساب التصرف لشاور
قوم ايه
شاور جابله رسل عمورى ف قصره 
عشان يتفاوضوا معاه انهم يخرجوله جيش نور الدين 
مقابل مبلغ وقدره ... 
كلاب وسماسرة فلوس يعنى .. مش اكتر !




والعاضد هيرضخ ويوطى راسه .. 
ميقدرش يقول لأ طبعا
وبس يوصل جيش نور الدين .. 
وشيركوه يروح ع الصعيد 
 وصلاح الدين يطلع على اسكندرية الماريا
ينزل الفرنجة على المنيا 
ويشتبكوا مع شيركوه ف حتة اسمها البابين
وياخدوا علقة موت
وشيركوه يعرفهم ان الله حق
فيهربوا ع القاهرة 
ومن القاهرة ياخدهم شاور
ويطلع بيهم على اسكندرية عشان يحتلها 
ويخرج منها صلاح الدين 
ولنا ف اسكندرية وقفةةةةةة




 
الا طول عمر اسكندرية حلوة كدا 
واهلها جدعان #اه_والنيعمة 
اسكندرية كان اهلها سنة 
وكارهين الفاطميين الشيعة 
ودايما ف الثورات ع الفاطميين ..
تبصوا تلاقوا اسم اسكندرية منّور كدا 
والثوار بيروحوا يتحصنوا فيها 
او يبتدوا منها ثورة






القصد اسكندرية الجدعة 
هتحتضن جيش نور الدين السنى
والظاهر كمان صلاح الدين بشخصيته 
عرف يدخل قلوبهم ويقعد 
المهم كلنا ايد واحدة يا بهجت ضد الفرنجة 
واتحاصرت اسكنكرية
وقعدنا كام بقى ف الزنقة دى  ؟؟
يقال 4 شهور كدا 
وشاور طبعا هيتجنن 
ويبعت لأهل اسكندرية واعيانها 
سلمولى صلاح 
وهما يقولوا أبضنننننن يا روح ام 
يقولهم طب هسامحكو وهنبقى حلوين 
وهما يقولوا ابضننن قولنالك روح لأمك ..! 
فبقى بيوريهم الويل والضنك 





صلاح الدين بقى بعدين 
قال لما سالوه عن الأيام دى

" والله لو أعطيت ملك مصر ما سرت اليها
فلقد قاسيت بالأسكندرية من المشاق ما لا انساه ابدا "
#يا_عينى
واضح انه شاف اهوال ف الفترة دى
بعلش بعلش


بعلش بعلش دى كلمة ابنى يوسف
قاصدا بيها معلش معلش 
لما كان صغير
ويشوفنى وانا بعيط 
فبيطبطب عليا 
وكدا :))






المهم اسكندرية عاملة احلى شغل 
وصلاح الدين متماسك
وشاور خلقه ضيق وزهق قوى
راح راجع القاهرة 
وبعت لشيركوه يتفاوض
شيركوه قعد يحسبها .. لقى العملية خسرانة 
والفرنجة والجيش الفاطمى اكتر واقوى حاليا 
راح مهادن شاور
واتفقوا ينسحبوا مقابل مبلغ تعويضى كدا 
وبس


 
بقى بعد كل دا هتتراجع يا شكشوكة 
وتمشى قصاد شوية فلوس ... ؟؟ 
محدش يقول 
انا هقولها لوحدى اهو





واحدة لا تكفى





قُصره .. 
رجع شيركوه وصلاح الدين بالجيش على الشام
وف دخلتهم على  نور الدين
شيركوه موطى وبيعتذر 
ويتعلل بالغلبة والخيانة والحصار وانا اسف #بعلش



نرجع مصر .. 
أظن كدا الأمور استكرت بقى يا طمطومة
قولى والمصحف والنبى قولى والمصحف 
كان بودى 
لكن يؤسفنى .. لأ محصلش 
الاخ شاور الجمييييل
بعد ما خلص من جيش نور الدين 
فضله جيش عمورى فدخل معاه ف اتفاق 
انه يبعتله الأتاوة المعتادة 
وان آل ايه عشان النوريين ميجوش تانى
تسيبلنا حامية
يعنى ايه الكلام دا ؟ ي
عنى 
"الفرنجة يكون لهم شحنة بالقاهرة 
ويكون أبوابها بأيدي فرسانهم " 
م الآخر هيبقالهم زى قاعدة عسكرية
وفين 
ف العاصمة 
وبعتر شوية عساكر ف الثغور كدا على خفيف !




وبيقولك ان الأتفاق عدى من تحت مناخير العاضد
الخليفة و محدش قاله ! 
طب محدش قاله 
هوه منزلش وشاف بعينه عسكر الفرنجة
بيحرسوا ابواب مدينته وقصوره ... ؟!
 
القصد كيس الجوافة سكت كالعادة 
وما بيده حيلة 
اللى اتكلم ساعتها .. واحد من ولاد شاور 
وكان اسمه الكامل 
الله يرحمه ويبشبش الطوبة اللى تحت راسه
الواد الظاهر 
كان قرف من عمايل ابوه الواطية 
راح باعت لنور الدين محمود 
"يسأل الدخول فى طاعته
وضمن عن نفسه ان يفعل هذا 
ويجمع الكلمة على طاعته"



والمقريزى ف جملة عجيبة .. 
انا شخصيا شيفاها لايقة علينا اطول الوقت
 بيقول
" فكأن من تأمل حال الوزراء
فانه يجد الصالح بن رزيك ربى رجال الدولة
وجاء الضرغام فأفناهم 
ثم جاء شاور فأتلف أموال مصر 
وأطمع الغز فى البلاد وجرأ الفرنج عليهم " 
مراحل انتشقالية 
وكدهون :) 
#مساء_الفُل

 
ومؤلف الكتاب اللى بنقلكم منه 
قال جملة 
اكثر عبقريةعن الحالة 
( ان التاريخ يذكرنا دائما با "جيش الأنقاذ" 
سرعان ما يتحول الى "جيش احتلال" )
وبيشرح ازاى انك لو جبت جيش غريب عن بلد واهلها
ومفيش بينهم أى روابط هيحصل مشاكل
فما بالك بقى لو استعنت بجيش الاعداء 
شوف كدا ؟؟

 
و شاور رجع لسيرته القذرة 
وبقى يقبض ع المعاااارضين
وبقى خبر قتل الأمراء والعلماء بيتسمع عادى 
ولا أى اندهاش 
وبعدين شاور حب يعمل فلوّطة
فراح باعت لنور الدين يطلب منه
انه يا ريت متبعتش شيركوه تانى
وانا هديك المبلغ اللى يرضيك بس شيركوه لأ .. 
البنطلون لأأأأأأه ...
#آل_يعنى_حويط_وصايع



وبس شاور راضى الأعداء على كل الجبهات 
وافتكر انه بكدا انه أكلنا جميعا الاونطة
فإذا بالكل هيطفحاله ان شاء الله 
أونطاية أونطاية



 
والجملة هتتحقق فعلا 
وجيش الانقاذ هيتحول لجيش احتلال
الاخوة الفرنجة المرابطين ف القاهرة 
هيدرسوها كويس 
ويعرفوا ان الدنيا سايبة كفاية 
فيبعتوا لعمورى يقولوله يا ريس البلد واقعة 
ودا احسن وقت تيجى فيه تحتلها
الجدع مكدبش خبر 
وراح خارج بعساكره علطول 
#نشيط_قوى_الحق_يتقال






الخبر يوصل لشاور فيتخرع يا ضينايا 
 ويبعت لعمورى يقوله كدا برضك
 دحنا واكلين شاربين قاتلين خاينين ويا بعض !! 
#انا_مجروح_قوى 
عمورى قاله #بعلش
دا رأى الفرنجة كلهم ف الشام ومش قرارى لوحدى
وقد سررنا بالتعاون معكم 
وقفا شاور دلوقتى ورم قوووى
واتجنن وركبه العصبى 
قام نازل القاهرة
ولما سمع بوصول عمورى بجيشه لبلبيس .. 
مكنش بس دى الاخبار
الأخ عمل مدابح واستباح البلد لجنوده 
فقتلوا فيها حتى النساء والاطفال ف رسالة واضحة




فهم منها شاور ان مفيش أى أمل ف تفاوض 
او موائمة 
راح شرشر لامم كل الفرنجة عسكر وغيرهم 
م اللى يعرفهم ف القاهرة 
وراح قاتلهم 
وأمر بحفر خندق وشوية تحصينات 
 وآل ايه قال الفقهاء يحرضوا الناس ع القتال .. 
توك ما افتكرت الشعب يا ابن الشعببببب !! 
وياريتها جت على كدا وبس 








قال اييييه ؟
قالك احنا نحرق الفسطاط 
عشان نمنع تقدم الفرنجة ويدخلوا مصر .. !
#يا_سلااااااا
وفعلا المخسوف هيعمل كدا




هيبعت 20 الف قاورة نفط
ومع الـ 20 ألف قارورة نفط .. عشرتلاف مشعل 
ويقول لجنوده .. اشوفها والعة
وحرقوا كل حاجة
وقعدت النار 45 يوم بحالهم 
:((






 
وبيقولوا ان الناس ملحقتش حتى تخرج بحاجاتها 
وحصل هرج ومرج 
واستغلال من الحمالين ونهب وافلام كدا 
واتحرق جزء من جامع عمرو
والنار بقت تتشاف من على مسيرة 3 ايام 
والمصريين جريوا على القاهرة 
اللى شاور فتح ابوابها ليهم
وناموا ف الجوامع والحمامات والطرقات #منك_لله






وكل دا عشان الجملة اياها
بتاعت 
لو محكمتش انا هما ميخدوهاش .. ويتهنوا بيها !
فعلا يستحق وبجدارة لقب .. 
نيرون الفسطاط



 
نهايته عمورى بعساكره وصلوا عند حدود الفسطاط 
شافوها مولعة كدا .. تراجعو 
وبعدين جزء منهم جه يهوب ناحية القاهرة ويدخلها
ف المصريين وقفولهم واستقتلوا 
مش دفاعا عن خلافة ولا نيلة  
خلاص الفسطاط اتحرقت 
والباقى من القطائع والعسكر العاصمتين القدام 
برضو النار اكلته 
ومبقالهموشى غير القاهرة 
ويا قاتل يا مقتول





وللمرة الكام مش عارفة انا .. 
شاور يتفق مع عمورى يخرج من مصر 
ويدفعله 100 الف دينار فورا 
ومليون دينار متآخرة .. !  






العاضد بقى فاكرينه 
وبجد مساء الخير يا حاج أبو حنان
 ... لقى شاور اتهطل 
وحرق الفسطاط 
والعملية بقت ف النملية 
حتى النمل مات حرقاااا فيعمل ايه؟
راح قاصص شعور حريمه 
وباعت الضفاير ف طرد لنور الدين محمود ف الشام 
ويقوله 
" ادركنى واستنقذ نسائى من أيدى الفرنج"  




وزاده من الشعر بيتا 
وقاله ليك تلت اقطاع مصر .. 
وعساكرك وجيشك اكلهم وشربهم ومرتباتهم عليا 
وملهاش دعوة بالتلت بتاعك 
مرضى يا عم ؟؟
نور الدين طبعا كلبش ف العرض السخى
وكان بيبص لبعيد ان لو الفرنجة تمكنوا من مصر 
هوه هيتفعص ف النص ويعملوه سنتدوتش
فراح باعت لشيركوه فورا



وقاله تاخد صلاح وتروحوا على مصر 
انتوا داهسينها كويس وعارفين زخانيقها 
شيركوه كان شايل ومعبى من شاور اشاسا
قال حاضر 
وهوه فرحان انه راجعله
ويقال ان صلاح الدين قال : 
"يا مولاي يكفي ما لقينا من الشدائد في تلك المرة " 
فنور الدين قال سيروا على بركة الله 
مش هتبقى نورماندى 2 المرة دى متخافوش


 
والتالتة تابتة يا صلوحة .. 
دنتا مستنظرك خير كتيييير لو تعلم يا بنى ! 
المهم خرج جيش شيركوه وصلاح
ونزلوا على القاهرة ف سلاسة 
ومحدش ضايقهم
وراحوا للعاضد ف قصر الخلافة 
الراجل استقبلهم ووجّب معاهم 
وادى الوزارة لشيركوه 
وقاله انتا اللى هتغنى يا منعم 
والامراء انبسطوا 
وفرحوا 
وهيصوا



مش بس الخليفة ورجال الدولة والجيش .. 
الشعب كمان اللى ما صدق وهيخلص من شاور
اللى يا ترى راح فين ف وسط الهيصة دى 
بعد ما العاضد خلعه ؟؟

 
بيقولوا الباشا قعد زى الكلب ف بيته مقدرش يهمس
لا حامية افرنجية تلحقه 
ولا هوه موالس مع شيركوه وصلاح 
ولا العاضد طايقه
وحتى الامراء الفاطميين كارهينه
والشعب كله بعد حرق الفسطاط ع الفاضى 
بقى عاوز يولع فيه هوه شخصيا
بس نظرا
لأن كان لسه عنده رجالة بتخدمه 
فالكل التزم الحذر 
وسابوه محتجز طوعا ف بيته
بس وقعد شيركوه ينظم ف الامور 
والأمن يستتب سنة سنة .. 
وشاور هيقعد ف الشمس يتفّلى ؟؟
لأ طبعا راح باعت لعمورى 
وبجد




 
ويرسمله الخطة ويقوله
" فليكن مجيئكم إلى دمياط في البحر والبر " 
وتكتم الامر 
بس ابنه الكامل عرف التفاصيل
راح هوه اللى شاكرله بقى !!
وقالهاله وش كدا : 
" والله لئن لم تنته عن هذا الأمر لأعرفن أسد الدين "
فرد الكلب شاور
طب ما كدا هنتقتل انا وانتا يا مغفل ...
فرد الابن ...
" لأن نقتل والبلاد بيد المسلمين خير 
من أن نقتل والبلاد بيد الفرنج " 
شوف الغُلب وصل الناس لأيه ؟!!
جدع والله 
وما أشبه الليلة بالبارحة فعلا



المهم ..
شاور هيقعد يتسلى بالتخطيط 
بمؤامرة لقتل شيركوه عشان يرجع للكرسى 
وشرعية شرعية
شكشوكة الوزير الجديد
هتوصله التفاصيل 
ويتعمل قعر مجلس بقصر الخليفة 
اللى هيحرض علنا على قتل شاور
ولا واقف وراه الفرنجة ولا المانجة 
لازم يموت ومفيش فايدة 




ويوصلوا لقرار بقتله
اكمنه بقى خطر على بلاد الإسلام
وتتعمل خطة للأغتيال 
بيختلف علي تفاصيلها المؤرخين
لكن كلهم ف النهاية 
بيتفقوا على كام نقطة


1) امراء الجيش الفاطمى اشتركوا ف المهمة
2) صلاح الدين كان احد منفذيها
3) العاضد كان المحرض الأول عليها
وصمم يشوف راس شاور بعينه
#انا_كمان_كنت_عاوزة_اشوفها_والله



واصطادوا الوغد بالغدر ف زيارة له 
عند الامام الشافعى كدا 
وكتفوه 
وبعدين دخلوه خيمة 
وقطعوا راسه النجسة 






 وبعتوها قصر الخليفة
ومات هذا الكلب موتة تليق به 
شوف بعد ما كبد البلد ارواح وخساير قد ايه ... ! 





اللى مزعلنى بقى ..
ان العاضد كيس الجوافة الفاضى دا 
أمر حراسه يستدعوا الكامل .. بن شاور
فاكرينه الجدع الطيب المخلص 
اللى مكنش عجبه وضاعة ابوه 
الخليفة أمر بقتله 
 :((






والمؤرخين بيفسروا دا بأن العاضد 
حب يقطع كل سلسال شاور 
عشان محدش يرجع يطالب بحقه ف الوزارة
اكمن كل الوزراء وقتها ورثوها لعيالهم من بعدهم !
وشاور نفسه .. 
ف الحوار دا كله مات هوه واخوه وولاده التلاتة 
سليمان .. وطىء .. والكامل
يعنى جاب الخراب والموت لنفسه ولكل من حوله !!





وهما شهرين وملحقش الجدع يتهنى بالمكاسب 
ومات أسد الدين شيركوه .. 
يقال مسموم والله أعلم بالحقيقة
بس الأكيد ان الامراء وقتها 
اختلفوا على تولية صلاح الدين مكان عمه ..
شوية قالوا هوه الاحق 
والعسكر بتوعه مش هيسمعوا غير كلامه
وشوية قالوا احنا اولى واكبر سنا 
فالنهاية كفة القوة رجحت 





وتولى الايوبى وزارة مصر
ومتغلبا مش بس على عقبة السن ..
 تخطى كمان حاجز انه وزير سنى ف خلافة شيعية 
بس لأن القوة هيا اللى حكمت 
 محدش اتكلم 
حتى العاضد يا نضرى وافق 
وانبسط
وبعتله بس وطلب منه يفى بالوعد 
ويكون قد المسئولية وكأنه فهم التيتة 
وعرف ان كله بتاع مصلحته 
 وكلهم بيقلبوا فرعون ف الآخر 
وموسى بيختفى ويروح ف الباى باى !!






ودا اللى هيحصل لما صلاح الدين شوية بشوية 
هياكل تايجر ويسيطر 
والبلد تبقى عجينة طرية ف ايده 
وحبة حبة العاضد يبقى انسان مش موجود ف الوجود
وصلاح الدين يجرده من كل حاجة
حتى الحصان اللى بيركبه
ويحبسه ف قصره لحد الجدع ما ينقهر
ويموت ف عمر الـ 21 
آه تخيلوا كل الأفلام والأهوال اللى مرت عليه دى
وكان دا سنه !


 
والعاضد ف اللغة .. هوه القاطع
والواد مخدش من اسمه حاجة 
غير ان بموته انقطعت الخلافة الفاطمية ف مصر للأبد 
وابتدى عصر الدولة الايوبية







وادينا قولنا ازاى دخل بنى أيوب مصر 
وبعدين ف ليلة تانية 
نبقى نحكى ازاى صلاح الدين
اخد مصر وطبقها وحطها ف جيبه .. 
هتكتشفوا مهازل والنيعمة


 
وتوتة توتة ..
خلصت حكاية شاور .. نيرون الفسطاط 





 

نقول الملاحظات 






1) اثناء دعبستى على صور لصلاح الدين 
طلعتلى الصورة دى 
ورغم انى كنت ف المتحف الحربى بالقلعة من مدة
 بس مش فاكرة انى شوفت التمثال دا 
 بس على أى حال 
اللى كتب تحته ...  خير اجناد الأرض
اصول يبطل مرقعة .. 
عشان صلاح الدين مش مصرى 
ومش من عندنا اصلا 
ولا له علاقة بمصرواجنادها خالص !
سوى انه دخلها ف اطار اتفاق لانقاذها 
وبعدين بلعها هوه ف كرشه 
#هكذا_كل_العسكر



2) العاضد يا كبدى 
كل ما يلجأ لحديطلع مقلب 
#بعلش يا حبيبى اللى عملوا التوريث 
كان لازم يفهموك ان عزبة بابا هتبقى مطمع دايما
وأن




 
3) عمورى تصرفه منطقى
ونور الدين كمان 
والعاضد راخر مضطر 
لكن ضرغام وشاور دول ايه
دا ميكافيلى يقول لكل واحد فيه يا اونكل









4) ايه موضوع حرق الفسطاط .. وحرق البلد عموما 
هوه ليه كل حد يجيلنا
يبقى عاوز يولع فينا  كدا ؟؟ 
لييييه
لييييييه




 
5) واحنا عيال كانوا ف المدارس 
علمونا ف حصص التاريخ 
ان النص التانى من زمن الخلافة الفاطمية 
كان عصر الوزراء العظام .. 
احنا انضحك علينا يا رجالة
بقى دى خلق وأشكال عظام دى ؟ 
يا خى اتدفتنوا ف تربة ما يلاقوا عظامكم
وميعرفوش يقرولكم الفاتحة عندها يا بعدا !!! 
#آل_عظام_آل







6) جيوش الأنقاذ اللى سرعان ما بتتحول لجيوش احتلال 
الجملة دى تتقال للاخوان 
بس تتقال كمان للى بيتحامى ف عسكر 
مبيعملش حاجة لله  
و الكل يفهم انه بعد شوية 
كل حد اتزحزح من مطرحه ... هياخد التمن  
والسر كله ف ... (سرعان) دى ايه شكلها ومداها 


 
7) الشعب المصرى ف المصيبة دى 
غير الصندل والجلابية وحرق الفسطاط 
بيّن كرامة ف اكتر من موضع
و الخط الرابط بينهم حاجة واحدة انه هرش عدوه
يعنى عرفوا شاور مكان ضرغام فقتله
ووقفوا مع صلاح الدين ف اسكندرية
ووقفوا رغم حريق الفسطاط يدافعوا عن القاهرة 
الملخص انهم فهموا 
وميزوا عدوهم


 
وعرفوا الخطر الحقيقى فين 
وان الفرنجة وكل من تعاون معاهم ضد البلد 
كلاب وخونة 
ويا ريت الاخوة مناصرى بتاع صديقى العزيز بيريز 
ويارب امريكا والمجتمع الدولى وطز ف الناس 
وكمانالاخوة مناصرى بتاع مصر ممتنة لامريكا
دول ودول
ياريت يعرفوا ان .... آخرة الغُز علقة 
والعلقة دى هتجيلهم من ابن البلد
اللى هارشهم كويس
وبيسكت قد ما يسكت .. ومبينساش
بس كل شىء بأوان



 
8) انا ف الفيلم دا كله مصعبش عليا 
غير الكامل بن شاور 
الشاب كان وطنى ومخلص 
و مكنش يستحق ابدا هذا المصير 
اهو دا اللى فعلا اللى يتقال عليه .. هذا جناه ابى


 
 
9) المصريين بعد حريق الفسطاط دخلوا القاهرة 
ومن يومها مخرجوش
وبعد ما بقت سكن الحاكم وحكومته 
بقت بتاعتنا احنا 
و ف النهاية دايما .. 
مصر بتاعتنا رغم انف ال معرفش ايه دول وكدا





10) ودى اخر ملاحظة ف شكل سؤال
لو اخترنا وصف لشاور الكلب 
تفتكروا يبقى .. نيرون الفسطاط 
ولا الحرباية تقولك يا عمى ؟؟ 






وتصبحوا على ألف خير



-------------------------------------




( ندّ فرسآنْ ) ،،،، @alfaisal112
 ده طلع كيس بطيخ



Hope = Faith @HendMAbdelaziz
يوسف صلاح الدين الايوبى متنسيهاش
عشان بيوت الشعر لما بيتقال فيها يوسف
 نص الشعب بيفتكروه ابنه 
مش عارفين الفرق بين اللقب والاسم


Hope = Faith @HendMAbdelaziz
ربنا بيسلط ابدان على ابدان والشعب الغلبان ربنا يصبره

Ahmed Rageh @Ahmed_Rageh101
 كان قائد عسكري من يومه


Ahmed Rageh @Ahmed_Rageh101
 قواعد اجنبية


Jass @Yasminemz
بيفكرني بالحج بتاع اهلي و عشيرتي اللي مشيوا
 يولعوا في البلد اما اتخلعوا من الحكم
 

Ahmed Rageh @Ahmed_Rageh101
 طري وهيفضل طول عمره طري


Hope = Faith @HendMAbdelaziz
يخلق من دهر الفاسد عالم .. سبحانك يارب


Ahmed Rageh @Ahmed_Rageh101
ده مش صلاح الدين ده تمثال جندي مصري في عهد الدولة الايوبية



Hope = Faith @HendMAbdelaziz
لا هو خطأ مطبعى "الوزاء اللى خلو الشعب عظام وجثث"



Hany Zaky @Hany_Zaky
فيه رواية بديعة إسمها سيرة شجاع 
تأليف على أحمد باكثير عن شجاع بن شاور
 كانت مقررة فى المدارس المصرية 
فى التلاتينات والأربعينات

 
Hany Zaky @Hany_Zaky
 المشهد ده مذكور بالنص 
وبصيغة رومانسية جميلة فى الرواية السابق ذكرها
 وعاش فى خيالى كمراهق عمره 14 سنة وقتها


ro7albmama2@
مناهج الاحتلال الانجليزى دى مجرمة فعلا .. كانوا قاصدين يعملوا العيال الخنوع :)


Hany Zaky @Hany_Zaky
  وغالبا حلفان الستات فى المناطق الشعبية 
بمقاصيصها بدأ فى اللحظة دى :-)


Hope = Faith @HendMAbdelaziz
وانا كان نفسى اشوف راس العاضد .. 
هو السبب والاساس

ليست هناك تعليقات:

إرسال تعليق

Related Posts Plugin for WordPress, Blogger...
"حقوق الملكية والملوخية والمهلبية ... الخ
محفوظة للست شهرزاد وإياك حد يسرقها ويحاول يزعلها آغجر .. مفهوم ؟ "