الجمعة، 18 أبريل، 2014

تــاجــوج والمحلــق : وللنخـــوة أصـــول


 
 
 
حدوتة النهاردة 
تخفيفا على الجمهور المعكوك بالسياسة والنكد
هتكون هجايص وخارج السياق شوية



الناس المتابعة من زمان
عارفة ان كل فترة كدا بنحكى
قصة من قصص الحب الكئيبة اللى أخرها غم ونكد
وذلك لأخد العبرة والموعظة مما سبقونا
قوم يا منعملش زيهم ونغلط ... 
يا منعملش زيهم ونحب من أشاسه ونخلص .. هه 
نبدأ بقى والقصة النوبة دى من جيراننا ف أسفل الخريطة
 السودان الشقيق
قالك من زمااااان قوى لما انهار سد مآرب
القبائل العربية ف اليمن كتير منها 
هج وطفش على الحجاز
 وم الحجاز عدوا البحر الاحمر 
راحوا السوادن




وأغلبهم استوطن جنوب السودان وشرقها
ييجى حوالى 40 قبيلة واكتر 
والناس الحلوة اللى هنحكى عنهم النهاردة
 قعدوا ف كسلا
القبيلة اللى نقصدها اسمها (الحمران)
وناسها اشتغلوا بالرعى والصيد والتجارة
وزعيمهم اسمه .. الشيخ محمد علي الهاكين



الحاج محمد دا بقى مربط الفرس
عشان هييجى ف ليلة يلعب الشيطان بعقله
فهيغلط مع الموادم بتاعته
قوم الست تحمل وتخلفه بنت
وليه بقول الشيطان؟؟




عشان البت الغلبانة دى هتنولد زى القمر ..
غزالون يهبلون زى ما بيقول الكتاب
وابوها هيسميها (تاجوج) يعنى الزهرة الجورية
ويخافوا عليها من الحسد



البت كانت حلوة زى ما قولنا
طيب زعلانة ليه يا فطمطم دلوقتى ؟؟
أقولكم استنوا لما تسمعوا باقى الحكاية
وانتوا تعرفوا قصدى
المهم .. كبرت تاجوج



وانتوا عارفين السودان طبيعة خلابة
والجو سخن ودرجة الحرارة مرتفعة
فالقصد البت توتو أستوت
وخراط البنات خرطها
وبقت عروسة ننوسة بتهوس الشوباب
والحاج محمد أبو تاجوج كانله أخت 
ومتجوزة وساكنة ف مطرح بعيد عن القبيلة شوية
مع جوزها وابنها
كان عندها ولد واسمه المحلق أو (المهلق)
متفرقشى



الواد كان بايظ واخلاقه تلفانة وبيشتغل (نهاض)
عيب يا فاتيما تغلطى فينا وتقولى كلمة زى دى ؟؟!!
والنبى منا دا الحدوتة اللى بتقول
ايه نهاض دى ؟



(نهاض) دى بعيد عنكم
زى المثبتاتى اللى ع الدائرى وخلافه كدا
بس النهاض بقى
كان بيطلع يثبت راكبى الأبل مش العربيات
ويسرق منهم أشيائهم وكدا



حلوة الشغلانة دى ؟
جدا طبعا هنعترض 
الولا بيسترزق بدل القعدة ع القهاوى
ولاّ قصاد النت زى حالاتنا
اهو يجيب قرشين للمعايش
المهمممممممم


المحلق باشا كان شاعر وقويل وزى القمر هوه روخر
والظاهر عيلة الهاكين كلها كدا
وبيعرف بنات وستات
ويقول ف اشعار وقصص كدا
ومقضيها صعلكة


قوم ف ليلة من ذوات الليالى
قبيلة الهاكين عملت فرح لأحد بناتها
وجت العمة بأبنها عشان يهنوا ويباركوا
وكانلهم زمن غايبين عن القبيلة



الواد المحلق شاف تاجوج وسط البنات ..
طبعا البت زى القمر ومزة طحن
الجدع حّب على روحه
وقعد يزن على امه تخطبله فورا حالا بسرعة



الام طبعا صدمته
وقالتله ابوها لا يمكن يوافق يجوزها نهاض
حتى لو كان ابن اخته
ولو بطلت الشغلانة العفشة دى يمكن يجيلى وش 
أطلبها منه
.. هاه ؟



المحلق طبعا قالها موافق
بس روحى اطلبيها الام راحت لأخوها ..
وطلبت تاجوج اللى شباب القبيلة كلهم هيموتوا عليها
الخال طلب مهر غالى



وقبل المهر
طلب ان المحلق يبطل اغارة على ابل القبائل التانية
ويتلم ويبقى راجل محترم
الام والعريس وعدوه
فراح موافق ...
وجوز تاجوج لأبن عمتها


لحد دلوقتى احنا حلوين اهو
والجوازة تمت
بس احب افكركم انى حكيت حكايات قبل كدا برضو
عن ناس اتجوزت احبابها
بس المسألة اتعكت ..


نكمل



تاجوج لما اتجوزت المحلق
كان عمرها ييجى خمآشر سنة كدا
صغيرة ف السن والخبرة
وحبت ابن خالها بحبه ليها وغرامه الشديد





المحلق بقى كان وسيم وحليوة وشاعر وداير ولافف
وحكايات
واتجوز البنية شغفا
لكن دماغه كانت بجنون الشعرا وصعلكتهم الخ الخ
كان مبيخدش باله اوقات ويروح راقع كام بيت شعر
ف غزل واحدة .. من حبيباته القدام
قوم تاجوج دمها ينحرق وتثور لكرامتها
ويتخانقوا وهوه يصالحها


وبعدين قعد يكتب فيها شعر ويهيم
ويوصف المفاتن وحاجات عجيبة كدا
لدرجة ان الناس كلها استغربت منه
وقالوله خف شوية دى المدام بتاعتك آجرع!!


وهوه عادى مش مهتم .. فيقول :
وَلّف ولايف
شنْ لمّ الَرّكَبْ للقام هو زايفْ
تكَسّر في نهيدنْ ماهو زايفْ
وتبرد حُمّة الصيف المصايف



الجدع ببساطة بيقول ان جمال تاجوج حقيقى
مش مزيف زى الباقيات نهديها مبينكسروش
وجسمها ف عز الصيف بيكون ملمسه بارد




فصّْ المـاظ مركـب فـوق مجمّـرْ
فصّْ عينيك يا أم خشماً مجمّـرْ
فوقْ بستان تحت سالك مضمّرْ
جليـدك طاقـة الكـيـدي المنـمّـرْ



ومحدش يسألنى اللى فات دا معناه ايه ..
واضح جدا انه فيه قلة أدب رهيبة
يعنى لا تليق بواحد متجوز يقولها عن مراته
وخلو بالكوا
احنا بنتكلم عن عالم كانت عايشة
ف سنة الف سبعماية وشوية ..
يعنى اللى بيشبب ببنت ..
يعنى يقول فيها شعر كان عيبة كبيرة
ومبيتجوزهاش ف الغالب


على حظ المحلق انه مسك لسانه لحد ما اتجوز تاجوج
وبعدين عياره فلت ومبقوش عارفين يوقفوه
والمهم قعدنا كدا شوية
وتاجوج تناكف فيه وهوه يناكفها


والأتنين بيموتوا ف بعض وهوه هايم بيها
ويقول شعر والناس متغاظة
ومرة واحد من ولاد عمه
واسمه النور بن اللمم خده على جنب
وقاله انتا ايه حكايتك؟


فضشحتنا يا منيل وسط القبائل
ومراتك كل مفاتنها بقت معروفة للقاصى والدانى
انتا اتهبلت بيها
وبعدين مفيش ست بالمواصفات دى أشاسا
قوم المحلق رد بإيه ؟

يلا حد يبهرنى بقى ...


ما شاء الله
" @WIZARD_Mohamed "
جابها من اول تويتة اهو
:)


حلو حلو الجمهور متابع وغدنة الشعرا .. ومذاكر كويس
شاطرين يا ولاد هوه فعلا عمل كدا
وقال لأبن عمه .. اصلك متعرفش
هيا جميييييلة قد ايه
وتعالى معايا


وانا أوريك عشان تقدر ظروفى ..
وتعرف ان عندى حق
والبت زى يوسف بيه وهبى ما بيقول
زى الكوستليتة وتتاكل اكل 






بصوا احنا لحد دلوقتى
عنفترض ان الزوج المهروش بيتكلم ف عاطشفيات
اللى هيا يشوف شعرها يسمع صوتها .. ضحكتها .. كدا
انما احنا طلعنا غلابة قوى يا سيد




عشان اسم النبى حارسه المحلق
هياخد النور بن اللمم ابن عمه من ايده
ويوصل بيه البيت ويفتحله خرم ف قماش الخيمة
عشان يشوف منه كويس ونظره ميتعبش
#احليلة



وبس خلاه يتمركز ف المكان المناسب
وقاله باى مؤقتا وراحل داخل ع الموادم
ومساء الخير يا تاجوجتى يا حبيبتى
ردت .. مساء الخير يا حبيبى أجيب العشا؟
وفعلا قعدوا يتعشوا وبعدين بدأ الهزار والفرفشة
وراح قايلها وش كدا
يا تاجوج عاوز اطلب منك طلب
قالتله أؤمر يا زوجى العزيز .. !
لأ_بلاش_متقوليش_أؤمر_دا_ندل



قالها
عاوزك ترقصيلى دلوقتى ... حالا
ومعلش ستوب نوقف الشريط لدقيقة
عشان ... لنا .. هنا ... وقــــفة


احنا زى ما قولنا بنتكلم ف زمن بعيد
حيث المرأة لها تقاليد وبتاع
ونظام قناة التت
والرقص ف الأفراح كمجاملة
وبدل الرقص الشرقى ف الجهاز بتاع العروسة 
والأفلام دى
مكنش موجود




زائد ان رقص البنت ف اياميها
كان مقتصر ع الغوزاى والمنحرفات والجوارى
والبت كانت 15 سنة
يعنى لسه صغننة على خبرة الحريم الكبيرة
 القصد .. م الآخر
الطلب كان عجيب جدا جدا جدا
وتاجوج حاولت تفلفص من تنفيذه
لكن المحلق حاصرها بإلاصرار عليه
وانتى مراتى ولو مرقصتيش هروح لواحدة من اياهم
وحركات وحجج الرجالة دى انتوا هارشين



البت اتزنقت زنقة الكلاب ف حارة سد
وقالت موافقة بس بشرط
قالها خير ؟
قالتله اللى اطلبه منك تجيبهولى
فضحك وقالها حاضر بس كدا
وكان فاكر انها هتطلب دهب
او حتة معزة زى رشيدة تلعب معاها ولاّ حاجة
المهم قالها موافق
ويلا ...



وقامت تاجوج وخففت من هدومها
حسب أوامر المخسوف
وقامت تهز طولها هزة شمال وهزة يمين
واللى زاد وغطى بقى
ان المحلق نسى تمامااااااااااااا

نسى ايه يا طمطم ؟؟
الباشا نسى نفسه من منظر تاجوج وهيا بترقص
ومخدش باله ان النور بن اللمم واقف بيبص
من خرم ف احد الاركان .. #سكر_م_النشوة




زى ما حكينا تاجوج كانت غزال وجميلة ورشيقة
ومراته بقى وخرجت عن حدود الاحتشام التقليدى
وعملت اللى بتعمله المحترفات ف فن الهوى
زى ما تقولوا الواد أتلحس ف نافوخه
وزاد ف هوسه
وقالها رجعى ايدكى ورا راسك
وارفعى شعرك واتميلى كدا وكدا
وقوليلى لو جالك خبر موتى هتنوحى عليا ازاى
وانتى بترقصى .. !! #الهبل_ف_الجبل


وروحى وتعالى وارفعى توبك ونزليه .. الخ الخ
الملخص خلاها تعمل عجين الفلاحة
وخلاص دماغه ساحت م المنظر
وخلاص خلصت تاجوج فقرة القرد دى
والمحلق خلاص انتشى بلا خمرة
وقالها تعالى جنبى وقعد يهزر معاها ويضحك
وبعدين قالتله
انتا وعدتنى تنفذلى اللى هطلبه يا واد عمتى .. صح ؟



قالها عيونى يا حبيبتى .. قولى عاوزة ايه ؟
قالتله .... 



طلقنى



المحلق مستوعبش اصلا الكلمة
يعنى احنا نازلين رقص ودلع
وشكل ليلتنا فل
وهتبقى فاتحة خير علينا اشاء الله





تقوم تقوله ...  طلقنى !!!
وبس يا تاجو متقوليش الهبل دا
فإذا بالست أصرت الحاحاً
وقالتله انتا خلتنى احس انى ف سوق الجوارى
ومعروضة بضاعة
ولا تستحقنى
وراحت تلم هدومها
وقالتله انا راحة لأبويا
والزوج المخضوض يقول ... لأ مش هطلقك
فردت بالرد بتاع الحريم المعتاد تبقى مش راجل
ولا قد كلمتك
والظاهر الكلام آل جه على كرامته آل
واتغاظ قوى
وفجأة افتكر حكمة الأجداد



اللى بتقول ال بيعرس يا وليداتى هوه الراجل
والأرجل منه ال بيطلق
والأرجل منهم كلهم ال بيعرس فوق مرته الأولانية




قالك ف نفسه ايه البت دى هتهزئنى يعنى
ومش راضية تلين ولا تتصالح
طب انا أطلقها ويبقالى طلقتين
وأبقى أردها تانى لما تهدى وأصوم كرانتى
لأ _راجل_قوى_يا_خويا



وبس انتى عايزة ايه ف ليلتك السودة دى ؟؟
تطلقنى
قالها خلاص .. انتى طالق
وف هذه اللحظة يحصل ايه يا عيال ..
قولوا كدا انتوا شاطرين حلوين



الواد البائس اللى كان مستخبى
وبيبص من وراء الخرم دا اتخض يا كبدى
اول ما سمع كلمة الطلاق
وراح فازز قايم هربان وعمل دوشة
وهوه بيهرب
قوم ايه؟
تاجوج شافته .. وبقت الغلطة غلطتين
وهااااارك اسود يا محلق
كدا اتنيلت خالص مالص بالص #معاك_ربنا_بقى




والموقف كالآتى 
تاجوج رجعت بيت ابوها متطلقة
ومكسورة ومفضوحة وحالها حال
والمحلق قعد يسوق عليها الكل
ويحاول يرجعها
وهيا ترفض


النور بن اللمم اللى شاف الليلة السودة دى
هيهرب من القبيلة مكسوفا من نفسه
وبعدين يرجع تانى ويعتذر لشيخ القبيلة وبنته
ونفضل شوية ف الهم دا
وتاجوج رافضة المصالحة
والمحلق متبهدل وعمال يعتذر ويقول ف شعر
وركبه المرض وجو مجنون ليلى كدا
قام صعب على خاله
وحماه ابو تاجوج يعنى




وبعدين قال انه مستعد يميل دماغ البت ويرجعهاله
لو بطل يقول شعر لمدة ليلة واحدة بس
المحلق هيص وقاله حاضر آخال
واتفقوا على يوم بساعته وتاريخه
وابتدت الليلة من وقت العشا لحد الفجر ..
والمحلق ماسك لسانه وهيموت ويقول شعر
وبعدين سهر وسكر راح متهبب قايل شعر
وخلاص يا بابا خليك عندك متنزلش ...
الخبر وصل لحماه
وقاله انسى تاجوج
انتا متنفعش تصونها ولا تبقى قد كلمتك يا زول
يستاهل_الصراحة



مينزلش منين ؟؟
من هناك فوووووق حيث الطبيعة الساحرة الخلابة
وكل سنة وانتا طيب يا حبيبى
كانت جوازة زى الهباب
وشكرا
روح لأمك



طبعا كدا الموقف بقى واضح
المحلق مفيش فيه رجا انه ينصلح
تاجوج يا كبدى مجروحة وحزينة وبائسة
وبيتقدملها عرسان زى الفل
وبالعبيط




وهيا قعدت ترفض فيهم كلهم لحد ما تقدملها
النور بن اللمم .. الموكوس بتاع الخرم اياه
فراحت موافقة !
هل بت ما بتغيظ المحلق ؟؟
لأ
بس قالت سبب تانى وجيه
قالت ان اللمم أفندى شاف منها حاجات
 أثناء وصلة الرقص اياها .. 
مكنش المفروض يشوفها
بالبلدى كدا انكشفت عليه
وبالتالى هوه احق حد تتجوزه
 :(

المهم .. اتجوزت النور بن اللمم فعلا
 والخبر وصل للمحلق اللى كان هيتجنن ...
راح راقع شعر كله تهزىء
وقلة حيا
ومحدش يقولى أشرحى بقى


كَمْ سَوّيتكْ رفيق ماخْدَ المرة وتلاّلها
كسِب لومي أنا والثانية ودّرْمالها
كم شلّبتها وقلبتها قباله
التّمشِي ام خدود الدنيا مِي دايماله
 
 


معلش معلش .. يعنى انتا نطع وخسع
وقليل الرباية وفيك كل العبر 
وكمان بتهين ف البنية ... ؟!!!
خسئت والله

وانتوا عارفين الحبيبة بقى ..
متهورين ومجانين ومهاويس
المحلق هيسكت ؟؟
لأ طبعا هيروح يدور ع اللمم
ويقوله انزلى من ع الفرس نتبارز ياض

اللمم قاله لأه مش نازل
 راح المحلق شاده وقعه ع الأرض
وضربوا بعضشيهم
وطبعا المحلق غلب .. كان نهاض قولنا
يعنى بلطجى وش
زائد غيظ العاشق وغضبه سخنه خلقة واداله القوة


وبعدين كان فيه عرف سايد وقتها
ان اللى يغلب ف مبارزة يروح لحصان المغلوب
ويقطعله حتة من ودنه
ويقص شعر ديله !
أم_كدا_ما_ذنب_الحيوانات_يا_غجر؟؟



المهم اللمم جر أذيال الهزيمة لحد بيته
ف دخلته على تاجوج شافت الحصان والمنظر
هرشت الحكاية فورا
وقالتله انتا صارعت المحلق
قالها ايون


وغلبك ؟
 قالها أيون
قالتله جاك وكسة يبقى تطلقنى
قالها حاضر .. وأيون
 وراحت على بيت ابوها للمرة التانية




ورجعت البنية
فالمحلق راحلها تاااانى يقولها ترجعله
ردت عليه
 
 
 
 
 بـمكنش يتعز
واتجنن اكتر وبقى يستخبى عند بيتها ويراقبها
ويقول ف أشعار ويتغزل فيها :
سَدُرْ , أكتاف علا وضامر فؤاده
كفل , أوراك مُلُسْ متل الوسادة

واهله يقولوله نجوزك غيرها خلاص
فيرفض

وَلّفْ حَكِيّة
دخول البيت ع لى الأجواد خطية
إنْتِ يا بقّة العسل الرويةٍ
بعد الكور كيف أركب حوية


والواد انذهل يا نضرى وبقى مجنون ليلى رسمى
وقعدوا يجيبوا ف أطبة وسحرة
ويروحوا يلموه م البرارى
ويأكلوه ويشربوه ليموت م الجوع والعطش ! #مسكين


وف مرة مات عزيز للقبيلة ..
فراحت رجال القبيلة تشيعه وتدفنه
وبقيوا الحريم ف المطرح
وخرجت البنات تجيب المية
ف نص الطريق طلع عليهم قطاع طرق

قوم البهوات ف البداية قالولهم طلعوا الدهب والمال الخ
بس لما عرفوا ان تاجوج موجودة
الوضع تبدل تمااااااااااااااا
وحصل تحول فظييييع


الأخوة الحرامية سابوا الدهب والمال
وقعدوا يتخانقوا على تاجوج
كانت قمرة قولنا وكل واحد يتمنى ينولها
فالمهم قعدوا يتخانقوا
ويقتلوا ف بعضشيهم
وكل واحد يقول انا اللى هاخدها
فيطلعله زميله يتقاتل معاه لحد ما قربوا يخلصوا على بعض
 راح زعيمهم واكبرهم سنا متسلل وقت الضرب
ورايح لتاجوج


هياخدها لنفسه هوه ؟؟؟
 يارييييت دا هيروح رافع رمحه
ودابه ف صدرها مموتها
وقايل لتشكيله العصابى
خلاص ماتت
بطلوا خناق بقى !!!!!!!
#ناس_طيبين_قوى



وماتت تاجوج زينة البنات على إيد نهاض ..
بعد ما عذبها بالحب نهاض آخر
اللى هوه مين ؟؟
المحلق طبعا
اللى لما عرف بموت تاجوج ...
روحه راحت
راح قعد عند قبرها
وفضل من غير اكل وشرب لحد ما مات بعد أيام
وخلصت قصة حبهم مؤقتا
بس بعدين هتخلدها القصص
والادب الشعبى
والشعر والسينما كمان

وقبر تاجوج ف تاكا بمنطقة كسلا ينعرف
ويشتهر لدرجة ان يبقى فيه مطالب
بأنه يتعمل مزار سياحى زى تاج محل
عشان الكل يعرف حكايتها
الغلبانة البائسة دى


وينتشر شعر المحلق وكأنه حكمة ...

زى راقِـدْ رُقـادَ الدِّيـك فوق الحِـبـِلْ
عيشـةً بلا تاجـوج ما بتنْحَمِــلْ

قالها
وعملها
انا خلصت
وفاضل الملاحظات بقى

1)
 بادىء ذى بدء كدا
انا مش صعبان عليا ف الحوار دا كله
غير تاجوج الغلبانة اللى اتولدت جميلة
فكان جمالها نقمة عليها للأسف كحال الجميلات غالبا

2)
 هيا مغلطتش ف حاجة ..
حتى عدم رضوخها لرغبات جوزها العادية
بمقاييس الزمن الحالى
ف وقتها كانت عار وعيب وميصحش ..
 طب هيا ذنبها ايه ؟؟؟


 
ولهذا فـ
 3)
 احب أعترف انى اخيرا
لقيت فايدة لقناة التت
لكل زوجة مبتعرفش ترقص
القناة دى هتمنع طلاقات كتيرة كدا




4)
 دى تالت قصة او الرابعة مش فاكرة
الاقى فيها القبائل العربية بترضى بحاجات عجيبة غريبة
ملهاش دعوة بالنخوة خالص
هوه فيه ايه ؟؟؟

وقعدوا بس ف المدارس يضحكوا علينا
بالشرف والتقاليد والغيرة 
والنخووووووة 
الخ الخ
وكل دا طلع فاسكونيا
 
 
 
 
 
حد يناولنى مسدس يا جماعة
 
 


5)
لأ والاخ المحلق قال يطلق البت
ويبقى يرجعها بعدين بس
عشان كرامته الأهم دلوقتى
 نعم يا روح طنط
والأخ اللى بيبص من خرم الخيمة ايه نوظامه ؟؟

6)
 لأ والمحلق زعل من اللمم 
لما اتجوز تاجوج ..
وقعد يبرطم بكلام زبالة
مش انتا يا بابا اللى جايبه برجلك لحد مراتك
 
 


 
والدرس المستفاد من القصة دى
هيتلخص ف الاقتراح الذى تطوع بيه سلطان السكرى
الله يمسيه بالخير لما قال:
ما ترقصيله يا زينب





واخيرا واولا وكل وقت
انا مش بالعة الحدوتة دى من اولها اصلا
اصل راجل ايه دا اللى بيحب مراته ويعشقها
وبيقعد يتغزل فيها دا ان شاء الله .. احنا عنستهبل بقى !!!

وتوتة توتة 
خلصنا احدى قصص الحب الكئيبة
بتاعت الشعرا المهاويس
:))



-----------------------

Middle of Nowhere... @WIZARD_Mohamed
 اكيد قاله.. متيجي تشوف بنفسك..!!!
ما انا عارف قصصك الي تجيب الجنان دي...
راجل #نص #كم


amr salem ‏@amrosalim2001
 اصل فيه كميه بشر مثقفين دلوقتي عليا التولؤ
لو سالتي منهم حد ع الكلام ده ل يفتح بقه
ويطلع لسانه ازبهلال



Heba Awad ‏@HebaklaweeZ
 مش شرف ونخوة قد ما هي أعراف
بيحطوها حسب ما يناسبهم
ماتنسيش انهم كانوا لما بيجوعوا بيغيرواعلى بعض
وبعدين الزعيم كان له استثناءات


amr salem ‏@amrosalim2001
 ده بن محظوظه قعد يبص واتجوزها كمان هو فيه كده


الكبيرة قوي ‏@TheBlackFairy_
 مشكلة تاجوج انها ضعيفه وغبيه الحقيقه

  
amr salem ‏@amrosalim2001
 وصافيناز يا اوختشي وصيها علينا والنبي


amr salem ‏@amrosalim2001
 اها بيقولك في الأمثال .. الحلوه بختها مايل


amr salem ‏@amrosalim2001
 النبي الواد ده قطع قلبي ..
بس يعني تاجوج دي ماتحب الا عيل سيسي زي ده
ماذا اقول...
pic.twitter.com/SapNJQgWlW


memo وبس ‏@MahmoudMohamme6
 غلطة أهلها ما جوزوهاش راجل يصون
شرفها وجمالها ويستتها بمعنى أصح


اجزاخانجى |IBRAHEEM ‏@Dr_Ibraheeem 
ملاحظات ايه ..داحنا جهله والنعيمه !

اجزاخانجى |IBRAHEEM ‏@Dr_Ibraheeem
 انتخر !؟
 

memo وبس ‏@MahmoudMohamme6
أنا إتأثرت خالص والله
ومراتي جميلة عشان كده حزنت على الجمال إنه يتقتل
مراتي متغاظة منك..عشان قفلتيني الليلة
ههههههههه


Heba Awad ‏@HebaklaweeZ
 نموذج للجمال اللي بيبقى لعنه على صاحبته

  Middle of Nowhere... ‏@WIZARD_Mohamed
ده لو جايبها من جامعة الدول مكانش عمل كل ده..!!!
انا مستفز الصراحة من الخرتيت ده..!!!

  
Middle of Nowhere... ‏@WIZARD_Mohamed
 ايه الزوق الخرتيتي ده
(نسبة الى الخرتيت بقرنه اليتيم)..!!
ده مش اهبل.. لا!!
ده لامواخذة يستحق عن جدارة لقب
#انتخبوا_ال@*#@!!


فَاطِمَة ‏@fatima0elzahraa
أشاساً ؟ اكيد التويته دي بصوت القرموطي :D


Middle of Nowhere... ‏@WIZARD_Mohamed
 اه.. ما انا عارف انا...
#عادل_امام استيل...


طز BIG ‏@Fatoma999
 ماقلهاش اللى تعصى امر جوزها تبات والملايكة بتلعنها :))


Middle of Nowhere... ‏@WIZARD_Mohamed
 الصورة دي معبرة جدا عن الي بيحصل ده..!!! #غطوني_و_صوتو__عليا...
#الرجالة_ماتت_في_الحرب


طز BIG ‏@Fatoma999
اتارى اللى بيصوروا مراتتهم ويرفعوا الفيديوهات ع النت
ليهم جذور.... احييييه احيييه

Middle of Nowhere... ‏@WIZARD_Mohamed
اكيد قاله.. متيجي تشوف بنفسك..!!!
ما انا عارف ققصك الي تجيب الجنان دي...
#راجل #نص #كم !!!

هناك 4 تعليقات:

  1. انتي كتاباتك تحفة

    ردحذف
  2. rehan
    --------

    ميرسى جدااا
    كلك ذوق
    :))

    ردحذف
  3. قصة تاجوج قصه حقيقه مش بالمصخره بتاعتكم دي وهي بت اصول واهلها ليهم تاريخ موروس جد عن جد منذ دخول اول جد لها السودان وكان حاكم سواكن وقتها كانت اداريا تابعه للحجاز تولى الحكم بامر من حاكم الحجاز ومعروف وثايقيا بعد جمالها هي بنت حسب ونسب وهاذا جمال اخر لو عندكم القصة الواقعيه دي كان فلقتونا بيها فلق بقصصكم بتاعت الخيال دي ماريحتونا

    ردحذف
  4. السلام عليكم ودي اسألك من وين تجمع الصور حقاتك ؟

    ردحذف

Related Posts Plugin for WordPress, Blogger...
"حقوق الملكية والملوخية والمهلبية ... الخ
محفوظة للست شهرزاد وإياك حد يسرقها ويحاول يزعلها آغجر .. مفهوم ؟ "