الأحد، 25 مايو، 2014

حــكــايــات مصــريــة .... 13




  
نبدأ حكايات
قصيرة من ازمان مختلفة



القصة رقم (1)




وحصلت ف ايام الحملة الفرنسية على مصر
ومصدرها احدى اجزاء كتاب وصف مصر
تحديدااا الجزء بتاع المصريون المحدثون
عن العادات والتقاليد والمجتمع




واحد مؤلفى الجزء دا بيتكلم عن واقعة
حصلت لزميل له كان قاعد فى قرية الرحمانية
ف ميت غمر دقهلية حاليا
وانظر الخريطة
:)




الاخ الفرنساوى كان مسطر ع القرية
وهوه الآمر الناهى بسلاح الاحتلال والقوة ..
قوم مبقاش فيه أى وجود للعثمانلية
وهوه اللى كان المسئول الأول
ف مرة قاعد ..
لقى داخل عليه غاغة ودوشة وناس كتيييير
رجالة وكبار وضغار وهوليلة
وف وسطهم واحدة ست ماسكة نافوخها
وبتشر دم من تحت النقاب
 وزعيق ودوشة وهوه بيفهم عربى طشاش
وجابوا مترجم
والمهم فهم انه فيه خناقة
والست دى ضربها واحد
طب هوه فين ؟
قالوا الواقفين انه هرب
اول ما صرخت وجرينا عليها !


الفرنساوى لما شافها صعبت عليه
وقام من مكانه وراح يحاول يشوف الجرح
اللى ف نافوخها
وحاول يشيل الطرحة من على وشها
وهيا تقاوم لحد ما رضخت
 وكل دا طبعا وسط همهمة واستنكار
من اللى واقفين على حد تعبير اخونا الفرنساوى
ليه بقى ..؟
هل بت ما النخوة خدتهم والغيرة وكدا
اكمن اجنبى بيلمس ست تخصهم
الفرنساوى قالك ابضنننننن
دول كانوا زعلانين عشان اللى عملته بعد كدا
لما قصيت حتة من شعرها
وجبت حتة قماشة من قميص قطعته
وضمدتلها جرحها .. !



الناس استنكرت انه يعمل كدا
وكأن تطبيب المجروحة دا فيه نوع من المهانة
ومش مقامه والمفروض انه مكان كبير البلد
او العمدة الخ 
المهممم
النحنوح الفرنصاوى داوى الغلبانة

وبعدين ابتدى يسأل عن الحكاية
قالوله فلان ضربها
طيب خلاص نجيب فلان ونعاقبه حسب القانون
قالوله لأ !
طب ايه انتوا ناس همج وبتاع وراح طاردهم
وسافر يسأل حاكم الولاية اللى هوه تابعله
فالحاكم اداله السلطة المطلقة
يعمل ما بداله
فرجع الرحمانيةلقى العسكر
قبضوا على الراجل اللى ضرب الست
فجابه وسأله ازاى يضربها
وانه هيتعاقب فاكتشف من النقاش
ان الراجل شايف ضرب الست عادى ومفيهوش حاجة
 فإتغاظ منه جدا
وقعد يديله محاضرة ف حقوق الانسان
وان الست كما الرجل
كما ان الجامهورية الفرنسية
لا تقبل بأن يبقى فيه عنف الخ 


فالراجل قاله ماشى ..
بما انكم هتطبقوا عليا عدل بلادكم
فأسمع شكوتى الأول
الست دى تبقى بنت عمى واخوها وابنه ..
سرقوا ارضى ايام التراكوة
ولما رحت اشتكى المماليك مرجعوش حقى
انتوا بتقولوا انكم انهيتوا ظلم المماليك
وجايين تخلصونا منهم
فرحت اخد أرضى من اللى نهبوها منى
بس خلاص !
الفرنساوى ازبهل شوية وبعدين لقاله مخرج
مش هيغلب يعنى
وكمان رده ان القانون الفرنسى
والعدالة بتاعتنا متقبلش العنف
وانتا ضربتها وهتتعاقب وخلصنا !


وركنه على جنب
ونادى كبرات القرية واعيانها
وسألهم ماذا تفعلون ف موقف زى كدا
لما بيتكرر فردوا عليه بأنه مبيحصلش
والحريم عندنا بتنضرب عادى ومحدش بيتعاقب
لكن لو راجل ضرب التانى
بيبقى عصايا قصاد عصايا ..
وفيه غرامات وضرب ..
وموت لو وصل الامر لكدا
فالفرنساوى حكم بـ 25 عصايا

وفؤجى بإستنكار رهييييب من الحاضرين ..
انه رقم كبير جدااا
ومينفعشى
وانتا كدا هتجرأ علينا الحريم .. !
فراح ممشيهم ..
وجه وقت التنفيذ 
وتفاجىء بمماطلة من كل الموجودين ..
اتغاظ قوى وراح ناده لواحد
من على اطراف القرية
ولما جه عشان ينفذ الضرب ضرب المتهم
بحنية ورقة وهوادة !
لدرجة ان الفرنساوى اتغاظ جدا
ودمه اتحرق ونده لحارسه اللى كان من مالطة
وامره يكمل ضرب .. بس بذمة
وغل كما ينبغى
وتوتة توتة .. الحكاية خلصت



وملاحظاتى ان الاكيد
انى ضد ضرب أى راجل لأى ست ..
بس الأخ الفرنساوى عدالته عرجاء
ومكلفش نفسه يسأل .. كلام الراجل صح ولاّ لأه
وانه اتسرق منه ارضه وكدا !


ثانيا بقى العدالة الفرنسية
لا تقبل لشخص ان يمارس عنفا ضد احد ..
انما تقبل تخش بلد تنهبها
وتقتل أى حد من اهلها لو قاوم وجود رعاياها
عادى !

اسم القرية "الرحمانية" سنتيمنتال قوى
وماشى جدااااا مع روح القصة
حيث ان الضارب مرحمش المضروبة
والمضروبة مرحمتش الضارب
والحاكم السابق والمحتل الحالى مرحموش المواطن
وظلموا الكل

والدرس المستفاد من هذه القصة هوه انه
الظلم عامل زى كرة التلج
تبدأ صغيرة وتتدحرج لحد ما تكبر
وتاخد ف سكتها أى حاجة وكل حاجة
بس


 القصة رقم (2)



المعبد اليهودى - القاهرة

من حكايات اليهود عموما
وعندنا ف مصر خصوصا
حيث ان الأخوة ليهم اعياد بعضها متطرف
لحد الجريمة المنظمة
واحد اعيادهم اسمه .."اليوبيل الفضى"
ودا باختصار عشان موجعش دماغكو وقلبكو
فكرته انه كل 50 سنة
اليهود بيحتفلوا بعودة الأرض ليهم
وبتطهيرها من الدنس اللى لحق بيها وبتاع
اذ ان الـ 49 سنة دول حصل فيهم حاجات ويحشة
ولازم تتصلح والنص بيقول حرفيا
"قدسوا السنة الخمسين فنادوا بأعتاق فى الأرض
لجميع اهلها فتكون لكم يوبيلا "


مين بقى اللى بيعمل حاجات ويحشة
ولازم نطهر الارض منهم ونرجعهالنا لتكون
"لنا" يوبيلا دول ؟؟
المسيحيين والمسلمين طشبعن
وأى حد تانى مش يهودى
المهم ان الحوار دا قعد يتتكرر
ومحدش ربط بينه وبينه الحوادث الدامية 
لحد ما ابتدت الحكاية تتجمع واحدة واحدة
ف سجلات واذا بالموضوع منتشر ف بلاد كتييير
وخد عندك .. جرايم ف :
فرنسا وروسيا والمانيا وسويسرا وبولندا
والنمسا وايطاليا واليونان واسبانيا
وامريكا وسوريا ومصر والجزائر
وغيرهم ..




وكلها ف توقيتات واحدة
وبتتم بشكل منظم وله طقوسه ونظامه الواحد
ومتعلقة باليهود ويوبيلهم
واحنا ف مصر نابنا م الغدر جانب
ويحكى ان ..
سنة 1881 فى مدينة بورسعيد الجميلة الهادية
ظهر راجل يهودى غريب عن البلد
وقعد ف عشة من العشش المتطرفة
على حدود المدينة
ظهوره مكنش مشكلة ف البداية 
اكمن البلد متعودة ع الأجانب والأغراب
زائد ان بورسعيد كان فيها يهود مصريين
وكانلهم معبد كمان




المعبد اليهودى - بورسعيد


الاخ بقى جه وآجر العشة
وبعدين عند بقال يونانى وقف يطلب خمرة يشربها
وكان معاه بنت صغننة ف سن ال8 سنين مش اكتر
وقعدوا وجه الطلب ع الترابيزة
اليهودى شرب وبعدين اجبر البنت اللى معاه
تشرب من الكوباية
والمنظر دا استفز اليونانى جدا
ولسه بيكلمه ويقوله ميصخش خبيبى
راح قايم بالبنت اللى بقت كانت ماشية 
مدروخة وبتتطوح وغابوا عن النظر ..


تانى يوم اليونانى شغال ف المحل عادى
لقى ست مصرية ماشية بمنادى
بتدور على بنت تايهة
وسمعهاوسمع مواصفات البنت
وعرف انها هيا اللى كانت مع اليهودى امبارح
زبون الغفلة السودة 
فخد الست وراحوا الكراكون
وبلغ عن الراجل وشكله ..
وبسرعة اتحركت قوة من القسم
 ومشطوا البلد ووصلوا للعشة ..
ودخلوها لقوا اثار دم .. وحصيرة ملفوفة
وبيفردوها لقوا جثة البنت
مدبوحة من رقبتها
ومتمثل بيها
وعنها والدنيا قامت مقعدتشى 
والبوليس مسك اليهودى 
اللى عمل العملة السودة دى ..
وخدوه القسم يفسحوه
فأعترف بكل حاجة وبالتفصيل
قال ايه بقى ؟؟؟



اعترف انه اتحرض على الجريمة دى
من واحد يهودى ف القاهرة
اتقاول معاه ودفعله مبلغ وقدره
وان الطلب كان دم طفل مسيحى مبلغش الحلم وكدا
 وانه .. القاتل يعنى لما جه بورسعيد
فشل انه يلاقى ولد مسيحى بسهولة
ولقى البنت دى كانت مسلمة
ومش هيبوظ الشغلانة بقى
فراح ساحبها وراه
وبعد ما دوخها بالخمرة ..
قطع حنجرتها وصفى الدم منها
ف 3 ازايز كبيرة



وقالك عشان اليهودى ف القاهرة
يتأكد انه مش دم حيوان ودم بشر ..
اخد جتة من حنجرتها معاه
عشان يثبت دقة الصنف
وان البضاعة مش مضروبة  #يا_سلاااااام



والبنت ماتت ف ظروف ابشع ما يكون
والاهالى ثاروا وبورسعيد كلها ولعت
والمحافظ وقتها عمل كردون حوالين حى اليهود
والمعبد منعا للمشاكل ..
وكانت ايام سودة 
وتوتة توتة الحدوتة دى خلصت


وملاحظاتى
انه حلو قوى الأعياد "الدينية" دى 
بتاعت دبح الأطفال عشان نرضى ربنا
لأ وبيقولوا علينا احنا اللى متوحشين وهمج !

ثانيا
برضو حلو قوى الاعياد الدينية دى 
بتاعت ندبح واحد "مسيحى" او "مسلم"
عشان الأرض ترجعلنا احنا "اليهود"
لأ وبيقولوا علينا احنا برضو اللى عنصريين !


ثالثا

حوار اليويبل ابو كل 50 سنة دهون 
كان 1881
وبحساباتى المتواضعة أخر واحد كان 1981
والجاى هيبقى ف 2031 وعلينا خير 
فيا حبذا الجيل القادم يعملوا حسابهم 
ويحرصوا بقى من الهطل والهاطلين

القصة رقم (3)


 








عن فندق سميراميس اللى اتبنى
ثم تم افتتاحه سنة 1907 على كورنيش النيل
ف حتة من اجمل ما يمكن



وسر تميزه كان ف موقعه اللى مكنش تقليدى
لأن اغلب الفنادق كانت متركزة
ف الازبكية والعتبة وميدان الاوبرا .. وما حولهم
فجه رجل اعمال ايطالى
ومتخصص ف بنا الفنادق ف ايطاليا وسويسرا
واشترى الأرض وبنى عليها الفندق بـ 6000 متر



موقع الفندق المميز بين قصر الدوبارة
وثكنات قصر النيل اللى احتلها عسكر الأنجليز
بعد 1882 خلته مشهور
وعليه الرجلين كتير





وبيقولوا ان اسمه ف الاول كان .. رمسيس التانى 
وبعدين غيروا اسمه لـ "سميراميس" 
تيمنا بالاميرة صاحب اشهر حدايق معلقة




ليه ؟؟ 
قالك عشان الفندق اشتهر بطابقه الاخير 
"الروف" وقعدة النزلاء فيه



ودى كانت عادة غريبة
 وبدعة مستحدثة ف عالم الضيافة
ومفيش فندق عملها قبل كدا ف مصر ... 
والفندق حضر الحربين العالميتين الاولى والتانية
ونزل فيه مشاهير وعظماء من كل حتة ف العالم




واشتراه الحاج بهلر
مين بهلر ؟

دا كان من رجال الاعمال برضو المشاهير
ف عالم البيزنس والفندقة والعقارات
وله ممر شهير ف وسط البلد بأسمه لحد النهاردة 
ممر بهلر


 
وسميراميس صمد لعوادى الزمن بمبناه القديم

لحد ما بعد الثورة ثم ف السبعينات قرروا يهدوه ..
معرفش ليه .. ؟!!!




وباعوا كل مقتنياته لفنادق تانية
زى عمر الخيام وشبرد وغيرهم من محبى الأثريات
ف مزاد علنى




 واتبنى مكانه المبنى القبيح الحالى .. 
واخد اسمه
لكن اكيد مش واخد الروح
ولا الجمال
ولا العبق



وتوتة توتة خلصت حكاية الفندق 
وليه بحكيها اصلا ؟؟ 
ولا حاجة بس حبيت اقول سبب التسمية
لأنها فعلا ظريفة
:)

الحكاية رقم (4)





 ودى عن مذبحة على صغنن كدا ..
تمت بعد رحيل الحملة الفرنسية
ورجوع العثمانلية تانى على راس اسطول
بقيادة حسين قبطان باشا
والراجل يا خويا ما صدق رجعوا مصر
واتملوا غل من ناحية المماليك تحديدااا
ودخلوا على بيوتهم ونهبوها
واخدوا الخدم والحريم اسرى وعرضوهم للبيع !


ساعتها الشيخ السادات اتصدالهم
وقالهم انتوا جايين تنقذونا ولا تعذبونا زى الفرنسيس ؟!!
وحسين قبطان ساوم
وقال خلاص الحريم متتبعش #لأ_شهم_ياض
 وبسرعة البرق الخبر وصل لأمراء المماليك 
ورجالتهم اللى عرف يهرب يهرب 
#دكورة_طول_عمرهم
اما الباقى ولسه عنده دم فضل
واعلنوا الحرب بقى وبتاع




كان وقتها مراد بك .. غار ف داهية مات

وفضل كام نفر منهم ابراهيم بك وعثمان البرديسى
وغيرهم ..
قبطان قال
وبعديييين ؟
وتفتق ذهنه عن فكرة .. هينقلها عنها بعدييييين
الاسطى محمد على
وانه يبعت للامرا يعزمهم على مجلس صلح
وبعدين هيغدر بيهم
وبالفعل حدث ذلك


بعتلهم كلهم يعزمهم على وليمة ف سفينته

اللى قاعد فيها ..
وحضر جزء كبير منهم
للسفينة الراسية بابو قير .. اسكنكرية





والمصدر بيحكى انه آل ايه ..
ان الامراء حضروا ف كامل الأبهة وبأسلحتهم
وطلعوا فوق سطح الغليون المسمى .. ازج عنيرلى
ومحدش يسال يعنى ايه بقى !


اول ما طلعوا ملقوش حسين قبطان
ولقوا مساعدين له شكلهم مكنش مريح
وماطلوا ف الاجابة وطلبوا منهم يسلموا سلاحهم
فالامرا رفضوا
والموقف اتكهرب
ولسه رجالة حسين قبطان هيمدوا ايديهم 
راح محمد بك المنفوخ شاهر سيفه
وبقية الأمرا اتلبشوا ورفعوا الاسلحة روخرين
وابتدت المعجنة
والدم غرق الغليون


وانتهت العركة بقتلى
وجرحى مقبوض عليهم 
وهاربين نطوا من على سطح السفينة ناجيين بعمرهم
وكان يوم أغبر مطلعتلوش سمس يااااا ثامح
الناس اللى هربت وانكتبلها عمر جديد اشهرهم 
عثمان بك البرديسى


اما القتلى :
عثمان بك المرادي الكبير
وعثمان بك الأشقر
ومراد بك الصغير
وعلي بك أيوب
ومحمد بك المنفوخ
وإبراهيم كتخدا السناري
ومحمد بك الحسيني اللى حضر نيابة عن اخوه
أحمد بك الحسيني
وكان نصيبه يموت ف اليوم دا !


الانجليز وقتها كانوا معسكرين ف ابوقير
ولما سمعوا باللى حصل اتنكدوا
وراحوا يوقفوا المدبحة دى طمعا طبعا
ف رضا الأمرا اللى كانلهم القوة
صحيح مكنوش بالقوة الرهيبة يعنى .. 
بس هما كانوا أقوى من العثمانلية على الأرض
والانجليز كانوا بيرتبوا لقدام


المهم المدبحة اتلمت على ما حدث
وحسين باشا قبطان قالك خلاص اللى اندبح اندبح
وهما شوية وقامت الناس على البرديسى
وبتحريض من محمد على
والموضوع وسع
وقامت ثورة بجد ..
ثم انتوا عارفين الباقى ..
الشعب أصر على رحيل الوالى التركى
المتعين من قبل العثمانلية 
خورشيد باشا
اللى كان مكروه جدا


ورضخ الباب العالى اخيرا بعد مماطلة 
وبعت لخورشيد باشا يقوله
ارجع تركيا
ومرجعشى لوحده اخد معاه حسين باشا قبطان
قائد الاسطول اللى كان ذكى
وابن لئيمة لقطها بسرعة
وبيقولوا انه يوم الرحيل

وقف على سطح الغليون كدا وقال ف لحظة تجلى
رأيه ف محمد على هذا الوالى الجديد انه ..
 
"اني لأترك في مصر رجلا ستجده الدولة يوما

من أعظم خصومها شأنا وأكبرهم خطرا
ولم يوفق إلى سلاطينها رجل
مثل هذا الباشا في دهائه وحزمه ومضاء عزيمته"



وتوتة توتة .. الحدوتة خلصت
ملاحظاتى
وسنتنضمو بها لملاحظات متابعى شهرزاد الجُمال
ان محمد المنفوخ جاى المدبحة جاهز الحقيقة
واسمه كفاااااية



تانى ملحوظة ان مبروم على مبروم ميلفش
وحسين باشا قبطان دا محمد على
بس ف جسم واسم مختلف
الاتنين خططكوا لمدابح ودماغهم سم ناقع
يخلق من الوحش المفترس أربعين 
وياااارب
يارب يكونوا مبسوطين ف جهنم بعمايلهم السودة
لأن اللى يفترى على الامرا المسنودين كدا
اومال كان بيعمل ايه بقى ف الغلابة المساكين ؟
#خيالى_بيعذبنى_لما_افكر_اجاوب

 
                                 الحدوتة رقم (5) 





دى بقى من وحى سؤال عن الفتوات
وهما بجد ولا خيال أدباء زى عمنا نجيب محفوظ
والحكاية تبدا من بدرى
لما كانت الفتونة ف ايام تكون علامة الجدعنة والشهامة

وف ايام تانية تكون رمز للسرقة والنهب والشر والدناءة ..
الخ 


لكن الثابت انه ...
لما دخل نابليون مصر
وحصلت ثورة القاهرة الاولى والتانية
الفتوات كانلهم دور بطولى ف مقاومة الفرنساوية
لدرجة وجعت دماغ بونابرتة ذات نفسيته


ولكن من الحكايات هنسمع انه قليلا ما كنا
نلاقى فتوة جدع ومش بيظلم الغلبان
ويتجبر بس ع الظالم
اما الأغلب فكان مجرم اكتر منه شهم واخلاق
#للأسف



والحكاية دى هتكون عن "محمدين" فتوة بولاق
واشتهر بانه مارد بولاق واعتى رجالتها الخ
 والجدع اصلا م الصعيد
وكان مشهور بالشقاوة والغشومية
وف سن الـ 30 بقى الصعيد ضيق على اجرامه

فقرر ينزل القاهرة
ودى مش صورته 
بس صورة احد فتوات هذا الزمن 


محمدين بقى نزل القاهرة 1919
وسكن ف بولاق وعمل قلق للناس
وبقى يتشاكل مع فتوات الاحياء التانية
وبعدين ابتدى نشاطه الاجرامى ف اوقات الفراخ
#ألذ_ألذ_ألذ

 
وشوية ويشتغل ف فرن

وشوية تانية ف الفاعل ..
وشوية يعمل مصلى وبتاع ربنا
المهم عمل قرد عشان يغطى على مصايبه السودة
بس على مين .. ؟؟
الطبع والروح ف جسد
وما طلعت الطبع الا اذا طلعت الروح
ايده بقت تاكله ويتخانق ويضرب وعمل مشاكل
والكل بقى يتحاشاه .. مارد بولاق بقولكم !!


طيب يضرب ف الخلق ويعورهم وكدا .. 
ونتحمله ابننا برضو .. 
عادى
لأ مش عادى
عشان محمدين هيقرر يوسع نشاطه
لما هو أكبر
ونسيبه دقيقة ونروح السيدة زينب ... شارع المبتديان


ف الشارع دا كانت سرايا ابراهيم بك سرى
واقفة شامخة .. والناس سموها القلعة
من كتر ما كانت اسوارها عالية
وعلى شبابيكها حديد
ومتحصنة تمام


ابراهيم بك سرى مات وساب بعده بنتين .. 

زكية هانم وفهيمة هانم 
 والأتنين مكنش لهم نصيب ف الجواز
واصغرهم عدت الخمسين
ولسه انستان
الأب سابلهم 250 فدان ف الفيوم
والسرايا وشوية عقارات .. وفلوس ومصاغ 
غير طبعا السرايا القلعة
ومكنلهمش راجل يراعاهم بعد موت الأب
كان عندهم جناينى وبواب وخادم وطباخ 
وجه دكتور العيلة يعزى ف الباشا المتوفى
ولقاهم يا عينى محتاسين ف ادارة شئونهم المالية
والأرض .. 
 فعرض عليهم ابنه .. حسن نشأت
يشتغل وكيل ويراعى مصالحهم 
البنتين وافقوا ثقة ف الأب
والأب يا عينى نفسه 
مكنش يعرف اللى فيها
وان ابنه بتاع قمار


المهم حسن ف البداية اشتغل بما يرضى الله

وبعدين ديون القمار اتراكمت عليه
وف قعدته مرة مع الخدام بتاع السرايا
سمع منه طراطيش كلام كدا
ايه ؟؟
 ان زكية هانم وفهيمة هانم
شايلين فلوس ومصاغ كتير ف شنطة كبيرة
تحت السرير اللى بيناموا عليه .. !
فين السرير دا 
يبقى ف ملحق الجنينة حضرتك !
لأن البنتين بعد موت الاب القصر فضى عليهم
وبقى واسع ومخيف فقرروا يقعدوا ف ملحق الجنينة
وكان زى شقة صغيرة وعلى قدهم
غلطوا ؟؟
#لأه_طبعا


والبنات كانت مأمنة لكل اللى بيخدموهم ..
خصوصا ان طقم الشغالين كلهم فعلا كانوا كويسين
ومعاشرينهم عمر بحاله 
المهمممممم
حسن .. الوكيل الندل هيسمع سيرة الفلوس يرّيل
 وف سهرة من سهراته ف واحدة من مواخير بولاق
هيتعرف على فتوة بولاق .. محمدين
وبعدين الكلام يجيب بعضه
والستتين متجوزوش
ولو اتجوزوا حتى ميخلفوش
وهيموتوا ومفيش ورثة
والفلوس تروح لبيت المال والحكومة ..
طب ما احنا اولى ؟!!
وخلاص انعقدت النية على سرقة فهيمة وزكية
وابتدت تتحط الخطة


 محمدين بعت رجالته تراقب المكان
ولقوا السرايا فعلا قلعة محصنة واسم على مسمى
فبقى الاقتحام مش معقول
وفكروا ف حاجة تانية
وبقى التوقيت المناسب
 وكان الوقت ف نهاية شهر رمضان ودخلة العيد
ومراوح الاختين ف زيارة لمقابر العيلة برا القاهرة
عشان يزوروا الاب .. كما عادات المصريين


وف اليوم الموعود
البنتين اتحركوا بالعربية هما والخادم بتاعهم
وسابوا الجناينى والبواب ف السرايا
وعدى النهار وجه الليل
وفجأة ظهر مراهق قصاد باب الفيلا يعيييط
 وخرج البواب يساله مالك يا بنى
رد انه تايه من اهله ومكلشى
وبس لو ينام للصبح ف الجنينة
وبكرة هيبقى يحاول يرجع لأهله !
#طبعا_الباقى_معروف


الولد دخل مع البواب واتظاهر بالنوم ..
وقبل الفجر كانت قايم وفتح لمحمدين ورجالته البوابة
وف ثوانى البواب لقاهم كلهم فوق نافوخه
قيدوه وكمموه
 ولفوه ف اللحاف بتاعه
وخرجوا من عنده على اوضة الجناينى
اللى كان قايم يتوضى ويصلى الفجر
اول ما شافهم اتلموا حواليه وبالسكاكين قتلوه فوراااا

 
ودخلوا على ملحق الجنينة اللى فيه اوضة البنتين
ومن تحت السرير طلعوا شنطة كبييييرة
فيها فلوس ومصاغ ياما
واخدوا الغنيمة وكتوا بنفس طريقة دخولهم

ومنسيوش يقفلوا البوابة وراهم وعااااااااااااادى خالص


وكام ساعة النهار طلع
ورجعت زكية وفهيمة
دخلوا طبعا لقوا البواب ملفوف
متقيد ف لحافه .. فكوه وحكالهم
وجريوا كلهم على الجناينى لقوا جثته
ف قلب الجنينة ووسط بركة دم
ودخلوا اوضتهم
لقوا الشنطة بلى فيها اتسرقت
وبلغوا البوليس اللى قلب الدنيا ..
لبشاعة الجريمة
واكمن الهوانم من علية القوم وكدا
وليهم صلات وقرايب مهميييين 
سريعا
ابتدى التحقيق
وقولوا المصاغ بمواصفاته
وهنلاقيه عند بتوع الدهب
انما الفلوس بقى كانت كام يا هوانم ؟
قالوا عشرتلاف جنيه دهب
#يا_حالولى


ف البداية الشكوك راحت لناس ف الفيوم
ليهم مشاكل ع الارض والورث
وبعدين البوليس معرفش يلاقى أى خيط
وبعدين قالوا الجناة دخلوا ازاى ؟؟
لازم يكون حد جوه ساعدهم
او دخلوا عن طريقه وازاى عرفوا المعلومة ؟
المهم الشكوك اتركزت حوالين المخدومين كلهم
والبواب والخادم والطباخ طلعوا براءة
فضل الوكيل ..
سى حسن


اللى سجلات التحقيق بتقولك
انهم شكوا فيه لما لاقوا اثار اوحال
وطين ف جزمته مكنتش بتتواجد 
الا ف حتت زى بولاق ... وكر الأوباش والضيع
وهوه المفروض ابن ناس
وابوه دكتور وبتاع
المهم قرروا يراقبوه
وبالمراقبة تبين انه له علاقة بالاخ "محمدين"
فتوة بولاق وبس كدا قشطة
هاتوا المذكور 
وجابوه من على حدود قنا
اثناء محاولة هروبه
اول ما سمع ان البوليس عاوزه


وبيقولوا ان التحقيقات قعدت 4 شهور بحالهم
ومحمدين وحسن كلاهما ينكر
أن له علاقة بالحادثة
وف النهاية البوليس سابهم
نعم ؟
سابهم ؟
ليه ؟
لأن القضية 590 جنايات السيدة زينب أغلقت
لعدم كفاية الادلة
وان مفيش أى حاجة تربط
بين وجود الشخصين دول وموقع الجريمة !!!


وفلت محمدين من العقاب ..
وعاش باشا كام سنة يفترى ويجور
لحد ما البوليس الإلهى
عكشه العكشة الكبرى والاخيرة
لما جاله شلل
وهاجمته أمراض تانية
وقعد يئن ويتبهدل من المرض ..
لحد ما بقى شبح
والناس تتذكر حكايته وكأنه عبرة ومثل
وقعد ف المرار دا عايش ميت
لحد ما مات سنة 1940


وتوتة توتة خلصت الحدوتة دى
والملاحيظ كثر بس اولهم ..
راحت فين العشرتلاف جنيه الدهب دول تفتكروا ؟؟
إسالونى فين يا فطمطم
قوم أتفذلك بقى وأقولكم اقتراحاتشى


اكيد المخسوف دا دفنهم
عشان محدش يعرفلهم طريق
واما اخد منهم وعاش حياته
بس صعب والا كان بان عليه ومسكوه
واما ملحقشى
فالفلوس راحت عليه
وف يوم ما .. 
حد ابن حلال ربنا كاتبله خير وسعد
هيحفر صدفة ف الحتة دى فيلاقى الكنز وكدا
:))
#خيالات_حكايات_ساعات_بتحصل_والنيعمة


ثانيا بقى ..
سرايا عظيمة وخدم وهوليلة و250 فدان
وف الآخر نحط 10 الاف جنيه ودهبنا تحت السرير ؟؟
هوه بابا البك مكنش عنده خزنة 
يحط فيه حاجته ولا كان مقضيها زلع 
او تحت البلاطة ولاّ ايه ؟؟


ثالثا .. 
ايه احساس الواحد يا ترى 
وهوه نايم تحت منه الثروة المهولة دى
بحسابات ايامها يعنى .. ؟
كل ليلة وكل يوم ... على رأى الست
دا ايه اللبش دا يا ربى ؟؟


رابعا ..
ربنا بيخلص
والافترا اخرته وحشة بجد
ومارد بولاق .. فتوتها المرعب محمدين
ف النهاية ربنا اقتص منه
كما يستحق
ويمهل ولا يهمل


 القصة رقم (6)



وبما اننا ذكرنا الأفترا ..

والخسف
ندخل على اخر حدوتة ..
عن راجل مفترى برضو لما سالوه رد بكل استهزاء



(قَالَ إِنَّمَا أُوتِيتُهُ عَلَى عِلْمٍ عِندِي)


دا كان رد قارون ..
على اللى سالوه عن كل ما عنده من مال وخير
وفين حق الغلابة وليه الظلم ..
فرده عليهم انه عارف كويس اللى بيعمله 
وانتوا متعرفوش وكدا
#زى_ناس



وطبعا كلنا عارفين حكاية قارون
احد رجالات فرعون
واللى كان عنده ثروة مهولة مكنتش عند حد
ومفاتيح خزاينه
كانت تقيلة حتى على اشد الرجال
القصر بتاعه كان ف الحتة الحالية
المعروفة ببحيرة قارون ..
الفيوم
وربنا ف لحظة خسف بالقصر وبقارون الأرض
وبلعتهم




وقصر قارون كان 3 أدوار وفيه 336 أوضة 
مفضلش منه غير البوابة
وبيقولوا ان فيه جواه المدخل ممر
وعلى الجانبين ممرين للهروب
كان قارون عاملهم 
شان وقت ما يحصل قلق يفلسع فورااا  
والناس الطيبة بتقول
اننا لو نزلنا لتحت الحتة دى
يمكن نلاقى جثة الراجل
:)
انما على اى حال هنا ولا مش هنا
ربنا سابلنا بعض من أثر الطاغية عبرة وعظة





وملاحظاتى ع الحكاية دى ..
ان غالبا الطغاة لا تتعظ 
لا من الأثار ولا القصص لأن غالبا برضو
ربنا مش بيحبهم
ومش عاوزلهم الهداية
#ميستاهلوشى



والملحوظة التانية من القرآن الكريم
بترد بما يكفى ويوفى 
على كل واحد واخد ف نفسه قلم
وفاكر ان محدش هيقدر عليه
بأن 
"أَوَلَمْ يَعْلَمْ أَنَّ اللَّهَ قَدْ أَهْلَكَ مِن قَبْلِهِ
مِنَ القُرُونِ مَنْ هُوَ أَشَدُّ مِنْهُ قُوَّةً وَأَكْثَرُ جَمْعًا "


وتوتة توتة .. خلصنا حكايات مصرية
بتاعت الليلة دى
نرتوت المنشنات
وتصبحوا على الف خير


--------------------------





☺ Memo Mshahys ❤ @memo_5_7_3 
العداله انه يحاكم الراجل على ضربه للست
ويحاسب الست بانه ترجع اراضي الراجل بصفه رسميه
وكدة يبقى طبق العداله
لكنه انحازللست اكتر



سعدية سليم @sa3deaselim 
راجل عنده ضمير بينقح عليه



Ahmed Rageh @Ahmed_Rageh101  

يعني هو الراجل هيعمل فيش وتشبيه للدم




Mohamed Hassan @M7amd_Hassn 
 انا سمعت ان قادة معركة العالمين كانوا نزلين فيه
وعاملينه مقر عسكري ليهم في الفترة دي كمان
بس مش متأكد




Captain Haddock @hassan19211 
فكر رجال اعمال لاستثمار الارض لاكبر عوائد ممكنه
مهما كان القبح..
لو المساله فلوس بس يبقى الدول تبيع اثارها
عشان تجيب فلوس!




إحـــكى يا شهـــرزاد @ro7albmama2
 الحقبة الناصرية تحسها بتخرب كراهية وانتقام وغّل

اما الحقبة الساداتية تحسها شبعة بعد جوعة
ونهم للفلوس بشكل مرعب
والقبح عنوانها


لا تَصالح . @khalidelnhas 

انا هعمل فيفورت علشان مانساش
وممكن اعمل رسالة تذكير ترن بعد 16سنة!


Yasser Abdullah @Yasserigo 

محمد بك المنفوخ ما الراجل باين يعني فين المذبحة؟
دا هو مولود كدا منفوخ لوحده


Mohamed Hassan @M7amd_Hassn
افتكر هيبقا ليه جهنم لوحده حاجة سبيشيال يعني

:-)



farida allam @faridaallam

يخلق من ضهر العالم فاسد




farida allam @faridaallam 

يا عينى ع الولايا




 
Ahmed Rageh @Ahmed_Rageh101 

ايه شغل شارلوك هولمز ده





Ahmed Rageh @Ahmed_Rageh101 

قمار وخمرة ونسوان هيروحوا فين يعني



Dalia Salem ‏@MasryaGedan7

لا الصور دى لما يُسمى بمعبد قصر قارون
وهو بقايا معبد قديم مطل على بحيرة قارون
بس ملوش دعوه بقارون فرعون وحكايته .. يتبع




دى صورة قدس الأقداس للمعبد مش قصر ولا حاجه
هو تشابه فى التسميه ليس إلا
بيت قارون إتخسف بيه الأرض ومفضلش منه
ومن ثروته أثر

بيحصل تعامد للشمس على قدس الأقداس مرتين فى السنه
مره فى أول الصيف وموسم الحصاد
والتانيه فى أول الشتاء وخد الإسم من البحيره فقط


Captain Haddock ‏@hassan19211 6h
اه بس بقى حاجه معتاده وتراث

وناخد مزايا العادات القديمه والجديده
واللى تغلب به العب به ولا مبدأ ومصلحتى..
النتيجه قضيتها خاسره!



متهيالى اللى يحكم مفروض يتكون ذوقه الفنى
والحضارى و"الانسانى"الاول زى الخديوى اسماعيل
مش رجل اعمال او سلطوى دول ليهم تكوين خرب


 ده مش مرتبط بطبقيه او فقر..
الغريب يقال مترو انفاق روسيا عباره عن متحف..
ودى دوله عماليه
تكوين الذوق والمحافظه ع الاثار مش طبقيه



Captain Haddock ‏@hassan19211

باحب الايه دى مع المغرورين..
او كرد على القسوه على الغير لفضائح 
مهما بلغت دون رحمه بهم
"انك لن تخرق الارض ولن تبلغ الجبال طولا"



المعنى مهما فعل الانسان لمتع وجاه
فهو"محدود"وهى زائله وتافهة القيمه 
ومعرض للمرض والموت 
ومهما فعل فلن يحقق اى معجزة كالخلود مثلا





ليست هناك تعليقات:

إرسال تعليق

Related Posts Plugin for WordPress, Blogger...
"حقوق الملكية والملوخية والمهلبية ... الخ
محفوظة للست شهرزاد وإياك حد يسرقها ويحاول يزعلها آغجر .. مفهوم ؟ "