الأربعاء، 7 مايو، 2014

محمــد عــلى ف الزمـــان التــرللــّى ... 2






نبتدى .. 
بس اقروا قبلا الجزء الاول  .. هنا 
اللى حاضر معانا يفتكر اننا حكينا سريعا كدا
ازاى وصل محمد على لحكم مصر محمولا ع الأعناق
على نغمات تسلم الأيادى
واختارناك وبايعناك
وأفرم يا بيصى 
وأول سيادته مع اتلايم ع الكرسى
بدأ يقضى على كل اللى ساعدوه يوصل
وحطم هيبة المشايخ والعلماء
وعجن بعدهم المماليك ف مدبحة القلعة
ثم دخل ع الزغلولة الكبيرة بقى .. عصب البلد
الاقتصاد
واحتكر كل السلع لصالح الدولة
وبقى يبيعها بالسعر اللى يحدده
ويفرض ضرايب ع الخلق وحاجة قرف





والراجل يا خويا دخل علينا بالحنجل والمنجل
وقالك انا مشروع وعاوز البلد تنهض وتتقدم
وبكرة تشوفوا مصر
بس تشتغلوا معايا
اتاريه كان يقصد .. تشتغلوا عندى
ومتاخدوش حاجة وهتدفعولى كمان #اه_والله






واحد الأراء ردت على اللى بيقولوا محمد على
عمل نهضة تنموية وبتاع
بأنه مكنش الا"نهضة البعض واختناق الآخرين"
وايه حوارهم العالم دى كل واحد يخش علينا بنهضته
يجبنا الأرض وتحتها كمان .. ؟
#نهضتكو_حمرا



والحاج سنكفوله يادوب مسك وهما 3 سنين
وف 1808 كان يملك أغلب أراضى مصر
هوه وعيلته ومحاسيبه ورجالة جيشه زى ما قولنا
وحكينا ازاى احتكر الزراعة
وإزاى كمان احتكر الصناعة والمنتجات
واحد المؤرخين بيدلل
على انها كانت عزبة ابوه شكلا وموضوعا ببساطة
لما جاب واحد من أوامره
وشاورلنا على كلمة انكتبت فيها عفويا 



الحاج محمد كان مطلع مرسوم لأحد حكام الأقاليم
وبيشدد عليه انه يجمعله المتآخر من الضرايب :
" البلاد الحاصل فيها تأخير في دفع ما عليها من البقايا
أو الأموال يضبط مشايخها ويرسلون للومان
والتنبيه على النظار بذلك
وليكن معلوماً لكم ولهم أن مالي لا يضيع منه شيء
بل آخذه من عيونهم"




شاخدلى بالك يا حاج محمد من الجملة الآخرانية دى؟
وليكن معلوماً لكم ولهم (تهديد)
أن مالي لا يضيع منه شيء (بيقول فلوسه)
بل آخذه من عيونهم (تهديد تانى)
طاه خير خير ...
الراجل كان معتبر المال ماله
والفلوس فلوسه
واحنا عبيده
والظاهر واخدنا تخليص كمبيالات ولاّ ايه متفهموش



المهم .. يحكى انه كان بيفضل الاجانب علينا
ووصل انبطاحه ليهم ان ف نهايات حكمه وصلوا
الجاليات المختلفة لحوالى عشرتلاف نفر
نصهم من الجالية اليونانية
و2000 طلاينة ونفوذهم التجارى استفحل وطغى
وبعد شوية انسحب على كل نواحى الحياة
ودا زود النفسنة عند المصريين
وخلاهم بعدييين هينتفضوا ضد التدخل الاجنبى بكل صوره
واول حد هيبين كرامة
بشكل واسع وصارخ هيكون احمد عرابى
لما يعمل حركة تمرد ف الجيش المصرى
ضد نفوذ التراكوة فيه


ونسيب عرابى
ونرجع لمحمد على نكسنا العلم ..
ظاهرة الاحتكار بتاعت سى محما
 ف الزراعة ف الصناعة كانوا مسمينها "التحجير"
والسلعة من اياهم كان بييجى مندوب من الحكومة
ويحطلها تسعيرة ..
وبعدين يتلم اللى عاوز يبيع واللى عاوز يشترى
من كل الأقاليم وياخدوها من المندوب
بالسعر اللى يقول عليه جنابه
وطبعا كان بيشترى رخيص ويبيع غالى



الموضوع دا عمل حالة سخط وغضب
بين منتجى الصناعات
اللى كان بيتفرض عليهم اسعار زفت
والحكاية دى خلت مثلا احد المصانع الصغيرة ف الصعيد
سنة 1824
وكان مصنع غزل ونسيج ..
عماله لما لقوا شغلهم هيروح بتراب الفلوس للوالى
راحوا مولعين ف المصنع بالمنتجات بتاعته غيظا وكمدا



ومحمد على بانى مصر الحدوثة
توسع ف نظام السخرة بشكل منقطع النظير يا جماهير
لدرجة ان مؤرخى عصره استنكروا
وفضحوه ف كل حتة خصوصا اوربا
عشان سى محمد كان بيلم الفلاحين
يشغلهم ف مشاريع حفر الترع وبنا المنشئات
وللعمل ف المصانع وغيره
ويديهم أقل القليل وشوف التسعيرة




كان الاول بيشغلهم ويديهم ملاليم
فكان الفلاح من دول بيهرب
راح مغتت وقرر يجندهم عشان يبقى الزام عليهم
وكان بيشغلهم سخرة ميرى
ويدى النفر منهم 15 قرش ف الشهر
بينما كان بيقبض القيادات التانية تراكوة وغيرهم
من 11 ألف لـ 12 ألف قرش
#لأ_فرق_تافه_الحقيقة



ومحمد على كان بيجند الفلاحين للسخرة دى
4 شهور سنويا وبأنتظام
كام واحد يا طمطم ؟
ألف اتنين عشرة ميت ألف ؟؟
لأ 400 ألف فلاح سنويا يشتغل عبد عند الباشا 



ويقال ان محمد على ضرب رقم قياسى بالـ 400 ألف دول
عشان قبل كدا ف أى عهد سابق
كان يوم ما أى طاغية يتمعظم
مكنش بيعدى الـ 15 ألف حتى !
وطبعا الفلاحين المتاخدين غصب دول
مكنوش خرفان يعنى وموافقين يتساقوا للدبح
فكانوا بيهربوا بعد اول يوم
يقوم محمد على يطاردهم ويرجعهم غصب
وبعدين يشغلهم وآخر اليوم يناموا ف ثكنات عسكرية
اشبه بالسجون ولا مسموحلهم يروحوا يمين ولا شمال
وطبعا اكل زبالة ونومة خراء ومفيش علاج صحى
فكان بيموت الآف
بسبب الخدمة خمس نجوم بتاعت الباشا



واللى كان بيعيش ويخرج بعد ما يكمل مدته الزفت دى
كان يا دوب يوصل قريته ويروح لامم حاله
ولامم عياله ومراته وكل ما يخصه
ويروح هاجج طفشان من البلد
عشان ميعرفش عسكر الباشا يجيبوه تانى ف وقت تانى
مهى كانت سلو وعادة سنوية بقى !




زائد ان الفلاحين يا كبدى
لا بقوا حرين يزرعوا وياكلوا من خير أرضهم
وبيدفعوا ضرايب
وكمااااان بيشتغلوا ببلاش عند الحكومة فخلاص كدا شكرا
اللى كان بيقدر فيهم ع الطفشان .. كان بيطفش
يطفش على بلد تانية او على الشام
وبأعداد رهيبة على فكرة مقارنة بتعداد السكان
ف هذا الزمن ...




ورغم ان محمد على عمل عقوبات صارمة للهاربين
وعمل كمان بطاقات زى تصريح خروج
يديه شيخ القرية او العمدة او أى كان هوه مين .. للفلاح
والنظام دا بدعه سى محمد
عشان يضمن ان كل فلاح يلزم قريته
وميخرجش منها الا بأمره
ومعرفش ليه فجأة افتكرت فيلم .. Chicken Run





ورغم كل العقوبات اياها
الا ان برضو المصريين منهم كتير
اللى رفض الظلم والجبروت
ووقف قصاد الطاغية محمد على
والوثائق بتقول انه سنة 1831 مثلا
هرب من الشرقية 6 الآف فلاح
واتقبض على عشرتلاف ف اسكندرية اثناء هروبهم
وكانوا بيتساقوا بعيالهم وستاتهم
ومعرفش ليه برضو افتكرت فيلم ...  سبارتكوس



وسنة 1845 قنصل انجلترا بعت لحكومته يبلغهم بأستنكار 
ازاى ... 
"ان عدد الاسر التى هربت من مديرية البحيرة
بلغ 12 الف اسرة وان عددا من الفلاحين اعدموا
لأنهم حاولوا الهرب"



بالمناسبة
الأرقام دى كبيرة جدا
ويكفى مثلا انى اقولكم ان بعض الأماكن
ف عهد محمد على .. زى الأقصر مثلا
كان عدد سكانها مبيزيدوش عن ألف ف أحسن حالاتهم !
فلما يهرب الافات يبقى الموضوع كبير كبير .. 
دا كان يعتبر نزوح جماعى وتهجير تقريبا 



واللى بيتقبض عليهم هربانين دول
كان مصيرهم حاجة من 3
اما كانوا بيرجعوهم القرية بتاعتهم ويشغلوهم سخرة
واما مانوا بياخدوهم السجن وبعدين يشغلوهم سخرة برضو 
واما ياخدوا منهم حد بحظه الأسود
عشان يعملوا منه عبرة وعظة
ويقتلوه عشان أقتل المربوط ... فيخاف السايب
:(



وبعد ثورة 1952 لما عملوا جرد للقصور الملكية
لقوا ف خزنة محفوظات عابدين وثائق سرية للغاية
فيها اوامر وفرمانات مكنتش منشورة ف أى حتة تانية



ومن ضمن الوثائق دى
لقوا امر صادر من الباشا سنكفوله
517 معية تركى
سجل رقم 17
صحيفة 74 بمحفوظات عابدين
بتقول ايه يا طمطومة الورقة دى ؟
ابدا دا محمد على بعت فيها امر لمتصرف جرجا
عشان يقولوه انا عرفت ان أغا ناظر قنا وأسنا
انقتل من شوية فلاحين أدب سيس
وبعدين طيب ؟؟
ولا حاجة هوه لسه هيبعت حد المنيا
عشان يشوفله قاضى هناك يعمل للفلاحين دول محاكمة
ومن اول جلسة يبعت للمفتى والكلام دالفارغ دا .. ؟!!
لأ طبشعن
محمد على قال لمتصرف جرجا ..
الأتنين المقبوض عليهم
والمتهم التالت الهارب يتجاب
وكله يتعدم
وفورااااااا لا محاكمة ولا يحزنون .. احنا فاضينلهم !!



وثيقة تانية كمان
رقم 29
 فى 29محرم عام 1236
 بالسجل رقم 6 معية تركى
صحيفة رقم 5
وفيه امر باشواتى مماثل .. لكاشف الغربية بيقوله فيها
عرفت ان شيخ القرية انقتل هوه وولاده
واتنهب بيته من فلاحين عملوا ثورة ف قرية مسير
ولازم
وهقول النص حرفيا ...
" أن يتم القبض على الجناة
وأن يعدموا نحو 10 او 15 رجلًا ممن كانوا رأس الفتنة
ليكونوا عبرة لأمثالهم ولا يتعدوا على هيبة الحكومة"
#احلااااوة
ياختشى الحكومة من زمان
وهيبتها وجعاها قوى قوى قوى اهى ... يا حراااااااام 





وحد بقى يسالنى ويقولى
وهوه لما الفلاحين تهرب دى جدعنة يعنى ؟
موقفوش ليه قصاد الظلم وحاربوا وقاوموا وكدا
أقولكم الصبر مالكوا مسروعين ليه ؟
ثم يعنى ... معلش يعنى مش كل الشعب غضنفر واسد
وبيعرف يشيل سلاح ويحارب
احنا شعب مبيحبش الدم وطبيعة النهر والجو دا ..
نبقى نحكى ف القصة دى بعدين 



المهم فيه ناس كانت بتهرب
بس فيه ناس قررت متسبش أرضها ولا بيوتها
وتقعد تغتت بس متقفش للحكومة وش كدا
فكانوا بيعملوا حاجة تانية حلوة قوى
وهيا انهم يحرقوا الحاجات
يعنى العمال ف المصانع كانوا بيبوظوا الألات والانوال
والعدد اللى بيشتغلوا بيها
فيوقفوا الشغل


الفلاحين بقى كانوا بيحرقوا الاجران ...
فاكرين انتوا اللفظة بتاعت كتاب القراءة
واحنا عيال ف القرون الوسطى ف ابتدائى دى ؟
الفلاح والجرن
الجرن كان الحتة اللى بيتخزن فيها المحصول
قوم ف ليلة مقمرة كتلك
قبل ما ييجى عسكر الباشا يلموا الغلة ويمشوا ..
كان الفلاح يقوم بليل يحرق المطرح بلى جواه
ومش هتتهنوا بيها
وطالما خيرى لغيرى يبقى انشالله يطفحه





قصة الحرق دى كانت منتشرة جدا
لدرجة انه محمد على عمل نص ف قانون الفلاحة
" ان الذى يحرق جرنه تخلصا من المال الميرى .. "
يجراله ايه ان شاء الله ؟
ولا حاجة ...
"فأنه يعتبر خائنا ويرسل الى الليمان مدى حياته "
وطبعا ف الليمان او اللومان هيتاخد يشتغل خدام
طول العمر يا ثااااامح
#ولاد_اصول_التراكوة_قوى



الموضوع كان منتشر .. كيدا ف الدولة بتاعت محمد على
اللى بتاكل شقاهم وعرقهم
وبالتالى كان المصريين بيتصرفوا بهذا الشكل
عقابا للحاكم
والكلام دا كان بيحصل برضو ف الجيش
المصريين كانوا بيتاخدوا اكوام اكوام يتجندوا
ويشتغلوا سخرة ويسفّروهم بلاد بعيدة
عشان الباشا وحلمه التوسعى
والمصرى طول عمره فلاح وعاوز يقعد جنب أرضه
فكان برضو بيتحايل ع الحكاية دى
بأنه يسبب لنفسه عاهة
ويقطعله ودن وصوابع ايده ويعمى عينه
وحاجات مؤسفة





وبعدين .. هروب وهربنا
وحرق منتجات ومحاصيل وحرقنا
وبرضو محمد على مستمر ف الأفترا
نعمله ايه المنكود دا بقى عشان يتهد ؟ 
قطاع من الشعب قالك احنا هنسكت ليه
قوموا بينا نحرق هالمدينة بواليها
وخرجوا على الباشا بالسلاح وعملوا ثورات مسلحة ... 
آه
حصل بالفعل 





طبعا كتب التاريخ بتاعت المدارس مبتجبش السيرة دى
انما انا شخصيا اتفاجئت لما قريت تفاصيلها
وازاى واحد ف صعيد مصر وقف للباشا الظالم
وثار عليه
الأسمرانى الحليوة كان اسمه الشيخ أحمد
واشتهر بأسم (الصلاح)
وصلوحة بقى عرق الصعايدة نفر عنده
ولم حواليه الفلاحين 
الثورة دى كانت 1820 وقعدت ييجى سنة بحالها
انضملها كل الفلاحين الهاربنين من ظلم محمد على
والعربان وغيرهم لحد ما وصلوا لـ 40 ألف مقاتل !!!
وكان مركز الثورة .. قنا


والصلاح سيطر على المنطشقة وضواحيها
وكان بيعين حكام الاقاليم المجاروة لقنا
وعاش حياته
وطبعا محمد على منبسطشى ..
وربنا ما يوريكو عدم انبساط محمد على بقى
واللى عمله
مبدئيا هوه بعتله جيش على رأسه ابنه .. ابراهيم باشا
وكان لسه شاب وطايش وأهوج وأرعن وكدا





ابراهيم بعيد عنكو اثناء شبابه 
كان مطيور ودموى وسفاح بشكل صارخ 
الواد نزل قنا وطاح ف الكل وسحق الثورة تماماااااااا 
واللى قدر ينجو بعمره نزل تحت شوية



وعلى ما الثوار لموا نفسهم واتجمعوا تانى
كنا بقينا سنة 1822
والمرة دى الثورة هتقوم ف الأقصر
ف حتة اسمها ... البعيرات
وهيتزعمها واحد اسمه الشيخ احمد برضو
:))
بس الفلاحين هينادوه بـ .. المهدى






المهدى هينجح ف حشد كل معارضى محمد على
والمضطهدين واللى عاوزين ينتقموا من مدابح ابنه ابراهيم
الخ
ويطرد رجالة محمد على من الأقصر كلها
ويقف يقولها كدا وش ... يسقط يسقط حكم العسكر
ومحمد على لازم يمشى
وهيا الكلمة اللى جابت اخره .. للأسف



عشان محمد على لما يوصله كلام المهدى
بتاع نعزل الباشا وبتاع هيقرر الآتى
1) يبعتله جيش من القاهرة لتحت
2) يسحب قوات من السوادن لفوق
وبس عملوا سندوتش
والقوتين دول من الشمال والجنوب
حطوا جيش المهدى ف النص .. وعصروه
وطبعا .. انسحقت الثورة التانية
للأسف
وجيش محمد على هيدخل قرية البعيرات
موطن ثورة المهدى ويحرقها عن أخرها
ويلم مئات الفلاحين ويدبحهم كما الخراف
فهل تفتكروا المصريين يسكتوا ؟



لأ طبعا الثورة هتنتقل للقرنة ...
جنب البعيرات الى أحرقت
وتقوم منها مقاومة مسلحة ضد الباشا وعسكره






وفلول ثورة المهدى .. انضموا لثوار القرنة
وقاتلوا على قد ما قدروا
بس سلاح جيش الباشا وخسته وغدره كانوا الأقوى
وانهزمت الثورة دى برضو ..
وشوف الحلويات والجمال والرقة والشياكة والرحمة بقى
قالك احمد طاهر والى الصعيد
جاتله الاوامر من محمد على انه يلم مئات الفلاحين الثوار
ويربطوهم على فوهات المدافع ويطلقوها ... !!!
عملوهم ذخائر حية يعنى
شوف الإبداع ف القتل وصل لحد فين ؟؟ #أميييير_الباشا_أمير_جداااا
حنية الدنيا فيه الحكيكة



طب وبعدين ؟
الناس تسكت وترضى وتبلع الموت والمهانة والعار .. ؟
لأ برضو ...
والثورة هتقوم 1824 ف أسنا
وتنزل لحد أسوان بقيادة أحمد بن إدريس
وللأسف للمرة الكام هقولها ...
 محمد على هيقمعها بشدة وعنف
ويموت ف الثوار كما الفراخ
بس اهل الدلتا بقى هيبقالهم نصيب ف الثورات دى
ولا هيتعشوا ويناموا خفاف؟



لأ .. الجماعة صراحة هيقوموا بأنتفاضة مسلحة
ف نفس السنة 1824
وقولوا فين يا عيال ؟؟
المنوفية آه والله المنوفية بتعرف تثور اهى
:))



واحب اقول ان كل ما سبق
محمد على كان بيبعت ابنه ابراهيم
او احد قيادات الجيش يقمعوله الهبات والانتفاضات دى
ثورة المنوفية بقى
سى محمد نزلهم بنفسه من القلعة وسلامتها ام حسن



الظاهر كان هارش الأصل المنوفى كويس
وكان عارف انه لو ساب الثورة دى تكمل
فالمنايفة مبيهزروش
ودول من روساء جمهورية وانتا طااااالع
وشغلهم تقيل من تحت لتحت 
فالجدع جاب م الآخر
وراح بنفسه على راس جيش
قطع رقاب وحرق قرى وقبض على خلق ياما
وانتهت الثورة ف المنوفية




ولنا هنا ... وقفة
بالنظر لتواريخ الثورات على محمد على
هنلاقى اغلبها كان ف اول 15 سنة من حكمه
وبعدين بسبب القمع والتوحش اللى أظهره
الناس يا عينى تعبت
وفهمت
فهمت انه وحش ف صورة بشر
ومعندوش أدنى درجة من الرحمة او التفاهم
وان كل همه الفلوس والسلطة .. وبس
فالوقوف قصاده مبقالوش غير معنى واحد
الموت
وخلاص كدا احنا رجعنا لنظام المماليك وألعن
يبقى نرجع لنفس القواعد القديمة بتاعت
لما متقدرش على الظالم ...
تعمل الحيلة الدفاعية اياها دى بتاعت
أصبر على الجار السو .. يا يموت
يا تجيله مصيبة تاخده




والراجل جابلهم م الآخر
ومن بعد مرحلة انتو نور عينينا
وليه منروحش الشغل على رجلينا ..
الى مش هسمحلك تقول عسكر تانى
وانا عارف انا بعمل ايه .. 
وعاوز اديك بس مش قادر .. 
لأ محمد على اداهم اللى يقدر عليه فعلا
وهو الأستغلال والنهب المنظم والقتل لمن يعترض
وطبعا انتوا عارفين الباقى
الباشا ربنا سلط عليه اللى اقوى منه
والوالى العثمانى بمباركة أوربا وضغطها
طرموا سنان محمد على
وخلوه يقعد زى القرد وشه ف وش الحيطة
ف القلعة بالقاهرة .. يقزقز لب ويناكف ف خلق الله 
واولهم ابنه الاكبر 


وفضلوا اعدائه يقصقصوا ف ريشه وامبراطوريته
لحد ما خسر كل اللى عمله من فتوحات
ويا دوب خد الحكم لأبنه
اللى كانوا بيتبادلوا الكراهية ما بينهم
وابراهيم مات ف حياة الأب ..
اللى عانى من الخرف والمرض والوهن
وشاف الحكم بيروح لحفيده عباس حلمى الاول
وكان زعلان وبيقول اللى عملته هيروح هدر 
على ايد الواد عبس عشان كان عارف طبعه النيلة 





وهيموت الطاغية بعدها بحاجة بسيطة
مشيعا بلعنات اهالى الضحايا
ودعواتهم بأيام سعيدة ف جهنم
وتتعمله جنازة أى كلام
وحتى الدكاكين يومها هتنفتح عادى ولا كأن فيه حاجة
وسبحان من له الدوام
 والله يجحمك يا دودو 
وتوتة توتة انا خلصت اقول الملاحظات بقى ...






1) واول حاجة كدا وم الآخر
لما يجيلنا حاكم هلاهوطة وعرة زى خورشيد باشا
انا بقول بلاش نزعله ونروح نعزله يا ولاد
نستحمل القرف وخلاص
ليه ؟؟
عشان احنا لو مشيناه هيجيلنا الابشع منه ..
ودى غلطتنا احنا كشعب اننا بنثور ع الظالم
وبنتخدع ف كلاب السياسة والدهاة
والمفروض مغسلين وضامنين جنة



وبعد ما نعمل كدا ونكتشف غلطتنا اننا وثقنا ف حد زبالة
نبتدى نتهزأ م اللى رايح واللى جاى
سواء من انصار خورشيد
ومن انصار محمد على
اللى الجوز بيجروا ع السلطة وبس 
واحنا اللى هنطلع أكلنا الجبنة 
وكأن هذا الشعب مكتوب عليه
اما يقبل سلطوية بأسم الخلافة والأبتزاز بالدين
يا اما السلطوية العسكرية والأبتزاز بأسم الوطن





2) الشعب المصرى واضح انه دايما يا نضرى
بياخد الهدر والعلقة لحد آخرها
وانا شخصيا قاطعت كل الأنتخابات
لكن شربت حكم مرسى وهشرب حكم السيسى .. عادى
وهقبل بكل ما يستجد ..
وهكون دايما مع الناس ... 
لأن التاريخ بيعلمنا ان الحركة لقدام
أى كانت اتمانها فادحة
فهى أحسن من الجمود والأستكانة


وبحاول اتخيل لو المصريين مثلا
زى ما انكتب ف مقالة قريتها ..
ماذا لو كان المصريين رضيوا بخورشيد
وعصروا لمون عليه
كان زمان مصر بقى حالها ازاى ؟
ومحمد على القدر الأسود بتاعنا لو مجاش
كان هيبقى ايه المنظر 
كنا هنعدى الأيام السودة وندخل على زمن اولاده 
واحفاده والدنيا تتغير 
ويحصل نهضة بمعنى صح 
ومصر تتقدم ولا كنا هنرجع لورا اكتر واكتر ... ؟
#الله_وحده_أعلم






3) كتب التاريخ الإنتقائى
اللى حشولنا بيه دماغاتنا ف الصغر والشباب ..
عن ان محمد على بانى مصر الحديثة
ورجل العسكرية ومؤسس اول جيش مصرى وكدا
اللى محدش درسهولنا بقى
ان جيش محمد على كان أغلبه مرتزقة جايبهم من كل حتة
ولولا انه جاب عبيد من السوادن وماتوا
بسبب ظروف معيشة سيئة
ولولا خوفه من حند المماليك اللى كانوا بيتآمروا عليه
ولولا انه اتزنق ف المصريين ف الآخر
وأضطر يعتمد عليهم ويجنّدهم عشان مشاريعه تكمل
ولا كانوا المصريين هيشموا ريحة البدلة الظباطى
ف نهارهم ولا ليلهم ... !
يعنى الراجل عملها متغصب .. مش محبة فينا وكدا 
المصريين من زمن عرابى وقبله وبعده 
هما اللى أخدوا حقهم بدراعهم 
عشان يفرضوا وجودهم 
مش محمد على  اللى رائد الجيش والقائد وهباب ...




4) ثم معلش يعنى .. الجيش بتاع محمد على دا
لا بتاعنا ولا يلزمنا
اللى يقتل الآف المصريين يبقى جيشنا ازاى ؟؟؟
ونقعد نردد الشعارات الفاضية دى ؟؟




5) انا مبطقش محمد على صحيح
بس منكرش انى معجبة بدهائه
وانه كان أخطر من قعد على عرش مصر
ف التاريخ الحديث وغلب الحرباية  حقيقتنننن



5) كان فيه اوشاعات ان ابراهيم بن محمد على مش ابنه
وانه ابن مراته من زوج سابق
انما نعممممم وحياة مين
دا الواد قطعية من ابوه والسح الدح امبو يعنى





6) بخصوص الناس الحلوة
اللى هارينا شتيمة ليل نهار بأن دى بلد وسخة
وهذا شعب ابن كلب بينضرب بالكرباج فيمشى عدل
ونظام محمد على هوه اللى ينفع معاه 
اللى يقولك انتوا شعب خانع وضعيف
وماشى جنب الحيطة تعمل بأيدك علامة النصر
وترفع صوبعينك
وتدبهم ف حبابى عينيه 
وتقوله يا حيلتها .... مش حقيقى بالمرة
والشعب دا وقف لمحمد على كام مرة
ودفع تمن وقفة الرجالة دى .. غالى
ومش دنبنا انك مبتقراش تاريخ بلادك
 واخرك صفحة الفن والرياضة 
او انك تقرى تاريخك بس تتكيف ف نفس الوقت
بالتنغيص علينا وتبكيتنا
وبس 
ومفيش أى محاولة لفعل إيجابى 
وكأن الواحد هيحس بقيمته ويثور لنفسه وبلده 
.... بالتهزيىء والحط من الكرامة
وكل شوية انتوا شعب غبى .. جاهل .. عبيد ..الخ 
#معرفش_ازاى_انا_إرحموا_مامتى







7) حكيوة محمد على دى بتفكرنى
بمقولة محمد فتحى البليغة عن ان
" مصر عاملة زى الست اللى حظها وحش ف الرجالة " 
#آه_والله 



8) لولا خورشيد مكنش جالنا محمد على
ولولا مرسى مكنش ربنا بلانا باللى جاى
ومعنديش حاجة اعملها غير انى 




ليجرالى حاجة





9) والله يمسيه بالخير اللى قالها بمنتهى البراءة ...
 مش هننضرب تانى يا منى
وكان المفروض يكملها ويقول لأ
وهنتفشخ كمان





10) كلمة عسكر بتزعلك ..
طب يا عسكر يا عسكر يا عسكر ... هه



تصبحوا على ألف خير ...



---------------------------------



Mahmoud @eng_M_taha 
عصر محمد على للرافعى VS كل رجال الباشا لخالد فهمى





amr salem @amrosalim2001 
يبقي لازم تركبي لنضه موفره والا كده
تبقي انتي ما بتحبيش مصر
وهاتتحاكمي عسكري بتهمه الخيانه العظمي




amr salem @amrosalim2001 
شكلك كده عاوزه تاكلي مصر ..انا بحذرك



Jass @Yasminemz 
 ما اشبه الليلة بالبارحة


Jass @Yasminemz 
ايه كمية الشر دي؟
واضح انهم علمونا تاريخ تاني خالص :/



amr salem @amrosalim2001 
 يا دين النبيييييييييييي التحول الديموقراطي
وصل المنوفيه



سعدية سليم @sa3deaselim 
 الجيش المصري قتل 22 ألف واحد والجرحى نفس العدد



♣Ħαиαи Ħ* Єʓʓαт♣ @EgyChampagne 






sally waly @soly281 
 طب الحمد لله جت على كدة
تخيلت هيحرقهم مكان اللي اتحرق
:D



amr salem @amrosalim2001 
فيلم هيبه الدوله ده وهيبه الحكومه مش هايخلص ابداااااا
يارب اعيش لحد ما اشوف هيبه المواطن


salma @drsalmataha 
 انا افتكرت فيلم الحرام لفاتن حمامه



amr salem @amrosalim2001 
 البلد متباعه من زمان يا مني



إحـــكى يا شهـــرزاد @ro7albmama2 
@tarekmomen دا محمد هنيدى ف مسرحية الابندا
كان عامل مطرب هفأ اسمه محمد سنكفوله :))



amr salem @amrosalim2001 
ههههههههههههههههههههه اه ياختي
اول ما المملوك ابو حمالات بيقولو طب وحكم العسكر
راح مكشر في وشه
وقالو اوعي اسمعك تقول عسكر تاني



الكبيرة قوي @TheBlackFairy_ 
قصدك ابه ها ها ها ؟
بلاش اسقاطات .... فاهمك يا عدوي



Yasser Abdullah @Yasserigo 
يوليو ولاد الجيش ما يقدروش يتكلموا
عن مذبحة قام بيها الجيش




سعدية سليم @sa3deaselim 
ضباط يوليو شالوا تماثيل اسرة محمد علي
من ميادين مصر ماعدا تمثال ابراهيم باشا قائد الجيش



يا عم انا بحكى عشان نعرف ان الأيام دول
وان كل ظلم الى زوال
ويبقى ف الأرض ما ينفع الناس وبس
دا ربنا اللى قايلها
:)
 استبشر خير


Yasser Abdullah @Yasserigo 
يوليو قامت على تنزيه الجيش كمؤسسة
والطعن في من تولاه
دا واضح في خطاب الانقلاب بصوت السادات



Yasser Abdullah @Yasserigo 
ناس كتير بتتكلم عن إبراهيم باشا
لكن الجيش في الوقت دا صيغ فكريًا على إيد
سليمان باشا الفرنساوي


ليست هناك تعليقات:

إرسال تعليق

Related Posts Plugin for WordPress, Blogger...
"حقوق الملكية والملوخية والمهلبية ... الخ
محفوظة للست شهرزاد وإياك حد يسرقها ويحاول يزعلها آغجر .. مفهوم ؟ "