الخميس، 22 مايو 2014

إحنـــا آسفـــين يا صـــلاح .... 2






حكينا التدوينة اللى فاتت 
كيف صعد صلاح الدين القليوبى افندى
من وزير للعاضد اخر خليفة فاطمى

عشان يبقى هوه الكل ف الكل
وبعدين حكينا كمان ازاى حط خطوات منظمة

وبمعلمة للقضاء على كل اللى هيقرفه
ويعطله عن تحقيق حلمه
اللى كان كاتمه ف قلبه
الا وهو عرش مصر
وانتهينا إلى ازاى انه موّت العاضد بحسرته

ثم اكل المزيد من التايجر حتى سيطر
ورجع مصر ولاية عباسية
وبقى رسميا نايب الخليفة العباسى بمصر


وخلاص كدا قعد على تلها .. السؤال بقى 

هل الشعب المصرى سكتله ؟
وهل مكنلوش أى منافسين او خصوم
او حد يعكنن عليه فرحته بالفوز بمصر ؟؟
لأ طبعا
الحقيقة ان العكننة هتبقى من برا الحدود

وجواها
من الأعداء زى الفرنجة
ومن كمان المؤيدين ..
زى نور الدين محمود سخصيااااا
ازاى كدا ؟؟


صلاح كان رقَم وسوسة ..

اظهر الولاء لنور الدين ما استطاع بكل السبل
لكن اول ما ملك مصر
واطمن ابتدى يسوق العوج على سيده وتاج راسه


والمصادر بتقول ان الخلاف بين الأتنين العتاولة دول

مكنش خلاف ظاهر
موقفوش يشرشحوا لبعضشيهم ع الئمة يعنى ..
انما كان فيه حرب باردة ومحسوسة
والسبب مكنش سلطوى وتنافسى بس

وكان صراع على رأى سياسى
نور الدين كان شايف مصر تخصه وبتاعته
لكن ظهير للشام مش اكتر
اما صلاح الدين
فكان شايف ان مصر هيا الأساس ..

موقع وموارد وقيمة وكل حاجة
وكان شايف كمان ان نور الدين ملوش الا فلوسه
تترميله ع الجزمة اول كل سنة
ودمتم !
ونور الدين قال ايه انا كيس جوافة

ومصر تبقى تابعة ليا ولسلطتى
وصلاح اصول يشورنى ف كل حاجة
وولاد الحلال اتدخلوا شعللولها 
فكل واحد نفسيته شالت م التانى



ولما كلنا هنبقى فتوات ... مين اللى هينضرب ؟!
بس نظرا للخطر الصليبى الرابض ع الحدود

وكل شوية ينطلهم دا
مكنش فيه وقت لتصعيد الخلاف
وكل واحد عمل زى البرص
يعنى ازاى ؟؟
يعنى يلبد ف السقف يمشى على ميهله كدهون

بكل ثقة وبرود بس ف أى لحظة تعمل حسابك
انه هينطلك ف طبق الاكل
او ينزلق فوق نافوخك فجأة
والفرنجة كانوا ازمة وعرض مستمر مبيخلصش




واذ جبنا سيرة الفرنجة بقى فلنا ... هنا ... وقفة

الا بصراحة لازم أشيد واندد بالاخ عمورى
اللى عنده غتاتة مشفتهاش الا عند الاخوان الصراحة
اللى يدخلوا ف حاجة اوحتة 
ويلبدوا فيها زى القرادة ميخرجوش منها الا بالدم



عمورى كان عنده هوس باحتلال مصر

ودخلها 3 مرات ولا فيش فايدة
كل مرة يمشى قفاه يقمر عيش
وكان لازم صلاح الدين يعمله حساب ويقدر خطره
قصره 

نور الدين ف الشام لم التعابين مؤقتا
عشان ميشقش الصف العربى الاسلامى
وعمورى ركن ع الحدود ينتهز أى فرصة
للأنقضاض على مصر ويقنع ف حلفائه 


نرجع بقى لجوا
الشعب المصرى لما شاف دولة الفاطميين

اللى عاش ف ضلها قرنين دى .. بتنهار وتنطفى
كان موقفه ايه ؟؟
الاجابة عند ابن تغرى بردى اللى قال الآتى ..

"نفوس المصريين كادت تزهق حزنا

لانتهاء دولة الفاطميين"

يا عينىىىى
والله احنا ولاد أصول ومن زمان
ليه بقى ..
قولولى ليه يا طمطومة ..؟؟؟



عشان رغم ان بعض حكام الفاطميين

زى الحاكم بامر الله
وعهد المستنصر اللى حصل فيه مجاعة
الناس فيها اكلوا بعض
ورغم ضعف اخر السلسال بتاعهم
الا ان المصريين شافوا ايام حلوة كتير مع العالم دى

من اول ما جه جوهر الصقلى فاتحا
ومكنش فيه اراقة دماء ولا عنف كما كان متوقع
ثم انه والاهم
الفاطميين خلوا مصر دولة مستقلة عن الخلافة العباسية

ولا خراج ينبعت ولا اهمال لشئون الدولة 
زى ما كان ولاة العباسيين عملوا وعمل اللى قبلهم !
وف عهد الفاطميين مصر لاول مرة منذ دخول العرب 

مش هيحكمها والى او امير متعين من بغداد
او دمشق
او حتى المدينة زى ايام الخلافة الراشدة


 

وحد يسألنى يا كابتشن لطيف ..
وهيا تفرق قوى يعنى ؟؟
اقولكم طشبعن عشان الفاطميين خلوا المصريين
اقباط وسنة جزء من النظام الإدارى للدولة حقا
واستعانوا بيهم

مش بس عشان يمشوا الامور ف الاول وكدا ..
لأ دول استعملوهم بجد
وكانلهم اليد العليا احيانا
والمشورة كلها عند بعض الخلفاء

زائد بقى الاعياد والمناسبات اللى الفاطميين

اهتموا بيها اكمنهم شافونا قوم كدا .. 
بنحب الفرفشة
وملناش ف النكد والهم فأحتفلوا معانا بكل اعيادنا
جنب أعياد الشيعة بتاعتهم ..

احتفلوا بأعياد السنة
والأقباط واليهود المصريين كمان !
ودخلوا ف نسيجنا
وسابولنا مظاهر زى الكحك وعروسة المولد الخ
الخليفة كان بينزل للشعب ف الأعياد

وتتفرش الموايد والاكلات
وكان ف مناسبة قبطية مثلا قوم يدى مكافأت لموظفينه
كلهم بما فيهم المسلمين
#عاوزين_م_الراجل_دا
كان ايه الهدف ؟؟

ان البهجة تعم ع الجميع وكله يفرح
ونفك الجبس اللى بين الدولة الفاطمية المتشيعة
وبين عموم الشعب بكل دياناته
ودا حصل فعلا



ورجوع مصر لقبضة العباسيين

فيما يبدو من وجهة نظر المؤرخين اضعفتها
وخلتها ترجع تفتقر تانى
ويتاخد خيرها
وابن جبير الرحالة الشهير
زار مصر كام مرة اثناء حكم صلاح الدين
والظاهر معجبوش حالها وقال نصا
" تملك الغز ديار مصر "
ويقصد بالغز الاتراك اللى جم مع صلاح الدين
وقرفونا بالعبيط



قصره .. اللى عاوزين نقوله

ان البلد كانت بتتنهب نهب منظم
وتنتقل خيراته من ارض النيل إلى الشام
ودا ظهر بشكل محسوس ف العملة النقدية المتداولة
المصريين كانوا ايام الفاطميين متعودين على العملات

اما دهبية او فضية
لكن لاول مرة بعد ما حكم ابو صلاح مش ابن الناظر 
هتظهر عملة "الفلوس"




 

ودى كانت عملة من نحاس او نحاس مخلوطة بفضة
والمصريين من كتر نحسها الدكر
سموها فلوس من الفلس
وكان اللى يلاقى عملة دهب او فضة يبقى زعقله نبى !
راحت فين الفضة والدهب بقى ؟

ع الشام طبعا وف جيوب المحاسيب والحبايب وبس
واهم دول الى دخلوا البيت نشفوا الزيت
#فعلا




ومما سبق هنلاقى ان صلاح الدين

كما قالت الست انغام دخل عليا بكل حاجة بحبها
صدقته واديته الامان ..نهبنى !
الناس اتدهولت شوية
وبعدين فاقوا
وهتبدأ رياح الغضب تهب

وتوصل انفاسها الساخنة لقصر الوالى
اللى ف مراسلاته

لنور الدين محمود هيكتبله نصا انه مستشعر
"ان اهل مصر وجندها أعداء"
#هىء_هىء
يا ضينايا نفسيته قامت عليه وزعل حبتين

اكمن قامت عليه ثورات ف شمال مصر وجنوبها
ومن كل الطبقات والديانات كمان .. !




وبصوا بقى .. المصادر نوعين ..

ناس مع صلاح الدين
فقالوا عليها حركات تمرد وشغب وتدمير
اما اللى مش معاه ... فقالوا عليها ثورات وش


انا بقى بقول ايه ؟

انا بحكى وانتوا تحكموا
وف النهاية هقول ملاحظاتى ..
بس مبدئيا اول الثورات هتكون زى 30 ستة كدا
واللى اشتركوا فيها
وصحيح هيا مكملتش للنهاية ..

لكن المصادر اللى مع صلاح
قالت عليها مؤامرة متدبرة مع الفرنجة
اما المصادر اللى ضده فقالت هذا كذب وافترااااء




المهم ان الهبّة دى هيشترك فيها مجموعة كبيرة

وتكون حلف .. فيه الآتى :

ابن عبدالقوى المعروف بالجليس
وكان ريس دعاة الدعوة الفاطمية ابا عن جد
وكان فيها العوريس المشرف على مالية الفاطميين

ابن كامل القاضى
القشة احد امراء المصريين وقوادهم
والشاعر فقيه عمارة اليمنى
ومين كمان ؟



العاضد كان سايب 11 عيل ماشاء الله

قبل ما قراقوش يحجر عليهم ويحبسهم ف القصر ..
كانوا لسه العاضد ابوهم ميت
فالأخوة قيادات الحلف اياه ...
اختاروا اكبر اولاد العاضد ..

وراحوا مسمينه الحامد بالله
وعملوا حكومة موازية
ووزعوا على نفسيهم المناصب
وجو عاوزين عودة الخلافة والشرعية وبتاع



المصريين لما شافوا الناس دى .. بتتكلم جد

وبتتلم على بعضيها
اتحمس منهم بشر كتير
وراحوا منضمين للتحالف دا من كل الطبقات والديانات ..
وبعض الجند السودانيين اللى نجوا

من مدبحة صلاح الدين لهم .. رجعوا
وانضموا للحلف
وفجأة الموضوع كبر
وبعتوا لكبير الحشاسشين ف الشام ينضملهم
ورغم ان الحشاشين كانوا زعلانين مع النظام الفاطمى

الا انهم وحدوا الصف مؤقتا
عشان يرجعوا البلد من صلاح الدين
السنى الويحشششش
المهممممم
فيه مصادر بتقول ان العالم دى آل مكفهاش كل دا

وراحت باعته لعمورى الفرنجى العدو
وقالتله تعالى ساندنا
واطرد معانا صلاح الدين المحتل !!!


ومع ان الكلام مش داخل دماغى انما ماشى نعديها

بس الأفكه بقى والعجيب
ان عمارة اليمنى احد المشاركين ف الحلف دا
هيتواصل مع تورانشاه اخو صلاح
وبيقولوا انه قعد يميل دماغه انه يروح اليمن

ياخدها من اللى ماسكينها !
ليه كدا ؟؟
قالك عشان يبعدوه عن مصر
اكمنه كان قائد حربى ابن 60 بوبى يعنى
الموضوع وسع اكتر

وبعض امراء النورية اللى كانوا زعلانين ان صلاح 
بقى وزير انتهزوا الفرصة عشان ينتقموا منه
فأنضموا للحلف
والعملية كبرت


وجهاز مخابرات صلاح

اللى كان على اعلى مستوى الحقيقة
كان هارش الليلة من اولها لآخرها
وبلغ صلوحة بكل حاجة اللى استناهم لما اتلموا
وجابوا اخرهم
واول ما وصلوا لمرحلة التآمر على اغتياله

راح لاممهم بقى وفين يوجعك
وقبض على ابن العاضد
وكل المحلقين حواليه 
وجاب العلماء وقالهم يعملوا فتوى فورا
- فتوى بأيه يا حاج صلاح

- بقتل المتآمرين عليا
- لأ مينفعش
- طلعوها والا تحصلوهم
- حاضر سعادتك
وبس افتوا بقتلهم لا محاكمات ولا دياولوا
واتصلبوا جميعا فى ميدان بين القصرين ..

وراح ف المأساة دى خلق ياما
من الحاشية والقصر والقواد الترك
واللى قدر يهرب راح اسكندرية يتحصن فيها



اهل اسكندرية لو تفتكروا كانوا سنة

وقافشين ع الفاطميين
واغلب الثورات كانت بتروح هناك وتزيد وتكبر
لأن الإسكندرانية كانوا بيؤيدوها
لكن الغريب
ان اسكندرية ليها تاريخ مع صلاح الدين

حكيناه قبل كدا لما شاور حاصره هناك
واهل الثغر استجدعوا معاه وحبوه جدا
لكن كل دا اتنسف ف لحظة
ازاى ؟
الهاربين من القتل جريوا على اسكندرية

واتحاموا ف اهلها
صلاح الدين معملش أى خاطر للعيش والملح
وبعت عساكره بهدلوا الدنيا
عشان يجيبوا الطفشانين


المؤسف اكتر ان جند السوادنيين اللى هربوا يا عينى

للمرة التانية .. لما اتقبض عليهم
اتكوا بالنار ف صدورهم ووشهم عشان يتعلم عليهم !!
والمصريين لأول مرة يبقوا مش مع صلاح الدين

فيشوفوا منه الوجه القبيح
وتنخمد الثورة الاولى دى قبل ما تندلع اصلا
وينقتل كل اطرافها 
لكنننن
هتولع ف الصعيد .. الكلام دا سنة 1174

على ايد احد افراد الجيش الفاطمى
وكان مقدم
واسمه كنز .. او كنز الدولة .. او كنز النوبة
كلهم واحد


وعمل ايه سيادة المقدم كنز ؟؟

وكانت ايه حكايته ؟؟
فيه ناس بتقول انه من الجند السودانيين
وانه من النوبة ..
لكن المقريزى كانله رأى يتفق مع نانسى عجرم
وكان بيقول ان كنز الدولة مصرى ..

وابوه مصرى ..
وكل مصرى الله عليه !
المهم الجدع كان ف الجيش
وشاف مدبحة زمايله على ايد صلاح وجيشه
وكان من الناس اللى نجيت بعمرها

وهربوا ع الصعيد وبعدين لم روحه ولمم شتاته
وراح قايم يثورة ف الجنوب
انضملها انصار وخلق كتير
وشوية كدا ...
والى قوص وكان اسمه عباس بن شادى 
الظاهر شرب بيريل واسترجل فجأة
وعمل ثورة هوه كمان
وانضم لكنز الدولة وعملوا جو ومجال



بس والجوز اتلموا على بعضيهم

وانضملهم انصار وعسكر الفاطميين الشاردين
والمطرودين من مذبحة القاهرة واسكندرية

ولأول مرة هنسمع الرقم دا
ان الجند والأعيان والعوام والمؤيدين

وكل من شارك ف هاتين الثورتين
هيوصل حسب ذكر احد المصادر لـ 100 ألف شخص
وصلاح الدين هيبتدى يقلق جداااا
وصحيح فيهم ناس كتير ملهمش ف الحرب

ولا السلاح لكن اغلبهم صعايدة ودماغهم ناشفة
بس طول عمر الصعيد عامل قلق لأى حاكم غريب
وبيعمله ألف حساب يعنى



المهممم

صلاح الدين قلق قلق السنيين
وكان بيفكر ينزلهم الصعيد بنفسه
لكن خاف الثورة تندلع ف القاهرة
ويبقى بين طرفى الكماشة
#حوييييط
وراح باعتلهم اخوه .. العادل ابو بكر

اللى كان حونين واميييير
وميتخيرش عن تورانشاه اخوهم الكبير ف حاجة
الجدع راح الصعيد ونزل دبح ف الناس

وقتل عباس بن شادى وقتل كنز الدولة

وقتل الاف مؤلفة من اللى شاركوا ف الثورة
وبيقولوا انه أسر 3 الاف نفر واخدهم معاه على القاهرة
وصلب اعداد غفيرة عشان يكونوا عبرة لأى حد

تسول اليه نفسه التمرد على صلاح الدين
واخمدت الثورة ف الصعيد بعد خساير قاتلة للثوار
واللى معاهم




وشوية .. واندلعت ثورة جديدة ف قفط ..

نواحى قوص كدا ف الصعيد برضو 
#رجالة_والله 
وبيقولوا قفط كانت علوية
واهلها اغلبهم شيعة ف هذا الوقت
وطلع من وسطهم داعية شيعى سابق من ايام الفاطميين

وكان من بنى عبدالقوى
#ياخراشى_ع_الأسم_كفاية_لوحده
:)



الأخ من بنى عبدالقوى هيلم حواليه انصار

والاخبار هتنقلها العصفورة فوراع القاهرة
فيبعت صلوحة اخوه العادل ينزلهم
ويلم كبارات القبيلة وبن عبدالقوى
ويصلبهم بعمائمهم على اسوار المدينة
ويقتله بتاع 3 الاف نفر كدا من باب العظة والعبرة

ومن تسول له نفسه
وانتوا عارفين باقى الحوار
وتخمد الثورة دى كمان #ربنا_يهد_المفترى

والناس فضلت عندها امل

ف رجوع الفاطميين لحد اخر نفس
واخر الثورات كانت ف إسنا ..
الصعيد برضو ارض الرجال وكدا
:)
دى كانت سنة 1181 وقام بيها اتنين رجالة

محدش ذكر اسمهم لان غالبا اتقبض عليهم
وراحوا ف الوبا
بس شهود العيان بيقولوا ان النفرين دول لفوا البلد
وقعدوا ينادوا .. يال على .. يال على

ويحاولوا يقوموا الناس عشان تخرج معاهم
تطالب بالإفراج عن معتقلى سجون صلاح الدين
ويسقط يسقط حكم العسكر
لكن للأسف .. دعوتهم راحت ف اللامحيص

وطارت ف الهوا شاشى
لأن المصريين وقتها كانوا خلاص
تكيفوا مع الوضع الجديد
واللى كان مترتبلهم بمهارة

 


وكان خطر الصليبين ف الشرق داهم
بكل ما ف الكلمة من معنى
ومكنش فيه وقت لأى ثورة داخلية
لأن العدو كان ع الأبواب
وصلاح الدين استغل الوضع
والشهادة لله كمان الجدع دا كان مرزق

وامه داعياله
وبخته م السما لأن الساحة فضيتله 
بموت نور الدين محمود
وموت عمورى واستلام وريثه الضعيف العرش


وابتدى صلاح يتحرك خارج نطاق مصر .. 

ويخش مدن ف الشام ويبسط نفوذه ويرخم 
ويقوى ف جيشه لمقاومة الفرنجة
والمصريين وقتها اتحطوا ف اختيار .. 

نبقى مع صلاح الدين ونحارب العدو الخارجى
ولاّ نناكفه صلوحة يعنى 
ويناكفنا
وطبعا اختاروا الخيار الاول .. #بدون_تردد




والمصريين على قد حبهم للفاطميين وعهدهم

على قد ما قلبهم كان سنى الهوى
ولهذا مكنش عندهم
أى مشكلة ف الرجوع للمذهب السنى تانى وعادى جداااا
وبالتالى لما الخطر على الدولة الأسلامية

من وجهة نظرهم اتضفر مع الخطر على مصر سوا
كانوا مع صلاح الدين
وانتهينا 
 


وهكذا خرج المذهب الشيعى من مصر

ورحل الى الشام والعراق
وقعد
وتوتة توتة خلصنا الحدوتة 


وباقيلى الملاحظات


1) انتى عاوزة ايه من أم القصة دى ..

تمجدى ف الشيعة وتشخرمى صلاح الدين السنى
الحليوة ابو عيون جرئية
يا رافضة يا متوحشة يا قليلة الادب ؟؟؟
ابدا والنيعمة .. 

انا بحكى التاريخ من مصادر
واللى مش عاجبه يقرى هوه من مصادر اخرى وينبسط
ولا يزعل روحه خالص
عادى :)
ثم هوه صلاح الدين دا نبى ولاّ ملاك ..

يعنى مش بشر يخطىء ويصيب وكدا
ولا فيه حاجة معرفهاش 
أو كنت مسافرة ولا حاجة ؟!!


2) الحكام نوعين .. ناس بتتفاهم .. وعسكر

اول صنف معقولين ينفع تتكلم معاهم 
لكن التانى ون واى ولو مسمعتش كلامه 
عادى يقتلك لو مش هتفهم وتعمله صداع
ومعرفش بيأكلوهم ايه ف الكلية

او ف الجيش اثناء التجنيد
اكيد فيه حاجة بتخلى دماغهم تلوح كدا
وميبقاش عندهم أى تفاهم او مناقشة
أو لا رأى معارض وحتى استنوا علينا!


3) قالك صلوحة مبنش عليه اغراضه واهدافه

الا بعد ما يمسك واتاريه كان مخبى ف قلبه وكاتم
لحد ما تجيله الفرصة وينقض ع الحكم .. !
أحلااااوة
زى ناس قالت الجيش لا يسعى للحكم ولم اكن انتوى

وبعدين شرشح نفسه
والظاهر والله اعلم 
غالبا بيدرسوا الحكاية دى ف مناهج 
الكليات بتاعتهم 
أو مثلا كلهم بيبصوا ف ورق بعض بقى !



4) قالك صلاح لما جه ادى الأرض لأهله وقرايبه

ولـ .. "قواده وعساكره "
ياصلاة العيد هما كلهم كدا ؟
وطبعا محدش استجرى يطلعله 
ويقوله عاوزين نشوف ميزانية الجيش


5) قرايب العاضد بقى اللى اتقبض عليهم واتحبسوا

واتفرق بين رجالاتهم وستاتهم عشان ميخلفوش
وفضلوا محبوسين لحد ما ماتوا وكدا
#نعممممم
يعنى الناس ذنبها ايه ف انها اتولدت ف أم العيلة دى ؟؟

وعشان كدا قولنا ديموقراطية وانتقال سلمى للسلطة
عشان المناظر السودة اللانسانية دى متحصلش !


6) مع كل تحفظاتى على الفاطميين ..

الناس دى مأجبرتش المصريين على المذهب الشيعى

الا ف حالات ضيقة وقليلة
وشاركوهم مناسباتهم والملمات كمان
ورغم انه عاشوا ف بذخ وترف من خير مصر

لكن عيشوا المصريين ف الخير دا ف اوقات كتير
مش زى غيرهم .. خدوهم فحت وردم 
وكله نهب نهب ومفيش شتيمة !



7) اه .. العسكريين مبيعملوش حاجة لله وللوطن

 مهما كان كلامهم عسل
وحوار اصله شال روحه على كفه وانكذ البلد وكدهون
معلش يعنى ..
دى مش بطولة
البطل بحق هوه اللى يضحى 

ومبيقدمش حاجة عشان يقبض قصادها تمن
لكن البطل من ورق بتاعكم قدم السبت
عشان يقبض قصاده الوطن كله زى صلاح الدين بالمللى





8) ايوه كنت هنسى 

اخوات صلاح الدين كانوا حونين قوى قوى 
الحاج ايوب عرف يربى فعلا 
:)
وقالك تورانشاه اسمه لوحده يرعب 
.. وهنعديها 
انما العادل ابو بكر دا ان شاء الله 
نعم بقى 
اومال لو كان اسمه الظالم كان عمل ف الناس ايه ... ؟!!




9) واخيرا بقى الشعب المصرى دا
لازم ياخد جايزة نوبل فى خيبة الامل ... ف حكامه
كل يا نضرى ما نيجى نفرح .. ناخد بعد شوية اكبر مقلب

وكلهم بيبقوا حلوين طيبين مخلصين قنوعين ف الاول
وبعدين بعيد عنكو يتحول لونهم الى الاخضر
ويهجموا علينا يفترسونا
ولك الله يا مصر




10) ويا جماعة والنبى ..

محدش ياخد منى الحكايات مسلم بيها
ويقرى هوه كمان ويكون رأى ووجهة نظر
انا بحكّى معاكم وبقول
لكن منيش متخصصة
ولا مؤرخة
ثم ليه فيه ناس واخدة الكلام على صلاح الدين

وكأنه جوز خالتهم
هوه بطل حطين المتين على عينى 
والقائد العسكرى الشاطر
واللى بيحافظ على نفوذه 
فهل دا ينفى اخطائه وهيخليه نبى منزه ؟!
ولا هوه هيشترينا عايش وميت وكدا .. ؟
الراجل كانله حسنات وسيئات

وانتوا اعرفوا الاتنين واحكموا بعدها
لكن نسمع الحلو بس والوحش منعرفوش ..
تبقى حقيقة عرجاء ومينفعشى !


حكيوة الليلة من عدة مواقع ومصادر 
لكن الاغلب من :

1) فى تاريخ الأيويبين والمماليك 
د.قاسم عبده قاسم 

2) ظهور خلافة الفاطميين وسقوطها 
د. عبدالمنعم ماجد 

3) سيرة القاهرة لــ ستانلى لينبول 
ترجمة : 
د.حسن ابراهيم حسن 
د.على ابراهيم حسن 
إدوار حليم


 
وتصبحوا على الف خير 


 -----------------------------

 
-smemo وبس@MahmoudMohamme6

 مساء الفل..معنى كده أن الشخصية التاريخية
المرسومة لصلاح الدين ليست حقيقية

ومن نسج خيال المؤرخين المنحازين له؟



-Ahmed Hilmy @ahmedhilmysaleh

 دي دخلة انك ميت وانهم لميتون


-farida allam @faridaallam

 اه والنبى عاوزينه


-smayada el_awady @MayadaEl_awady

ويقال انا المثل الشعبي "اخرة خدمه الغز علقة "
طلع برضة عليها لانهم افتروا ع الناس
#توب_علينا_يارب



-smayada el_awady @MayadaEl_awady

كانون التظاهر :) دنيااااا



-ssally soliman @sasosall

ده انتى حيقام عليكي الحد يا شهر

#اخرررررراشي ده انتى بتكسري التابوهات يا حب :))


إحـــكى يا شهـــرزاد @ro7albmama2

تابوهم لأمهم :))
#شهرزاد_من_عابدين
MAF™ @Mohamedfahmy82
على كده يوسف شاهين فشخلنا دماغنا



Ahmed Rageh @Ahmed_Rageh101
اول ملحوظة احنا بختنا مايل فعلا



-farida allam @faridaallam

يعنى شال روحه على كفه
والناس اللى نزلت الشارع دى شالت روحها

على جزمتها يعنى


هنا شعب أنتيكا @nohabrahim
كلهم بيقولوا كده في الأول ..
والكلام الحلو بيتحول
( الشيئ بالشيئ يذكر )
:))))))))



-stamer eldibawy @tharou

 صلاح اول ما تولي الوزارة بعت لنور الدين
في طلب أهله فبعتله 16 الف
فأعطي لهم الإقطاعيات
والمناصب الكبري عشان يبقوا شوكته





-

Yaser Seif @NobyanCo
ده نوبي الي يومنا هذا فيه قبليه نوبيه من نسله



-Yaser Seif @NobyanCo

ف لغه ف النوبه اسمها كنزي






m. hasan ‏@tantalos2 now

الله ينعل أبو السياسة
وكما قال محمد عبده لعن الله لفظ ساس يسوس سياسة


m. hasan ‏@tantalos2

الصراع في كتابة التاريخ
وتدوين السنة مجردانعكاس(مرأة) لصراع سياسي مري
قديم ع أرض الواقع



 

د. محمد عبدالعال ‏@muhamadabdelaal
فيه صراع متصل بين السنة والشيعة

سواء في كتابة التاريخ وحتى في تدوين السنة
وتضيع الحقيقة بين التعصب للاتنين


Captain Haddock ‏@hassan19211

اعرف بيت قديم مبنى حوائط حامله وعروق..
مليان ابراص ع السقف بكل حجره
واصحاب الشقه عايشين حياتهم عادى
ومتعايشين بلا اى فزع !


m. hasan ‏@tantalos2


 ١- أي واحد حاول يوسع دائرة معلوماته أكتر
من اللي شافه في فيلم يوسف شاهين
ويدعبس في الكتب المكتوبة عن هذه الفترة وهي مهولة


٢- في عددها سواء مصادر أولية أو ثانوية سواء عربية أو إفرنجية يعرف إن الكلام اللي كتبتيه
له أصوله المدونة
إنما التاريخ عادة




٣- بيكون وجهة نظر وبتختلف قراءة الواقع 
من عصر للتاني
.واختصارا هناك كثيرون نظروا لصلاح الدين
من زوايا مختلفة 
ف سنة ١٩٦٦




٤- كتب اللبناني حسن الأمين كتابه
"صلاح الدين بين العباسيين والفاطميين والصليبيين"
وكان ناقضا شديدا


٥- لصلاح الدين ورد عليه الكثيرون في ذلك الوقت
زي حسين مؤنس والدكتور زكي المحاسني
واتهموه أنه قرأ التاريخ قراءة متحيزة لأنه


٦- ينتمي للطائفة الشيعية فطلّع الراجل طبعة تانية
سنة ٢٠٠٠ ضمنها ردوده علي نقاده
ولكن اكتر واحد تصدي له كان السوري الدكتور



 ٧-شاكر مصطفي وجمع ردوده في كتاب بعنوان:
"صلاح الدين الفارس المجاهد
والملك الزاهد المفترى عليه" ف٢٠٠٣ 





٨- واللي يحب يقرا حاجة متوازنة وحديث
(٢٠٠٨) من واحد علامة
يقرا كتاب د. محمد مؤنس عوض اللي صورته هنا


farida allam ‏@faridaallam
@tantalos2
شكرا ع المعلومات القيمه والامداد بالمصادر


د. محمد عبدالعال ‏
طبعا .. لما يحطلك في الفيلم جمل من الميثاق
بيقولها صلاح الدين يبقى تعرف ساعتها
ان صلاح الدين كان ناصري


Captain Haddock ‏@hassan19211 now
التحيز وجهة نظر او رؤيه تكمل وتربط الاحداث

يعنى تملا فراغات بين احداث(كتفسير مقبول).
لكن لا تزور احداث مؤكده..ده حق للمؤرخ



 

يارب بنصه فرنك عقل ‏@MunaElMasriya
 توهتيني ورجعتيني
ده احنا بلد مسكينة بجد!
اذن بجد بقي جمال عبد الناصر اول حاكم مصري
من بعد الفراعنه!


farida allam ‏@faridaallam

واضح ان الموضوع ده ترااااااث وبنحافظ عليه


سعدية سليم ‏@sa3deaselim
في كتير بياخدوا معلوماتهم عن صلاح الدين

من الفيلم الاهبل اللي يوسف شاهين عمله



Ahmed Hilmy ‏@ahmedhilmysaleh
انا اول اعرف الحاجات دي ..

انا اخر معلوماتي عنه انه مرضاش يدي الماية
لرينو في الفيلم:-D

هناك 3 تعليقات:

  1. قال "ول ديورانت" عن القائد صلاح الدين رحمه الله، فقد قال في رائعته (قصة الحضارة) عن صلاح الدين أنه: "كان في العادة شفيقاً على الضعفاء، رحيماً بالمغلوبين، يسمو على أعدائه في وفائه بوعده سموا جعل المؤرخين المسيحيين يَعجبون كيف يخلق الدين الإسلامي -الخاطئ في ظنهم- رجلاً يصل في العظمة إلى هذا الحد، وكان يعامل خدمه أرق معاملة، ويستمع بنفسه إلى مطالب الشعب جميعها، وكانت قيمة المال عنده لا تزيد على قيمة التراب، ولم يترك في خزانته الخاصة بعد موته إلا ديناراً واحداً؛ وقد ترك لابنه قبل موته بزمن قليل وصية لا تسمو فوقها أية فلسفة مسيحية" (قصة الحضارة - ول ديورانت: [15/44، 45] - ترجمة: الدكتور زكي نجيب محمُود وآخرين - دار الجيل).


    علق مترجم كتاب "قصة الحضارة" على كلام "ول ديورانت" السابق في صلاح الدين بقوله: الحق أن عظمة صلاح الدين منشؤها استمساكه بأوامر دينه واتصافه بفضائل هذا الدين.

    ردحذف
  2. وبعد، فإن اعتدال صلاح الدين، وصبره، وعدله قد غلبت بهاء رتشارد، وشجاعته، ومهارته الحربية؛ كما غلب المسلمون بفضل إخلاص زعمائهم ووحدتهم الزعماء الإقطاعيين المنقسمين على أنفسهم، والذين يعوزهم الولاء للغرض والإخلاص في المقصد؛ وكان قصر خط التموين من وراء المسلمين أعظم فائدة من سيطرة المسيحيين على البحار. وكانت الفضائل والأخطاء المسيحية أبرز في السلطان منها في الملك المسيحي؛ فقد كان صلاح الدين مستمسكاً بدينه إلى أبعد حد، وأجاز لنفسه أن يقسو أشد القسوة على فرسان المعبد والمستشفى؛ ولكنه كان في العادة شفيقاً على الضعفاء، رحيماً بالمغلوبين، يسمو على أعدائه في وفائه بوعده سمواً جعل المؤرخين المسيحيين يعجبون كيف يخلق الدين الإسلامي "الخاطئ" في ظنهم رجلاً يصل في العظمة إلى هذا الحد. وكان يعامل خدمه أرق معاملة، ويستمع بنفسه إلى مطالب الشعب جميعها، وكانت قيمة المال عنده لا تزيد على قيمة التراب. ولم يترك في خزانته الخاصة بعد موته إلا ديناراً واحداً؛ وقد ترك لابنه قبل موته بزمن قليل وصية لا تسمو فوقها أية فلسفة مسيحية: "أوصيك بتقوى الله تعالى فإنها رأس كل خير؛ وآمرك بما أمر الله به فإنه سبب نجاتك؛ وأحذرك من الدماء والدخول فيها والتقلد بها فإن الدم لا ينام؛ وأوصيك بحفظ قلوب الرعية والنظر في أحوالهم، فأنت أميني وأمين الله عليهم؛ وأوصيك بحفظ قلوب الأمراء وأرباب الدولة والأكابر. فما بلغت ما بلغت إلا بمداراة الناس؛ ولا تحقد على أحد، فإن الموت لا يبقى على أحد؛ وأحذر ما بينك وبين الناس فإنه لا يغفر إلا برضاهم، وما بينك وبين الله يغفره الله بتوبتك إليه فإنه كريم 3". ومات في عام 1193 ولم يتجاوز سنه الخامسة والخمسين
    ول ديورانت ( قصة الحضارة )

    ردحذف
  3. ولما اقترب من بيت المقدس خرج إليه أعيانها يعرضون عليه الصلح، فقال لهم إنه يعتقد كما يعتقدون هم أن هذه المدينة بيت الله، وإنه لا يرضيه أن يحاصرها أو يهاجمها. وعرض على أهلها أن تكون لهم الحرية الكاملة في تحصينها، وأن يزرعوا ما حولها من الأرض إلى ما بعد أسوارها بخمسة عشر ميلاً دون أن يقف أحد في سبيلهم، ووعدهم بأن يسد كل ما ينقصهم من المال والطعام إلى يوم عيد العنصرة 1، فإذا حل هذا اليوم ورأوا أن هناك أملاً في إنقاذهم، كان لهم أن يحتفظوا بالمدينة، ويقاوموا المحاصرين مقاومة شريفة، أما إذا لم يكن لهم أمل في هذه المعونة، فإن عليهم أن يستسلموا من غير قتال. وتعهد في هذه الحال أن يحافظ على أرواح السكان المسيحيين وأموالهم. ورفض المندوبون هذا العرض، وقالوا إنهم لن يسلموا المدينة التي مات فيها المسيح منقذ الخلق. ولم يطل حصار المدينة أكثر من اثني عشر يوماً، ولما أن استسلمت بعدها فرض صلاح الدين على أهلها فدية قدرها عشر قطع من الذهب (47.50؟ ريالاً أمريكياً )عن كل رجل، وخمس قطع عن كل امرأة، وقطعة واحدة عن كل طفل، أما فقراء أهلها البالغ عددهم سبعة آلاف فقد وعد بإطلاق سراحهم إذا أدوا إليه الثلاثين ألف بيزانت (270.000؟ ريال أمريكي) التي بعث بها هنري الثاني ملك إنجلترا إلى فرسان المستشفى. وقبلت المدينة هذه الشروط "بالشكر والنحيب" على حد قول أحد الإخباريين المسيحيين. ولعل بعض العارفين من المسيحيين قد وازنوا بين هذه الحوادث وبين ما جرى في عام 1099. وطلب العادل أخو صلاح الدين أن يهدي إليه ألف عبد من الفقراء الذين بقوا من غير فداء، فلما أجيب إلى طلبه أعتقهم جميعا، وطلب "باليان" Balian زعيم المقاومين المسيحيين هدية مثلها، وأجيب إلى ما طلب، وأعتق ألفاً آخرين، وحذا حذوه المطران المسيحي وفعل ما فعل صاحبه. وقال صلاح الدين إن أخاه قد أدى الصدقة عن نفسه، وإن المطران وباليان قد تصدقا عن نفسهما، وإنه يفعل فعلهما، ثم أعتق كل من لم يستطع أداء الفدية من كبار السن. ويلوح أن نحو خمسة عشر ألفاً من الأسرى المسيحيين بقوا بعدئذ من غير فداء فكانوا أرقاء. وكان ممن افتدوا زوجات وبنات النبلاء الذين قتلوا أو أسروا في واقعة حطين. ورق قلب صلاح الدين لدموع أولئك النساء والبنات فأطلق سراح من كان في أسر المسلمين من أزواجهم وآبائهن، ومن بينهم جاي، أما "النساء والبنات اللاتي قتل أزواجهن وآباؤهن فقد وزع عليهن من ماله الخاص ما أطلق ألسنتهن بحمد الله، وبالثناء على ما عاملهن به صلاح الدين من معاملة رحيمة نبيلة"، ذلك ما يقوله إرنول Ernoul مولى باليان. وأقسم الملك والنبلاء الذين أطلق سراحهم ألا يحملوا السلاح ضده مرة أخرى، ولكنهم ما كادوا يشعرون بالأمن في طرابلس وأنطاكية المسيحيتين حتى أحلهما حكم رجال الدين من يمينهما المغلظة، وأخذا يدبرا الخطط للثأر من صلاح الدين. وأجاز السلطان لليهود أن يعودوا إلى السكنى في بيت المقدس، وأعطى المسيحيين حق دخولها، على أن يكونوا غير مسلحين، وساعد حجاجهم وأمنهم على أنفسهم وأموالهم، وطهرت قبة الصخرة التي حولها المسيحيون إلى كنيسة بأن رشت بماء الورد، وأزيل منها الصليب الذهبي الذي كان يعلوها، بين تهليل المسلمين وأنين المسيحيين.
    ول ديورانت ( قصة الحضارة )

    ردحذف

Related Posts Plugin for WordPress, Blogger...
"حقوق الملكية والملوخية والمهلبية ... الخ
محفوظة للست شهرزاد وإياك حد يسرقها ويحاول يزعلها آغجر .. مفهوم ؟ "