الجمعة، 2 مايو، 2014

انطوان سليم نحاس : مهندس وصياد وحلوانى








حكاية النهاردة عن شخصية متميزة
وبهديها لشخصية اكثر تميزاُ
ولها غلاوة ف قلبى هوه منامينو حبيبى
 " minagergis@
أطيب مهندس معمارى ف الدنيا
و#بيقولك اللى بنى مصر
كان ف الأصل حــــلوانى







وكان يا ما كان يا سادة يا كرام
من ييجى نص قرن واكتر 
1955 تحديدا طلع عدد من موسوعة دنيا المبانى
وفيه استفتاء بين المعماريين المصريين
قالولهم يا جماعة اختارولنا
أكتر 10 مهندسين شاطرين ف مصر
ففعلا نقوا عشرة
وكان رقم 3 ف القايمة
الهندزة انطوان سليم نحاس
واختاروه لأعماله المتميزة
واللى جسدت المدرسة الفرنسية ف التصميم
ونحكى بقى حكاية الجدع من طقطق لسلامو عليكو 








نحوسى ودا اسم دلعه بقى عشان انا حبيبته
وما دام حبيته يبقى لازم يتدلع
 نحوسى بقى
والعذرائى البرج اتولد لأسرة دمشقية
فى 27 اغسطس 1901
بس بما ان الشام كلها كانت حاجة واحدة ..
فيه ناس بتقول اصله سورى
وناس بتقول اصله لبنانى لأنه عاش فيها فترة
المهم الجدع شامى الأصل
وخلاص بلا خوتة


ف وقت ما كانت مصر أرض الاحلام والفرص الكبيرة
جت اسرة نحاس متمثلة ف الأب سليم والعيلة
وقعدوا ف القاهرة
وبدأ الشغل
وعيلة نحاس كانوا اغنيا
الكلام دا كان 1899
وكان صيدناوى ابن الشام برضو
بيكبر ف الأمبراطورية بتاعته
المهم اتحالف الأتنين ف الغربة
وعملوا بنك (نحاس - صيدناوى)





ومولوا عن طريقه مصنع للغزل والنسيج
ووصلت التجارة لحد انجلترا
وهوب حصل ارتباك كدا
فالتجارة باظت والبنك فلس .. !
الأب .. سليم نحاس مش هيستسلم
وهيشتغل ف الغزل والنسيج ويدير مصنع والدنيا تمشى
كان عنده 3 أولاد
انطوان بطل قصتنا كان المعهم
واكثرهم موهبة
بس مش ف التجارة .. ف الرسم والهندسة والأبتكار
 :)
انطوان او تونى او نحوسى اللى تختاروه
هيدخل مدرسة الفرير ف الضاهر






ويتميز جدا لحد ما المدرسة تختاره
ضمن مجموعة الطلبة اللى بيختاروهم سنويا
عشان يسفّروهم برا يكملوا تعليمهم
زى منحة دراسية يعنى
فنحوسى سافر
كان عنده 19 سنة لما راح باريس
وهناك انضم لمدرسة السنترال للفنون والحرف 1920
وأخد دبلوم السنترال ف 1925






لما خلص الدبلوم حب يتعلم اكتر
فانضم لمدرسة الفنون الجميلة
وبعد 5 سنين تانية يحصل على دبلومها
وبيقولوا ان المدرسة الفرنسية ف العمارة الوقت دا
سيطر عليها طراز الفن الحديث
الطراز العملى والمدن الصناعية
يعنى ايه يا طمطم هذوها الكلام ؟
يعنى الأشكال الأساسية للعمارة الحديثة
كانوا بيخدوها أو مستوحاة من الالات الحديثة
مش من الاشكال القوطية الزخرفية المعتادة 
واللى الناس عارفاها ومتعوداها 




انطوان كان قاعد ف فرنسا بعد تخرجه
واشتغل ف التدريس وبعدين حصلت ف حياته نقلة
غيرت الخطة بتاعته تماما
لما ف لبنان عملوا اعلان عن انشاء متحف
وانفتح المجال قصاد المهندسين اللى عاوزين
يتقدموا بتصميمات ونحوسى تحمس
وعمل رسمة وبعتها
وفؤجى اذ بيها تنقبل ! 






الجدع كان راسم شكل للمتحف بواجهة فرعونى اشاسا
الخلفية المصرية وكدا
فإذا بيها يتوافق عليها
ويقولوله تعالى اعمل المبنى 
فـ يلم خلجاته فورااااويروح على لبنان
عشان يبتدى ف انشاء مبنى .. متحف بيروت الوطنى
ويقعد يشتغل فيه سنين
بيقولوا ما بين 5 و7 سنوات




ويخلصه ويفتتحه رئيس الجمهورية اللبنانية وقتها
ويعمل المبنى ضجة وهوليلة
وانطوان يتحمس اكتر
ويقرر ينزل على مصرعشان يبتدى بزنس هناك





بس قبل ما ينزل مصر الاول
هيتعرف على بنت مديره ف الشغل هناك
ويتجوزها ويسافروا كلهم البنت وابوها وجوزها نحاس
ف مصر .. القاهرة تحديدا هيبتدى انطوان بالشغل
تحت رئاسة حماه ف مكتب كبير ف شارع شريف
بس بعد شوية هيتخانق مع مراته
ويتطلقوا
فيسيب المكتب !




وياخد دور ف عمارة ف شارع قصر النيل
ويعمل مكتب كبير مع زملاء له ف كلية الفنون الجميلة
اللى هيشتغل فيها مدرس لبعض الوقت 
وتبدأ المسيرة بتاعته ...



انطوان كانت سمعته سبقاه
بسبب مبنى المتحف ف بيروت
بس كمان لأصوله البراجوازية واهله الأغنيا
هيقدر ينسجم مع طبقتهم جدا
ورغم ان ابوه سابله ميراث ..
بس اخواته الأتنين هما اللى أداروه
وسابوا نحاس ف العمارة والتصميمات
والفن اللى كان واكل دماغه
:)
اغلب زباين نحاس كانوا من الأثرياء
ورجال الأعمال وبعض اثرياء الحرب
ودا اللى خلاه يتحرر من التبعية لمؤسسة
او قطاع عام ببيروقراطيته المعهودة وقوانينه الزفت
اللى تقتل أى موهبة او ابتكار





وكان من أنشط معماريو زمنه
انطوان سليم نحاس عمل (60) عمل متميز ف مصر
 شملت العمارات السكنية الفيلات مشروعات صناعية
ومبانى عامة مصانع ومطبعة وكنيستين




والراجل قعد يشتغل ويبنى من 1931 لحد 1966
وأنشط وقت كان الخمسينات
وبصوا معايا بقى الباشمهندس
عمل ايه ف الـ 35 سنة دول ..
وزمان يا عيال العمارات كانت بتتسمى بأسامى ملاكها
يعنى دى عمارة ام بعجر دى عمارة ابو سحتوت كدا 
ماشى ؟






اشهر عمارات انطوان ع الأطلاق كانت
عمارة عزيز بحرى
قولوا فين يا عيال ؟
ميدان التحرير بذات سخصيته
العمارة على ناصية محمد محمود
اللى تحتها هارديز دى ..
العمارة دى مزدوجة .. جناحين يعنى
واتبنت سنة 1934
وعملت ضجة وقتها رهيبة بسبب ارتفاعها
وتصميمها
وكذا حاجة كدا .. 




الطراز وقتها ف بنا العمارات كان الزخارف والحليات
والادوار متزدش عن 5 او ستة بالكتير
جه انطوان بالعمارة دى
وغيرها
وعمل تحول 





قالوا عليه وقتها ..
 انه بيستخدم اتجاه جديد ف التصميم اسمه الارت ديكو
ويندرج تحت بند الحداثة ف العمارة 
واستخدام خامات كانت لسه جديدة ف الوقت دا
زى الخرسانة المسلحة والحديد والألومنيوم والأزاز
والبعد عن الزخارف قدر الممكن 






طبعا فيه ناس كتير وقتها معجبهاش المنظر دا
وانا لو كنت هناك وقتها برضو كنت هقول يع
شكل العمارات دى وحش
بس الحقيقة ان الصيحة دى
بعد فترة
بعد شوية هيبقالها زباين ومعجبين
وانطوان جاله شغل تانى وتالت وعاشر
والسبب ؟
انه بتصميماته دى كان جرىء ومتمرد 
وبيستغل الفراغ
لأقصى درجة وبكل مرونة






يعنى ..
العمارات كانت زمان حوايط حاملة واسطمبة واحدة
الطراز الجديد كان اعمدة
وفيه امكانية ف انك تفتح شقة على التانية
تزود اوضة .. كدا
زائد انه العمارات بقت اطول
وبالتالى بقى فيه عدد شقق اكتر
وبمقاسات مختلفة حسب طلب كل زبون بقى
اوضتين او تلاتة او خمسة .. الخ


زائد كمان ان انطوان
كان عملى جدا ف عماراته خصوصا اللى ف وسط البلد
الدور الارضى كان مخصص للمحلات
الدور الأول للشركات
والباقى سكن عادى
وكل حاجة مترتبة ومتقسمة صح




قصره .. نحاس نجمه على
وابتدت تنهال عليه العروض
ويروح يعاين ويوافق او ميوافقشى
وابتدت بقى العمارات تتبنى 
وخد عندك ...






دى عمارة دوس .. ف شارع فؤاد
تحتها الأمريكين الصغير
مشهورة واللى بيروح وسط البلد يعرفها كويس 






عمارة عزيز بحرى .. فى ميدان مصطفى كامل
عزيز اتعاقد مع نحاس يبنيهاله
بعد ما عجبته .. عمارة التحرير




عمارة عزيز عبد الملك - قرب شيراتون الجيزة






 عمارة مطرى .. جاردن سيتى







عمارة انجى زادة
وساعات يكتبوها انجو زادة .. ف غمرة برمسيس
كانت أعلى عمارة ف زمنها





الكنيسة الانجيلية .. قصر الدوبارة
كنيسة قصر الدوبارة يا عيال .. !






عمارات الشمس - جاردن سيتى





 عمارة الشمس - المبتديان






عمارة بيسادة - القصر العينى 





وشايفين العمارة ع الشمال ف الصورة 
اتهدت 




وبنى نحاس مكانها العمارة 
اللى فوقها اليافطة دى




والفرير اللى اتخرج من مدرستها
طلبوا منه يوسعلهم الكنيسة
فعمل تصميم اكبر واجمل 





واشهر عماراته بقى كانت .. عمارة ليبون .. الزمالك 
واللى سكنها مشاهير الفن
زى فاتن حمامة شريهان محرم فؤاد ..






وسكنها ليلى فوزى وسامية جمال
 وفريد الاطرش ف فترة من حياته ...
والعمارة دى لها حكاية عجيبة اول ما اتبنت ..
العمارة اتبنت بأسم مالكها .. تشارلز ليبون الوريث
لعيلة ليبون اللى شركتها كانت اول ناس
دخلوا النور لشوارع القاهرة
يعنى عيلة كبيرة وبتاع
قوم ايه
الشركة تشترى حتة الأرض جنب جنينة الأسماك
ف ارقى مكان بالزمالك
وتكلف انطوان يصمم ويبنى وهيا تكع
وينتهى البناء 1950 تقريبا



واذا ايه يا خويا
سنة 1952 تقوم ثورة يوليو ..
وبعدها قرارت تأميم فياخدوا العمارة دى سنة 1961
عشان تبقى ملك للدولة وكدهون
:)
ويسكنها الضباط يا انشراح 
والدنيا وسع وبراح





الخبراء حسب المصدر اللى قريته
بيقولوا ان المتر ف عمارة ليبون بـ 40 ألف جنيه 
وبيع الشقة فيها بيتعمله مزاد وكدا 
o.O
ولحد دلوقتى الفنانة فاتن حمامة قاعدة فيها ..





اما فريد الاطرش بقى
فبعد شوية هيقرر يبنى عمارة لنفسه
على نيل الجيزة
وطبعا مش هيدور ويحتاس .. نده لنحاس
وقاله عاوزك تبنيلى عمارة أبهة
وفعلا عمل انطوان نحاس التصميم 
وعجب فريد وقال ع البركة






وخلصت العمارة وطبعا شهرتها سمعّت
وفريد قعد ينقى ويتشرط ف مين يسكن وميسكنشى
عشان وجع الدماغ
لحد ما جاله واحد من الاعيان ..
وكان اسمه (ابو الفتوح) وكان غنى
وعجبته فكرة السكن ف عمارة فريد الاطرش
فراحله وطلب يشترى شقة
ف قعدتهم الراجل الظاهرغلط 
ليه يا طمطومة قال ايه ؟


ابو الفتوح الظاهر كان اهلاوى ولا ايه ..
المهم فريد الاطرش قاله مبسكنش عندى غير الزملكاوية
وشدوا مع بعض
وكانت خناقة !
وفريد رفض يديله شقة
.. ابو الفتوح اتغاظ قوى قوى
راح طالع من عنده يتأبط غيظا
واشترى حتة الأرض اللى جنب عمارة فريد
وراح لنحاس وقاله ... الآتى





قاله انتا تبنيلى عمارة أطول من عمارة فريد الاطرش
لازم !
فنحاس نفذله طلبه فعلا
وبنى عمارة 25 دور
لحد ما بقى كدا شكلها جنب عمارة فريد 





اخراشى ع المنظر !
ليه يا عم ابو الفتوح العملة دى ؟؟
قالك ... 




وايه الدروس المستفادة من الواقعة دى ؟؟
ابدا ياريت الاخوة الزملكاوية بس يهدوا خلقهم
عشان الأهلوية زعلهم ويحش




انطوان سليم نحاس
بنى عمارات ف وسط البلد شهيرة جدا
زى عمارة اللوا - شارع شريف اللى ورا وزارة الاوقاف
ملقتش صورة أقرب #للأسف



عماراته كمان انتشرت ف وسط البلد
كانت ف ممر بهلر ومحمد فريد
شارع فؤاد شارع وشريف وقصر النيل
شارع الجمهورية وباب اللوق والقصر العينى
وخرج للزمالك المنيل ماسبيرو
وف بدايات شغله التلاتينات والاربعينات
كان مركز ف وسط البلد
بس بعد شوية خرج للجيزة وغيرها
لما الأعيان والكبار هما كمان خرجوا برا زحمة
وسط المدينة




وعمل مبانى لمصانع ف كذا حتة
زى مصنع الطويل للغزل والنسيج ف اسكندرية
مصنع فرانسوا تاجر للأقطان بمسطرد
مصنع سجاير البستانى كورنيش روض الفرج
مصنع ف المحلة الكبرى







وغير الفيلات ف مصر ولبنان ..
الكنيستين اللى قولنا عنهم
ومبانى عامة زى نادى الصيد المصرى 
 ومطبعة دار المعارف ف ماسبيرو





نحاس تميز بالادوار العالية ف عماراته
وعمارة انجى زادة ف غمرة رمسيس
كان اول مرة حد يعرف البرج السكنى شكله ايه ؟؟ 
ورغم انه مكنش غاوى زخارف
لكن استعمل زهرة اللوتس وحطاها ع الأبواب
وكوبستة البلكونات
وحد ابن حلال الله يكرمه يفهمنى يعنى ايه كوبستة
الا يستهيألى كدا والله اعلم شكلها شتيمة




وانطوان اهتم بإن العمارات يكونلها اكتر من مدخل
بما انها بتستخدم لأغراض تجارية
فيكون فيه مدخل بممر جانبى للسكان
ومدخل للموظفين
زائد مدخل الخدم




اللى يعرفوا الراجل دا .. بيقولوا انه كان هادى
وف حاله ومش غاوى شهرة ولا أضواء
رغم كل نجاحاته دى
مكبر دماغه ع الآخر 
ولولا ان الشغل بيحكم عليه الظهور
ف حفلات الطبقة الراقية
فكان يروح واخره 10 مساءا
ويفلسع منها ويهرب





وكان غيته الصيد
وكان صياد شاطر وله سمعته
لدرجة انه كان من المجموعة الخاصة
اللى بتسافر مع الملك فاروق انشاص
يصطادوا البطابيط وكدهون




وكان شاطر بجد .. لدرجة انه ياخد بطولات





ولدرجة ان رواد نادى الصيد كانوا بيراهنوا عليه
ف أيام حضوره
ويكسبوا
:) 



وبيقولوا انه كان بيؤمن بالحسد
وبيخاف جداااا من العين
لدرجة انه نادرا ما تلاحظ اسمه ف مدخل اى عمارة بناها
على عكس المتبع وقتها من زمايله







ويقال ان العمارتين الوحيدتين
اللى اسمه كان ظاهر فيهم
عمارة انجى زادة
وعمارة المقاولين العرب اللى بين عدلى وعبدالخالق ثروت
دول فلتوا يعنى
اما غير كدا فانتا تجيب عدسة مكبرة
وتمشى تفتش هوه ناقش اسمه فين ؟؟
حاجة غريبة جدا



الاغرب بقى انه لما عمل مبنى
لنادى الصيد المصرى .....
جاله التكليف بأمر ملكى من فاروق سخصيا
اكمن جلالتله كان دى هوايته وكدا
فنحاس عمل التصميم ونفذه
ومقبضش ولا مليم
والأتعاب كانت حاجة تانية





كانت حصوله على البكوية
اللى عمره ف حياته ما استعملها اطلاقا
لدرجة ان ابنه معرفش القصة دى الا صدفة
وهوه بيدعبس ف اوراقه ! 



الحقيقة ان انطوان كان مهندس معمارى
ورجل انشاءات وبس ومكنلوش ف السياسة
ولا عمره انضم لحزب
ولا اهتم بقرف السياسيين من اشاسه
قوم ايه ؟




تقوم ثورة يوليو زى ما احنا عارفين
وقرارتها تأذى قوى الناس اللى معاها فلوس
وهما زباين نحاس اصلا
بس دا محصلش فجأة
وخد وقت على ما حصل
على ما وصلنا لسنة 61 رجالة عبناصر
كانوا توحشوا فابتدوا يقرفوا كل حد بيكسب فلوس كتير
ونظام انتا ليه معاك فلوس من اصله 
وانتا كنت بتروح تصطاد مع الملك
وقعدوا يزنقوا عليه
الجدع اصدقاء له اقنعوه يمشى م المنطقة
ويبتدى شغل ف حتة تانية فمضطرا
لم خلجاته وسافر ايطاليا
ومنها راح لبنان سنة 1961



ف الوقت دا وما بعده على فكرة
ناس كتير قوى طفشت من مصر
هربا من نفوذ رجالة عبدالناصر
اللى بيقولوا بيقولوا ...
انه مكنش يعرف عن طغيانهم حاجة .. 


#القصد
يرجع انطوان لبنان
والراجل بانيلهم متحفهم الوطنى
قالوله نورتنا وتكرم
طب وسعلنا فيه كمان
قالهم حاضر
ولخبرته ومقامه 
عينوه رئيس لاتحاد لبنان القومى للفنون الجميلة
ورغم انه رايح هناك وسط منافسة شرسة
من معماريين اجانب وعرب
الا انه نجح يبدأ من تانى وبنشاط
وعمل 3 فيلات وبنك الاردن وبنك تانى كمان





وعمل تصميم مبنى البرلمان اللبنانى
وبدأ فيه لكن مكملوش للأسف
وكمله مهندس تانى
ليه ؟





عشان ف نوفمبر 1966
هيودع انطوان سليم نحاس الدنيا
وهوه كان بيتمنى يرجع مصر
لكن ملحقش




انطوان كانت المعلومات عنه قليلة
بسبب عزوفه عن الاضواء والشهرة
لكن وحسب المصدر يقال انه مؤخرا
حد لقى اوراق طالعة من مكتبه بالصدفة متخزنة
واتباعت عند بتوع الحاجات القديمة 
ومن وسط الاوراق دى خرجت صور
وتصميمات واحداث وشجعت اهله
يعملوله موقع ع النت
والمهتمين يجمعوله اللى يردله مكانته المعمارية
بأعتباره من الرواد





انطوان ف شبابه اول ما نزل مصر
فضل يدرس ف الفنون الجميلة من 1933
لحد ما قامت الثورة
واشتغل مستشار لجروبى
كان كمان رئيس للمعمارين بوازرة التربية والتعليم
ودرس ف بيروت العمارة
وزى ما قولنا 1961
اتعين رئيس لاتحاد لبنان القومى للفنون الجميلة







متحف بيروت الوطنى أول اعمال نحاس
بعدين هيتدمر جزء كبير منه ف الحرب الاهلية للأسف
لكن بعدين برضو هيتم ترميمه
واعادة افتتاحه


وخلاص انا خلصت يتبقى المصادر والملاحظات
الحكاية دى اعتمدت فيها
1) موقع انطوان سليم نحاس
2) مقالة 
3) كتاب " المعماريين المصريين الرواد" 
لــ شيماء سمير عاشور




واشتروه ولن تندموا يا جماعة
فيه تفاصيل اكتر عن التصميمات والعمارات من جوا
ولمعماريين تانيين
هايل بجد 





دى فيلا حما نحاس .. ف لبنان
من برا






وجوا


واقول الملاحظات بقى ..

1) المؤسف ان مصر اللى كانت الحلم
وكان بيجيلها الأخوة من الشام
تبقى ف زمن آخر طاردة وبتطفش ولادها نفسهم
مش زوارها بس
بس برضو كله منفّد على بعضه
والشام احنا نروحلهم هما يجيلونا زى دلوقتى ما حاصل
ماشى بس يبقى بمزاجنا
يا ريت منروحش هربانين مطرودين خايفين والنبى





2) انطوان بقى اللى عاش ف فرنسا زمن
ومرجعش مصر الا بعد ما تشبع بالثقافة الفرنسية
رغم ذلك اعتز جدا بزهرة اللوتس
واستعملها ف اعماله عن طيب خاطر
ويكفى انه عملها بجمال وبراعة
تخلى اللبنانين يشوفوها ف متحفهم الوطنى
وميعترضوش !
يا ترى العملة دى لسه موجودة ؟





3) هوه فريد الاطرش صعب عليا قوى الصراحة
بس يستاهل
 :) 

4) احب انا الناس التى تعمل ف صمت دى
لا غاوية شهرة ولا يحزنون
الجدع عمل اللى بيفهم فيه وبيحبه
وقعد الشغل دا ينفع بشر ياما
ولسه بيفيدهم
وعلى غرار عمارة يعقوبيان
بحاول اعمل زى الاسوانى
واتخيل كام حد سكن ف كل عمارة
كام حد حب وفرح وحزن
واتجوز واتولد واتطلق
ومات وقتل واتقتل ..
والعمارات نفسها .. والمبانى
كنيسة الدوبارة دى شهدت على احداث ياما
 وعمارة عزيز بحرى تحديدا اللى ف التحرير بقى ...







5) عمارة عزيز بحرى دى شهدت على حاجات 
احداث وايام وناس
 ولو بتنطق تقولنا مين اللى قنص الشهدا 
ف يوم الجمل
وشارع محمد محمود
مين سحل ست البنات





مين اللى جرجر جثامين المتطاهرين ف الزبالة 
مين اللى خان وغدر وباع
وقلب الفرحة ميتم وغم وجنازات ومعتقلات لا تنتهى ؟
تقول وتشاور على كل مجرم فيهم بالأسم
العمارة دى يا ريتها تنطق
ياريت




6) انطوان كان قانونا كدا ميبقاش مصرى ..
يبقى سورى لبنانى
رسميا يعنى
لكن الحقيقة انه ينطبق عليه قول نجيب محفوظ
المفضل عندى اكيد زهقتوا منه 
بتاع
المصرى هو من يحب مصر #نجيب_محفوظ




وانطوان سليم نحاس حب البلد بطريقته ..
بشغله
وبقت اعماله حتة منه
ومن شوارعنا
ومننا 





وليه القصة دى اهداء لمينا ؟
عشان هوه هندزة زيه
ومعمارى زيه
ومسيحى زيه
 بس انطوان فرع الشام
وعشان متغرب عن مصر .. مؤقتا برضو زيه 
وعشان احنا شوفنا ايام كتيييير
ف مكاننا على الرصيف قصاد هارديز
نبص ع عمارة عزيز بحرى دى
واحنا نرغى ونحكى ونتفائل ونقول بكرة خير
آه يانى






واتارى انطوان الصياد الماهر 
المهندش الشاطر 
البانى الحلوانى 
كانله ف كل شارع ف القاهرة الخديوية حتة 
وله ف التحرير حتتين وكنيسة 
واحنا مش عارفين !




وتصبحوا على الف خير


---------------------


Captain Haddock ‏@hassan19211 
حسب كل زمن..فى زمن التدهور الزياط اجدى!
مشاهير مهندسين الان زياطين
وعشان كده بيعملوا فلوس
لكن ملهمش اعمال قيمه معماريا


haimaa ‏@vanillaflavorr 
يعنى تقريبا هو اللى مظهر العماره الحديثه الجاف
اللى بيبعد عن المظهر الجمالى
اللى حبيناه فى العهود السابقه


Ahmed Rageh ‏@Ahmed_Rageh101
مش حلوة


 بومبة ‏@7urya 
لا ده نفسنته للأسف وعقدة النقص االي عنده علي الأغنياء وصحيح كان مع الغلابة 
لكن كان صد من كسب مليم بعرق جبينه 
زي محمد الفايد كده


عربيات @a7mad_ZaghLOL
 ونستنتج من كده ان الاهلي والزمالك حبايب من زمان :D

hmed Rageh ‏@Ahmed_Rageh101
وتلاقي الراجل قال مش هاسكن في عمارتي غير الاهلاوية
وسميعة عبد الحليم بس


memo@MahmoudMohamme6 
كوبستة هي سور البلكونة


Mina Elnaggar @minagergis

 الكوبستة الي هي الجزء العلوي في السور بتاع البلكونة
او الدرابزين الي هي بيتسند عليها
وانت واقفة في البلكونة
:)


Mina Elnaggar ‏@minagergis 
 مين بقي الي متميز اكتر مني ده ؟؟ #يهده_التواضع :)


تابع الحكاية وانتا تعرف
طول منا بقرى عنه واجمع تفاصيل كنت انتا ف بالى :-*

هناك تعليقان (2):

  1. صباح الخير
    المقاله تحفة بجد والاحلى انى قريتها اول حاجة تنهارده الصبح
    عامله ايه يا فاتيما يترى فكراني
    تقبلي مروري

    ردحذف
  2. سيد سعد
    ====

    دا كلام تقوله يا سيد المسكرات
    معقولة مفتكركشى ؟؟
    دنتا عشرة ايام جميلة يا أبو زينة
    وياريتها تتكرر تانى
    انا مبسوطة قوى انك هنا
    وانك متابع شهرزاد وحابب رغيها
    :)
    ومتهيألى عشان نحاس زميل من بعيد سنة بسيطة
    فنتا حبيت قصته
    فنانين زى بعضيكم بقى وكدا
    :))
    يارب دايما تكون بخير
    ومنورنى هنا
    ومبسوط بالحودايت ..
    منحرمش من ودك ومجييك ابدا يارب

    ردحذف

Related Posts Plugin for WordPress, Blogger...
"حقوق الملكية والملوخية والمهلبية ... الخ
محفوظة للست شهرزاد وإياك حد يسرقها ويحاول يزعلها آغجر .. مفهوم ؟ "