الأحد، 4 مايو، 2014

المحــروســــة : يخــت عليها يخـتـشــى








الحكاية النهاردة عن ازاى شوية خشب

ومسامير ف مية
يبقوا شاهد على التاريخ ودروسه وعِبره
والقصة هتبدأ
من عند الواد الحليوة المسمسم المقسم
اللى بعاكسه علنا
وفوق رؤوس الأشهاد اهو ولا بيهمنى
الخديوى اسماعيل




سمعة اللى مصر وحكمها جاله سهوة

تولى بعد وفاة الوالى سعيد اللى مات 1863
ومنذ هذا التاريخ بدأ عهد اسماعيل
اللى كانله خطط واحلام عظام



اسماعيل قضى جزء كبير من طفولته ف اوربا

يتعالج من رمد ف عينه
وبعدين راح ف بعثة يتعلم الفنون العسكرية لما بقى شاب
القصد الجدع انغرم بالغرب
وحب باريس واللى ف باريس
ولما جاتله فرصة يكون من اولى الامر
وصاحب مصر
قرر يخليها حتة من أوربا وأحلى كمان
وانتوا عارفين الباقى بقى




بدأ يخطط لقاهرة حديثة

وانشاءات ف البلد كلها وتجديدات الخ
وبعدين وهوه قاعد كدا على شط النيل
قالك ليه ميبقاش عندى مركبة مخصوص ليا ولعيلتى؟


ف الوقت دا كان أى حد ف الأسرة العلوية

لما بيسافر اما برا او بحرا وف البحر
بيستخدم السفن والمراكب العادية
او اللى تبع الاسطول المصرى الرابض اغلبه 
ف اسكندرية





اسماعيل ف سفرية من سفرياته

شاف مركبة تابعة للأسطول الانجليزى
وكانت تابعة للملكة .. واسمها
 HMYVictoria and Albert II 
فقرر يعمل واحدة زيها صورة طبق الأصل
وفعلا يبعت لشركة محترفة ف صناعة السفن ف انجلترا
اسمها "Samuda Brothers "
ويتعاقد معاهم ع الصفقة




وبدأت الشركة ف عمل المهمة وخلصتها 1865

وبعتت للخديوى تقوله .. لقد عُلم ونُفذ على أتم وجه
تعالى خد سفينتك آحاااج





سماعين مكدبش خبر

وبعت طاقم من الأسطول المصرى راح أبحر بيها
من نهر التايمز ورجع بيها على اسكندرية
واستقرت هناك
وراح اسماعيل عشان يملى عينه منها
ووقف يبص عليها ويشوفها مطابقة فعلا لأحلامه
واللى ف دماغه
فلقاها كالآتى واكتب عند يا بنى مواصفات العروسة:
الطول 411 قدم العرض 42 قدم
الحمولة تساع 3417 طنا
وبتمشى بالفحم
ولها طارات جانبية بسرعة 16عقدة في الساعة
وعشان الكلاكيع
 والقدم اللى بطلنا نستخدمه
بالبلدى كدا السفينة كانت طولها 145 متر
وعرضها 14 متر
ومكونة من 5 أدوار وحاجة تشرح النفس
وكانت بتمشى زى ما قولنا بالبخار
ومسلحة بـ 8 مدافع صغيرة العيار
من طراز «أرمسترونج» واهو منها زينة
ومنها حماية للمركبة من أى اعتداء يعنى





وقف اسماعيل يتأملها

ويبص لجمالها زى عاشق متيم
وبعدين سألوه يا أفندينا هتسميها ايه ؟
قالهم نسميها : ... ممممم
المحروسة 




والمحروسة ست الحسن والجمال بقى

هتشوف احوال واحداث وناس ياما
بس الاول بعد ما عرفنا مواصفاتها
نعرف شكلها ايه بالتفصيل الممل





المحروسة كانت مكونة من 5 ادوار او طوابق

1) الطابق السفلي :
وفيه الماكينات والغلايات وخزانات الوقود






2) الطابق الرئيسي

وفيه غرف الجلوس والمطابخ والمخازن
والجناح الشتوي والقاعة الفرعونية
وجناح الأمراء والأميرات 








3) الطابق العلوي الأول
وفيه مقدمة اليخت والمخطاف والأوناش
وصالة الطعام وصالة التدخين




4) الطابق العلوي الثاني
وفيه سطح المدفعية الحديقة الشتوية والصيفية
 والجناح الصيفي والصالة الزرقاء


5) الطابق العلوي الثالث : الممشى والعائمات







واليخت فيه 4 أسانسيرات صغيرة

وجراج خاص
والخبراء بيقولوا ان المحروسة تعتبر متحف عائم
من كم التحف والزخارف
واللوحات النادرة اللى موجودة ف كل اركانها
والتحف دى بتعكس كل حضارات مصر
من فرعونى ليونانى لرومانى لعربى اسلامى
وفضيات وكريستالات وخزف وصينى وسجاد نادر
والا الأخيرة دى بقى
السجاد






يقال ان المحروسة فيها سجادة تبريزى

مفيش منها الا 2 ف العالم
والسجادة كانت حلوة لدرجة ان اخت نابليون التالت
لما طلعت على متن المحروسة وشافتها
السجادة يعنى
لما قعدت قلعت جزمتها ورفعت رجلها فوق الكنبة !






واليخت الملوكى فيه بيانو نادراهدته اوجينى لسماعين 

وعزفتله عليه كمان
#رومانصيات_يامه_ياهبه
وبيقولوا اوضة السفرة كان فيها 30 كرسى آل
بسسسسسسس 
ازاى الكلام دا ؟!!



المحروسة من اول ما وصلت مصر

وهيا بادئة الشغل والحركة وحضرت ايام كتير قوى
سواء وصاحبها موجود او من غيره
وبعده
اول مرة خرجت فيها المحروسة من المينا
كان سنة 1867
ومكنش على متنها الخديوى اسماعيل
لأنها راحت تحارب سعادتك




راحت جزيرة (كريت)

لأخماد ثورها اهلها على الدولة العثمانية 
ولما السلطان العثمانى اتزنق ف جيش
قام باعت لسمعة
وقاله الحقونى .. فسماعين قال عينى يا عُبد
وبعتله المحروسة وغيرها من سفن
عليها جيش وعسكر قاموا بالواجب كله 
وتنهم راجعين







معدتش سنة

وف 1868 اتعزم الخديوى
على المعرض الدولى بباريس
فقرر يروح
وكانت دى اول مرة يسافر بيها على متن المحروسة 





دوس ع الصورة للتكبير

وحضر المعرض وانبسط وهيص
ورجع بيها على اسكندرية







ف هذا التوقيت كان العمل ف قناة السويس

بيتم على قدم وساق




وخلاص أوشكت تخلص

ويلا نعمل حفلة بقى
ونبتدى نحضر لكل التفاصيل





و ف سنة 1869 هتنبعت كروت الدعوة

لحضور حفل افتتاح قناة السويس
لعدد مش قليل من ملوك اوربا وكبراتها 
واسماعيل يقولهم يا ولاد
بدل ما كل واحد ييجى ف مواصلة تعالوا سوا
على متن المحروسة
واهو نوفر اجرة المكروباص برضو 






وييجى أمير وأميرة هولندا
وولي عهد ألمانيا الأمير فريدريك
الإمبراطورة أوجيني إمبراطورة فرنسا
و زوجة نابليون
وإمبراطور النمسا فرنسوا جوزيف







وف المحروسة يقضوا ايام لطيفة ف حفلات ودلع
على حساب صاخب المخيل
لحد ما يوصلوا مصر
ويحضروا حفل الأفتتاح وما قبله وما بعده كمان !




وتقام الافراح والليالى الملاح



                                دوس ع الصور للتكبير

وتحظى المحروسة بشرف انها تكون اول سفينة
ف التااااريخ 
تعبر قناة السويس
 :) 





وتخلص الحفلة وكله يروح عند امه بقى
 وتبدأ المحروسة شغل الجد والعمل والرحلات
لحد ما يلاقوا انها محتاجة حبة تعديلات
وف سنة 1872 يبعتها الخديوى لندن
عشان يطولوها شوية عن الاول
وبعدين تتدهور احوال البلاد ماليا
وانتوا عارفين القصة وازاى اسماعيل اتزنق
قوم مبقاش قصاده غير حل واحد
وهوه قبول العزل من الحكم والتنازل عنه لأبنه توفيق
اللى يختشى وكأنه ما صدق
وقال أبيع يا باشا #أبييييع





و ف 1879 يقولوا لاسماعيل السفر يوم الأتنين
فالجدع يا نضرى
يقعد يلم ف كل ما خف وزنه وغلا ثمنه
من القصور الخديوية كلها مجوهرات وتحف وفلوس !
ويشوف مين جاى معاه م الحريم ومين هتستندل ومتجيش
المهم هيحضر روحه ف السريع كدا
وييجى يوم الاتنين
فركب القطر لمحطة القبارى اسكندرية







ونزل م القطر استقبلوه المودعين
وكان توفيق ابنه معاهم
ومن شط القبارى يركب اسماعيل زورق صغنن
يوصله ع المحروسة ووراه زوارق فيها بعض المودعين





ويوصل الزروق للمحروسة
ويطلع اسماعيل على سطحها
وهتكون آخر طلعة يطلعها ف حيااااااته 
ويضربوله المدافع تحية وبتاع
والبوارج المحيطة ترفع الأعلام ومراسم وحركات
والمهم يسلم اسماعيل ع الناس
وبعدين يسيبهم ويدخل كابينته الخاصة
والشمس بتغرب
وتشق المحروسة البحر والوجهة نابولى المنفى المؤقت
واللى بعده هيروح اسماعيل تركيا
ويحاول يسترضى الباب العالى يمكن يرجعوه
وأبضنننننن
ميحصلش




ويقعد سماعين ف الغربة 17 سنة بحالهم
وكل شوية يقول عاوز ارجع
عاوز ارجع
ومحدش يعبره لا ابنه توفيق لحد ما مات
ولا حفيده عباس حلمى راخر !!!





وف يناير 1895 توصل برقية من الأستانة
لحسين كامل واحمد فؤاد اولاد سماعين
نصها بيقول الحقوا ابوكم صحته متدهورة للغاية
ومحتاج جو جاف وحار للأستشفاء ..
الجدعين خدوا البرقية
وراحوا لعباس حلمى
اللى كان لسه خديوى صغنونة على قده كدا
الواد كان قنزوح قوى
والانجليز فارمينه ومبهدلينه وبيحاربوه
ومتعرفوش كان فيه ايه بينه وبين جده اسماعيل
والظاهر كان بيحمله مسئولية دخول الاجانب مصر
وان بسببه الانجليز عافقين ف رقبته




يعنى المهم عباس حلمى التانى بص ف البرقية
وشه قلب
وقالهم .. لأ ميجيش
وانتهينا




وف شهر مارس من نفس السنة
توصل برقية تانية بإن جدكم اسماعيل توفى
وتعالوا خدوا جثمانه
اسماعيل كان سايب وصية انه يندفن ف مصر
فولاده فؤاد وحسين طلبوا من عباس
يبعت المحروسة تروح تاخد الفقيد
وقالهم برضو لأ 





وماله الواد دا غلاوى كدا ؟؟
عموما
طز
والأبناء أجروا باخرة من هناك
وجه عليه الجثمان واندفن اسماعيل ف مصر
والله يرحمه وعموما هيا مبتدومش لحد 
وهتشوف يا عبس 





ف 1894 أتغيرت غلايات المحروسة
واتعملها عمرة حلوة كدا
ف ورشة «حسبو» بك بالإسكندرية 





وف سنة 1899 الخديوى ركب المحروسة
وهوه رايح بورسعيد
عشان يحضر حفل تنصيب تمثال ديليسبس
على مدخل القناة 



والمحروسة سنة 1905 هتسافر انجلترا
عشان يشيلوا «الطارات الجانبية»
ويحطوا مكانها «الرفاصات »
وتتزود بأحدث توربينات بخارية في العالم وقتها





وبعد ما يبنى عباس حلمى التانى قصر المنتزة
ف اسكندرية
 يبقى للمحروسة مرسى تانى بعد مرساها الأساسى
ف المينا الغربى




ومع التعديلات
هيشيلوا مدخنة من المدخنتين اللى كانوا فيها
و اى صورة للمحروسة غالبا هتكون متاخدة بعد 1905
مش قبل كدا 
لأن ملهاش صورة بمدخنتين ابدا صادفتنى 







وف سنة 1912 هتزود المحروسة بتلغراف

وسنة 1914 يقرر الخديوى عباس حلمى
انه يسافر اروبا ف رحلة استجمام وعلاج
ويسيب مكانه للقائمقام بتاعه
مين يا طمطومة
يبقى الباشا .. حسين باشا رشدى
اللى على اسمه احد شوارع وسط البلد
وكلفه عباس بتولى شئون الحكم لحين عودته من برا
حلو ؟؟



لا مش حلو .. عشان الحرب العالمية الاولى هتقوم
واوربا تشعلل وعباس يقلق
ويبعت لرشدى يقوله رتب حالك انا جاااااى
فرشدى يقوله
- بلااااش
- ليه يا حاج بلاش ؟
رشدى قاله الأنجليز زعلانين منك ومقموصين
وبيقولوا يستحسن تأجل رجوعك لمصر دلوقتشى 
عبس قال طب هرجع امتى ؟
رشدى قاله معرفشى وغلاوتك
واتارى ف هذوها الأثناء
كان الأنجليز بعيد عنكو بيحضروله خازوق مغرى
مخصوص وصنف اول ممتاز



اللى هوه ازاى كدا ؟
بسيطة الانجليز اعلنوا الحماية على مصر
وعممونا ولبسونا السلطنية قصدى عملوها سلطنة
وشالوا ألدوا جابوا شاهين .. حسين كامل
وحسين كامل ابن اسماعيل
كان راجل كبرة والحكم حسب الأريكة اياها
بتاعت الورائة خلاص بقت بعيد عن شنبه اشاسا
وطبعا اول ما عرضوا عليه الكرسى
وتمنع لأسباب عاوائلية
اكمن عباس يبقى اخو المودام
المهم هددوه لو رفض 
كدا هيخرج الحكم من اسرة محمد على
حسيبن كامل قال أبيع اخو مراتى عادى
 .. أبيع يا باشا
وبقى السلطان
والحاج اللى قاعد برا ف اروبا دا وضعه ايه ؟؟
قالولك دا خديوى معزول
ومع نفسه بقى



وبيقولوا ان عباس حلمى التانى رفض اللى حصل
وراح الاستانة وقلب الدنيا
وطبعا ف النهاية كلام الانجليز هوه اللى مشى
لكن عبس قعد مصّر انه الخديوى
وشرعية شرعية
وف الأخر أضطر ينخ ويتنازل رسمى للملك فؤاد
اللى كدا كدا قعد ع الكرسى ولزق لزقة سودة يعنى
وشوف حكمة الزمن يا مؤمن بقى
شوف حكمة الزمنننن



قالك الخديوى المعزول عباس
ف المنفى بتاعه بسويسرا قعد كل شوية
يبعت لفؤاد يقوله
ارجع مصر
أرجع مصر
وفؤاد يقوله أبضننننننننننننننن



وحتى بعد فؤاد ما مات ومسك فاروق
وكان لسه صغنن بس سامع الحكايات كلها
عن ندالة الحفيد مع جده اسماعيل
اللى هوه على فكرة جد الأتنين
اسماعيل يبق جد عباس وجد فاروق



المهم .. عباس حلمى قعد لحد سنة 1944
يطلب الرجوع وفاروق كمان زى ابوه يقول لأ
لحد ما المعزول مات ف المنفى
وبعدين الفرع بتاعه راح لفاروق ..
وقالوله عاوزين المحروسة
تروح تجيب الخديوى عباس من برا
دا خديوى مصر برضو رغم كل شىء
فاروق رفض طبعا
وشوف عملك بيقعدلك ازاى 
وكما تدين تدان




انا بقى اللى يهمنى ف القصة دى
بعد الندالة الأكوام اكوام ف الفسحة دى
ان كان فيه حرص
على ان المحروسة تكون توصيلة الناس دى للوطن
بعد الموت
قد ايه كانت مهيبة .. وجميلة .. ومهمة
وليها مكانتها 



المحروسة سنة 1919 هيبعتوها انجلترا
عشان يغيروها فيكون وقودها من فحم لمازوت
ويطولوها كمان شوية
وكل دا كان لون القاع اسود على فكرة





قاموا سنة 1925 قالوا كفاية كآبة والنبى
وراحوا باعتينها تندهن أبيض .. بدل الاسود
وتثبت ع الفاتح بقى متغيروش من يومها





وف سنة 1930هتاخد الملك فؤاد على متنها
لبورتوفيق عشان يحضر افتتاح المينا الجديدة 





وسنة 1939 هتروح تجيب المخسوف على عينه
رضا بهلوى من ايران
عشان يكتب كتابه على الاميرة فوزية
وبعدين ياخدها بلده يعكنن عليها عيشتها
وينكد عليها ويرجعهالنا خاسة ومكسورة وحزينة
ومحرومة من بنتها 
وبعدين تتطلق 





سنة 1946 هتروح المحروسة جدة
عشان تاخد الملك السعودى عبد العزيز آل سعود
من هناك وبعدين ترجعه بلده تانى معزز مكرم ..





وسنة 1949 يبعتوها ايطاليا
عشان يتعملها عمرة شاملة وتجديدات على احدث طراز





وترجع المحروسة مصر
والمفروض لحضن
حفيد اسماعيل بقى فاروق
اللى كان بيحب اليخت دا جداا
وغاوى يطلع بيه سفريات اوربا
لكن على الحظ والقمسة
تقوم الثورة










والظباط يحاصروا المقرات والقصور
ومنها قصر راس التين اللى كان فيه فاروق
 ويطلبوا منه التنازل عن العرش والا ف المّنفلة





الفتى اصلا كان قرفان ومش عاوزها
لولا انها ورث وميصحش يتبطر وكدا
وبعدين قال هاتوا الورقة
وراح ماضى عليها
ويلا ... اياكش تولع 






واتنازل لأبنه
اللى طبعا بقى تحت وصاية الضباط الاحرارطبعاااا
المهم الراجل قالهم ألم حاجاتى
واسافر ع المحروسة





وطبق الأصل علقة اسماعيل الجد
وخروجه من مصر على المحروسة
ويقال ان فاروق قال عاوز اليخت 
احتفظ بيه بعد ما اسافر
والكلام وصل للضباط الاحرار
فمحمد نجيب كتب ورقة بتعليمات بخط ايده
لقائد المحروسة انه يرجع بيها
لااااازم
بعد اتمام المهمة 



فاروق قالهم طب الطرادات اللى بتحرس المحروسة
تيجى معايا لحد نابولى تحرسنى ؟
برضو طلبه اترفض
وقالوله لحد المياه الاقليمية
وبعد كدا مع نفسك !
والمحروسة عليها مدافع وسلاح ومتخفش
واحنا كنا عاوزينك تغور واديك بتغور
والقصص دى
المهم الملك المعزول استكان
ولم اللى قدر عليه والبنات
ومراته التانية ناريمان





ويوم 26 يوليو 1952 لبس البدلة البيضا بتاعت البحرية
وخرج لحد المحروسة ف التشريفة المعتادة 
دوس هنا 
وضرب العساكر الطلقات تحية
وكان المفروض محمد نجيب يحضر المراسم دى
بس الطريق كان زحمة 
فاروق استتقل الانتظار
وبرستيجه نقح عليه يستنى اكتر من كدا
سلم على المودعين واللى بكى منهم ناس كتير
وطلع سلم المحروسة واتحركت بيه


وبعد شوية لحقه محمد نجيب
وركب لنش صغير لف حوالين المحروسة ف الاول
كتقليد متبع وبعدين طلع نجيب على متنها
وودع فاروق كما يجب لملك أن يودع 






ونجيب الكومل الاخلاق
انتوا عارفين هيمشى ازاى من كرسى رياسة مصر
وييجى مكانه عبناصر اللى هيغير اسم اليخت الملكى
من المحروسة إلى  .... "الحرية"





ويبدو لظروف الحرب والسما الملغمة
فهيكون السفر بالمحروسة اضمن وأكثر امنا بمراحل
وعبدالناصر هيرمح باليخت ف حتت كتير 
وهيروح بيها لقاءات 
ومؤتمرات ف اللاذقية وباندونج والدار البيضا
وف مرة ركب المحروسة ف زيارة للأخ تيتو
قوم وهوه عنده
حصل انكيلاب ف العراق





والمخابرات اليوغسلافية بعتت اخبارية لعبناصر
ان فيه مخطط لقتله
وتفجير السفينة الحرية بمن عليها وانتا اولهم ! 
وبس تيتو قال يعمل فيها جوز عمته
وقاله خليك عندنا يا أنصّ
وعندى سرير كنبة تحفة
ولاّ افرشلك ف الصالون
ومحدش هيخش عليك متخفش
المهم متمشيش دلوقت!



عبناصر عرق الكرامة الصعيدى نقح عليه
وقال لتيتو متقلقش عندى طرادتين بيحرسوا الحرية
القاهر والظافر
واياك حد بس يقربلى وانا بلوة سوخة .. 
وكل هذا الهتش ..
وبس اتحركت الحرية من يوغسلافيا
على متنها ضباط جيش وبحرية
و3 مدنيين فقط
هما وزير الخارجية 
ومحمد حسنين هيكل
وصلاح الشاهد مدير المراسم



وبمجرد ما اليخت الرئاسى اتحرك
راحوا مطفيين كل الأنوار
واطلقت صفارات الأنذار
وعملوا زى تجربة كدا لوقت الخطر 
صلاح الشاهد  ... اتشاهد


وقعدوا يفهموه هيركب انهى زورق نجاة وبتاع
المهم انه جه على جنب
وسأل احد الظباط كدا
وقاله لو حد عاوز يغرق سفينة يعمل ايه ؟؟
ايه الطريقة يعنى
فحضزابط رد ببرود :
ابدا .. فى منتصف الباخرة وعلى سطح المياه
ويطلق قذيفة وبس
صلاح الشاهد عمل حساباته
لقى اوضته ف الهدف مباشراااااا
وقعد يضحك ويقول لو الحرية انضربت
هكون اول شهدائها :)
ومنضربتشى يا خويا ولا حاجة
دا تهويش مخابرات وحركات احنا هارشينها 
ورجع عبناصر على مصر



وبيقولوا المحروسة
(الحرية ف العهد الناصرى والساداتى وجزء مباركى)
ركبها تيتو وخروشوف .. يا خرشواااا
ومات عبدالناصر ومسك السادت وقامت الحرب 






وانتصرنا وعلى ما الدنيا هديت
وقرر السادات يعيد افتتاح قناة السويس
كنا بقينا ف سنة 1975
وانتوا عارفين السادات بقى غاوى فشخرة وقنعرة






وكان راجل نزيه وبيحب الابهة الصراحة تتقال يعنى
وكفاية علبة حلاوة المولد
اللى كان حاططهالنا 
على صدر بدلته العسكرية دى يعنى



السادات كان ببيفكر انه يركبها
ويدخل بيها القناة
بأعتبارها كانت اول سفينة دخلتها زمان
ويا سلام لو تبقى اول سفينة تدخلها تانى برضو
ايه الناس الحلوة اللى بتقرى تاريخ دى ..
#فكرة_هايلة
بس الفكرة معجبتش هيكل
واللى بيقول ف كتاب خريف الغضب
انه قعد مدة يقنع ف السادات ببلاش ولأه
وتدخل بحاجة عسكرية أوقع
واكثر مهابة وكدا





وفين وفين لما السادات تنازل عن الفكرة
وقال يركب مدمرة
بس برضو تدخل وراه المحروسة ف الخلف
 #احب انا الناس العنيدة
:)




وشقت المحروسة قناة السويس للمرة التانية
ف لحظة تاريخية من عمر الزمن مبتتكررش
لا لناس ولا لسفن كمان









السادات زى ما قولنا عكس عبدالناصر خالص ..
كان نزهى وغاوى شياكة
وكان بيعشق المحروسة ويحب يركبها 





ولدواعى امنية برضو
لأن التنقل جوا ف منطقة الشرق بعد الحرب
مكنتش لسه آمن كفاية
المهم انه المحروسة هتوصله يافا
اثناء بدء محادثات السلام 
والمحروسة برضو هيا اللى هتوصله العريش
عشان يرفع عليها العلم المصرى لأول مرة
بعد عودتها من تحت قبضة المحتل
وتفضل المركبة الجميلة دى 
تحت الرعاية والعناية
بأعتبارها من أقدم واندر قطع الأسطول المصرى



وبعدين يتكل السادات على الله
وييجى مين يا حلويييين ؟
ايوه الموكوس
انا حوسحوس وحوسحوس أنا
وطبعا الدنيا اتغيرت والطيارات أروق واسرع
زائد ان الحاج مكنش ذواقة
لا لفن ولا أدب ولا ثقافة ولا تاريخ حتى ..






والمحروسة هتقبع وحيدة ف مرساها عند قصر التين
ف اسكندرية
وتقعد الست ف حالها
لا تزعل حد
ولا حد يزعلها 
وتتعملها الصيانة الدورية ومتتحركش من مطرحها
بس بتشتغل وتمشى عادى



وسنة 2000 يصدر امر رئاسى بأعادة اسمها
الى " المحروسة " بدل الحرية ..!
والحقيقة الحركة دى نفسى اقول عليها شياكة
بس متوجسة عشان ممكن تكون اتعملت
كيدا ف عبناصر او أى حد
اصل الله يمسيه بالخير ال مبيموتش دا
تعودنا منه انه مبيعملش حاجة كويسة لله ابضنننننن
لازم فيه سبب
اما كيدا ف حد
او غلاسة
او دماغه اتخبطت ف ترابيزة الصالون
حاجة كدا يعنى
المهمممممممممم
ترجع المحروسة لأسمها الاصلى ف السجلات الرسمية





وبيقولوا بعد مسلسل تيم الحسن بتاع فاروق
فتحوها للزوار كمتحف 
ومش كان حد يقولى يا عيال عندى شبشبى وجلابيتى
واروح ارقعلهم 30 زغروطة
واتصور جنب السجادة التبريزى اياها #اخص_عليكو 






وهوه انا معرفش عالميا .. بس الاكيد انه عربيا

يخت المحروسة هوه اقدم عائمة
تعمل منذ انشائها وحتى اليوم
اكيد فيه حاجات أقدم ف العالم ..
ولسه شغالة بس عربيا مظنش فيه الصنف دا
ولسه بيشتغل ومبقاش ف متحف وكهنة ..
#يستهيألى




واخيرا دايما اسأل نفسى هذا السؤال 

يا ترى الناس وهيا بتعمل الحاجات 
بتتخيل لثوانى ان مصيرها ممكن يتدهور للدرجة دى ؟
اسماعيل وهوه فرحان بالمحروسة 
كان يتصور انها اللى هتاخده لبعيد عن مصر 
وميرجعش تانى ؟
وان المصير نفسه هيلاحق 2 من احفاده 
واذا كان عباس حلمى التانى خرج من مصر 
ومكنش فاكر انهم هيخلعوه 
فالملك فاروق خرج وهوه عارف كويس 
ان نجنه بينطفى 
ونفس لحظة جده اتكررت ..
لم الشنط 
والوداع والخروج الحزين ...
ايييييه ع الدنيا .. !


وانا خلصت

واقول الملاحظات :



1) بيقولوا ان المزمزايل أوجينى أهدت اسماعيل بيانو نادر

وهوه حطه ف المحروسة
بس محدش جاب سيرته ليه ف أى مقالة قريتها 






2) توفيق كان واطى وندل وباع ابوه

طب عباس حلمى عمل كدا ليه ؟؟؟
العيال دى مالها اخلاقها عربجية كدا
مع الأعتذار للعربجية




وانا اسفة فعلا

لأن العربجى لو حد من اهله عمل اييييه ومات
هيروح ياخده ويدفنه عشان اكرام الميت دفنه
يا احفاد سماعين ياأوغااااد




3) المؤسف بقى ان الأنتقام دا ينتقل من جيل لجيل

وفؤاد يشربه لأبنه فاروق
ويقولك آخلاق ملوك وبتاع
سكتونى بقى عشان مشتمش .. هه





4) الأصل غلاب 
والمحروسة اتغير اسمها
ورجعلها تانى عشان الأسم بينادى صاحبه
والسفن كمان :)
وحسنى رجع الأسم ف لطشة كرم
وكتر خيره بصراحة انه مسمهاش المحروسة ..  سوزان






5) المحروسة دلوقتى داخلة على قرن ونص من الزمان

وشغالة وحلوة وبخيرها على عكس حاجات كتير قوى 
ف البلد دى خربت وراحت عليها وهيا تستاهل 
المحروسة ربنا حارسها وصاينها 
والله اكبر من عينيا
وعين اللى يشوفها ولا يصليش ع النبىىىىى
حاجة تفرح بجد



وهذا يقودنى الى رقم

6) ف حكاية النهاردة وكل وقت
متنكروش ان رغم اسراف اسماعيل وجنانه
بس الجدع قِرفته حلوة
وربنا مبارك ف اعماله آه





ويحكى ان احد العرافين تنبأله بأنه هيحكم
وقاله أبنى طول ما بتنبى ملكك دايم
واول ما تبطل بنا هيزول عرشك
والظاهر سماعين سمع بالنصيحة
وفضل يبنى ويعمر ويشيد 
ويخسر فلوس واملاك
واحنا ف النهاية طلعنا الكسبانين
ويسألونى بحب اسماعيل ليه ؟
سؤال غريب مجاوبشى عليييييييه






7) بيقولوا ان المحروسة مكنتش بتعدى

ولا هتعدى عموما ف المستقبل
على أى سفينة الا لما يترفعلها العلم
ويتضربلها طلقات تحية وتكريم لمكانتها وهراقة اصلها  #آخرااااشى ع الدلع



وتوتة توتة

خلصت حكاية المحروسة







المصدرين الأساسيين 

1) موقع فاروق مصر 
2) قناة السويس 145 عاما : قراءة فى مشهد الافتتاح 
والصور من ع النت ... 



------------------------------------------


amr salem @amrosalim2001 
 اخدها بقي وقعد يعمل بيها خمسات قدام القصر بتاعه


amr salem @amrosalim2001 
 لا حول ولا قوه الا بالله ايه العالم الجاحده دي
سبحان الله محدش منهم بيشوف طيب
ولا بيموت مستور


amr salem @amrosalim2001 
 معلوم من حفر بيرا لاخيه اتزحلق فيه


Yasser Abdullah @Yasserigo 
 العيال دي راضعة لبن صناعي



amr salem @amrosalim2001 
 احبيبي ا مرسي ...قصدي اعباس



amr salem @amrosalim2001 
 الكرسي بتاع مصر ده وبال ع اللي بيقعد عليه
اشوف فيك يوم يا سيسي



Hany Zaky @Hany_Zaky 
كيدا فى الحرية ذات نفسها


تصدق آه صح والله ابلغ تفسير فعلا :))))


 سها المنياوي @morgana00m 
 الكراسي بتغير دي حقيقة



اكتئاب ما بعد الثورة @MahometusUsama 
 أحمد شفيق باشا بيحكى أن عباس
كان عايز جده يرجع يتعالج فى مصر
ومجلس الوزراء هو اللى رفض

هناك 3 تعليقات:

  1. hassan18211@gmail.com5 مايو، 2014 12:15 ص

    لو اتعملت كمتحف متحرك تحيب ايرادات هايله وثقافه..يعنى تطلع عليها نزهات بتذاكر غاليه لتجربة العبش كالملوك لساعتين تلاته مع الطعام والشراب..

    ردحذف
  2. hassan18211
    --------------------

    حسب المعلومات انها مفتوحة للزوار
    وهيا راسية
    ومتهيألى كدا احسن .. منعا لأستهلاكها او غرقها
    انتا عارف احنا اجدع ناس نغرق ونحرق ونبهدل ونقل قيمة الحاجة
    :))

    انا عاجبنى فكرة نضال المركبة دى ضد الزمن
    وكأنها فعلا اسم على مسمى
    محروسة
    وربنا كاتبلها تقعد
    وتشهد كل العصور دى
    وانشالله تعيش كمان اكتر واكتر


    نورتنى
    :))

    ردحذف
  3. موجود فعلا فى المحروسة بيانو بتاع الامبراطورة اوجينى

    ردحذف

Related Posts Plugin for WordPress, Blogger...
"حقوق الملكية والملوخية والمهلبية ... الخ
محفوظة للست شهرزاد وإياك حد يسرقها ويحاول يزعلها آغجر .. مفهوم ؟ "