الأحد، 1 يونيو 2014

مــارجـريتــا .. أنثـى العنكبـوتــة





حكاية الليلة دى دراما
وفيها كل العجايب والعبر
وهبتديها بسؤال سألهولى ابنى زماااااان
ان هوه ليه ربنا خلق العناكب يا ماما؟




قوم انا طبعا اتفذلكت وجاوبته اجابات
نظام عشان تعلمنا النسيج
وازاى نعمل الشبك ونصطاد
وعشان التوازن البيئى انها تاكل حشرات تانية
لو فضلت ممكن تضرنا 
وعشان يبقى فيه سبايدر مان وافلامه وكرتوناته وكدا
بس مرضتش بقى أصدمه بأهم سبب ف وجودها
وهو الدرس الفشيخ اللى بتديه كل انثى عنكبوت
لكل جنس الحريم وتحديدا خصوصا واذا بالذات
القادرات المفتريات منهن !
والدرس يتلخص فى
كيف تتخلصين من زوجك ف ليلة الدخلة بدون معلم
:))



حكاية الليلة دى عن احداهن ..
عنكبوتاية بس على كبير بإيدين ورجلين ووش برىء
والضحية واحد راحلها برجليه لحد العش المغزول
عشان يلقى مصيره المحتوم




وعنكبنا الذكر ..
كان مصرى هنقول حكايته
بس لما نحكى الأول عن انثى العنكبوتة
الأنسة مارجريت ميلر الشهيرة ف باريس وضواحيها
بـ ماجى ميلر ..





الأنسة مارجريت أو ماجى كما يسمونها
كانت بنت فرنساوية قمورة نغنوشة
تعرف من أين تؤكل الكتف
وف سن الخمآشر كان عندها طاقة فدخلت ف علاقة
وبقت حامل !
وخلفت بنوتة والظاهر الاب فلسع او استندل
أى كان يعنى المهم انها بقت بطولها مع بنتها
وبدأت تحضر نفسها لحياة مستقلة 
تصرف بيها على نفسها وبنتها
ومعنديش ادق التفاصيل
بس الشاهد انها قررت متشتغلش أقدم مهنة ف التاريخ
بقواعدها التقليدية اياها
وقررت تكون ..
من النوع "الغالى" للطبقات الراقية وفقط




وبيقولوا انها كانت بتعمل زى صالون ثقافى كل يوم حد
وتعزم فيه كتاب وشعرا ووجهاء
وكانت محبوبة ومرغوبة
وبتختار عشاقها بعناية لحد ما بدأت الحرب
وجمال ماجى وشخصيتها وعلاقاتها قدرت توصلها
لأرقى الاماكن وتتعرف فيها على اهم الاشخاص
واللى هيكون منهم امير ويلز شخصيا





بتقولى مين يا طمطومة ؟
أمير ويلز ؟
ولى عهد المملكة 
واللى هيبقى بعد كدا ملك انجلترا حضرتك
المذكور أدوارد التامن
وإدى زى ما كانوا بيدلعوه .. وقع ف الحب
وقلبه راح لمارجريت كانت اول قصة حب ف حياته
وشباب بقى وطايش



هوب والحرب العالمية الاولى قامت
واواد سافر الجبهة وقعد يبعت لماجى جوابات
وهيا تبعتله وحب وهيام وف وسط الكلام
تعليقات منه على السياسات العامة للبلاد
ورأيه ف الحرب والقرارات .. الخ
وطبعا كان بيخبط ف الحلل 
ومتضايق م الوضع وبيتكلم بحريته مع المزة بتاعته 
#عادى



وبعدين لهيب الحب انطفى وادوارد نفضل لماجى
وهيا قلبها قاد نار فقعدت تبرطم بالكلام
وراحت باعته لسكريتر الأمير تردحله بالفرنصاوى
وتقول جوابات المذكور عندى وهفضحه !
وكانوا 20 جواب .. بخط ايده وامضائه
والهانم لوحت بالتهديد وطبعا كان مفهوم
انها عاوزة مقابل تعويض عن وغدنة الأمير معاها 




وفعلا دا اللى حصل .. حاشيته دفعتلها التمن المناسب
واستردت الجوابات وانتهينا على كدا
وخدت الموكوسة الفلوس المغموسة بالإبتزاز
وقررت تخرج برا انجلترا خوفا على نفسها ..!
وقالت اتفسح واهيص ..
ونسيبها شوية بنت التييييت دى
ونرجع مصر فلاش باك لورا شوية
عند الخديوى عباس حلمى التانى





للخديوى عباس حلمى التانى صحيح
كان بيكره الانجليز وبيحب مصر قوى
بس كمان بيحب الفلوس قوووووى
حاشيته كانت على نفس المنوال
واثروا ف حياته ثراء فاحش
وبعد مجى السلطان حسين كامل موته
ثم بعده احمد فؤاد
هنبدأ نسمع عن الوجيه .. على كامل فهمى





على بقى عنكبنا الصغنن البائس
ابوه كان راجل من رجالات القصر والجيش
وكان برتبة فريق
#الله_يخربيتهم_كلهم
الأب كان غنى بشكل فاحش وغبى غبى



كان عنده اراضى بالهبل
 وعقارات ف اسكندرية اكترها
ف سيدى بشر وميامى والعصافرة
واشهر قصوره القصر دا
متهيألى كلكم شفتوه ع الكورنيش





المهم ان الاب رغم كل الفلوس والغنى دا
كان بخيل وجلدة وبيقطر على عياله
وبيقولوا على الغلبان كان ف المدرسة
بيستلف من صحابه عشان مصروفه كان قليل
وكان مذلول ذلة الكلاب بين زمايله
اللى كلهم ولاد ناس زى حالاته
بس اباهاتهم كانوا حاجة تانية
المهمممم قعد على يعانى لحد ما الأب مات
#ف_داهية



بس دلوقتى الأب مات .. وعلى ف تالتة ابتدائى
ابتدائية من بتوع زمان
وكان عمره 18 سنة ووراث مبلغ خرافى
واملاكه هوه واخواته
وكان تحت الوصاية
قام قرر يتمرد وراح سايب المدرسة
واتلم حواليه شلة منتفعين وطماعين
منهم سعيد الكنانى
واحفظوا اسم الكلب دا كويس
ماشى؟



سعيد دا كان موظف عادى على قد حاله
اتلم على محامى وشوية اوغاد وعملوا كردون
حوالين على الوريث
ورفعوا قضية لحد ما اتشالت الوصاية عنه
معرفش ازاى !
وبقى على كامل فهمى متصرف ف امواله
اللى الدخل السنوى بتاعها
 يعنى اللى بيجيله من تركة ابوه سنويا بس
وقولو يطلع كام يا عيال ؟؟
150 ألف جنيه
سنويا غير الأصول الثابتة طبعا ...



وفجأة الواد بعد زنقة ومرمطة ف حياة ابوه
بقى الورث قصاده يغرف منه
وما صدق اتلايم ع الفلوس واتلم عليه الواغش
وابتدى يصرف ببذخ رهيب
وكأنه بيفترى وينتقم من ايام الضنك
وبقى يبعتر ف المال يمين وشمال
ويسافر برا ويدى هدايا ورشاوى
والناس من كتر الفشخرة دى
 افتكروه من الأسرة المالكة وبقوا يندهوه يا برنس
#ازاى؟
أصل سى على الفللى كان بيحضر حفلات الملك
احمد فؤاد ويقدم فروض الطاعة والولاء
قوم فؤاد غض الطرف عن الحكاية دى
طالما بيكسب من وراه
وسابه يتباهى باللقب 



الملخص انه على كان مسرف
وبينضحك عليه من طوب الأرض
ويدفع جنيه ف أبو قرش وأبو قرشين
وسكريتره الخاص سعيد العنانى كان بيستفيد من وراه
ويعمل سبوبة من ورا كل حاجة
لدرجة ان دخله شهريا كان بيوصل ل500 جنيه 




وعلى .. مش بس بعزق ف الفلوس
بعزق كمان ف صحته وشبابه
وانغمس ف حياة الليل والمجون
وفاكرين محمدين فتوة بولاق اللى حكينا عنه ؟
كان من ضمن معارفه !
وكانله صديقات بيعرفهم ويصرف عليهن
وبعدين يمشيهم بعد ما يزهق
الملخص الواد ورث وانحرف وعاث فسادا
وهوه لسه ف اول العشرين
لحد ما هيتلم على انثى العنكبوت مارجو 
ودلوقتى هنقلكم الحكاية بطريقتى
ولكن نقلا عن .. د.ياسر ثابت ف كتابه
قصة الثروة فى مصر
وكمان من مدونته الجميلة .. هنا 





ف يوم 23 يوليو 1923
وف ليلة زرقا برق ورعد وجو زى النيلة
ف العاصمة لندن .. فندق سافوى تحديدا 
هيخرج الوجيه الامثل
على كامل فهمى من جناحه بالفندق لابسا البيجامة
ويدخل على جناح الست مارجريت زوجته





يخبط الاول وترفض تفتحله
وبعدين يعمل دوشة تصحى الجيران ..
فتقوم المودام تفتحله ويدخل بعد ما خادم الفندق
ينتبه ويحضر المشهد كله 
و بعد دقايق وهيصة هيخرج على من اوضة المدام
مطرود وباين على خده أثر ضربة بالقلم #كويس_انه_منضربش_بالزنوبة




ومن ع الباب هتقف الست ماجى تردح
وبعدين تقول للخادم بتاع الفندق ان على جوزها
حاول يخنقها .. !
الخادم هيطنش الموقف اكمنه الظاهر متعود
على خناقات الازواج وعادى ف المعادى
لكننن .... 



على ما على الزوج مشى كام خطوة مع الكلب بتاعه
كانت الست مارجريت دخلت اوضتها
ورجعت وماسكة مسدس ف ايدها
وطاااااخ
قتلته



بس والدنيا اتقلبت
ومارجريت انهارت واترعشت وحالها بقى حال
الخادم وقف مذهول شوية
وبعدين جرى على الزوج لقاه غرقان ف دمه
وكلبه جنبه بيلحس الدم من على وشه




ودقايق والبوليس كان وصل الفندق
اللى إدارته كانت شالت الجثة وبعتتها مستشفى
واتحفظت على مارجريت لحين تسليمها
وبيمسحوا ف الدم الواقع ع الأرض
وليه يا جماعة تعملوا كدا ؟؟
قالك الست اعترفت وفيه شاهد والقضية منتهية
وسمعة الفندق وبتاع !



المهم البوليس اخدها
وايه اللى حصل
مارجريت قالت انا قتلته قبل ما يقتلنى
وخلاص اعتراف رسمى
وتمت احالة المتهمة للمحاكمة
واظن اعدام او مؤبد بقى مفيهاش كلام دى !


انتوا ناس طيبين والله
:)
ليه ؟
عشان اول ما هنبدأ المحاكمة ..
هتختلف الصورة كومبيليتلى
واليكم التفاااااصيل
ودى مش بس من مذكرات المخسوفة اللى كتبتها
وقبضت فيه عكمة محترمة
لأ كمان من الجرايد والكتب اللى خرجت
تحكى عن هذه الحادثة المجنونة !




الست مارجريت اتعرفت ف نهار أغبر
على الوجيه على كامل فهمى
والواد شافها انبهر
رغم فرق السن ما بينهم
وكان عشر سنين تقريبا
وهوه اهوج ارعن وجعان حياة
وهيا ست لعوب وصيادة فرص
وعينها على الاثرياء السهل جذبهم
وقع ف شبكتها على فأحكمت الوثاق جيدا
مشوها حب ثم علاقات اسمها ايه دى ... كاملة
ثم زواج





وطبعا المزامزيل ف المذكرات منسيتش تذكر
ازاى انه جرى وراها وكان مجنون بيها
وبيغدق عليها الهدايا عشان توافق
واسكرها بالهيام والغرام لحد ما قالت موافقة
وكانت بريئة ياعينى وشاذجة وكدا
واتجوزوا مدنى الأول
وبعدين الست اشهرت اسلامها
وسموها وياريت كان سمموها .. #منيرة
على اسم ام على 
وبعدين كتبوا الكتاب .. !





الجواز المدنى كان ف ديسمبر 1922
اما الشرعى فكان ف يناير 1923
وراحوا يقضوا شهر العسل ف الأقصر واسوان 
وبدأ النكد يظهر
على اشترى يخت وسافروا بيه ف النيل من القاهرة
وماجى بتحكى انه كان بيعاملها وحش
ويعامل الكل برعونة وطيش عموما
وكان عنيف ومؤذى لدرجة تخويفها
ولما وصلوا الأقصر راح يحضر فتح مقبرة
توت عنخ امون ويتفرج ع الأثار
وأصر يصورها وهيا راقدة ف تابوت فاضى .. !
#الواد_روش_عاتى




وقالت كمان انه كان بيحبسها
ويرفض خروجها لوحدها الا مع خدمه النوبيين
عشان يراقبوها ويبلغوه بتحركاتها
وانه عاوز يغيرلها عاداتها الفرنسية والاوربية
وانه ضيق عليها الخناق وف مرة هددها بالقتل
لما حط مصحف على عيه وحلف ليتخلص منها
يوما ما ..
ولحد ما خافت على نفسها جدااا
لأنه كدا هددها بالموت وش  !!





ومن كتر رعبها كتبت جواب لمحاميها ف القاهرة
وقالتله لو جرالى حاجة
فأعرفوا ان على جوزى هوه السبب وكدا 
القصد وحسب روايتها الجدع نكد عليها
وكان عاوز يحولها الى امراءة شرقية ذليلة
وهجص فكس كتير كدا
قصره رجعوا القاهرة متخانقين 
ومالكو بس يا ولاد انتوا ..  #اتحسدتوا_والنبى
وخدتوا عين 




المهم ان مارجريت بقت حبيسة
وقالتله عاوزة أسافر باريس أشوف بنتى .. رفض
عاوزة اخرج لوحدى اشم هوا .. رفض
عاوزة اعمل أى حاجة ف أى حاجة .. رفض
وقعدوا كدا شهور لحد دخول الصيف
والوجهاء ف مصر زمان
كانوا بيسافروا اوربا يصيفوا 
قام الجدع اخده مراته وراحوا انجلترا
لعل وعسى المزاج هناك ينعدل
ومكنش عارف بقى اللى مستنيه هناك .. !




ونزلوا ف الفندق المشئوم
وبعدين حصل اللى حصل
ولحد كدا رواية مدام فهمى انتهت
واللى خبر جريمتها ف الصحافة الأجنبية
اقترن بس ... بفكرة ان المقتول برنس 
وكانت الجريمة تقليدية ومش مهمة قوى لأغلب الناس
ايه يعنى المثير ف واحدة قتلت جوزها
عادى ومنطقى وطبيعى ف أى حتة ف الدنياااااااااا
الحقيقة
:))
وحتى لما اتحددت اول جلسة للمحاكمة
نقولها قاعة صغننة تاخد بتاع 30 شخص
وكأنها قضية دهس كلب ولا حاجة
مهتموش م الآخر 
لكن اللى حصل بعد كدا حاجة غير




اول جلسة كانت ف سبتمبر 1923
وصحيح مكنتش مهمة للعامة
لكن كانت مهمة جدا للمتهمة
اللى واضح انها عملت حساب كل حاجة كويس
ومرتبالها تمام
ازاى؟



بيقولوا ان الست ماجى اخترت هيئة دفاع
مكونة من محامى شهير جدا ف هذا الوقت
اسمه ادوراد مارشال هول
ومعاه 3 محامين كمان 
الراجل دا كان مشهور آووووى
واتعابه حراقة
ويقال ان هوه مساعديه مجموع اتعابهم
 يوصل لـ 6 الاف جنيه استرلينى
ودا مبلغ رهيب بحساب تلك الايام يعنى !





مش بس كدا .. الست ماجى خصصت
ما يقرب من خمستلاف جنيه استرلينى
للصحافة والاعلام يشتروا بيه ايريال وسافو
ويقعدوا ليل نهار ينضفولها بيه ..  سمعتها الهباااااااااب



ومش بس كدا .. الهانم استغلت علاقتها القديمة
بالحاج ادرواد التامن وبعتتله تستنجد بيه يساعدها
السكريتر الخاص بتاعه قالها واحنا مالنا .. ؟ 
راحت ملوحة بالجوابات والأسرار اللى فيها
فالاوغاد خافوا على سمعه البيه
وراحوا موصيين جهة عليا تبلغ القاضى
بعدم النبش ف علاقات المتهمة السابقة .. لدواع امنية
فالقاضى استحاب لطلب المحامى 
بمجرد ما فتح بقه وطلبه .. !!
#سمعشت_البلد_وكشدا



وبس حضرتك اصلا من قبل ما أى حاجة تحصل
كانت مقضوفة الرقبة مظبطة الدنيا
والمتهم يا كبدى .. عليه روبطية من كل جهة
وف الجلسات هيظهر الاوسخ من كدا
#للأسف
ف المحكمة هيقف المحامى هول
ويمرمط بسمعة المجنى عليه الأرض
ويوصفه بكل الصفات الهمجية المتوحشة البشعة
للرجل الشرقى الفزيع المريع وكدا
ومش بس كدا دا هيظهره بمظهر المريض
اللى عنده انحرافات
لدرجة انه هيقول انه كان بيطلب من مراته طلبات
هنقولها بالانجليزى بقى 
عشان فيه بنات قاعدة ... 
ومن سجلات المحكمة انكتبت كدا بالحرف ..
 unnatural sexual practices
 (namely, anal sex)
وهتجيب شهادات من دكتور بهذا 
وانها كانت محتاجة عمليه والقتيل رفض .. !



المحامى هول كمان هيقول ان على كان بيحبسها
وكان شاذ وله علاقة باحد مخدوميه "الرجالة " .. !
وهيستعين بشهادة سكريتر على الخاص
الوغد ... سعيد العنانى للتأكيد على ذلك !




وهيسرف ف اظهار العيوب والبشاعات
لحد ما ياضينايا
 هيذرف الدموع قصاد المحلفين
من كتر ما صعبان عليه موكلته
واللى جرالها !
#شكسبير_مسيطر_ع_المنطشقة_قوى



بس والمحامى هول فريد الديب
كما يحلوا للمتابعين الكرام ان يصفوه
:)
قعد يشوه ف سمعة المجنى عليه
ويخلى الجانية طاهرة و خضرة الشريفة 
وابتدى الاعلام يلعب على نقطة الشرق والغرب
والزواج من العرب
وتحول الموضوع من جريمة قتل عادية
الى صراع بين العربى والغربى والهمجية والتحضر
والأعلام "المهنى" مع القضاء"الشامخ"
حولوا المسألة لحاجة تانية خالص
كان ملخصها ف النهاية
واخر الجلسات واجتماع المحلفين
انهم ياخدوا قرارهم التااااريخى 





ويوم الحكم .. هاه يا جماعة ايه رأيكم ؟
قالوا .. المتهمة غير مذنبة
والقاعة راحت مصقفة
وكان ناقص يزغرطوا ويجيبوا رقاصة كمان !! 
وطلعت منها الست ماجى .. زى الشعرة م العجينة
رغم انها قاتلة ومعترفة 
وعجبت لك يا زمن ... !!!!!!!




اما المجنى عليه ..
فخلاص كدا دمه راح ف الوبا .. !
والغريب ان الإدعاء حاول يبرز كل دوافع المتهمة
لأرتكاب الجريمة دى بدءا من فرق السن والتجربة
والمسدس اللى ظهر فورا ف مسرح الجريمة 
وشهادات المحيطين كلها ضد الزوج 
ورفض المحكمة فتح سيرة اخلاقها .. المشكوك فيها
وميت ألف حاجة تقول انها مكنتش فريسة ضعيفة يعنى !!
لكن القضاء النزييييييه بقى .. تقولوا ايه
المهم ان القضية خلصت على كدا
وطلعت ماجى براءة
والدنيا ولعت ف مصر وانجلترا بسبب الحكم وما حوله




وابتدى العرب ف انجلترا يراسلوا الصحافة
ويكتبوا ويدافعوا عن الراجل الشرقى
والعادات والتقاليد الحقيقية مش المشوهة ..الخ
وف مصر حصل هجمة مضادة ضد جواز الأجنبيات
لدرجة ان رئيس البعثات ف الجامعة المصرية
اصدر امر ف السنة دى
بمنع أى طالب مصرى ف الخارج من الجواز
بغير عربية ..!


وابتدى الهجوم يشتد هنا وهناك
وبعد شوية ابتدت لهجة الصحافة الانجليزية تخف
وتاخد شكل اعتذارى
#الظاهر_ماجى_بطلت_تدفع
وانتهينا الى الصراع المكتوم
واللى ف القلب فضل مكمكم  ف القلب




است ماجى بقى بعد ما خدت البراءة
ونفدت من حبل المشنقة
هل بت ما تسكت وتكن وتقول آكريم يارب ؟
أبضننننننن
دى هتبجح وتكشر عن أنيابها السامة
وتقرر تطلب آل ايه ... ورثها من المرحوم !!!
#ينيلك_يا_بعيدة!!!




وترفع قضية فعلا
وبعض ولاد الحلااااال يساعدوها
بس عيلة فهمى هتقفلها متمثلة ف اخواته البنات
ورجالة العيلة ويقرفوها
والمحكمة ترفض طلبها لأسباب متعلقة بالديانة
- مش هتدونى نصيبى ليه ؟
- أصلك مش مسلمة
- أنا اشهرت اسلامى واسمى منيرة حضرتك
- ورينا الورق
- أهو
- كدا .. طب فوتى بعد سنة 




وبيقولوا ف مصادر تانية ..
ان ماجى قالت انا حامل
عشان عيلة على تخرج من الورث وتكيدهم
 بس محدش شافها ولا شاف الحمل ولا العيل
لأنها لم تجرؤ تنزل مصر اساسا ... !
ويقال انها معرفتش تاخد حاجة بسبب الملك فؤاد
اللى تدخل شخصيا للمماطلة
اكمن ميراث على كان الملايين
وطبعا الفلوس دى متخرجش برا
ولازم تفضل جوا البلد عشان خاطر البلد طبعنننن !





ومارجريت زهقت ولقت نفسها هتطحن ف الملك
ودا بقى مش زى حبيب القلب بتاع ويلز
ادوارد كان انجليزى شيك وسمباتيك
واتيكيت وبسكويت وفايف كلوك تى وكدا
انما .. فؤاد صايع ومن عابدييييييين  #فمعلش




زائد انها كانت واخدة من على مجوهرات
وفلوس ومظبطة روحها
ثم جالها عرض بالعمل ف التمثيل
بسبب شهرتها اللى غرقت الدنيا ..
فصرفت نظر عن مصر واللى ف مصر
لكن حكايتها مخلصتش عند كدا





القتيل لما عرض عليها الجواز
اشترالها قصر ف الزمالك عشان يتجوزوا فيه 
القصر دا (حاليا مجمع الفنون) بعد موت على 
راح لاخته .. عائشة فهمى
اللى كانت بتتجوز كتير
ومن وسط ازواجها يوسف وهبى
اللى عاش ف القصر دا مدة وعجبته حكاية على




وقرر يعملها مسرحية ثم ..
بعد شوية هيقرر المخرج محمد كريم يحولها لفيلم
ويتصاف انه يكون اول فيلم مصرى ناطق
هيتعرض بالسينمات
واسمه "اولاد الذوات" 




وطبعا الفيلم هيتبنى وجهة نظر معاكسة
لأحداث سير القضية
وقصته هتبقى عن رجل مصرى يتجوز فرنسية
فتخونه وتدمر مستقبله
وقبل ما يقتلها هيخش ف وصلة خطابة
وينهى المشهد بجملة للاجنبية بانها "مزبلة الكل"
ف أشارة للست ماجى وحكايتها
وبيقولوا ان الاجانب ف القاهرة
لما شوية منهم شافوا الفيلم ف السينما ثاروا
وهاجوا وماجوا وطالبوا وزير الداخلية وقتها
بمنع الفيلم من العرض
والراجل كدا ان يفعلها لولا ان ...
الجمهور المصرى تدفق على دور السينما
يشوفوا اول فيلم مصرى ناطق
وكمان يشوفوا القضية اللى اثارت غضبهم من سنييين
بقتل واحد مصرى وتشويه صورته أيما تشويه 



وطبعا اتكتب عن حكاية مدام فهمى دى
كتب هنا وبرا
وكمان اتعملت عنها حلقة ف مسلسل اجنبى
بس مارجريت نفسها بقى
راحت فين ؟ 




الست مارجو رفضت تشتغل الا ف السينما
وبعدين لما محدش عبرها سينمائيا
اتعرض عليها دور ف مسرحية
والغريب انه كان دور لزوجة رجل مصرى !
وكان شرطها هيا .. !
وطبعا لا ليها ف التمثيل ولا نيلة ليها ف أشياء أخرى
 فشلت فشل ذريع
ومحدش حس بيها
وشهرتها تلاشت
وعاشت بعدها قد ايه
قولوا يا عيال ؟
جريمة القتل حصلت سنة 1923
العنكبوت السوداء دى عاشت لحد سنة 1971
لما بقى عندها ييجى 80 سنة يا ثااااامح
#يخربيت_كدا_يعنى



وبيقولوا انها قعدت تحضر السهرات
وتقدم "خدماتها الاجتماعية" لحد سن السبعين
وبعدين اعتزلت
خدمات ايه ربنا يهدها ..  ! 




وصلاح عيسى ف كتابه عن حكايتها
بيقول انها بعد الموت ..
اتنشرلها نعى ف جريدة الفيجارو
وفيه مكتوب ...
" طلب إلينا أن نعلن أن البرنسيس فهمى بك
قد رحلت عن الدنيا فى 2 يناير 1971
وأن مراسم الجنازة وإجراء الدفن
تمت فى خصوصية كاملة فى مدافن ضاحية «نيولى»
إحدى الضواحى الراقية للعاصمة الفرنسية"
.......... نعم يا روح طنط !!
مدام فهمى والبرنسيس ؟!!




طب شايلة اسمه وفهمناها 
الست متجوزتش من بعده فمشالتش اسم حد غيره
وطبعا مين هيتجنن ف نافوخه ويتجوزها ..
لكن برنسيس منين يا بنت سلطح ملطح
دحنا دافنينه سوا
والولا مكنش برنس اشاسا !


لأ وايه
الهانم قالت ف مذكراتها انها مفكرتش تتجوز بعد على
آل ايه
"لأنها لم تشعر بالسعادة إلا حين كان يحبها" 
يا ضينيايا ... 
#هاتولى_مسدس_اطخنى_يا_جدعااان!!




واخيرااااا على هامش الحكيوة
الواد على لما راح بالموكوسة الأقصر
يقضوا شهر العسل الأسود
بيقولوا انه حضر فتح مقبرة توت عنخ أمون 
قوم ايييه ؟
لما انقتل بعدها بشهور قليلة
اسمه جه وسط كل الأسامى اللى ماتت ف حوادث
وقالوا انها لعنة الفراعنة وصابتهم
شوف ازاى !!!


يعنى مكنش سوء اختيار
ولا اخلاق زفت ولا تخطيط مسبق من المزغودة
 ولا أى حاجة
ومعرفتوش تصلحوا جوازكو
ولا تكيفوا الجريمة صح ..
قوم تلزقوها ف الواد الميت من كام ألف سنة
ومتحنط !!


وتوتة توتة نقول الملاحظات

1) المصريين اللى بيتجوزوا اجنبيات فيقتلوهم
مالها الزوجة المصرية يعنى
وتتجوزها وتقتلك لو حابب واهو بنت بلدك أولى 
وشجع المنتج المصرى يا أخى 
#اين_الوطنية؟



2) على رغم طباعه البشعة لكن صعبان عليا جدااا
كان عيل صغار رغم كل شىء
ونشأته كانت هباب
وكان حواليه بطانة تفسد بلد مش شخص
كل مشكلته انه كان محروم  ... !

ثم كل إدعاء عن اخلاقياته المنحطة دى
محدش متأكد منها
الراجل كان ف تابوت مغلق ومدفون تحت الأرض
اما قاتله ...  فكانت ف ايدها كل حاجة
ومعلش يعنى .. دى خبرة ف الرجال بحكم شغلانتها
ومش عيلة ينضحك عليها .. 
وحتى لو اتجوزت واكتشفت غلطتها ...
ف لندن كان قصادها فرصة 
تهرب منه لو خايفة على عمرها 
وتستعين بنفوذها ومعارفها ف ابعاده عنها والطلاق
لكن هيا قعدت ومهربتش ... مش خوفا ولا نيلة
ولكن لأنها استعدت للحظة دى 
وكان معها مسدس  .. 
وف وقت قياسى حضرت لجنة دفاعها 
واعلامها 
ودفعت لسكرتير الضحية يساندها 
بصوا م الآخر دى جريمة منظمة .. ممنهجة 
مع سبق الأرصاد والترصدة ... !



3) أخت على فهمى الست عيشة كانت مزواجة
واتجوزت يوسف وهبى
ومن بعده اتجوزت شكوكو
وغيرهم والظاهر العيلة فيها عرق هارش
وارثينه م الأب ولا ايه ؟؟
وهذا يقودنى الى رقم


4) بخصوص الأب اللى الظاهر والله اعلم
ان فلوسه حرام ولاممها من عرق الغلابة
عشان كدا ربنا مباركش فيها ولا ف العيال #تخمينات



5) حبوا عيالكوا ..
بلاش القسوة والبخل وكل حاجة وحشة
حبوهم عشان ميرموش نفسهم ف اول حضن يقابلهم
فيطلع حضن عنكبوتة .. سودة قاتلة 
#ممكن؟


6) سكريتر على .. ومكتوب ان اسمه سعيد العنانى
يمكن يبقى الكنانى وانا مخدتش بالى
أى كان يعنى
ياريت يكون بيتشوى ف جهنم
ومبسوط كدا ومهيص تمام ع اللى عمله 



واخيرا
7) بخصوص الافترا على الغلبان المسكين
فاحب اقوله بالأصالة عن نفسى وباقى الشعب المصرى 
#احنا_آسفين_يا_توت






وتوتة توتة 
وتصبحوا على ألف خير 
:))

----------------------------------------

hmayada el_awady @MayadaEl_awady 
انا شايفه كده برضه
وبعدين احنا عندنا خدمه التعبئة بعد القتل
(الاكياس البلاستيك )
هنريحوك ياشاب
:)


amr salem ‏@amrosalim2001
@MayadaEl_awady @ro7albmama2 ههههههههههههههههههههههههههههههههههههههههه
والمصحف مش عارفين نودي جمايلكو فين


كفاية ابهار @Fatoma999 
@ro7albmama2 اصيلة يا ام سيد :))



 يااااه يا عبد الصمد ‏@nohabakla  
عيني علينا أحنا يا مصريات
شايلين أكتر من كده و ساكتين


 يااااه يا عبد الصمد ‏@nohabakla  
و النبي تلاقيها هي اللي شبطت في تابوت
من توابيت الواد توت


 mayada el_awady ‏@MayadaEl_awady  
هي قصاد كده  رقدته في التابوت الابدي #غرام_وانتقام


 طابور العيش والحرية ‏@HabiShehawi  
العناني ولا الكناني؟


 مصطفى سعيد Mustafa.S ‏@Mustafasaidm  
أخذت من هذه القصّة نواة رواية أولاد الذوات
أوّل فيلم ناطق بالعربيّة على الصعيد الرسم
،يوسف وهبي،خريف1930
دوام التوفيق!

 farida ‏@faridaallam  
لا عادى اعرف ناس هنا بياخدوا براءة كتير اوى

 طابور العيش والحرية ‏@HabiShehawi 
هو ده الكلام، هي لسه هتستناه أما ينام وتحضر الساطور


 Dalia Salem ‏@MasryaGedan7  
 قيدى النور يا بهيه..كل العسكر حراميه


 يااااه يا عبد الصمد ‏@nohabakla  
 اتسرب من التعليم و إتلم عليه عيال صايعة فقدوه يعني!!


@MasryaGedan7
 قضاؤهم شامخ زيى قضاءنا أهو..ومحدش أحسن من حد



ليست هناك تعليقات:

إرسال تعليق

Related Posts Plugin for WordPress, Blogger...
"حقوق الملكية والملوخية والمهلبية ... الخ
محفوظة للست شهرزاد وإياك حد يسرقها ويحاول يزعلها آغجر .. مفهوم ؟ "