الاثنين، 25 أغسطس 2014

إحنــا بتـــوع التمــاثيــــل ..... 1






 



الحاج نزار قبانى قالك مرة ف إحدى قصايده
ايه ؟
 لا تجرحي التمثال في إحساسهِ 
فلكم بكى في صمته تمثالُ
والصراحة احنا التماثيل عندنا ساكتة ومعبية 
ولو حد فتحها مش بس هتبكى دى هتولول 
 ثم هتجيب بنزين وتولع ف روحها 
كأقل واجب ع اللى بتشوفه آه والله


 
حدوتة النهاردة عن تماثيلك يا مصر
 اللى بنشوفها ف الميادين والشوارع كل يوم تقريبا 
ومنعرفش حاجات كتير عنها 
 والرغى هيكون عن فترة حديثة نوعا ما









بس الشهادة لله ..
 احنا بتوع التماثيل اصلا 
ومن كام ألف سنة ومش انا اللى هقولكم بقى










إيوه احنا بتوع التماثيل من كل شكل وخامة وحجم

واحنا اللى علمنا الدنيا 
ازاى تعمل م الحجر والمعدن والخشب .. جمال بينطق !


وقعدنا كدا نبدع ونرسم وننحت 

حتى تعاقب علينا الغزاة .. 
ثم جاء زمن عمر بن الخطاب تانى الخلفاء الرشدين
ومصر بقت إسلامية والدنيا اتغيرت
وبقى نحت التماثيل تحديدا دونا عن باقى الفنون الآخرى

بيسبب حساسية ومكروه وحرام عند كتيرين
وتقريبا اندثر هذا الفن ف مصر ... الا قليلا


لكن مع حكم الأتراك لمصر بداية من الدولة الطولونية 
وما بعدها وصولا لحد المماليك والعثمانلية
العالم دى عملت فارق ف فن العمارة واختلاف
والفاطميين تحديدا بسبب اختلاف المذهب 
كان عندهم بحبحه ف حتة الفن دى
وبقى عادى تلاقى رسومات وتماثيل لطيور وحيوانات



لكن الملخص وعشان الرغى
المصريين مشافوش التماثيل بشكلها الصريح الواضح
من أيام الفراعنة الا لما جه الخديوى اسماعيل
ووسع وسع لحليب قلبى
انتوا عارفينى بموت ف الراجل دا
 انا قولت الجملة دى خمآشر ألف مرة معلش
بس لازم اقولها تانى 
اسماعيل كان عنده خطة لخلق قاهرة خديوية 
تنافس باريس ف جمالها








والصراحة تنقال .. الراجل كلف وصرف جامد

لدرجة ان الخرينة المصرية فلسّت أيما تفليسة بعدها
بس اهو كله قعدنا ف الآخر برضو
ومرحش برا  .. هه


الخديوى اسماعيل عاش جزء من حياته وهوه بيكبر
ف أوربا عشان يتعالج من مرض ف عينيه
وكمان عشان يتعلم فنون العسكرية
وكان احد افراد بعثة الانجال
البعثة دى كانت من أشهر البعثات 
اللى سافرت ف زمن محمد على 
وكان من زمايل اسماعيل ف الفترة دى .. على مبارك 
 بس الكل رجع بعد موت محمد على علطول





اسماعيل مكنش ف الحسابات العلوية 
انه يكون والى مصر 
بس حادثة راح ضحيتها اخوه الاكبر منه .. احمد رفعت 
 خلته هوه التالى ف الجلوس ع الأريكة
وف يوم وليلة بقى اسماعيل ولى العهد
وبعد موته عمه .. سعيد باشا بقى هوه افندينا
وابتدى يحقق احلامه اللى حلم بيها بقى لسنين طويلة
واستعان بالاجانب وكمان بعلى مبارك رفيق البعثة
وبكل من امكنه من تحقيق حلمه 
وابتدى يخطط لقاهرة ع الطراز الغربى 
تختلف عن القاهرة الفاطمية
 
من ضمن التخطيطات 
اللى أصر عليها اسماعيل كانت ... التماثيل 
الجدع عاش ف أروبا بقى وذوقه اترقى 
وقالك منعملش عندنا كدا ليه .. ؟!! 
وقد كان

سماعين كان قوس ... وانتوا عارفين برج القوس بقى
لما بيحط حاجة ف دماغه لازم ينهيها كما يجب 
يا كمال يا كماااااال #فؤاد_المهندس_ستايل

 

وقصة اول تمثال بدأت سنة 1865 
لما اسماعيل قال
عاوزين نعمل تمثال لجدى محمد على
والفرنساوية كان لا يعلى عليهم 
هما والطلاينة ف هذه الفن





ولأول مرة هنسمع اسم الراجل دا
واحفظوه كويس عشان هنسمعه بعدين تانى وتالت
 Henri Alfred Jacquemart
جاكمار بقى كما ينطقه مؤرخى هذه الفترة
كان حاجة كبيرة قوى ف فرنسا ومثال له وضعه ومكانته
وعامل شغل عالى قوم ايه ؟


 سماعين بعت وقال الآتى
 اسماعيل : عاوزين نعمل تمثال لجدى فخيم كدا وابهة
جاكمار : وماله عينى 
اسماعيل : طب أجرتك كام يا عم حزومبل ؟
 جاكمار: بص يا باشا
شاكب راكب كدا بتاع 200 ألف فرنك 
اسماعيل : قشطات استبينا 
جاكمار : خلاص ع البركة ابعت العربون




والوثائق بتقول نصا :
 " وفي 17 مايو 1869م تم إحالة مبلغ ثمانية آلاف جنيه
إلى أحد المصارف بباريس بإسم المسيو
 لوكونت نيودركيك 
ناظر مدرسة الفنون والصنائع بباريس "




وابتدى جاكمار يشتغل من 1869 لحد يوليو 1872
وخلصه
وعرضه اسبوع ف الشانزليزيه 
وبعدها شحنه على مصر اللى استقبلته





وف فى ١٩ ديسمبر ١٨٧٢
كان الاحتفال الرسمى
بإقامته وسط ميدان محمد على .. اسكندرية
وفيه ناس بتقول ان النية كانت ف الاول
 ان التمثال دا يروح ميدان الاسماعيلية
اللى بقى ميدان التحرير حاليا
 بس رجعوا ف كلامهم




والمعلومة الاهم بقى
ان التمثال دا تقريبا الوحييييد من تماثيل الأسرة العلوية
 اللى مسابش مطرحه من اول ما قعد هناك
لحد النهاردة ...  !





اما باقى التماثيل التانية اتزحزحت او اتشالت او ضاعت
الا دا قعد زى الطود الراسخ كدا ومتعتعشىىىى 






مش كدا وبس فيه طرطشة كلام
عن انه اسود قصر النيل الاربعة اتعملت مخصوص
عشان تحاوط تمثال الحاج
من الاربع جهات ... آل حماية آل ! 







انما الفكرة اتلغت بعد كدا
 والأسود راحت ف مطرحها المعروف





 القصد سيبك انتا الحاج محمد على 
كانله شمخة قوية برضك




 التمثال دا شاف احداث عظيمة بحكم موقعه
ف أشيك مكان ف اسكندرية 
حى القناصل ومحل سكن وتجارة الاجانب 
والدلع كله بقى 




لكن تحت قاعدته دى هيخطط احد رجال عرابى
تخطيطة سودة
لما الأنجليز يبقوا على وشك دخول اسكندرية 1882
 فيقول يلا نحرق البلد عشان المحتلين ميتهنوش بيها .. !





وشاف تمثالنا افراح كتير وأحزان
لكن ما زال ف مكانه والدنيا حواليه هيا اللى اتغيرت
 اما هوه اتشال الحديد اللى كان محاوط قاعدته
وطبعا عشان الهلال والنجوم
 اللى كانت بتزخرف المكان
وتعتبر من الزمن البائد اللى الثورة جت
ونسفته نسفا من الذاكرة ومبقاش منه الا الصورعشان توثقه






ونسيبه ونروح للى بعده
برضو لنفس العيلة ولنفس الفنان .. بس المرة دى
اسماعيل عاوز تمثال لبابا .. ابراهيم باشا 
 عشان يحطه ف القاهرة
الحوار دا بدأ سنة 1868 وكالعادة فرنسا كانت الأختيار
وبعت اسماعيل للجنة مكونة من كوردييه
وجاكمار و كام حد 
ووقع الأختيار جاكمار عشان يعمل المطلوب 



والجواب دا من نوبار باشا بيقول :
"تمثال والد الجناب العالي وجده المقترح إقامتهما
في الإسماعيلية والأزبكية 
 وكان رأي الجناب العالي في ذلك الانتظار
حتى يحضر صاحب المصنع الذي أخذ على عاتقة عملها
وعرض النماذج"


والفنان بعت حد يشوف الموقع اللى هيتحط فيه التمثال
عشان يعمل مقاييس صح
وكانت الخطة انه يتحط ف ميدان الازبكية الشهير
وبعت اسماعيل دفعة 6 الاف جنيه
عشان يبتدوا شغل فيه وعملوه وخلصوه وبعتوه فعلا 







وصل سنة 1872 لمصر وبيقولك آل ايه 
ان لما شافه الخديوى اسماعيل معجبوش !!!
وقالهم حطوه ف ميدان العتبة الخضرا
 عند مدخل شارع الازهر كدا حاليا ... 







وقعد الكابتن هناك مغضوب عليه
واتغيرت المعالم شوية لما هدوا بقايا جامع أزبك
 وعملوا شوية تعديلات ف الحتة بص ف الصورتين 
ودوس عليهم للتكبير والفرجة عالتفاصيل 





وروح يا زمان وتعالى يا زمان
واسماعيل اتشال وقعد مطرحه ابنه توفيق
وقامت الثورة العرابية
 وبعيد عنكم بقى نار وقادت ف قلوب بعض الأتباع
وواحد من اتباع عرابى ف القاهرة بقى
مش اسكندرية المرة دى
 :)
كان اسمه عليش راح لشيخ الازهر وقتها
 واستصدر فتوى 
 بإيه بقى يا سى منص ؟؟!!!
قالك التماثيل دى حرام شرعا
ووجب ازالتها من مطاريحها والغازية لازم تنزل
وراحوا على قصر النيل شالوا الأسود
 وراحوا على العتبة شالوا ابراهيم من على المصطبة !





كانوا عاوزين يصهروه ويعملوا منه مدفع
بس لما لقوا امكانياتهم متواضعة ومتوصلش لكدا
 قالوا خلاص يترمى ف الأنتكخانة ببولاق
بس والثورة العرابية اتلمت سريع سريع يا نضرى
وقعد المغضوب عليه ابراهيم باشا فى مخازن
متحف بولاق من 1882 لحد 1891 يا ثاااامح 
 وبعدين خرج للنور






بس المرة دى مش هيرجع مكانه .. لأه
دا هيروح ف حتة أشيك واجمل وأنقح
بيقول عليها على مبارك انها صرة القاهرة
ميدان الأوبرا 





ويطلع ابراهيم ع القاعدة التمام
ويدى ضهره للأوبرا الخديوية ويترستق يا معلم
ومحدش يزحزحه من مكانه تانى ابداااا
 ويتسمى الميدان لفترة على اسمه 
ميدان ابراهيم باشا 
لغاية ما تقوم الثورة ويتغير لميدان الاوبرا 







ويتصور صور بالعبيط ويتحط على كروت بالهبل
 ويبقى أيقونة المكان
 والمصريين لما كانوا يحبوا يوصفوا لحد سكة
 يقولوله عند تمثال ابو أصبع وادخل شمال او يمين .. كدا 










وبمناسبة ابو أصبع بقى
 بيقولوا بيقولوا ان عم هيمة بيشاور على اتجاه الشام
 باعتباره كان فاتحها وفاشخها لفترة م الزمن
فأظن كدا خلاص اللى عاوز يروح ع الشام 
اديكم عرفتوا السكة
 :) 






فاضل نقول ان التمثال لما اتعمل
كان فيه على جانبى قاعدته لوحتين لمعارك ابراهيم
و انتصارته على الأتراك ف نزيب وقونية وعكا 




قوم عيون العثمانلية ف مصر
وولاد الحلااااال اتطوعوا
 ووصلوا المعلومة للباب العالى اللى بعت يوبخ اسماعيل
 ويقوله مفيش الكلام دا
 واللوحات دى متتحطش ابدا ... ! 




فالمثال يقولهم خلاص عبوكو كلكو
ويحتفظ باللوحتين ويعرضهما ف باريس
وبعدين تختفى عن النظر من 1900 وانتا طالع
وروح يا زمان وتعالى يا زمان
 وسنة 1948 فاروق هيحتفل بمرور 100 سنة 
على وفاة جده








وف اطار الاستعدادت للاحتفال وكدا
اتنين من الفنانين المصريين هيسافروا باريس
 يلفوا ويدوروا ع اللوحتين
ولما يغلبوا وميلقهموشى يلاقولهم صور فياخدوها
ويعملوا من الصور نسخة طبق الاصل ع الطبيعة
وتتحط اللوحتين على جانبى القاعدة
 وشوف الزمن مكتوبالك يا حاج ابراهيم






أحمد عثمان ومنصور فرج هما اللى عملوا اللوحتين
واتحطوا سنة 1950 شوف بعد قد ايه !





والتمثال دا زى تمثال ابوه 
 شاف احداث ياماااااا يا إيسامة
بحكم قربه من قصر عابدين والقاهرة الفاطمية
والازبكية والفنادق والاجانب والمصريين
 والمظاهرات وحريق القاهرة وحريق الاوبرا وغيرهم 
صرة القاهرة كما قال على مبارك 
لو بينطق كان حل ألغاز واسرار كتير ... 




ونسيبه وننقل ع اللى بعده
المرة دى هيكون الخديوى اسماعيل نفسه صاحب التمثال
والحكاية هتبدأ من اسكندرية الماريا ف أرق احيائها 
وعلى البحر طوالى يختاروا اجمل موقع 








ولما الجالية الإيطالية من حبها لاسماعيل وأفضاله عليها
قررت تعمل نصب تذكارى 
 وفيه تمثال له




 الكلام دا كان ف عهد فاروق






اللى هيعمل الليلة دى فنان ايطالى شهير ف زمانه

اسمه .. بييترو كانونيكو
وارتفاع التمثال بالقاعدة كان 3 متر ونص






وف ديسمبر 1938 يحضر الملك فاروق
اللى كان لسه ماسك الحكم من سنتين يا دوب
وحفلة كبيرة والجالية الايطالية ورقص وشرب
وضرب نار حتى الصباح الباكر






ويقعد التمثال معزز مكرم لحد اول الخمسينات
لما ينتهى العمل ف مجمع التحرير
ويقرر فارق انه ينقل تمثال جده للقاهرة







وتتعمل البتاعة اللى زى الخازوق دى
وكلنا بنشوفها ف الصور القديمة 
و منعرفلهاش معنى ولا صاحب
 اتاريها يا خويا كانت قاعدة التمثال 
ومستنية صاحبها ييجى يقعد وينجعص ... ! 






والفكرة كانت ايه بقى ؟

قالك ان تمثال الأب ابراهيم ف الاوبرا
هيتلاقى مع تمثال الإبن اسماعيل ف التحرير 
ف اتجاه واحد كدا
وكأنهم آل يعنى بيسلموا على بعضشيهم 





ولف يا بنى تمثال جدو وشيله لحد ما نفتتح مجمع التحرير
ونعمل حفلة للتمثال وهوليلة
وهوب الليلة كلها تبوظ وثورة العسكر تقوم 




والتمثال الحزين يتركن ف المخازن عقود طوال
محدش يعبره الا شوية حرامية من الحكومة
هيقولوا عاوزينه نصهره ونعمل منه فلوس ..! 





الطلاينة المهتمين بالفن
هيسمعوا عن الحوار الأسود  دهون
 فيرفعوا طلب للحكومة المصرية
احنا عاوزين التمثال بتاعنا
ومستعدين ندفع تمنه (تانى) بس متسيحهوش !!!
واذا كان الخديولا ميلزمكوش ومبعترين مقامه كدا
فاحنا هناخده ونحطه ف احسن ميدان فيكى يا روما 
الكلام دا كان أوائل عهد مبارك
والموضوع لما انفضح تراجعت الحكومة عن الفكرة
وقالوا خلاص ... خليه !






وفضل رهين المحبسين محبس المخازن
ومحبس ظلم التاريخ لحد ما جه عبسلام المحجوب
محافظ اسكندرية
وقرر ينصبه فى كوم الدكة 
الكلام دا كان 1996 تقريبا 
ومش مكانه الصراحة بس اه يطلع يشم هوا 
بدل الركنة والكمكمه ومسيره يروح ف مكان أفضل







هذا عن التمثال البائس اما بقى النصب التذكارى نفسه
فسنة 1964 عبناصر
 اصدر قرار بتحويله لنصب لشهداء البحرية







وشالوا منه أى معالم تقول
 انه كان جاى على شرف الخديوى اسماعيل
 انتوا عارفينهم كان بيجيلهم استبحس من الأسرة العلوية وكدا 





اما قاعدة التمثال فقعدت من الخمسينات 
لحد ما ابتدى الشغل ف مترو الأنفاق 
وبعدين شالوها ومحدش عارف مصيرها 
الغلبانة دى راحت فين ... ؟!!


وباقى نقول ان اللى يزور المتحف الحربى بالقلعة
هيلاقى نموذج مصغر دقيق وجميل
مبعوت من ايطاليا مخصوص 
وفيه النصب التذكارى بالتمثال 
ناس محترمين والله  بيقدروا قيمة الفن والجمال فعلا







اخر تماثيل الأسرة العلوية بقى
ودا بتاع المخسوف المنكود اللى مبطقش وش اهله
الملك أحمد فؤاد 
انتوا عارفينه كان غلاوى وقلبه فحماية مولعة كدا
ومبيحبش نفسه
 قعد ف الحكم من سنة 1917 لحد 1936
كابس على انفاسنا






المهم غار اخير سنة 1936 وجه فاروق ابنه
لكن ف نهاية الأربعينات القصر
كلف الفنان مصطفى نجيب بعمل تمثالين
واحد منهم للملك فؤاد والراجل خلص التمثال فعلا 
وف أبريل (شاخدلى بالك يا حاج محمد) سنة 1952
 اتنصب التمثال على قاعدة عالية 
 فين بقى ؟
قصاد قصر عابدين كدا عند مبنى المحافظة حاليا
وشوف عشان الناس قِرف واعتاب ونوايا
 التمثال فضل ملفوف بالقماش
وقالوا هنعمل حفلة وبتاع ونهيص
 مفيش 3 شهور يا بشر الا والثورة قامت
وهع هع .... انا شمتانة



ليه يا شهر كدا ؟؟
اقولكم عشان الضبابيط الاحرار اول ما حاصروا
قصر عابدين ومسكوا زمام الأمور بصوا كدا
وقالوا ايه دا بيعمل ايه هنا التمثال دا 
وبسرعة امروا بإنه ينزل فورااااا
وحطوا مكانه بعد شوية تمثال أحمد عرابى
على نفس القاعدة 
نكاية بقى وغتاتة ف الملكية واللى يتشددلها 
ثم تمثال عرابى اتنقل بعدين للشرقية مسقط راسه





الطريف بقى ف الحكاية انه
اللى عمل تمثال الملك فؤاد
هو نفس الشخص اللى عمل تمثال عرابى 
 :)
#مصطفى_نجيب
 والأفكه بقى ان تمثال فؤاد دا اختفى ف ظروف غامضة
ومحدش لقاه الظاهر سيحوه وعملوه شلنات وبرايز .. !




والافكه والافكه ان فؤاد له تمثال تانى
كنا حكينا عنه قبل كدا مرة زمان
والتمثال دا برضو رغم انهم نصبوه كام يوم 
الا انه ... 
بعد شوية بعض اهالى بورسعيد رفضوا وجود
 واتشال واتحط ف مخازن الهيئة
وأظن كدا بقى واضح ان العيب مش ف ثورة يوليو بقى
دا العيب ف واحد صاحبنا
ومحدش ينكر !




وكدا ابقى خلصت الجزء الأول من حكايات التماثيل
عن اسرة محمد على
 المرة الجاية بأذن الله هنحكى عن
رجالات الحكم والحاشية وتماثيلهم
ويتبقى الملاحظات كالعادة ..



اول ملحوظة 
 تمثال محمد على هوه الوحيد
من كل التماثيل تقريبا اللى محدش تجرأ ف أى عصر
انه يمسه بأى شكل 
ومع انى مبحبوش الراجل دا
لكن الواحد لازم يقول .. ان الهيبة ليها رجالها برضو
وثورة يوليو غضبت على كل التماثيل
الا تمثالى محمد على وابراهيم باشا 
وجم لحد عندهم واستووووب !
ويبدو كمان انه كما قال احد الفولورز الكرام عندى مرة
 ان ابراهيم كان قائد عسكرى
ومكنش ينفع يتهزأ ولذلك فبالمرة نضيف محمد على بقى
دا حتى هوه يبقى الزغلولة الكبيرة !




2) تمثال ابراهيم باشا ف الاوبرا

 فيه منه نسخة تانية طبق الاصل فى القلعة
 حاولت اعرف عنه اى معلومات وفشلت 








مين اللى عمله ... هل نفس الفنان
ولا دى نسخة مقلدة
وكان معمول عشان يتحط ف حتة
وبعدين رجعوا ف كلامهم ولا ايه
يا ريت يا جماعة اللى يعرف ... يعرفنا معاه 







3) بغض النظر عن صاحبه وانتقاداتى لسياساته الدموية

فانا ف سياق اخر ملوش دعوة بأى حاجة
بحب تمثال محمد على دا جدا
وبحس كدا ف بعض الصور
انه هيكاد يمشى من على قاعدته وهينزلنا 
بس تفتكروا كان هيسلم علينا مثلاااا
لأ طبعا هيدينا بالكرباج
 محنا فلاح سيس خرسيس وكدا  ... !



4) قالك تماثيل قصر النيل الأربعة كانت معمولة

عشان تحاوط تمثال الحاج سنكفولة فتعمل رهبة وكدا
يخربيت الرعب 
آل يعنى محمد على مكنش فامبير
وآل يعنى الناس كانت ناقصة خضة !!




5) الخديوى اسماعيل لما شاف تمثال ابوه 
ابراهيم .... بيقولوا انه  معجبوش
تخيلوا !!!!
متصورين ذوق الجدع دا كان عامل ازاى 
والتصرفات دى بتقول انه كان دايما بيسعى للكمال 
ومبيعجبو أى حاجة ولا اى حد
قوس بقى :)
وأظن ان خربانه لميزانية البلد مكنش متعمد 
بقدر ما هوه اصلا  كانت شخصيته كدا ... !!


6) وبما اننا جبنا سيرته ... اسماعيل 
عمل نهضة عمرانية ف حتت كتير ف مصر 
لكنه يستحق ان تمثاله يتحط ف قاهرته الخديوية 
هيا اولى المطارح بيه ... مش اسكندرية ولا غيرها 





7) وطالما جبنا السيرة 
انا معنديش ادنى مشكلة ان النصب التذكارى
 يبقى لكل المصريين 
واكيد شهداء البحرية على عينى وراسى
بس ممكن جتب دا يبقى ينحكى تاريخ المكان 
ونقول انه كان لفلان اولا ثم بقى هكذا ... ؟
ممكن نبطل حوار امشى على تاريخ من قبلك باستيكة دا
وانسب الأشياء لنفسك .. بالزيف والكدب و
بدل النصب ما يبقى تذكارى 
يبقى نصباية تذكارية 
ممكن منعملش كدا تانى .... هل ممكن ؟؟



8) الملك فؤاد ف اواخر حكمه

لما المصريين اكتتبوا ولموا من بعض فلوس
عشان يعملوا تماثيل لمصطفى كامل
وسعد زغلول الزعماء الشعبيين
هوه نفنسن وغار ورفض 
انه يتحط ف ميادين عامة أى تمثيل الا للأسرة المالكة 
#غتاتة_وغّل
قوم سبحان الله .. شوف يا مؤمن
 بعد موته تماثيلهم هما هتتقام ف احسن اماكن
ف مصر واسكندرية والناس تشوفها 
 اما هوه
 فتماثيله واحد يضيع
 وواحد يتركن نص قرن ويزيد
فؤش محتاج ينضف نفسيته فعلا ...



بكرة ان شاء الله نكمل الجزء التانى
نرتوت المنشنات
وأقولكم تصبحوا على ألف خير مقدمااااا


------------------------------





ʎqɐɹɥƃɐɯ-lɐ ɯɐɥʇʎɐɥ @H_Almaghraby
 صعب يغضبوا علي اللي اسس جيشهم نفسهم

واكبر قائد حقق احتلال واستيلاء علي مناطق شاسعة
يعتبر رمز لهم قبل ما يكونوا رمز للملكية




mamado @mamadozezo 
 فؤاد النحس


Hany Zaky ‏@Hany_Zaky
 تعرفى إنهم نشروا ديل الحصان علشان نحاس
 وباعوه وفى عز جبروت الأمن مستتب
(عن تمثال عرابى )


hayat ‏@hayatankh 

 عدو الدستور
(عن الملك فؤاد)



NG @NGsees
 سمعت معلومة مرة

 ان وضع رجلين الحصان في التمثال
 دليل على طريقة موت صاحبه
 اللي واقف على القائمتين الخلفيتين
 يعني صاحبه مات في معركة
 اللي رافع رجل واحدة يعني صاحبه مات بعد المعركة
متأثر بجراحه
 اما الحصان اللي كل رجليه على الأرض
يبقى صاحبه مات موتة طبيعية
والله أعلم :)


 عروسه البحور ‏@ashketromancya  
تمثال الفارس 


ليست هناك تعليقات:

إرسال تعليق

Related Posts Plugin for WordPress, Blogger...
"حقوق الملكية والملوخية والمهلبية ... الخ
محفوظة للست شهرزاد وإياك حد يسرقها ويحاول يزعلها آغجر .. مفهوم ؟ "