الاثنين، 8 سبتمبر 2014

القـــرم ومســافة أُم السكة




 حدوتة المرة دى فيها حرب ودم وجيوش
 فاللى هتكون القصص دى دمها تقيل على قلبه
 ميكملشى وادينى بقول مقدما اهو
 هه
 #شهرزاد_بتزغر




كان المشهد كالآتى 
 اسكندرية ميدان محمد على
قبل ما يحطوا التمثال
لأننا دلوقتى لسه سنة 1853 حضرتك
عساكر الجيش المصرى شايلين حاجاتهم
 ورايحين يركبوا البحر
 أمد ايدى على كتف أحدهم وأسأله
 - على فين العزم يا دفعة ؟؟
 فيرد عليا 
- رايحين القرم !
- رايحين تهببوا ايه هناك ؟
 يتنحوا شوية ويبصوا لبعض
 ويتقمصوا دور الست فردوس عبحميد
ف المسلسل الشهير
 ويردوا قائلين



يسيبونى ويجروا عشان يلحقوا السفر
وأهرش ف نافوخى وأحاول افتكر
 انا سمعت فين الكلمة دى قبل كدا ؟
 القرم .. القرم .. ؟




وبعدين ييجى ف بالى اول مرة اسمع الكلمة ف صغرى
عن طريق علوية هااااااانم الاسيوطى
وهيا بتقول لحبيبها السابق بسيونى بيه ابو الليف




عن ازاى ان ابوه لما راح يخطبها له
مرضيش يدفع المهر اللى طلبه باباها
آل عشان كان .... مقّرم
وفهمت بالويم كدا ساعتها على قد سنى 
 ان مقرم دى ....  يعنى بخيل وسقيل
ودى كانت كل معلوماتى السابقة عن القرم
 لحد ما كبرنا يا امى
وبقينا نسمع الاسم ف نشرات الاخبار
 خصوصا ف الشهور اللى فاتت
 ايه بقى الحوار دا ؟؟



القرم لغويا
كل  معانيها  حادفة على حاجات بايخة وفيها عنف
و مجمل المعانى ان كلمة "يقرم" حاجة او حد او شىء
 يعنى يقطع منه حتة 
وسبحان الله حقا هذا سيحدث 
عشان القرم دى بعد خناقات وحروب وبلاوى زرقا وسودة
 وكل الالوان الغميقة
 ف الآخر الدب الروسى هيقرمها من عين الكل
 وكله بالدستور 
والقانون




والقصة هنرويها اعتمادا على كتاب الراجل الجميل
 السكرة .. الامير عمر طوسون
 اللى حكى فيه تفاصيل التفا تفاصيل
وكل حاجة بالأعداد والأسماء مذكورة
لدرجة ان لو حد فيكم له جد جد جد جده
كان ف الحرب دى
و لو كان معدى جنب البحر حتى
مش بعيد يلاقى اسمه ف الكتاب !






وقبل ما نقول روحنا القرم ليه
 وعملنا ايه وازاى رجعنا
 نحكى الاول الحرب دى كيف بدأت
واشتعلت وايه النوظام



ونبتدى بموقعها
لأن القرم دى شبه جزيرة كان ممكن تبقى حتة أرض
 وعادى ولا فارقة مع أى حد 
لكن المأساة انها كانت واقعة ف النص
 بين تركيا ... وروسيا 
ودا اللى خلاها نقطة ملتهبة من زمان وحتى الآن 
وان اختلف المتصارعون عليها 




والامير طوسون بيحكى ف الكتاب البدايات
 وازاى دخل الاسلام المنطقة دى
وكان واقعة لعقود تحت حكم الـ .. خان
وكان مسلم والبلد فيها مساجد وشغلانة كبيرة كدا
لما ظهرت الامبرطوارية العثمانية ولعلعت كدا
 وحطت ايدها على مناطق نفوذ كان من ضمنهم القرم
 وبعدين روسيا دخلت ف الصراع 
ومعارك واحتلال وانحسار ومناوشات 
وشد وجذب وحصل اتفاقات وتهدئات الخ 



العثمانيين كانوا ف التوقيت دا هما رجل اوربا المريض
 والدول الكبرى بتسعى للقضاء عليه
 وجيبانه الارض لمس اكتاف مع اول فرصة
 لكن معرفتش ف الأول
فابتدوا يمشوا بسياسة الحتة حتة
الاول نبسط نفوذنا شكليا وبعدين رسمي
 وبعدين نخش ع الأرض عسكريا
 وكانت دى الخطط من بدرى لكن منتظرين بس 
التوقيت المناسب للتنفيذ 





اللى حصل وقتها الآتى
فرنسا وانجلترا كانوا متفقين مع السلطان العثمانى
 ان المسيحيين الكاثوليك ف الشرق يبقوا تحت حمايتهم
اما الأرثوذكس
فتدخلت روسيا عشان يبقوا تحت حمايتها
 واهو بكدا تحطلها رجل ف الأراضى العثمانية
 والقرم تحديدا كانت تحت نظرهم
 وهيموتوا عليها لأنها ع البحر الاسود ..
وبالنسبالهم كانت منفذ مهم



 القصد العركة بدأت دينية
لكن الحقيقة انها كانت سياسية واستعمارية قحة
مفيهاش فصال دى
لكن الموضوع بدأ باختفاء احدى القطع الدينية الهامة
 ف كنيسة القدس
 واُتهم فيها رعايا ارثوذكس
 قوم روسيا اتلككت وقالت محدش ييجى جنبهم 
ورموها ع المسيحيين اللاتين
قوم فرنسا اتدخلت وقالت محدش له دعوة برعايانا
 والموضوع اتكهرب بلا داعى



وقيصر روسيا استغل الفرصة اللى كان مستنيها أصلا
وقدم طلب للباب العالى
وطالبه بتقنين رعاية القيصر الروسي
 للرعايا العثمانيين الأرثوذكس بموجب اتفاقية خاصة
 وبالمفتشر كدا قاله لو محصلشى 
هيكون بمثابة اعلان الحرب !
المشكلة مكنتش ف التقنين وبتاع
 المشكلة الاكبر كانت ف مطالب روسيا
 ان المضايق تتقفل ف وش الانجليز والفرنساوية
 وان القوات الروسية فقط تتدخل
ويبقى فيه اتفاقية دفاع مشترك بينها وبين الأتراك
بشروط طبعااا هتكون مجحفة م الدب الروسى
اللى كان ف وقتها بيتك على رقبة العثمانلية
 وهوه عارف كويس انهم ضعفا !






بس الحقيقة انه مكنش مركز قوى
 ان فيه ناس تانية هتقفله .. زى فرنسا وانجلترا
وهتساند الأتراك ف العركة دى مش محبة
ولكن عشان مصلحتهم يا مونشيرى
قصره
 القيصر الروسى هيبعت للسلطان العثمانى بالمطالب
 ويهدده ان لو منفذهاش يبقى كدا بيولع الدنيا
وهنوريكم
ويا مستوقد مفيهوش راجل




بيقولك بقى السلطان عبمجيد
بعد ما قعد يدخل ويخرج م الحمام كذا مرة #ياعينى
عمل قعر مجلس واستدعى القناصل الاوربيين فورا 
وشاورهم ف المصيبة السودة دى
وبعد ما رجعوا لدولهم .. قرروا الآتى
 قالوله يا ميجو ارفض الطلب
 وارميه ف وش روسيا ولا يهمك
 واحنا وراك وساندينك



وطبعا مش هيستنوا
جرررررى
 الأسطول الفرنسى بعت سفنه ركنت عند سواحل اليونان
 اما الاسطول الانجليزى فراحت سفنه عند مالطا
وابتدوا يستعدوا للحرب
روسيا شافت المنظر .. تسكت ؟
ابضنننننن
 فورا راحت محركة عساكرها وجيشها
ودخلوا ولايتا مولدافيا وفلاخيا
Moldavie & Valachie 
اللى هما جزء من  رومانيا حاليا
والولايتين دول كانوا وقتها من ضمن الاملاك العثمانية
وبس كدا خلاص روسيا احتلتهم
رسمى فهمى نظمى
 وعبدالمجيد اتورط وكدا بقى اعلان حرب 
ولازمله تحرك من الجانب المعتدى عليه 
مفيهاش كلام



لكن الشهادة لله ولازم نقول
 روسيا البائسة لما عملت الحركة الدنيئة دى
مكنتش متخيلة اللى هيحصل بعدها
وكانت فاكرة العثمانيين بس اللى هيقفولها
وكانت فاكرة ان النمسا هتقف معاها
وان انجلترا وفرنسا هيتلهوا ويسكتوا
 لكن اللى حصل كان مخالف للتوقعات
و آه صحيح فرنسا وانجلترا اشتغلوا بلطجية للأتراك
اما النمسا فالأمبراطور بتاعها قال للروس
طلعونى م الخناقة دى يا عم انا مليش دعوة
 واللى ساند الروس كان شوية غجر ف هذوها التوقيت


زى مين يا شهر  ؟
روسيا ساندها اليونان وشوية مرتزقة من البلغار
وشكرا
 قصاد مين ؟
قصاد انجلترا وفرنسا
وسردينيا (جزء من ايطاليا حاليا)
 وطبعا الأتراك بجيشهم 
وجيوش بعض من محاسيبهم
ومحاسيبهم دول اللى يخصونا
جزء فيهم  من تونس والجزاير
 والقطاع الاكبر جنب الجيش التركى كان
 الجيش المصرى 
 وعرفنا ليه اتورطنا والأسباب 
 نشوف بقى شكل التوريطة  .. ؟






مصر سنة 1853 كانت تحت وراثة أسرة محمد على
والوالى وقتها كان الحاج عباس حلمى الأول
 واول ما جريت وتيرة الاحداث بعتوله 
قالوله ايه بقى
و المصادر بتحكى ان السلطان العثمانى طلب مدد
 من الوالى ف مصر
 امدادات بالفلوس والسفن وكدا
ومقلش ابعتلى جنود ولا حاجة .. !!
وعبس هوه اللى حب يجامل من عنده يعنى 


ومش هنقعد نخمن بقى 
الفرمان الهمايونى اللى بعته السلطان تحت ايدينا اهو
 ومكتوب بالتفصيل
وهقرالكم منه عشان مسخرة الصراحة
 بدءا بالديباجة اللى كلها تفخيمات


 .. "الدستور الكريم المشير المفخم المحترم
نظام العالم مدبر أمور الجمهور بالفكر الثاقب
متمم مهام الأنام بالرأي الصائب 
ممهد بنيان الدولة مشيد أركان السعادة والإجلال
 المحفوف بصنوف عواطف الملك الأعلى
 سمير الطبع عباس حلمى .. "



وكل الفيلم اللى فوق دا بيندهله بس 
يعنى بيقوله خد ياض تعالى .....!
واللى هوه مسعود جاد الحق عبحق عبعز 
عبعال  عبعزيز 
عبمعين عبدالله عالله هالاهالله
وبكرة ابقى اقول لحضرتك اسم بابا !!




وبعدين بيشرح بقى ف نص الخطاب
 ازاى ان روسيا خرقت الأتفاقات
ودخلت على الاراضى العثمانية احتلتها
 وانها رفضت اى تفاوض وخروج
وانهم (الأتراك) اتشاورا كفاية مع الحلفاء بتوعهم
ووصلوا للآتى :

" تقرر باجماع الآراء اختيار جانب الحرب
 واتخاذ التدابير العسكرية توكلاً واعتمادا
 على عون الله تعالى وعنايته .
واستنادا لأمداد وروحانية الحضرةً النبوية
 مستعينين بنصرة الله تعالى
 وصدرت أيضا فتوى شرعية بذلك
من طرف شيخ الإسلام "
 يعنى ضبطوها شرعى كمان




وبعدين بيوصيه ويقولها السلام امانة
 تخلى الأوغاد اللى عندك يدعولنا .. !
"عليك أن تعلن ذلك لأهالي جميع الجهات الواقعة
 تحت إدراتك وتذيعه 
وأنً تنبه عليهم وتفهمهم بأن يشتغلوا جميعا بالدعاء
بنصرة دولتنا العلية
، كما هو مفروض عليهم ويواظبوا على ذلك "
 وليه مفروض عليهم يعنى 
واللى ملوش نِفس يدعى
ايه هتغرموه ولا تحبسوه ولا ايه مش فاهمة !!!



واخيرا والصراحة لفتة كريمة
 والناس ذوق ذوق ذوق
 السلطان بيوصى الوالى عباس
ويقوله ان الرعايا بتوع روسيا واليونان والبلغار
 دول قاعدين للسياحة والتجارة 
لذا نوصى بإن محدش يأذيهم
 ولا ياذى الرعايا الأرثوذكس ف العموم
لأن ملهمش ذنب فيما فعلته بلادهم 
#عداك_العيب_ياعم_الحنين





والفرمان خلص .
ومفيهوش سيرة أى حاجة من نوعية ابعتلى حد
 ولا لملى عيال من ع القهوة
 وكل واحد يجيب مطوته ونبوته معاه ولا حاجة 
اومال ايه بقى ؟!!
الحقيقة ان عمر طوسون مقلش كدا طبعا
انما مصادر اخرى هيا اللى قالت
ان عباس حلمى انتهز الفرصة دى
عشان يوجب مع الباب العالى ويكسب ارضية ومحبة
ليه ؟ عشان هوه اخد مكان جده
والجلابية كان واسعة عليه قوى
 زائد انه كان مكروه وسط العيلة اكمنه شرانى
 وطبعه زفت 
فأسرته بقت تألب عليه السلطان
الجدع قالك فرصة .. أضرب عصفورين بحجر
 أكسب ود السلطان ورعايته
وبالمرة أقوى من الجيش بتاعى
اللى الأتراك فارضين عليا اقلل من عدده وعتاده .. !




وفعلا دا اللى حصل وكان حاصل اصلااا
طوسون بيقول ان عباس كان عامل حيلة يكتر بيها
عدد افراد الجيش عشان يفلت من الاوامر التركية 
بتقليص عددهم
كان بيضاعف عدد الجنود جوا الوحدات
ويتحايل على الشكل العام
 قوم الاتراك يبصوا للجيش يلقوه وحدات قليلة
 لكن ميعرفوش ان جوا كل حاجة ف دول 
العدد دوبل وتربيل !





وبس بقى .. أبو شيماء هيتهور
 ويصدر اوامر للأسطول والجيش المصرى
بالاستعداد فورا
وهنسمع عن النجدة المصرية الاولى
اللى بعتها عبس سنة 1853
اللى مهتم يشترى الكتاب يا عيال
وهيلاقى فيه التفاصيل القااااتلة المملة بس مفيدة جدا
 للى عايز يدقق 
لكن الملخص ان الجيش هيتبعت منه الآتى
الأسطول المصرى
 12 سفينة مزودة ب ٦٤٢ مدفعا و٦٨٥٠ جنديٍّا بحري
 بقيادة أمير البحر .. حسن باشا الاسكندرانى
اما الجيش البري
فهيكون بقيادة الفريق سليم فتحي باشا
ومجموعه : ١٩٧٢٢ جنديّ




وخدولى بالكم من الاسمين دول كويس
 حسن باشا الاسكندرانى وسليم فتحى
عشان دول اكبر راسين اهو
 ف القوات المصرية بحرا وبرا
وهيسافروا ف المهمة دى
 ومش هيرجعوا تانى بسبب طموحات
 المخسوف على عمره .. سى عباس
 المتمحلس لسيده ف الآستانة



القصد وبالاختصار
 الأمر هيصدر لكبار رجال الجيش والأسطول
وينفدعلهم مرتب 3 شهور عشان يشتروا طلباتهم
 سريع ف السريع ويتجهز السلاح والذخيرة
وطوسون وصف حالة السفن واللى عليها
 بالعساكر بالرتب بالذخاير بالمدافع وكل حاجة
وهتسمعوا المصطلحات التركية الفشيخة 
اللى قعدت ف جيشنا لحد وقت مش بعيد 
زى 
الالاى - السوارى - الطوبجية 
جى غارديا - جى بيادة - جى بيادة - سودان 
غليون - وابور بحرى - وابور صاعقة 
جى اورطة - جى لوء 
فرقاطة - قرويت - جويليت 
والرتب زى 
اميرالاى - قبودان - صاغقول - يوزبشيان - قائمقام 
برنجى طوبجى - بكباشى .. الخ 




وف شهر يوليو 1853 يركب عيالنا السفن 
ويتجهوا على تركيا
ويوصلوا الأستانة ف اغسطس
 وتم استقبالهم من محمد على احد رجال السلطان
ودايما يخلطوا بينه الجدع دا
وبين صور محمد على سنكفولة بتاعنا 
وهما مش نفس السخص 




المهم بقى ويالسخرية القدر
 ان القوات المصرية عسكرت ف حتة اسمها بيكوس
والسلطان عبمجيد عمل استقبال حافل للقيادات الكبيرة
 ف الجيش وبتاع
وشوف يا مؤمن المطرح دا من عشرين سنة
كان ابراهيم باشا بيحاربهم فيه وفاشخهم
والروس كانوا بيساعدوهم (الأتراك)
عشان يمنعوه هوه ونفوذ محمد على 
من انه يتقدم اكتر
 قوم ايه ؟؟
يشاء السميع العليم انه يحصل العكس
 ودلوقتى عساكر جيش محمد على
 هما اللى بيساعدوا الأتراك ف منع الروس من التقدم
 #زمن 




وبيحكيلك طوسون بقى
 ان السلطان ف ليلة التكريم دى أنعم على كل قائد
 من القواد بعلبة للتبغ مرصعة بالماس
 وانعم على كل ضابط وصف ضابط براتب شهر
 :)
وبس كدا قعدنا وانبسطنا واخدنا الواجب بتاعنا
 نروح نتقتل بقى ولا احنا جايين نهزر .. ؟!



الجيش المصرى انضم للجيش التركى
وبقوا تحت امرته ورافعين علمه
واصلا كان الزى الرسمى للجيش شبه التركى 
وكله سنتضمو على بعضيهم 
وهنحاااااااااااااااارب
وف سبتمبر هنسمع عن اسم احمد باشا المنكلى
 اللى هيبعته عباس لمساندة القوات المصرية
وهيبعت معاه كمان قولوا مين يا عيال ؟ 
على مبارك سخصيااااا





على مبارك ف التوقيت دا
كان اشهر خريجى البعثات المصرية 
المعروفة بـ : بعثة الانجال
 وكان ناظر المهندسخانة
وكان وجوده كان ضرورى
وف مذكراته حكى ان ايام القرم دى 
كانت اسوأ ايام مرت عليه من بشاعة الحرب 
واصلا اصلا على مبارك دا كان راجل لطيف 
مش بتاع دم وقتل دا بتاع بناء وتعمير ونهضة
و محدش فهمه وقدره الا اسماعيل ... فعلا





واول معركة هيخوضها الجيش المصرى
هتكون ف البحر وتحديدا عند بلدة "سينوب"
وبعيد عنكم وع اللى هيجرى فيها 
الأتراك ومعاهم المصريين اللى ماسكين ف ديلهم
هيتلبوا م الروس علقة محترمة 
والاسطول الروسى هيزنق السفن التركية والمصرية
 ف كورنر كدا وفين يوجعك
ويقال انه كان خطأ من القبودان التركي عثمان باشا 
اللى مقدرش الموقف ع الأرض كويس
 وعنها واتأسرالراجل
 واتبرت رجله بسبب مقذوفة ومات مساعد له




والمصريين اتنسفتلهم الفرقاطة (دمياط) 
والوابور (بروانا)
وبيقولك ان عدد البحارة الأتراك قبل بدء المعركة
كانوا ٤٤٩٠
دول بقى اتقتلوا ولم ينج إلا الجرحى و١٢٠ أسيرا 
#نعممم_ياعومررر





 اما .. سينوب
فبعيد عنكم كما ذكرت الجريدة اللندنية الشهيرة
 The Illustrated London News
فقد أصبحت أثرا بعد عين وتم تدميرها تمامااااا 
والمؤسف اكتر ان ف الحدوتة دى
 ان بعض السفن التركية كانت بتفضل
 بدل ما تقع ف ايد الروس انها تنسف نفسها بلى عليها
قال عشان ميقعوش ف الأسر !
وانا طول عمرى اقول ع الأتراك مجانين وخُلل
 دى حاجة الظاهر ف الجينات !


وكدا الحكاية بانت بقى بعد المعركة السودة دى
 الأتراك ريش على مفيش
 والعسكر المصرى بيتاخد ف الرجلين
والمنظر بقى زفت فرنسا وانجلترا هينزلوا بالتقيلة 
ويتدخلوا




ف هذوها التوقيت عمكم عباس حلمى الأول
هينقتل ف قصره ف بنها العسل
ويمسك من بعده .. عمه سعيد ابن محمد على
اللى كان هوه اكبر افراد الاسرة سنا
وبالتالى الاحق بالقعده ع الأريكة





وسعيد مش هيضيع وقت عشان يبدى الولاء 
للباب العالى واسياده هناك 
 فيقرر يعزز القوات بالنجدة المصرية التانية
 وبيقولوا بعت حوالى 15 ألف جندى
ويلا هما فارقين دول ولا الكتاكيت .. عادى 




وتنضم القوات لاخواتها
 ويبتدوا يبينوا كرامة لما يتحركوا ع الأرض
الظاهر البحر مكنش قد كدا
وكانت نقطة ضعف واستغلها الروس كويس




المهم ان الأتراك والمصريين ف ضهر
فرق من القوات الفرنسية والأنجليزية
 هيتوغلوا ناحية الأراضى المستولى عليها الروس
ويتجهوا للدانوب 
ويعبروا النهر دا اللى كان اسمه وقتها
الطونة وبيقولوا ان المشاة المصريين كانوا ف طليعة
من عبروا وبينوا بطولات 




وبعد شوية هنسمع عن اسم سلسترة 




وطابية العرب واستعادتها من الروس 
ورفع العلم التركى عليها



ويتقدم الجيش المصرى
وتتدخل قوات من اليونان فيتصدلها التحالف 
وف مقدمتهم قوات مصرية وتركية 
ويتوغل التحالف ويتقدم اكتر





وهنسمع عن  حصار سباستبول 
اللى قعد بتاع سنة بحالها لحد ما سقطت 
وهنسمع عن استبسال القوات المصرية بقيادة 
سليمان الارناؤطى غير اسماء اخرى ...  




القصد .. 
ف خضم الحرب اللى هيتقاتل فيها قوات التحالف
الإنجليزي الفرنسي العثماني ضد الروس
هينطحن من الناحتين ناس كتير 
والقوى هتبدو متكافئة ..





ودول عمالين يطحنوا ف دول
ومحدش بينتصر فعليا .. لحد ما هيتدخل النمساوى
 الفايق بتاع الروقان كله 
ويقولهم استوب يا جماعة 
وكفاية كدا
والصلح خير قوم نتصالح
وعملوا اتفاقية ببنود وتشاور


 وقتها كان القيصر اللى بدأ الحرب دى ربنا خده وريحنا
 ابنه بقى اللى مسك مطرحه 
كان مش عاوز مشاكل فوافق ع الهدنة 
وف باريس 1856 انتهت الحرب السودة دى
 بين كل الاطراف بأتفاق مرضى للجميع
 وسبحان الله اللى يشوف الخساير يندهش
من غباء الانسان عموما




المصادر اختلفت ع العدد
 بس بيقولوا ف مجمله شارك بتاع مليون نفر
 من كل الأطراف تركيا فرنسا انجلترا
روسيا اليونان سردينيا البلغار
 وبعض العرب من مصر وشمال افريقيا 






وبيقولوا كمان ان عدد القتلى
 وان اختلفت المصادر برضو مقلش عن ربع مليون نفر
 ما بين قتيل وجريح واسير ومفقود
 ف 3 سنين الحوار دا !



ويقال كمان ان الوحشية اللى بدت اثناء المعارك
كانت بدرجة غير مسبوقة 
من تشويه وقطع للأنوف والودان والتنكيل بالجثث
وحاجات مروعة ... 
وربنا ما يحكم اتراك أو روس عليكو يا رب 
ف طبعهم شراسة ودايما طبلع منهم بشاعات 
وكفاية التتار كمثال 
:)
والظاهر الحتة دى القسوة نزلت فيها 
و منذ بدء الخليقة وقالت انا قاعدة ومش ماشية !




اما الفايدة السياسية بقى فخد عندك
 الأتراك رجعوا اللى احتله الروس من ارضهم
اما الأنجليز والفرنساوية
 فخدوا امتيازات من الأتراك على حساب الروس
اما الروس فخدوا امتيازات عن طريقة الاتفاقية دى
 تديهم حقوق ف البلقان والدانوب
خلت بعدين الصرب والبوسنة وسكان الجبل الأسود
 ينفصلوا عن الأتراك على حسها 



اما تركيا نفسها رجل اوربا المريض
كسبت ف عمرها كام سنة كمان تحارب فيهم
وتحسن من وضعها وتعالج روحها
ومكنتش تعرف بقى اللى فيها
 وانه حلفاء اليوم .. فرنسا وانجلترا ساعدوها فقط
 عشان يعرفوا بعدين يقسموا التركة بتاعتها
 لما تموت بس برواقة 
وبعيدا عن أنف الدب الروسى التقيل




المصريين بقى اخدوا ايه من أم القصة دى كلها .. ؟!
 الحقيقة انهم خسروا وكسبوا
خسروا بشريا خسارة فادحة
 وياريتها كانت ف الحرب .. !
دا بيقولك والناس راجعين ع الآستانة
عشان يصلحوا حال السفن
امير البحر حسن باشا الاسكندرانى ومساعده شنن بك
 كل واحد كان ف مركب
اسمهما ...  بحرية ومفتاح جهاد
وقامت عاصفة شديدة واعصار اخد المراكب
 زى ما تكون معمولة من ورق
واتكسروا الأتنين على صخور البسفور 
ومات كام نفر بقى ... ؟!!




بيقولوا مات القائدان .. الاسكندرانى وشنن
 ومات معاهم من البحارة ١٩٢٠
ومفضلش من الناجين غير 130 فقط .. !
ويعنى مماتوش وهما بيحاربوا ماتوا وهما بيرجعوا !
دا غير واقعة تانية اثناء الحرب
غرقت فيها فرقاطة اسمها دمياط
وخدت اللى فيها كلهم ونزلت للقاع 
:(
ويقال ان ضحايا الجيش المصرى بالاجمالى
 ف حرب القرم بلغ .. 2500 فقط لا غير 
دا غير الجرحى طبعا



لكن الخساير ف السفن والدخاير عليها
 كان الأكبر والأفدح
 وان كانت المعارك اللى شارك فيها الجيش
خصوصا القوات البرية اللى سمعّت
 وكانلها حضور قوى
وفيه شهادات من جنرالات انجليز وفرنساوية كثر
 بيشيدوا ببراعة العساكر المصريين وصلابتهم
رغم انهم حاربوا ف ظروف مناخية
تختلف عن بيئة مصر والشرق عامة
ومكنوش مضطرين للشهادة دى يعنى .. !




ومش بس اللى اتجمعوا ف اتفاقية باريس
هما  اللى كسبوا من كل هذه المعارك
 والخساير والدماء ..
الوالى ف مصر كمان كسب كتير
عباس حلمى زود ف اعداد الجيش وحسن من تسليحه
 مستغلا الظروف وان السلطان التركى مش هياخد باله
ولما جه من بعده سعيد
 استفاد الرضا العالى السامى
لدرجة انه هيحب الموضوع قوى
 وهيبعت بعد شوية العيال بتوعنا ع المكسيك
 ونبقى مرة نحكى فيها الحكيوة دى .



بس عود على بدء نسأل 
 احنا بقى كسبنا ايه ؟؟
الشعب المصرى يعنى .. كسب ايه م الحرب دى ؟
 انا بقول كسبنا صلاة النبى واكتر من كدا مفيش .. !
اصلا احنا دفعنا ومخدناش أى حاجة 
وبيقولوا انه الوالى عباس اتبرع هوه وابنه الهامى
 وبعض رجالات الدولة بما يقارب الـ 85 ألف جنيه
ودا مبلغ وقدره يعنى ف هذا الوقت
وحد يقولى زعلانة ليه دى فلوسهم وهما حرين ؟!!
أرد واقولكم يعنى هما كانوا جابوها منين
 ولا هيلموها تانى من مين .. مش مننا ومن شقانا ؟!




 ثم انه التبرع المالى مكنش لوحده
 مصر بعتت ف حرب القرم
حسبما قال طوسون من سجلات الجهادية
 في ديسمبر سنة ١٨٥٣م :١٢٥٠ صندوقًا
بها ٢٥٠٠٠ بندقية
وفي أكتوبر سنةً ١٨٥٤م : ٣٦ مدفعا
 و١٠٨٠٠ قذيفة
وطوسون كتب حاجات اكتر بتفاصيل 
ومكاتبات راحة جاية بين الوالى ومحافظ اسكندرية 
والناس الكبيرة ف الجيش ... افلام هندى كدا 
وهلم ما يتلم وكله على حساب صاخب المخيل





وطبعا كل ما سبق ولا حاجة
 مقارنة بالخساير البشرية اللى تمثلت ف موت
 اكتر من 2000 نفر
 وموت اكبر راسين ف الجيش البرى والبحرى .. !
وليه .. ؟
يعنى اخسر اكبر قوادى ف حرب مليش دعوة
 بأى حاجة فيها ليه .. ؟!!
وبالمناسبة فتحى سليم قائد القوات البرية
 لسه ضريحه موجود ف القرم




حاجة كمان 
 الراجل دا اسمه اسماعيل أبو جبل
وكان احد القادة ف القرم
 ودايما يخلطوا بينه وبين الخديوى اسماعيل
ويقولوا ان دى صورته ومش حقيقى بالمرة
اسماعيل مخطاش المنطقة دى ابضنننننن




عمر طوسون استغل الفرصة دى
وحب يلقح ع الاحتلال الانجليزى والملك بالمرة
وقال ازاى ان الجيش المصرى ايام حرب القرم
 كان عدد افراده ٩٣٩٤٧
وميزانيته 4 مليون جنيه 
ومكنش مديون لحد وبيهتم برجاله وتسليحهم
 بينما الآن 
(وقت نشر الكتاب ف التلاتينات)
الجيش عدده ١١٠٠٠ جندي
 وميزانيته ٢٥ مليونًا ومع ذلك ... مديون !!
وامكانياته الله اعلم بيها هتوصل لفين 
والراجل كان محق .. ف حرب 48 احنا عرفنا فعلا
 اداءانا طلع متدهول لحد فين  .. !



واخيرا خلصت 
وفاضل الملاحظات 




1) مع كل كراهيتى للعسكر
وكل تحفظاتى علي صنف القيادات العرر
الموجودين ف كل زمان ومكان
الا انه الجندى المصرى على صعيد منفصل
حاجة تشرح القلب الحزين 
بس للأسف خيره لغيره دايما ومستغل 





يعنى محمد على زماااااان
بعت السوادن يجيب ناس من هناك
 عشان يدخلهم الجيش بدل المماليك اللى قتلهم زى الفراخ
 قوم السوادنيين شوية ماتوا ف السكة
 وشوية ماتوا بعد ما وصلوا ..!
ومحدش اتحمل الجو ولا العذاب ...
 بينما الجيش ف القرم اتحمل التلج والبرودة
وظروف ف غاية القسوة
 ومع ذلك بينوا كرامة وعملوا شغل مش بطال ..
واغلب اللى مات هناك كانت حوادث ..
عاصفة ... اعصار .. خطأ من قائد تركى
لكن المصريين لما نزلوا ع الأرض
واتصرفوا بحرية اكتر كانوا تمام زلفل والله
احنا حلوين بس حد يشيل بيادته من فوق راسنا 
والشعب المصرى الوديع المسالم ذو الطبيعة النهرية
اكم من احتلال عدى عليه 
وعلمه لما ييجى الوقت المناسب ازاى يبقى شرس
 ومقاتل وخير اجناد الارض
لولاش استغلال الاوغاد
والجنرالات النرجسيين اللى عدوا علينا
 وما أكثرهم 





2) عباس حلمى جرى ووطى عشان الباب العالى
 يرضى عليه قوم يموت بعد سنتين
وييجى سعيد يقش ويبقى هوه المستفيد
شوف يا اخى الزمن وعمايله 
واجرى يا بن آدم فعلا ... !


3) حوار ان عباس حلمى عمل مصلحة 
عشان يقوى الجيش المصرى ووطنية منه وكدا
مش حقيقى .. 
هوه قوى الجيش عشان نفسه 
عشان يحمى روحه خوفا من افراد اسرته 
اللى كانوا واقفينله زى الخازوق وبيعادوه 
وكانوا عمالين يدوه زونب عند السلطان عشان يقلشوه 
فمحدش بقى يقولى الوطنية والمهلبية 
دا نسخة من جده محمد على .. كوبى وبيست
 انتهازى وبتاع مصلحته حتى آخر قطرة دم
ف الجيش وف الشعب .. !






4) حتة القرم دى منظورة ومعمولها عمل .. آه والنبى
 قعدت ف الزور كدا شوفوا كام ميت سنة بقى
 راحة جاية بين الأتراك والروس 
لحد ما جه بوتين وحرك بس كام دبابة وعسكرى منظر
 ومضربش ولا طلقة
 وهوب خد القرم ف عبه ولا سحر ولا شعوذة
 وباستفتاء واغلبية وديموقراطية وبدون نقطة دم واحدة
ولعبها صح ولى رأ ى وديع  .. أستااااااااااااااذ
وهذا يقودنا لسؤال الحلقة بقى
وعلى لسان الست سيمون
 بعد كل الهوليلة دى والدم 




ولنصل الى رقم
5) وهوه ان زمان عبناصر انتص ف نافوخه
 وبعت عيالنا اليمن يموتوا بلا سبب
 ومخدناش حاجة احنا م العبارة دى اطلاقا 
غير المنظرة وجثامين الشباب ترجع ف صناديق 
قوم الأيام دى ربنا يبتلينا بجنرالات من نوع اخر
 بيدورا ياريت ع المنظرة
دول طلعوا أحط .. وبيدورا ع المصلحة
وعاوزين يشغلوا جنودنا مرتزقة للى هيدفع !


ويطلعوا يقولوا كلام كبير من نوعية
اياك حد يهوب ناحية مين وهيا مسافة السكة
وهوه مسافة السكة بتاعت دلوقتى ياترى
 هتختلف قوى عن مسافة السكة بتاعت عباس زمان ؟؟
وانه لسؤال غير برىء 
ومش منتظرة اجابته على كل حال





ومعلش طولنا عليكم توتة توتة خلصت حدوتة
 اولانا ف القرم
 وتصبحوا على الف خير


--------------------------


أولي النهى.. @nohabakla 
كل الحروب بترسى ع كده في الآخر
 الغلابة تموت عشان الكبار يتفاوضوا و يتصالحوا 
:(




أولي النهى.. @nohabakla 
 نفس اللي عملوه اليهود في فلسطين.. 
:(
 نفس الدماغ الشيطاني




أولي النهى.. @nohabakla 
 النمساوية أخذوا نهج البرادعي
 واضح إن السر في الجو بتاعهم
 مبدأ لو قلبت بعكننة، فالجري جدعنة :)


ليست هناك تعليقات:

إرسال تعليق

Related Posts Plugin for WordPress, Blogger...
"حقوق الملكية والملوخية والمهلبية ... الخ
محفوظة للست شهرزاد وإياك حد يسرقها ويحاول يزعلها آغجر .. مفهوم ؟ "