الجمعة، 31 أكتوبر 2014

سحيم الغياظ ومن الشعر ما قتل




 
العواف عليكم
حدوتة شهرزادى خفيفة كدا ع الماشى
حدوتة النهاردة عن شاعر عربى قديم
وشاعر صعلوك من الصعاليك اللى هما 
انا لقبته بالغياظ .. الفرّاس 
اللى لسانه وداه ف داهية 
وطالما جبنا سيرة الشعراء 
 يبقى هنجيب سيرة الأخوة زمان
 ف القبائل العربية ومآثرهم 
وهنكتشف أدلة جديدة على قد ايييه 
هما كانوا حلوين واحنا انضحك علينا 
بالعبيط ف كل سنوات التعليم ف البلد دى ... !



شاعر الليلة دى بعيد عنكو 
وربنا ما يحكم على حد يارب اسمه سحيم 
ومحدش يضحك الا لما اخلص اسمه الثلاثى
 سحيم بن بنى الحسحاس 
#اه والله زمبقولك


 
وسحيم بقى الله ما اجعله خير
كان من الشعراء الصعاليك بس مش اى صعاليك
 كان زى عنترة بن شداد كدا 
وقريب له ف ظروف كتير


                   

                   يعنى كان سمارة ومامته من الموالى
اللى بيرجعوا لأصول حبشية 
تم السطو عليها ف غارة من قبيلة على قبيلة 
واتجوزها نفر من السااااااااادة 
وف ليلة شقاوة اثمرت عن سحيم افندى
والفتى بقاله نسب ف قومه .. بنى الحسحاس 
لكن ف نفس الوقت مكنش حر 
وكان عبد يباع ويشترى
 وحكايته كانت حكاية مش عاطفية قد ما هيا اجتماعية
وخش يا بنى على تتر برنامج حياتى 
يمكن الست فايزة واصف تشوفلنا حل ف المصيبة دى 
الله يكرمك



فاكرين انتوا فريد شوفى ف الفيلم
والمأساة اللى كان فيها 
الحقيقة دا كان واقع مؤسف بيعيشه كل بنى آدم
 اتحكم عليه ينولد اسمر البشرة ف الحتة دى
نظرة المجتمع لهم كانت متدنية حتى لو كان
 معروف مين الاب 
والبشرة كانت وكأنها وصمة وعار 
زائد العبودية ونارها
والعقد والكلاكيع بقى المترتبة على ذلك



يقال ان سحيم لحق يشوف الرسول (ص) 
ولكنه كان ف عز مجده شعرا وقولا
 ايام عمر بن الخطاب وانه رغم وضعه الاجتماعى النيلة 
كان واد قويل اللى هوه


وياريته كان قويل وبسسسسس 
دا كان مصيبة سودة وبلوى مسيحة
 فاكرين التشبب .. ؟
 يعنى لما شاعر يحب بت فيسيحلها 
ويقول ف حبها الشعر فاهلها يبهدلوه 
ويفرقوا بينهم ويرفضوا يجوزهوله 
اهو الاخ سحيم بقى مكنش عنده بس رفاهية
 انه يحب واحدة فيسيحلها 
لاااااااا لا يا بابا لاااااااا 
دا كان بيشبب بحريم سيده اللى قانيه ف بيته !

 

يعنى مثلا .. 
هوه كان عبد عند احدى سادة قبيلة بنى أسد 
ودى قبيلة مشهورة جدا ف شبه الجزيرة وقتها 
قوم الولا كان عنده قدرة يدخل ف البيت 
ويدهس
ويطلع على اسرار حريم المنزل 
والزيارات المتبادلة لهن 
وف مرة قال قصيدة عن خروجة من الخروجات 
عند قبيلة بنى صبير 
وقالك ايه ؟؟


كأن الصبيريات يوم لقيننا 
ظباء حنت أعناقها في المكانس
فكم شققنا من رداء مورد 
ومن برقع عن طفلة غير عانس 
إذا شق برد شق بالبرد برقع 
دواليك حتى كلنا غير لابس


بس كدا شكرا وطبعا كله فاهم
بيقول ايه دا يا شهروزة ؟؟ 
ابدا دا بس بيقول انه قعد مع الحريمات يلعبوا لعبة 
مين اللى يقلع الاول
.. لحد ما كلهم قلعوا ف الآخر #عاتشى_خااالص



بتهرجى يا شوشو .. 
ابضضضضن والنبى دا اللى حصل 
هوه كان مشهور بقلة الحيا والخلاعة دى ف شعره 
واللى يقرى الـ 32 قصيدة اللى سابهم 
هيلاقيهم كدا 
تحتوى على الفاظ صادمة ومشاهد صريحة 
وقلع هدوم وخدش حياء للصباح الباكر !!



حتى القصيدة اللى عجبت عمر بن الخطاب 
لأنها بدأت ببيت بيقول 

عُمَيرةَ وَدِّع إِن تَجَهَّزتَ غَادِيا 
كَفَى الشَيبُ والإِسلامُ لِلمَرءِ ناهيا


يا دوب قال اول بيت وكمل باقى الأبيات 
لحد ما سيدنا عمر قاله : ويحك إنك لمقتول ! 
وكأنه كان بيقرى الغيب 
سبحان الله 
ليه يا ترى ؟؟


عشان باقى القصيدة وما تلاها من اشعار 
كانت إباحية لدرجة مهما كان العرب فيها
 بيعشقوا البلاغة
 فمش معقول هيكونوا بهذه البلاهة ! 
ومركبين دشاش وأرايل وقرون .. 
وخد عندك الآتى



البنات تودى وشها الناحية التانية 
والولاد الشعر دا فوق تمآشر .. انا بحنذر اهو


فلما أبت لا تستقل ضممتها 
ترى الحسن منها والملاحة باديا
توسدني كفاً وتثني بمعصم 
علّي وتحوي رجلها من ورائيا

 
ومحدش يقولى إشرحى ..



تجمعن من شتى ثلاثاً وأربعـا 
وواحدة حتى كملن ثـمـانـيا
وأقبلن من أقصى الخيام يعدنني
بقية ما أبقين نصلا يمـانـيا 
... 
ربنا يديه الصحة !!


بصوا .. الولا كان قليل الادب كما يقول الكتاب 
والمؤسف انه كان بيلمح بالأسامى احيانا 
وكانو يرقع القصيدة من دول .. القبيلة كلها تتجنن !!
وكل واحد ياخد الكلام على روحه ويقول
 يا ترى يقصد مين .. نهون نهين ؟!! 
ومسلمش منه سيده نفسه 
وكان من بنى اسد واسمه جندل 
وخدله من الحب نايب


والظاهر سادة بنى اسد دول مكنوش بيشربوا بيريل كفاية
مكنش التسويق بيوصل السلعة دى 
لمطرحهم ساعتها ولا ايه متعرفوش
المهم الراجل نفسيته تعبت من الأشعار دى
قوم يكتم ف روحه يجيله جلطة 
لأ ابسلوتلى
راح واخد سحيم ورايح يشتكيه 
قوم اتحكم عليه بـ 80 جلدة 
اخدهم سحيم 
وبعدين رجع يشعر تانى عادى خالص !


حد يسألنى يا شهروزة انتى بتهزرى صح .. ؟
 فين العادات والتقاليد 
فين الكرامة 
فين النخوة 
وين الكومترررررى ؟!!!


 
أقولكم العرب كانوا مشهورين بالشعر والكلام 
والمبارزة بيه 
زائد اننا لسه ف صدر الإسلام
 وكان لسه الجاهلية ف عزها ومخلصتشى 
كانوا دول الفلول بتوع زمانهم 
اللى منقعوين ف الفساد الاخلاقى والاجتماعى 
ومش عاوزين يغيروا حاجة 


والاسلام مش هينجح انه يخلص المجتمع وقتها 
من التقاليد النيلة دى .. ببساطة 
بس الشاهد بيقول ان عمر بن الخطاب
 لما سمع الشعر بتاع سحيم
علق على الجزء الجميل فيه لكن لما سمع الباقى قاله 
"انك لمقتول"
 .. عشان كان عارف كويس ان الكلام دا زفت 
ومش هوه لوحده
سيدنا عثمان بن عفان كمان
بيقولوا ان جندل حاول يبيع سحيم عشان يخلص منه
 ومن قرفه واتعرض على سيدنا عثمان يشتريه 
ولسه بيقولوه دا شاعر وقويل وبتاع 
عشان يحلوا البوضاعة 
عثمان قالهم .. لأ مش هشتريه
وافتكر اسمه وحكاياته فرد : 
لا حاجة لنا به .. ان شبع شبب بنساء أهله 
وان جاع هجاهم
 :)



فيه نقاد بقى بيحللوا سخصية سخام سحيم دا 
وبيقولوا انه كان واحد بق وبتاع كلام 
وبس انما ف الواقع هوه مكنش بيعمل حاجة 
وكان غياظ وفراّس بس


 
يعنى .. ظروفه الاجتماعية وقيود العبودية 
ونظرة المجتمع الزفت هيا اللى خلته يدور على طريقة 
يرد بيها المهانة 
وكانت موهبة الشعر هيا ضالته



ودا باين قوى ف اشعاره اللى بيقولها عن نفسه



لئن أك أسودا فالمسك لوني 
وما لسواد جلدي من دواء


يس يزري السواد يوما بذي اللّب 
ولا بالفتى اللّبيب الأديب
إن يكن للسواد فيّ نصيب 
فبياض الأخلاق منه نصيبي



إن كنت عبدا فنفسي حرّة كرما 
أو أسود اللون إني أبيضُ الخلقِ


واضح انه كان متعقد من نظرة المجتمع النيلة 
وحب يردلهم الصاع صاعين 
لكن الناس اللى حطته ف طبقة شعراء عبيد العرب
 ضمته لفريق عنترة بن شداد
 




والنقاد بيعتبروا دا ظلم بيّن لعنترة 
لأن بن شداد هزأ قومه وابوه ف افعالهم صحيح
 لكن مجاش جنب الحريم ولا فضح البنات 
ولا قال البلاوى دى بالمرة


ثم انهم بيحكوا عنه انه كان متهتك 
ومش فارس ولا نيلة
يعنى ف مرة كان بيرعى الغنم 
وأنقذ احدى فتيات قبيلة مجاورة من يهودى 
حاول يخطفها 
حلو ؟



لا مش حلو .. عشان بعد ما انكذ البت وسابها تروح 
قابلته ف يوم ف السوق وجاية بسماحة نيفس تتشكرله 
وتقوله ميرسى على ذوقك وكدا 
ومش عارفة اعوضك ازاى
قالها لأ تعرفى .. 



ومفيش داعى اشرح الباقى 
البت يا نضرى اتخضت وانكسفت وجريت 
وبيقولوا انه قابلها تانى ف مكان تانى 
وعرض نفس العرض تانى
فالبت وافقت بعد ما سمعها من اشعاره المنقى
وقعد يتغزل فيها وكدهون 
قوم اييييه الرواة بيحكوا الحكاية دى ع
شان يقولوا انه كان وغدااا مأصلا
ومكنش فارس وشهم لوجه الله يعنى .. 



قصره الباشا بتاعنا هيفضل يقل ف أدبه شعرا 
ويفضح ف البنات لحد ما ف يوم يبقى عنده رانديفو 
مع احدى بنات الدار
والبت الصراحة كانت بنت أصول بنت أصول 
قالتله لما ابويا يبعتك بالإبل .. اتمارض 
واعمل نفسك عيان قوم يخرج هوه وتقعد انتا 
ونتقابل يا حزومبل


 
وفعلا عمل سحيم كدا .. الأب خرج 
وبعدين متفهموش نسى نضارة الشمس بتاعته ولا ايه 
فرجع ياخدها لقى سى سحيم ف وضع مش اللى هوه
 والبت روخرا ...
وبيقولك ايه بقى انه (الأب يعنى) والله اعلم كدا 
استغفر الله العظيم 
لا سمح الله 
شك ان فيه حاجة بين والواد والبت

 
 
 
وكان فيه جارية الظاهر كانت قارشة ملحة البت
 وسحيم راحت مكمله ع الحدوتة
 وقالت للسيد فيما معناه انك ربيت حية ف بيتك 
وابلك راحت يا حاج !


طبعا بعد الكلمتين دول .. الحاج ابو البت يسكت ؟!!
 أيش أعقول
 راح واخد بعضه ورايح على مجلس القبيلة
ومالك يا جندولة راح مبعبع بكل حاجة ... !
قالوله خلاص يا ابو نسمة .. 
احنا هنجيب الولا ف شوال 
ونشوف ايه حكايته ولا يهمك 
وعنها وراحوا جايبنه ورابطينه
وهوه طبعا هرش التيتة وقعد يزعق
حد ابن حلاااال ف أخر التوتير 
هيقولى اكيد قعد يستعطفهم ويقول 
وكتاب الله ما جيت جنب البت والحاجات دى
يؤسفنى ارد عليه
وأحبطه واقوله ... ابضنننننننن



دا سحيم افندى اسم الله عليه بدل ما يلم الدور 
شيطان الشعر قعد يهدى فيه 
ويقوله خلاص عندى انا المرة دى 
وسحيم يقول لا ممكن 
وقالهم بعلو صوته

شدّوا وثاق العبد لايفلتكم 
إنّ الحياة من الممات قريب 
فلقد تحدّر من جبين فتاتكم
عرق على ظهر الفراش وطيب


 

هاااااار أسود ومهبب 
طبعا سحيم مقلش مين الفتاة دى تحديدا 
يعنى كتر خيره 
لكننننننن العالم كلها نزل عليها سهم الله 
وكل واحد بقى مرعوب ف جلده
يا ترى هوه يقصد مين ؟
مين الفتاة اللى العرق والمسك معرفش ايه يا دى النيلة 
وغصب عنهم لازم يقتلوه 
عشان كدا وصلنا لمرحلة 
لا يسلم الشرف اسمه ايه دا من ايه



وتعالى يا سحيم يا إبنى لما نعذبك ونقّررك 
ونعرف تقصد مين يا وغد ؟ 
راح قايلهم .. 

إن تقتلوني تقتلوني وقد جرى 
لها عرقٌ فوق الفراش وماء
...
لأ بقى دنتا عاوز تنقتل فعلا



وبس راحوا مبتديين وصلة التعذيب 
وقعدوا يلسوعوه وهوه يقول 

إن تقتلوني فقد أسخنتُ أعينكم 
وقد أتيت حراما ما تظنّونا

ويقال انه غاظهم قوى قوى فحاولوا يشربوه خمرة 
عشان يعترف مين البنت اللى كان يقصدها ف شعره 
لكن هوه مقلش 
وعدت جنبه واحدة الظاهر يعنى
كانت حبيبة سابقة او معرفتش تكون حبيبة اصلا
 المهم الست اتفرجت عليه وهوه مربوط وبيعذبوه
قعدت تضحك راح قايلها

فإن تضحكي منّي فياربّ ليلة 
تركتك فيها كالقباء المفرّجِ 
.. 
القباء يا ولاد يعنى حاجة زى العباية كدا 
بتتفتح م النص


 
قصره .. سحيم لقى الموقف منيل 
وحب يكسب وقت باى شكل فوعدهم انه تانى يوم
 لما يرتاح شوية هيقولهم على كل حاجة
فالناس وافقت وقالوا ماشى !



وعدت الليلة الزرقا دى 
وتانى يوم ف عز الضهر الاحمر 
اتلم الجمع الغفير عشان الولا سحيم يعتيرف بكل حاجة 
قوم اييييه ؟ 
راح واقف ف النص وقايل

"يا أهل الماء ، ما فيكم امرأة إلا قد أصبتها

إلا فلانة فإني على موعد منها "

وشكرا

 
الراجل قالهم بمنتهى الوضووووح 
يا مستوقد مفيهوش راااجل 
وخلاص كدا جاب ضرفها ولازم ينقتل ملهاش حل
وابو الفرج الأصفهانى قال بالحرف ..
" أنّه حُفر له أخدود وألقي عليه الحطب فأحرق " 
كدا بالنص عملوا حفرة و حطوا حطب ونار
ورموه فيها ومات محروق
وبس كدا لا جنازة ولا كلمتين رثاء 
وبالمرة لا عزاء للسيدات 
سيدات ايه اللى هيصوتوا عليه ان شاء الله 
دا هيا فلانة واحدة اللى لم يصبها 
وكان واخد معاها معاد كمان .. !!!
وبس خلاص خلصنا حكاية الشاعر بن بنى الحسحاس 
وأنا حسحس وحسحس انا ... !!
 
  

نقول بقى الملاحظات ..

1) كلاكيت للمرة المليون العرب زمان 
كانوا ناس فُللى
 وفرى وسبور واحنا على رأى @neversaydiee
اللى كنا فاهمينهم غلط



2) كل ما اقرى او اسمه قصص عن لون البشرة 
واستعباد البشر والعقد اللى بتسببها الحكاية دى 
بحس قد ايه البنى آدم دا مخلوق عجيب .. ومعقد
يعنى الضعيف ف قصتنا قدر رغم وضعه
 انه يتفوق على الاقوى ف زمانه .
واسمه هوه اللى يتخلد بينما 
هما يروحوا ف النسيان هما واللى زيهم ..



3) سحيم رغم طولة لسانه وقلة أدبه ..
 الا انه ف عمره القصير وموتته البشعة نجح
 يسيب بصمة بقصايده القليلة بين الشعراء الهجناء
كما كانوا يسموا


4) الكبت ويحش . البنات زمان لما كانت بتتحبس 
كانت بتعمل بلاوى سودة 
والأبهات بتنطش لحد ما تصحى ع المصيبة
وتقلب الحكاية بغم ليه يا جماعة
ما اللى يحب حد يتجوزه وهيندممم 
واللى يتغزل ف واحدة يشرب المقلب لأخره وسيبوه 
بكرة هيقول حقى برقبتى والنيعمة
والأبهات تلم الدور 
عشان بتيجى تلم البنطلون الجاكتة بتضرب يا حاج 
وبالموناسبة بقى ...


5) سحيم قال انه كل حريم القبيلة عدت عليه الا فلانة
أوشكت وكاااااد أن يعنى .. 
وعندى فضول معرفش فلانة تبقى مين 
لكن الفضول اعرف كل واحدة غير الفلانة .. 
رجالتهم بين قوسين مشوها رجالتهم 
عملوا معاهم ايه؟



6) الواد دا اتولد ف زمان غلط 
لو كان على أيامنا كان زمانه عنده حساب على توتير 
ولا ع الفيس بوك ولا عمله برنامج ف فضائية 
وقال كل اللى ف نفسه وشتم وأفترى وشنّع ع الناس 
وعرض مكالمات واسماء وهتك اعراض الناس عادى 
لا حد جه جنبه  ولا زعله ولاضايقه 
ولا حاجة خالص وكان قعد يقول ثكلتك مامتك
لحد الفجر ولا حد هوّب نواحيه ...  !


7) حاجة م الأتنين 
يا الولا يا بيتكلم جد 
وكدا القبيلة كلها لازم تولع معاه ف الحفرة
يا شكله كان بقيق وبيهرتل وكدا يبقى العقاب ظالم
ف الحالتين مكنش غلطان لوحده
وكدا يبقى مات 
ضحية لسانه 
وهذا يقودنا لأخر ملحوظة



8) اللى يقولك الجملة دى صدقها لأنها حصلت فعلا
من الشعر ما قتل ..


وتوتة توتة 
خلصنا الحدوتة

-----------------------------------


الصبح قرب @Fatoma999
طب والله شاطر, الاقربون اولى
,ويبص بره ليه,بص جوه الاول يا موورسى
 :)


الصبح قرب @Fatoma999
 يتجننوا كده على رؤس الاشهاد,
 بس جوا يعدوا طول الليل يتفرجوا ع الاورربى
:)) #امجاد_يا_عرب



الصبح قرب @Fatoma999
بس سحيم ده ولد.. رغم ضجرهم منه..
الا انه متمسك بحرية التعبير 
:)



الصبح قرب @Fatoma999
 يااااااااااختىىىىىىىى!!!!!! 
الواد دا لو على ايامنا كان حمل لنفسه 
فيديوهات على اليوتيوب الناقص
 :)


                  Rasha @neversaydiee

              هو العرب واضح انهم كانوا ناس فري 
                                 ومبحبحينها 
                        واحنا اللي فاهمنهم غلط




                     ( ندّ فرسآنْ ) ،،،، @alfaisal112 
                      يخرب بيته ،،،، طلع سياسي محنك
                                  ودبلوماصي،،،

               Octmohamedzaky @mohzaky25
             " يا أهل الماء ، ما فيكم امرأة إلا قد أصبتها 

              إلا فلانة فإني على موعد منها .. وشكرا" 
                    ده بقي كان مقطع السمكة وديلها



ʎqɐɹɥƃɐɯ-lɐ ɯɐɥʇʎɐɥ @H_Almaghraby
انت في ليلة 
لازم تحكي علي انواع الزواج عند العرب في الجاهلية
 عشان الناس تعرف قد ايه الناس دي فلة شمعة منورة 
وكانوا سبور 
:)


@H_Almaghraby
 فيه بنات قاعدة يا عزيزى اخاف يجرالهم حاجة 
او يقطعوا علاقتهم بيا 
:))

 
ʎqɐɹɥƃɐɯ-lɐ ɯɐɥʇʎɐɥ @H_Almaghraby
 الاحتكام لشيخ القبيلة لما يكون مع شخص وضيع 
ولكن لو شخص صاحب شئ كانوا بيحتكموا للكهنة 
ودول كانوا في اليمن بيسافروا يحتكموا عندهم



 ‏@ahmed_nafa
والله هي البصمة الي سابها انه علم ع حريم القبيله


Captain Haddock ‏@hassan19211 1d1
حياته ومماته هو وسادة قبيلته الجائرين تدل 
على ان الانسان تافه يتكدر ويتعوق لتفاهه 
ومتخيل نفسه مركز الكون فداير يبهدل ف البشريه!
ومين قال العبوديه انتهت؟
 التمييز فى ايامنا مش عبوديه؟

هناك تعليق واحد:

  1. الله يسعدك ويفرحك زى ما بتسعدينا .حكاياتك وأسلوبك

    ردحذف

Related Posts Plugin for WordPress, Blogger...
"حقوق الملكية والملوخية والمهلبية ... الخ
محفوظة للست شهرزاد وإياك حد يسرقها ويحاول يزعلها آغجر .. مفهوم ؟ "