الخميس، 6 نوفمبر 2014

احتفالات قناة السويس






قصة الليلة دى 
ممكن نختصرها ف جملة واحدة
 قيلت على لسان احدى وأهم شخصيات الحكاية
 لما قالت
 " لم نصرف شيئا بالمرة خلال هذه الرحلة "



- مين دى اللى قالت كدا ؟
- الست المزغودة أوجينى -
وليه كدا يا شهروزة تشتميها ؟
- معلش أصل بينى وبينها مشاكل
- عملت ايه؟
- هنقول اهو







بيقولوا ان الحاج نابليون بونابرت لما لم جيشه
 وجه مصر محتلا كان ف دماغه يربط ما بين البحرين
 الاحمر والأبيض المتوسط
 ويخلى ليلتنا بمبى
بس الشعب المصرى الويحش عكنن عليه من ناحية
وأروبا روخرا عكننت عليه من ناحية
 الراجل حط ايده ف الشق منا
 وقام راجع على فرنسا وسحب جيشه
بعد 3 سنين من النهب المنظم وبعد ما خرج هوه
 ومن خلفوه ف القيادة شايلين ومعبيين
 من كل ما غلى ثمنه وخف وزنه واحيانا ما ثقل كمان
 قوم ايه







فكرة تنفيذ الربط بين البحرين اتأجلت
واتركنت على جنب 
 




لحد ما جه الاخ ديليسبس
حاملا رسومات المشروع تحت باطه
وبتوصية من كبرات اروبا عرض الفكرة تانى
المرة دى عرضها على الوالى سعيد باشا اللى وافق
 ومضى معاه التعاقد المجحف كعادتنا ف الشرق
وف سنة 1859 راح ديليسبس يشق أرض القناة
 بأول ضرب فاس 




انجلترا وقتها زمزقت ورخمت
لكن الست اوجينى امبرطورة فرنسا ف هذا الحين
 اتدخلت واكمن ديليسبس كان قريبها
 و اكمن كمان فرنسا لازم تغلس على انجلترا
 عشان الضدديات القديمة بتاعت الحريم اللى كانت 
شغالة ما بينهم  دى .. ف بسط النفوذ والسيطرة
المهم
الموضوع مشى




وبدأ العمل على قدم وساق
وعلى ارواح الشعب كمان القناة قعدت 10 سنين
من 1859-1869  وطولها كان 165 ك.م 
وعلى ما خلصت اشتغل فيها ييجى مليون نفر
ومات اكتر من 125 ألف نفر منهم !







اثناء الـ 10 سنين حصلت تغييرات كتير ومهمة
 زى موت الوالى سعيد 
وتولى الخديوى اسماعيل الحكم
 ف خطوة غير متوقعة بعد موت اخوه الكبير
احمد رفعت ف حادثة قطر بكفر الزيات
واللى اتطرطش كلام انها مدبرة 
عشان اسماعيل هوه اللى يمسك ومحدش أثبت كدا 





وسماعين يا خويا يا دوب اتلايم ع الكرسى
وقرر يخلي وراثة العهد ف اولاده هوه وبس
ويمنعها عن باقى العيلة 
وبدأ يشتغل على تقيل ف هذا الاتجاه
ومن ضمن طرقه ف هذا .. انه يوطد علاقاته
بملوك واباطرة اروبا عشان كان عارف
 ان القرار السياسى الحقيقى ف ايدهم
مش ايد الباب العالى اللى كانوا يقولوله امضى يا أشول 
يمضى علطول
مكنش حاسس بقى بالمغرز اللى مترتبله 
وفخ الديون اللى بقى حفرة ملهاش قرار 




اسماعيل اصلا وهوه صغير سافر اروبا
 يتعالج من مرض ف عينه
وبعدين سافر وهوه شاب ف بعثة الانجال
 عشان يتعلم فنون العسكرية ومن وقتها 
وهوه متعلق بالغرب جدا
لما وصل لكرسى الحكم قرر يخلى مصر قطعة من أوربا
 وابتدى المشروع دا برحلة لفرنسا
وهناك نزل ف ضيافة امبراطور فرنسا ومراته 
ولنا .. هنا .. وقفة









الا مراته دى هيا اللى مضايقنى قوى قوى قوى الصراحة
 الست اوجينى اللى بيقولوا
ان اسماعيل وقع ف غرامها
ومش عارفة على ايه يعنى 
والموضوع مش غيرة على اسماعيل اكمنى بحبه وكدا 
أبسولوتلى دى محض نفسنة حريم وبس 
#اه_والله




الست اوجى واضح ان كانلها تأثير ع الرجالة
 لإن قصة اعجاب اسماعيل بيها موجودة ف مصادر كتير
 ومش هيوه بس
 دول بيقولوا السلطان العثمانى كمان اتذهول !!!





والموضوع زى ما قريت ف كتاب 
بيشرح المسألة
ملخصا ف ان اسماعيل كان عايش ف دور فرسان
 العصور الوسطى اللى بيقعوا ف غرام فتاة ما
 ويهيموا على روحهم بقى
حب ف المطلق كدا .. مش لازم ينتهى بجواز
 نظام عشق الروح ملوش آخر
بس يؤسفنى اقول ان ف حالة اسماعيل كانله اخر
وزى النيلة على بوزها الناشف  .. هه





القصد ..
سمعة حب اوجى حب فرسانى من بتوع زمان
وقرر يعزمها ف مصر ف اقرب فرصة
 عشان يعبرلها عن امتنانه ومحبته وتقديره
 الخ 
وكانت المناسبة هى الإحتفال بأفتتاح قناة السويس
واللى قرر اسماعيل يخليها حفلات اسطورية يحكى
 ويتحاكى عنه الناس لميت سنة قدام
وقد كان ... 
 :)





والتفاصيل كلها من هذا الكتاب ... يا عيال





الترتيبات للحفلة بدأت من بدرى قوى
 كان اهمها لما المخسوف اسماعيل قرر يبنى قصر
 للست اوجينى على الظراز الاندلسى 
ليه يا شهروزة ؟
 قالك عشان يفكرها بمسقط راسها
اللهى ما توعى تقيم راسها البعيدة
 قوم بنالها قصر الجزيرة على النيل 
اللى ف جزيرة الزمالك 





مش بس كدا
دا الخديوى  اختار الزمالك تحديدا
عشان تبقى بعيد عن العالم بتوع عابدين الويحشين
 ليعملوا ف البنية حاجة اكمنهم كانوا قارشين ملحتها
وشايفين الحاج ولهان فيها
 



وبنى كوبرى قصر النيل مخصوص  لحضرتها
آل عشان ميصحش نعديها ف مركب .. من بر لبر ..!






ومش بس كدا 
دا كمااااااان بنالها استراحة ف طريق الهرم
عشان لما تروح تزور المنطقة تقعد فيه !
الاستراحة دى يا عيال بعيديييين
 بعد تعديلات وتوسعة هتتحول إلى فندق مينا هاوس





 اما قصر الجزيرة فهيتحول بعدييييين
إلى فندق عمر الخيام 





ثم ...  الماريوت








وطبعا غير الاوبرا اللى اتبنت 
عشان يحضروا فيها كل الضيوف 
اول حفلة على شرف الحدث الجلل ... 
ومكانها معروف طبعا قبل ما تتحرق 
بـ .. ميدان الأوبرا 





الملخص انه الاستعداد ف القاهرة مكنش هوه الاهم
 قد ما كان خط القناة
هوه اللى ترمى فيه الملح مينزلش
والحكاية بدأت ف بورسعيد لما اتبعتلها أمر
هيا واسماعيلية والسويس بإخلاء الشوارع العمومية
 وطرد الغرباء منها وتعليق الزينات
 والتنضيف و دهان الواجهات وشيل المصاطب
ورص قصارى الزرع اللى  طبعا هتتشال بعد شوية
لما يمشوا الزوار 
وانتوا هارشين بقى الموال دا .. 



بيقولوا ان اسماعيل بعت لأوربا يتعاقد مع 500 شيف
لأعداد اشهر المأكولات الغربية
 بجانب طباخينه الخصوصى ف القصور
وبعت يجيب النبيذ واللحوم والاسماك
وكميات تلج خرافية عشان تحفظ كل حاجة
 وأمر بترتيب اماكن للضيوف اللى جايين
 كام واحد يا شوشو 200 او 300 او ألف حتى .. ؟؟؟



لا لا يا بابا لا
 دا احمد شفيق باشا ف مذكراته قال
انهم كانوا فوق الـ 6 الاف نفر 
غير اهل البلد حضرتك
 وكله اكل واتفسح على حساب صاخب الميخل
اللى هيا فلوسنا وعرقنا ودمنا 




الناس اصلا من قبل موعد الافتتاح
 وهما بيستعدوا للحضور ف هذا الحدث المشهود
وخط القناة ع الناحيتين اتزحم بالبشر 
 ولحسن الحظ ان الخديوى كان عامل ترتيبه
قصور وبيوت الكبرات والعمد وطبقة الافندية والأجانب
 كانت بيوتهم مكان لأستقبال كبار المدعوين




 اما الباقيين فتم نصب خيام لهم 
على طول ضفتى القناة





وأمر فيالق من الجيش بتطويق الاماكن المهمة
 لمنع أى شغب
 وامر كمان بصرف زى من الجوخ مخصوص
 للمناسبة دى وعمل جو كدا فخيم واخر ابهة 
كان فييس والله
بس ياريته كان فييس بفلوس ابوه 
مكنش نطقنا ولا فتحنا بوقنا ... !




قصره ...
حضور المناسبة دى كان تاريخى
وزى ما قولنا بالألآف من الاجانب
 اما ولاد البلد فالخديوى أمر بأن يكونلهم تواجد برضو
ازاى ؟
 اسماعيل بعت لمديرى الأقاليم وقالهم ابعتوا الأهالى
 بستاتهم وعيالهم وبهايمهم
 يعملوا جو فلكلورى كدا حيلو 
ودا اللى حصل فعلا وانتشر الأهالى من عربان
وصعايدة وفلاحين على طول القناة بخيولهم وجمالهم
وخيامهم واعشاشهم الخ





كل العالم دى جت من جوا مصر
 طب ماذا عن بتوع بلاد برا
مين كانوا وايه حكاياتهم ؟؟
 بقول احنا نبدأ بلى محضرش الأول 
السلطان العثمانى 
ودا يبقى الحاج عبعزيز التانى
 اللى كان سلطان الدولة العثمانية اللى مصر تابعة لها
 وبيقولوا انه مجاش غيرة وتوجسا من سمعة ! 
توجسا عشان كان عنده مخاوف من ان اسماعيل
يستغل حضور كل الأباطرة و بتوع اروبا ف مصر
 ويعلن استقلاله بالحكم عن تركيا ف لحظة طيش
فقال نقطع عليه الطريق 
زائد ان اسماعيل مكنش عاوزه ييجى فمعزموش رسمياً
ولما سألوله معزمتوش ليه .. ؟
رد بدبلوماسية المكر والدهاء والصياعة 
ازاى هعزم اهل البيت ف بيتهم .. !
#آصاااايع 




طب دا توجسا الغيرة ليه بقى ...  ؟
الحقيقة ان فيه طراطيش كلام عن انه (عبعزيز)
 كان راخر معجب الست اوجينى نينى كونينى
 وبصراحة لأنى متغاظة م الولية دى 
فمش هعلق 
عشان مقولش كلام آبيح ... هه





قصره الحاج مجاش
 لكن بعت تحياته مع مخصوص
اما  اللى جم فخد عندك ...
 الإمبراطورة أوجينى إمبراطورة فرنسا
 وفرنسوا جوزيف إمبراطور النمسا 
ملك المجر
وولى عهد بروسيا
والأمير هنرى شقيق ملك هولندا
وسفيرا إنجلترا وروسيا بالآستانة
 والأمير عبد القادر الجزائري
وطبعا ديليسبس ونوبار باشا
والأمير توفيق ولى العهد وامراء الأسرة العلوية
 وكبارها واهل القصور والحاشية والصفوة
 كله كان ف صدر المشهد
وبيقولوا اسماعيل وصى على طلمبة مخصوص
 تحسبا لأى حريق وادهنت بنادق العساكر وأسلحتهم
 وكله لبس جديد ف جديد 
واستعدوا لليلة الكبيرة 




المعاد الرسمى للافتتاح كان ف 17 نوفمبر 1869
 لكن طبعا الضيوف وصلوا من قبلها
 وكانت اوجينى اول الحضور
 جت امتى الموكوسة دى ..؟
جت 23 اكتوبر
الاول اتحركت من فرنسا وسط حاشيتها
 اللى عدد الخدم فيهم بس كان 30 خادم وكوافير
وطبعا طقم حراسة
 وعدت على تركيا اولا
سلمت ع الحاج عبعزيز
الا يكون واخد على خاطره ولا حاجة



وراحت مكملة على اسكندرية الماريا
وف المينا استقبلها ديليسبس وقنصل فرنسا وغيرهم
والجالية الفرنسية كانت عاملة استعدادت
 وحفلة على شرف حضورها
 ولما راحوا المينا لقوها ركبت قطر الساعة 11
وخلعت على القاهرة ونفضتلهم 
فانقمصوا
وفيه ناس كاتبة ان اوجينى بعد وصولها القاهرة
 سافرت فورا على بورسعيد
وناس تانية بتقول انها اتفسحت شوية قبل ما تروح
وانا أرجح الرأى التانى
لأن بين وصولها وبين حفل الافتتاح وقت طويل
كانت بتعمل فيه ايه يعنى غير انها تتفسح على قفانا






واسماعيل الصراحة مخلاش ف نفسها حاجة ..
بيقولوا اخدها تزور الاهرامات
وعبدّ الطريق مخصوص 
ونقل شجر من شبرا وغرسه ف السكة 
عشان الشمس متضايقش المضروبة ..!
والخبثاء بيبالغوا 
وامعانا ف حرق دم زوجات افندينا
قالوا انه لما امر برصف طريق الأهرامات 
قالهم خلى فيه ميل شوية ف منطقة ما 
آل عشان الست اوجينى ف المنعطف اياه
تقع ف حضن الخديوى .. عفويااااا 
ويختشى على شغل العيال بتوع ثانوى دا .. ؟!





 ويقال كمان انه جوز واحد من الحاشية بتاعته مخصوص
عشان قالت ان نفسها تحضر فرح مصرى 
فعملها الفرح ف ليلتها
 وكان ف قصر الوالدة باشا القصر العالى
وهيا حبكت ... الليلة يا عمدة  ! 
وبيقولوا زرعلها شجر كرز تحت بلكونة اوضتها
عشان عرف انه بتحبه ومفتقده ريحة زهره ...
واداها هدايا ودلعها دلع مرىء كدا ومخلهاش تدفع مليم
 ف أى حاجة لدرجة انها بعتت لجوزها 
تقوله
لم نصرف شيئا بالمرة خلال هذه الرحلة !




بالمناسبة وعلى الهامش 
مش بس احد قاطنى قصر الخديوى 
اللى اتجوز ف الأيام دى 
ديليسبس نفسه حضرتشك عملها
ف بورسعيد ف احدى الكنايس يوم 25 نوفمبر 
هيتجوز وظوظوة ف العشرين
ويلا ادينا بنحتفل ونهيص ونشهيص
#احتفالات_يامه_ياهبة




 وبس حضرتك .. خدت جولتها الأولية
 وبعدين طلعوا على بورسعيد عشان يحضروا الحفلة
هناك هتنزل اوجينى ف ديوان محافظة القنال
 اللى امر اسماعيل بتجهيزه لاقامة الأمبرطورة فيه
 اثناء الاحتفالات واشرف عليه بنفسه 
وعلى تجهيزه واثاثه 
 


وف الصباح الباكر قبل تحرك الموكب من بورسعيد 
لاسماعيلية ع الصبحية كدا
هنلاقيهم عاملين  احتفال (دينى)
 واتكلم فيه موفد البابا ف قصر الحكم الفرنسى ..
 وشيوخ من الازهر




ويقال ان التلات منصات كان متوزع عليهم الضيوف
 بشكل منظم الخديوى واوجينى والأباطرة
والملوك ف منصة
 رجال الدين المسيحى ف منصة 
 والشيوخ ف منصة



المونسينيور (بلرو) او مرشد القصر التويلرى
 كما سماه المؤلف قعد يعظ الحاضرين
 ويشيد بالتقاء الحضارات ف هذه البقعة
وأشاد بالخديوى اسماعيل وانجازاته
 ثم ناشد شيوخ الدين الاسلامى بالصلاة
عشان تبقى الحتة دى مجمع للأديان




وبعدين الظاهر خدته الجلالة ع الاخر واندمج
 وراح قايل لاوجينى ف نبرة مسرحية
 " روحك الشجاعة تفعل أكبر الاشياء فى صمت " 
ينيلك انتا وهيا ... دنا اللى بقول !!!






واثناء الفسح الخديوية مع الست الاوجينية
كان الضيوف الكبار جم من اروبا
 واتحركوا تباعا لبورسعيد

 



ومن هناك هيدخلوا بسفنهم على مدخل القناة
والموكب الملوكى بدأ بيخت المحروسة
 ثم تلاه يخت النسر بتاع اوجينى
وتلاه يخت امبراطور النمسا وباقى اليخوت 
اوجينى ابدت اعجابها بالزينة الممتدة على طول الطريق
 واللى مكتوب فيها كلمات للتحية وهتافات باسمها





وطبعا مش كل اليخوت دى كانت رسمية منها
مراكب تجارية عادية لكن جت تحضر المناسبة
 وكله مشى ورا بعضه ف نظام وانتظام ودقة




بعد ساعات كان الموكب وصل اسماعيلية
ورسى على بحيرة التمساح
وانطلقت الطلقات والهتافات
 ابتهاجا بوصول الضيوف وكدهون 
اوجينى وديليسبس كانوا على متن يخت النسر
 الخديوى اسماعيل بمجرد وصولهم اسماعيلية
ساب يخته وطلعلهم يستقبل اوجينى
 ويحيها تحية مخصوصة هيا واللى معاها 
وألف مبروك يا ابو سامية
الله يبارك فيك يا حاج ابو حنان
 قناة سعيدة ان شاء الله وعقبال الانجال
وفيه بوفيه 
ولا هتوزعوا بونبنيرات وكوباية الشربات وهنروح ..؟





لأ إزااااى ... طبعا فيه بوفيه
 وجايبلكم طباخين من فرنسا
وايطاليا وهتتعشوا وتملوا كرشكوا 
بس عالله يتمر ف اشكالكم  .. ! 
#مش هيتمر يا ابو توفيق 





و بعد ما خلاص عدينا ييجى نص القنال كدا
 والخديوى هينزل ف قصره اللى اتبنى للمناسبة دى 
واللى هيتزين ويلالى ف عز الليل
 




 بعد ما تبدأ الحفلة اللى عملها اسماعيل لأوجينى
 والضيوف وهنشوف رسومات لمأدبتها العامرة
سمعة جاب مخصوص رسامين 
عشان يوثقوا الأيام التاريخية دى بالصور 
مكنش لسه التصوير انتشر بقى 






وبيقولوا ان ليلتها اسماعيلة كانت لؤلوة
 واليخوت والدهبيات بتاعت الأعيان كانت منورة ف القناة
وكأنها نجوم ف السما الزرقا






تانى يوم الصبح الست اوجينى ركبت الجمل
وراحت ترد الزيارة لأسماعيل




 وف رجوعها من عنده 
زارت بيت قريبها .. ديليسبس الشهير
بلد ابوهم اصلها 
واللى لا زال ف مكانه باسماعيلية حتى الآن 






وبليل اتعملت حفلة تانية على شرف الست جوجو
 ورقص وشرب وضرب نار حتى الصباح الباكر يا معلم
واحمد شفيق بيقول ف المذكرات بتاعته







" "فى المساء اقيمت سهرة راقصة اعقبها مقصف
 حوى اطيب المأكولات وافخر المشروبات
 فى كرم منقطع النظير"
 بيذلهم بالبوفيه وكدا
 جدع ياض 



الليلة دى كانت 18 نوفمبر يوم تسعآشر بقى
 التحرك الجميع للسويس ف المراكب واليخوت
عشان يوصلوا لآخر المهرجان
وهناك ينضرب الطلقات ف السما ايدذانا بختام الحدث
 وخلاص كله بيتك بيتك ويروح
 الا ...




الا طبعا الست هانم اوجينى
اللى قالت عاوزة اتفسح كمان .. ممكن ؟
 اسماعيل قالها بس كدا
 انتشى تشؤمرى آحياتشى 





وباقى الملوك والأباطرة والامراء رجعوا سريعا
 على بلادهم بعد ما حضروا افتتاح الاوبرا 
وحضروا اول حفلة فيها 



 
اوجى قعدت شوية .. رجعت قصر الجزيرة
 ومنه اتفسحت ف القاهرة وخان الخليلى
وبيقولوا انها لفت شوية ف الدلتا
 قبل ما تروح على اسكندرية عشان تسافر 
 وشافت فلاحة لابسة ملس فعجبتها قوى
راحت مشترية منها الملس 





واخر المطاف كان  اسكندرية
قبل ما تركب اليخت وتسافر
 الجالية الفرنسية عملتلها حفلة فأختشت على دمها
وحضرت المرة دى .
وودعها اسماعيل اخيرا
بعد ما اداها هدايا السنين وعملها حفلات ليلاتى 





واخد منها وعد
 بزيارة قريبا لمصر
 والست قالت ايوه
 مكنتش تعرف بقى اللى هيحصل بعدين 
ايه اللى حصل ... ؟
هقول اهو بس الاول نقول الاهم 






حفل افتتاح قناة السويس يقال انه اتكلف شاكب راكب
 فوق المليون ونص جنيه .. فلوس وبس
 محدش لسه اتكلم عن التكلفة البشرية الباهظة
اللى متتقدرش بأى تمن ولا تتعوضشى 






والمؤسف 
وليس بمستغرب انه محدش
 طول الحفلات دى جاب سيرة الفلاحين
 الأدب سيس الغلابة اللى مات عُشرهم ف حفرها
 ومخدوش من خيرها حاجة لا وقتها ولا بعدها 
لعقود طويلة 


والحقيقة ان قدر الظلم 
اللى شافوه الغلابة ف حفر القناة
كان وبال على اصحاب فكرتها وتنفيذها فيما بعد
 وسريع سريع والله
 ربنا اسمه الحق والعدل ... 
وشوفوا كدا القايمة ومآل اصحابها 






صاحب تنفيذ المشروع 
 ديليسبس وحش الصفقات وبرنس القنوات
 بعد ما ساب مصر عمل شركة لحفر القنوات
سنة 1880 تقريبا 
بناء على سمعته العالمية وافتكر انه هيلم لم ويهيص
واتعاقد على قناة لربط المحيطين الهادى والاطلنطى 
اللى هيا بقت دلوقتى (قناة بنما)




الشركة دى طبعا مكنتش ف مصر
وبالتالى مشغلوش الناس سخرة زى عندنا
 وواجهتهم ظروف خاصة بالتربة والأمكانيات
وبعد 8 سنين افلست الشركة وانهارت
والمساهمين رفعوا قضايا واتحكم على الكل
 فناس اتسجنت منهم ومنهم ابن ديليسبس
 وناس انتحرت
 وديليسبس نفسه اتحكم عليه بالحبس



 

 ولسنه الكبير اوقفت العقوبة 
كان عدى السبعين مستريح
وف سنة 1894 هتاخد شركة فرنسية تانية الصفقة
 وتحفر قناة بنما 
وينهار اسم امبراطور القنوات للأبد




 اما ف مصر فبعد ما اتعمل شارع باسمه
ويتعمله تماثيل ف بورسعيد 






وعلى مدخل القناة





 هييجى العدوان الثلاثى 1956
ويتنسف تمثاله من مطرحه ... ويتهزأ قوى الجدع ! 




الخديوى اسماعيل بقى انتوا عارفين اللى جراله ..!
 بعد تكالب الديون على مصر وسياساته النيلة
 هيتلم عليه الكبرات اللى اتحامى فيهم 
ويسقطوه
ويزقوا الباب العالى يبعت لسمعة فرمان
 بتنحيته عن العرش وتولية ابنه توفيق مكانه
 ويرحل اسماعيل عن مصر بعد الفرمان بـ3 ايام 
حزين  مطرود 1879 ومتتكحلش عينه برؤية مصر 
اللى عمل فيها سوى وخلاها زى ما اتمنى ...





عبعزيز .. السلطان العثمانى نفسه
 واللى مجاش اصلاااا
 لكن بعت تحياته فقط مع سفير انجلترا 
 اتخلع هوه راخر سنة 1876 ومتحملش الصدمة دى
وراح منتحر 
وناس بتقول انقتل وخلوها انتحار 
فمشوه انتحار لحين اشعار اخر ...


الواد رودلف ولى عهد النمسا يا كبدى
 حب بنت من عامة الشعب واهله موافقوش
 قوم الولا شال ف نفسيته قوى
 وراح ف كوخ للصيد للتنزه ف يوم
وخد معاه البت اللى بيحبها
وراح ضارب على راسها رصاصة قتلها
 وبعدين صوب المسدس لدماغه
ومع السلامة انتا م الاحرار يا رودلف .. !






مرشد قصر التويلر ومندوب البابا زى ما قالوا عنه
 اللى وقف ينخع ف الكلام دا
 يقال انه اتجنن والناس شافته ف غابة ف بولونيا
 قرب مستعمراة العراة بيهذى
وبيؤدى التحية العسكرية لأى حد بيشوفه ف طريقه .. !!!




 اما الزغلولة الكبيرة
 الست اوجينى هانم امبراطورة فرنسا
محطمة قلوب الرجال أديلو بقى 
الست بعد ما رجعت فرنسا
هما شوية كام شهر
 واتنين م اللى كانوا قاعدين معاها 
على ترابيزة عشا واحد وبيضحكوا ولا ف دماغهم
 هيتأمروا عليها وعلى جوزها 
وهيقوموه من فوق الكرسى مطرودااااا






وفجأة قامت الحرب السبعينية نسبة لسنة 1870
 اللى هتنتهى بأسقاط عرش امبراطور فرنسا
 نابليون التالت وهتهرب اوجينى من قصرها 
زى الحرامية متخفية
تهرب على انجلترا بعد سفراء ايطاليا والنمسا
 ما يحذروها من مصير مارى انطوانيت وبسكويتها
 جوزها هيموت بعد سقوط عرشه ب3 سنين محسور
 وابنها هينقتل ف رحلة صيد ف افريقيا
وهيا هتعيش ف بنسيون حقير ف انجلترا
وتنتقل ف اروبا من بلد لبلد حسب ظروفها الزفت
 وتقعد تتفرج على سقوط الامبراطوريات من حواليها
 لعقود ..!







وبيقولوا انها زارت مصر سنة 1904 او 1905
 ونزلت ف فندق متواضع ف بورسعيد
ومقالتش هيا مين لكن جت تستعيد الذكريات ! 
وقبل رجوعها لأروبا زارت مرات الخديوى
 عباس حلمى التانى
 وحافظ ابراهيم مفوتش المناسبة دى
وكتب قصيدة يلسعها بيها
يقولها ف مطلعها 




 اين يوم القنال يا ربة التاج 
 ويا شمس ذلك المهرجان
 اين مجرى القنال أين مميت المال
 أين العزيز ذو السلطان؟


كنت بالامس ضيفة عند ملك
 فإنزلى اليوم ضيفة فى خان
واعذرينا على قصور كلانا
غيرته طوارىء الحـدثان





الست ربنا مد ف عمرها
 لحد ما شافت الحرب العالمية الاولى
وهزيمة فرنسا لألمانيا
 وفرحت طبعا بالعدالة الألهية دى من وجهة نظرها 
وقعدت لحد سنة 1920 لما عملت عملية
 وحصلها مضاعفات
 وماتت عن عمر 94 سنة يا ثااااامح !!!




وشوف الزمن عمل ايه ف كل الناس دى
 اللى جت تاكل وتشرب وترقص 
وتحتفل على جثث الالاف ماتت
 وهيا مش لاقية شربة مية ..
 وهييييييه دنيا غرورة يا زحمد
لا بتخلى الراكب راكب ولا الماشى ماشى !




وخلاص الحدوتة خلصت
 فاضل بس الملاحظات 
ومحدش يجيب العصايا انا هخلص اهو وامشى 
عارفة انى طولت عليكم
 #معلش






اول ملحوظة
غايظنى قوى  الراجل المهروش بتاع
 (روحك الشجاعة تفعل اكبر الأشياء فى صمت )
لولا اتجنن كنت قولت هاتوهولى من حواجبه .. !!
 نعمممم يا خويا
روحها ايه ونيلة ايه وهيا هببت ايه اصلاااام ف الحياة ؟
دى جت تتفسح وتتدلع وباى باى 
ولا هيا ولا غيرها انكسف على دم اهله
و افتكر الناس الغلابة
 اللى حفرت بدمها دى ولو بكلمة شكر
 يا كلاب !






2) الاخ امبراطور فرنسا دا حكايته ايه بالضبط ؟؟
 يعنى الموادم هايم ف حبها ناس كتير
سلطان وخديوى وما يستجد .. 
 واسماعيل بيبالغ ف الاهتمام والمودة 
 وبرضو عادى يبعتهاله وميجيش معاها كمان .. ؟
مخابرات فرنسا مكنش عندها علم بالغراميات المستترة دى
ولا نابليون كان عارف ومطرمخ عشان المصلحة 
ولا مكنش عارف بينما امة لا اله الا الله عارفة 
وعشان كدا سقط واتشال من على العرش 
ولا ايه نظامكو بالتحديد






3) اسماعيل راخر ..
 بيقولوا مداماته كانوا غيرانين 
لدرجة انه قعد الست اوجى  ف قصر لوحدها
 وبعت حرس مخصوص عشان يضمنوا 
ان اكلها ميتسمش م العوازل ولا حاجة !
طب يعنى اقول ايه
 ف طفاسة بعض الرجالة وفراغة عينهم ... ؟






كل الحريم اللى عندك و بتبص برا .. ؟
 طب اديك سبت الستات كلهم
 وصرفت ملايين ف الحفر والاحتفال 
وخدت اللى عتبتها طلعت فقر عليك 
وع السلطان العثمانى 
وعلى جوزها وابنها وفرنسا كلها 
وادى اخرة القرع لما بيمد لبرا ...






4) قصر الخديوى اسماعيل الفخيم اللى بناه مخصوص
 للمناسبة دى .. راح ف الوبا واتهد


  

بينما بيت ديليسبس فضل مثلا 
شىء مؤسف
لأنها قيمة معمارية بغض النظر عن صاحبها 
ولأنها فلوسنا برضو بغض النظر عن اللى سرقها







5) احدى المقالات ف التلاتينات نشرت
 ان اوجينى لما حبت تزور الاهرامات
 وقعدت ف جنينة الاستراحة تاخد نفسه
 وحضرت فرح جبت تدخن شيشة 
وبيقولوا انها تعدت المرحلة دى من تدخين الارجيلة
 وقالت نفسها  تشرب حشيش
 والله اعلم الخبر دا ايه مدى صحته
 بس على كل حال هيا جاية مستعدة للأنيحراف
ومتدهولة خلقة ... 



6) الواد بتاع النمسا اللى مات منتحرا 
عشان اهله رفضوا الجواز م السنيورة بتاعته 
طب انتا اكتئبت وموتت روحك 
تقتل البنية الغلبانة معاك
البت تموت ليه .. ليه .. ؟







7) قالك  اوجينى ماتت بعد ما عملت عملية
 فحصلها مضاعفات
 يعنى لو مكنتش عملت عملية
 احتمال كانت تعمّر اكتر
و 94 سنة يخربيت كدا !
ربنا يكفينا شر الحسرات مع أرذل العمر 






8) مكتوب ف اكتر من مطرح
 ان اسماعيل اهدى لأوجينى قبل سفرها .. مبولة !
 آه والله مكتوب كدا 
ومش فاهمة ايه الهدايا العجيبة دى ؟؟؟؟
" اهداها مبولة غرفة نوم .. من الذهب الخالص
 تتصدرها ياقوتة حمراء نقشت عليها عبارة بالفرنسية
 (عينى ستظل معجبة بك إلى الأبد ) " 
... نعممممممم




ايه الهدايا المقرفة دى .. اولا يعنى
 ثانيا .. الجملة الشاعرية الرومانصية دى
 تنكتب على حاجة زى دى ازاى .. ؟!!
 الناس اتجننت والنيعمة !
#جاتكم_القرف
ثالثاً الرواية دى لو حقيقية .. 
احنا عاوزين المبولة بتاعتنا
#حقها ولا مش حقها ؟




واخيراااا اسماعيل من بذخه الرهيب
 كان فيه قلة قليلة مندسة ف حاشيته كان عندهم ضمير
 وصعبان عليهم الفلوس اللى بتترمى ف الارض دى
 واحد م الوزرا  اشتكى 
وقال لأحد الاجانب:
 اننا نأكل يا سيدى احجار الاهرام حجرا حجرا
 فرد عليه الضيف:
 لا تهتم سنقرضكم المال اللازم لتشتروا منا الأسمنت 
لاعادة بنائها .. !





ودا كان مربط الفرس
 ف عرف الدول محدش بيسلفك الا عشان يتردله المبلغ
 اضعاف اضعاف
 وكل توريطة وفيها مصلحة لغيرك
عشان محدش يفرح بمساعدات الغير





واكم من ناس احتفلت وهيصت
 وقعدت تحلى ف وشها القبيح 
وتعمل لنفسها بطولات زائفة 
وتطبّل برقصاين مراجيحها ف الأعلام
 وف النهاية مصيرهم كان اسود
 وعقبالك يلى ف بالى 






وف النهاية .. نقولها تانى وعاشر
 اللى من حق اهل البلد دى خدوه
 ورجعلهم ولو بعد حين
 والطغاة فرحوا شوية ف الاول بما أتاهم 
 وبعدين اخدوا ما يستحقون
و مين يتعظ من التاريخ وحكاياته وعمايله 




والبت اوجينى صحيح اتبنالها قصر واستراحة 
واوبرا وكوبرى وافلام كدا 
امبراطورة وحلوة ودورت رؤوس الرجال
لكن ف النهاية  وشها فقر وعتبتها نحس 
وعلى رأى امى وجدتى 
 الستات قِرفْ و اقدام واعتاب
واسماعيل كان تعيس ف الحب والحكم 
عشان راهن ع اللى ميستاهلش 
وداس ع اللى يستاهل 
وبس كدا 
تصبحوا على ألف خير 


--------------------------------



هناك تعليق واحد:

  1. الله كانت وحشانى أوى كتاباتك و أول مرة أقرأ لك هنا فى شهرزاد .. أسلوبك رائع و سلس و دمه خفيف جدااا :) ......... بجد مبسوطة جدا أنى رجعت تانى و مبسوطة أنى بأقرا لك هنا .. دمتى رائعة و غالية

    ردحذف

Related Posts Plugin for WordPress, Blogger...
"حقوق الملكية والملوخية والمهلبية ... الخ
محفوظة للست شهرزاد وإياك حد يسرقها ويحاول يزعلها آغجر .. مفهوم ؟ "