الثلاثاء، 9 ديسمبر، 2014

حكايات مصرية ..... 16









الليلة دى .. حكايات مصرية قصيرة 
عن البلد دى واهلها





القصة رقم (1)



 من أحد أجزاء كتاب وصف مصر عن المصريين
 ازاى اتعاملوا مع المحتل الفرنسى اللى مكنتش أيامه كلها
قتل × ضرب




والحكاية تتلخص ف الآتى 
 احد الرسامين وكان اسمه ميشيل ريجو
 قرر يعمل لوحات تعكس ملامح المصريين
على اتساع الخريطة المصرية
 وعاوز نماذج بقى
وشغله طبعا كان تبع المعهد اللى عملوه مخصوص
لدراسة كل شاردة وواردة بمصر




وبالصدفة وصلت القاهرة قافلة جاية م النوبة
 اقصى الجنوب
 قشطة ؟ 
قائد القافلة تحديدا .. كان اسمه عبدالكريم
عجب ريجو بملامحه وقرر يرسمه
 عرض عليه الاول فرفض طبعا
بس اغراه بمبلغ كبير .. عبكريم وافق 
آه سقراط قالك الفلوس الفيلوس 
كل شىء ييجى بالفيلوس 
أومال 




ف المعاد المتفق عليه وبعد مفاوضات راحة جاية
 دخل عبدالكريم المرسم ومعاه ييجى من 10 لأتناشر نفر
 من القافلة بيحرسوه وكأنه جاى ينخطف
ريجو مركزشى قوى ع السبب
 والمهم نخلص وفين وفيييين
 لما اقنعه يمشى البودى جارادت بتوعه دولم
 واقعد يا حاج عشان نرسمك وخلصنّننننا 




عبكريم قعد وابتدى ريجو يرسمه صورة نصفية
 بالحجم الطبيعى والخطوط الاولانية هيه
 وعبكريم يقول ماشى كويس
 لحد ما بدأ ريجو يلون وعبكريم زى ما يكون 
مسكته الكهربا
وقعد يصرخ ويهلل وراح واخد ف وشه
 وجرى ع الشارع وعبثا يحاولوا يوقفوه
 وكل اللى طالع عليه يصرخ البيت دا فيه ناس
 سرقت راسى ونص جسمى الحقونى .. !!




بس ومحدش لحقه
وبس واللوحة باظت
 ريجو مش هيسكت ويروح يتفق مع واحد من البوابين
 كان بيحرس احد ابواب المعهد
والواد جه على مضض وبالأمر 
وقعد برضو يترسم متوجسا
وبعد الجلسة يخرج يحكى لأصحابه ازاى
انه كان ف بيت واحد فرنصاوى
 محتفظ بعشرات الرؤوس والاجساد المقطوعة للبشر
 وعادى خاااالص كدا 




وكل ليلة اصحابه دول ييجوا
سقفوا قصاد الباب عاوزين يخشوا 
عشان يتاكدوا انه مبيهزرش وبيسرح بيهم
وف مرة ريجوا عزمهم يدخلوا المرسم
 وكانت ليلة زرقا وطبق الأصل اللى عمله عبدالكريم
 عملوه الأصحاب




وريجو حكى ازاى انه عبدالكريم قبل ما يطفش
 كان جايبله ست نوبية من طرفهم تترسم
 والستجاية بالغصبانية وكانت مخضوضة
وقعدت  تقول للرسام ليه تاخد راسى
 ليه تشيل دراعى .. ليه كدا !!
الملخص انه المصريين وقتها
كانوا مقتنعين ان الرسام بياخد اجزاء منهم
وينقلها للصورة !
 وحتى الأقباط اللى كانوا بيدخلوا المرسم صدفة
 لأى سبب
لما كانوا بيشوفوا لوحة مرسومة لأحد القديسين
كانوا بينحنوا قصادها
وكأنهم متصورين ان اللوحة حية
 والقصة خلصت 




التعليق بقى ببساطة هوه
عبو كل اللى قال وبيقول ان الرسم والفن حرام
 وفيخلى وخلى ناس زى المصريين
 اللى علموا الدنيا الإبداع كله من كام ألف سنة
بالرسم والنقش ع الحيطان والمعابد
 وبعمل التماثيل
ييجوا ف لحظات تعيسة من عمر الزمن
ويتخضوا من حتة رسمة على ورقة متلونة بحرفية
ويفتكروها روح وناس حقيقية
فيتخرعوا ويجروا مذعورين
ويضحكوا علينا الدنيا 




ثانيا
 ريجو اندهش ان عبكريم جاى ف حراسة وخايف
لا ملوش حق ؟
هوه مش حضراتكم احتلال برضو
 ولا احنا ظالمينكم ومحصلشى
 واحنا اللى كنا مسافرين ولا حاجة ؟!! 







ثالثا
كتاب وصف مصر دا لحد النهاردة عامللى هسس
 الناس دى كانت بتدرسنا ونيتها تقعد للأبد
فسبحان الله غاروا سريعا 
واذا بالعمل العظيم دا
يكون التصوير الدقيق لشكل حياتنا
وكل حاجة ف بلدنا اللى ساعتها مكنش فيه حد بيعمل فيها
 أى جهد توثيقى بالبراعة دى
الزمن بيعلمنا ان مش كل البدايات التعيسة
تؤدى الى نهايات تعيسة ...
فعلا 




القصة رقم (2)



 من العصر المملوكى أيام السلطان برسباى
 والراجل دا كان هزوء قوى ومفترى
وف زمنه على وش امه النحس النيل مجاشى
 وحصل جفاف ثم مجاعة وطاعون وقصص فحلوقى كدا 
المهم ان الفوضى انتشرت والبلد فرطت منه
قوم زيه زى كل الحكام الطغاة
نظام اللى هوه لسه هنحقق بقى
 ونقيم العدل مفيش وقت 
والأستقرار اهم حااااااجة الإستقرارررر 
قوم ايه ؟




بص ف اوسخ رجالته ونقى أكلب كلب فيهم
 كان اسمه ايه يا شهرزوة ؟
 اسمه دولات خجا
وماله دا بقى ان شاء الله ؟
 ابضنننن 
 زالفل والعسل واليوستفندى





الباشا كان زى محافظ الوجه القبلى كدا
ثم انتقل للوجه البحرى
 وكان ظالم ومفترى ومطلع عين المواطنين
وزى الزفت ع القطران
 قوم برسباى لما احتاس راح باعتل
 ومسكه ولاية القاهرة
 والسبب على عهد ابن تغرى بردى اللى قال
 "كان رغبة السلطان في ولاية دولات خجا هذا
 بسبب النساء، لما يعلم من شدته وقلة رحمته وجبروته "
الله ....  دا جايلنا احنا بقى !!!




المهم ان دولات خجا اول ما مسك
 كان فيه مساجين محبوسين ف قضايا سرقة
 راح مديهم افراج بس حلف بأيمانات مغلظة
 لو شاف حد فيهم ف الشارع ليوسطه
الناس الى متابعانا من ظماااان عارفين التوسيط
واللى ميعرفش حاجة كدا توصفوها لعدوينكم
 بيقطعوا النفر من دول من وسطه بالسيف على حمار
وامعائه تتدلى قصاده عشان يبقى عبرة 





القصد .. سى دولات 
 " رهب إرهاباً زائداً، وركب في الليل، وطاف،
 وأمضى وعيده في السراق، فما وقع له سارق إلا وسطه،
فذعر الناس منه " 
مش بس كدا
بيقولك أمر الباعة ينضفوا الشوارع قصاد دكاكينهم
 ويرشوا مية واللى ميعملش كدا يتحبس
يعنى شغلهم بدل البلدية وغرمهم تمن المية
ف ايام الضنك والعوزة وجفاف النيل .. !
وكل دا كوم
 والحريم بقى كوم تااااانى






ابن تغرى بردى بيقول
 " كان يتتبّع النّسوة ويردعهنّ بالعذاب والنّكال "
قالك الباشا منع الستات تروح الترب يوم الجمع
 والمناسبات وابتدى يزنق عليهم
متخرجش الا الجوارى والأماء 
وتكشف وشها عشان متطلعش حرة وبتستعبط 
ولابسة جارية عشان تخرج غصب عننا وكدا !!
ولما معرفش يسيطر ع الحكاية دى 
 منع خروجهم خالص
وقال مشوفش ست واحدة ماشية ف أى طريق
 ومنع الحريم تخرج لأى مشوار وطبعا بقت ورطة
 #الله يمسيك بالخير يا حاكومة



الحاكم بامر الله كان ملسوع كدا برضو
 دولات خجا ميتخيرش عنه
 وكان عقابه بشع لدرجة ان الستات فعلا خافت منه
 وبطلت تخرج من بيوتها
ولو وقعت واحدة ف سكته صدفة كان مأساة
 " حتّى إنّه ظفر مرّة بامرأة وأراد أن يضربها
 فذهب عقلها من الخوف، وحملت إلى بيتها مجنونة،
 وتمّ بها ذلك أشهرا 
وامرأة أخرى أرادت أن تخرج خلف جنازة ولدها
 فمنعت من ذلك فرمت بنفسها من أعلى الدّار فماتت"



طب حد يسالنى 
هما كانوا خايفين منه قوى كدا ليه يا شهر ؟!!
يعنى ما يخرجوا ويمشوا وعاتشى يعنى
 اقولكم لأه اصلكم مش عارفين
 الجدع جايلهم سمعته سبقاه انه كان لما يحب يعاقب حد
كان بيعمل الآتى
"وصار ينفخ بالكير في دبر الرجل حتى تنذر عينيه
 وتنفلق دماغه إلى غير ذلك من سيء العذاب"
 يا حلاوة يا ولاد
 شوف الجمال
 شوف الإبداع
شوف الابتكار 
 تفُنن والله



بس والمجاعة وشح النيل جاب معاه طاعون
والمرض زاد وبرسباى شخصيا لقط العدوى
 المصريين يا كبدى هيلاقوها منين ولا منين
 ضجوا بالشكوى من دولات خجا
 وقالوا للسلطان مش عارفين نمشى ف الشوارع
والستات بقى يمرضلهم قريب او يموتلهم عزيز
 ميقدروش يخرجوا .. ينفع كدا ؟!!
برسباى اختشى على دم اهله و امرلهم بالخروج بالنهار
يروحوا السوق والحمامات ويروحوا بسرعة
وراح شايل دولات خجا بعد ما مصايبه كترت
 والبلد اصلا مكنتش ناقصة انهيار
 وانزوى خجا ف بيته زى الكلب لحد ما مات
والقصة خلصت



 تعليقى بقى
برسباى بعد ما شال دولات خجا
بيقولوا ربنا شفاه م المرض وكأن وجوده كان سبب
وشيله كان العلاج 
 معلشى
عشان اللى بييجى علينا ميكسبشى
على رأى الست شويكار ف سيدتى الجميلة
ربنا يجعلها بيضا ع الكريم سودة ع اللئيم
 طين ع اللى ييجى ع الحريم



ثانيا
 يختشى ايه دا
 كل الناس ف كل حتة حاجة وييجوا لحد عندنا ف مصر
ويبدعوا ف التعذيب والفساد والقهر
هوه كل ما حد يشوفنا يفترى علينا ليه ؟!



ثالثا
 سلاطين المماليك زمان بيفكرونى بمماليك دلوقتى
 يبقى جايب واحد وسخ
وعارف انه وسخ
وامه عارفة انه وسخ
وهيطلع ترابنتين الناس
 وبرضو اللى جايبه يستهبل ويستعبط لحد الناس
 ما تنهار
وبعدين يطلع بكل براءة بعد الف سنة عذاب ومرار
ويشيله ولا يحاسبه على جرايمه
 ولا هوه شخصيا يتعاقب انه جابلنا واحد بالبشاعة دى
 واحنا غلابة قوى يا سيد 





القصة رقم (3)





 ودى عن احد رعايا الارمن اللى جم مصر
 ف زمن محمد على والراجل دا مات وصحى
 أقصد مين ؟
 بوغوص يوسفيان  .. حضرتك






والحاج بوغوص اللى عاش بين سنتى 1769- 1844
كان ملتزم بيدفع مبلغ لحكومة محمد على
 وبعدين ياخد هوه المكسب من دخل الأرض او المطرح
ومكسبه ف الفرق 
واليكم ما حدث بالتحديد 
بوغوص كان ماسك جمرك اسكندرية
وبيدفع 50 كيس يعنى 250 جنيه سنويا لمدة 5 سنين
 حلو ؟



لأ مش حلو عشان محمد على هيستدعيه
ويقوله هجددلك التعاقد بس هتدفع 500 كيس
 يعنى 2500 جنيه لمدة خمس سنين
والخمس سنين يندفعوا دلوقتى حالاااا
طبعا بوغوص اتخض وقال لأ مقدرشى
ومينفعشى وكدا خسرانة ... الخ
محمد سكنفولة قاله متقلقش وأى عجز يقابلك
 خزانتى هتشيله معاك بالنص
 واقنعه انه هيكسب بالهبل خصوصا
وانه
سبوبة محور القناة  قصدى ترعة المحمودية كانت بتتحفر
وماشية الله ينور وجمرك اسكندرية هينتعش
وهيجيب ايرادت اكبر واكتر
 سنكفولة كان باصص لقدام واليغمة هتكفى الكل 
المهم اقنعه واتفقوا




وهل بت محمد على ما هيسيب بوغوص لحاله كدا ..؟
 لأ طشبعن
 بعت معاه مراقب حسابات يقعدله ع الساقطة واللاقطة
والمراقب ف يوم بعت للباشا وقاله ..
بوغوص بيخنصر م الإيرادت
 وليلتك طين يا مورسى 
وبس يا معلم اتعملت تحقيقات
 ومحمد على بعت لبوغوص وواجهه
 وفورا قال الجملة المعهودة وقت الغضب
 " فليُسق من قدميه "



يسق من قدميه دى يعنى اسحلوه بالعامية عندنا
وبأدبيات العصر الحالى دخلوه التلاجة
 المهم ان احد رجال كبار حرس محمد على اتقدم
 واخد بوغوص من قفاه وخرج بيه فورااا
راح بيع ع السجن بقى لازم
عشان يعملوا معاه الجلاشة والبغاشة والتشيز كيك ..؟!
 لأ الجدع دا هيطلع كان عارف بوغوص
وله جميلة ف رقبته من زمان
 صعب عليه ينقتل كدا .. 
وراح واخده مهربه على دهبيته
ومخبيه لحد ما خفاه تماما عن النظر



 وتانى يوم محمد على بيتمطع وبيرتشف قدح القهوة
وبيبص على شروق الشمس ف رومانصية
من شباك القاعة المفضلة بتاعته 
وسأل رئيس حرسه .. قتلوا بوغوص يا ولاد
ومات مبسوط وفرحان ومستريح وكدا ..  ؟؟
الجدع بتاع الحرس  رد .. طولة العمر لك يا باشا
فمحمد على يطمن ويكمل فنجانه ف وداعة
#طول_عمره_حونّين





ويمر الوقت وبوغوص ميت حى
 لحد ما ف يوم عجيب
محمد على كان ف عز غضبه وثورته
 وبيعانى من مشكلة مالية ضخمة
 وفجأة قال بعلو صوته فيما معناه
"لو بوغوص حى كان زمانه حلهالى دلوقتى 
بس يا خسارة "
رئيس الحرس اياه كان واقف فوشه انقلب
وبان عليه التوتر
 محمد على الرِقم هرشه طوالى وقاله مالك ؟
 الراجل ركع تحت رجليه واعترفله بكل حاجة
 محمد على فرح .. !




وقاله هاتهولى حالااااا
 بعتوا جابوه من مخبأه
و بوغوص كان بيرتعد من هول الموقف
 محمد على عفا عنه
 وامر بأبعاد رئيس الحرس وقال مشوفش وشه تانى
ويرجع بلده وميقعدش ف مصر بتاتا .. 
 بس سامحه
ومن يومها بقى ومبقاش محمد على يستغنى عن بوغوص
 ف ادارة كل اعماله المتشابكة
وبقى وزير خارجيته وماليته وحاجات كتير كدا 
وبيقولوا انه فضل يلبس القفطان والعمامة طول عمره
وكان بيعرف أرمنى وتركى وفرنساوى ويونانى
وبيستف لمحمد على الأونطة جوا الشنطة
 خصوصا مع الغرب اللى كان قارش ملحته 
ف أواخر ايامه وعاوز يحطمله كل طموحاته 




وبيقولوا كمان ان بوغوص قعد يبعت شهرية
 لرئيس الحرس اللى انقذ حياته
وحتى بعد موت الراجل تكفل بأسرته
 ومفكرش بوغوص يكون اى ثروة من ورا محمدعلى
وركز جهده على حماية الجالية الارمنية
ومتجوزش ولا خلف
لكن قدم ابن اخته لمحمد على
فشغله عنده مترجم ثم وداه لأبنه
وابن الأخت هيبقى سكرتير لأبراهيم باشا فعلا
ويسافر معاه اوربا ف رحلة علاجه
 ويحضر معاه (ابراهيم يعنى )
اخدانه لصك توليته الحكم ف حياة ابوه
 ثم يترقى ف المناصب لحد ما يبقى ف يوم
 أول رئيس وزراء لمصر فى العصر الحديث 




وطبعا عارفين أقصد مين .. نوبار باشا
و بوغوص بقى
الخال يعنى
فضل بتاع 35 سنة مع محمد على
اللى كبر وابتدى يدرب اولاده واحفاده على ادارة الدولة




وحظه الدكر وقعه ف خلاف مع عباس حلمى الاول
وكان واد قليل الادب زى ما كلنا عارفين
 عباس ضايق يوسفيان قوى قوى
لحد ما
بوغوص يا نضرى شال ف نفسوياته
 وبيقولوا اعتزل الشغل وبطل ياكل لحد ما مات م القهرة
ومحمد على اللى كان اتشال ع الرف ف آخريات سنواته
 زعل عليه
واتضايق جدااااااا لما عرف انهم معملوش
جنازة رسمية وعسكرية و كدا
قوم بهدلهم وبعتر كرامتهم وبعت لمحافظ اسكندرية
اللى بوغوص عايش فيها اغلب وقته
 وقالهم اعملوها تانى .. ! 




وطبعا مطلعهوش ودفنوه
بس زى ما قال نوبار ف مذكراته ... عن خاله
 " لم يتم إعادة دفن الرفات لكن أقيم قداس مهيب بالفعل
 حضره كل قوات الضباط .
 واصطف عسكر حامية الإسكندرية فى حديقة الكنيسة
بكامل أسلحتهم
وبينما كان اللواء وضباطه كلهم داخل الكنيسة "
 باختصار اتعمله جنازة عسكرية
والقصة خلصت





تعليقى بقى زى ما كان فيه ترزية قوانين
 كان فيه برضو ترزية حسابات
والحاج بوغوص كان م العالم دى
 بغض النظر عن أى تفخيم لشخصه من المؤرخين 




ثانيا ..
 مش كفاية ساعد محمد على ف شفط فلوس الغلابة
 وتكييف الوضع محاسبيا وقصاد الغرب
دا كمان راح بلانا بأبن اختشه نوبار
 اللى جثم على انفاسنا عقود متتالية 
وقعد يخدم مصالحه ومصالح الارمن ومصالح الغرب
حاكم بعد التانى .. من اول محمد على
لحد ما مشى م السلطة ف عهد عباس حلمى التااااانى 
يا ثااااامح 
يخربيت كدا يعنى 
دا مدوب كام والى وخديوى .. !!
حاجة غريبة جدااااااااا


ثالثا بقى واخيرا 
بوغوص دا لطيف قوى 
2× 1 زى الشامبو 
يعنى مات مرتين 
واتعمله جنازة مرتين ... 
حاجة مسخرة ومصر دى بلد العجايب
 :)




القصة رقم (4)




من كتاب "النيل حياة نهر " للأخ اميل لودفيغ





والشاب كان بيحكى عن مشاهداته للنيل 
 بيحكى عن أسطورة سمعها عن .. "البطرك يوسف"
ويقصد يوسف عليه السلام
 بس هيا مكتوبة كدا
 أه والنبى مش انا اللى بقول !




قالك ايه بقى آل الاخوة ف بلاط الفرعون اتضايقوا
 من سيدنا يوسف وسلطانه ونفوذه عند ملك مصر
 وقعدوا يبرطموا قصاد سيدهم
ويقولوا ...
" يا فرعون لقد شاب يوسف وقل ذكاؤه وزال جماله
 وضعف رأيه"
ابو الفراعين كان شايل ليوسف الجميلة وبيحبه
 فقال يمشى معاهم للاخر 
ويكبسهم فقال اقترحوا عليا عمل عظيم
ونشوف كدا يوسف هيكون قده ولا مش هيقدر
وساعتها نعرف اذا كان شاب وخاب
ولاّ كلامكم هيطلع فساكونيا اطلبوا .. !




خصوم يوسف اتمطعوا وقالوه ماشى
البحيرة اللى ف الحتة الفلانية تحتها النيل بيعدى
 يعرف يوسف يستعملها ويجفف الارض
وبعدين يرجع يزرعها تانى ؟!
فرعون قال يجاريهم وبعت لسيدنا يوسف يقوله
 عندى بنت هجوزها وعاوز اعملها اقطاعية لوحدها
تسكنها ومتكونش بعيدة عن العاصمة ف الحتة دى
 تعرف؟
تعرف تحولها من مجرد بحيرة لأرض
 ومزارع وبلد بحالها .. ؟
 يوسف ساله
 "متى تريد ذلك يا فرعون مصر فسيكون بأذن الله "
 فرعون قاله أسرع وقت ممكن



بس ويبدأ يوسف الشغل ويحفر 3 قنوات
واحدة من مصر العليا والتانية من الشرق
 والتالتة من الغرب والأرض تبقى طمى
ويتزرع فيها شجر وزرع ياما
ويدخل الفيضان من احدى القنوات ويسقى الأرض الجافة
 ويخرج من القناة الاخرى ويتم كل شىء فى 70 يوم فقط
لحد ما تبقى جنة ف شهرين و10 أيام 
بس !!



فيبعت فرعون لرجال بلاطه ويبستفهم
 "هذا هو الذى عمله يوسف الشايب الضعيف الرأى
 وهذا ما لا تقدرون على صنع فى ألف يوم " 
وتقول الاسطورة ان من يومها البلد اللى
ميقدرش رجال فرعون يعملوا زيها
 ولا ف ألف يوم
 بقت .... الفيوم
 والحكاية خلصت





تعليقك يا شهر ؟؟
 المصريين حلوين قوى والنيعمة
 الحكاية كلها هتش ومتعقلشى
 انما فكرة تلبيس المعنى والكلام
 والتدليل على قدرة النبى يوسف جميلة
ورغم المتشددين والمكفرين 
وكل العالم اللى عاوزين يكرهونا ف الدين دول
احنا بنحب الأنبيا والصحابة والأوليا
 والصالحين 
بطريقتنا المصرية البسيطة 
وكفى




 الحكاية رقم (5)



 ودى بقى عن أهل الطرب
 الناس الحلويات
واقصد بيهم الست ليلى مراد ... البرنسيسة 





لوّلا وناس كتير متعرفش الحكاية دى
كانت بتحب محمد عبدالوهاب
 بتحبه بتحبه اللى هوه مش حب مطربة لملحن
 لأ حب ست لراجل



عبوهاب قبل ليلى ما تدخل دنيا المغنى
 كان نجم الجماهير الاول 
وكل البنات بتحبه كل البنات حلوين ومجانين بيه 
ليلى مراد لما ابوها حب يدخلها الوسط قعد يبعت لعبوهاب
 ييجى يسمعها لحد ما ف ليلة نفذله طلبه
وخرج من عندهم ف الليلة دى
 مقررا انه يتبنى ليلى





والحكاية انقالت على لسان لولا سخصيا
ان عبوهاب قرر يديها دور ف فيلمه الجديد
ومحمد كريم المخرج معجبوش شكلها
 اكمنها رفيعة وسفيفة
بس عبوهاب أصر
وبالذوق والادب والمسايسة ..  اقنع كريم بليلى 





وابتدى تصوير الفيلم 
ولقطات منه كانت ف اسكندرية
 وليلى مراد طايرة م الفرح والسعادة
وبقت قرب الاستاذ وبتشوفه وتحبه ف الفيلم 
لأ وهوه هيحبها كماااان ... !!!







طبعا عبوهاب مكنش تلميذ يعنى
 كان فاهم طبعا ان ليلى واقعة ف غرامه
 وباين ف عيونها الدوبلى الحلوين دول كل ما تشوفه !! 
بس كان مستمر ف التلحين والشغل ورعايتها فنيا
ومعتمد على انها بتنكسف ومش هتنطق




بس والفيلم بيتصور 
والمعجبات كل ما يلمحوه يتلموا حواليه أمم أمم
ليلى تشوف المنظر تتجنن والغيرة تاكلها
وبعدين ف لحظة جنان تقرر تعترف للأستاذ بحبها
وف بهو الفندق تحدث المواجهة 





كانوا قاعدين ف فندق وندسور بالاس 
ف اسكندرية
 ليلى استغلت قعدة عبوهاب ف الصالون واصطادته
وقالتله 
"عاوزاك ف موضوع مهم"
الراجل قعد بكل برود وحط رجل على رجل وسكت تماما
 كان حاسس الظاهر
راحت ليلى بكل عصبية انفجرت فيه
 وقالتله ....  "انا بحبك "




عبوهاب منطقشىىىى .. ابتسم بس وفضل ساكت
 ليلى ارتبكت اكتر وبعدين قالتله
" انا بحبك"
" بحبك قوى قوى"
يا لهوى بحبك ومعاها اتنين قوى يا مفترى ! 
المفروض الاتنين قوى دول يعملوا أى منظر
لكن عبوهاب فضل على هدوئه وبروده وابتسامته
 فأنفجرت ليلى فيه اكتر وقالت
" انا مش قادرة اخبى خلاص ! "



ساعتها عبوهاب راح مبدل قعدته
 وحط الرجل التانية ع الأولانية
 بعد ما كانت الاولانية فوق التانية
وقعد يطبطب على ركبته ف حركة شهيرة له 
وبعدين ابتدى يكهكه
وكل اللى شاف عبدالوهاب وسمعه
عارف ضحكته العجيبة دى بتاعت .. قه .. قه .. قه
 اللى تحس انها تريقة عليك
وانك عاوز تضربه بعدها مش تضحك معاه !
 القصد
 الموقف بقى زفت






طبعا وأكيد عبوهاب مر بالموقف دا سبعتلاف مرة
 من سبعتلاف معجبة
انما ليلى كانت اول مرة يحصلها كدا
الدنيا لفت بيها 
وكل اللى مر بموقفها
 اكيد عارف انه أنيل موقف ف الوجووود
 قوم ليلى تصورت ان ضحكة عبوهاب سخرية
 وان كل اللى ف الفندق ملاحظين 
وفاهمين وعارفين هوه بيضحك على ايه !!
والبت انكبست كبسة من أم رز ولحمة  بموت فيها
وعرقها مرقها ودايخة وبتاع
راحت مزعقة
 "معناها ايه الضحكة دى انا بحبك"
#يابجم 
ناقص كلمة يا بجم




عبوهاب الحبيّب القرارى صاحب الخبرة
 فهم انه داخل على تهزىء
 فلم الليلة وراح شاخط فيها
 "انا افهم ان دى قلة أدب ازاى تتجرأى وتقوليلى كدا ؟ "
ليلى انفجرت ف العياط وقالتله
" يعنى انتا مش بتحبنى زى ما بحبك !"
 #استفوجئت يانضرى
وبس راحت قايمة وطلعت اوضتها
 واتهرت عياط  وكآبة وحزن 





وكملوا تصوير الفيلم وقلبها مكسور
لكن عبدالوهاب بأسلوبه الشيك المتمرس
عرف بعد شوية يمتص وجعها ويحتفظ بيها كصديقة
وكفنانة كمان بيحبها 
ويحب فنها وعملها اجمل ألحان 




اللطيف بقى ..
انهم قعدوا اصحاب لحد نهاية العمر
 ولما ليلى فكرته مرة  بالواقعة دى قعد يضحك
ويقولها 
"انا قلت بلاش سفالة يا بنت انتى لحسن اقول لبابا .. !" 
وليلى وعبدالوهاب فضلوا أصحاب
 حتى بعد جوازها من انور وجدى اللى كان بيغير منه
 لكن بيشتغل معاه برضو
 بزنس اذ بزنس 
انتوا عارفين انور وجدى كان بيعز الفلوس 
زى عينيه 



وعبوهاب أصله كان جنتلمان حقيقى
وفاكرة سمعت لليلى مراد حديث ف الإذاعة
 بيسالوها لو راحت القمر
ومفروض عليها تختار شخص واحد بس يروح معاها
فيا ترى تختار مين ؟ 
انا قولت هتقول انور وجدى .. ولا حاجة
قالت عبدالوهاب ... هاخد معايا الأستاذ عبدالوهاب
وبس الحكاية خلصت





 وتعليقى الوحيد
 ليلى مراد دى ...  ست الستات والله
 بغض النظر عن أى حاجة ف الحياة يعنى




الحكاية رقم (6)





 والاخيرة دى بقى عن صاحب الدجاجة
 واحد من أهل مصر الطيبين
والقصة حكاها السخاوى ف تحفة الاحباب 
قالك كان فيه فقيه عالم اسمه ابو عبدالله محمد
 المعروف بالفضى
 ومعروف كمان بصاحب الدجاجة 



ماله يا شهروزة ؟؟
بيقولك انه كان من مشايخ القراءة وكان ربنا موسع عليه
 وعنده مال وعقار وحاله مبشبش
 قوم ف يوم نفسه هفته ياكل فرخة 
وبعت اشتراها وسوتها الجارية




ولسه يا خويا الفرخة طالعة م الميكروويف
وبتتحط ع السفرة
الباب دق .. دق قولنا مين ع البيبان دق
 رد الصوت من برا
انا أرملة وعندى عيال 
والست الظاهر كانت جاية عاوزة مساعدة
قوم الشيخ بص ف الصينية قصاده
وراح قايل للجارية اديها الفرخة
 فعلا ادتهالها
 انا هسميها خوخة 
مش الست .... الفرخة أقصد




المهم الست الأرملة واللى عندها عيال
 ومحتاجة مساعدة اخدت خوخة (الفرخة)
وروحت بيها حطتها ع السفرة
 وندهت عيالها وبصت كدا 
وقالت مكنتش عاوزها كان نفسى ف فلوس 
المهم ف هذه اللحظة دق الباب
 اتاريه وكيل صاحب البيت وعاوز الإيجار
 قالتله معييش ومحدش ادانى فلوس
 ادونى فرخة
 تاخدها ؟




 الراجل قال ماشى أى حاجة والسلام 
واخد خوخة وروح بيها على صاحب الدار
 اتاريه ميييين ؟
 ايوه الشيخ اياه الفضى
الراجل اول ما تحطت خوخة قصاده عرفها علطول 
وسأل الوكيل جبتها منين وازاى
الوكيل حكاله فهم طبعا وقاله خد فلوس
 وروح للست الغلبانة دى
 ومتاخدش منها ايجار تانى أبداااا 



وبس خوخة رجعت !!
ولسه الشيخ هيمد اييييده .. الباب دق !
مين اللى بيخبط ؟
رد الصوت عابر سبيل فقير ومحتاج
 الشيخ قال للجارية بتاعته خدى خوخة اديهاله !!
الجارية نفذت امر مولاها وادت الطارق الفرخة
الراجل اخدها وهوه مش مبسوط
 كان عاوز فلوس عشان عليه دين



 ف سكته قابل شاب 
الولد لقاه متضايق ومتنكد .. مالك يا عمى
أصله كان جار من بعيد ويعرفه
الراجل قاله محتاج فلوس ومعايا فرخة تشتريها منى ؟
 الولد قاله طيب واخدها
وقال دى تستاهل بق بابا وخدها وروح
على فين على بيت ابوه
 ابوه هيطلع مين ؟
 ايوووون الشيخ الفضى صاحب الفرخة .. خوخة ! 





بس والواد دخل على ابوه ومساء الخير يا ضاضى
 وجبتلك فرخة حلوة كل بالهنا والشفا
 اول ما حطها قدام الشيخ قال ...  الله !!!
الفرخة دى انا عارفها ...  رجعت ازاى تانى ؟!
وقال لأبنه تعالى احكيلى جبتها منين
فحكاله
الشيخ اداله 50 دينار وقاله روح للراجل جارنا
وفك زنقته



وبس لسه هيمد ايييييده عشان ياكل خوخة !
قوم ايييييييييييييه ؟!!!
الباب دق ..
 خلاص كدا انا بقول نطفى النور
 وناكل التفاحة اللى فاضلة بقى !!!
الراجل قال للجارية شوفى مين ع الباب
 لكنننننننن
لو طلع عابر سبيل وفقير اديهاله
وانتى تاخدى حريتك ..!
 الجارية راحت تفتح وتسأل طلع فعلا فقير الى الله
ادته الفرخة 
وهيا اتعتقت لوجه الله
وطلعت تحكى حكاية الفرخة العجيبة دى 
ومن يومها اشتهرت حكاية الشيخ الفضى
 وبقى معروف بصاحب الدجاجة
 والحكاية خلصت


ويتبقى التعليق عليها
 بأن ف مصر ناس طيبة بشكل مرعب
 وأظن ان هذا هوه السبب الأساسى
ف ان ربنا فاكرنا دايما برحمته
مهما كان وسطينا طغاة وأوغاد ياما ميتعدوش 



وتوتة توتة خلصنا حكايات الليلة
تصبحوا على الف خير 


---------------------



Mahmoud Abdou @m7moud_3abdou 
 يوسطه يعنى يشقه نصين من هنا هو :D


Mahmoud Abdou @m7moud_3abdou 
 ما يغزه بخنجر و خلاص ليه الكلفة دى
 و ناس تمسك و تكتف و ناس تمسك الكير
 و ناس تصب ايه العالم دى :(


اكتئاب ما بعد الثورة @MahometusUsama 
 الطاعون جه فى عهد برسباى كذا سنة
وقتل ناس كتير فعلاً، وكل ما يجمع الناس تصلى
 عشان الطاعون أو النيل
 الوضع يتنيل أكتر


اكتئاب ما بعد الثورة @MahometusUsama 
 يعنى أتعملتله جنازة متعملتش لمحمد على نفسه!




اكتئاب ما بعد الثورة @MahometusUsama 
 الروم والأرمن عملوا شغل حلو مع محمد على!
D:



Yasser ʿAbd Allāh @Yasserigo 
 عبد الوهاب برج الحوت مواليد 13 مارس



Moussa @moussiav 
 مواليد ١٣ مارس ومات ٤ مايو


Yasser ʿAbd Allāh @Yasserigo 
 من الطريف إن زكي مراد كان خايف على بنته
من إن عبد الوهاب يعمل معاها زي منيرة المهدية
 في أوبريت كليوباترا ويديلها ألحان أقل




Nelli @NGeorgos 
 اااااه؟؟؟ هي اللي غنت معاه
 اغنية يادي النعيم اللي انت فيه ياقلبي؟؟ 
بحبها اوي الاغنية ديه



Dina @DinaRabee3 
 أول مرة أعرف ..
المشهد بتاع غزل البنات كان بجد بقى D:



Moussa @moussiav 
 والله راجل محترم ، اي قفا من نجوم اليومين دول
 كان عمل معاها الدنيئه و قالها العيال مش بتوعي
ونزل بمرتضي منصور


Molly @mollyz80 
 قالت عبد الوهاب


saso @_samah__ 
 والله انا قلت شكلها هتطلع الحلوة خوخة
اللى رجعت بعد دوخة :)))


saso @_samah__ 
 سبحان الله ..الفرخة خوخة طلعت وش السعد
 على كل اللى شافوها:)))



ليست هناك تعليقات:

إرسال تعليق

Related Posts Plugin for WordPress, Blogger...
"حقوق الملكية والملوخية والمهلبية ... الخ
محفوظة للست شهرزاد وإياك حد يسرقها ويحاول يزعلها آغجر .. مفهوم ؟ "