الاثنين، 29 ديسمبر، 2014

فى عشق التلوين ..... 3






شوية صور قبل التلوين وبعده 
وافتحوا الصور عشان تشوفوا التفاصيل 
الجميلة 





جامع محمد على بالقلعة اللى بناه سعادته
 وملحقش الا انه يندفن فيه
 وبس 





دروايش زمان ومجاذيبه
الله ....  حااااااااااااااااااى ىىى




مسجد خاير بك
 اللى خان مصر السلطان الغورى ف ساحة الحرب
وفتح السكة لسليم الاول عشان يحتل مصر
وبقى أول والى للعثمانلية مكافأة لغدره 
 والمصريين سموه بعد هذه الواقعة .... خاين بك 





ابو الهول لو بينطق 
هيقول ع اللى شافه من أهوال
 أومال هما سموه كدا من شوية ؟!!!
 من مجموعة لينرت & لاندروك





بعض المشهد دا والفيلم دا والراجل دا 
#فوزى_حبيبى 






سموها باب الحديد
عشان اول ما اتفقوا على مد خط سكة الحديد
للقاهرة .. جابوا القضبان والحاجات كلها
واتخزنت ورا باب كبييير كان معرف اللى وراه
 فاشتهرت بيه المحطة لحد دلوقتى 






شكرى سرحان قاعد وسط القمرات





اللى جاب النيل جاب الهرم





الأنسة أم كلثوم ... 1 





الأنسة أم كلثوم ... 2 




الأنسة أم كلثوم ... 3 




خان الخليلى أرضه كانت مقبرة لأكابر الفاطميين
 وهوه جهاركس الخليلى الأمير المملوكى
 اخدها من السلطان عطية
 وقام لامم اللى مدفونين 
وف التلال ورماهم
رماهم ف أرض خلا وبنى لروحه بيت ووكالة وهيصة
 وسافر يحارب وانقتل
وفضلت جثته لحد ما نبشها الطير
 والمصريين قالوا ان دا عقاب ربنا على اللى عمله
ومفيش حد بيتعظ .. ان من قتل يقتل ومن ظلم يظلم
 ولو بعد حين .. بس تقول لمين !!!




العمارة دى لسه موجودة
ف شارع نجيب الريحانى الازبكية
حالها كرب بس الحمدلله انها لسه موجودة
 أحسن من مفيش



♣ ĦΔИΔИ Ħ☯ ЄƵƵΔƬ ♣ @EgyChampagne 
 ونبي متقوليش احنا بنخبي الحاجات دي منهم




فندق مينا هاوس كان ملك الخديوى اسماعيل
وابنه توفيق لما اتزنق باعه
 واتنقلت ملكيته بعدين لزوجين انجليز
اللى حبوه وكبروا ف حجمه وخلوه زى دار ضيافة
وبقوا يعزموا اصحابهم واصحاب صحابهم
واختاروله اسم .. مينا هاوس
على اسم مينا موحد القطرين
 بما انه كان أشهر شخصية يسمعوا عنها وقتها
يعنى مسمهوش تشارلز على اسم جده ولا حاجة ..  !!





جامع بن طولون الحتة دى ف زمن الخديوى توفيق
 كانت متهدمة وخربانة
وبيسكنها المشردين والعجزة والمرضى
 واللى ملهمش متوى




دكان البقال
 والسكر أقماع متعلقة كأنها فوانيس



Cindy @CindyJanabi 
 بنسميه النوع ده من السكر القند


Νολο @GypsyNolo 
 سكر جلاب





مواصلات زمان ولا اجدع تاكسى
 بس مش رابطين الحزام ليه ..؟!
 مخالفاااااة 




من بورسعيد
يختشى الاجانب كانوا مدلعين روحهم قوى 




بنات زمان .. يا لهوى 



 Heba ‏@HappyGeddan  
و النيعمة دي حلوة 
دانتي وريتينا شوية ستات عجب قبل كده




قصاد القلعة زمان 
أين ذهب كل هذا الجمال يا كل المسئولين 
يا كفرة ياعشاق القبح ف كل زمان وعصر ..؟!






شادية



اللونا بارك - مصر الجديدة
 كوكى بارك وسندباد ودريم لاند
بتوع ناس زمان يا ثاااامح


H. @_HishamFikry 
 ليها علاقة بأدهم بارك؟؟ :-D





السقا .. لو كنت عايشة اياميها
كان زمانه صاحبى وحبيبى
وكل يوم نرغى شويتين تلاتة أربعة 





مسجد قايتباى كان سلطان مفترى
 لكن ف مرة نجار وقع من على سقالة ف القلعة
 لما كان بيشتغل ومات وجم عياله على باب قاتيباى
وطلبوا منه صدقة فأمرلهم بفلوس
وأمر ان النجار الغلبان يتكفن ف توب من تلات طبقات
 ونزل يصلى عليه كمان
ودى كانت واقعة عجيبة ادهشت الجميع طبعا 
متى امتى الحنية دى يعنى ...  !




ف باحة قصر عابدين .. انا وصاحبى
خدلنا تسويرة





ف شارع المعز
 من مجموعة لينرت & لاندروك 





رمسيس التانى دا مرة نحكى حكايته
 كان مصيبة وبلوة سوخة ...
 كبس على مراوحنا عقود لحد اما هرمنا 




التعليم بالضرب 
عشان نكبس بالعلم على نافوخ الواد
 أومال المعلومة تثبت ف دماغ العيال ازاى ؟!!!



 Moneerah I Al-fulaij ‏@MonerahAlfulaij 
  يالهوي دي حتطير المخ كله
 مش بس المعلومه 




العيال زمان مكنتش بتلبس بامبرز
 كانوا بيشيلوهم ف الحتة دى ازاى انا مش فاهمة .. !!! 



 waheed mokhtar @waamls 
 ماكانش وصلهم التسريب لسه





العسكر قال للشعب
 تعالى لما اجوزك هنومة يا بنى







مسجد صرغتمش
ومحدش يسألنى يعنى ايه مسجد .. !


عروسه البحور @ashketromancya 
 هههههههههههههههههههههههههه
 انا فضلت ساعه انطق فى الاسم


 دا امير مملوكى لعين :)





فوزى وشادية ... يا حكيمااااات 






مآذن الجامع الأزهر ... واذكر الفارق بين الصورتين
 ومفيش جايزة للإجابة عن السؤال
من قبل ما حد ينطق 


اكتئاب ما بعد الثورة @MahometusUsama 
 الصورة اﻷبيض وأسود من غير قبة






قصر الجزيرة اللى بناها الخديوى اسماعيل
مخصوص للمخسوفة اوجينى
 فيه مشاكل ومحاكم ما بيننا معلش






 تصبحوا على الف خير


----------------------------------------------------------------

هناك 4 تعليقات:

  1. السلام عليكم
    عامك سعيد ام يوسف
    دوما لطرحك بهجة ننتشى لها كرقص عصفور تحت حبات المطر
    خفة ظلك فى التعليقات رائع
    سلامى ليوسف

    ردحذف
  2. ازيك يا محمد :))
    تسلملى يارب ومنحرمشى منك ابدا
    :)

    ردحذف
  3. والله تعقيب بسيط بس على تعليق منكم مستفز شوية لمعدومية العلم فيه
    فى صورة لدرويش او مجذوب انتم كاتبين تحتها الله حاااااااااى
    اولا اللفظ ده حضراتكم تنقلوه نقلاً من المسلسلات والأفلام دون اى فهم لهؤلاء المجاذيب او الدراويش لأن مفيش حد منهم بيقول الله حااااااااااى غير فى اأفلامنا بس
    إنما هما اعقل منكم ومنا كلنا هذا اذا كان لهم وجود حاليا

    ردحذف
  4. وليد ابراهيم
    -------------

    انا كمان والله تعقيب بسيط على كلام حضرتك
    أولا .. انتا متعرفش اذا كنت نقلت اللفظ دا من مسلسل ولا فيلم او من الواقع ..
    ثم انه ثانيا ... الافلام والمسلسلات - فيما عدا التافه منها - بيكتبوها ناس دارسة وفاهمة ومش عيب الواحد ينقل عنهم
    خصوصا لو كان شايف لكلامهم صدى ف الواقع
    ثالثا .. ايه التعارض بين كلمة الله حى وبين انهم عاقلين وأعقل مننا كلنا ... مش فاهمة
    رابعا
    معلش عشان استفزيناك ... احنا متأسفين .. معلش
    وشكرا

    ردحذف

Related Posts Plugin for WordPress, Blogger...
"حقوق الملكية والملوخية والمهلبية ... الخ
محفوظة للست شهرزاد وإياك حد يسرقها ويحاول يزعلها آغجر .. مفهوم ؟ "