السبت، 28 مارس، 2015

فى عشـــق التـــلويــن .... 4




لمزيد من الانعزال عن اخبار 
الحروب والجيوش والسياسة والنكد
 وصلة ف عشق التلوين
وصور قبل التلوين وبعده ... لمصر وناسها 
وافتحوا الصور عشان تشوفوا التفاصيل
وتستمتعوا 






مسجد السلطان حسن صاحب هذا البناء الرائع
 بناه ومندفنشى فيه
لما حاول يتخلص من احد منافسيه
الامير يلبغا الخاصكى 
وهرب حسن واحتمى بالقلعة ومحدش شافه بعدها




 المقريزى بيقول
 كان هذا اخر العهد به وقيل : خنق والقى به فى البحر
ولم يعرف له قبر
وبيقول كمان
 " انه دفن فى مصطبة كان يركب عليها من داره
بقلعة الكبش ، 
كما قيل : دفن بكيمان مصر واخفى قبره "
وعلى لسان احد الرحالة بيحكى ان المسجد
 " كان فيه 4 منارات وقيل ثلاثة
ثم هدمت بعض المنارات
ولم يبق سوى اثنتين ،
وهى عجيبة من عجائب الدنيا "







مريم فخر الدين مكنش ف دماغها تمثيل ولا دياولو
 راحت تتصور والمصوراتى بعت صورتها
من غير ما يقولها حتى .. لمجلة "ايماج" الفرنسية
فكسبت وبقت فتاة الغلاف
وعملوا معاها لقاءات وازاى انها جميلة 
وبتعرف كام لغة وبتعزف بيانو وكدا
فجالها منتجين ومخرجين يعرضوا عليها افلام
وابوها يطردهم ويقول برا !!
الحاج ابو مريم طرد حسين صدقى وانور وجدى
اما لما جاله احمد سالم اللى عرف يبلفه
 ويخليه يوافق على انها تشتغل ف السينما
وبعدين محمود ذو الفقار اتجوزها 
عشان مينطردش 
:)




مديحة كامل
 لما مثلت دورها ف فيلم 30 يوم فى السجن
 كان سنها 22 سنة ومطلقة
وعندها بنت هتخش المدرسة ... !





سيدى أحمد البدوى اللى اندفن ف طنطا
أصله مغربى ومواليد مدينة فاس
لكنه بحب المصريين للأوليا والمتصوفة وآل البيت
صار مصريا خالصا 




الأختان رجاء وعواطف يوسف
اول فيلم يظهروا فيه كان أربع بنات وظابط
 بعده اعتزلت عواطف وكملت رجاء ف عالم الفن 





مئذنة جامع بن طولون الشبيهة بمنارة سامراء
كانت الوحيدة فى مصر اللى ليها سلم خارجى
بيلف حواليها بشكل حلزونى من برا 





شادية اسمها الحقيقى .. فاطمة
:)
من أب مصرى وأم تركية
وكانت بتدلعها .. فتوّش






6 ديسمبر 1976 رياض غالي اطلق 5 رصاصات
 علي رأس الاميرة فتحية 
بعد ما خلص على فلوسها وضربها وخانها
وطلبت الانفصال ورفضت ترجعله
 وضرب نفسه بالمسدس بعد ما قتلها 
وانقذوه بأعجوبة
ومات بعد ما عاش قعيد كفيف بيتحاكم ويتبهدل




مسجد المؤيد اتبنى فوق سجن شمائل
 اللى اتحبس فيه المؤيد شيخ وهوه أمير
وشاف فيه اهوال وبلاوى 
وندر لو خرج منه ف يوم واتسلطن 
ليهده فورا ويعمل مطرحه جامع 





سعاد حسنى ماتت
وهيا على ذمة السيناريست .. ماهر عواد 




وسعاد انتحرت او نُحرت 
 ف 21 يونيو 2001
وللصدفة ان يوم 21 يونيو دا لكن سنة 1929
 كان هوه يوم ميلاد عبدالحليم حافظ ! 



 


الدبدوب أسلوب حياة
 الملك فاروق طفلا
قبل ما القصر والسياسة ما تفسده وتسد نفسه
وتنكد عليه عيشته وينقهر #ياكبدى






عيد ميلاد الملك وفى الصورة فريدة
وهيا لسه مخطوبة والاميرات .. فايزة وفايقة وفتحية






زينات صدقى بدأت ف صالة بديعة مصابنى
وكانت عاوزة تبقى مطربة
 لكن بديعة قالتلها ... لأ
هترقصى مع تحية كاريوكا وسامية جمال ! 
وفضلت ترقص وسط المجاميع
لحد ما شافها نجيب الريحانى
وخدها تشتغل معاه ف المسرح وسابت الرقص والغنا
وبقيت ألطف كوميديانة عرفتها السينما المصرية






باب الفتوح بناه جوهر الصقلى
وجدده بالشكل الحالى .. امير الجيوش بدر الجمالى
 واللى ع الشمال دى .. مئذنة جامع الحاكم



الاميرة فايزة .. أو فائزة حسب شهادة الميلاد
احدى اخوات الملك فاروق
بعد الثورة فضلت فى مصر محبتش تخرج
الا لما مشوها 
كان فيه طراطيش اشاعات
انها على علاقة بأحد رجال الثورة
وعبناصر قال لازم تمشى
فراحت باريس مع جوزها وانفصلوا هناك
ولما فلست راحت امريكا
قعدت عند امها نازلى
واختها فتحية وجوزها رياض غالى
 وجالها عرسان بالهبل فاتجوزت احد الأثرياء
واتطلقت ومتجوزتش تانى




فيلم وردة اللى كانت عاملة فيه بنت باشا واتأمم
وراحت باريس ورشدى راح وراها والقصص دى
كان فيه تلميحات لحياة فايزة 
بس مش كلها 
هذا والله اعلم








نجيب الريحانى مات وهوه بيمثل دوره ف غزل البنات
 انور وجدى كان شاطر وضبط الفيلم
 بحيث ميفرقشى كام مشهد ناقص متمثلوش
ورغم ان الفيلم مليان قامات فنية بالهبل 
عبدالوهاب وليلى مراد ويوسف وهبى وغيرهم 
 الا انه استغل حكاية موت الريحانى ف الدعاية بشدة
 ولم وقتها 100 ألف جنيه ايرادات سنة 1949
وفشر السبكى وايرادته





الملكة ناريمان لما فاروق قرر ياخدها من خطيبها
ويتجوزها هوه مأعلنش الخطوبة بسرعة
وبعتها اروبا تتعلم الأتيكيت 
وكيف تتصرف كملكة الأول





الست اتجوزت فاروق سنة 1950
وخلفت الولد ابن 8 شهور سنة 1951
وقامت الثورة سنة  1952
وطلبت الطلاق من الملك المخلوع فى فبراير 1954 





وفاروق مخلاش ف نفسه
وطلع ترابنتينها ف المنفى
ولما اتطلقت رجعت مصر
واخدت ورقة من المحكمة بالطلاق
واتخطبت لأدهم النقيب
وبيقولوا انها اتجوزت خطيبها بعد الـ 3 شهور عدة ..!
كل حاجة متسربعة ليه كدا ؟
ناريمان دى كانت غريبة فعلا .. مش فاروق بس !






نوبار باشا عاصر 6 من حكام مصر
الوالى محمد على
الوالى إبراهيم ابن محمد على
الوالى عباس حلمى الأول
الوالى سعيد 
الخديوى إسماعيل 
الخديوى توفيق 
ومشى اثناء حكم عباس حلمى الثانى



الملك فؤاد هوه اللى بدع سلاح تدريب الكلاب البوليسية
 وفاروق من بعده دعم البوليس بسلالات مدربة
 كان بيحب يشتريها ويربيها






ومش تربية الكلاب
 وجمع الطوابع والتحف و الستات بس
كان غاوى صيد بط كمان





نشروا مرة انه اصطاد 344 بطة
بينما سفير الهند اللى راح معاه اصطاد بطة واحدة
 بس معلش تلاقيه مفطرش يوميها
الهند زمان كانوا غلابة برضو





أول من بدأ حكاية الصلاة ف جامع عمرو
الجمعة الأخيرة من رمضان .. هما الفاطميين
الخليفة الفاطمى كان بيشوف الهلال 
ويريح اول جمعة
تانى جمعة يصليها ف مسجد الحاكم
تالت جمعة ف الجامع الأزهر
والجمعة الأخيرة كانت ف جامع عمر .. بالفسطاط
واهل القاهرة الفاطمية كان عليهم يعلقوا الزينات
من قصر الخليفة لحد جامع بن طولون
واهل الفسطاط يعلقوها من عند ابن طولون
 لحد جامع عمرو





اسمهان 3 جوزات واجهاض وبنت وحيدة
وقصص حب وعشرات الاغانى وفيلمين
ومخابرات وحروب وحياة صاخبة وموت مفجع
كل هذا ف 32 سنة.. بس






فم الخليج سور مجرى العيون
 (من كتاب وصف مصر)





هيا دى نفس الحتة اللى عند مفترق الطرق
 لمصر القديمة وزينهم واول القصر العينى 




صافيناز ذو الفقار الشهيرة بالملكة فريدة
اسكندرانية
والملكة نازلى اللى رشحتها لفاروق
والجدع حبها وقرر يتجوزها
اول مرة راح يزورها بعد الخطوبة خدلها 3 هدايا
اسمعوا بقى عشان كل واحدة تتخانق مع خطيبها الليلة دى
 وتنكد عليه عيشته وتقوله اشمعنى فريدة !!!
فاروق اخد 3 حاجات :
 1) خاتم خطوبة مخصوص كان اداه الملك فؤاد لنازلى
يوم خطوبتهم وكان التقليد انه ينتقل لخطيبة الأبن 
ولى العهد وكدا
2) براءة الباشوية اللى أنعم بيه على الحاج ابو فريدة
 3) براءة الوشاح الأكبر من نيشان الكمال
اللى أنعم بيه على نينة الست ام فريدة
ومش هقول جتنا نيلة ف حظنا الهباب ولا حاجة
عشان الملكة فريدة شافت الويل ف الجواز
وبعد الطلاق
 واتحرمت من بناتها زمن طويل





الملكة فريدة مع بنتها فريال
 اللى بمناسبة ميلادها ادوا كسوة واكل وجنيه دهب
لـ 1700 اسرة اتولدلهم طفل ف نفس اليوم
ابتهاجا وكدهون




هذه ليست فينيسيا
ولكنها االبيوت المطلة ع النيل ف منطقة باب الشعرية
آه والله
آه والله
آه والله
(من كتاب وصف مصر)



دار القضاء العالى
اللى صممها المهندس محمد كمال إسماعيل
واشرف على بنائها اثناء فترة عمله
بمصلحة المبانى الأميرية





وختامه مسك .. الشيخ عماد عفت
صورة فوتوغرافية
وصورة مرسومة بريشة الفنان وليد ياسين




تصبحوا على ألف خير

---------------------------------

ليست هناك تعليقات:

إرسال تعليق

Related Posts Plugin for WordPress, Blogger...
"حقوق الملكية والملوخية والمهلبية ... الخ
محفوظة للست شهرزاد وإياك حد يسرقها ويحاول يزعلها آغجر .. مفهوم ؟ "