الأربعاء، 18 مارس، 2015

مسجد محمد على






المكان اللى شهروزة هتتكلم عنه النهاردة
مظنش ان حد فينا مرحوش ولا شافوش
ولا مكنلوش فيه ذكريات واخد فيه صور
واعتقد ان صوركم هتغلب صور شهرزاد كمان
 :)



بس احب الاول اذكر 
انى اعتمدت فيه على كتابين اساسين
 غير النت والمواقع وكدا
المصدر رقم واحد بيمدح قووووى
والتانى واحد بيذم قووووى
 والاتنين ان شاء الله يوضحوا الفكرة






الكتاب الاولانى يبقى للدكتور / حسن عبدالوهاب
وكان واحد من الناس المحترمة
 ف مجال الأثار الأسلامية وتاريخها وترميمها
الدكتور حسن كان علامة ف مجاله
ومفتش اثار واشتغل ف لجنة الأثار العربية
اللى اهتمت بترميم كل حاجة قديمة ف مصر اتدمرت
واهملت لأكتر من سبب









دكتور حسن كمان كان مصور شاطر







ولما تلاقوا الصور دى ابقوا اعرفوا انها شغل ايده
وافتكروه وادعوله






الجدع كان عاشق للأثار الاسلامية والمساجد
وعمل عنها مؤلفات
لكن كتاب النهاردة تحديدا كانله سبب ومقدمة 





قالك ايه بقى يا سيدى آل الملك فاروق الله يرحمه
قرف شوية م الدنيا كدا وخد ف وشه وربى دقنه
 وعاش ف الدور ع الآخر





قوم قرر يلبس توب الرئيس المؤمن
وبقى اللى حواليه ينادوه .. بالفاروق
وقرر كل جمعة يصلى ف مسجد ف المملكة
آه .. مملكتشى وانا حر فيها
افردها واكويها 
وبابا اللى جابهلى وكدا





فيه ناس استعجبت طبعا من التحول العجيب دا
 لكن ناس تانية ما صدقت وقررت تستفيد من الهيصة
 واهو الراجل يعمل خير للبلد 
بدل السهر والهلس والحريم وخلافه ..
دكتور حسن عبدالوهاب معرفش تحديدا ازاى قابل فاروق
 بس واضح انه بعد ما قابله
حصل على العطف السامى لدرجة انه اهداله 
كتاب مخصوص ...
سماه بخط كبير .. تاريخ المساجد الأثرية
وعنوان اصغر تحت منه 
التى صلى فيها الجمعة صاحب الجلالة الملك الصالح
 فاروق الاول  ...  والكتاب من جزءين





والكتاب بيستعرض تاريخ حوالى 66 مسجد
صلى فيهم سعات الملك الصالح الفاروق أول
 ومنيش زعلانة ولا متضايقة ولا حاجة
 لكن كل الحكاية انه ف مقدمة الكتاب
وف محتواه مدح رهيب لفاروق والعيلة المالكة
 بشكل مستفز ويخنق
ولا يتناسب بصراحة مع راجل علامة زى دا 
ومكنش يصح ابدااا
وكفاية الاهداء اللى مليان كلام مزحلق
من كتر العسل المدلدق ومذيل بجملة
العبد الخاضع المخلص .. حسن عبدالوهاب 
بيفكرنى بعلى مبارك لما عمل خطط وسماها 
الخطط التوفيقية عشان تاخد حظها من النشر والاهتمام
والظاهر الترميمات والتجديدات والكتاب نفسه 
مكنوش هيتموا 
غير بالطريقة دى .. منعرفش زمان واحواله بقى
قصره 
ما علينااااااااااا
بس الكتاب اكتر من ممتع
ومليان تفاصيل شيقة واللى هيشتريه لن يندم 
اطلاقااااااااااااااااااااااااااااا
وهفوت انا ال65 مسجد دلوقت .. 
وهروح لمسك الختام





لما حسن عبدالوهاب هيحكى عن
مسجد محمد على





وطبعا مش هيبدأ حكاية المسجد وتاريخه
الا لما يقعد يتشكر الاول ف سى محمد على سنكفولة
ويقول فيه اشعار عشان يشلنى
واتشلوا معايا مش هتشل لوحدى انا




بيقولك ايه بقى
" الى روح محمد على باعث النهضة
 ومحيى مصر
ومؤسس البيت العلوى الكريم
 الى منقذ مصر من الفوضى
وواضع دعامة استقلالها ونهضتها
الى روحه الطاهرة نبعث بأخلص الدعوات
ونسأل الله القدير ان يغمره بفيض الرحمات "
 خلاص كدا





وانا هسيب رأيى ف الكلام دا للملاحظات
عشان معكرش دمى وانا لسه بحكى
ماشى ؟



 المهمممممم 
دكتور حسن طبعا هيبدأ كلامه عن محمد على باشا
 الجميل الحنين
وازاى يا نضرى بدأ من قوله مسقط رأسه
رحلة الكفاح وقصة النجاح قصة حب ميرفت وعيلاء
 وازاى واجه المحن والأنواء
وفضل مثابر ولا ينحنى لحد ما تولى حكم مصر
وطبعا محدش جاب سيرة الدهاء والطمع
واضطهاد ولاد الناس والعلماء والشعب نفر نفر
لحد ما كسر جناحنا كلنا
وخد مصر مشفية وقعد يلهط فيها 
هوه واهله 
متقلش حاجة من دى طبعا



القصد .. اللى مقالوش عبوهاب ان محمد على
شفط فلوس البلد ف جيبه
وبعدين عمل مؤتمر اقتصادى عشان يشفط اللى جاى
وسيطر على كل حاجة بايد من حديد
وبعدين بدل ما يبوس ايد ولى نعمته ف تركيا
راح عاضضها
وقرر يستقل بمصر
قوم الباب العالى انقمص وخلع ضرفة
وقرر يديله بيها على نافوخه ويادبه 
افلام كدا






ف دخلة اروبا والدول القلقانة من نفوذ محمد على
 ليكبر ويناطحهم
قوم ميعرفوش يسرقوا كويس
 الملخص الكل اتلم على سنكفولة وكانوا هيقلعوه هدومه
الراجل لحق نفسه سريع سريع
 وقال البنطلون لأ البنطلون لأ
وخلاص هقتصر عن الشام وغيرها
 بس ادونى مصر والسودان اورثها لعيالى واحفادى
 اهو يسترزقوا 
دول غلابة ومساكين



اروبا قالتله خلاص آمحما
 مصر ليك ومتغلاش عليك هيا والسودان
واقعد كنّ بقى ف قصرك بقلعتك
وخليك ف كوزك لحد ما ربنا يفتكرك
مش عاوزين قلبة دماغ 
الحاج قالهم حاضر
ف هذوها المرحلة كان حسب ما بيقول دكتور حسن
 الأصلاحات ف مصر والمشاريع شغالة
والقلعة من ضمن الاماكن اللى نابها نصيب كبير
 من التجديد والبناء




سنكفولة صلح المتهدم ف القلعة
وبنى كام قصر له ولحريمه
 وعمل ديوان للمالية وللجهادية وكام مدرسة
ودار للضرب .. الفلوس مش الناس 
:) 
وبعدين ؟





قالك انا قتلت خلق ياما 
وعذبت خلق ياما
ونهبت خلق ياما .. آن الآوان استريح بقى
وابنيلى جامع اصلى فيه وامسح ذنوبى 
واهو اتدفن فيه بالمرة 
وصدرت الاوامر من الباشا والى مصر
ببناء مسجد ف القلعة يحمل اسمه
واختير له مكان .. قاعة يوسف
ولنا هنا وقفة





فلاش باك ثوانى ..
لأول ما جه صلاح الدين الايوبى مصر
وبعد ما خلص على كل نفوذ وحس للفاطميين
كلف وزيره قراقوش بعدة مهام جسام
منها انه يخلصه من أى حاجة تخص الدولة الفاطمية
 وتتسبب ف رجوعها تانى
واستباب الامن
وانه يبنيله قلعة على جبل المقطم منها يحكم 
ومنها يدافع عن حكمه 




الشاهد انه صلوحة هيسافر بعد شوية
 وينشغل بحرب الصليبين ويفضل بعيد
وميرجعش يشوف قلعته ولا يتهنى بيها
لكن هتفضل القلعة 
بأسمه ..... لحد يومنا هذا
وهتقعد القلعة دى مركز للحكم وقصر رياسة
 يقعد فيه كل سلطان يحكم مصر ايوبى ومملوكى وعثمانى
لحد محمد على واولاده
 ثم يغير الخديوى اسماعيل التقليد
وينقل الدفة على قصر عابدين عشان يسكن 
قاهرته الجديدة ويبعد عن زحمة الشعب المزعج




اللى يهمنا ف الحكاية دى
 ان قراقوش هيبنى قاعة للحكم ف القلعة
ويسميها .. قاعة يوسف
وهتشتهر بعدين بقاعة العواميد



طبعا اسم قاعة يوسف ..
لأنه اول اسم لصلاح الدين بس مبيستخدمش كتير
 واسم قاعة العواميد بسبب تصميمها 
وكترة العواميد فيها 






القاعة دى هتفضل محل اهتمام وقعاد السلاطين
 ومباشرة الأمور
لحد ما يدخل سليم سخامة الاول مصر
وبيقولوا انه هدم جزء كبير منها 
وتعمد يسيبها خراب كرمز لزوال سلاطين مصر
وبزوغ نجمه لوحده 





وطبعا بعد الحكم العثمانى لمصر .. مين هيصلح ويهبب
قعدت القاعة ف حال متدهورة
لحد ما دخل الفرنساوية مصر ومشيوا ! 
ومنسيوش يرسموها ويحطولها صورة 
ف كتاب وصف مصر 



وبعدين مسك كام والى فاسكونيا
لحد ما جه محمد على
واخدها من بوق الكل ... السلطة يعنى
وبعدين قعد ياكل ف تايجر ويسيطر 
وبعدين يتوحش ويتغول
وبعدين اروبا حاصرته زى فار ف مصيدة
 فركن على جنب وقال ابنى الجامع بقى
واتسلى شوية ف اواخر ايامى 
وصدر الامر سنة 1830 م
ونعمله فين الجامع يا ولاد .. ؟
 قالوله مطرح حطام قاعة يوسف يا باشا
قالهم اتكلوا على الله هدوها
فاتهدت واتسوت بالأرض 





ولهذا خدوها قاعدة
 أى رسمة للقلعة مفيهاش الجامع
تعرفوا انها ما قبل هذا التاريخ
 وما بعده بييجى 18 سنة كدا
اللى هيا مدة انشاء المسجد والانتهاء منه




محدش للأسف عرف يلاقى وثيقة بتحدد بدقة
مين هوه مهندس المسجد الأصلى
لكن عرفوا من التدوير ان له مساعد اسمه (على حسين)
خريج المهندس خانة





اما رسامين المسجد فكانوا :
على أفندى موسى - السيد افندى حمد - المعلم ابرام
حكاكيان افندى
ود.حسن بيرجح انه (يوسف هكاكيان)
اللى كان ساعتها يبقى ناظر المهندس خانة





وبيقول ان اللى عمل الشبابيك كان اسطى رومى
 اما النحاتين فكانوا مصريين
منهم حسين محرم وابراهيم حسن
#اومال_فين_كابتشن_حسام؟ 




الحجارين كانوا كانوا اتنين
الاسطى حسين والحاج ابراهيم الأنبعاوى





اما اعمال الرخام فعمالها كانوا مصريين
والمقاول الخواجة سيمون
ومشرفين على اعمال الرخام
ضيا افندى وشاكر افندى 
والقبطان هدايت
والمعلم يوسف
#القبطان بيعمل ايه ف طقم العمل مش فاهمة
يمكن اللى كان بيورد المواد الخام ... يمكن ! 





والاهلة النحاسية بتاعت المسجد
كانت نحاس ومطلية بالدهب
واللى عملها الخواجا بيرون وكرابيت
 ف النحاسين بالموسكى
اما القباب اللى اتكست بالرصاص 
هيا وجسم المناريتن
فيقال انهم جابولها عمال من الآستانة
عشان الصنف دا كان شاحح ف مصر





وبس جبنا فريق العمل ورصدنا ميزانية
ومحمد على مهتم 
نبدأ الشغل




المهندس صمم المسجد كنسخة
عن مسجد السلطان احمد ف تركيا 
معرفش كانت فكرة مين بس حد قال
 عاوزينه نسخة من اللى هناك دا
واشمعنى السلطان وانا لأ
وانا عاوزة العروسة بتاعتشى فستانها
شبه فستان عروسة بنت خالة عمى وكدا





المهم .. المسجد تصميمه كالآتى
مستطيل من جزئين .. جزء شرقى وجزء غربى
وركزوا معاياااااااااااااااااااااااااااااا



الجزء الشرقى ومعد للصلاة





اما الجزء الغربى ففيه صحن مكشوف 
وفسقية للوضوء
طبعا كلنا أو اغلبنا أكيد شفناها





المربعين دول .. 
الشرقى والغربى 
والملاصقين لبعض بينهم باب





اما الجزء الشرقى المعد للصلاة ففوقه
وعدوا معايا يا عيال
قبة كبيرة
و4 أنصاف قباب
نص قبة خامسة لتغطية بروز المحراب
 و4 قباب ف 4 اركان
#مكتوب_كدا



مهندس المسجد زى ما قولنا
اقتبس من مسجد السلطان احمد بالآستانة
التصميم والواجهات 
وشكل المنارات العثمانية السخيفة دى
وكله تقريبا الا قليلا 





بس مخدش الزخارف الأصلية 
لكن عمل زخارف كانت الموضة 
الزهور الملونة والفواكه والنباتات 
وعناقيد العنب .. الخ





مخدش كمان نفس شكل الفسقية





 بتاعتنا كانت مختلفة واحلى الصراحة ميت مرة 






غير كدا كل حاجة تقريبا كانت واحدة
والبناء زى ما قولنا بدأ 1830
وقعدوا فيه لحد ما سنكفولة غار ف داهية 1848 
فيعملوا ايه ؟





ولا حاجة هيتهببوا يتقندلوا يتزفتوا يدفنوه جوا
ف حتة مخصوص
ويتخمد للأبد ف ضريحه الشيك اللى ميستاهلوهشى
بس ربنا كاتبله بقى مش هنعترض 
هنزمزق كل ما تيجى الفرصة 
ونعلن عن امتعاضنا وبس 
:( 



بعد محمد على هيمسك حفيده ... عباس حلمى الاول
 الواد كان شرانى ورزل صحيح 
 بس هيختشى على دمه
ويأمر بأتمام الاعمال ف المسجد
وبيقولوا عباس هيأمر بعمل مقصورة نحاس
ويحط جواها شمعدانات فضة ومصاحب مذهبة
ويامر بفرش المسجد واضاءته وتكملة اعمال الرخام





بيقولوا كمان انه هيأمر بتعيين قراء
ويرصد ميزانية للصرف ع المسجد 
بمقتضى وقفية موثقة وقصص كدا 
القصد
 اعمال النقاشة والنحت والتذهيب
وكل حاجة هتخلص تقريبا
ويتفرش ويضاء ويتعينله قراء
وخلاص كدا بقى كامل من كله





ينقتل عباس حلمى الاول وييجى بعد سعيد
والحاج سعيد هيرصد لمسجد باباه فلوس كتير
 ويعمل فيه احتفالات ثابتة سنويا
احتفالات ايه يا شهرو ؟؟
اقولكم 




ليلة الأسراء والمعراج
ليلة النصف من شعبان
و3 ليالى ف رمضان منهم ليلة القدر







كدا فاضل ليلتين يا ست ؟
آه مهو بسلامته عملهم مخصوص
واحدة ف ذكرى يوم وفاة باباه ف اسكندرية
والتانية ذكرى يوم دفنه ف المسجد ف القاهرة !!





ويعنى يا موكوس يا مدهول
بقى رمضان شخصيااااا ميبقلوش الا
احتفال يوم واحد بس
 ويومييييين احتفال لأبوك ... !
#ابوك_ولاّ_رمضان_يا_طه؟
هيخوتنا عايش وميت بقى 




ومحدش يهدينى انا هديت لوحدى .. 
عشان سعيد مات
وجه بعده حبيبى .. الخديوى اسماعيل
روحى دا بموت فيه انا
:)




ابو السباع روخر هيهتم بجامع جده
وهيعمله ابواب جديدة بأيدين نحاس
وهيحط فيه مصحفين مدهبين






ويعمل فيه مقصورة 
عشان الحاج السلطان عبعزبز لما ييجى
لما ييجى ايه يا شهر ؟
 يعنى لما ييجى ويخش المسجد يصلى
 يصلى براحته
بعيدا عن الرعاع الدهماء اللى هما احنا الشعب يعنى 





وعمل سماعين 
 دورة مية .. وحاوط المسجد بأسوار
 ركزوا ف الصورة اعلاه .. هتلاقوا الأسوار الحديد





واتخلع سماعين من العرش
وراحت الخديوية لأبنه توفيق
تيفة هيأمر بترميم الرخام اللى يظهر انه باظ
من عوامل الزمن والقهرة





ويعيد طلاء رصاص القباب اللى حالها بقى كرب
واهدى المسجد مصاحف مدهبة
وجدير بالذكر ان فترة توفيق كان زفت
واحتلال لسه داخل بقى ومش هيصرف الغازى 
ويكلف روحه دا جاى يسرق حضرتك






 بعد توفيق ييجى عباس حلمى ثم ينخلع
ويمسك مكانه طوالى حسين كامل
 وتتحول مصر من خديوية الى سلطانية
وهما 3 سنين يا كبدى يموت حسين كامل
وابنه يرفض الكرسى حسب الأصول المتبعة وقتها
ويقولهم بشبشبى العرش ... مش عايزه 





فيقع الكرسى ف حجر الغلاوى السماوى الفلاتى
 اللى كان مقطع اروبا زمان مهيصة
ثم نقل المشيان على حل شعره ... الى مصر
احمد فؤاد الاول



والأخ فؤاد اللى مبطيقوش انا .. ماصدق
 ومسك ف العرش زى القرادة ولبد فيها
وبعيدا عن السياسة اللى كان خاربها 
ومنبطح فيها تماما للأنجليز
الراجل الشهادة لله والحق لازم يتقال
كان حواليه ناس كويسة كتير
جنب الفاسدين
نتايج حركة التنوير والتعليم والروح الاستقلالية 
والروح المصرية بانت بعد سنين قهر واستغلال واستعمار
ودا ظهر بشدة ف كمية الحاجات
 اللى تمت خلال فترة حكمه 





كان عنده ناس دماغها كويسة
ف اطار الاصلاحات والمشروعات 
والحاجات والمحتاجات
 كانت لجنة الآثار العربية اللى حكينا عنها ف اول الحدوتة
 اللجنة دى كان رئيسها راجل اجنبى بالمناسبة !
وبيساعده مصريين 
وكان منهم المهندس حسن عبدالوهاب





واللجنة طلعت تقرير سنة 1931
بيقول ان حالة مسجد محمد على سيئة للغاية 
ماله يا ولاد ؟؟






قالك فيما معناه كدا وبالبلدى والشعبى والهجايص ...
ان الأعمدة المقام عليها القبة الكبرى
 وما حولها من قباب اخرى مش تمام
ومعمولة غلط 




وبدون الدخول ف تفاصيل فنية معقدة
كان فيه عيب ف تثبيت شدادت حديدية
 من فوق ومن تحت زائد حصول اكسدة للكانات 





الملخص انه حصل شروخ
وطلع التقرير بضرورة ازلة القبة الكبيرة من المسجد
والا هتحصل كارثة
وتقع على نافوخ اللى بيصلوا !! 






طب هتتشال لوحدها يعنى ؟!!
قالوا لأ هيا وانصاف القباب المحيطة بيها
وكله يتعاد تركيبه بعد تدعيم الأساسات



والحل ايه ؟
 قالوا هيتعمل هيكل من الصلب المجمع ف شكل ابراج
بنسب محددة عشان تشيل القباب تانى مضبوط
 ينفع؟ 




نانسى عجرم رفعت ايدها من اخر لبنان
وقالت ينفع آه
.. آه ونص !!
قالوا خلاص يا ولاد نانسى قالت ينفع يبقى ينفع
 اتكلوا على الله





وابتدت عملية الهدم والبنا من تانى
والحديد اللى اتشال كان وزنه 650 طن
عبوهاب اللى بيقول 





ولما اتعمل الصلب
كانت اول ضربة شاكوش ف القبة الكبيرة
ف 11 فبراير 1935 ثم تبعها باقى القباب 





وبيقولوا انهم لما هدموا لقوا بين اركان القباب
زلع فخار كبيرة
وطبعا استنتجوا انها كانت بهدف تكبير الصوت
 سماعات قناوى 
Made In Kena
والقلل القناوى ...  قصدى السماعات القناوى دى
 طلع اغلبها متكسر
وطبعا ساهمت بشكل غير مباشر ف الترييح اللى حصل
 جنب مشكلة الصلب والمقاييس الغلط 
فلوسك حرام يا سنكفولة





المهم ان الفريق اللى عمل اعادة البناء دا
 كان محترف بشكل كبير اخد رسومات عن كل حاجة
وبالتفصيل الدقيق الممل جنب التصوير الفوتوغرافى





وعملوا قباب جديدة احتفظوا بنفس ابعادها
مع تفريغ بسيط
وعملوا الزخارف طبق الأصل النسخة القديمة
بعد ما رسموها وصوروها




والعملية دى كلفت كدا شاكب راكب
 60 ألف هدم وبناء
و40 ألف بياض وزخرفة وتذهيب
و16 ألف فلوس الحديد
يا بلاش والله !




الملفت للنظر ف هذا المسجد حاجات كتير





الفسقية اللى ف الصحن مثلا




والقبة بتاعتها اللى متشالة على 8 اعمدة




جوا القبة قبة تانية رخام ثمانية الأضلاع
ومزخرفة ف اعلاها ومن جوا
وعليها كتابات بخط ايرانى اسمه (سنكلاخ)
 بعيد عنكم




مكتوب
 "يأيها الذين امنوا اذا قمتم للصلاة فأغسلوا وجوهكم
 وايديكم الى المرافق وامسحوا برؤسكم
وارجلكم الى الكعبين"





ومكتوب قال صلى الله عليه وسلم
 "الوضوء سلاح المؤمن"
وبعدين مكتوب التاريخ .. 1263هـ 





تحت الفسقية وتحت الرخام فيه صهريج
المفروض انه كان بيضخ المية لحد الميضة
عشان الناس تقعد 
وتتوضى  .. دلوقتى طبعا مفيش الكلام دا





من الحاجات المميزة كمان ف المسجد .. الساعة
 اللى بيقولوا انها كانت هدية لمحمد على ملك فرنسا
لويس فيليب




وبيقولوا ان الساعة دى كان مبصوص فيها
 الا من اول ما جت وركبوها ف البرج 
وهيا مبتشتغلشى !
فلوسك حرام يا سنكفولة




حسن عبدالوهاب مسميها .. الساعة الدقاقة
اللى جت مصر 1845 تحديدا
وانكتب ف الوثائق الرسمية ساعتها الأتى ...
الى ديوان المبيعات والتجارة
"27 رمضان 1262هـ بصرف مبلغ من المال
الى الأسطى الذى احضر الساعة المهداة من ملك فرنسا " 




وبيقال ان الساعة دى قعدت من ايام محمد على
متشتغلشى لحد ما جه فاروق الاول
وقال صلحوها فصلحوها 





بس رجعت باظت تانى !





ومش فاكرة وانا صغيرة انها كانت شغالة ابدا
يعنى واضح انها بايظة من السبعينات ع الأقل





ولحد اخر مرة روحت القلعة
كانوا بيرمموها ومعرفش اشتغلت ولا لسه
بس يا مسهل يمكن يصلحوها كمان خمسميت سنة
انننن الله مع الصااااااااابرين !




من ضمن الحاجات المميزة برضو ف المسجد
 الكتابات اللى فوق الأبواب والشبابيك
والمصحوبة بالزخرفة 
واللى عمرى ما فهمتها ابضنننننن !!




وساعات من الكلكعة يتهيألى ان فك رموز حجر رشيد
كانت اسهل لحد ما قريت الابيات اخيرااا
واللى كتبها الشيخ .. محمد شهاب الدين
شاعر القصر ف ايام محمد على
واللى بدا النظم من شمال الباب البحرى للصحن 
وقال ..





عروس كنوز قد تحلت بعسجد
مكللة تيجانها بالزبرجد

ام الجنة المبنى عالى قصورها 
بأبهج ياقوت وابهى زمرد





وكمل ...... 

وقد اثريا صاح يعرب عن حلى
مؤثره دون البناء المشيد

فدع قصر غمدان واهرام هرمس 
وايوان كسرى ان اردت لتهتدى

ودع ارما ذات العماد ونحوها
وعرشا لبلقيس كصرح ممرد

ودع اموى الشام وانزل بمصرنا
وبادر الى هذا بأيماء مرشد



فلو عددت فى الكون بدء بدائع
 لكن به ختم لذاك التعدد

وكم منشأت كالرواسى تخالها 
حصونا جرت فى البحر ذات تشيد


وكم مسجد مبناه يشهد انه
على وفق معنى انما يعمر آبتدى

وزر حرما مهما تشاهد جماله 
نظرت بديع الصنع فى كل مشهد


مبان اذا امعنت فيها مؤرخا
تريك على قدر العزيز محمد


ودى كانت اخر الأبيات 1261 هــ





الشاعر دا بغض النظر عن شعره يعنى
 كان مؤرخ وهوه مياخدشى باله
لأنه كان بيكتب على المطارح تاريخ الانتهاء منها
 لما بيكتب شعره 
فمثلا
منه عرفنا ان سلامة افندى المهندس
عمل مزولة الجامع 
وان الأبواب انتهى تركيبها .. سنة 1845
وان القبة الكبيرة خلصت تماما .. سنة 1846






كان فيه خطاط تانى للمسجد واسمه امين ازميرى
كان كتب الأيات القرآنية اللى فوق ابواب المسجد
 سنة 1851 





هذا الراجل الجميل .. امين 
 هوه اللى كتب لفظ الجلالة ومحمد رسول الله
 واسماء الخلفاء الراشدين ف المسجد من جوا






المسجد من كل الاتجاهات التلاتة
بحرى وقبلى وغربى فيه 64 شبااااك يا ثاااامح
ربنا يديكو الصحة 





قبر المخسوف على عينه اتحط عليه لوحة رخام
مكتوب عليها بالتركى مدح له ولمآثره
ومدة حكمه وتاريخ وفاته ..الخ







وبعد ما اتعملت كل التجديدات 
والمسجد قرب بقى على سنجة عشرة
احمد فؤاد ربنا كرم مصر
واخده وريحه ومات قبل ما يروح يفتتحه 





الكاست كمل شغل وعادى خالص لحد سنة 1939
ما خلصوا الشغلانة وبعتوا لفاروق الأبن
 ييجى يقص الشريط
ويصلى الجمعة ف 24 فبراير



والملك الشاب لقى منبر قديم معجبوش
 فأمر بعمل منبر رخام الابستر مطعم برخام احمر





له باب نحاس 
ومكتوب على جوانبه اسم الملك 




وبس سكت الدكتور حسن لحد كدا
طبعا بعد وصلات من المديح 
لعمنا فاروق الملك الصالح 
 خخخخخخخخ 
وشكرا



اللطيف ف الحكاية ان فيه رحالة جه مصر
ف زمن الخديوى توفيق تقريبا
اسمه دى فوجانى
 والراجل لف على الأماكن
ومنها مسجد محمد على وكان متكدر قوى






كان شايف ان المسجد له شعبية جارفة 
مش بسبب جماله
 قد ما كان نفاق للحكام وقتها
ومحلسة ف محمد على واسرته وافضالهم الخ 





كان رأيه ان المسجد معمول سمك لبن تمر هندى
 وملوش طراز محدد
وكان شايف المآذن جافة
وبالمناسبة متفقة معاه جدااااا





كان شايف المسجد من جوا بارد
وفخامته تحسسك انك قاعد ف صالون قصر
 مش ف بيت للصلاة
وخلوا بالكم كل دا كان عن الشكل القديم 
مش اللى بنشوفه دلوقتى ...





وحضرته مكنش عاجبه النقوشات اللى ف السقف
 وبيقول مش مريحة للعين .. !
#نعم_ياخويا؟
والسجاد الأيرانى مش قد كدا
هاه !
 اختصر .... قول شمبانزى وخلصنا ! 






القصد 
الراجل شنير المسجد خالص
وواضح انه كان ف حال مؤسف زى اغلب الآثار
بعد الاحتلال الانجليزى
لدرجة خلت فؤاد بعديييين يتحمس لتجديده





وبقى المسجد والقلعة محل اهتمام كل اللى جم بعده 
ان مكنش لأنها مصدر للفخروالمباهاة 
يبقى ع الأقل باعتباره أثر مهم 
وجزء من تاريخنا 
بغض النظر عن محمد على والملكية والمهلبية الخ 





وانا تقريبا خلصت
يتبقى اقول شوية حاجات ..





منهم ان مبيعجبنيش صحيح المآذن العثمانلى 
دى خالص
 اللى هيا .. شكل القلم الرصاص
جمال الغيطانى بيشبهها بالحراب .. قاسية وجافة
انا بقى بحس انها طراطير
عاملة زى ما تكون طراطير وملبسينها للعواميد !! 





لكن وبغض النظر عن أى حاجة
يكفى ان أنوه بأن مآذنة مسجد محمد على
هى (اعلى) مئذنة ف القاهرة
الأعلى وليس الأطول #للتوضيح 





وطبعا السبب معروف
 طولها بجانب وجودها على جبل المقطم
 مخليها الاكثر ارتفاعا وعلوا من بين كل مآذن القاهرة
#مكتوبالك يا سنكفولة يا مدهول









جمال المسجد وشهرته
 وارتباطه بالحكام وعلية القوم
خلاه دايما زبون دايم ف كروت البوستال









وهوه وكام مكان كدا ف مصر 
هتلاقيلهم كروت
وصور بالهبل ... على مر الزمن والعهود 




اما عن الاحداث اللى عاشها الجامع 
فممكن نتخيل انها ياماااا 




فيه ناس بتقول 
ان محمد على كان قاعد ف حتة قريبة
من مكان المسجد حاليا  وقت ما كان المماليك
 بتندبح زى الفراخ الشمورت
محدش متأكد لكن بيشاع ذلك 
وانه قد اختير هذا الموقع مخصوص للمسجد 
تكفير ذنوب وكدا 




وبما ان القلعة كانت مقر الحكم 
فنقدر نقول ان المسجد شهد 
مراسم واحتفالات بحضور شخصيات هامة 
من الساسة وكبار الشخصيات 





زى السلطان عبعزيييز لما زار مصر 
وسماعين استقبله ودلعه وفسحه وركبه القطر
وسمى شارع كمان على اسمه !





وزى ما المسجد شاف ضيوف من الغزاة الاتراك 








شاف الغزاة الأنجليز 
اللى استوطنوا مصر والقلعة كجزء من البلد 





وشاف كمان يوم خروجهم 1947 من القلعة 
ومن ثكنات قصر النيل 





وزى ما شاف 
اصحاب الوشوش الغريبة 
كان حاضر مناسبات القريب والحبيب 
وشهد من مطرحه كل سنة طلعة المحمل 
وخروج الكسوة الشريفة ق موكب مهيب 





وكان بيحضر لحد وقت قريب السوق 
اللى كان منصوب علطول عند القلعة 





لما تشوف اجانب فيه دلوقتى ف كل حتة منه





افتكر ان  الاجانب
كانوا بيحضروا الحضرات اللى كانت بتتم فيه
وانه من زمان وهوه فرجة ومتعة 






وطبيعى وانتا واقف فيه تلاقى ناس بتتفرج 
وناس تاخد جنب وتصلى فيه فرداى  





وقيل ان صلاة الجمعة 
كانت بتقام فيه لحد وقت مش بعيد
لكن ف عصر مبارك اخر 10 سنين
اتمنعت فيه الصلاة ايام الجمع
ويقال انها رجعت بعد الثورة وبعدين اتمنعت تانى
 معرفش الحقيقة ايه






لكن المؤكد ان المدفع اللى سموه الحاجة فاطمة
 قعد يضرب من فوق القلعة 
كل مغرب ف شهر رمضان
 عشان يقول للناس .. افطروا 
والسمجد شاهد ع الحكاية دى 
:) 




وبليل بقى يشخلعوا القلعة 





ويلبسوها الوان شفتشى
 زى برج القاهرة 





وانا صغيرة اول مرة دخلت المسجد
القناديل اللى كانت ف السقف دى بهرتنى
 واخدت عينى 





دلوقتى النقوش اللى ف السقف هيا اللى بتشدنى اكتر





ومن صغرى ولحد آخر مرة 
مهما كنت واقفة فين لازم 
دايما اول ما أبص ف السقف 
تقع عينى من كل الاسامى 
على اسم .. سيدنا عمر 
:)





اللى يركز وهوه قاعد كدا هيلاقى دور علوى
فيه زى بلكونة عريضة
بيقولوا زمان كانت مخصصة للسيدات
من علية القوم والأسرة المالكة 
عشان تحضر فيها الصلاة ف المناسبات  








مسجد محمد على لفت انتباه الفنانين


 




ورسموه ف لوحاتهم .. كتير





ولازم نعترف ان المسجد عمل تميزللقلعة
اللى كانت قبله تايهة كدا 
وجافة 
وروحها باردة 







انا بحب اللوحة دى جداااا
الرخام دا جاى من محاجر بنى سويف يا عيال
 تخيلوا الجمال









وفى سياق متصل 
القلعة والمسجد زى ما اتخلدوا ف عيوننا
واللوحات والصور وكروت البوستال
خدوا وضعهم على عملاتنا وطوابعنا كمان




وكالعادة كان مسجد محمد على
هوه اللى بيخطف العين بشياكته وجماله





وبالمناسبة بحبه ف الصور الملونة جدا




وبحب قبابه لما كانت مدهونة بالأخضر
ونفسى مرة يغلطوا 
ويدهنوها اخضر لطيف كدا 
بدل الفضى ..  




منطاد زبلن فوق القلعة وبيمسى ع المسجد 
اتفضل يا باشا نسقيك شاى






منبر وكرسى للمقرىء 
من تحف المسجد  
يخربيت الجمال 




الملك فاروق ف احدى زيارته للمسجد 





دا الحاج مالكوم اكس لما زار مصر 1964
وصلى ف مسجد محمد على





ماكيت للقلعة وموقع المسجد فيه









واخيرا 
انا بحب الفسقية دى قوى





الواحد ممكن يقعد على واحد من كراسيها 
وهوه بيتوضى فيسرح ف ملكوت الله 
وينسى الدنيا 
واللى فيها 






المسجد من جوا طراوة بشكل غريب 
مع انك لو خرجت براه خطوة واحدة 
الشمس تنقحك .. !






كتاب حسن عبد الوهاب
 مساجد مصر الأثرية
طباعة الهيئة العامة لقصور الثقافة بـ 12 جنيه
الجزئين
ومعرفش لسه فيه نسخ ولا خلص



ودايما افتكر .. 
المكان مش حتة صخرة وحديد وتراب
المكان ذكريات
واظن كلنا المكان دا له ذكرى عندنا وغلاوة






و طبعا بعد كل هذا الرغى 
ميجيليش عين اقول ملاحظات 
غير المعتاد ان القلعة مهملة والجامع كمان 
زى كل حاجة غالية ف مصر
آه وحاجة كمان كاتمة على قلبى 
أقولها ليجرالى حاجة
بخصوص حكاية ان محمد على هوه محيى مصر 
ومنقذ مصر 
وباعث نهضة مصر  
ولولاه كانت مصر ضاعت واتقسمت 
والراجل كان كان حاطط روحه على كفه
وكان ممكن يغتالوه ولازم يحكم البلد 
مصرعاوزة راجل يشكمها 
ويعمل ف مصر ما بداله 
ويخليك لمصر ولينا يا حامينا 
وانتا الشعب والشعب انتا
وفاضل يتقال دا  لولاه مكناش اتخلقنا 
ولا انوجدت مصر من اصله 
.. بالمرة 
والسؤال هو 
هوه مصر  امتى هتخلص من طريقة التفكير
ف العيشة السودة اللى احنا عايشينها دى يا رب ؟!!!
ومحدش يجاوب
 انا ببعبع بس 



طولنا عليكم معلش
 :)
شكرا على المتابعة 
وتصبحوا على ألف خير


------------------------------


Mahmoud Abdou @m7moud_3abdou 





Ahmed حمدي Wafy @ahwafy 
من قلائل الصور اللي حاطتها عالنت :)






Mahmoud Abdou @m7moud_3abdou 
"محمد المأثر على كل المآثر..عزيز مختار ساد كل مسود "




Mahmoud Abdou @m7moud_3abdou 
أهى الوضوء سلاح المؤمن أهى :D





 مِرڤَت ‏@frikeko   
 فعلا ايام الطفولة كنت بأشوف نقل لصلاة الجمعة منه


 اكتئاب ما بعد الثورة ‏@MahometusUsama   
 التتويج فى أسرة محمد على إن الحاكم يصلى
أول جمعة فى الجامع السلطان
فؤاد معرفش ﻷن اﻷنجليز كانوا واخدين القلعة
وعوضها لما بقى ملك


 hoda mahmoud ‏@hodaelsorogy   
 في المنطقة المحيطة بالقلعة في جوامع كتير احلي
 بس النفاق طبعا هيخلي جامع الأسرة الحاكمة
احلي جامع زي جوامع العسكر دلوقت




sally soliman @sasosall 
لا مشتغلتش و لا خلصوا ترميم :)


hoda mahmoud @hodaelsorogy 
الزلع في الحواديت بتبقي مليانة فلوس


memento mori @MDamarani 
 واضح ان المصاحف المدهبة كانت ببلاش على ايامهم


memento mori @MDamarani 
وانا صغير كنت منبهر جداً بالنجف ده




اكتئاب ما بعد الثورة @MahometusUsama 
 صحيح سألت لحضرتك على هيئة قصور الثقافة
فاتحين فى شارع القصر العينى قبل روزاليوسف


Arminuis @amrsaleh88 
 البوست دا اصاب الاعدادية في مقتل

هناك 3 تعليقات:

  1. انا بجد مش قادرة أوصف إحساسي وانا بقرا البوست الرائع ده
    وأسلوبك يا فاتيما يخلي اللي ما بيحبش يقرا .. يقرا يقرا ويقرا
    من كتر ما البوست عاجبني مش هاين عليا أقفل الصفحة .. تسلم ايدك ومجهودك فاتيما :)

    ردحذف
  2. Fatema Al3ubaydy (المشخصاتية.صولا)
    --------------------------------------------------

    ميرسى يا فطومة
    كلك ذوق
    مبسوطة جدااا ان البوست عجبك
    ويارب كل حكاية تعجبك
    تسلميلى وبوسات وحضونات ليكى ولسوسنة الجميلة
    :*

    ردحذف
  3. مبروك تجديد المدونه يا ست الكل يا شهروزه....ولا نقول فاتيما؟؟....واضح جدا انك عندك مكتبه ضخمه وبتحبي اقتناء الكتب...ف ياريت كل حكايه تبقى تقولي اسماء الكتب والمواقع الالكترونيه اللى بتستعيني بيها....انتى اوقات بتذكريها وكتير بتنسي
    وليكي خالص اعتزازي وتقديري :)

    ردحذف

Related Posts Plugin for WordPress, Blogger...
"حقوق الملكية والملوخية والمهلبية ... الخ
محفوظة للست شهرزاد وإياك حد يسرقها ويحاول يزعلها آغجر .. مفهوم ؟ "