الخميس، 26 مارس 2015

المقريزى ... زكريا بيقول





حكاية النهاردة عن شخصية مميزة جداااا
 بالنسبة لشهرزاد شخصيااااا




وتأتيكم الليلة برعاية شاليمار .. زكريا بيقول 




وقبل ما نقول هوه مين هذوها الشخص
 فلاش باك الى طفولة شهروزة ف القرون الوسطى كدا
 لما اتعرض مسلسل أديب عرض اول
وكان تلتربعكو لسه متولدشى اشاسا



قوم نور الشريف بطل المسلسل
 اللى كان عنده هرشة ف نافوخه وغاوى أدب وقراية
وسافر فرنسا وكان مسميها بلد الجن والملائكة 
وقصص كدا
ف مشهد م المسلسل كان بيحكى لحبيبته .. نورا
وكانت هبلة مش فاهمة حاجة ف أى حاجة
 لأنها مكنتش متعلمة لكن بتموت فيه 
كان بيشاورلها ع الكتب ويقولها دول اصدقائى ... !
كل واحد فيهم علمنى وسمعته واستفدت منه وحبيته
 المشهد دا كان بيأسرنى 
وانا لسه عيلة اخر ثقافتى مجلة ميكى




لما كبرت بقى .. أدركت المعية الفكرة
وازاى ان ناس تانيه من ازمان قريبة او بعيدة
 وعمرك ما شوفتهم بس قادرين بحروفهم وافكارهم
يكونوا حتة منك
صاحبنا النهاردة واحد من هولاء اللى بكلامه قدر يشدنى
 وينقلنى لزمانه .. بألة زمن ولا اروع
انه ابو المقاريز 
تقى الدين المقريزى الشهير عند شهرزاد 
بزكريا بيقول





ويعنى يا خويا المؤرخين دول عمالين يتحفونا
 بروايع ودرر الزمن الغابروبننقل عنهم
ومحدش بيفتكرهم ولا بيفكر يحكى حكاياتهم .. ليه ؟؟
هنحكى اهو
بس الأول نرد الفضل لأهله
ونقول ان حكاية الليلة من كتاب
مؤرخو مصر الاسلامية ومصادر التاريخ المصرى
 لـ محمد عبدالله عنان




الكتاب ممتع لأبعد حد
بيحكى عن اشهر من سرد حكايات مصر البهية
من اول الفتح الإسلامى .. لحد دخول الحملة الفرنسية
بداية من عبدالرحمن بن عبدالحكم
والكندى وبن زولاق والمسبحى والقضاعى
 ثم النويرى والعمرى والقلقشندى
والمقريزى والعسقلانى وبن تغرى بردى
والسخاوى والسيوطى وابن اياس والبكرى
ونهاية بالجبرتى ..
 ف مرات جاية نحكى عن ناس منهم



ونبدأ بقى حكاية تقى الدين المقريزى
احمد بن على بن عبدالقادر بن محمد بن ابراهيم
بن محمد بن تميم بن عبدالصمد بن ابى الحسن
بن عبدالصمد بن تميم التقى ابو العباس 
بن علاء بن المحيوى الحسينى العبيدى
و اخر اسمين دول اللى فيهم الزبد
 ليه ؟
عشان المقريزى اللى جده من اهل الشام
وتحديدا .. بعلبك
يرجع نسبه الى آل عبيد وجدوده كانوا فاطميين متأصلين
 لكن الجد اللى من حارة المقاريز ف بعلبك
وكان من رجال الحديث هناك 
هيبعت ابنه على مصر
الأبن هيسافر على مصر ويقعد فيها ويخلف أحمد
اللى هيشتهر بعديييين بين الناس 
بتقى الدين المقريزى




تؤتو بقى .. اهله بيت علم وناس ولاد أصل وبتاع
قوم هيسكنوا ف حارة برجوان
اللى قعدت لفترات طويلة ف زمن الفاطميين
هيا وما حولها سكن علية القوم والوزراء الخ
ونركز بقى كويس ف التواريخ الآتية
حيث انه المقريزى اتولد 1364م ومات 1441 م
وف الفترة دى
عاصر ف طفولته وشبابه وشيخوخته 
سلاطين مماليك ياماااا



ابو المقاريز عاصر الآتى
1) المماليك البحرية
--------------
زين الدين شعبان 
علاء الدين علي
 زين الدين حاجي 
ثم

2) المماليك البرجية
--------------
الظاهر سيف الدين برقوق
الناصر فرج بن برقوق 1
المنصور عبد العزيز بن برقوق
الناصر فرج بن برقوق 2
المستعين باللّه أبو الفضل العباسي
المؤيد أبو النصر شيخ المحمودي
المظفر أحمد بن الشيخ 
الظاهر سيف الدين ططر
الصالح ناصر الدين محمد بن ططر
الأشرف سيف الدين برسباي
العزيز جمال الدين يوسف بن برسباي 
الظاهر سيف الدين جقمق



يا دين النبى يا محمد !!!
طبعا فيه سلاطين ف دول اتقلبوا سريع سريع ومقعدوش
 وفيه ناس قعدت 10 و16 سنة
وفيه ناس اتشالت ورجعت زى فرج بن برقوق 
وناس انقتلت 
افلام هندى كدا 
وطبعا اغلبهم مات مقتول
 الا فيما ندر اللى مات على سريره
وساب العرش لابنه بهدوء
 المهمممم المقريزى اتولد ف عهد السلطان شعبان
ومات ف عهد السلطان جقمق




والشاب اللى كان شيعى الهوى وسنى المذهب
 شانه شأن ابناء الطبقة الوسطى انذاك
راح يتعلم ف الازهر جامعة هذه الأيام 
ومقصد اى شغوف بالعلم ودرس علوم الدين
ف مجية شخص مهم من شمال افريقيا
 كان اسمه .. ابن خلدون
وهذا الجدع لجأ لمصر هربان من البطش ف وطنه 
قوم اييييه ؟
يقيم ويدرس ف الازهر
ويعمل حلقات دراسية ونقاشية مختلفة
المقريزى هينتبه لهذا الوافد الجديد
وكلامه يحرك دماغه .. فيبقى من تلاميذه النجباء



وزى ما بيقولوا كدا
 المقريزى انتمى لمدرسة ابن خلدون الفكرية
كان عاجبه فيه ثوريته على الاوضاع الزفت
اللى كانت شبيهة بما يحدث ف مصر تمام
وبعد ما خلص دراسة جه وقت الشغل
 اول وظيفة استلمها المقريزى
 كانت ف ديوان الانشاء بالقلعة
مكان ما كان والده شغال زمان 
نظام الحاج المقريزى وولده



- بتشتغل ايه يا تؤتو ف الديوان ؟
- بشتغل كاتب يا أبلة
- بتكتب ايه يا حبيبى
- بكتب مراسلات وحاجات ومحتاجات 
.........
مش فاهمة ؟؟
ديوان الانشاء دا والعهدة على الراوى
كان يوازى وزارة الخارجية ف زماننا الحالى
قوم مكنش بيشتغل فيها الا العيال النضيفة الحلوة 
والمتلمعة وبتبرق والمتعلمة قوى طبعا 
واكيد كان فيه وسايط برضو زى ايامنا
احنا والمماليك فولة واتقسمت نصين
 القصد الشاب كان شاطرف الادب والتاريخ
وتقويم البلدان والحساب
 فشغلوه





بعد شوية لفت الأنظار اكتر فاتعين نائب حاكم
وبالبلدى كدا .. قاضى
 المقريزى اتعلم ع المذهب الحنفى لكن سابه
ونقل القناعات للمذهب الشافعى
بعد شوية هيمسك الامامة ف جامع الحاكم
ودى وظيفة كانلها شأن
 والاهم من كل دا ان ابوه كان فرحان جداااااا
 بالحكاية دى 
لأنه وهوه صغير لما راحوا مصر ودخلوا لجامع الحكام
 قاله جملة منسيهاش ابداااا
قاله (هذا جامع جدك) 
طل اهو بقى امامه اهو وابسط يا عم !





بيقولوا كمان انه كان خطيب لجامع عمرو
فترة من الزمن .. 




وانه كمان ولى الخطابة والامامة بمسجد السلطان حسن
 الظاهر انه كان شاطر ولا ينقصه جنب البلاغة
الحماسة وجذب المستمعين




بعد شوية هياخدوه يدرس الحديث ف جامع المؤيد
وهيبقاله حلقات دراسية وهيبقى زى استاذ جامعة كدا
 بأدبيات العصر الحالى
حوار التدريس دا تم بتوصية من ابن خلدون شخصيا
اللى رعاه كتلميذ نابه ووصى عليه السلطان برقوق
اللى كان ماسك الحكم وقتها






بعد كل الشغلانات دى ..
المقريزى هيدخل ف جو تانى خالص
هيتعين ف الحسبة 1398م
 والمحتسب بقى قصة تانية خااااالص يا ثااااامح
ابو المقاريز اتعين محتسب للقاهرة والوجه البحرى
ودى وظيفة زى مفتش التموين كدا
بس على صلاحيات اكبر وأسخف وأبشع احيانااا
 خصوصا ف الأيام السودة اللى مليانة ظلم 




الشغلانة كان من ضمن مواصفاتها النزول للأسواق
ومراقبة البيع والشرا وعقاب المخالفين
وسماع شكوى المستهلك ومحاربة الغش
وتثبيت الأوزان والمكاييل
وسن قوانين وعرض قضايا وهم ما يتلم
 وقرف بالهبل
لدرجة ان المقريزى من كتر النكد
 اعتذر عن الشغلانة دى 
سنتين ورا بعض يقدم استقالة وتترفض !
الجدع طفش وقال مش لاعب 




ف خضم الفساد والفوضى العارمة اجتاح القاهرة
طاعون شرس 1403 م
المقريزى كان عنده بنت وحيدة عمرها 6 سنين 
وماتت
 :(
وبعد فترة من الحزن والإنزواء صدرله قرار تعيين
من السلطان برقوق
بأنه يدرس ف المدرسة الأقبالية والأشرفية
 لكن المرة دى ف دمشق 
فالمقريزى هيسافر
سنة 1408 هذا الكلام لما يروح على دمشق
ويقعد فيها شوية ويدرس
ثم يمسكوه نظارة البيمارستان النورى
واحد كان من اكبر مستشفيات زمانه





وفرج ابن برقوق هيمسك مكان بابا
 فيعين المقريزى نائب حاكم .. يعنى قاضى لدمشق
المقريزى مش هيعجبه القصة دى ويستعفى 
ويمشى من الشام كلها
ويقرر يرجع على مصر
 قوم ف وسط السكة يقرر يروح يحج
فيشد الرحال إلى بيت الله
وبعد الحج يقرر يقعد هناك يّدرس شوية
الشوية دول بقوا 5 سنين
وف النهاية يرجع على مصر
عشان يستقر اخيراااااااااا ف حارة برجوان
 حيث الحنين ابدا لأول منزل
 ويعتزل العمل العام ويتفرغ للكتابة




والحقيقة ان موضوع الكتابة التاريخية دا مجاش على كبر
هوه نفسه اللى بيحكى انه من صغره
وهوه بيسجل أى حاجة تيجى على باله
فقيدت بخطى فى الاعوام الكثيرة
وجمعت من ذلك فوائد قل ما يجمعها كتاب
 او يحويها لعزتها وغرابتها اهاب "
زائد تأثره بأستاذه .. ابن خلدون
والتعلم ف الأزهر وانفتاحه على ثقافات مختلفة
ف مذاهب عدة وتواريخ كمان عدة
والمتابع لتاريخنا ببساطة يقدر يوصل لنتيجة هامة الا وهى
ان تاريخ الفاطميين والمماليك
هما اكتر فترتين مليانين ثراء ومتعة وغرابة ...
هوه عاش فترة منهم .. وسمع عن التانية
 ونقب ف كل الفترات



وزى ما قولنا ف البدايات
 كان فيه ناس قبله مؤرخين كثر 
وشدوه ف السكة دى بلى سابوه
فترة المقريزى كان فيها معاصرين له على مستوى عال
زى ابن حجر العسقلانى اللى كان صديقه
وفيه تلامذة نجباء 
واخرين مش تلامذة لكن برضو شطار
وجوده وسط اسماء كبيرة زى ابن تغرى بردى
 والسيوطى والسخاوى وابن حجر العسقلانى
وقبلهم ابن خلدون خلاه يلمع اكتر ويتوهج
ويبقى من اساطين المجال
المناخ كان مشجع وبيدفع للتألق 




مؤلف الكتاب اللى بحكى منه بيلمح لنقطة مهمة جداااا
وهى ان ف هذا الزمن الأغبر بتاع المماليك
كانت الحتة الوطنية مشتعلة ف القلوب بشكل ما
يعنى محدش ف المؤرخين وقتها مثلا
وقف ف وسط ميدان التحرير وهتف
مصر هتفضل غالية عليا والكلام دا
لكن كان واضح ف كتاباتهم الميل الوطنى
كانوا بيتكلموا عن مصر بشكل مختلف
حيادى ف العرض جايز
لكن كان فيه انتماء مستتر
مظهرش بشدة الا بعدين لما جه الجبرتى
وكان عمدة الحماسة والوطنية 
وكان بيدى الغزاة اللى من برا
واللى من جوا بالكاتنلة القدييييمة ومهموش 




المقريزىبيقول بنفسه
" وكانت مصر هى مسقط رأسى وملعب اترابى
ومجمع ناسى ، ومغنى عشيرتى وحامتى
، وموطن خاصتى وعامتى 
وجؤجؤى الذى ربى جناحى فى وكره ،
 وعش مأربى فلا تهوى الأنفس غير ذكره ،
 لا زلت منذ شذوت العلم واتانى ربى الفطانة والفهم
،ارغب فى معرفة اخبارها
وأحب الاشراف على الاغتراف من ابارها
واهوى مساءلة الركبان عن سكان ديارها ... "
يا ليهوى
 مصر بيتقالها جؤجؤى يا عيال
 شوف الرومانصية 



والحقيقة انه يبدو من سيرة حياته
انه كان قرفان من احوال السلطة والحكام الزبالة
وسيبانه للوظايف اللى كان غيره بيدفع فيها فلوس
عشان يقعد فيها ويتربح ... دليل
ف اكتر من موضع
كان بيقول رأية بصراحة ف العالم الواغش دى
 وخد عندك
" صارت المماليك السلطانية أرذل الناس ،
 وادناهم،وأخسهم قدرا ، وأشحهم نفسا
واجهلهم بامر الدنيا، وأكثرهم اعراضا عن الدين،
ما فيهم الا من هو أزنى من قرد ، وألص من فأرة ،
وأفسد من ذئب،
لا جرم ان خربت مصر والشام حيث يصب النيل
الى مجرى الفرات بسوء أيالة الحكام ،
 وشدة عبث الولاة، وسوء تصرف أولى الأمر .. "
  الله ينور عليك يا حاج 




الراجل بيشتمهم بالمفتشر اهو وبيهزأهم
اكمنه عاصر زمانهم الأغبر
وانكوى بنارهم بموت بنته ف طاعون
كان شدته سببها اهمالهم وسوء تدبيرهم وبيشرح اهو 
" فأذا تأملنا الحادث  من بدايته الى نهايته 
وعرفناه من اوله الى اخره
عرفنا ان ليس بالناس سوى سوء تدبير الزعماء والحكام
وغفلتهم عن النظر فى مصالح العباد"




القصد .. المقريزى بدأ ف تسجيل الحوادث
وكتابه الأفكار من وهوه لسه شاب
لكن الشغل والتدريس اخدوه لحد ما سافر دمشق
هناك بقى المية والخضرة والوجه الحسن
والمناخ سمح بالتفرغ شوية للكتابة ايام الروقان
يخربيتك يا اسد اب وابن 
واللى موجودين دلوقتى روخرين




ولما كمان سافر المقريزى على مكة
 يقال انه ألف فيها كتابين صغننين كدا على السريع
لكنننننن
 لما رجع مصر بدأ مشروع العمر واهم انجازاته قاطبة
المواعظ والاعتبار بذكر الخطط والآثار
واللى كتبه واصفا فيه شكل القاهرة وغيرها
الشوارع والبيوت والمساجد والاسواق الخ 
جنب الوصف كان فيه حكايات تخص الاماكن والناس
الخطط ضمت مصر بكل معالمها وناسها
 واسواقها ودورها وجوامعها ورياضها ومدارسها 
وكل حاجة





واشتهرت بالخطط ... اختصارا للعنوان يعنى
بقت تعرف بالخطط المقريزية
وصحيح الخطط دى كأسلوب كتابة كانت منتشرة
 ومكنش المقريزى هو اول نفر يعملها يعنى
لكن خططه كانلها الحضور عبر التاريخ 
واتخلدت فيما بعد لدقتها






جنب الخطط اللى كانت الاشهر
كان فيه كتب تانية
السخاوى مثلا بيقول انه قرى للمقريزى 200 مجلد
بخط ايده ! 
الجدع كان غزير الانتاج ونشيط والله
بس اللى وصلنا مكنش كتير ولا كل حاجة
لكن اشهر ما وصل 
...........
* السلوك لمعرفة دول الملوك
* كتاب المقفى
* درر العقود الفريدة فى تراجم الاعيان المفيدة
* اتعاظ الحنفاء باخبار الائمة الفاطميين الخلفاء
* البيان والاعراب عما فى مصر من الاعراب
* عقد جواهر الاسفاط ف اخبار الفسطاط
ودا محدش قراه .. موصلناش
 لكن كان عن تاريخ الفسطاط واعلامها وناسها
 للأسف ضاع





خطط المقريزى كانت درة التاج
لكن كتبه التانية مكنتش اقل اهمية
خصوصا عن تاريخ الفاطميين
وكتابه اغاثة الامة بكشف الغمة اللى كان موجز وبليغ
ف عدد قليل من الصفحات استعرض النكبات
اللى مرت على مصر ف تاريخها من مجاعات وقحط
ثم استعرض اسباب المحنة الحالية 
وكتبلها روشتة علاج
مستعين ف ذلك بخبرته السابقة كمحتسب شاف وعرف
 قد ايه فيه فساد ودناوة
وان السلم لازم يتكنس من فوق عشان تنضف
زى ما كان بيتقال ايام ثورة يناير





وف عرضه لحكاية الطاعون وغيره
من كوارث طبيعية الحكام برروها 
بأنها مصايب من فوق وايش يعملوا هما 
كتب الآتى
 "المجاعات وامثالها ليست شيئا مفروضا على الانسان
من على ينزل بامر ويرتفع بأمر
 كما انها ليست ناجمة عن جهل الطبيعة وعماها
دون ان يكون للانسان نصيب فيها
 بل هى ظاهرات مادية اجتماعية لم تلازم البشر دائما
ولكنها تقع آنا وتنقطع آنا اخر
تقع عندما تجتمع اسبابها ودواعيها وتنقطع ع
ندما تنتهى المسببات والدواعى "



عداك العيب يا ابو سامية 
الراجل اوجز 
وقالهم ف وشهم كدا .. ان الحكام هما السبب
بسوء التدبير ومش كل شوية ادفعوا لموا هاتوا لمصر
 وانا عاوز اديك بس مش قادر اديك والأفلام دى
واذا كان ابن تغرى بردى ابن الامير
كان فوق شوية وبعيد عن الطبقة الدنيا
فالمقريزى بحكم وظايفه شاف حكايات
وعاصر احداث .. فرقت معاه ومعانا







شاف الطبقات كلها من اول عليا القوم
اكبر راس زى برقوق الأب والأبن
والمؤيد شيخ والوزراء والامراء والعسكر وخلافه





وشاف التجار واصحاب الحرف والمهن 
من اعلاها لأدناها
ودخل ف زوارقها وعرف عيوبها وكل ما فيها 




سمع لشكاوى الناس احزانهم ومصابهم
 لما كان قاضى 
وشاف كمان العيوب والسقطات 





شاف المرض والفقر والجهل
لما كان ناظر للبيمارستان ف دمشق




ولما مسك الحسبة ف مصر




حضر اعياد المصريين واحتفالاتهم 






درس ف الازهر وقرب من طبقة المثقفين
والعلماء ف هذا الزمن وشاف اطياف متنوعة منهم
من شتى بقاع الدنيا
وخطب ف اكثر من جامع
وممكن نتخيل سمع كام استفسار وكام سؤال
وعرف كم من احوال عن الناس البسيطة العادية





حكى عن المنشئات .. المستشفيات والمساجد
والمنازل والثكنات والقصور والاسواق
حتى اللى معاشوش تتبع سيرته
وحكى عنه كأبرع ما يكون
 كان وسط الناس ومنهم
مكنش منفصل ف برج عالى وعايش ف فقاعة 





ناهيك عن انه عصر المماليك
كان ثرى بكم ميلودراما مفيش كدا
غدر ودم وشهوة وسلطة وظلم ومجاعات
وحروب وبلاوى وخيانات وافلام هندى بالعبيط
وجنب انه كان مثار تقدير واعجاب علماء عصره
فهوه كمان بعد موته ولقرون تلت ولحد النهاردة
 هوه واحد من اشهر وادق مؤرخى عصره
 وتاريخ مصر الاسلامية




ومفيش حد ممكن يبحث ف فترة تاريخية للمماليك
والفاطميين وما كتب عنه المقريزى
الا ويتم الرجوع اليه كأحد المصادر الثقات
وبراعة الوصف ورشاقة العبارة واسلوبه المميز
واللى تحس انه مكتوب ف ايامنا دلوقتى
مش بس الاحداث المتشابهة
 لأ 
الأسلوب نفسه كان سلس مش مجعلص كدا



وشوف الراجل كان اسطى شاطر ازاى
والكل بيشهدله قوم لازم يطلعلنا حد زى الخازوق
ويذم فيه ويتهمه بالسرقة عينى عينك كدا
مين الوغد دا يا شهرو ؟!
الوغد دا يبقى السخاوى
اللى كان من اشهر المؤرخين لتاريخ مصر
ووقت ما مات المقريزى كان السخاوى لسه شنبه بيخط
وصوته هيتخن ومحدش يعرفه اساسااا
كان ابن 14 سنة يا دوب !



السخاوى حسبما قيل عنه كان ذكى ونبيه وشاطر
 وكان تلميذ ابن حجر العسقلانى المؤرخ الكبير
والواد يا خويا اتعلم منه الشطارة
 لكن متعلمش الادب !
عشان بعد ما يدرس ويسافر ويروح وييجى
ويعمل ما بداله ويشتهر ف اوساط العلماء
 ويبقاله اسمه بدل ما يحترم نفسه
هيروح مألف كتاب عن اعلام عصره
هيتشكرلهم وكدا يا شهرو ويذكر فضلهم وبتاع ؟!!
ابضننننن
 دنتوا ناس طيبين
دا الواد عامل الكتاب 
عشان ينفسن عليهم نفر نفرررر
 #بصوت_شادية




الكتاب اسمه 
" الضوء اللامع فى اعيان القرن التاسع "
وحط فيه على المقريزى والسيوطى وابن خلدون
وابن تغرى بردى وغيرهم
 وف الفصل الخاص بالمقريزى قال الآتى
"وكان حسن المذاكرة بالتاريخ لكنه قليل المعرفة
بالمتقدمين ولذلك كثر له فيهم وقوع التحريف والسقط
وكانت له معرفة قليلة بالفقه والحديث والنحو"
ف موقع اخر قال
" وانه كان كثير الاستحضار للوقائع القديمة
فى الجاهلية وغيرها واما الوقائع الاسلامية
 ومعرفة الرجال واسماؤهم
والجرح والتعديل والمراتب والسير
وغير ذلك من اسار التاريخ ومحاسنه فغير ماهر فيه .."
طيب لحد دلوقتى بيعيب على خلفيته 
قال ايه كمان .. ؟





" اقام ببلده عاكفا على الاشتغال بالتاريخ
 حتى اشتهر ذكره وبعد فيه صيته
وصارت له جملة تصانيف كالخطط للقاهرة
وهو مفيد كونه ظفر بمسودة الاوحدى
فأخذها وزادها زوائد غير طائلة " ... !
الكلام معناه انه اخد مسودة حد تانى
وعمل بيها الخطط المقريزية ..؟
يقصد يا شهرو 
لأ 
يمكن ميقصدشى !!!




لا ميقصدشى ايه ..؟!!
 دا ف كتاب تانى اسمه
"الاعلان بالتوبيخ لمن ذم أهل التاريخ"
هيكرر الجملة دى عشان اللى مقراش يقرى !
"وكذا جمع خططها المقريزى وهو مفيد
قال لنا شيخنا : انه ظفر به مسودة لجاره الشهاب
احمد بن عبدالله بن حسن الاوحدى بل بيض بعضه
فأخذها وزاد عليه زيادات ونسبها لنفسه"


لأ كدا وضحت
هوه بيقول ان المقريزى سرق مسودة الاوحدى
وبيضها وعمل عليها شوربة .. 
قصدى الخطط بتاعته !
مين الاوحدى 
وايه القصة بالضبط ؟؟؟
الحكاية انه الاوحدى كان من المؤرخين برضو
عاصر المقريزى وكتب خطط لكن موصلناش منها حاجة
سمعنا عنها بس وضاعت ف الوبا 
قوم اييييييييييه ؟



متفهموش السخاوى جاب منين
حوار ان المقريزى سرق المسودة بتاع الاوحدى
وعمل بيها خططه ؟!!
 المؤسف انه بينسب القول دا لشيخه 
يعنى بيقول ان ابن حجر العسقلانى
قال بعضمة لسانه الحكاية دى .. !!
 ودا غريب جدا لأن الناس الحلوة بعد كدا
بحثوا ف الموضوع دا ولقوا العكس
العسقلانى كان صديق للمقريزى
وقال عنه بالحرف ف احدى المواضع انه
"رفيقى الامام الاوحد المطلع تقى الدين المقريزى "
#كااااااابسة_ياسخاوى





زائد ان المقريزى نفسه ف الخطط بتاعته
 وعن طريقة كتابتها قال نصا
" انى سلكت فيه ثلاثة انحاء
 وهى النقل من الكتب المصنفة فى العلوم والرواية
عمن ادركت من شيخة العلم وجلة الناس
والمشاهدة لما عاينته ورأيته
واما الرواية فعمن ادركت من الجلة والمشايخ"
يعنى الراجل قال عمل ايه




ومش بس فتحها ف المطلق دا ذكر الاسماء
 كل فى موضعه
كل ما كان بيقتبس من حد كان بيذكر اسمه
والجدع قال انه نقل عن مؤرخين يامااااا يا ايسااااامة
وقالهم بالإسم الكندى والقضاعى وبن بركات النحوى
 والجوانى وابن عبدالظاهر وابن المتوج وابن عبد الحكم والمسعودى وابن زولاق والمسبحى وابن المأمون





يعنى الراجل كان موضوعى اهو
 زائد ان الأوحدى اللى بيحكوا عنه مات سنة 811هـ
 بينما خطط المقريزى استمرت كتابتها
لحد قرب وفاته 843 هـ 
فايه ؟
حتى لو فرضنا جدلاااا انه استخدمها ونسبها لروحه
فهيكون استعان بجزء ضئيل جداااااا منها
ووقف عن حقبة زمنية بعيدة
و مش مستاهلة يعنى سرقة وافلام !!




اللطيف ان الحاج السخاوى المنفنس
لما عمل كتابه الضوء اللامع
 حط نفسه ضمن اعلام عصره
وافرد لنفسه فصل انجازات
مع شكرنيات من المعاصرين له 
وفعلا ... النرجسية ملت النملية 
وفعلا ... ما عدوك الا ابن كارك 
وفعلا ... اللى عليه شديد يا سعاد
#معلش




على كل تهمة السرقة دى ملزقتش يعنى
اللهم الا أحد المستشرقين اللى مسك فيها وقال اه حصلت
 عشان اسبابهم الوضيعة المعروفة للتشكيك بعدين 
غير كدا ولا الهوا
غير ان اخرين ردوا على السخاوى
 وفندوا المزاعم ف زمانه .. زى السيوطى
 اللى كان من المؤروخين التقال وقتها
 وحصلت بينهم معارك ادبية وخصومات بشعة




السيوطى عمل كتاب سماه
"الكاوى على تاريخ السخاوى "
ومسكه غسله وفرده ونشره ونشفه وكواه وتناه
وحطه بدل المشاية اللى قصاد عتبة البيت



اهو بيقول
" ماذا ترون فى رجل ألف تاريخا جمع فيه أكابر واعيانا
ونصب لأكل لحومهم خوانا ملأه بذكر المساوى 
وثلب الاعراض
وفوقّ فيه سهاما على قدر اغراضه
والأعراض هى الاغراض وجعل لحم المسلمين
من جملة طعامه وادامه 
واستغرق فى اكلها اوقات فطره وصيامه
ولم يفرق بين جليل وحقير وامتد حتى الى العلماء الأعلام " 



وبعدين رماه بالجهل والحماقة
وبعدين اتهمه انه ظفر بمسودة لاستاذه ابن حجر العسقلانى
وانه استغل انه تلميذه وسرق المسودة وعمل بيها كتاب
 يعنى ردله التهمة ف حجره #استااااااااذ
وبس بهدله ومرمطه وشواه ع الجنبين
وجبت لنفسك الكلام يا سخسخ
 تستاهل



وابن اياس كمان اللى بعتبره عبده الرايق 
بتاع التأريخ
فين وفييييييين بعد 30 سنة قرر يرد على السخاوى
 وذكره بجملة بسيطة كدا 
وسط الكلام
 قائلا
 "انه الف تاريخا فيه اشياء كثيرة من المساوىء
فى حق الناس"
يوغتى 
ابن اياس دا بسكوتة .. نسمة كدا 
:)



القصد .. المقريزى زكريا بيقول
 قعد يتفرغ للكتابة والتوثيق وبس وكتب ف حاجات شتى
لدرجة انهم لقوله كتاب ف الغناء واحواله .. !
وناس فاهمة بتقول ان خبرة المقريزى ف الحسبة
وعالم الأسواق والتجارة خلته يوصل لنظرية
"ان العملة الردئية بتطرد العملة الجيدة" دى
من زمان ف احدى كتبه





مش كدا بس .. جرأته وقوته وشدته ف نقد الأحوا
 وسرد الأحداث .. تتحسبله اكتر ما تحسب ضده
 خصوصا انه كان قريب من علية القوم 
ومش بعيد عن غضبهم
كان معرض للبطش ف أى لحظة 
وهما كانوا مجانين اصلا المماليك دول 








وبمناسبة الخطط والخناقات عليها 
والناس اللى عملتها 
بعدين هييجى على مبارك 
مهندس القاهرة الخديوية ويعمل خطط هوه كمان
ويسميها .. الخطط التوفيقية على وزن الخطط المقريزية 




انا كشهروزة بحب الجدع دا جداااااااا
ابو المقاريز حبيبى وصديقى العزيز
 لكننننن يؤسفنى اقول انه كانله نعرة تعصبية
وكان ف سرده احيانا متحيز
الكلام دا سهل جدا تلاقوه لما يحكى عن أى واقعة
 متعلقة بالأقباط مثلا اللى كان ف النوازل والمحن
لما بيتعرضوا لعنف كان بيحكى عنهم ببرود عظيم !!
يعنى مثلا لما حكيت عن الثورة البشمورية
واللى عمله جند الخليفة ف الاقباط وقتها
المقريزى وصف البشاعات اللى اتعرضولها
وكأنهم كانوا بيصيفوا ف جمصة !



ومعرفش التعصب دا جاى منين
علما بأنه الفاطميين اللى ينتسب لهم كانوا بيعاملوا الأقباط
 احسن معاملة بالمقارنة بغيرهم من حكما 
فليه مطلعش زيهم؟
ويمكن يكون دا السبب ؟
انه استشعر ان الأقباط لما بيوصلوا لمناصب عليا
بيسيطروا ويتجبروا
طب اسم الله ما المسلمين شرح
والحال من بعضه !



قصره .. فيما عدا جزئية الاقباط دى
 انا معنديش خلاف معاه اطلاقا
وبالعكس امتع القصص بتنحكى
 وهوه ف خلفية المشهد بتفاصيله وحضوره ورواياته
:)
وكفاية عليا جؤجؤى اللى قالها دى عن مصر دى 
 #هاحيييييييييح





واخيراااا ابو المقاريز مات
عصر يوم الخميس 16 رمضان سنة845هـ بالقاهرة
ودُفن يوم الجمعة قبل الصلاة بحوش الصوصية البيبرسية
 والعزاء تلغرافيا
وكويس عشان انا مكنتش هقدر اروح الليلة دى
واقفل يا وااااد مقدرش اشوف المقريزى وهوه بيندفن ! 




وتوتة توتة .. خلصنا حكاية ابو المقاريز
 ف مرة جاية نحكى عن جبروتا الشهير بالجبرتى
 نرتوت المنشنات
وألف شكر ع الكلام الحلو
 وتصبحوا على ألف خير


---------------------------



 MarMoustafa Magdy @moustafamagdy 
وجود الأمثلة العليا و القامات العلمية دي بتساعد
 على ظهور نوابغ و هو ما يفتقده الوطن العربي الآن 
تماما


 MarHeba @HappyGeddan 
 دا كلام جارح انا لسة باقرا ميكي


وانا كمان دنا بقراها قبل يوسف :)))


 Martarek momen @tarekmomen 
النملية دي موضة قديمة يعفها العواجيز
دلوقتي التهبيش ملي النيش




 Marmuhburek @makaveli8482 
دي كانت من عادة السخاوي و السيوطي
 كتب مؤلف للرد علية اسمه 
مقامة الكاوي في الرد على السخاوي



اكتئاب ما بعد الثورة @MahometusUsama 
أيام ما أشتغلت مرشد سياحي على أدى
كنت بحكى عن الفاطميين من المقريزى،
 واحد قالى المقريزى ده ثقة؟
 للحظة فكرت أقتله بس سبته ومشيت


اكتئاب ما بعد الثورة @MahometusUsama 
أول مرة أربط بين أسم الخطط هنا وبين كتاب على مبارك
 اللى سماه على أسم المخسوف توفيق


هناك تعليق واحد:

Related Posts Plugin for WordPress, Blogger...
"حقوق الملكية والملوخية والمهلبية ... الخ
محفوظة للست شهرزاد وإياك حد يسرقها ويحاول يزعلها آغجر .. مفهوم ؟ "