الجمعة، 15 مايو، 2015

حكـــايـات مصـــرية ..... 18





كالعادة حكايات قصيرة 
عن ازمان وامكنة وناس ملهمش دعوة ببعض 
 لكن بتجمعهم ... مصر 



الحكاية رقم (1)




 ودى من كتاب (تقويم النيل) لأمين سامى
عن الجزء الخاص بعهد اسماعيل
 ومن سجلات قصر عابدين
 (صفحة 70 من الدفتر الاول )
وانظر الشكل صفحة سبعتاشر 
مكتوب ايه يا سيدى





"وفى غرة صفر 1290هـ إرادة لطوسون بك :
  نظرا لغيرتكم وهمتكم المشهودة ولما هو مأمول فيكم
 من بذل الجهد قد اقتضت ارادتى توجيه
واحالة مديرية طاشيوز اليكم
فبناء عليه يجب ان تبادروا بالذهاب الى مأموريتكم
 الجديدة ومباشرة امورها طبقا للأصول الموضوعة
 والمتبعة طبقا للأصول الموضوعة والمتبعة
 وان تعنوا بنشر العدالة والأمنية بين الاهالى
 ولذلك أصدرنا امرنا هذا وارسلناه اليكم " 
انتهى





الصراحة انا اول مرة اسمع الأسم دا
 احنا عندنا ف مصر حتة اسمها طاشيوز ؟!!
- احنا خدنا حاجة قبل كدا اسمها طاشيوز ...
فيه حاجة ف المقرر اسمها طاشيوز ..؟!!!
- أنا عارف بيجيبولنا الأسامى دى منين ؟!!!!
 فين دى يا شوشو وفين أراضيها 
وبعدين بالبحث
 والتمحييييص
اذ بى الأقيها جزيرة ف اليونان حضرتك .. !






وكانت تابعة للدولة سخامة العثمانية
وبعدين ف غمرة تدليل فتاها الوفى محمد على 
قامت حبت تهاديه بالجزيرة دى يلعب بيها شوية
مع اصحابه بالكورة ساعة العصارى
وبقى يتنادى حضرته هكذا
محمد على
والي مصر والسودان والشام والحجاز
والمورة وطاشوز وكريت
هااااى هىء





بس واتنقلت بقى من ضمن الاملاك بتاعت سنكفولة
الى الورثة ورايحين طاشيوز راجعين من طاشيوز
واسمها الاصلى .. ثاسوس
والجزيرة دى استولى عليها التراكوة سنة 1462
وفضلت تحت السيطرة لحد ما بدأت حرب البلقان
 سنة 1912 ورجعت يونانية
ومصر ليها املاك هناك كانت تابعة لمحمد على
 اللى بنى فيها مبنى للبحرية وافلام كدا
وبتشرف عليها الاوقاف المصرية للآن
باعتبارها ملكية تابعة لينا   




سنة 1902 الخديوى عباس حلمى التانى
 حب يستثمر فلوسه هناك ويشترك ف معصرة للزيت
مع بعض الاجانب
قوم رخامة كدا عمل ضرايب
بيقولوا كان عاوز يلم فلوس على المعيز
اللى بتاكل من شجر الزيتون اللى ف أراضى الدولة 
قوم الفلاحين واصحاب المعيز قالوا ايه الراجل النتن دا !
وراحوا قايمين بثورة صغننة كدا على ما قُسم
ورفضوا يدفعوا الضريبة
وراحوا اشتكوه للباب العالى اللى لم التعابين
وقام باعت قوات تحتل الجزيرة !
وقال للخديوى اتلم وملكش دعوة بالمعيز !!!






 عباس حلمى اتغاظ قوى
 وكان بيحاول بكل طريقة يمشى الحامية العثمانية الجديدة
 من هناك وهما أبضنننننن
الا المعيز ومصلحتهم !
وف الآخر كبر دماغه وساب الحكاية
 وراح يشغل فلوسه ف بساتين ومزارع ف الاناضول
واهو أى حاجة تيجى من عينهم .. احسن منهم
وفضلنا كدا لحد ما راحت طاشيوز او ثاسوس من ايده
 ومن ايد اسياده خالص سنة 1912
 ورجعت لباقى أراضى اليونان وشعبها وشكرا





وتقعد تتقلص الأراضى والألقاب
لحد ما ترسى على ان القاعد على كرسى مصر
 يبقى ملك مصر والسودان وفقط
ثم تروح السودان بعد شوية هيا كمان
واخيرا كل يقعد ف حدوده لحد ما نعوزه
 وخلصت الحكاية على كدا


ملاحظاتى بقى
 كشهرو بقول ان طاشيوز دى شكلها شتيمة مش بلد
وكويس وألف بركة انها راحت
ثانيا .. عباس حلمى التانى كان بيعز الفلوس زى عينيه
واخرة الطمع ويحشة
اهو اتخلع بين يوم وليلة من عرشه سنة 1914
بعد ضياع طاشيوز بسنتين 
 وفعلا اللى ييجى ع المعيز ميكسبشى !!





واخيرا كويس ان طاشيوز محدش يعرف عنها كتير
والا كانوا طلعوا عايرونا بالقصة دى
وقالولنا يلى احتلتيونا زمان 
ومتتكلموش عننا 
وكُبة تاخد المصريين وكدا
وعلى راى اشرف عباقى الله يمسيه بالخير ف .. باللو
عبوهاب مكنش يصح يغنى كل مصرى يونانى
الصح كل مصريون مصريون 
وكل يونانيون يونانيون
 وبس :)






الحكاية رقم (2)






من كتاب مفرج الكروب فى اخبار بنى أيوب
 لـ :جمال الدين بن واصل
 الذى اشتهر بأنه مؤرخ بنى أيوب
وعاصر نشأة دولة المماليك
الجدع حضر أيام الظاهر بيبرس
 اللى يعتبر بعد شجر الدر وقظز اول سلطان مملوكى فعلا
وكان راجل داهية ومش سهل
وقوى وحازم ...  الخ




وجمال بقى بيحكى عن زيارة الظاهر بيبرس
لأسكندرية اول مرة سنة 1262 م 
بيبرس زار اسكندرية ف فترة حكمه 5 مرات
اول مرة دى اللى بنحكى عنها الظاهر دخل اسكندرية
من باب رشيد 
وطبعا طلع الكبرات بتوع البلد يستقبلوه
والسادة المسئولين وعملوله تشريفة اللى هيا
والشعب السكندرى خرج يتفرج





وبيقولك ان بيبرس كان له مهابة كدا
قالك ..
"ورأى الناس من حسن صورته وعظم مهابته
 ما بهر عقولهم"




طشبعن رشدى أباظة حضرتك
وأقل واجب ينبهروا يعنى





القصد بيبرس خلص الموكب والأستقبالات
واصدر شوية مراسيم على قرارت
 واحسن الى بعض الفقراء وسمع شكاوى من الناس
وبعدين راح يصلى الجمعة
 ف الجامع الغربى اللى كان اكبر جوامع اسكندرية انذاك
وبعدين قال اندهولى الشيخ القبارى والشيخ الشاطبى
 عاوز أشوفهم واتكلم معاهم






القبارى والشاطبى كانوا من اقطاب اسكندرية ف العلم
عاصروا الشاذلى وابو العباس المرسى واتعلموا منهم
وعاشوا بعدهم ينقلوا علمهم فكانلهم مكانة
الشيخ القبارى كان شخصية مهيبة كدا وله دماغ لوحده
وكان زاهد ف أى حاجة من ناحية السلاطين
وكان وارث عن ابوه بستان
 فكان بيزرعه ويعيش من محصوله
وبيقولوا انه اشتهر بزراعة ثمرة اسمها القبار او القبارة
وكانت عاملة زى العنب كدا
ومعرفهاش الحقيقة خالص 
انما يقال انه اتسمى على اسمها بالقبارى 
المهممممم



بيبرس ببعت رجالته يقولوله
 مولانا السلطان عاوزك يا شيخنا
جمال الدين بن واصل اللى بيحكى الواقعة
 ومبتديها بالجملة دى نصا
 "وحدثت نكتة غريبة "
ان الرسول رجع من عند الشيخ القبارى وقال للسلطان
" ان الشيخ قال لا سبيل الى النزول اليه
 ولا الى كلامه الا من اسفل البستان"
بالمختصر كدا قال
 يعنى اللى عاوزنى يجيلى انا مبروحش لحد !
أظن بيبرس ما هدّ الدنيا وطربقها
وقالهم هاتولى الراجل دا من حواجبه
 مثلا .. ؟؟؟؟
ابضنننننننن
لا قال هوه مش عارف انا مين 
دنا سلطان وليه وضعى
 وهوه اللى يجيلى
هااااره اسوووود 
ولا كل القصص دى
الجدع قالهم بمنتهى الهدوء
" انا رايح لله تعالى فمن أى مكان شاء يكلمنى "








وفعلا يركب بيبرس الفرس ويروح لبستان الشيخ القبارى
 " واعلن الشيخ قطب الدين القبارى بحضور السلطان
 فأمر بدخوله اليه فدخل وحادثة وباسطه"
وبيبرس قاله اتمنى علىّ أى حاجة
فقاله مش عاوز حاجة بس اوصاه بعمارة الثغر
والعناية بيه لأنه فيما يبدو كان ف حالة سيئة




بيبرس خرج من عنده راح لافف على ابواب اسكندرية
والاسوار وكل حتة كان فيها هدم او اهمال
امر بتصليحها وبعدين رجع من الجولة دى
 ع الشيخ الشاطبى
وبيبرس فضل يزور اسكندرية لحد قبل موته
 وكان طول الوقت مهتم بالتحصينات
كان رجل عسكرى من الطراز الاول رغم عنفه
لازم نقول اللى لينا واللى علينا




اللطيف بقى ان المماليك بقالهم عادة فضلت
 لحد ما مشيوا من الحكم
ان أى سلطان مملوكى يزور اسكندرية
قبل ما ييجى تتفك أبواب المدينة كلها من مفصلاتها
وتترمى على الأرض وتفضل الأبواب مفتوحة سداح مداح
 لحد السلطان ما يمشى وتتركب تانى
 آل يعنى السكة مفتوحاله يدهس براحته
والمدينة تحت أمره وخضعاله وكدا !!




وبس الحدوتة دى خلصت ولا تعليق لشهرزاد
سوى انه اللى ربنا معاه ميهمش سلطان ولا جاه
والشيخ القبارى كان من الناس دى قولا وفعلا
ومفيش داعى نعقد مقارنة بينه
 وبين شيوخ الفتة والفضائيات العرر اياهم
 عشان كدا نبقى بنهزأ الراجل
وبنخليه يتقلب ف تربته
ملوش لزوم





القصة رقم (3)





ودى عن اسطورة سمعها احد الرحالة اللى زار مصر
 ف عهد الخديوى توفيق
والرواية من كتاب : القاهرة وضواحيها لـ دى فوجانى




والراجل يا خويا راح يزور جامع عمرو
ف الفسطاط بمصر عتيقة او مصر القديمة حاليا
عشان قالوله انه اقدم مسجد ف مصر وكدهون
واقف بيتفرج جاله احد خدام المسجد وقعد يدردش معاه
على الجامع وحكاياته وقاله على حكاية عجيبة جداااا
عن عمرو بن العاص وقت بناء المكان




آل ان عمرو ف احدى جولاته التفقدية للبناء ومراحله
 جه عند ناحية المنبر كدا وبعدين رقد شوية
وراح ف النوم 
ورأى فيما يرى النائم 
ايه بقى ؟؟




انه - عمرو يعنى - كان ف مسجد بمكة
فلقى عامود مش موجود ف مكانه صح
راح مكلمه
 اه زى ما بقولكم كدا
 كلمه 
قاله ايه يا شهرو ؟؟؟
"انى امرك ان تنتقل فى هذه اللحظة نفسها
الى جامع عمرو بمصر وان تقف أمام القبلة "
 عمرو اللى بيقول
 العامود بقى سمع الكلام ولا لأه ؟؟؟






الاسطورة بتقول انه مسمعش الكلام
وفضل واقف ف مطرحه !!
 قوم عمرو امره تانى بس المرة دى كان بيزقه بإيده
 عشان ينحرره يعنى 
:))
العامود اتهز ... !
لكن برضو منفذش الأمر
 ساعتها عمرو بن العاص اتنرفز
 وراح رافع الكرباج بتاعه وضربه كام ضربة
وكررها تانى ... ع الفسطاط يلا !!
بس قبل ما يقوله يلا .. قاله
 " بسم الله الرحمن الرحيم .. إرحل "
 راح العامود ناطق 
:)) 
قال ايه يا شهروزة ؟؟؟




قاله " لماذا نسيت ان تسمى باسم الله ؟!"
وراح فورا متحرك وطلع لفوق
ودار ثوانى حوالين نفسه فوق الكعبة
وبعدين خد ف وشه وطيرااان على مصر
بس يا سيدى وراح يحتل المكانة جنب المنبر
ومتحركش منها تانى
والحكاية دى خادم المسجد بيقولها لكل حد ييجى
يزور الجامع ويشاور على حتة ف العامود
عبارة عن شرخ طويل
هوه فسره انه اثر ضربة كرباج عمرو بن العاص




وخلصت الحكاية على كدا
والسؤال بقى الذى يطرح نفسه
فيه ناس طيبة كتير قوى بتصدق ف الحاجات دى
 لحد دلوقتى ولحد القيامة ما تقوم اكيد
بس بحاول كدا اتخيل 
يعنى من جملة العواميد الكتير اللى ف جامع عمرو
 دى اتزنقوا ف واحد وطيروه كل المسافة دى ؟!!
 ليه ؟؟
 ثم عمرو بن العاص بجلالة قدره وجبروته
هيغلب ف عامود ويضربه والقصص دى ؟!!
 واخيرااا بقى بحاول اتخيل كدا انى قاعدة ابص ف السما
 واعد النجوم واذا بى
الاقى عامود طاير فوق نافوخى
 يا اخواننا مش ممكن ع الخيال الفُللى
 :))




الحدوتة رقم (4)






والحكاية تبدأ من بعد السادات ما مسك الحكم
وابتدى يدور على المنافسين
كيف يتخلص منهم نفر نفررررر #بصوت_شادية 




كان فيه ناس مستهيفة السادات
ومعتبراه سطا ع السلطة بليل
وناس شافته عميل للمخابرات الامريكية
 وانها هيا اللى جابته للحكم بتدبير محكم
وفيه ناس قالت لأه دا هوه اللى قتل عبناصر
او ساهم ف التخلص منه عشان ييجى هوه
 المهممممم ف وسط كل هذا هنسمع اسم
 .. الليثى ناصف






الراجل كان رئيس الحرس الجمهورى من ايام عبدالناصر
 وكان بيثق فيه جدا ومأمنه على حياته
و بعد ما مسك السادات خلاه ف منصبه
ف ابريل 1971 هيكون السادات عمل خطة محكمة
للقضاء على منافسيه اللى سماهم بمراكز القوى
 واستعان بالليثى ناصف وبعتله
وانا فيه مؤامرات على حياتى
عاوزين يموتونى
 مصر هتضيع
هتشتعل حرب اهلية
 هيشمتوا فينا الأعادى
مفيش وقت للصراعات 
ومصر بتضيييييع يا وديع




الخلاصة
الليثى قاله ...  اوامرك يا ريس ؟؟
قاله هنقبض على الروس الكبيرة ونحطهم ف السجن
لحد ما الأمور تهدى ونطلعهم تانى !!
 الليثى مقدرش يستوعب
أصل اغلب الأسامى اللى مطلوب القبض عليها
كانت زملائه واصحابه ويعرفهم
وتهيب انه يعمل خطوة زى دى فيهم
السادات فهمه انها حركة مؤقتة وهتعدى
وانه هيطلعهم تانى بعدين ووعده بتنفيذ ذلك
 والليثى امتثل للاوامرمصدقا السادات 





 وكان متصور ان التحفظ ع الشخصيات دى
 هيكون كوتيمى
 وبأقل دوشة ممكنة #غلبان
لأنه هيتفاجىء ان السادات عمل هوليلة





والاعلام المأجور بتاعه طلع يطنطن
 دى ثورة 
دا تصحيح 
دا معرفش ايه كدا






والأسامى المقبوض عليها انقتلت معنويا 
الليثى اتكبس كبسة السنين 
مقدرش يتكلم وقتها
وحس انه اتخدع خدعة العمر  





 وشوية بسيطة
والسادات خلاه كبير الياوران ورقاه إلى رتبة فريق
وبعده عن منصب حمايته
 وخلاه قاعد على مكتب ميتحركش
 الا بتكليف ومواعيد محددة
 خلاه كيس جوافة م الاخر





بس اللى قيل وقتها ان الليثى مسكتش فعلا
وانه حاول يجمع معلومات عن السادات
 اللى حامت حواليه شبهات لعلاقته بالأمريكان
وبأمة لا اله الا الله 
وبدأ ف التقصى والموضوع وصل للسادات
وانتوا عارفين ابو رقية غلاوى ومنفسن
وقلبه مقلم أسود ف بتنجانى
 وبحركة معلمة معتادة راح ناقل الليثى لوزارة الخارجية 





- والف مبروك يا ليثى بقيت على درجة سفير
(غور من هنا خلاص دورك انتهى)
 - موشكرين يا ريس
 (غشتنى منك لله)
- ريّح وروق بالك بالوظيفة الجديدة
(خليك ف حالك احسنلك)
- تعيش ياريس
(ربنا ينتقم منك )
 وهكذا بتخيل انه كان الحوار قدام الكاميرات
 انما اللى ف القلب ف القلب






وزارة الخارجية المصرية
هتطلع قرار بتعيين الليثى سفير لمصر ف اليونان
ف شهر اغسطس
والراجل متعرفوش انقهر ولا ايه 
تعب وركبه المرض
وقبل ما يطلع ع اليونان يستلم مهام عمله الجديد
راح الاول على لندن عشان يتعالج
ويشوف ايه حكاية العيا اللى جد فجأة كدا 




اخد معاه مراته .. الشت شوفيكا وكانت تركية ابا عن جد
وخد معاه بناته الأتنين .. منى وهدى
 اللى سماهم على اسامى بنات عبدالناصر 
من شدة حبه فيه
وطلعوا على برج ستيوارت
 ف شقة تابعة للحكومة المصرية وسكنوا الأول ف اول دور
 وبعد شوية نقلوهم للدور الـ 11
وبس حلو جميل الدنيا مشيت عادى





يوم 24 اغسطس عام 1973 
يصحى الفريق الليثى كعادته
 يصلى الصبح هوه ومراته سوا
ويقرى شوية قرآن
 وبعدين يدخل الحمام 
وتنام الزوجة شوية لحد ما ييجى معاد الفطار 
وتصحى منى وهدى ويقعدوا ف الصالة
يتفرجوا ع التلفزيون
وشايفين باب الحمام مقفول متصورين ان باباهم لسه جوا !!
بعد شوية يطلع شرطى انجليزى يخبط ع الشقة
الام تقوم على صوت الجرس والبنات يقفوا جنبها
وهيا بتفتح عشان يبلغها الشرطى
ان جثة جوزها وجدت ملقاة على الأرض
والبقية ف حياتك يا هانم !





وتنهار الست والبنات
 وتقعد تقول .. السادات قتله .. السادات قتله !
 الخبر طبعا ف اقل من القليل
يوصل للسفارة المصرية اللى هتبعت مين ؟؟؟
السفير المصرى طبعا ومعاه مستشار السفارة الطبى
ومعاهم ابن الوارمة .. مصطفى الفقى ربنا ياخده
وكان نائب القنصل وقتها




الست شوفيكا اكدت ان جوزها لا يمكن ينتحر
 دا مصلى معاها وقارى القرآن وكان هادى ومفيش حاجة
 وانه كان عارف ان السادات متربصله
 وانه مش هيسيبه
ولما لقوا جثته لقوها وقعت من غير نقطة دم
غير انه كان لسه لابس الشبشب متقلعش من رجله !
وان مفتاح باب المطبخ مكنش معاهم
 وكان مع صاحب البرج
وانهم نقلوهم من الدور الارضى لدور عالى
واكدت انه مش انتحار
 وانه قتل مع سبق الإصرار والترصد
والسادات اللى عملها وقعدت تزعق وتهدد



ورفضت انه تتم اجراءات لسفر الجثمان على مصر
وقالت يندفن ف المغرب عشان علاقتهم بالملك الحسن
كانت كويسة وطلبت تتصل بيه
 او بالملك حسين ملك الاردن ومنعوها
وبعدين فين وفييين بعد اسبوعين
من رقود الجثة ف تلاجة المشرحة
وتقفيل المحضر ع الطريقة المصرية
ومحاولات بالهبل للتعتيم ع الموضوع 
رجع الليثى
واتدفن ف مصر لكن فضلت الاتهامات قائمة
خصوصا ان البرج دا بقى تخصص ميتين
بعدين هيتصفى سعاد حسنى واشرف مروان 
واللى يقولك دى انتحرت واللى يقولك دا اختل توازنه
!!




وطبعا هما شهرين والحرب قامت
واتنسى الراجل واللى جراله
 اخوه المستشار بيحكى ان الليثى بعتله جواب
 بيقوله خلى بالك من نفسك وحرصّ
وانه كمان قاله تعالى انتا والعيال على هنا
 لأن السادات مش هيسيبنا ف حالنا
 واضح ان كان جايله تهديدات فعلا خطيرة
 بس اخوه بيستبعد حكاية القتل والانتحار
وبيقول معرفش الحقيقة ايه ... !



 القصد الراجل مات فطيس
لكن بعديييين المخرج اشرف فهمى
هيعمل فيلم يحكى فيه قصته .. بتصرف
مع شوية تغييرات
هنا
 بس الفيلم فيه من الحقيقة كتير
وهكذا كانت تدار وما زالت .. جمهوريات الموز
والكانتلوب والمانجة العويسى




واخيرا الحكاية خلصت
لكن شهروزة ف قلبها كلمتين .. الله يرحم الجميع
بس ابن المتضايقة الفقى
كتب مقالة عن الواقعة 
وفكرنى كدا بيحيى الفخرانى ف الفيلم
بس يحيى فاق ف الآخر ودفع تمن الغلطة الشنيعة
 اتمنى الفقى ميفوقش ابدا 
ويموت موتة الكلاب الضاااااالة 
وينكتبلوش أى غفران يارب




وحد يقولى ليه كدا يا شهرو ؟
اقولكم كفاية بس تشوفوا موقفه من ايام موبارك
ومن ثورة يناير عشان تعرفوا انه أكذب كذوب ف الدنيا
وانه قلاب للحقايق
وبالتالى أى كلام كتبه ف مقالته
واغلبه تلقيح على الحالة النفسية لأسرة الليثى وفقط
بالتاكيد هيكون عكسه تقريبا اللى حصل
 وكدا اتأكدنا ان الفريق اتقتل فعلا !!!



ثانيا شايفين يا ولاد
ببلاش اهو وتاريخ البعض بيفضحه 
 وكيف تتعلم الوساخة بدون معلم ف عشر خطوات 
:))




الحكاية رقم (5)





واخر حاجة عشان طولنا عليكم
ودى عن اسيوط راويها الاستاذ .. عثمان فيض الله
من كتاب 
 مدينة أسيوط بحث فى بيئتها بين الماضى والحاضر







والأستاذ عثمان كان مدرس المواد الاجتماعية
بمدرسة اسيوط الثانوية للبنات
وبدأ الكتاب عن اسيوط بكل ما فيها سنة 1935
ونهاه سنة 1940 
بانوراما كدا عن كل حاجة ف اسيوط جغرافيا
وتاريخ وحالة اجتماعية واماكن وشوارع
ومحلات وكل حاجة





ف موضع من الكتاب بيحكى عن التركيبة السكانية لأسيوط
 وان سكانها خليط من المصريين القدامى والعرب
والشراكسة والاتراك
وان السكان
ف تعداد سنة 1882 كانوا 42,078 نفس
 ف تعداد 1907 كانوا 51,431 نفس
ف تعداد سنة 1937 كانوا 60,388 نفس 





والـ 60,388 نفساً دول كانوا متوزعين على 26 كم مربع
هما مساحة اسيوط وقتها القديمة والحديثة
يعنى 2600 نفر ف الكيلو ف المتوسط
وان اسيوط القديمة مكتظة بسكانها وبيوتها ضيقة
وان البيت الواحد فيه من 15 - 25 شخص فى المتوسط
 بينما اسيوط الجديثة واسعة وصحية 
وشرحة وبرحة





وخليكوا فاكرين احنا دلوقتى سنة 1937
وتعداد اسيوط وقتها كان ... 60,388 نفر
ماشى
 العدد دا بقى كانت توزيعته الآتى
المصريين كان مجموعهم : 59,978
 منهم
ذكور : 31,522
اناث : 28,723 




اما سكانها من الأجانب فكان مجموعهم : 360
 الذكور : 172
الأناث : 188




عدد المسلمين كان : 39,507
 الذكور : 20,759
الاناث : 18,748




الأقباط كانوا : 20,468
 الذكور : 10,494
الاناث : 9974




والمسيحيون الاخرون كان عددهم : 298
الذكور :137
الاناث : 161




الطايفة الاسرائيلية كان عددهم : 62
الذكور : 34
الاناث : 28
والعقائد اخرى الذكور : 3 ومفيش اناث ..




التقسيمة حسب الحالة الاجتماعية بقى
 اللى لم يتزوج بعد من اهل اسيوط
لم يتزوجوا لسه مجموعهم : 9198
الذكور : 6740
الاناث : 2458



المتجوزين بقى مجموعهم : 22,636
الذكور : 11,525
الاناث: 11,101 




المطلقون وكان مجموعهم : 444
 الذكور : 135
 الاناث : 309



الارامل مجموعهم : 3570
الذكور : 613
الاناث : 2960 
:(
واخيرا حالات غير مبينة مش عارفينلهم
دول متجوزين ولا مطلقين ولا ايه الحوار بالضبط
مجموعهم : 208
الذكور : 115
الاناث: 103 




وخلص التعداد
والواحد ممكن من الارقام دى يطلع بشوية حاجات
معرفش دوقتى وضعها ايه ؟
 يعنى زمان الأسايطة 
كان عدد مسلميهم ضعف عدد اقباطهم تقريبا
هل ما زال الوضع دا قائم
 ولا اتغير قوى من سنة 1937 لحد دلوقتى ؟؟؟
 ولحد فين يا ترى ف ظل دولة مبتقولش عدد اقباطها بدقة
وكأنه سر حربى !




المتطلقين عددهم بائس قوى 444
 بينما المتجوزين 22,626
دلوقتى لو شافوا نسبة الطلاق ف مصر
غالبا الأرقام هتتعكس 
 :))






الاجانب ف اسيوط كان عددهم بسيط جدا 360 نفر
 لكن كانلهم نشاط ملحوظ خصوصا ف الجانب الثقافى
وكان فيه جانب تبشيرى زى الارسالية الامريكية
وغيره 



العقائد الاخرى دى .. الجملة ف حد ذاتها كدا حلوة
 الناس زمان كانت متعايشة رغم الاختلافات الجوهرية
ايام ما مكنش حد بيخرج حد من وسط بيته
ويقتله عشان شيعى 
رغم انه قال الا اله الا الله ويتعد مسلم 
ولا يهدر دمه زى الاخوة الدواعش 
ما بينقوا المسلمين على كيفهم وبيصنفوهم 
وعن المسيحيين واليهود والملحدين الخ 
فدول ميتين خلاص احنا بنتكلم ف ايه 
:)




اللى وجع قلبى عدد الارامل
 الذكور : 613
الاناث : 2960
ودا موضح ازاى كانت الست لما يموت جوزها
عليها ضغط مجتمعى وصعب تتجوز تانى
 بينما الراجل يتجوز عادى
الكتاب ممتع يا عيال مليان تفاصيل
 دا حتى الأستاذ عثمان جايب اسامى الصيدليات
 اللى ف البلد ! 
الطبعة عيبها ان الصور رديئة 
غير كدا قشطات اشتروه 
والأسايطة اول ناس لازم يبقى عندهم 



 تصبحوا على ألف خير


------------------------------




Heba @HappyGeddan 
 يغوروا بمعيزهم



Hany Zaky @Hany_Zaky 
الشيخ الشاطبى له مقام للأن لكن بدون مسجد
علشان كده مش معروف


Hany Zaky @Hany_Zaky 
 الرأى الغالب أنه قبارى تحريف لكابرى من جزر المتوسط
كعادة المتصوفة المغاربة


Heba @HappyGeddan 
 دا العمود فلق


هند @HendZayed 
بس انت اكيد فاهمة الهدف من ورا القصة اضفاء قدسية
 على المسجد مستمدة من قدسية المسجد الحرام
:-) 
علشان ماحدش يفكر يهده او كده


hmayada el_awady @MayadaEl_awady 
 انا كلي اللي مخوفني ان حد من السعودية الشقيقة
 يعرف القصة ويجوا يطالبونا بالعمود
 الا دي ناس عقلها صغير
 :)




Islam Gamal @eslamalnagar 
 السادات كان صايع


اكتئاب ما بعد الثورة @MahometusUsama 
 هو كان كل ما يزهق من حد من التقال يبعته الخارجية


mostafa ibrahim @dr_mostafa84 
 السادات ...... #الجزاء_من_جنس_العمل


هند @HendZayed 
 بس طلعوا للحداشر عرفنا هينزلوا ازاى
 كما ينزل المصريين في لندن



اكتئاب ما بعد الثورة @MahometusUsama 
 عادى الستات فى مصر بيقصفوا عمر أجوازهم


Haпaп H❃ ЄʓʓαƬ @EgyChampagne 
لا احنا مبنقولش عشان الحسد



هناك تعليقان (2):

  1. كملى حكاياتك يا شهر
    متابع

    ردحذف
  2. مدونة رحلة حياه
    -----------------
    وانا ممتنة لهذه المتابعة يا متولى
    وسعيدة بيها جدا
    :))

    ردحذف

Related Posts Plugin for WordPress, Blogger...
"حقوق الملكية والملوخية والمهلبية ... الخ
محفوظة للست شهرزاد وإياك حد يسرقها ويحاول يزعلها آغجر .. مفهوم ؟ "