الثلاثاء، 12 مايو، 2015

الفــريـــق ســــعد الشــــاذلى : أعـــز جــــنده ... (2)







وقفنا المرة اللى فاتت
عند عبور خط بارليف
واعتراف العالم بمصر وانجازاها
وبالشاذلى .. رومل العرب
وكنا ماشيين حلو زى السكينة ف الحلاوة
بعد يومين تفوق اسرائيل من العلقة وتبتدى ترد







سعد يقترح ع السادات انه يخلى الكبارى صماء
يعنى تتردم ف القنال بدل ما هى بتتركب بس
والعدو بيضربها
الفكرة تعجب كبير المهندسين
بس بيقولوا مش هتتنفذ الا بعدين
ف شهر ديسمبر
 بس هوه الشاذلى هيستنى لحد ديسمبر .. !
دنتوا ناس طيبين قوى والله






دى هيا أيام قليلة واسرائيل هتفوق علينا
خصوصا ف الجهة السورية
اللى هتقولها فين يوجعك والسادات هيقلق
 فيصدر اوامر لقوات المشاة بالتقدم للأمام
ليه ؟
قالك تخفيفا للضغط ع الجبهة السورية
مين اللى وقف وقال محبذش يا فندم ؟؟؟
 سعد طبعا
ليه يا فندم ؟
قالك مبعتش ولادنا من غير غطاء جوى





قائدا الجيش الميدانى التانى والتالت
وقفوا ف صف الشاذلى ف الرد دا
 وهددوا بالاستقالة لو السادات أصر على رأيه .. ! 





بس والدنيا اتكهربت
ويحصل شد وجذب وخناقات
واذا بينا نوصل ليوم 15 اكتوبر
والثغرة تحصل ويعدى منها حوالى 200 دبابة
 ف ظرف أيام بسيطة
السادات يتجنن ويحس بالنصر بيتسرسب
من بين صوابعه زى المية





ويروح النقطة 10
ويقابل الشاذلى هناك اللى لسه هيشرحله
نتغلب ازاى ع المستجدات دى وانى اقتر....
ولسه الجدع مكملش باقى الكلمة ...... ح
السادات راح مزعقله
وقاله اسكت ومش هسمع منك أى اقتراحات
ولو سمعت منك أى كلمة .. هاحاكمك ! 
#حصلنا_الرعب





سعد فكر ف التو واللحظة انه يستقيل
ويسيب كل حاجة لكن عز عليه يسيب ولاده
 ف الوقت دا
زائد انها هتعتبر خيانة لمبادئه
وهروب ف لحظة احتياج #مينفعش
فبلع الاهانة مؤقتا وعدى يا ليلة 
ابو رقية كانت اعصابه شايطة
وكل اللى شافوه وقتها قالوا انه كان عصبى
ومحدش عرف يهوب ناحيته
ويقترح أى حاجة وأى شىء 
وكنا بنضحك من كام يوم ومبسوطين النهاردة
 تحطوا الفولة على مناخيره تطق ا





الشاذلى قال ان السادات كان مبيت النية وناوى 
وكان مقرر يلبس الثغرة دى لأى حد
وميعترفش بأنه السبب بسوء تدبيره
وعدم سماعه للنصح وقعد يألف
ويبالغ ف كتابه البحث عن الذات 
وانه آل الشاذلى دخل عليه يوم الثغرة
منهااااار ومحتاس وحاجات كدا
وطبعا دا محصلشى
انما تقولوا ايه النرجسية ملت النملية يا سوعااااد




واحنا النهاردة 20 منه
شهر اكتوبر يعنى
وابو رقية اصدر قرار كوتيمى بأزاحه الشاذلى
 من رئاسة الاركان .. !
والخبر لم يعلن رسمياً الا بعدييييين بشهرين
وتخيلوا انتوا بقى المصريين ف كل الشوارع
بتحتفل بالنصر
بينما مهندس الحرب واحد اسباب انتصارنا
قاعد ف بيتهم معزول !! 
مغضوب عليه من رئيس الدولة
وبعيد عن كل حاجة
وكرامته ناقحة عليه يفتح بوقه
ولا يشتكى او ينطق .. !
كانت ايام عجيبة غريبة مؤلمة





وترن كلمة المشير اسماعيل ف ودنه
"لو انتصرنا محدش هيشكرنا
ولو انهزمنا هنشيلها لوحدنا "






وقعد سعد ف بيته صاين كرامته
كافى خيره شره
وفجأة لقى غراب البين بيدق عليه الجرس
 وجاى ف زيارة
مين يا شهرو ؟؟ 
الوغد الندل .. موبارك 
الشاذلى اول ما شافه قاله انتا جاى ليه ؟؟
المفروض بروتوكوليا الريس يبعتلى اروحله
او يخاطب رئيسى المباشر
لكن يبعتك انتا ليه بقى ؟!
مبارك قاله الريس بيقولك انه عينك
 سفيرنا بلندن .. بلد الاكسلانسات





بعدين لما مبارك بقى رئيس وغدر بالشاذلى
سألوه انتا عملتله ايه يا حاج ؟؟
الشاذلى قال يمكن احتمال
عشان لما جالى بيتى يقابلنى كنت ناشف معاه
وقولتله جاى ليه ؟
بس معقولة ؟؟
 آه معقولة ونصصصص
انتا فاكره راجل محترم
وعنده شرف ف الخصومة زيك !!
صوابعك مش زى بعضها
والسواد والكمكمة بعيد عنك تعمل اكتر من كدا





سعد اصلا كان متوقع اقالته .. من بدرى
 ف عز التدريبات كان زمايله بيتنبأوا
ان السادات ونرجسيته لن تسمح بأبطال
 يشاركوه ف أى مجد وقد كان
المدهش ان هوه وغيره كانوا عارفين
ومع ذلك لم تمنعهم المخاوف دى
من انهم يعملوا اللى عليهم ويحاربوا بأيدهم
وسنانهم وقلبهم وكل حاجة 
وعلى رأى الحكمة البليغة 
"العظيم هو من يعمل ليوم لن يراه "





السادات فهم الشاذلى انه بعته عشان
يتفق على صفقات سلاح للجيش
وان الدبلوماسية دى مجرد غطا للمهمة الأساسية
سعد صدقه وبعدين اكتشف انه كداب كدب الإبل
وينفذ بحسن نية التكليف 1974
ويقلع البدلة العسكرية للأبد
ويلبس الزى المدنى ويسافر على لندن
 ويبدأ ف اداء مهام وظيفته 





وشوف بقى ازاى ابو رقية
كان باعته ف بلاد الانجليز
 عشان يخلص منه ويطفى نجمه
فإذا بسعد يكسرله كل التوقعات ف ظرف شهور
و يبقى عمدة المصريين ف لوندرة #كابساااه





والجدع تقيل وراسى 
وبطل حرب مفيهاش فصال دى
ولغته الانجليزية اخر فُللى
وشخصيته 20 آخر فُللى
وكاريزما ياما يانا يا هبة للصبح
فاتلم حواليه المصريين وغيرهم واتلمع اكتر
السادات دمه يتحرق اكتر






وف وسط هوجة منح نجمة سيناء
لأبطال الحرب الكبار يستنى اما الشاذلى يسافر 
ويديهاله !!
 #غلاوى
الشهادة لله .. السادات كان غلاوى فعلا
وسهنة وصايع بحر وجو وبر
وبيعرف ازاى يغلس على أى حد
طول مدة حكمه تشهد بهذا 




بس ربك رب قلوب
سعد يتألق اكتر واكتر ف لندن
والأخبار تسمع ف القاهرة
انور افندى السادات
يقولهم شوفولنا سفارة أى كلام نشاطها ضعيف 
 نغوره عليها الجدع دا !!
قالوله نوديه البرتغال سعادتك .. !
وفعلا بعد سنة حافلة ف لندن
يسفروه على البرتغال سفيرا لنا هناك





وسعد نفسه بيحكى بقى
ان البعثة الدبلوماسية هناك كانت 4 تنفار
والسفير الخامس والعلاقات هادية
ومفيش أى نشاط عكس سفارات لندن
وواشنطن وروسيا الخ
وان البعتة هناك حاجة من اتنين
يا حد عاوزين يريحوه ف نهاية مدة خدمته
فيودوه يستجم ويهدى اعصابه
يا حد بيتعاقب وبيودوه يتنكدر وينطفى
 وشاذلى كان الصنف التانى
اللطيف بقى ان سعد اعتبرها تصاريف ربنا
وتدابيره للخير والصالح
لأنه لقى وقت يكتب جزء كبير من مذكراته
ولقى وقت يعمل جامع للجالية الاسلامية
ولقى وقت يقعد مع عيلته الى انشغل عنها
اخر فترة لظروف الحرب
لأ ... واخر سنة اتعلم اللغة البرتغالية كمان .. ! 




ويسافر للحج وكانت مباردة السلام
بدأ الترويج ليها عالمياً فيسألوه ايه رأيك ؟
يقولهم " انها قفزة ف الظلام" 
وانه لا يؤيدها اطلاقا
الكلام طبعا يوصل لأبو رقية يشيط
وانا موديك بعيد عشان ارتاح من وجع الدماغ
 تنط لى تانى وتقرفنى !! 
وبعدين ف الراجل دا !!!!
لا نافع معاه دهب المعز ولا سيفه
ولا بيريل على فلوس ولا منصب
وملوش مسكة وبعدين يعنى ؟!!
مبقاش قدام السادات غير تحطيمه معنويا
ازاى ؟؟





سنة 1977 هتصدر الشئون المعنوية للجيش
كتاب عن اكتوبر و متحطش أسم الشاذلى
فى أى سطر مع انه كان بيتكلم عن الخطط
والمعارك والاحداث بالتفصيل !!
ويزيد السادات الطين بلة
بصدور كتابه البحث عن الذات
وبين صفحاته يحمل الشاذلى غلطة الثغرة
 ويرميها عليه





ويسافر رجل الحرب والسلااااام على القدس
الدول العربية يركبها عفاريت
وتطلع بيانات
وقرارات بقطع العلاقات مع مصر 
سعد يسكتشى ويخليه ف حاله ... ؟!!
ابضنننننن
 دا هيكتب بيان شديد اللهجة يشبه فيه السادات
 باحد طغاة البرتغال ويبعته
من تحت مناخير المخابرات اللى مراقباه
وطبعا كان عارف عواقب نشر وكالات الانباء
لبيانه ولما السادات هيعرف
ويقرر يولعها حريقة
فكان مرتب حاله ياخد بعضه
ويسافر ع الجزائر #الصياعة_ادب





اشمعنى الجزاير؟
أصل كان فيه علاقة للشاذلى بهوارى بومدين
 قديمة من ايام ما كان الاول 
 أمين مساعد عسكرى بالجامعة العربية
قوم السادات قبل حرب اكتوبر والأستعدادت
بعت الشاذلى لبعض الدول العربية
لجمع مساعدات منها الجزاير اللى ساعدت مصر
 بتانى اكبر مساعدات بعد العراق






بومدين رحب بسعد وقاله بلدك وبيتك ومطرحك
وسافر الشاذلى بعيلته للجزاير
مودعا البدلة العسكرية 
والبدلة الدبلوماسية بالمرة
وخلاص بقى مدنى ولا فيش مناصب
ولا حاجة
بقى مواطن عادى تماما 
وهناك كان بيته مفتوح للجالية المصرية
والجنسيات التانية واتكرم واتدلع
واتعمله حراسة مخصوص
وخلص سعد مذكراته ف فترة التفرغ التامة دى
وبعتها لبنته شهدان تتنشر ف امريكا
والبنية ذاقت الآمرين عشان تنشرها
اكمن السادات كان طفل امريكا المدلل
وقاعد على حجرهم بقى
ومش عاوزين يزعلوه #يوغتى 
ونشرته على حسابها
ودى كانت عجبة زمان مش زى دلوقتى ..!






 القصد المذكرات اتنشرت
وانتشرت كالنار ف الهشيم
 وعملت هيصة وهوليلة بما فيها من سرد
ورد فعل كبير 
ووصل صداها لمصر طبعا
واتنقلها الناس زى المخدرات كدا ف السر
وابو رقية الصراحة مبقاش عارف يلاقيها منين
 ولا منين واطلق كلابه يهوهوووو
واشتغلوا بقى ف الجمل اياها بأيعاز من سيدهم
 اللى بيوكلهم الممّ
الشاذلى خاين
وبيطلع اسرار بيتنا .. قصدى الدولة برا ! 






ولازم يتحاكم بتهمة "افشاء اسرار الوطن "
وازاى يستغل منصبه كرئيس اركان سابق
ويقول حاجات امن قومى
وكدا ميصحش ابدا
اين الوطنية
والملوخية
والمهلبية
وانتا بتكتب يا احمد ؟؟؟ 





ويعنى اللى انكتب ف البحث عن الذات
مكنش أسرار الدولة و حاجات عسكرية 
 وأمن قومى برضو 
ولا كان أسرار ام محمد بتاعت الخضار ؟!
ولا للشاذلى شيطان رجيم 
 وللسادات غفور رحيم ..!!






 تفتكروا اللى طول عمره توبه 
ابيض نضيف مفيهوش نقطة دنس .. هيسكت ؟!!
دنتوا غلطتوا ووقعتوا مع برج الحمل يا بابا
دى القرون دى مش محطوطة عبثا 
دنتوا هااااركم اسوووود
وسنة 1979 يبعت الشاذلى
 للنائب العام المصرى بلاغ ضد أنور السادات
رئيس الجمهورية يطالب فيه بالتحقيق معاه
عن أشياء كان من شأنها الإضرار بالبلاد
ويتهمه بالأهمال الجسيم وبالتزييف
و بالكذب وبالأدعاءات الباطلة
واساءة استخدام السلطة
ويدعم اتهاماته بوقائع واحداث وتواريخ بعينها
 #إديلووو




و ف نهاية البلاغ يقول ان قوانين البلاد
ودستورها لو مفيهوش نص يخليكم تحاكموا
رئيس الجمهورية فحاكمونى أنا وبلاش هوه 
 لكننننن
لو ثبت صحة ادعاءاتى
خلاص يبقى كدا الحق ظهر ويرد لى اعتبارى
 اما لو ظهرت انها أباطيل .. وافتراء
 فأنا مستعد لتحمل المسئولية كاملة 
#يا لعيييييب




وطبعا بعت صور من البلاغ لوكالات الانباء
واداله القاضية ف الحتة الفاضية
والموضوع كبر ف دماغ ابو رقية
لدرجة ان بعض قرايب الشاذلى ف بلاد برا
جالهم تحذيرات جادة بعدم الرجوع لمصر
 وقالولهم خليكم برا
احسن الريس عاوز يشوط ف أى حد
تبع الشاذلى طالما مش قادر يهوب نواحيه
هوه شخصياااا
وف وسط انشغالات السادات بحبس الشعب والمعارضين له ولسياساته
وف وسط انشغاله بقطع عيش
وتهديد المخالفين لرأيه
اتشددت الحراسة على سعد 
#ليه؟
كانوا خايفين عليه من الأغتيال






 لكن سبحان اللى هيغتال حد تانى سنة 1981 





 السادات




هينقتل بإيد اللى اداهم الامان وخرجهم من سجنهم 
عشان ينقلبوا عليه مع اللى طمعانين ف الكرسى
ويموت أنور ف يوم الزهو بانتصاره 
اللى حب يكوش عليه
ويخطف نصره لوحده 






وبالسلامة يا ابو رقية بس انا عاتبة عليك
دى عملة تعملها فينا يا رااااجل ؟!!!
طب قدر ان احنا شعب ويحيش
 وزعلناك حبتين
قوم تشيل ف نفسيتك 
وتدخل الشيطان ما بيننا 
وقبل ما تمشى
تدبسنا ف رجل الكنبة موبارك الوغد
عشان يقعد ينكد علينا 30 سنة بحالهم يا ثااامح






- وانا زعلان منك جدا يا حضرة الناظر
 - ليه يا ابنى
- دى أشكال تمريسوها ؟!!!
#منك لله 





وسعد بعد مقتل السادات طلع بيان
قال فيه ان نهايته جت بسبب سياساته القمعية
 ومعارضته للحرية
وعزله لمصر عن الجسد العربى 
قوم ناس طلعت تلومه وتقوله دى خيانة للوطن
ازاى تقول كدا ف ظرف زى كدا ..؟
ميصحش !!!
اهيه .. وهوه كان يصح اللى ابو رقية عملع 
ف سعد وف الشعب الكل كليلة !!!
 نعممممم 
الراجل مكدبشى وقال الحقيقة فعلا !! 





القصد موبارك الزفت مسكها
وعلى رأى الشاعر اللى مش فاكرة اسمه

ذهبت هموم حرت ف اسمائها
وأتت هموم ما لهن أسامى





وسنة 1983 بعد ما يرستق حوسنى نفسه شوية
ويشوف نفسه حبتين
يقرر فجأة م الباب للطاق
 انه يحاكم الفريق الشاذلى !!
اهيه .. ليه يا بابا كدا ؟ 
هوه الراجل زعلك ولا جه جنبك





ثم انتا اللى تحاكمه 
 دا السادات بجلالة قدره ونرجسيته
وغروره وصلفه معملهااااش ؟! 
قوم تيجى انتا يا زبل الحمام 
 يا امعة
 يا طفلة الحشرة





وتاخد عليه حكم غيابى بالسجن .. ينيلك !!!





المؤسف ان الاحداث ف الجزاير
بدأت تاخد منحى مش اللى هوه
واتغيرت القيادات والشاذلى بقى يعامل معاملة
مش تمام معجبتوش 
فقرر يرجع مصر 
وبعد 13 سنة غربة و أربع كتب
وحياة حافلة لم تهدأ لحظة
ومحبة جارفة من الشعب الجزائرى
يقرر الشاذلى العودة للوطن 





و13 مارس 1992 ينزل م الطيارة
ويتقبض عليه وتختفى اخباره عن أسرته
لمدة 3 أيام
ويعرفوا بعدها انه ف مستشفى سجن الهايكستب 




وتنشر الأهرام ان الشاذلى اتخطف
وبعدين تنشر خبر تانى
انه طلب اللجوء السياسى لعدة دول عربية
 و ان كلها رفضت طلبه
 وتشنيعات بالهبل 
ولأ مطلبش لجوء لحد ومحصلشى
#مرات الفريق سعد اللى بتقول
وطول عمركم كدابين يا ولاد االمتضايقة
#انا _اللى بقول






ويبدأ المرار الطافح ... 
ويتحجز بطل العبور الحقيقى مش الفنشك
وارد الطلعة الجوية
ف الهايكستب
ويتغير محاميه بضغوط خفية
ويتقدم استشكال للحكم عشان يطلعوه 
ويتعاد المحاكمة
اصله الوضع طبيعى جدا
انه لما حد يتحكم عليه غيابى
اول ما يظهر بيتعاد الموضوع
ويتحاكم حضوريا
والشاذلى طالب بمحاكمة علنيا
لأنه مش خايف من حاجة !!!





ويا عز الرجال مش انتا اللى خايف
دا  فار مذعور هوه اللى بيخاف
حتى من حروف اسمك
واترفض الاستشكال
وسمعنى أحلى سلام لقضائنا العسكرى 




والمؤسف الموجع المؤلم
انه ف نفس اليوم اللى يترفض فيه
 استشكال الشاذلى يفرج فيه عن شبكة تجسس اسرائيلية
يقودها يهودى اسمه فارس مصراتى ..!!! 



كل اللى بيحترموا الشاذلى برج من عقلهم يطير !!!
ويعنى خرجت جاسوس للعدو 
وحبست البطل اللى هزم العدو ... !!! 







وتتوالى المقالات وتترفع دعاوى لطلب الحرية
لبطل الحرب العظيم
وتاخد القضية دورتها سريعا 
فتصدر محكمة جنوب القاهرة الإبتدائية
حكم بوقف تنفيذ الحكم العسكرى
ومش بس كدا





تصدر محكمة جنايات أمن الدولة العليا
حكم تانى بوقف تنفيذ الحكم
والمفروض ان الحكم دا تحديدا
واجب النفاذ
وفوراااا
ويلا طلعوا الراجل .. مطلعشى برضو
 القصد كان اذلاله
 فهل وطى راسه وعملها ؟!!! 






عدت احتفالات اكتوبر 92 عليه
وهوه ف حجزه
وراحله واحد من قرايبه يزوره
وقاله نكتب التماس بالعفو طيب !
سعد رفض بشكل قاطع 
قاله اكتبه انا بلاش انتا
الشاذلى قاله لو عملت كدا مش هعرفك تانى !!






وتتحرك بنته الكبيرة شهدان
 وترفع دعوى رد اعتبار عشان تحرك القضية 
وتفضح النظام القذر دا
وتلف على كل قادة اكتوبر الاحياء 
تطلب مساندتهم لباباها وتدعيم موقفه





من ضمنهم كان المشير الجمسى
اللى السادات بهدله بهدلة السنين
وخلاه ماشى جوا الحيط مش جنبه بس
راحتله شهدان تطلب شهادته 
الراجل قالها انا اسف ومقدرش
ومش عاوز مشاكل تانى
واقترح عليها اسامى
قائدى الجيش التانى والتالت وراحتلهم فعلا
ووعدوها بالحضور والشهادة ...





وخرجت من عنده محبطة وبائسة
وكانت تتمنى يساعد ابوها لسمعته
وبحكم موقعه اثناء الحرب
ومعرفته لحقايق كتير ولثقل شهادته 

تانى يوم قبل الجلسة لقته ف وشها ف المحكمة
 بيقولها 
كان لازم اجى يا بنتى 
ووقف يدلى بشهادته اربع ساعات
:))
 #شهروزة عيونها بترغرغ 





ويتحكم برد الاعتبار للفريق الشاذلى
و برد نجمة الشرف له
ورغم انه برىء وبحكم محكمتين اهو
طنطاوى هيجيبها بجميلة
ويخرجه بأفراج صحى !! #اوغاد






وايه يا خويا الراجل دا
 اللى كل ما يحاولوا يحطموه ويقزّموه
يخرج من المزنق اقوى م الاول
وعملاق ومنتصر .. !! 


الناس بتحكى انه كان ف السجن 
متشال على الراس من كتر محبة الضباط والعساكر
اللى سمعوا عنه وعن امجاده 
مش بس اللى سمعوه 
اللى شافوه بعينهم من التواضع والمهابة 
الراجل كان بيطبق اللى اتعود عليه ف الجيش 
لدرجة انه كان بيوفر لهم حتى ف الكهربا 
وهوه مسجون عندهم ... !!






القصد يخرج سنة 1993 الشاذلى من محبسه
على شبراتنا مركز بسيون الغربية
مسقط راسه عشان تكون اخر المطاف
بعد لف وترحال ويبقى كبير البلد بمحبة اهلها 






ويظهر فى بعض الفضائيات زى الجزيرة
ويلقى محاضرات يحضرها الآلآف
والناس تتلم حواليه كالعادة
قوم موبارك الوغد يفرك
ويبسك عليه اعلامه العاهر يشتم فيه
ويلقى عليه التهم ويقلب ف التاريخ المزيف
والراجل يقرف منهم
بس يفضل برضو ثابت على موقفه
ويرعى اهل بيته وبلده





وبعد دخول الامريكان بغداد 2003
يدخل ف نوبة اكتئاب تروح وتيجى
وبعدين تتدهور صحته ويعمل عملية فتاق
كانت لازمة وضرورية 
والظاهر البنج أثر عليه بشكل كبير
كان سنه فوق التمانين يا عيال





وابتدى صاحب الذاكرة الحية
اللى مبتنساش حاجة يعانى من الالزهايمر
وآخر 3 سنين كانوا الأصعب
 لكن اخر 9 شهور كانت قلت حركته جدا
وضعف بصره وسمعه
 السن بقى واحكامه







ويتنقل للمركز الطبى العالمى ويدخل ف غيبوبة
 بس قبل ما يدخل فيها
يلحقوا يهمسوا جنب ودنه
ان الشعب المصرى قام بثورة 
وباينه هيشيل مبارك بجد .... !!




وشوف بقى مفارقة القدر
ف نفس اليوم اللى يلاقى فيه الفريق سعد الشاذلى ربه 
يكون الثوار ناويين على الزحف على قصر الموكوس
 عشان يغور 





ويخرج جثمان البطل الطاهر بعد الصلاة عليه
عشان يندفن ف تراب وطنه معزز مكرم
محاط بالدعوات والدعوات بسكنى الجنة
بينما موبارك بيركب الهيلكوبترهربان زى الكلب
مشيع بالعنات والدعوات بالهلاك
 #دنيااا





وترد ثورة يناير للشاذلى كرامته ومجده
ويتردد اسمه كبطل ف الميدان
ومعرفش ليه دايما بفتكره بهذا الهتاف
الجدع جدع والجبان جبان 





وتترسم صورته ف محمد محمود 
عشان يفكر الناس بالجندى الحقيقى 
مش العسكر 




وخلاص انا اوشكت اخلص
 بس لازم اقول شوية حاجات كدا
اولها الفريق سعد الشاذلى اسمه مفيهوش .. الدين





دا خطأ شائع سببه قعاده ف الجزاير سنين
الناس هناك الظاهر بيحبوا اسماء صلاح الدين
.. شهاب الدين .. الخ فكتبوا اسم الشاذلى كدا
وهذه مش حقيقة .. هوه سعد وبس








الشاذلى  زار مرة البانوراما
لقى مركز قيادة الحرب وصورته مش مرسومة
وناس تانية محطوطة ومكنتش هناك اشاساااا






نده المسئولين 
 ايه الغلط دا ازاى يحصل ؟؟
قالوله دا خيال فنان وبتاع وملناش دعوة !
راح مقدم بلاغ عشان هما تجاهلوا رتب كبيرة
مش هوه بس وحطوا رتب أقل محاباة وتزييف للتاريخ
 قوم اتشكلت لجنة وقعدوا يستهبلوا
 وف الآخر رسموا راسه مش باينة من بعيد!
موبارك الوغد كان عاوز يمسحه من كل حاجة ... !





الشاذلى على الصعيد الانسانى كان شخصية فذة

ولطيف ومثقف وكاريزمته دى اللى جابتله الكافية





مراته كانت بنت مدير الكلية الحربية خبط لزق كدا !
وتخيلوا بقى لما مدير الكلية الحربية ذات نفسه
يتوسم ف هذا الفتى من صغره
انه هيبقى حاجة كبيرة فيجوزه بنته !!!






اهله بيقولوا انه كان منظم بشكل مرعب
وان قاموسه اتطبق ف البيت على بناته واحفاده
وعلمهم النظام واحترام الوقت والكرامة 
وبيقولوا حاجة لطيفة
انه طبعا كان راجل رياضى وتدريبات شاقة
 و كان حريص طول عمره على وزن معين 
ميزدش عنه مهما حصل ابضننننن
 :))





وصحيح مخلفش ولاد لكن علم بناته المسئولية
 وبنته شهدان اتعلمت القفز بالمظلة زيها زى ولاده
اللى ف سلاح المظلات تمام





ومعلش انا شتمتهم بس مش كفاية الصراحة
 ايه دا ايه الخسة والوضاعة والنجاسة دى
 اللى بيدافعوا عن موبارك دول
جنس ملتهم ايه ؟




والسادات روخر .. ايه يا بنى شغل خناقات السلايف

وغيرة الضراير
ومجد اكتوبر كان يساع الجميع يعنى
 دنتا شخصية سيكو قوى قوى !!





وف سياق متصل ما دمنا جبنا سيرة الرويسا

 اللى اتوكسنا بيهم
 الاخوان اللى بيتمحكوا ف الشاذلى دلوقتى
 وبيلقحوا ع السيسى 
اومال مين يا حبيبى اللى بلانا بالنصيبة الحالية
 وقال عليه وزير دفاع صوام قوام ولبسنا فيه
وبيحاسبنا عليه دلوقتى 
 ويسمعنا المنقى
شوف نفسك الاول





وبالنوسبة للسيساوية اللى بيتمحكوا برضو ف الشاذلى
 ويقولك البيصى بيعيد امجاده وشبهه وزفت
 نعم يا حبيبى انتا وهوه ؟!!!
من امتى الشاذلى ايده اتعاصت بدم مصريين
أى كانت انتماءتهم
وكان امتى قتل ف ثوار واخوان عشان يمسكها هوه
ف الآخر ويقعد على تلة بعد خراب مالطة 
فكرونى حصل امتى يمكن كنت مسافرة ولا حاجة ؟؟؟






ومحدش يهرتل بحوارات دا بطل

دا انقذنا
 دا بتاع
 الابطال يا بابا انتا وهوه زى الشاذلى كدا 
اللى  بيعملوا الأفعال الشجاعة
ويروحوا ومبياخدوش قصادها غير المجد المعنوى
وشكرا 





البطل بينقذ الارواح ويشكروه ويروّح
مش بيقتل الأرواح عشان يبقى رئيس جمهورية
الشاذلى لا بتاعكم ولا بتاع الأخوان ولا بتاع الفلول
وبطلوا تماحيك ف الجدع اللى يتهيألى لو موجود كان قال
#عبوكو_كلكو






ومش بعيد كمان يطلعلولنا
 بتوع الدولة الاسلامية روخرين بعد شوية 
 ويقولوا الشاذلى لو كان عايش كان زمانه معانا
 اهو دا اللى ناقص !!!





واخيرا .. طول عمرى ومن قبل الثورة

وانا بستغرب على البنات صحباتى
وولعهم بالبدلة الميرى وشكل الضباط وابصر ايه
ونفسى اتجوز واحد منهم
 o.O
ومع نفسهم انا مالى خلاص ..
بس بعد الثورة بكام يوم اكتشفت انى صح جدا
وكم من بدلة قهرتنا وبهدلتنا 
والبدل مبتعملش الناس
 والمهم اللى جوا البدلة حضرتك







واذا كان فيه حد يستحق الاحترام والتحية بحق

على كل ما قدمه ودفع تمنه طول عمره
ومخدش مقابل فمش هيكون سادات ولا مبارك ولا سيسى
وهيكون الشاذلى وبس





لا الــه الا الله هـو وحــده

 نصــر عبـــده
و أعــــز جنـــــده
والفريق الشاذلى هوه فعلا ف نظرى  .... أعز جنده 


الله يرحمه ويرزقنا بناس حلوة كدا زيه تانى 
وتالت 
وعاشر 
بدل الأشكال الضالة اللى مررت عيشتنا دى 
#النبى_حبيبك_يارب





ونقول تانى ..
سرد الحكاية من كتاب العسكرى الأبيض
 لمصطفى عبيد


تصبحوا على ألف خير 



-----------------------------------------


 Cindy ‏@CindyJanabi   
 ماتنسيش يا شاهي المناظرة اللي عملها
 مع السفير الاسرائلي
 في لندن 




 Tricksy ‏@Tricksy4   
 النقطه دي كانت معروفه عن مبارك
و اتكلم عنها إيهاب نافع بموقف حصل له شخصيا
 اعتقد بس مكنتش متأكده .. لكن السلوك معروف



 mayada el_awady ‏@MayadaEl_awady  
  المنوفية سمعتها سابقاها والله ماانت حالفه :)



 Ahmed ‏@bahgaga99  
 من احبوا وتفانوا فى خدمة مصر ماتوا فى ضوضاء
احداث اقل بكثير من اسمائهم



 حـفيدة أسـد الجزيـرة ‏@HuthamahAlSabah  
ابو رقيه تحول لأم رضا المعدّده



Ahmed Al-Ish ‏@AhmdAlish   
هو اللي قال ده، ان لقاهم بيحضروا خطبة قصيرة
 يلقيها قائد كل كتيبة على جنوده قبل العبور
فقالهم مجند يمسك ميكروفون ويهتف الله اكبر




 Tahrir ‏@Huria_Egypt   
 مع كامل الاحترام لشخص و تاريخ و مكانة سعد الشاذلي
 الا ان نقل القصة من وجهة نظرة فقط  غير موضوعي
 في كتب اخري مثل كتاب الجمسي



 gomaa ismael ‏@khafaga73   
 ياسيدتي بقالك يومين بتحكيلنا في كتاب قريتيه
 عشان في الاخر تشتمي الناس ؟
مش فاهمك



 mohamedamar ‏@mohamedamar1960  
 كتيراتظلموا ولم ياخذوا حقهم
 على راسهم الفريق فوزى وعبد المنعم رياض
 وابطال مجهولين كتير قوى



 Moussa ‏@moussiav  
 المهم طنطاوي ده ولا كان ليه اي دور في حرب اكتوبر
 كان رائد وكتيبته اتحركت من غير غطاء دفاع جوي
 واتضربوا وقضي الحرب في المستشفي



 john gabriel ‏@johngabriel18   
متهيألي كل المشاكل دي عشان ما كانش من المنوفية 



 Heba ‏@HappyGeddan   
 اهه انا امي ماتت في دخله الامريكان للعراق




 Mohamed Emam ‏@memam8   
 - مذكرات حرب أكتوبر - سعد الدين الشاذلي
http://mybook4u.com/ منوعة/download/61




 Moussa ‏@moussiav   
 مراته كانت زعلانه انها مخلفتش صبيان
 قالها ولايهمك انا هخلي بناتك ب ١٠٠ راجل
 شهدان الشاذلي اول سيده عربية ومصرية تقفز بالمظلات




 Shady ElGhazaly Harb ‏@shadygh  
المجد لأبطال أكتوبر الحقيقيين
#الفريق_سعد_الشاذلي والمشير الجمسي
والعار لمن سرق انتصاراتهم
#مبارك_الحرامي ماسرقش فلوس البلد بس




 Tricksy ‏@Tricksy4  
 وهنا خاصة أحب أقول إنه مش محتاج التكريم ده
 قد ما إحنا اللي محتاجينة
هو أخده محبه و ذكرى مستمره بالخير 



 Mohamed Emam ‏@memam8   
  شاهد على العصر- سعد الشاذلي - الجزء الأول https://youtu.be/dC9em6D5UuI 




هناك تعليقان (2):

  1. ردي على خطاب السادات في مجلس الشعب يا رب – كفانا حكاما مثقوبين – كفانا حكاما لا يستحون – كفانا ضحكا على الذقون – لا يهمني ان يخرج أي فرعون ويخطب خطبه عصماء امام الشعب الغبي – الشعب الذي نسبه الاميه فيه اكثر من 90% - ما يستفزني هو تعليقات القراء على الخطاب – كيف تعلق على خطاب وانت لم تسمعه – ولم تقراه – واذا قراته فانت لم تفهمه – كيف تصفق لخطاب يمجد احمد اسماعيل علي والذي طرده عبد الناصر من الخدمه لانه جبان – وبقي في بيته الى ان ارجعه السادات وزيرا للحربيه – لان السادات كان يبحث عن طرطور ينفذ اوامر السادات كما ينفذ العبد اوامر سيده بدون سؤال او استفسار – كيف يمدح السادات احمد اسماعيل علي ولا يذكر البطل الحقيقي للحرب سعد الدين الشاذلي ؟ كيف يسكت الناس وهم يرون الفرعون يزيف التاريخ امام اعينهم ؟ كيف يسكت الناس وهم يرون الفرعون يذهب راكعا الى اسرائيل مثل عاهره تذهب الى قوادها اخر اليوم لتقدم له تقرير عما صنعت ذلك اليوم – ومع كم زبون كانت في الفراش – وكم من النقود جمعت – السادات له لقب واحد في التاريخ – الخائن – مهما حاول الاغبياء والطبالين والمزيفين ان يجملوا صورته – فسيبقى عند كل الاحرار والشرفاء الخائن السادات – ويوم القيامه سوف يناديه الله بلقب الخائن – فلا لقب يليق به اكثر من لقب الخائن – سوف اتوقف عند بعض ما جاء في خطاب الخائن – لافحصها معكم – ونرى صدقها من كذبها –
    يصف الشعب المصري بالشعب الابي – هههههه – هل حقا الشعب المصري شعب ابي ؟ كلمه ابي يعني العزيز الشريف الذي لا يقبل الذل او الخضوع – فهل الشعب المصري هكذا ؟ ههههه – لا – طبعا لا – فالشعب المصري لا توجد في قاموسه هذه المعاني والصفات – هو شعب ذليل مهان – عباره عن قطيع من العبيد – منذ مينا اول فرعون مصري الى اخر فرعون – الزيزي – وقبل ان تشتموني او تسبوني – هذا ليس رايي واله – هذا راي السادات وهو مذكور في خطابه الذي قراتموه ولم تفهموه – هو يصف الشعب بانه يقف في طوابير وبطاقات من اجل لقمه العيش – وهو يقول بان الشعب عاش خمسه قرون أي 500 سنه تحت الذل والمهانه – احتلال يذهب واحتلال يجيء – هو يقول في خطابه بان الشعب المصري عاش قرونا من التخلف والهزيمه – طبعا انا لا اصدق خائنا – لكن هذا الكلام قال به كثير من علماء مصر – يهمني انه كذب عندما قال شعب ابي – وبعد دقيقتين يصف الشعب بالذليل والمهان والمتخلف – ثم يكذب عندما يتكلم عن صلابه دبابات مصر – ههههه – أي صلابه ؟ هل نسي السادات بان هذه الدبابات الصلبه دمرت اسرائيل منها وفي خلال ساعتين وفي يوم 14 اكتوبر بالضبط – بين الظهر والعصر – اكثر من 250 دبابه ؟ كيف تنجح اسرائيل في تدمير 250 دبابه في ساعتين ؟ اسالوا السادات الخائن – اما شراسه الطائات فهي قصه اخرى – باعتراف كل من شارك في الحرب او كتب عنها – يعترف بان الطيار المصري لا يقارن نهائيا بالطيار الاسرائيلي – الطيار المصري كان يتجنب أي مواجهه مع الطيار الاسرائيلي – هذا ما اعترف به كل من كتب عن الحرب – ثم يعترف بان مصر عاشت 500 في هزيمه وتخلف وذل ومهانه – هو يكذب ايضا – فمصر عاشت 5000 سنه في الذل والمهانه والعبوديه – 5000 سنه وليس 500 سنه – يبدو انه نسي الصفر الثالث – طبعا يعترف من خلال هذا الجمله بان مصر زمن صاحبه عبد الناصر – فرعون مصر منذ 1952 الى سنه 1970 – ايضا كان تخلف وذل وهوان وهزائم – الحمد لله – شهد شاهد من عصابه الفرعون عبد الناصر – اما قوله بان القوات المسلحه ردت للمصريين كرامتهم – فهي جمله اضحكتني كثيرا – القوات المشلحه المصريه تعودت على شلح الملابس امام اليهود في كل الحروب التي خاضتها مع اسرائيل – حتى تغير اسمها من القوات المسلحه الى القوات المشلحه – وهذه القوات قامت بتشليح الشعب من باقي كرامتهم – ولا زالت القوات المشلحه حتى يومنا هذا تقوم بتشليح الشعب من كل شيء – تشلحه من امواله – من مدخراته – تشلحه من رزقه – تسرق من لقمه العيش – تبيع الكعك على النواصي – وتبيع الخضار والفواكه المرويه بماء المجاري – تبيع لحمه هنا وهناك – هذا هو دور القوات المشلحه في مصر – فلا حريه – ولا قانون – و قضاء – ولا مقدسات – ولا دين – ولا رجال دين – الكل – الكل تحت اقدام العسكر – فكفى ضحكا على الذقون

    ردحذف

Related Posts Plugin for WordPress, Blogger...
"حقوق الملكية والملوخية والمهلبية ... الخ
محفوظة للست شهرزاد وإياك حد يسرقها ويحاول يزعلها آغجر .. مفهوم ؟ "