السبت، 23 مايو 2015

لغتنا العامية البزرميط خالص ... 3





العواف عليكم
 كمان شوية امثال وألفاظ من زمن فات




بنستعملها وفاكرينها تأليفة مصرية خالصة
واتاريها فصحى أصلى تقفيل بلاده






" ابن الكُبة طلع القبة و ابن اسم الله خده الله "

وهل تعلم عزيزى المتابع ان كُبة دى أصلها فصحى
الكُبة ليها كذا معنى منهم الثقل
الكُبة كمان بمعنى الطاعون والدمل او البثرة
 وأى حاجة تتكور او تتعمل بشكل اسطوانى زى اللحمة
 ومن هنا جت كلمة .. كبيبة #الاكلة الشامية 
بالتالى أى مزز ماشية ف شارع زمان والآن
 لما تقول لحد بيعاكسها 
سم يا كُبة
 تبقى ف الغالب هتقصد انه رخم او طاعون
 او دمل او كبيبة
وهوه المفروض يكون فااااااهم 



Heba ‏@HappyGeddan  
تصغير الكبه كبيبة فعلا




وعلى ذكر الرخامة رخم دى

 لما بنقولها على حد سقيل وغلس
معناها ف اللغة العربية الفصحى من ضمن اشياء اخرى
 اللبن الغليظ او الكثيف
والرخم برضو عبارة عن طائر مواصفاته كالآتى
غزيرُ الريش أَبيضُ اللون مبقَّع بسواد له منقار طويل
 قليل التقوُّس رماديُّ اللون إِلى الحمرة
أَكثر من نصفه مغطَّى بجلدٍ رقيق
 فتحة الأَنف مستطيلة عارية من الريش
وله جناحٌ طويل مذَبَّب يبلغ طوله نحو نصف متر
 والذنب طويل به 14 ريشة
واخيرا رجليه ضعيفة 
والمخالب متوسِّطة الطول سوداء اللون
 م الآخر فيه شبه م النسر شوية
 وسقيل ورخم زيه تمام #ختم_الحكومة_بأمتياز



Hany Zaky ‏@Hany_Zaky  

 الرخمة 
هى النسر المصرى
 هو شكله رخم فعلا





" اتصالح الفار والعرسة ونسيو الهتيكة والجرسة " 
زمان كانت من احدى العقوبات ف مصر .. التجريس
كانوا بيقعدوا البائس المحكوم عليه على حمار بالعكس
  ويمشوا بيه ف الطرقات يفضحوه ويعلنوا جريمته
وكان اللى ماشى جنبه ماسك جرس
عشان يصحصح النايم
ويسمع اللى مش سامع
 ومن هنا جت كلمة يا دى "الجرسة"




وعلى ذكر الحمير لما يحبوا يقولوا على حد تافة
وامعة وملوش رأى ولا سلطة انه .. شرابة خرج 




الخُرج بتاع الحمار له استعمال
 اما الشراشيب اللى بتبقى علي الخرج دى
 لزوم الزينة وفقط
 ولا ليها فايدة فشرابة الخرج يبقى زيها 






غشيم ومتعافى  #امثال
وهل تعلم ان لبط  دى فصحى
 لبط فلان : صرعه طرحه ارضا
وف قول اخر لبط به الأرض زى مسح بيه البلاط كدا !!
 ولبطه الفرس يعنى رفسه بقوائمه !




طخه بس متموتوش يا بوى
مش ضرب وتهويش بس
 يهوّش دى فصحى بمعنى يحدث الإضطراب
 ويزرع الفتنة والاختلاف ويفسد بين الناس 
هوَّشَ يهوِّش تهويشًا فهو مُهوِّش والمفعول مُهوَّش
هاش القومُ يعنى اختلطوا واضطربوا ووقعت بينهم الفتنة

eslam ‏@eslmessam 
 الخليج بيقول هوشه ع الخناقه




"أول حزنها جواز ابنها"
 المثل دا بتاع الحموات المفتريات اللهم احفظنااااا 
وتبقى بتجوز الواد وتفضل تنكد عليه هوه ومراته
 لحد ما يرجعلها متطلق زعلان منفلق




 زعلان دى جاية من الزعل
وزعل فصحى
زعل يزعل فهو زعلان وزَعِل والمفعول مزعول منه
زعل يعنى : مضطرب متلو من مرض أو جوع
وزعل من تصرف ما
يعنى: غضب واستاء وحنق وسخط ومّل
وهو زعل وهى زعلة




"بيت ينشرى و بيت ينكرى و بيت يغور بسكانه"
ينكرى يعنى يتأجر




لهوج يلهوج لهوجة فهو ملهوج
 يلهوج الشىء يعنى لم يحكمه ولم يتمه
لهوج الطعام يعنى لم ينضجه
 لهج بمعنى ولع بالشىء وثابر عليه ولم ينته منه !
عشان كدا الكلمة مقترنة بالدعاء .. لأنك مبتخلصش منه
 ولا تنهيه ابدا مهما دعيت
 :)




وزغزغة يا عيال !!
 زغزغ يزغزغ فهو مزغزغ وتلك زغزغة !
 يزغزغ الطفل يعنى يدغدغه ليثير ضحكه
 زغزغ بشىء بمعنى هزىء وسخر منه 




وبطل برطمة
 البرطم هو : عيّى اللسان
وبرطم الليل : يعنى اسّود
وبرطم بمعنى غضب وكشر وعبس واغتاظ
وأدلى شفتيه من الغضب




بجم اللى بنستعملها كشتيمة لما حد يتنحلنا
بجم بمعنى : ابطأ وانقبض وحدق بالنظر
 وسكت من عِيٍّ أو فزع أو هيبة




نـ قور الكوسة دى فصحى
 قوّر يقوّر تقويراً فهو مقوّر
قوّر ثوب أو أى شىء
 يعنى جعل فيه خرقا مستديرا .. !




"راحت الناس وفضل النسناس" #امثال
طب والله شبه فريد الديب #هع


 سعدية سليم ‏@sa3deaselim   
 بتشتمي القرد الله يسامحك
:)


WTHend ‏@HendZayed  
 يعنى مشيوا الناس اللي كنت فرحان بلمتهم حواليك،
 واخرتك انت والنسناس بوشه العكر
وعدم منفعته لوحدكم
 تمشي كده؟



زالفل انتى كدا شرحتيه بالمللى :*




بطل لكاعة
لكع يلكع لكعا فهو لكيع بمعنى اللؤم والحماقة
 رجل فيه لكاعة يعنى بيتلائم
عشان ميكملش الفعل المطلوب منه
ومعلش القلشة حكمت .. #رامى_لكع 



WTHend @HendZayed 
 الصورة اللي فاتت وجه القرد
 والصورة دي لا مؤاخذة مؤخرته #حبكت




دا كهين وسوسة
 كهين جاية من كهن تكهن فهو كاهن وتلك كهانة
وهولاء كهنة
كهن لفلان يعنى أخبره بالغيب
وحدثه به بعد ان خمنه





ربنا ياخد المدعوق اللى ف بالى
 المدعوق متحرفة عن مدعوك
 دعك يدعك دعكا فهو داعك
 والمفعول مدعوك
 ومعناها الآتى 
دعك الجلد يعنى لينه وجعله طريا
 دعك الخصم يعنى ذله حتى استسلم
 دعك شخص ف الوحل يعنى مرغه
 دعك الثوب يعنى فركه لحد ما نضفه 
والمدعوك بقت تتنطق مدعوق بمرور الوقت 




" يا حامل هم الناس خليت همك لمين ؟ " #امثال 






كل ما اشوف حبيبى وبعدين ييجى يقوم يمشى
 اقوله زى سيمون بالضبط 
 استنى شوية متمشيش !!
استنى ... جاية من تأنى ويستأنى
شوية .. معناها البقية من الشىء
 اشوى يعنى اخد شيئا يسيراً او هينا





متبقاش بايخ !
 باخ يبوخ بوخا وبؤوخا وبوخانا
باخ الشىء يعنى : فتر و تعب و سكن
 و تغير وفسد وذهب لونه





الناس اللى بتغش وبتعمل برشام
 هل تعلمون ان من ضمن معانى برشم
انه يعنى: أظهر الحزن
وبمعنى انه : أدام النظر وأحده !! 





"عقبالك" جاية من العقبى لك
يعنى انتا اللى عليك الدور المرة الجاية
"كويس" جاية من كيسّ يعنى فطن لبيب نابه
وبيعرف يتصرف كما يجب ومتوقع منه




انا لابدلكم هنا
لبد معناها لزم وقعد
لبد بالمكان : اقام به
 لبد الناس به : لزموه واحاطوا به
لبد الشىء بالأرض : لزق




الواحد ميعرفش يبعبع معاكو بكلمة !
بعبع يبعبع بعبعة فهو مبعبع
البعبعة صوت خروج المية متتابعة ف الأناء
ولهذا
بعبع الشخص يعنى اخرج كلمات سريعة غير مفهومة
 بسبب سرعته ف التحدث
بيبعبع زى المية لما حد يشربها وتخرج م الاناء
ومثلما يعب احدهم الماء عبا





" ايد الحر ميزان " #امثال




" بعد ما كان بيحجل زى الغراب لبس جزمة و شراب "




" حطى جوزك فوق السطوح ان كان فيه خير ما يروح "
 #امثال 
فوق السطوح ليه ... فرخة دا ولا ايه ؟!!
 عملت ايه يا منيل ؟!!
الظاهر دى اختبارات الصلاحية بتاعت زمان ؟
 #شهروزة_تتعجب





" جم يساعدوه فى دفن أبوه سابهم و مشى "




واخيرا .. خلصنا
تصبحوا على ألف خير


---------------------------------


saso ‏@_samah__  
 طب والله ده احنا طلعنا ناس زي الفل اهو 
ونص كلامنا فصحى


هناك تعليقان (2):

  1. مساؤك سكر يا شهرزاد
    مما قرأت انه عندما ترتكب احداهن الخطيئة فى احدى مناطق الهند يطوفون بها عارية على حمار ارجاء المكان عقابا لها

    ردحذف
  2. مدونة رحلة حياه
    ------------------
    يا ليهوى .. !!!!!!!!

    :))

    ردحذف

Related Posts Plugin for WordPress, Blogger...
"حقوق الملكية والملوخية والمهلبية ... الخ
محفوظة للست شهرزاد وإياك حد يسرقها ويحاول يزعلها آغجر .. مفهوم ؟ "