الثلاثاء، 19 مايو 2015

ابراهيــــم الوردانى غــــزال البــر




مساء الخير يا ولاد
 حدوتة النهاردة طول ما كنت بجمع تفاصيلها
مكنتش بفتكر غير هذا الدعاء 



والحكاية عن شاب مصرى
غزال البر اللى لخص الموضوع ف جملة واحدة
 لما سألوه
 ليه قتلته ؟؟
فقال .. "لأنه خائن للوطن"





واكتب عندك يا بنى
انه ف الساعة الواحدة بعد الظهر
يوم 20 فبراير 1910 هيخرج المذكور
من مقر عمله عشان يركب عربيته
ويروح بيتهم
 المذكور مين ؟
المذكور سعادتك يبقى الأخ بطرس غالي
 رئيس وزراء مصر ف هذا التوقيت
لما كانت مصر تحت الاحتلال الانجليزى





واللى كان قاعد على عرشها
الخديوى عباس حلمى التانى اللى بدأ عهده ثورجى
ثم حبة بحبة بقى قطة شيرازى بتتمسح
وترقد ف خنوع تحت رجلين المحتل 




القصد ..
خرج بطرس غالى ومعاه
1.حسين باشا رشدي ناظر الحقانية
 2.فتحي زغلول وكيل الحقانية
3.عبد الخالق ثروت النائب العمومي
4.أرمولي بك تشريفاتي الخارجية
وباى يا ولاد عشان رايح اتغدى
مع السلامة آريس
وبينزل السلالم
ورايح يركب العربية لقى شاب من ورا بيندهه
عشان يقف
وبيقوله معايا عريضة عاوزك تبص عليها




لسه بطرس هيبص وراه 
 سمع طلقات مسدس ف ضهره
واذ به يكتشف انه هوه اللى بينضرب بيها ... !
كانوا رصاصتين
وبيتلفت عشان يشوف مين اللى عملها
 لقى الفتى بيضربه 3 رصاصات كمان
ف كتفه ورقبته 
ورصاصة سادسه طاشت
وجت ف هدومه
 وشكرااااا





ووقع الباشا ع الأرض واتلمت الدنيا
حسين رشدى وزير الحقانية (العدل حالياً)
بص للجانى كويس وهما بيقبضوا عليه ويكتفوه
اكتشف انه يعرفه
 قرب منه وخبطه بإيده وقاله ليه تعمل كدا ؟!
 الجانى بصله وسكت منطقش 
كان مين يا شهرو
 هذا الفتى ؟
كان .. ابراهيم الوردانى





ابراهيم ناصف الوردانى
غزال البر كما سماه المصريين
بعد حادث الاغتيال الشهير 
وستوووب
فلاش باك شويتين لورا عشان نفهم
عمل ايه بطرس غالى عشان ينضرب بالرصاص
 ومين ابراهيم الوردانى دا اللى اتجنن 
وعملها .. ؟!!!





بطرس نيروز غالى
من مواليد بنى سويف 1846
كان ابوه بيشتغل ناظر للدايرة السنية لواحد
من اخوات الخديوي اسماعيل في الصعيد
ابوه علمه كويس
واتنقل ف المراحل التعليمية من الكتّاب بقريته 
للمدرسة القبطية بالقاهرة
وبعدين دخل مدرسة البرنس مصطفى فاضل
وفيها اتقن اللغة الانجليزية والتركية
ولما خلص رجع اشتغل مدرس ف المدرسة القبطية 
اللى كان فيها قبل كدا
وسافر اروبا يتعلم هناك
ورجع وكانت الثورة العرابية ف عز عزها
قوم اييييه ؟؟





كان هوه ترقى ف المناصب
من باشكاتب لمجلس التجار ف اسكندرية
 ثم سكريتر لنظارة الحقانية
 ثم وكيل ليها ف سنوات قليلة جدا
وهوووب اخد الباشوية
واللى انعم عليها بيها
سى توفيق افندى نكسنا العلم سنة 1881





وبيقولوا ان بطرس غالى كان اول قبطى
 ياخد الباشوية وكدا 




القصد .. الثورة العرابية قامت
 وبطرس كان من رجال الدولة المخلصين
 لكن بدهائه اخد صف التهدئة
وكان بينصح بالتفاوض مع العرابيين
وعرابى وثورته هزمتها الثورة المضادة
واتنفى يا حبيبى ودخل الانجليز مصر
وقعد توفيق شويتين صغننين
وغار ف داهية




ومسكها ابنه .. عباس اللى استعان ببطرس ف الوزرات المتعاقبة اكتر من مرة
مرة وزير مالية ومرتين وزير خارجية 
واخر وزارة قعدها من نوفمبر1885
لحد نوفمبر 1908 ودى كانت مدة طويلة
بتقول معانى كتير
ان بالبلدى كدا
الراجل كان ننوس عين الانجليز
واسيادنا راضية عليه
والكلام دا اتحقق قولا وفعلا
بطريقته ف ادارة الامور
واللى كلها كانت بتصب ف صالح الانجليز والقصر
 لما ف مرات بيتفقوا على البلد والمصريين 
وما اكتر هذه المرات !!






والحكاية بدأت تحديدا سنة 1899
لما وقع ابو البطاريس اتفاقية خاصة
 تدى للأنجليز الحق (مع مصر) ف الحكم
والسيطرة على السودان
والدنيا قامت عليه ازاى يعمل كدا !
يسكتشى بقى ... لأ أبضنننننن
سنة 1909 هيخرج قانون قديم  م الادراج
اسمه قانون المطبوعات
عشان بيه يضيق ع الجرايد والصحافة
اللى بتهاجم سياسات الحكومة والقصر وكدهون




ف شهر مارس هيعمل كدا
وف يوليو من نفس السنة 1909 يعنى
هيوافق على اصدار قانون النفي الإداري
عشان يقرف أى موظف
يخرج عن المطلوب والمفروض





ويكمل الحكاية بمشروع مد امتياز قناة السويس 
 واللى بموجبه تدفع شركة
(مش هتكون اجنبية ومش انجليزية طشبعننن)
للحكومة المصرية 4 مليون جنيه 
ليه؟
نظير ادارة القناة والأستفادة من ارباحها
بالمناصفة مع الحكومة





وطبعا المشروع مكنش ترسيخ لقدم الاستعمار
ولا لحس لرجلين المحتل 
ولا لهف لفلوس البلد ف جيبنا احنا 
بينما نبيع البلد للغير 
ونزود الخضوع لأرادة خارجية 
ولا حاجة خاااالص م الحاجات تشى
و ازاى ييجى ف بالكوا الكلام دااااااا ... !!
#شهروزة_تستعجب !





وكل دا كوووووم ومحاكمة دنشواى
اللى كانت كوم تاااااااااااااانى
الموضوع كلنا عارفينه وحافظينه
ومرة شهروزة تحكيه بالتفصيلى المملى
 ان شاء الله
بس الملخص ان سنة 1906 هيتظلم فلاحين
 ف قرية دنشواى ويتعدموا بالرخيص
وهيكون قاضيهم ومحاميهم والنايب
مصريين للأسف




وزير الحقانية ف هذا الوقت كان غايب
لأسباب ما
فعلى حظ بطرس باشا غالى انه كان بيقوم بأعماله 
وانتدب لرياسة محكمة دنشواى
مكنش لوحده وكان عضو ف هيئة المحكمة
بس كان المصرى الوحيد
واللى زى ما قال بعديييين
انه اضطر يوافق مرغما على الاحكام 
وانه فعلا اعترض على شنق واحد
ومسمعوش كلامه .. ! 






واتشنق الفلاحين الغلابة ظلما وعدوانا
واتوصم كل من شارك ف هذه المحاكمة
والحركة الوطنية باجمالها
فضحتهم فضيحة زرقة 
وكل الأسامى على الملأ كدا






بطرس غالى .. القاضى
 فتحى زغلول .. اخو سعد زغلول .. وكيل النيابة
 ابراهيم الهلباوى .. محامى الدفاع
واللى كان نيران صديقة ف القضية !!
التلاتة دول اتشندلوا واتفضحوا
والوسط السياسى كان قرفان منهم لموقفهم الزفت
 ف دنشواى لكن هما يهمهم ؟؟!
المهم رضا الخديوى واللى فوق الخديوى !





المختصر بعد دنشواى بطرس غالى
هيبقى من المقربين لعباس حلمى
 ويتنطق لحد ما يبقى رئيس الوزراء
وبعدين يبتدى ينفذ سياسات الاحتلال
على اكمل وجه ويصدر ف القوانين
واستهدى بالله يا مصر وقومى اقلعى
لحد ما تيجى سنة 1909
وتبقى دى القشة التى قصمت ظهر البعير
 لما يعمل مشروع مد امتياز قناة السويس
والاكادة انه مش هيعرضه للرأى العام ولا حاجة
ويخليه ف السوكتيم
بس مين اللى هيعرف بالمشروع ويفضحه ؟
قولوا مين يا عيال ؟




 الراجل الجدع الجميل دا 
محمد فريد 
وسى محمد كان ماسك الحزب الوطنى
بعد وفاة مصطفى كامل علطول
وكان هوه الحزب الوليد اللى مبهدل الاستعمار
مع ظهور الحركات الأخرى 
قوم ايه ؟
راح واخد كل تفاصيل المشروع
ونشرها ف جريدة اللواء
والقناة هتضيع الحقونا وكل شىء انكشفن وبان
 والدنيا قامت مقعدتشى 



وطالب السياسين بعمل جلسة
 لمناقشة المشروع المهبب دا
عشان نشوف ايه الحكاية
وبضغط ع الخديوى عباس تم تحديد المعاد
وخلاص كدا هنروح ف الجلسه
مستفين الأونطة جوا الشنطة
وهناكل بعقلهم حلاوة ونطبقهم
ونحطهم ف جيبنا وننفذ المشروع زى ما اتفقنا
ومع السلامة
(بطرس غالى بيقول لروحه )
حلو ؟ 






لا مش حلو !
 عشان ف احدى الاركان فيه شاب جدع
ابن حلال مجبتوش ولادة
هيعرفك ازاى تضحك علينا وتستعبطنا
وهيقولك كفاية عليك كدا لقد هرمنا 
و ... 







ابراهيم الورادنى كان مجرد فتى يتيم
محدش يعرف مستقبله هيكون ازاى
لولا احد الأقارب من بعيد
وكان راجل موسر واسمه .. ظفيل باشا 
اللى اخده ورباه
والظاهر الباشا دا لقى ابراهيم ذكى ونابه
ودماغه كويسة فبعد ما اخد البكالوريا
بعته سويسرا يتعلم صيدلة
وبعد سويسرا سفره انجلترا يكمل علام
ورجع هيمة من بلاد برا
وهوه ناقح عليه عرق الوطنية
 اللى كان بيسرى ف مصر ف هذا التوقيت
وانضم للحزب الوطنى وشبابه




الباشا اللى رباه فتحله صيدلية ف عابدين
والجدع انشغل فيها جنب النشاط السياسى
 اللى اكل دماغه
ولقى ان الحزب مش كفاية فانضم لجماعة سرية !
كان اسمها (جماعة التضامن الاخوى)
و ناس قالت (جمعية مصر الفتاة)
وناس قالت (جمعية اليد السوداء)
بس  أى كان يعنى
اهو الجدع كان منضم لجماعة سرية وخلاص




بس فيه ناس حالمة بقى افرطت ف الزعم
وقالت انه جماعة التضامن الاخوى دى
كانت تعتبر نواة للأخوان المسلمين بعد كدا وبتاع !
 يعنى ابراهيم كان اخوان 
:)
ويا حالولى بعد شوية هيطلع حد يقولك
لأأأأه دا ضباط احرار
و لأأأأه دا كان مع الملك
لأأأأأه دا مع داعش
مش هنخلص احنا كدا !!!




المهممممم الواد كان ثورجى
وقعد يسمع لترهات الحزب المثالية
عن السلمية والمهلبية والحوار ..  الخ
وبعيونه شايف البلد بتتنهب
ورجالة الخديوى زيه خانعين للاحتلال
وسى بطرس فاشخ الوطن بقرارته الزفت
قالك احنا لسه هنتناقش مع المحتل
ولا ديل المحتل
ولسه هنقوله ارحل ولا اتنيل
 الولد بيت النية وف جلسة المجلس العمومية
رقد لبطرس عند الزاوية
ولما خرج اداله الست رصاصات !!





بعد ما اتصاب الباشا ووقع ع الأرض
والدنيا هاجت اتقبض على ابراهيم فورا واتقيد
وودوه على قسم عابدين بعدين 
اما المجنى عليه 
فجابوله دكتور كان متواجد
ف محيط المكان اسمه سعد الخادم
وحاول يخرج أى رصاصة منه
ولقى الموضوع كبير وبطرس باشا
بيغيب عن الوعى
قالهم لازم ننقله فورا لمستشفى .!!!




بس ونقلوه على مستشفى ميلتون ف باب اللوق 
جنبيهم علطول واتعمل كونسلتو من 15 دكتور
من الكبار وانقسمت الأراء
نعمل عملية حالا ولا منعملشى ؟؟؟
وف الاخر قالوا حالته صعبة
لكن لازم نخرج الرصاصات وعملوا العملية
وخرج المخفى على اوضته
وبيقولوا انه كان بيفوق اوقات
ويقول حبة حاجات ويرجع ينام تانى 





وكمان بيقولوا ان الخديوى عباس
يا نضرى يا ضينايا اتأنثر قوى
 وقال لفتحى زغلول انه يحرص
على تلقى بطرس لأحسن علاج ممكن 
وبيقولوا انه راح بنفسه بذات سخصيته
 عشان يزوره ف المستشفى يطمن عليه
واخدله اتنين كيلو برتقان وكيلو موز بقشره 





وف دخلة الخديوى الأوضة صحوا بطرس
وقالوله قوم يا بيبو بابا جاب موز
 قصدى الخديوى جاى يزورك
راح متنحنح كدا وقال شكرا يا افندينا
وقالك كمان ان الخديوى قبله ف جبينه
واغرورقت عيناااااه بالدموع
وان المريض اتأثر وقعد يقوله العفو يا افندينا 
ومتشكرين ع الزيارة يا أبو سامية






ومشى ابو سامية من هنا
وحالة بطرس بعد ما كانت استقرت 
اتدهورت وحرارته ارتفعت
 وهوه سواد الليل ويوم 21 فبراير
كان بيطلع ف الروح والبقية ف حياتكم
وبينقل عنه انه قبل وفاته قال الآتى
"يعلم الله أني ما أتيت أمراً يضر ببلاد
 لقد رضيت باتفاقية السودان رغم أنفي
وما كان يمكن أن أعترض"




"ويسندون إليّ حادث دنشواي ولم أكن منها
ولا هي مني ولكنها أقوال سادت فأساءت
إن هي إلا غباوة ضعيف صارت
وقوة قدير بطشت فتوسطت بينهما
كما توسط المصلح بين المتخاصمين
فنالنا من شرها ما نال"



 "أما عن قانون المطبوعات فهذا عهد
كونه لم ينفذ وإنه من اختصاص نظارة الداخلية"


"أما أعمالى فى المحاكم فليس فيها ما يؤخذ على
لذلك تفضل على المنتقدون 
فضربوا عنها صفحاً
وكذلك مجالس المديريات وحضور النظار
مجالس الشورى وتبادل الآراء بين النظار
والأعضاء .. كل على قدر وسعة
واختياره وعلمه وفضله"




واخيرا قال
"فليعلم الله والناس أنى ما أوتيت فى ذلك
ما يضر بلادى"
ودى كانت اخر كلماته قبل ما يموت 





كل دا واحنا ف المستشفى
وبنحاول نلحق المجنى عليه
بس كانت الدنيا اتقلبت اول ما اتأكد خبر الوفاة
الدنيا اتقلبت اكتر واكتر واكتر
الحادثة كانت والعهدة ع الراوى
تعتبر تقريباً
اول اغتيال سياسى يبدأ بيه هذا القرن
بعد حادثة اغتيال سليمان الحلبى لكليبر
ايام الحملة الفرنسية من قرن فات .... !




محمد على كان منيم مصر م المغرب
وخلى محدش فيه نفس يقاوم
واللى جم بعده من اولاده واحفاده
حرصوا على وأد أى حركات سياسية وتحررية
لحد ما ظهر عرابى ومن بعده جم الانجليز
ومع حركات التنوير والتعليم والثقافة
الدنيا اتغيرت وبقى فيه مقاومة وحركات وطنية
الخ 




واحنا دلوقتى عندنا جبهتين
جبهة القصر والانجليز ورجالتهم المخلصين ف ناحية 
وجبهة الشعب والحركات الوطنية ف ناحية





ع الصعيد الرسمى عقد مجلس النظار
برئاسة الخديوى فعابدين جلسة طارئة
وقرروا تعطيل نظارات الحكومة وجميع مصالحها
 والمدارس الأميرية إلى أجل غير مسمى
ونكسوا الأعلام على الثكنات العسكرية
 ودور الحكومة حداداً على الفقيد
وتقرر تشييع جنازة مهيبة برعاية افندينا
اللى راح سخصيا يعزى اهل بيت بطرس





وخرج الجثمان الساعة 11
من مستشفى ملتون بباب اللوق
ف طريقه للكنيسة المرقسية
ومنها إلى دير أنبا رويس المثوى الاخير
وبيقولك ان النعش اتشال من الكنيسة لحد المدفن
 على عربية بيجرها 8 حصنة
ووراها 12 عربية عليها اكاليل زهور
والناس خرجت تتفرج ع الموكب المهيب
والمحلات قفلت والبنوك والقنصليات
والكنايس دقت الأجراس
ومشى ف الجنازة باشوات وكبرات
وكانت لحظات مشدودة للكل
تنبىء بما سيحدث بعد قليل من عواصف





اللطيف بقى ان موفد من الجيش الإنجليزى
 بعت عربية من عنده
عشان تشيل جثمان بطرس باشا لحد مدفنه
اسرة الباشا رفضت 
وقالت العربية افندينا موجودة
بس واتدفن الراجل مع سيفه ونياشينه
 وحضر الامير محمد على توفيق
بالنيابة عن اخوه عباس حلمى
وخلاص دفنا الراجل
وخلصنا نص المشكلة ... !




نرجع بقى لأبراهيم اللى عايش
ونشوف عملوا فيه ايه ؟!!!
الجدع بعد ما اتقبض عليه عند وزارة الحقانية
 اخدوه فورا على جوا فتحى زغلول 
اللى سأله فورا
وقبل ما يفتح المحضر معاه حتى
ليه عملت كدا ؟؟
قال ابراهيم لأنه
"كان خائن للوطن" 
 ... بمنتهى البساطة يعنى !!!
قتلته عشان الآتى :
1) رئاسته لمحكمة دنشواي
2)  توقيعه لاتفاقية السودان
3) اعادة اصداره لقانون المطبوعات
4) عرضه لمشروع قناة السويس الجديد
5) وعشان اهانته للحركة الوطنية ف مصر





اصل بطرس غالى طلع يقول
انه ضد الفوضى والفوضويين
وانه لقح كلام كدا عن المعارضين
انهم بتوع تخريب
والكلام زعل هيمة فقرر يعمل معاه السليمة
#سامعنى يامدهول



اه .. غالى طلع يقول انه راجل دستورى
وبتاع مؤسسات
قوم ابراهيم قرر يديله ف مؤسساته
ويعرفه يعنى ايه دستور وكدهون 



القصد .. بعد ما اتقبض على ابراهيم
الولد اعترف فورا وبكل فخر
ومضى على اقرار باعترافاته كاملة
 وحرص يأكد ان مكنلوش أى شركاء بالمرة
 ليه ؟؟
اصلهم لموا زمايل له ف الحركة السرية بتاعتهم
اللى كانوا عاملينها واتهموهم بالمشاركة ف الجريمة
واتحولوا للنيابة فعلا 
بس طلعوا براءة بعدها
وابراهيم كتب اعتراف للتاريخ نصه الآتى :

 " أنا الذي قتلت بطرس باشا كبير الوزراء المصريين
في يوم الأحد الساعة واحدة إفرنجي مساء
لاعتقادي أن الرجل خائن لوطنه وأن سياسته ضارة لبلاده
 ولست أسفاً على ما ارتكبته لأني أرى ذلك خدمة في بلادي"

انتهى




واتحولت الجناية رقم 14 عابدين 1910
الى محكمة جنايات مصر
 عشان يتهم الوردانى بالقتل العمد مع سبق الإصرار
 واللى كانت جريمة عقوبتها الإعدام
والمحكمة كانت مكونة من : مستر دلبروغلو
وبعضوية أمين بك علي وعبد الحميد بك رضا
اما النايب العمومى فكان المخسوف :عبد الخالق ثروت




اما الدفاع فكان الآتى:
أحمد بك لطفي السيد
 إسماعيل شيمي بك
 محمود بك فهمي حسين 
محمد علي علوبة بك
 محمود بسيوني 
أحمد عبد اللطيف بك 
مصطفى عزت
وشوف يا مؤمن .. شوف بقى تصاريف القدر واحكامه
آل  ييجى ابراهيم الهلباوى الشهير بجلاد دنشواى
عشان يترافع عن ابراهيم ... !
ازاى الكلام دا يا شهرو ؟؟؟
زمبقولكم كدا
الهلباوى كان عاوز يمسح موقفه القذز ف دنشواى
 بأى طريقة ويكفر عن ذنبه
 فراح للوردانى
وعرض عليه خدماته
 ابراهيم اشترط عليه انه يبدأ مرافعته بإبداء الندم على خطيئته
 ف حق فلاحين دنشواى وف حق مصر
فالهلباوى وافق فوراااا !!!
 #جدع_ياابراهيم



بس والقضية قضية رأى عام
 والدنيا مولعة برا المحكمة اكتر من جواها
ونتفاجىء ان الموضوع اتنقل من اغتيال شاب مصرى
 لرجل ف الحكومة
 الى فتنة طائفية ف ايام !!
الأنجليز قرروا يحولوها لكدا
وطلعت مثلا الايجيبسيان تقول أن:
 «الوردانى وهو يقتل بطرس غالى
 كان يجهز فى الوقت نفسه 
على الوطنية المصرية فى مصر»




الحاج المعتمد البريطانى ف مصر قالك ايه
 "اغتيال بطرس غالى غير مرض
 وأن إنجلترا يجب أن تظهر فى مصر القوة
وأنه إذا استمرت موجة العداء ضدنا فلن نمضى قدماً
فى تهيئة المصريين لحكم أنفسهم
فنحن فى مصر أوصياء على أبناء مصر
 وأوصياء عن أوروبا وأوصياء عن العالم" 




يا حبيبى
لطاف قوى الانجليز دول
 ولاد حلال عاوزين يعلمونا ازاى نحكم نفسينا
 بالأصول والانسانية
 شوف واحنا اللى كنا ظالمينهم ؟!!
 أخص علينا 
حقيقتن أخص




الجرايد بقى .. كل واحد وانتمائه لحزب او رأى
وكله بقى يضرب ف كله
 زى ما بيحصل الايام دى تمام
 بدل ما يركزوا مع المتسبب بيمكسوا ف القشور
ومصر يا أم العجايب شعبك أصيل والخصم عايب 
وحوا بص العصفورة دا شغال من زمان الله ينور !!!




- واصله اتقتل عشان مسيحى
- يا بنى اتقتل عشان عمايله السودة !
- اصلهم ارهابيين وحشين
- يا بنى اتعدموا من غير ما يحصلوا على حقهم
ف محاكمة عادلة !
#يختشىىىىىى




ونزل شوية مواطنين شورفااااء
 محدش مأجرهم ولا مسيسهم ولا حاجة
 وقعدوا يهتفوا
"سلم إيدين الورداني قتل بطرس النصراني"
 قوم الناس هرشتهم 
ونزل ناس تانية قصادهم تعلى ع الهتاف بهتاف
"تسلم إيدين الورداني قتل بطرس البريطانى"
 والامن اتشدد 
وبقى فيه قلق من حدوث مواجهات




سعد زغلول قال ان حادثة الوردانى دى
فتحت الباب للفتنة بين عنصرى الامة
ومتقفلش بحق وداب كل الخلاف  الا ف ثورة 19 
لما الأقباط والمسلمين اتلموا سوا ف المظاهرات
ونزلوا الشوارع .. عشان يقطعوا السكة ع المحتل 




ومحمد فريد قال بعدين ف مذكراته
انه مكنش عارف بموضوع ابراهيم
وان عملية الاغتيال كانت بعيدة عن الحزب
 ولاكنا نعرف حاجة عنها وحياة امى يا باشا
كان خايف يقفلولهم الحزب .. !!




شيخ الازهر بقى لازم يدلى بدلوه فقال:
 "إن ذلك المسيحى عمل من الخير للمسلمين
ما لم يقدر على عمله كثير منهم"
 #مفيش_فايدة_والنيعمة_فيهم


القصد ..
الجلسات ابتدت ف اول ابريل
#القضاء النزييييه من زمان اهو
ومستعجلين قووووى يا خويا عشان يحكموا ع الجدع
 والجدع ولا هامه 
واقف زى الأسد ف القفص
والشهادة لله المحامين بتوعه كانوا ناس محترمة
وحاولوا يعملوا أى منظر
 ملقوش أى حاجة يقولوها الا ان بطرس مات بسبب العملية
 مش من ضرب الرصاص !!
وقالوا لولا العملية اتعملت ف وقت حرج وغلط
كان زمانه عايش
وانه كان فايق لحد ما جاله الخديوى بكيلو الموز
والظاهر الموز كان فيه حاجة يا ثامح ؟؟؟!!




الملخص انه الواد قارر ومعترف بكل حاجة
وبخط ايده و#بأعترافاتهم
خلاص مفيش فايدة
وف الاخر ملقوش غير انهم يقولوا انه
كان مش متزن لحظتها وكدا
القاضى مهتمش لطلبهم باحالة المتهم
 لمستشفى الامراض العقلية والكشف عليه
وكانوا بيحاولوا يكسبوا وقت غالباااا
 لكن المحكمة كانت اصدرت حكمها
مصرة الحاحا على عقابه وسريعااااا





ف 18 مايو 1910 
تم احالة اوارق ابراهيم ناصف الوردانى
 الى فضيلة مفتى ديار المصرية
الشيخ بكر الصدفى
فريق الدفاع عن ابراهيم طعن على الحكم
وف الجلسة اللى بعدها الشيخ الصدفى فاجىء الجميع
برفضه انه يصدر فتوى شرعية بأعدام المتهم
 ومش بس كدا !!
دا طلب بالأوراق انه يتم احالة المتهم للمستشفى
 للتاكد من سلامة قواه العقلية
قبل ان يفتى بأعدامه من عدمه 
وبس الخبر انتشر يا معلم
 ولعتتتتتتتتتت الدنيا




متعرفوش فجأة وجت منين اقاويل
 ان المفتى رفض يصدق على حكم الأعدام
 عشان اعتبر ان شرعا لا يجوز قتل مسلم بدم كافر !!!!
حد ابن حلال طبعا اللى لعب ف الكلام
واستغل ثورة بعض الأقباط
 وقعد يقول المفتى مع الوردانى عشان مسلم
والقبطى لا تمن له
 الخ 
لكن كما تقول الروايات ..
 المفتى كان عاوز يتحرى الحقيقة كاملة
 ويتأكد ان الولد مش مختل
 الجريمة اصلها كانت غريبة وقتها 
وصادمة للجميع



والمذهل واللى بينفى ان الحكاية طائفية ان
"عبد الخالق" ثروت النايب العمومى المسلم
 طالب بالأعدام لأبراهيم 
قائلاً
"الجريمة المنظورة أمام المحكمة هي جريمة سياسية
 وليست من الجنايات العادية
 وأنها بدعة ابتدعها الورداني بعد أن كان القطر المصري
طاهراً منها "
بينما احد الأقباط واسمه مرقص حنا
 لما لاقهم بيقولوا ان ابراهيم احتمال يكون مختل
او متعصب للأسلام فكتب يقول :
"أنا أعرف الورداني شخصياً فهو فتى شديد الذكاء
 كثير المعارف ملأت صدره الوطنية الحرة
وليس شخصاً متعصبا 
وأنا بصفتي قبطياً - أعني مصرياً مسيحياً
أصرح بأن حركتنا هي حركة وطنية مجردة
وما تهمة التعصب الإسلامي إلا من إشاعات الإنجليز
 التي يشيعونها ليبرروا المظالم التي يرتكبونها في مصر"
سلم لسانك يا بنى
اللى يقولك دا مجرم والبلد دا كان طاهر
 وطول عمره طاهر واعدموه
 الى اخر هذا الهراء كان ...  #مسلم
 واللى يقولك كان وطنى وذكى وبطل كان ... #مسيحى




القصد .. المحكمة ام قضاء نزيه بترتر وشخاليل
 قررت تجاهل كلام المفتى
وصدقت على حكم الأعدام
فالرأى العام انشغل اكتر وف اسكندرية حدث الآتى
اتعملت عريضة بالتنديد بالحكم والمطالبة بوقفه
واتمضى عليها من عدد كبير من الجاليات الأروبية
ف اسكندرية 
يعنى لا مصريين ولا بتاع اهو 
بس ناس كان عندها "بواقى ضمير" والله !
قوم المعتمد السامى البريطانى اتغاظ جدا
وبعت للقناصل ف اسكندرية وقالهم كل واحد يلم فراخه
 بلا عرايض بلا زفت 
وملكوش دعوة 
#أصل الديموقراسى اهم حاجة عند المحتل يا ولاد







بس وخلصونا بقى من الولد دا
 الا فجأة بقى بطل شعبى وله جمهور وناس بتتابعه
وعاوزاه ميموتش كمان !
وامعانا ف وأد القضية طلع قرار بمنع نشر صوره
ويقال انه سرى هذا القرار لحد ما قامت ثورة يوليو .. !!



وشوف يا مؤمن ...
الاغتيال حصل يوم 20 فبراير
بطرس غالى مات يوم 21 فبراير
التحقيقات اخدت شهر مارس كله 
 المحكمة بدأت ف اوائل أبريل
 الحكم ف نص مايو كدا
وف 28 يونيو هيتم تنفيذ الحكم




والخبر هينتشر بسرعة كالنار ف الهشيم
ابراهيم الوردانى هيتعدم خلاص يا ولاد
 الناس اتخلعت 
والحنونة قلوبهم طلعوا من اللحظة الحزينة 
بموال بيقول ...
قولوا لعين الشمس ماتحماشي
 احسن غزال البر صابح ماشي
 وغنوها ف الشوارع وهما بيقولوا لبعض
 ياميت صباح الفل علي الورداني




وف محبسه .. سجن الاستئناف يعنى
ييجى وكيل المحافظة والحكمدار وطبيب السجن والمأمور
وعند اوضة الاعدام 
ويحضر ابراهيم ناصف الوردانى
والساعة 6 الا عشرة يقرى المأمور حكم الأعدام عليه
ويوقفوه ويلفوا الحبل حوالين رقبته
 ويقولوله اتشاهد يا بنى 
فيتشاهد غزال البر
وتكون اخر كلماته ف الدنيا
  "أشهد أن لا إله إلا الله وأن محمداً رسول الله
 وأن الحرية والاستقلال من آيات الله"
 واتنفذ الحكم 
ومات الجدع وخرج من سجن الدنيا 
ودخل التاريخ من باب العزة والكرامة والحرية 





 ونقلوا الجثمان
لمكان مخصص عشان يشرحوه حسب العادة المتبعة
 ويغسلوه ويكفنوه وبعدين اتاخد لمقابر اسرته
ف الامام الشافعى عشان يرقد هناك
 ابن الـ 24 ربيعا ف هدوء 



وانا تقريباً خلصت الحكاية لكن كالعادة
 لازم اعرف وبصر اعرف اغلب الأطراف راحت فين
 بعد كدا وكملت ازاى ف الحياة 
بعد ما اقترفته يداها .. ؟




عبدالخالق ثروت بتاع البلد دا طول عمره طاهر
 ويا ام المطاهر رشى الملح سبع مرات
الباشا اتكافىء على عمايله 
وبقى رئيس وزراء مرتين
وقاعد يناكف ف الوفد وسعد زغلول
والحركات الوطنية ودعاة الاستقلال عن المحتل
بينما هوه بيبوس الأرض تحت جزمة اسياده
 لحد سنة 1928 لما غار 
وماتوالتاريخ لا يذكره سوى بانه شخصية وصخة
كانت تخدم الانجليز ومصلحته الشخصية وفقط ... !





 الحاج عباس حلمى التانى انتوا عارفين اللى جراله
بعد حوار بطرس غالى دا ب4 سنين يا دوب
 كان مخلوع من عرشه ومطرود برا مصر
 ومعرفش يرجعها الا عشان يندفن
 بعد نفى ومرمطة 30 سنة يا ثاااامح



الهلباوى حاول بكل طريقة يمحى عار دنشواى
وقعد يسمح ف اللطخة دى عن توبه سنيييييييين
 لحد ما مات 1940 ولقب جلاد دنشواى لصيق به 
لا يفارقه لليوم





فتحى زغلول اخر ما قدر يوصله
كان منصب وكيل وزارة الحقانية
ولما عملوله حفل تكريم ف شبرد
 وعزموا احمد شوقى يلقى قصيدة وكدا 
شوقى قرفان منه ومن اهله اصلاااا
قام مرحشى وبعتلهم جواب يتقرى ع الملأ
راح واحد طالع قاريه وكان نصه الآتى
 ....
اذا ما جمعتم أمركم وهممتوا 
بتقديم شيءٍ للوكيل ثمين
خذوا حبال مشنوقٍ بغير جريرةٍ 
وسروال مجلودٍ، وقيد سجين
ولا تعرضوا شعري عليه، فحسبُه
 من الشعر حكمٌ خطه بيمين
ولا تقرأوه في "شبرد" بل اقرأوا
على ملأٍ في دنشواي حزين
#الشعر_ادب_مش_هز_كتاف





وقعد فتحى زغلول ف الضل محدش بيحبه
 وعامل مشاكل لأخوه سعد زغلول اللى كان حبيب الملايين
وفضل يهرى وينكت ف روحه غيرة وغل واحتقار من الناس
لحد ما غار ف داهية سنة 1914





الشيخ بكرى الصدفى مفتى الديار المصرية
 اللى رفض يصدق على الاعدام
وتلقى ما تلقاه من هجوم
مات سنة 1919 وهوه بيشوف البلد بتنتفض ف ثورة




محمد فريد البائس الحزين المهضوم حقه
 عايش وميت
 كتب مقدمة لديوان شعر فيه رثاء لأبراهيم الوردانى
للشاعر على الغاياتى 
فاتهموه بالتحريض ع العنف وكدهون
وقالك انتا بتزدرى الحكومة وتحبذ العنف
 وتحض ع الجريمة الخ 
وحكموا عليه بالسجن 
والخديوى عباس نفاه برا مصر ومات ف الغربة 
وحيد شريد ورجع جثمانه لمصر 
على نفقة احد ولاد الحلال  ...  !






بس حكاية الفتنة الطائفية دى جت بفايدة
وعلمت الناس برضك
عشان بعد شويتين كدا لما الحركات السرية هتكتر
واعدام الوردانى مش هيأثر فيها 
هييجى واحد شاب كان عضو ف منظمة اليد السوداء
 ويقرر يغتال رئيس الوزراء اللى مسك البلد
تحديا لسعد زغلول وثورة 1919 واهدافها
 قوم رئيس الوزارء يوسف باشا وهبة
 وبرضو كان مسيحى !!
طلع وقال انا امسكها 
وتضامن بذلك مع الملك فؤاد والانجليز لكسر الثورة





 راح طالعله زى الخازوق شاب قبطى
 اسمه عريان يوسف سعد
وقال انا اموت وهبة باشا
عشان محدش يقول ان دى فتنة طائفية
زى المرة اللى فاتت
 :)))





بس المحاولة فشلت 
ويوسف باشا ممتش
رغم ان عريان رمى على عربيته قنبلتين
ف ميدان سليمان باشا بوسط البلد
واتحكم على عريان بعشر سنين اشغال شاقة





اخيرا .. الشاعر مجدى نجيب كان معتقل سياسى
ويوم قرر ياخد تيمة وداع الوردانى
ويعمل منها غنوة .. هنا 
 غنتها شادية
وكانت بتفكر المصريين ف هذا الوقت بولادنا 
اللى رجعوا من 1967 مهزومين 
وشمس الصحرا والهزيمة فوق روسهم 



واخيرا بعد اخيراااا ..
 كلام بطرس غالى كله بيصب ف خانة واحدة
انا كنت شرابة خٌرج
والانجليز ضغطوا عليا 
وشربونى حاجة اصفرة 
وانا ضعيف ونيتى خير .. الخ
طيب يا حبيبى مش قادر ومش موافق
طب مسمعتش عن حاجة اسمها الاستقالة ؟؟
 مسمعتش عن حاجة اسمها لأ
مقبلش يحصل كدا
مسمعتش عن حاجة اسمها الشعب والحقوق والحريات
مسمعتش عن حاجة اسمها التاريخ ومنظرك قصاده .. ؟؟؟
سمعت وطنشت وبرضو كنت عبدالمأمور
 يبقى خلاص تستحمل اللى يجرالك
وتستاهله 




ملحوظة كمان
 ابراهيم الوردانى كان شاب ف عمر الورد
اخضر كدا ولسه بخيره
 لا لعبت ف دماغه السياسة بدهاليزها 
وخنوعها 
ولا انتهازيتها
ولا خوف على مكاسب ومناصب ولا حاجة
الجدع لقى الساسة الكبار والأسامى المتلمعه
خايفة وضعيفة وعمالة تنطحن
تحت رحى الأحتلال وعمايله الخبيثة
ف جاب م الاخر وقطع العرق وسيح دم الخاين
مغلطش ف رأيى 
اومال كان هيفوق الناس ازاى م السبات اللى هما فيه ؟!!
ويعنى هما الانجليز والفرنساوية قبلهم
 وأى احتلال كان هيمشى بالذوق والانسانية
 والتفاهم معاهم ف قعدات وجلسات
ولا مشيوا لما طفحوا الدم وعيشتهم بقت مرار ؟
سيبوا الشباب يمشيها ولو تطرف قليلا
 هيا متجننة خلقة وملهاش منطق
واحيانا الدنيا عاوزة جنون وطيش عشان تستقيم
ويرجع القطر على القضيب تانى



اهم حاجة بقى ... اهم ما ف حكاية الليلة
 شفتوش والنبى محكمة تحت الاحتلال حقانية كدا
وتدى حق للمتهم يبقاله دفاع ومرافعات وطعن 
 وحاجات كدا .. !
وشفتوش كمان مفتى ديار يقول لأه 
وميصحش 
وميتعدمشى كدا نشوف الأول ماله .. الخ




مش يعدموا شباب بليل
ويحرموه من حقوقه والعدل
ويقتلوه ف صباح فاجر زى وشوشهم العكرة .. !!
تعدم روح من غير ما تدي فرصة لأى حاجة
اخص دا الاحتلال معملهاش يا دولة الظلم الفاجر ... !
وآل عاوزين البلد تتحرك سنتى واحد لقدام 
ابقوا قابلونى 
بس الأول جربوا تهربوا من عقاب ربنا 
شوفوا هتروحوا فييييين 
... كان غيركم أشطر .... !!!




يا اعزائى الدم لعنة تطارد مرتكبها
ولنا ف حكيوة زمان عبرة
دم فلاحى دنشواى كان نقمة على كل من شاركوا ف قتلهم
وكام سنة عدت وحقهم عاد بصورة اخرى 
والعادل هو الله 
والحق لا يموت 
وانا لمنتظرون يا غجر
وتوتة توتة .. خلصت حدوتة غزال البر
 تصبحوا على ألف خير



---------------------------


الحكاية نقلا عن :
 1) مدونة الأستاذ ياسر ثابت
 2) كتاب حكايات قضائية لعبد الحميد يونس
 3) ذاكرة مصر المعاصرة


-------------------------------


mohamed salah ‏@mohamed08711241 
ربنا ياخد حفيدة هو راخر...سرق فلوس الغﻻبة
 بتاعة التأمينات وخلع


mohamed salah ‏@mohamed08711241  
هو ﻻزم مصر يمسكها القطط الشيرازى...
مفيش مرة قط بلدى
Embedded image permalink




 التعليم هو الحل ‏@ZiadMbadR   
مش دا اللي الفوا له اغنية
"قولوا لعين الشمس ما تحماشي
،دا حبيبي صابح ماشي"
 يوم اعدامه؟


 ahmed zain ‏@ahmedzain82   
 تقريبا دا اللي غنوله اغنية قولوا لشمس بكره متحماشي
 احسن حبيبي صابح ماشي ...
كان يوم اعدامه


 zz ال مُريدْ zz ‏@ahmed_alkashif   
في بعض روايات بتقول انه كان كييف مواليد
و حضرة و ذكر و حاجات من دي


 zz ال مُريدْ zz ‏@ahmed_alkashif  o 
شبه الإحالة للمعاش للموظف ال هايضرب ع عمل


hoda mahmoud ‏@hodaelsorogy   
 بس ال اعرفه ان الهلباوي ندم علي مشاركته في الجريمة دي
 و كان بيحاول يكفر عنها بكل الطرق
.صح?!



 سعدية سليم ‏@sa3deaselim   
سامعك يا شهروزة  بس عامل مش واخد باله
 ((:


zz ال مُريدْ zz ‏@ahmed_alkashif   
السماح بتجنيد المصريين و توليهم لبعض المناصب القيادية
 في الجيش العلوي كان أحد أهم أسباب بروز النزعة الوطنية
و الحركة القومية



 WTHend ‏@HendZayed  
 زي كده ما تقولي لي فريد الديب راح يدافع عن علاء سيف
 مع الفرق طبعاً


zz ال مُريدْ zz ‏@ahmed_alkashif   
أجمل ما في نص الاعتراف انه بيقول "لاعتقادي"
مش إيماني يعني حاطط انه ممكن يكون غلطان
 زمن راقي حتى في الاعتراف بالقتل



 هتتكرعوا CC4 ‏@HMaamoon   
 شيوخ السلطان و كل سلطان



 WTHend ‏@HendZayed   
"بواقي"! ده لوحده ضمير يكفي مصر فى فترتين
من حكم السيسي!


 طارق ‏@aa68798   
 دروس عشان الناس تتعلم ان الاجنبي ولد ستين كلب
 حتي لو هذا الاجنبي عربي 
و ركزي علي عربي...فالسياسه طبعا


WTHend ‏@HendZayed   
 تخيلي كده والـ wanna be's بياخدوا مع الورداني
 سيلفي القبض عليه وسيلفي المحاكمة 
وممكن سيلفي الإعدام كمان


Mahmoud Taha ‏@eng_M_taha   
زى ما عم نجم قال 
مين يا فتى علمك لعب العصا ع الخيل 
وازاى قطفت القمر من فوق شواشى الليل



 WTHend ‏@HendZayed   
يعني الديب دخل التاريخ من اوسخ ابوابه
احمدك يارب


 WTHend ‏@HendZayed 
 احيي فى المصريين فلسفتهم ودراستهم لتاريخ الإغتيالات
 لزيادة المنافع الوطنية


 ahmed zain ‏@ahmedzain82   
 حكاية ابراهيم الورداني دي حكهالي سواق تاكسي
 من كام سنه ركبت معاه
 شغل الراديو جت الاغنيه وبدا الحكايه وصلت
وقلتله لف وكمل الحكي



 WTHend ‏@HendZayed   
 بيفكرني بحكاية عبد الرحمن وقضية عرب شركس
 وكرداسة والاعدام
الواحد حيران
مع الفرق بين احتلال اجنبي واحتلال مننا فينا



Abdallah Higazy ‏@Abdalah_Higazy  
 نسيتي إن إتسمى على إسمه شارع في وسط البلد
إلا إذا كان اتغير وأنا مش واخد بالي


mohamed salah ‏@mohamed08711241  
هو غزال البر فى نظر المصرين
ونظرة المصرين 
ماتخيبش ابدا
مثل الامثال ﻻيمحوها الزمن


ليست هناك تعليقات:

إرسال تعليق

Related Posts Plugin for WordPress, Blogger...
"حقوق الملكية والملوخية والمهلبية ... الخ
محفوظة للست شهرزاد وإياك حد يسرقها ويحاول يزعلها آغجر .. مفهوم ؟ "