السبت، 30 مايو 2015

محمود المليجى : إيقونة الشر قلب الخساية




صاحب حدوتة الليلة دى لازمله كل الانتباه
 إذ أنه حبيب قلبى والنيعمة
 اللى لخص حال مصر عبر تاريخها ف مشهد عبقرى
 هوه الآتى




- مش لازمنى محامى
 انا اعرف ادافع عن نفسى كويس
 - خلصت اللى عندك ؟
قسمتك بقى إن أنا أترافع عنك
عجبك مش عجبك حترافع عنك
أنت يابنى خايف لأكسب القضية؟
من الناحية دي إتطمن حخسرها
تسعة وتسعين فالمية حخسرها
وحيحكموا عليك وحيكون حكم قاسي قوي
وللمرة المليون حيقولوا عليا محامي حمار
 نعمل ايه !
 قسمتنا كده .. حمار بيترافع عن حمار
 - طب .. لما أنت عارف أنك حتخسرها جاي ليه ؟
- تنفيسه
تنفيسه ليا ولك كلمه حلوه نقولها
صحافى يلقط مننا لمحه نضيفه
 قاضى تفلت منه كلمة شجاعة 
أهى تنفيسه للكل .. زمن !
زمن يبرروا فيه إنهم يرموا البمب على دماغ ناس
 ملهمش دعوة بالحرب خالص 
 وعايزنى أكسبها ؟!!
زمن بتتشوي فيه الناس فالأفران
عشان لون جلدها أحمر ولا أصفر ولا عنيها مسبسبه
 وعايزنى أكسبها ؟!!!
زمن بيلموا فيه ولاد الناس سن ستاشر
وسبعتاشر سنه ويدفنوهم فالرمل
بإسم الحريات الأربعة
 وعايزنى أكسبها ؟!!
زمن بيكسبوا فيه نفر واحد خمس تلاف جنية فدقيقة
 ويغلو على التاني أجرة التروماي 
وعايزنى أكسبها؟!!
كل اللى أتمناه أنهم يخففوا عنك الحكم ولو شويه





حكاية النهاردة عن الجميل البديع اللى ملوش زى
محمود المليجى 
والراجل دا له غلاوة خاصة ف قلبى
على عكس فنانين تانيين خفت منهم ف صغرى
 ولما كبرت حبيتهم زى محمود مرسى كدا
لكن المليجى كان حاجة غير  
من وانا عيلة عمرى ما خفت من نظراته
او شره الحاد ف الافلام
ولما كبر ف السن وبدأ يعمل ادوار شبهه اكتر
عرفت ليه حبيته 
.... عشان حنيته




ومحمود حسين المليجى
 اتولد ف 22 ديسمبر 1910 عشان يبقى
برج الجدى بأمتياز
وبرج الجدى يعنى برج الإجتهاد الرهيييب يا ثامح 
الجدى يعنى الشغل بلا كلل ولا ملل
يعنى الإنغماس ف الشىء لآخره ونسيان أى حاجة تانية
برج المجتهدين اللى بيوصلوا لحلمهم 
برج عبناصر والسادات على سبيل المثال 




ومحمود اتولد ف المغربلين لأسرة موسرة
وأب بيشتغل ف تجارة الحصنة وبيقولوا كمان العربيات!
 كانت طفولته مستريحة 
وكانله اخت وحيدة ماتت صغيرة
فبقى لوحده لا أخت ولا اخ
وكان من صغره بيهوى المغنى وبيسمع ف الاسطوانات
 اللى بيجيبها ابوه
- وعاوز تطلع ايه لما تكبر يا حبيبى ؟ 
- اطلع مطرب !
يضحك الأب والام ولا ف بالهم .. انما محمود يكبر
 والحلم ف دماغه 




ينقلوا السيدة زينب فيدخل المدرسة الثانوى
الخديوية الثانوية تحديداااا
وف المدرسة ينضم لفريق الملاكمة
 وبيقولوا اتعجن مرة ف علقة
وبعدين ساب اللعبة المؤذية دى
 :) 
وقرر ينضم لفريق الغناء بالمضرسة
 بيقولوا ان محمد عبوهاب أفندى
 كان مرة بيحضر بروفات ف المدرسة
وبيسمع العيال سمع المليجى ف وصلة 
قاله اسكت يابنى !!!





محمود لقى روحه مش نافع ف الغنا كمان
 يسكتشى ويفقد الامل ؟
عييييب دا جدى يا بابا انتوا بتهرجوا
 هيجرب تانى وقام رايح على فريق التمثيل
وعلى مسرح المدرسة الخديوية محمود هيتألق
ويبقى من اعمدة فريق التمثيل
 اللى بيحضروا العروض يشيدوا بيه
ويبتدى يحس ان المهنة دى هتكون مهنته للأبد




الست عزيزة أمير هتعمل اعلان عن رغبتها
 ف ضم وجوه جديدة عشان فيلم ليلى 1927
قوم محمود هيروح مع زمايله ف فريق التمثيل 
وعلى باب الفيلا يوقفهم البواب وعاوزين ايه يا عيال
ولأ مفيش دخول ويتطور الموضوع لخناقة وضرب
 ويرجع المليجى بيته متخرشم 
كدمات وسحاجات وكدهون
الحاج المليجى يشوف منظره يتخض ويساله
والمشهد الكلاسيكى اياه بقى
- ايه اللى حصلك يا ولد
- اصلى روحت لعزيزة امير الممثلة وضربونا
- ليه ؟ 
- عشان ...
- عشان ايه انطق يا ولد !!
- عشان امثل معاها ف السيما
- سيما !!!
- ايوه
- قلبى .. قلبى ... الى اخر القصة
وانظر حكاية حسين رياض #طبق_الأصل




القصد .. الموضوع هيتلم مؤقتا لحد ما عزيز عيد
الفنان الكبير يشرف على مسارح التربية والتعليم
ويشوف محمود ويعينه رئيس لفريق التمثيل مرة واحدة
وهيبعت للعيال يدربهم على مسرحية ف مسرح الازبكية
قوم الست فاطمة رشدى بالصدفة تحضر العرض
وتتفرج م الكواليس
وعجبها اداء محمود وافتكرته ممثل محترف
واستغربت انه لسه تلميذ
 وقالتله لو حابب تشتغل ف فرقتى اهلا وسهلا
 المليجى ما صدق ! 




محمود ساعتها كان اوشك ياخد البكالوريا
1930 الكلام دا فاتشجع بقى وقرر يحترف التمثيل
 وحلوين وكويسين ورايحين نتدرب وراجعين نتدرب
 وعادى لحد الافتتاح
وعرض أول وتانى وتالت
 واخينا كل يوم يرجع وش الفجر
ابوه استناه ف ساعة فجرية ومسكه غسله ونشره
 وكنت فين يا ولد لحد دلوقتى ومحمود اضطر يعترف




يا بابا بعد اذنك وانا اعتبرت موافقتك منتهية
وتحصيل حاصل يعنى 
انا اشتغلت ف فرقة فاطمة رشدى
 وهكمل ف الفن وطبعا مفيش داعى أكمل
اللى اتقال وكان من نوعية ...
لو مرجعتش لعقلك لا انتا ابنى ولا اعرفك
واطلع من بيتى وهحرمك م الرصاص وهضربك بالميراث
 الى اخر الموال اللى انتوا هارشينه دهون




ولم مودى عزاله وراح على عماد الدين
شارع الفن والمسارح والأنس كله
وركن جنب شغله ف الفرقة وابتدى يقدم أدوار ويظهر 
اول اجر اخده كان 4 جنيه ونص
 والحاج المليجى فقد فيه الامل ومات وهوه زعلان منه
 اما الأم فضمته لحضنها تانى
خلاص مبقالهمش غير بعض 




وبعدين تطف دماغ الست فاطمة رشدى
تعمل فيلم ف السيما اسمه "الزواج"
وتدى لمحمود دور كويس فيه ويمثله فعلا
ويخلصه سنة 1933
النقاد شافوا الفيلم مسكوا فاطمة رشدى غسلوها
قوم الست انقمصت ونفسوياته قبت عليها
وحلفت مليون يمين لتحرق الفيلم خالص وحرقته فعلا
 ومستغرب م الستات يا خويا #دولا_مجانين





بس وتتعرض الفرقة لمشاكل مادية
وتقفلها الست فاطمة وتسرح الممثلين
 ومنهم محمود اللى هيتلطم شوية
 ويقدم اسكتشات ضاحكة 
مع بعض زمايله ف الملاهى عشان يعيش ويصمد
وبعدين يحاول يعمل فرقة مسرحية
مع الفنان حسن البارودى والمشروع يفشل
وف النهاية يلقفه يوسف بك وهبى
ويشغله ف فرقته ... ممثل ؟ 
لأ ملقن يا فندم!




يوسف بك الاول شغله ملقن
وبعدين اخده ف دور م الادوار الصغننة
وبعدين بقى من فريق العمل
وبعدين البك اخده ف السينما ف افلامه
غرام وانتقام وغيرهم
بيقولوا ومن مصادر عدة الحقيقة
اغلب اللى اشتغل مع يوسف وهبى كان بيؤكد
على حكاية النفسنة دى عنده
وانه كان مغرور وشايف نفسه ومعتد بروحه
وكونه يقتنع بموهبة حد تانى ويلمعه جنبه
مكنتش بتحصل كتير لكن حصلت مع المليجى
لدرجة انه ف اواخر العمر اشاد بيه
وفضله على نفسه كموهبة كبيرة كمان .. !




المهم سنة 1938 هيكون محمود جزء أصيل
من فريق يوسف وهبى ف السينما وف المسرح
وهيتعرف على اليصابات خليل مجادلانى الشهيرة
بعلوية جميل
الست علوية .. مواليد طماى الزهايرة بلد ام كلثوم
 لكن ابوها كان لبنانى ومسيحية باين م الأسم
واتجوزت ف سن الـ 13 وخلفت واتطلقت
وعشقت الفن واكتشفها يوسف وهبى
واخترلها اسم علوية جميل
 وشغلها معاه ف المسرح





القصد .. الست علوية هيحصل بينها
وبين محمود حب سوا سوا
وكل نفر هيكتم ف نفسوياته عشان الظروف
والجوابات والحسابات والتقاليد والعادات .... الخ
لحد ما هيوصل لمحمود خبر وفاة والدته
 وكانوا مسافرين برا القاهرة ووقع ف حيص بيص
 ومكنش معاه ولا مليم .. فماذا عساه يصنع ! 
علوية غابت ساعة عن المسرح ورجعت
وراحت واخده على جنب وحطت ف ايده فلوس كتير
- منين دول يا علوية ؟
قالتله انها باعت الدهب اللى كان معاها
ويلا سافر فورا وميهمكش
ورجع المليجى ودفن والدته وبقى وحيد تماما ف الدنيا
 الا من قلب فاضله ومهتم بيه وبيحبه ولسه مستنيه
 قلب علوية اللى خطفه 




وبعد شوية بسيطة مقدرش يستحمل اكتر 
وطلب منها الجواز
واتلم جوز العسافيييير ف القفص الذهبى
 سنة 1939 عشان تفضل الست ف أرابيزه
 قاعدة ومستربعة لحد يوم وفاته يا ثااااامح




والظاهر كانت ست شخصيتها قوية ومفترية
وكانوا بيطلقوا عليها لقب المرأة الحديدية
من قبل ما تيجى الست مارجريت تاتشر الى الوجود
 بزمان يعنى




بيقولوا ان محمود كان بيحبها وبيخاف من زعلها
 وف بدايات قصتهم اعتذر عن فيلم العزيمة
عشان يسافروا ف عرض برا مصر
وراحت الفرصة لحسين صدقى .... !




ويبدو انه كان هدف لستات تانية بسبب طيبة قلبه
ودماثته وخفة دمه
 لدرجة انه اتجوز واحدة كومبارس
بيقولوا كانت رقاصة درجة تالتة 
وحصل الجواز فجأة 




الخبر وصل لعلوية راحت مدياله الامر
يطلق البت دى فوراااا
راح رايح للعروسة الننوسة ورامى اليمين
 قالتله 
- ليه كدا ؟ 
قالها 
- اوامر علوية !!





ويقال انها نكدت عليه عيشته طويلااا بعد القصة دى
بس هوه اقنعها انه كان شارب حاجة اصفرة ليلتها
 فصحى م النوم لقى نفسه متجوزها ! 
واللى عملناه ف الأفلام هيطلع علينا ولا ايييييه !
:)


قصره .. الجدع غلط وغلطة الجدى بألف
 الراجل لم روحه وبطل يفكر ف الحكايات دى تانى
 لحد بعدييييييين
لما فكر يتجوز تانى على علوية 
وكانت جوازة ف السر




ونسيب بعديييين دى ونخلينا ف دلوقتى
احنا بقينا ف الأربعينات والمليجى عمال يثبت نفسه
 ف ادوار مختلفة قصيرة ومش فظيعة لكن بتسيب أثر




حصروه الاول ف ادوار بسيطة
متنوعة بين كوميدى خفيف وتراجيدى
لحد ما اظهر براعة ف ادوار الشر وسط ناس فطاحل 
ولما سالوه بعدين ليه حصرت نفسك ف الأدوار دى ؟؟
 قالهم الشرير فيه تنوع وثراء انسانى
اكتر من أى حاجة تانية
 وكان احسنلى عن دور الحبيب والصديق
اللى مربوطين بسن وملامح ومرحلة عمرية وبس




وفضل محمود كدا يتأرجح بين دور والتانى
لحد ما جه صلاح ابو سيف
واداله دور مميز ف فيلم الوحش عن قصة حقيقة
لخُط الصعيد اللى كان مشيب الداخلية 




الدور دا تحديدا خلى للمليجى مكانة معينة
مساحة كدا ف مملكة الشر مكتوبة باسمه
ووقف بدوره قصاد انور وجدى
اللى ابو سيف خرج منهم هما الاتنين اداء مش عادى





وانهالت علي محمود بعدها العروض المماثلة 
وف يوم وليلة بقى شرير الشاشة الاول
اللى بيفرق الأحباب
 ويغوى البنات
ويموت البهجات ويبوظ كل الحاجات الخ 




وبقوا يجيبوه ف دور الفِلن
 لدرجة انه عمل دور أبليس سخصيا
وقدام مين .... زكى رستم !! 




وداس المليجى ف السينما شريرا عتيدا
 وبيشتغل حريقة لدرجة انه كان بيعمل فوق ال15 عمل
 ف السنة واحيانا يوصل لعشرين !!!




كانت صداقاته ف الوسط بتخليه يقبل أدوار مكررة 
لناس اصحابه عشان يسند الأفلام بتاعتهم 




وفيه أرقام بتقول ان المليجى ف حياته كلها
عمل فوق الـ 700 عمل ودا رقم كبير قوى
الأستاذ الكبير قعد نص قرن يمثل
طبيعى يكون عدد الأعمال كبير
بس الثابت لنا قرب الـ 400  عمل وفقط 





لكن الشاهد انه الراجل كان فاكهة السينما
وتلاقيه متواجد باستمرار
وان كان بيعمل حاجات متكررة
لكن كان فيه غزارة ف الشغل 
برج جدى بقى قولنا




لكن مش بس الاجتهاد والجدية 
الموهبة قبلهم 
المخرجين كانوا واثقين ف قدراته 
ومن اشطر مخرج لأغلبهم مستوى 
كان بيستعين بيه 




وبعدين يظهر فريد شوقى كبطل للترسو
ويبقى المليجى خصمه اللدود
لكن ع الشاشة وبس




ولنا هنا وقفة شخصياً افتكرها من ايام دراستى 




احد المعيدين ف قسم المكتبات ساعتها
 الله يمسيها بالخير بقى عمل دراسة احصائية
لمين كان الاكثر ضربا ف الأفلام وشرير الشاشة فعلا
فريد شوقى ولا المليجى ؟؟!!





فالدراسة اظهرت 
وبالتوثيق من عدد الأفلام والمعارك فيها
ان محمود المليجى كان اكتر واحد بيضرب
 ف السينما المصرية
 واكتر من فريد شوقى وحش الشاشة كمان
:)




وبيقولوا ان من كتر ما المليجى كان شغال ف الأفلام
كان احيانا بيقطع فرصة شغل على فريد شوقى
 خصوصا ف مرحلة بداياته 
لما كانت ادوارهم متشابهة 
فكان بيعتذر احيانا عشان الدور يروح لفريد
والملك كان بيفتكرله الحركات دى بالخير
وعشان كدا فضل ف مكانة مخصوص ف قلب 
الاسماء الكبيرة ف الوسط 




وغم ان ظهر منافسين بشدة لمحمود ف ادوار الشر
 زى زكى رستم واستيفان روستى والدقن وعادل ادهم
لكن فضل هوه البريمو ف حتته 




الشرير الناعم اللى مش سهل ابداااا تكشفه 
ولو كشقته مش سهل ابداااا تنتصر عليه 
لمعة عينه وهدوئه وثباته الانفعالى 
كان حقا مختلف ... وغير الباقيين 




ومن تكرار ف الادوار واصرار على التواجد ف الساحة
ولو بأفلام مش قوى كانوا بيسألوه ليه تقبل ؟
 فيقولهم لازم افضل اشتغل
زى جندى ف الميدان 






ما خلاص فهمنا الجدع كان بيطفش من وش علوية
 :))
القصد فضلنا كدا ف الادوار النمطية
 والمليجى سنه بيكبر





وبقى ينوع شوية ف ادوار الأب الطيب
وطبيب الأسرة وصديق العيلة
وعم البطل وخال البنت وحاجات كدا ..
لحد ما هتحصله نقلة نوعية ف تاريخه الفنى
على إيد يوسف شاهين اللى كان اشتغل معاه زمان
 ف فيلم ابن النيل




والموضوع دا له حكاية لطيفة
لما المليجى كان ف مشهد بياخد مجوهرات من محل
 ف شارع سليمان بوسط البلد والمفروض يهرب بيه
 ويجرى وراه كومبارسات
قوم شاهين المجرممم قرر يعملها واقعية
 واستنى لما بدأ المشهد
ووقت الجد زعقوا حرامى حرامى
فالناس جريت ورا المليجى لحد ما قفشوه 
وجه العسكرى فورا
ومسكوه بقى ولسه هيديه باللوكمية
محمود زعق وقال انا بمثل
العسكرى قاله ما كلكم بتمثلوا
 ولسه هيهبده العلقة شاهين وصل وقعد يضحك
وشرحله الحكاية والموقف خلص
 قبل ما محمود تتغير ملامحه للأبد 
:)
وبقوا أصحاب من يومها .. المليجى وشاهين




وشاهين كان بيعتبر محمود المليجى
من اعظم فنانين العالم كله
 واستعان بيه ف اغلب افلامه كان بيحبه ويقدره جدااا
#مخرج_عبقرى من يومه
وقعدوا يشتغلوا سوا ف ادوار متنوعة 
لحد اول السبعينات 




سنة 1970 هيقرر شاهين انه يعمل الأرض
 بتاعت عبرحمن الشرقاوى فيلم
وهيختار المليجى لدور محمد ابو سويلم 
وسط تعجب واستنكار ان المليجى مش بطل أفيش
واسمه مبيوزعش لوحده وان الفيلم هيفشل
وازاى كدا ... وشاهين طبعا كعادته .. #نفضلهم



كلنا شوفنا الارض واظن انى مش محتاجة اقول
 ازاى انه واحد من اهم افلام السينما المصرية
من اول ما بدأت لحد بعد بكرة ولحد ما هتخلص ! 




وانه لو كان محمود معملش أى حاجة غير الفيلم دا 
كان هيبقى كفاية عليه عشان نعترف
 بقدره كفنان عظيم وهوه يروح بيتهم وشكرا 




المليجى ف الأرض بدعّ
والفيلم لقى قبول جماهيرى بسبب دقة التفاصيل
والنقاد مرخموش على شاهين كالعادة
ولما سافر برا نقاد فرنسيين اشادوا بهذا الرجل النحيل
والمليجى مفارقش شاهين وافلامه





لكن ف نفس الوقت بقت نظرة المخرجين له مختلفة
 وعرضوا عليه ادوار مختلفة 
وبقينا نشوف المليجى ف أدوار تانية
يعنى مبقتش تتوقع انه شرير الفيلم
زى ما كان بيحصل زمان وساب بصماته كالعادة 





وقعد محمود يمثل سينما ومسرح وتلفزيون واذاعة
ويعطى بلا توقف ولا راحة
 لحد سنة 1983 لما عمل فيلم ايوب
مع عمر الشريف


وخلص مشهد وقعد مع عمر بيشربوا قهوة
ويرتاحوا شوية والمخرج هانى لاشين معاهم




وبعدين فجأة لقوا محمود بيضحك 
وبيقولوهم الدنيا دى غريبة جدا
الواحد يصحى ويشتغل وينام
 ويصحى ويشتغل وينام
ويشخر كدهو
 ورجع براسه لورا وقعد يشخر




عمر وهانى افتكروه بيقدم فاصل قصير
 ووحى التمثيل نزل فسابوه براحته
وبعد دقيقة عمر الشريف قاله خلاص يا محمود ؟؟
 محمود مردش
بيحركوه .. لقوا السر الإلهى طلع




 و6 يونيو 1983 مات المليجى ف البلاتوه
 وهوه بيشتغل لأخر لحظة
كما كان يتمنى ومات كجندى ف الميدان 
بعد 50 سنة قضاها ف محراب الفن
 بيشتغل وينصهر ف النار فيصفى ويبقى أغلى 




المليجى جاتله فرصة للعمل ف افلام عالمية
مثلا عرضوا عليه دور ف وادى الملوك
اللى اشتغل فيه رشدى اباظة وسامية جمال 




لكن هوه رفض
عشان اتعرض عليه دور تاجر اثار حقير كدا
وهوه محبش يظهر بهذا الشكل
لكن كانله تجربة عمل ف ايطاليا وغالبا مكملتش
ومعرفش كانت ايه الصراحة
بس واضح انه منبسطش اطلاقا




 وكان بيقول ان عمر الشريف هوه الوحيد
 من نجوم مصر اللى عرف ياخد مكانته اللايقة
عالميا غير كدا محدش موهوب اخد مكانه اللى يستحقه




واضح كمان انه بعد فيلم الأرض
 لم يلق التكريم اللازم والاحترام اللى كان يتوقعه
لما سافروا بالفيلم برا وعشان كدا كبر دماغه
وركز ف مصر




علاقته بيوسف شاهين كانت مش عادية
 والمخرج النابه اتاحله فرصة للظهور ف افلامه 
بشكل مغاير وغير نمطى 
ساب علامة وأثر لا ينسى للطرفين




شاهين كان بيعتبره أبوه 
فنياً وانسانياً




ع المستوى الانسانى المليجى كان شخص طيب
عكس ما يظهر ع الشاشة ف البدايات
 لكنه الاجتهاد والاتقان والتركيز ولبس الشخصية 




ولما تسمعوه ف الحوارات التليفزيونية
هتلاقوه لطيف جدا وحاضر الذهن
 وله ابتسامة خفية شقية لما بيزنقوه ف سؤال
ابتسامة كدا ملهاش حل 
كان طفل كدا ويتحب بأقل مجهود ممكن 




ونظراته اللى كانت نارية
وبتخوف حتى الممثلين اللى قصاده ساعات
 لما بيندمج
 كانت ف الواقع ولا حاجة




كان طيب وكريم ويحكى عن ايده الفرطة كتير
وكانوا بيستغربوا من انه مخلفش من علوية أى اولاد
ومع ذلك كان بيقول انه بيشتغل كتير
 عشان يحافظ على مستواه المادى وميحتاجش لحد
 فكانوا بيسألوا كان بيودى الفلوس دى فين ؟؟





 عرفوا بعدين بعد وفاته انه كان بيعمل خير كتير
 وانه كان مسئول عن اولاد علوية جميل
من زواج سابق وكان عليه التزامات كتير 
شايلها بكل كبرياء وصمت يليق به 




للأسف مشفتلوش غير مسرحية واحدة
 عرضها التلفزيون مع اسماعيل ياسين
 وكانت مسرحية بائسة
 شكلا ومضمونا ومهياش اكيد مقياس



لكن متخيلة انه ف عروض اخرى محكمة وجيدة
 هيكون غول




غول لدرجة ان يوسف وهبى ف الكبر
لما يسألوه مين ف نظره اقوى فنان 
فيقول زمان كنت انا أعظم ممثل 
لكن دلوقتى بقول ان أعظم ممثل هو .. المليجى !




بيقولوا جنب طيبة القلب والاخلاص لفنه
وللناس اللى بيشتغل معاهم




كان حاد الذهن سريع البديهة والتصرف 





وذاكرته قوية جدا وبيحفظ بسرعة
وكان مريح المخرجين جدا ف النقطة دى 




كان ف البروفات مبيخرجش كل اللى عنده 
ووقت ما المخرج بيقول أكشن 
كان الفنانين قصاده يشوفوا اداء أقوى
 عن البروفة بمراحل ويدهشهم ويخوفهم احيانا 





وكانت علاقته بتوفيق الدقن قوية جدا
رغم ان الدقن كان مزعل ناس كتير ف الوسط
بشخصيته اللى كانت نفرية شوية
لكن مع المليجى لأ .. محصلش 




رغم انه نافسه ف توقيت لاحق
 لكن زيه زى فريد شوقى كانت المهنية والاخلاق الأعلى




 حتى عادل أدهم لما ظهر 
وسألوه عنه ف حوار اشاد بيه
وقال انه مش ناقصه حاجة وانه لما شافه ف افلام
عجبه ادائه
المليجى كان عنده شياكة كدا واستاذية
وثقة ف نفسه سهل جدا تلقطها لما تسمعه 






كان واثق ف نفسه ومكانته الفنية
حتى لو اسمه مبينكتبش اول واحد ع الأفيش
 لكن كان عارف قدره
 وانك لمتمكنننن




المليجى قعد مخلص لعلوية سنييييين طوال
 لحد ما جه سنة 1974
واتعرف على ممثلة كانت ناشئة وقتها ف احد الاعمال
 وحبها وقرر يتجوزها
ومش كل مرة علوية تعرف 
وتعلق الشبشب ع الباب بقى
زائد انه اكيد خاف عليها من الصدمة 
 المرة دى كان اكثر حرصا
وخلوا الجوازة ف السر والسوكتيم
كانت مين العروسة يا شهروزة ؟؟




اهى
احلفى
اه
والنبى بتهرجى
 وحياة ابويا سناء يونس !
اه والله
اه والله
اه والله




سناء والمليجى اتعرفوا ف عمل
وكيوبيد بقى اشتغل بذمة مع فارق السن
اتجوزوا واحتراماااااا لعلوية وشبشب علوية
 الجوازة فضلت ف السر لحد يوم وفاته 
وبعدها كمان لفترة طويلة 
وفاكرة كويس انا سنة 85 او 86 مش فاكرة
لما قريت حوار لسناء يونس
 ف مجلة "زهرة الخليج" الاماراتية
وقالت فيها انها اتجوزت المليجى وانها ارملته
بس المجلة دى مكنتش منتشرة ف مصر
ولا حد خد باله قوى .. فالحكاية ماتت
ومحدش عرف الا بعديييين




علوية نفسها بيقولوا عرفت لكن طنشت 
وعملت من بنها
وفضلت قصاد الناس هيا أرملته الوحيدة المعروفة
 لحد ما فارقت الدنيا ف اوائل التسعينات
مع ألف سلااامة يا ست الحاجة




بيقولوا ان السادات كرم المليجى بعد فيلم رض
وخلاه عضو بمجلس الشورى
لكن ع الصعيد الجماهيرى مكنش واخد حقه كفاية
رغم موهبته العظيمة




 ونور الشريف - ربنا يشفيه - اللى بيحكى
 القصة دى
وبيقول انه كان لما بيمشى معاه ف الشارع
كان بيسمع من بعض الناس تعليقات سخيفة
وكانوا بيوحدوه مع ادواره الشريرة وكأنه بجد
حاجة عجيبة كدا ناس زمان دول !




وبيقول ان الموضوع دا 
كان بيأثر ف نفسية المليجى جدا
رغم قناعته بفنه اللى بيقدمه
ودا فعلا اللى خلى نجوم كثر زمان
تحصر نفسها ف دور الطيب البرىء وكدا




دا المليجى ف عجالة عند النقاد وف تاريخ السينما 
اما عندى انا بقى كشهروزة
فلنا ... هنا ... وقفة 




انا هذا الرجل أحبه من زمان قوى
 حتى وهوه شرير
 كان الشرير الشيك الناعم والتقيل الراسى 
 واللى يتعمله ألف حساب
برنس م الآخر
وبعده بشوية كتير ييجى برنس تانى .. عادل ادهم





دوره مثلا للشيطان اللى نافس بيه يوسف وهبى
ف سفير ف جهنم
متنكروش رغم عباطة الفيلم
 الا انه مكنش بعبط سفير جهنم
 :)) 




دوره ف يوم من عمرى
بيفكرنى بأصدقاء بابا ف الصحافة
كان فيهم ناس زيه بالمللى
تحط الفولة على مناخيرهم تطق ! 




غروب وشروق



 الفساد اللى منخور ف السلطة
وخان وهوه بيجرجرله سعاد لحد رجليه
ويقوله جبت بنتك من سرير اعز اصدقائى !!


  

اقطاى ف واإسلاماه يا عيال
مين غير المليجى تفتكروا
اللى كان يقدر يبعتر كرامة شجر الدر كاريوكا كدا
 ويطلشلها بقلب جامد !!!




الدموع الساخنة
 المستشار اللى اخد ميرفت امين من الوحل
 كى لا تسقط ودخلها بيته واحتضنها
ودفع التمن راضيى
وكان معنى للعدل ايه الناس الحلوة دى ؟!!




السكرية دور الباشا الشاذ
اللى بيغوى الشباب الصغير ويتظاهر بالوطنية
 وهوه غرقان ف فساده وعهره
كان دور مميز جدا






دوره ف انتهى الدرس يا غبى
بحب المسرحية دى جدا 
واللى اتمصرت عن فيلم تشارلى 
وطلعت أحلى منه بمراحل
وازاى كان ادائه حلو جدا 
خصوصا اخر دقيقة ظهر فيها ف المسرحية 
وهوه بيعترف بأن كان الغبى مش سطوحى 




نفس الدور لكن بتنويعة اخرى
للعالم اللى بيجرى ورا فضوله لأخر مدى 
ف مسلسل العنكبوت
و ازاى جسد الدور ف رواية مصطفى محمود 
كما تخيلتها




وكل دا كووووم
 وافلامه مع شاهين قصة اخرى




 طبعا فيلم الأرض
 اللى كان من احب ادواره لنفسه واصعبها
 كما قال ف حوار
ومشهد النهاية يا اخواننا ... يا اخوانننااااااا




عودة الإبن الضال




دور الجد اللى بيزق حفيده لبكرة والمستقبل
وبيقوله امشى .. روح ... متبصش وراك
 ماضيك العفن لازم ينمحى
اه والله #صدقت





الاختيار الفيلم دا من احب الأفلام لقلبى
 ودور المليجى فيه رهيب
 حاجة كدا فُللى ودرجة اولى 




ودوره ف الناصر صلاح الدين والعصفور
 لكن كل دول حاجة
والمحامى ف اسكندرية ليه كان شأن اخر





المشهد العبقرى اللى بينختم بجملة يقولها
ويحسها كل الشرفاء ف كل زمن بيحاربوا الشر فيه
وهما عارفين ان الخسارة القريبة جاية
 لكنهم كسبانين ع المدى البعيد
 ابراهيم ف الفيلم اتحكم عليه بـ 15 سنة صحيح
 لكن بعدين سجانه هينهزم وهوه اللى هينتصر 





والحكاية ببساطة ان الدنيا مش سهلة
والشر متوحش .. عارفين
لكن دا ميدكش مبرر للإستسلام والتراجع
 حاول شوية تقاوم ولو عارف انك مش هتكس حاليا
لكن بعدين آه
الدنيا كدا فعلا والشاطر اللى يلحق روحه م الاول 
وميضعيش فرصته ف انه يكون نضيف 





ويستهيألى بعد ما عرفنا حكاية جوازته
نقدر نخمن ازاى عمل دور الجزار
 اللى بيخاف من مراته ف (فيه حاجة غلط)
بمنتهى البراعة




الجزار المقهور من نعيمة الصغير المفترية
بحب دوره وحسن عابدين والمسلسل كله 





المليجى محدش جه بعده وملى مكانه
لكن اظن .. لو كان المجال سمح والعمر
 كان يبقى خالد صالح اقرب حد له ف مدرسته 






لكن برضو يفضل أيقونة الشر أبو قلب خساية
هوه اللى ف القلب 




لسه جمهور السينما شايفه زعيم مملكة الشر 





ولسه لحد دلوقتى بيفتكسوله حاجات




لسه ملامحه راسخة ف أذهان الناس
والجيل الصغير لسه ما زال بيتعرف عليه 





ولسه المليجى بيدينا درس هادى
وبلا ضجيج عن انه كيف يكون لكل مجتهد نصيب






وتعبيرات وشه اللى بتقولك بمنتهى البساطة كدا
نهااااارك مش معدى !




نظرة انك ميت دى عارفينها 
اللى بتتمنى متشوفهاش ف عين حد ابضنننننن !





ومن ملامح الشر الى الطيبة
 مدرسة السهل الممتنع





وقال عملوا ربطة ايشارب
من وحى ربطة المليجى ف الأرض




وسموها باسمه تيمنا يعنى
طب بلاش أعلق ونقلق الراجل ف تربته بقى 




ووقت الجد 
ولما تطل الوغدنة والندالة من بعيد
 يفتكروا كلمته
" كنا رجالة ووقفنا وقفة رجالة  "




ووقت الهزايم يفتكروا .. وعايزنى أكسبها ؟!!! 




وانه ليبهجنى ويسعدنى ويثلج صدرى
انى أبلغك انه بالحقيقة وبالدليل
 انتا كسبتها يا عمنا
فعلا 




توتة توتة 
وتصبحوا على ألف خير



-------------------------------


Heba @HappyGeddan 
 الحريات الاربعة حرية التعبير.حرية العباده.التحرر من الخوف.التحرر من الحاجه


Hema Abdella @hema_abdella 
و النبي لو سمعتى قصة حياتها هتعرفي انها عانت كتير


Heba @HappyGeddan 
 شكله بيحاول يخنقها
و مش عارف مش قادرة ابطل ضحك 


أحا...براءة @safaagawdat 
 حكم الزمن يا با محمد 
حكم العمدة يا عبد العاطي


Ibrahim Mohamed @Ebrahim_Muhamed
 الصوره دى جباااااااااره لما شفتها
حسيت ان المليجى وحشنى بشكل شخصى
 بالرغم انى لا اعرفه شخصيا


 محمد جاد @MOHGAD782 
بقية المسرحيات في الاذاعة لكن ليست مصورة فيديو


Angels & Demons
 @KhShalaby2012 
اعتقد صداقتة العميقة والقديمة مع اسماعيل ياسين
 هى من جعلتة يقبل اى دور معه دعما له
 ومش موضوع التزام بقدر مساعدة صديق عمره


معنديش صحة حتى للرد @AShohdy67 
 دي قصة حياته بصوته الله يرحمه 
https://t.co/pXQnO9bj6R



Ibrahim Mohamed @Ebrahim_Muhamed 
 حصل فعلا و اعتقد انه كمان امينه رزق دخلت معاه
مجلس الشورى


WTHend @HendZayed 
 الصورة دى بروفايل جبار بالذات الإضاءة


 اسكندريه ليه @saharkhamis1 
 المليجى اطيب وش اجرام


WTHend @HendZayed 
هو يشرف الربطة،
 بس الربطة هى اللي ماتشرفوش لامؤاخذة
 لمعجابينها يعنى


حMED Mahجoub @Ahmed_Mahgoub1 
 محمود المليجى يروي قصة حياته
 فى لقاء اذاعى جميل جدا لازم تسمعيه 
https://t.co/Y5KKAU91I6


" @HappyGeddan كنت باخاف منها جدا "
وانا والنيعمة ولحد دلوقتشى
 :)


Heba @HappyGeddan 
بيقضوا وقت الفراغ في القراءة الرشيدة
انا قلت الجوازة دي مش نافعة


Angels & Demons
@KhShalaby2012 
صعب تقييم هذة الافلام بالعبط ولكن فى زمانها ووقتها
 كانت افلام مرعبة
 :-)
 زى العاب الكمبيوتر والاتارى زمان
 دلوقتى ساذجة جدا
:-)


mariya ‏@drsalmataha   
 سناء يونس كانت مرات محمود المليجي
... بنت المحظوظه ... يا بختها


ليست هناك تعليقات:

إرسال تعليق

Related Posts Plugin for WordPress, Blogger...
"حقوق الملكية والملوخية والمهلبية ... الخ
محفوظة للست شهرزاد وإياك حد يسرقها ويحاول يزعلها آغجر .. مفهوم ؟ "