السبت، 2 مايو 2015

أبو العتاهية وعُتبة ومن الحب ما زهــد

  



حدوتة النهاردة 
واحدة من قصص الحب الكئيبة اياها
عن قصة حب وقلبت بغّم
وغالبا بطلها شاعر
وشاعرنا النهاردة حاجة آخر مهيصة ... !
والشاب انولد ف فترة تاريخية مؤثرة وحاسمة
ف التاريخ العربى 
لما اذ فجأتن طلعت ف دماغ العباس
يروح ياخد بتار العيلة ويقضى على الدولة الاموية
ولم المدهول أنصاره وجيش الجيوش
وخد ف سكته كل اللى خده
وف النهاية شخرم اخر خليفة اموى
ولقب روحه بسفاح بنى آمية
وبدأت الدولة العباسية




قبل الاحداث دى كان بطل حكايتنا بينولد
من أب غلبان وعلى قد حاله بيشتغل حجام
ف حتة اسمها عين التمر - الأنبار - العراق
قوم الحال ضاق بالأب راح واخد ولاده والموادم
وطلعوا ع الكوفة
واشتغل الولاد الصغيرين ف صنعة الفخار
كان بيبعوا لامؤاخذة  قلل وكدهون
قوم زيد الاخ الأكبر هيراعى التجارة والبيع الخ
اما الاخ الأصغر
واسمه إسماعيل بن القاسم بن سويد العيني
الشهير بــ ..  أبو إسحاق
فهيكبر دماغه ويتهرب م الشغل
بيتهرب يروح فين يا شهرو ؟
يكونش قصدك مثلا 
انه بيزوغ فيقعد ع القهوة يشيش وكدا
  


  
آه احنا ابننا مؤديب
ومتربى اخر تربييييية
والله يا جماعة كان بودى أقولكم كدا
انما الولا كان بيقول شعر ودى حاجة كويسة
الوحش بقى انه اتلم على شوية صيع
وبقى يعمل زيهم
زيهم اللى هوه ازاى كدا ؟؟
البنات تودى وشها الناحية التانية
عشان هنقول ان اسماعيل بقى يتشبه بالنساء
 ويتخنث
ويعمل حاجات مش اللى هيا
لحد ما اخد لقب اطلقوه عليه الناس وقتها قائليييين
 انه ... مخنث أهل بغداد
#يالهوى
يادى الخيبة ليه كدا .. ؟




القصد 
الحاجات دى كانت منتشرة وقتها عادى
زائد ان الفتى كان متميز ف قول الشعر
لدرجة سمعت ف المجالس والمنتديات
فوصلت شهرته لقصر الخليفة المهدى
اللى قال هاتوه نسمعه الواد دا
واتنقل شاعرنا من بيع الفخار الى عالم تانى خالص
مليان سهر وانبهار وخلاعة وعطايا 
وشخصيات لها نفوذوقصص كدا
وهينال محبة الخليفة اكبر راس ف المنطقة
لدرجة انه هيطلق عليه اللقب اللى لزق فيه
لحد آخر العمر
ولحد الساعة دى
وهيخليه بدل اسماعيل يبقى .... أبو العتاهية




وحد يقولى يا شهر العتاهية دى جاية من العته .. ؟
اقولكم منا كنت فاكرة كدا والنبى
طلعت أنيل وبعيد عنكم جاية من التعته
يعنى الانحلال والخلل والغرابة
يعنى المهدى لقى الجدع مهروش ومنحل
وغريب الأطوار
وواخد ف وشه مش هامه حاجة
راح مسميه ابو العتاهية يعنى ابو الفساد كله .. وشكراااا





المختصر ابو العتاهية كان شاعر شاطر جدا
ومتمكن من ادواته زائد الغزارة ف الشعر
و يكفى اقولكم ان اللى وصلنا منه بس
فوق الـ800 قصيدة يا ثاااامح
كان حاضر الذهن وبليغ 
وكان بيقول عن نفسه
"لو شئت أن اجعل كلامى كله شعراَ لفعلت "
وطبعا مشخلع وبتاع سهر وتفاريح 
وبيشعر على روحه
فبقاله صيت واشعاره ف مجالس الخليفة
وغيره انتشرت ومن جمالها اخدها 
ابراهيم الموصلى اللى اتصاحب عليه
وبقت تتغنى كلماته ف كل مكان



حسناء لا تبتغى حَلْياً إذا برزت
لأن خالقها بِالحُسْنِ حَلاَّهَا
قامت تمشى فليت الله صيَّرنِي
ذاك التراب الَّذي مسته رجلاها




فيه ناس ف زمانه طبعا نفّسنت منه
واتغاظت من قربه من الخليفة وقعدوا يلسنوا بكلام
زى انه زندييييق ومتهتك وبتاع
طبعا الخليفة المهدى ولا الهواااا
الراجل كان عاجبه الأشعار 
ومبسوط بجو المديح والدلع
ايش فرق معاه ف سلوك ابو العتاهية الشخصى ..؟
اداهم طناش وبقى ابو العتاهية من الندماء



إنّي لأعجبُ من حبٍّ يقرّبني
ممن يباعدني منه ويُقصيني
أما الكثير فما أرجوه منك ولو
أطْمَعْتِني في قليل كان يكفيني




وخلاص احنا حلوين كويسين 
قاعدين واكلين شاربين
سهرانين ف بيوت الكبراء وعلية القوم
وبنقول الشعر ونؤجر عليه
ونعيث فسادا 
ومحدش يقربلنا هنقعد كدا كتير؟
لأ طبعا
لازم يحصل حاجة تقلب الدنيا
 وتعمل تحول درامى
والتحول هيكون عن طريق 
المزامزيل الأنسة .. عتبة
  


   
والاخت عتبة دى عقبال اللى مش سامعين
جارية من جوارى المهدى
وكانت كمان زى ما تقولوا كدا
كانت وصيفة الحاجة مرات الخليفة
عتبة كانت الجارية المقربة للخيزران
والخيزران دى حدوتة لوحدها
مرة تيجى مناسبة ونحكيها 
كانت ست قوية مفترية وكدا
المهم ان الأنسة عتبة كانت جارية
من الدرجة الأولى ممتاز
والظاهر الخليفة المهدى كان بيحبها وبيقدرها
وبيوكل لها مهام احيانا 
زى ايه ؟





بيقولوا انه كان اوقات بيحب يفك رقبة
وياخد ثواب العتق
فكان بيبعتها بالفلوس لسوق الرقيق تشترى
 عبيد وتحررهم لوجه الله
 وكان بيبعت معاها حراس وجو كدا
وطبعا كانت حلوة وبتعرف ف الشعر والغناء
والرقص والنوادر والحكايات
 زى كل الجوارى المميزات 
بتوع قصور الحكام




ومتعرفوش امتى بالضبط حصل
والحب وصل وابو العتاهية شاف عتبة
ووقع ف غرامها ف التو واللحظة 
والواد شاعر مخلول بقى وطايش ومستبيع
قوم قعد يتتبعها بتخرج امتى لسوق العبيد
 وراح متنكر ف لبس شيخ عجوز
 ووقف وسط الجموع
وبعدين جت عتبة وقعدت راح مقرب منها
واستغلب ع الآخر وقالها انا بائس وتعبان
واشترينى واعتقينى ينوبك ثواااب
فصعب عليها 
فقالت خلاص هنعتقك
فقرب اكتر وطلب يبوس ايدها
عشان يتشكرلها
يعنى الست مدتش خوانة ومدت ايدها باسها
وبعدين فص ملح وداب من قصادها ف ثانية !



مفهمتش وقتها مين دا وايه الحكاية
 لكن بعدين عرفت انه كان ابو العتاهية
عشان الولا كتب فيها شعر وفضحها بين الامم


أحد قال لي ولم يدر ما بي
" أتحب الغداة عتبة حقا"
فتنفست ثم قلت: نعم حبا
 جرى في العروق عرقاً فعرقا



وبس شبب بيها الولا وفضحها بحبه
ف كل مطرح واخد المغنيين الشعر
وتناقلوه ف المجالس
 وشفتوش اللى حصل
ابو العتاهية بيحب عتبة يا عيااااال


عُتبُ ما الخيال خبريني ومالي
لا أَراه أتانى زائرا مذ لَيالى
لو رآني صديقي رق لي أو رثى لي
او يرانى عدوي لان من سوء حالي



والشعراء لما بيحبوا بقى ... ويندلقوا
والحبيبات لما قلبهم يقسى
وميردوش ع المحبة ويتمرعوا
البت تمنعت وابو العتاهية اتجنن اكتر



وَلي فؤاد إِذا طالَ العذاب به
هام اشتياقا إِلى لقيا معذبه
يَفديكَ بالنفس صَبٌّ لو يكون له
أَعَزُّ مِن نفسه شَيءٌ فداك به


واشتكت عتبة للخليفة المهدى من اللى حاصل
 الصراحة الراجل سألها
ما تتجوزيه يا تيبو ايه المشكلة ؟؟
راحت معيطة وعملت مناحة ! 
عملت مناحة ليه يا شهروزة .. ؟





 المسألة بسيطة جدااا وواضحة
 احنا بنتكلم عن جارية الخليفة
وجارية مرات الخليفة وام الخليفة القادم
يعنى الدلع والبغددة والنفوذ والراحة الخ




قوم انتوا عاوزينها تسيب كل العز
والسلطة والمستقبل المهم عشان تتجوز بياع قلل
بيقول الشعر ويتكسب منه
وبيقولوا عليه ولا فخر .... مخنث اهل بغداد !
 ثم ان بعض الشعراء مهاريش
 وبيحبوا مع النسمة
شوية الهوا يروحوا الهوى يروح معاهم
فأيش ضمنها انه هيفضل يحبها علطول 
ومش هيزهق بعد شوية ويرميها !!
ثالثا ودا اتقال من ابو الفرج الأصفهانى
 ف الأغانى ان ابو العتاهية مكنش وسيم البتة
 فالبت قفلت منه عشان كانت عاوزة واحد
شبه حسين فهمى !


الملخص .. عتبة قالت مخدوش يا بابا
مخدوش يا بابا 
الخليفة قالها خلاص متزعليش
وسيبيه يشعر على روحه لحد ما يزهق
 ابو العتاهية يسكت .. ؟!!!
لأ طبعا هيفضل يحب ويتلوع
ويكتب ف اشعار ويفضح البنية حبااااا



ان شئت موتا فأنت الدهر مالكه روحي
وان شئت ان احيا فأحييني
يا عتب ما أنت الا بدعة خلقت
من غير طين وخلق الناس من طين



الا مالسيدتي مالها 
ادلت فاحمدت ادلالها
والا ففيم تجنت وما جنيت 
سقى الله اطلالها
وجارية من جواري الملوك 
قد اسكن الحسن سربالها


عتبة اشتكت للخيزران والخيزارن سخنّت المهدى
 قوم الحاج بعت لأبو العتاهية
عشان يطلع ترابنتينه
عتوهة استشعر الخطر 
وراح مديها



الا شافع عند الخليفة يشفع
فيدفع عنا شر ما يتوقع
وانى على عظم الرجاء لخائف
كأن على رأس الأسنة تشرع


وبس جابه الخليفة وهزأه
 ازاى يكتب بيت الشعر :
 الله بيني وبين مولاتي
ابدت لي الصد والملامات
وقاله هيا كانت شافتك امتى 
عشان تصدك بعدها ؟!!
قاله يا مولانا دا شعر وخيالات شعرا
 وانا بحبها وعاوز اتجوزها وهيا اللى تقلانة عليا
راح المهدى أمر بجلده
عتبة عيطت 
فراح مديله فلوس ترضية
 وبرضو قالت على عرض الجواز .. لأ




وروح يا زمان وتعالى يا زمان
والخليفة المهدى يموت 
ويمسك بعده ابنه .. الهادى
 الواد مش هيعمر ف كرسى المخلفة كتير
ويموت بعد سنة تقريبا ..!
 ويقال يقااااال ان ست الحاجة نينة الخيزران
 مرات ابوه سمته عشان تخلى الطريق
لابنها هارون اللى هيمسك بعد موته
 ونعرفه باسم .. هارون الرشيد




هارون الرشيد بقى انتوا عارفينه راجل مبهج
وجنب الفتوحات والحاجات والحبشتاكنات
 كانت بيحب الشعر 
ويقرب منه الشعراء والأدباء
 الخ
 قوم فضل ابو العتاهية تحت النظر محبوب
ومقرب وعمال يحب ف عتبة
والبت منفضاله تنفيض السنين
فطلبها تانى من الخليفة الجديد لعل وعسى !!




الشهادة لله الرشيد كان راجل حنين
وقلبه قلب خساية وافق على طلب ابو العتاهية
واوشك يجبر جاريته عتبه على الموافقة
لولا اصرارها ع الرفض
فالراجل مرضيش يجوزها بالعافية يعنى
 وقال لأبو العتاهية معلش
 البت مش طايقك يا تهته نعمل ايه .. سلافى


لجت عتيبة فى هجرى فقلت لها
 تبارك الله ما اجفاك يا ملكه
ان كنت أزمعت يا سؤلى ويا املى
حقا على عبدك المسكين بالهلكة
فقد رضيت بما أصبحت راضية
ها قد هلكت على اسم الله والبركة



بس بقى 
والواد دخل ف مرحلة البكائيات والشحتفة


عيني على عتبـة منهلـة
 بدمعها المنسكب السائل
يا من رأى قبلي قتيـلا 
بكى من شدة الوجد على القاتـل


وقعد يستعطفها وهيا ولا الهوا
 لحد ما يئس تماما من حبها
ومر بلحظة تحول من النقيض للنقيض
وانتوا فاكرين حكايات القصص الكئيبة بتاعتنا
عادة الحبيب او الحبيبة
او الأتنين سوا بيموتوا ف اخر الحكاية
المرة دى شاعرنا هياخد منحى اخر
وبدل ما يموت حبا ف عشق البنية هيزهد
وهيطلق الدنيا بلى فيها
ويسيب كل حاجة كان بيحبها ويمشى
وهوه اللى قال بنفسه
 ف اخر قصيدة غزل وهيام ف عتبة

قـطـعـت ُ مـنـك ِحـبـائـل الآمالـى
وحططت ُ عـن ظهـر المطي رحالي
ويئـسـت ُ أن أبـقـى لـشـيءٍ نـلــت
مـمـا فـيـك ِ يادنـيـا وأن يبـقـى لـي
فوجت ُ بـرد اليـأس بـيـن جوانحي
وأرحـت ُ مـن حـلّـي ومــن ترحـالـى
 ولئـن يئـست ُ لـرب بـرقـة ِ
خـلَّـب بـرقـة لــذي طـمـع ٍ وبــرقــةِ آل ٍِ
 مــا كان أشــأم إذ رجاؤكِ قـاتلى
وبـنـات ُ وعـدكِ يعتـلجـن َّ بـبـالي
فــألآن يـادنـيـا عـرفـتــكِ فـاذهـبي
يــادار كــل تــشــتــت ٍ وزوال
والآن أبصـرت السبيـل إلـى الـهـدى
وتفـرغـت همـمـي عـــن الأشـغــال


آخر بيت دا هوه اللى هيحصل بعد كدا بالملل
 ابو العتاهية هينسى عتبة
وينسى السهر والشهرة واللهو وكل حاجة
 ويندم على كل ما فات ف حياته
وينشغل بالموت والحساب 
ويتوه ف حدائق الندم
ويتحول الى شعر الزهد
ويبقى من أساطينه واشهر شعرائه ...


اِصبِر لكل مصيبة وتجلد
وأعلم ان المرء غير مخلد
أوما ترى ان المصائب جمة 
وترى المنية للعباد بمرصد

وقعد بقى يحذر ويفكر الناس بالموت
وبالدنيا الغرورة .. يازحمد

إذا تستّرت بالأبواب والحرس
 واعلم بأنّ سهام الموت قاصدةٌ
لكلّ مدّرعٍ منّا ومـتّرس
ترجو النجاة ولم تسلك طريقتها
إنّ السفينة لا تجري على اليبـس

وطول عمرى بحب البيتين دول
واول مرة اعرف ان هوه اللى قايلهم .. 


ما لي أرى الأبصار بي جافية
لم تلتفت منى الى ناحية
لا ينظر الناس الى المبتلى 
وانما الناس مع العافية


وطبعا هوه صاحب أشهرأبيات
هنقولها ف الحقبة الزمنية التى أتت واللى فاتت 
وهتأتى لأى حد فينا
ولازم هيمر بيها يوما ما .. لما قااااال


بكيْتُ على الشّبابِ بدمعِ عيني
فلم يُغنِ البُكاءُ ولا النّحيبُ
فَيا أسَفاً أسِفْتُ على شَبابٍ
نعاهُ الشّيبُ والرّأسُ الخَضِيبُ
عريتُ منَ الشّبابِ وكنتُ غضاً
كمَا يَعرَى منَ الوَرَقِ القَضيبُ
فيَا لَيتَ الشّبابَ يَعُودُ يَوْما
فأُخبرَهُ بمَا فَعَلَ المَشيبُ


هاحييييييييييييح ايو النبى قول يا تهته قول



القصد
الجدع تحول من اقصى اليسار الى اقصى اليمين
 طبعا فيه ناس فرحت وانبسطت
وخلصت منه زى عتبة 
والمنافسين من شعراء عصره
 وفيه ناس زعلت واستغربت واتقمصت
وقالت لأ .. لازم يقول الشعر تانى
ايه بقى مكنتش قصة حب وباظت دى !!
 من الناس دى كان الخليفة الرشيد سخصياااا
وراح باعت رجالته جابوه ابو العتاهية
اللى  قال يا مولانا انا بطلت اقول شعر خلاص
 الا ف مواضيع معينة
ومليش ف الغزل والمديح الخ 
شطبنا



احنا لسه فوق قايلين ع الرشيد راجل لطيف
 وحلو ومتفهم
العكس تماماااااا بقى هنقوله دلوقتى
 عشان الرشيد هيتغاظ جدا من رد ابو العتاهية
 ورفضه
ويامر بسجنه وجلده ..!
ابو العتاهية ف السجن هيفضل على رأيه
 ويقول شعر ف الزهد والموت وخلافه
 الرشيد هينكسف على دمه ويطلعه
 حلو ؟
لأ مش حلو عشان هوه هيطلعه
لكن هيسجنه ف بيته ويعمله اقامة جبرية كدا
 بمصطلحات الزمن الحالى غتاتة رزالة وغيظ
اصل ابو العتاهية فقعه بيتين


اختلف اللّيل والنّهـار
ولا دارت نجوم السماء في الفلك
 إلاّ لنقل السّلطان عن مـلـكٍ
 قد انقضى ملكه إلى ملـك


بس والرشيد سابه ف حاله
وبعد موته جه الأمين والمأمون
وبيقولوا ابو العتاهية مدحهم ف بدايات قصايده
برو عتب يعنى وعشان يخلص من الزّن
وفضل شاعرنا ف حاله زاهد متنسك
ويقال ان ابو العتاهية عمّر لحد ما عاش 80 سنة
يا ثاااامح وعاصر كام خليفة عباسى 
وقاعد يطلب الغفران من رب العالمين


إلهي لا تعذبني
 فإني مقر بالذي قد كان مني
 مالي حيلة إلا رجائي لعفوك 
فاحطط الأوزار عني
 وكم من زلة لي في الخطايا
وأنت علي ذو فضل ومَنِّ
إذا فكرت في ندمي عليها
عضضت أناملي وقرعت سني




وحد يسألنى يا شهرو
اين ذهبت عتبة يا ترى ؟
الحقيقة ان اخبارها انقطعت
 ومحدش ذكرها تانى
وفيما يبدو ان حياتها انتهت كجارية وليس اكتر
ومبقتش سخصية ذات حيثية 




 ابو العتاهية بقى
هل بت ما زهد ف الحريم
ومتجوزشى بعدها ؟؟؟
الصراحة يبدو انه اتجوز
وعاش حياته برضو عشان لما مات
ابنه قال فيه شعر رثاء وكدا
فيعنى ابنه دا هييجى بالمراسلة
 ولا هيشتريه من ع النت .. لازم يكون اتجوز !



الموْتُ بابٌ وكلُّ الناسِ داخِلُهُ
 يا ليْتَ شعرِيَ بعدَ البابِ ما الدَّارُ


وسنة 211هـ هيخرج ابو العتاهية من الباب
ويقول عنه الأصمعى
" شعر أبي العتاهية كساحة الملوك يقع فيها
الجوهر والذهب، والتراب والخزف والنوى"


وحتى بعد موته ميسيبهوش ف حاله
وناس تقول انه متبع مذهب كدا فيما معناه
بيتكلم عن الموت والفناء ومعرفش ايه
لكن مبيتكلمش عن البعث والحساب !
القصد مات بياع الفخار اللى قال عن نفسه
«أنا جرّار القوافي، وأخي جرّار التجارة»



وف وسط البحث قريت وصف بليغ لحالته
من احد الكتاب بيقول ان ابو العتاهية
معملش زى غيره ومات حبا
او اتجنن دا كان احسن العاشقين حالا
لحق روحه من مصير عبيط يعنى 
واستفاد من الفشل العاطفى 
 وانا خلصت الحدوتة 
وفاضلى كام ملحوظة ع السريع


1) 
عتبة كان عندها حق ف خوفها وصدها
يعنى الواد جايلها سمعته سبقاه بايظ ومنحيرف
 ولاهى وعابث
واسمه مشتق من المجون نفسه !! #نعممم

2)
ابو العتاهية بسبب تطرفه اخلاقيا ناحية الشمال
 انحرف برضو اخلاقيا ناحية اليمين
طب ليه منبقاش ف النص الدنيا تتعاش
 وتتحب ونحاول منغلطش .. ؟


3) 
يختشى الخلفاء زمان كانوا حاجة فُللى قوى
مفيش مشكلة ان مجالسهم يبقى فيها عيال شمال
 وعادى ف المعادى .. ملناش دعوة يا موهيى
 اومال الاخوة بتوع الدولة الاسلامية
 رموا الشاب اياه من مكان مرتفع ليه
 لما الممارسات دى زمان كانت عادية
ومعترف بيها ومحدش موتضايق منها .. ؟

4)
ومنتهى التناقض بقى ان الخليفة
يسمح بالحاجات دى
وبعضهم كانله ولع بالغلمان
 بينما ف نفس اللحظة بيعتق الرقاب 
ويعمل خير بالعبيط .. !

5)
قصص الحب اللى مبتكملشى دى
 قوتها جاية من عدم اكتمالها
 يمكن لو كانت مشيت ف سيرها الطبيعى
كانت انتهت وماتت ومسمعناش عنها
ولا عن صحابها ... #احتمال
 وليه متكونش القصص كبيرة وقوية
وتكمل وتفضل ونسمع عنها برضو من غير زعل
 ولا هجران 
ولا نكد 
ولا موت
ولا أى حاجة م الحاجات دى .. #سؤال



واخيرا .. حكاية النهاردة من كتاب الأغانى
 ومواقع مختلفة ع النت
ودا لينك لقصايد ابو العتاهية للى حابب يقراله  
وتصبحوا على ألف خير 

-----------------------------


! @khalidelnhas
 أس الفساد يعنى :-)


ْنُورهَان @NourhanAhmedAly
حقها طبعا كفايه سمعته السابقه


هند @HendZayed
هي "عُتبة" بضم العين
 ولا "عَتبة" بفتح العين ...لا مؤاخذة

زى  ما كتبتيها يا هند :)


فرحات افندي براقع @elkarmoooty
 علي فكره ديه حاله اكتئاب لو في عصرنا
وراح لدكتور كان هيظبطه بجلسات علاج نفسي 
وأدوية

هند@HendZayed
علشان يكفر عن ذنبه بمجالستهم 


سى محمد أفندي @alemabada
 الخليفة معصوم من الخطأ
 يعمل الي هو عاوز يعملة


ليست هناك تعليقات:

إرسال تعليق

Related Posts Plugin for WordPress, Blogger...
"حقوق الملكية والملوخية والمهلبية ... الخ
محفوظة للست شهرزاد وإياك حد يسرقها ويحاول يزعلها آغجر .. مفهوم ؟ "