الخميس، 4 يونيو، 2015

آثــارنــا المصرية بين خــمس متــاحــف




حدوتة النهاردة عن حاجات 

وانتقالات بين شوية مطارح 
وشخصية مؤثرة ف تاريخنا




وهتبدأ القصة من قديم الأزل لما الأخ المصرى القديم
 يقرر يخلد تاريخه بطريقته المتميزة





ويقعد يزرع سعادته ويستنى الزرعة تكبر
عشان يحصدها
قوم يلاقى الفراغ ويحش
فيشغل نفسه ف عمل المسلات والتماثيل 




ويبنى ف معابد



وف اهرامات





ويدفن موتاه 




ويمجدهم






ويسيب معاهم تحف فنية
لا تقدر بثمن 






وتفضل هذه المقابر هدف للحرامية
كله بيدور ع الدهب والمجوهرات النفيسة
 ويرمى الباقى
الباقى اللى هوه ايه يا شهرو ؟
أى حاجة مومياء تماثيل الخ
مش هيا المهمة ولا ليها أى معنى عنده
ولما دخل العرب مصر
الموضوع متغيرش كتير
بالعكس يزيد ان الأثار المصرية
هتكون هدف للسرقة والباقى يتكسر
وتستخدم احجاره ف البناء .. وفقط
العرب كانوا مسمين الاهرامات .. البرابى
 جاية من ربوة يعنى المكان العالى






وكان اللى ف السلطة بيبعتوا رجالتهم 
يبعتوهم يتشمسوا
ونفسيتهم تتحسن م الهواء العلييييل ؟؟
 لأ طشبعن





كانوا بيبعتوهم ينبشوا عن الدهب
المأمون لما جه مصر لوأد الثورة البشمورية
حاول ينبش الهرم الاكبر
وزهق بسرعة ورجع على بغداد





ويقال ان احمد بن طولون بذات نفسه

 لقى خبيئة من الدهب
ومنها بنى مسجده الشهير 
شيخ الجوامع .. مسجد ابن طولون
وفضلت بصة المصريين وحكامهم للآثار
على انها حرام وأى كلام
تماثيل ومنحوتات لبشر وحيوانات
واللى عملوها كانوا كفرة كمان 
#ياللللللهوووول
وفضلنا على هذا الحال الأثار تهمل
ويتاخد احجارها ف عمل المبانى
والدهب يتسلك من مقابرها كل ما حد يعتر في
.. لحد ما جم الفرنساوية





الشهادة لله عم نابليون
واللى تبعه عاملونا بما يرضى الله
وكله كان بالذوق والانسانية
المهانة والقتل والنهب وكل حاجة 
بالاحتراااام اهم حاجة الاحتييييرام 




الباشا كان جاى وهوه عارف هدفه كويس
 مصر كانت اليغمة 
والتفاحة الشهية اللى ما اسهل قطافها 
وكما ذكرها احد ضباطه بأنه
" صعب أن يجد المرء بلد أغنى
ولا اشد بؤساً منها "




قوم ايه ؟

 الجدع اللى كان بيهلفط بكلام
عن انه مش جاى يغزو
 وانما جاى يهدد انجلترا وفقط
وانه عاوز يخلصنا م الاتراك الأوغاد الخ
 بعد شوية بان اصله
وابتدى حملة نهب منظمة وممنهجة
عن طريق فرض غرامات بالهبل
 وافتراس البيوت والحرمات ما اوتى لذلك سبيلا 
واخيرااا سرقة الآثار
اينما وجدت ف سكته او حد دله عليها .. !!





بس يا سيدى وقعد الفرنسيس يشيلوا

ويعبوا ويكيسوا ويشحنوا على فرنسا
لحد ما غاروا 1801
وبعدها بـ 4 سنين
هيوصل محمد على سنكفولة للحكم 
ايه يا شهرو ؟؟؟
اغلطشى بقى ف سنكفولة
زى ما بتعملى كالعادة ... !
لأ مش هغلط
دنا هقول فيه شعر
الحاج ابو طوسون دا حبيبى
وروحى روحى روحى
#انتوا_عارفين


والراجل يا خويا 

وكما قال المؤرخين خصوصا الاجانب
كان معتبر مصر
مجرد بقرة عمال يحلبها ليل نهار
تمهيدا لدبحها ف الوقت المناسب
وف اطار حملته الممنهجة هوه راخر
للسيطرة على كل موارد البلاد واحتكارها
امر بأن الأثار محدش يهوب ناحيتها
غير بامر شخصى منه
وأى اجنبى يتحط تحت النظر والمراقبة  




واظلميه بقى يا شوشو 
دا الراجل بيحافظ علي آثارنا وكدا ؟؟






والنبى طيبين !!
ابضنننننن محصلشى
 الحاج ابو طوسون كان حريص بس
ان محدش ينهب غيره
خصوصا بعد ما جه شامبليون مصر
وعمل طفرة ف علم المصريات 
شامبيليون اللى حكينا عنه زمان
والكل تقريبا عارف قصته
كان مولع بتاريخ مصر
وهوه اللى فك رموز حجر رشيد الخ
 قوم ايه ؟






الجدع لم عزاله وحاله ومحتاله ونزل مصر
واخد موافقة محمد على ف البحث والتنقيب
وقعد قد ما قعد يستكشف
وبعدين روح بلده عشان يرجع 
ومرجعشى 
لكن اتنشر ما وصله واثار مصر 
بقت مثار فضول وهوس الأروبيين 




ف هذوها الأثناء كان محمد على قاعد
بيبدد ف آثارنا كهدايا
خصوصا بعد ما اروبا اتعرفت
 على هذا الجزء المنسى من التاريخ
وبقت مولعة بيه 
فقالك نستفيد بقى ونرميلهم كام مسخوط
على كام مسلة طالما هُبل كدا
وبينبسطوا يالحاجات دى 
ونقلّبهم وناخد قصادها اللى يهمنا .. !
#واد يا سنكفولة آصايع








وطبعا استغلت انجلترا وفرنسا
الخصمين اللدودين الموقف
وقعدوا يتنافسوا
وانا عاوزة المسلة دى يا عمو محمد
لأ انا اللى هخدها يا اونكل
ومحمد على يقول كل واحد ياخد مسلة
والعبوا مع بعض متتخانقوش .. ! 



وقعد جنابه يستعمل الأثار كهدايا
يحصل بيها على طلباته
ومسلتنا ف الكونكورد مثلا كمثال
كانت هدية مقابل صوارى للسفن الحربية بتاعته




وبعدين المصريات واثارها بقت الموضة
والتجار والمحترفين ف اروبا نزلوا مصر
 يشتغلوا ف التجارة الرابحة دى
مقابل تقديم الأوبيج أول بأول
رشاوى تندفع للوالى ورجاله
وكانت مبالغ أى كلام مقارنة 
بلى هيلمه المنقبين
 دول لما يرجعوا بالتحف دى
على بلادهم ويبيعوها هناك للأثرياء




زاد وغطى بقى ان الدول نفسها
دخلت ف اللعبة
 والدافع هوه اثراء المتاحف القومية بتاعتهم
 بهذه الكنوز والقناصل شاركوا بنفسهم
ف هذه العمليات القذرة 




والحقيقة لا عتاب عليهم هما
العيب علينا احنا اللى كان حكامنا
(وما زالوا) ميعرفوش قيمة الكنوز دى
وبيرموها برخص التراب لكلاب السكك
الأجانب قالوا ناخدها اولى 
ونحافظ عليها ف متاحفنا وناخد المجد 
كتمن بسيط مقابل اللى دفعناها
ف اخراجها للعرض تانى
فلما حد تانى ييجى وينهبها وانتا تسكتله
يبقى مش غلطته يا عزيزى
وعداه العيب وجالك 
احنا اللى حكامنا عالم جرابيع
ورعاع وشبعة من بعد جوعة #للأسف 







القصد
النهب المنظم كان شغال الله ينور
ف زمن محمد على 
اللى تولى - ف حياة عينه - ابنه ابراهيم
ثم مات ابراهيم باشا وحكم الحفيد
عباس حلمى الاول
والفتى كان مرخم ع الاجانب شوية ومنشفها
وكان صعب يستميلوه بفلوس وهدايا
كان براوى ومبيثقش ف أى حد 
من عيلته حتى مش بس الغربيين  
وشامبليون قبل ما يمشى من مصر
كان اوصى عند محمد على
انه يتعمل دار للآثار ومحمد على محبش
يكسفه وقال نراضى فرنسا منزعلهاش 






 وقال ماشى وفضى بيت ف الازبكية

كان لمحمد الدفتردار
البيت كان على ضفاف بركة الازبكية
واللى مكانه دلوقتى مدخل ش الألفى
 وشارع فؤاد من ناحية شارع الجمهورية





والبيت اتحط فيه كام تمثال

 على كام تابوت بائس كدا
وطبعا مفيش مجوهرات ولا نيلة
كله اتنهب يا بابا واتاخد اول باول
انتوا بتهرجوا !!
وكان هذا المبنى اسمه دار حفظ الآثار
وقولوا مين اللى مسكه يا عيال وبقى مديره ؟
 رفاعة الطهطاوى
ايوالنبى !






وبس عملنا الدار 
ويلا يا ولاد هاتولنا آثار تقعد فيه !
آثار مجتش
 ليه يا شهرو ؟؟
عشان كانوا بيخطفوها ف السكة من الاقاليم
لحد القاهرة ومبتلحقشى حضرتشك !
حكام الأقاليم كانوا بيشتغلوا
تحت امر محمد على ونقاوة ايده
قوم المصرى زمان اخترع المثل الجبار دا
عشان يتقال ف هذه المواقف 
اللى هوه ؟؟
"حاميها حراميها"
الاخوة كانوا بينهبوا اللى بيقع تحت ايدهم
ويبعتوا شوية لمحمد على نفاق ومحلسة
 واقل القليل يبعتوه القاهرة
فالدار فضلت منظر محتوياتها هزيلة
ومبتئسة بؤس السنين



ونسيب مصر هبابى

ونروح فرنسا عشان هناك هنتعرف على شاب حالم غاوى رسم ومزيكا وكتابة روايات
اسمه اوجست مارييت 






اوجست او مارييت
كما سيكون اسمه الأشهر لآخر العمر
للصدفة ان ابن عمه كان رفيق لشامبليون
ف رحلته لمصر وابن العم رجع برسومات
الرسومات واللى فيه شد مارييت
وخلاه عاوز يتعرف ع الحضارة دى
واخده الهوس اللى اجتاح اروبا كلها
خصوصا بعد نشر كتاب وصف مصر
وقعد الأخ يبحث ويتمحص ويبدى مهارة
 لحد ما اخدوه ف متحف بولونيا
يصنف المقتنيات المصرية هناك




واخد خبرة اكتر 
بعد شوية هيتعرف اكتر ف الاوساط الثقافية
ونجمه يعلى وهياخدوه ف اللوفر
ويبقى مسئول عن المقتنيات المصرية هناك 
كان وقتها بسن التلاتين وجاتله مهمة
 انه يشترى مخطوطات قبطية
ورصدوله ميزانية وسافر مارييت لأول مرة
 لمصر عشان تعضه البطة 
:)




والبطة دى زى ما قال مارييت بنفسه 
" البطة المصرية طائر خطر
فهى تحييك برقة ولكن ما انسقت وراء
ما تبديه ببراءة وارتبطت بها بشكل ودود 
فانت ضائع
ذلك ان عضة واحدة من منقارها
سوف تبث سمها بداخلك
وفاذا بك عاشق لعلم المصريات بقية حياتك "
 مش ناقص يقول غير #تعاليلى يابطة





القصد الراجل نزل مصر سنة 1850
ودور ع المخطوطات لقى البابا لمها وشالها
ف خزانة بعيد عن الحرامية
يوه .. قصدى المتطفلين وفشلت المهمة
فالجدع انصدم وقال خلاص
الجالية الفرنسية جبت توجب معاه
وعملوله حفلة وبتاع
ف احدى الزيارات لقنصل فرنسا لقى عنده
ف الجونينة تمثال لأبو الهول
سأله جايبه منين ؟؟
خصوصا ان شاف واحد زيه ف فرنسا
عند احد تجار الآثار المشهورين
 القنصل قاله دا من منطقة سقارة
مارييت عينه لمعت 
وقرر الآتى
انه يستخدم الميزانية اللى اترصدت
للمخطوطات ف انه ينقب ف سقارة
ويبعت اللى يلاقيه على فرنسا
وبعت فعلا للمتحف ووافقوا
ورفعوا المبلغ لـ 30 ألف




عباس حلمى الاول كان زى ما قولنا
مبيحبش الاجانب ونفوذهم اللى زاد ف عهد
 جده محمد على
لما سمع بتنقيب مارييت اصدر فرمان
يمنع فيه اى تنقيب تانى الا تحت اشراف
حراس من الحكومة المصرية
وان أى حاجة يلاقوها تتصادر وتنبعت
على دار حفظ الأثار بالازبكية 
حلو ؟
اه حلو لناس وناس لأ
حلو لمصر والدول المنافسة لفرنسا
لكن مارييت واللوفر اتغاظوا
واحنا هنصرف 30 ألف عشان
ياخد الوالى عباس تعبنا وشقانا !!
ملهمش حق #سحيح
 القصد 
اللوفر وقف المهمة
ودخل قنصل فرنسا ف مفاوضات مع الوالى
اللى ف الآخر لين دماغه
وقال اللى لقيتوه قبل الفرمان خدوه وبس




مارييت كان اكتشف معبد السرابيوم
ف سقارة واكتشف جبانة وموقع تانى
وراح طامس معالمهم عشان ميتاخدوش
منه واستنى شوية 
وابتدى ينقل م الجبانة ف السوكتيم
والاخوة ف السوق يهروا وينكتوا
ويقولوا عنه قدام عباس انه
" ان الرجل الفرنسى الموجود ف سقارة
 ما هو الا لص "

واتعرض مارييت لمحاولة اغتيال بالسم
وحاولوا كمان يوقعوه ف احدى المواقع
ويكسروا رقبته والراجل كان بسبع ارواح
وما عدوك الا ابن كارك يا ماريو 
وكلم مهمته
وبيقولوا يا حبيبى انه رجع فرنسا
وهوه متكدر
ليه يا شهرو ؟
قالك اصله حب مصر قوى
وصُعب عليه يمشى #البطة_كاك_كاك 



حاجة كمان كانت منغصاه انه سافر لفرنسا
ومعاه 7 الآف قطعة
وضميره نقح عليه 
كان عارف ان حكام مصر مش مهتمين
لكن كان عارف كمان .. انه حرامى
ورجع فرنسا ومعجبوش يواصل وظيفته
ف اللوفر وما أشبعش طموحاته
زائد مرتبها الضئيل وفضل ساكت
وكاتم ف قلبه لحد ما جاتله فرصة
انه يرجع مصر تانى !





سنة 1855 هيحصل حاجة تانية لما يزور
 ولى عهد النمسا ماكسميليان مصر
وهيسمع ان فيه عندهم اثار
وعاوز يشوفها !!
الحاج عباس حلمى الاول كان وقتها
اصدر فرمان بنقل الآثار لاحدى الأماكن
بالقلعة مقر الحكم انذاك 
ولى عهد النمسا قاله
عاوز أطل عليهم و أخد فكرة 
وحلوة الآثارات دى قوى ياعبس
- موشكرين يا ابو سامية
- بتعملوا بيهم حاجة؟
- لأ وحياتك
- طب ما تدهمولى؟
- ميغلوش عليك



بس ولم الأرشيدق كل اللى كان
ف دار الحفظ وهيلا بيلا ع النمسا
واتجابت ضرف اول متحف للآثار ف مصر
وآثار 
آآآآثار 
راحت آثار 
#ذنب_وفاج





ونرجع فرنسا تانى حيث مارييت
اللى هيعرف بمقتل عباس حلمى الاول
ف قصره ببنها العسل وان الوالى سعيد
جه بداله وكان بيدور على رضا أروبا ترضى 
عشان يقعد ف كرسيه
 قوم ايه




بالصدفة ديلسبس يوصى بمارييت

انه يتدخل بين سعيد وبين احد امراء القصر
 ف فرنسا لأنه ناوى يزور مصر
وينقب على اثار يحطها ف الجونينة بتاعته !!
مارييت هيقوم بالمهمة على اكمل وجه
ويسافر مصر مع الامير اللى اغلب الزيارة
هيقعد ف الدهبية ع النيل
ومارييت هيقوم بعدة تنقيبات بموافقة الوالى
ويسافر اسمه ايه على فرنسا .. الامير يعنى
 ويقعد مارييت ف القاهرة شوية




ويقول لروحه وبعدين ؟!!

 ما بدل ما اشتغل لمتحف اللوفر
ما اشتغل عند مصر ؟!!
ويبعت للمتحف يستعفى ويعرض خدماته
على الوالى سعيد اللى ما هيصدق
ويقوله ماشى تعالى
اللوفر يقوله مفيش احسن منك تبعته فرنسا لمصر يشرف على اثارها واحنا موافقين
وسنة 1858 يتعين مارييت
كأول مدير لأدارة الآثار فى مصر






وياخد لقب بك

ومارييت بك هيكون مسئول قصاد سعيد
ويمنح ميزانية 18 ألف فرانك سنوى
 وتعتبر ادارته من الاشغال العامة 
ويا جناب الوالى عاوزين مكان يصلح
يكون متحف للآثار .. قاله عندك بولاق




 اللى كانت ميناء عظيم وغنى بسكانه 

وبحركة التجارة طول عمره




وف ثورة القاهرة التانية
الحى كله اتحرق تقريبا
 وبقى فيه اراضى فاضية كتير 
ملحقتش تتعمر
وكان فيه مخازن تابعة للحكومة 





من جملة المخازن دى كانت فيه مخازن
تخص شركة السفن البخارية
العاملة بين القاهرة واسكندرية
والتى توقفت عن عملها 
بعد افتتاح السكك الحديدية






ف الوقت ذاته اثناء تحويل المخازن دى
لمتحف واعادة تصميمها بشكل مناسب
كانت حملات التنقيب شغالة ف القطر كله
على دونه 
ايوالله على ودننننه
ف سقارة وادفو والاقصر 
واهرامات الجيزة
وعين شمس والقليوبية
وبيساعد مارييت فرنساوية ومصريين
وجمع منها عدد هايل من التحف والتماثيل
والتوابيت




وابتدى تنسيق المعروضات

مع اضافة لمسات فنية
وشوية بشوية بقى المتحف
ينفع ينفتح قصاد الزوار ويتشاف
بعد سنين من النهب والسرقات المقننة




والشهادة هنا من كارتر
 هوارد كارتر
 اللى اكتشف مقبرة توت عنخ امون
 بعد كدا بنصف قرن واكتر
هوه اللى بيقول عن مارييت 
ان مصر
" كان أى حد يمكنه امتلاك اى شىء
من الجعران وحتى المسلة
واذا وقع خلاف ف الرأى مع احدهم
كان المرء يستعمل سلاحه   
ثم وقع التغيير بفضل شخص واحد
الح ف صدور قانون لم ينفذ لسنوات طويلة
وظل حبر على ورق 
لكنه ف النهاية انقذ الكثير 
قام الرجل بمفرده بالاشراف على وادى النيل
 بأكلمه من الدلتا وحتى الشلال التانى
وصار علم المصريات همه الشخصى
الذى لم يكن لأهل البلاد وواليهم
انه اوجست مارييت "



والحقيقة ان المنافسين بسبب سلطة مارييت

واكمنه كان زميل سابق ف النهب
وعارف حيلهم كلها
واللى مربى قرد عارف لعبه
الراجل قدر عليهم حبة حبة 
لكن رجالة الوالى كانوا هما المشكلة الاكبر




ويحكى ان مارييت لقى سنة 1859
 تابوت اياح حتب زوجة الملك سقنن رع
من ملوك الاسرة السابعة عشرة



والمزامزيل مقبرتها كانت ف القرنة

ف الجانب الغربى للأقصر
وفتح التابوت لقى مجوهراتها مطرحها
ومحدش لحق يسرقها.. حلو ؟ 
لا مش حلو !
عشان مدير مديرية قنا اسم الله عليه
هيشوف المجوهرات يقوم لاممها
وحاططها ف صندوق
وقرر يبعتها لسعيد هدية وفوراااا ! 




مارييت اللى مكنش موجود ف موقع الحفر
وقت النهيبة دى لما عرف اتجنن
وحاول يلحق الصندوق قبل ما يوصل القلعة
 لكن مقدرشى 
وبعدين قرر يدخل للوالى ويفهمه القصة
ويقوله المجوهرات دى من حق المتحف
ومصر .. الخ
 سعيد هينكسف على دمه
وياخد جزء م الصندوق ويسيبله الباقى !





وسعيد هينشكح بالحركة دى
ويكرمشله خمسيناية ويديهاله ف ايده
قصدى هيعرض على مارييت فلوس مكافأة 
مارييت هيقوله لأ الأثار كترت
وبقيت محتاج مساحة اوسع لمتحفى
يليق بالآثار فيقوله .. اوك 




وروح يا زمان وتعالى يا زمان
ويوصل اسماعيل الى العرش
ويبقى والى مصر الجديد  
سماعين احبط مارييت ف الاول
بيقول انه كان مش مهتم بالتاريخ
وبيعتبر المومياوت دى جثث موتى
وكان مهتم بالمستقبل وبكرة 
وانه يخلد اسمه واسم عيلته ف مصر 
عن تخليد ذكرى الملوك اللى ماتوا دول 





لكن ف ذات الوقت مكنش عنده مانع
يسمع لمقترحات مارييت
اللى اعتبر متحف بولاق
 واحد من عياله واغلى
 وعشان يبقى تقدمى دعم الحكاية 
بفرمانات عدة
واليكم الفرمان التالى




امر كريم الى مفتش قبلى
" بما ان الآثار الموجودة فى القطر المصرى
 تساعد على تنوير تاريخ البلاد العام 
وتخليد ذكرها بحيث ان رغبتنا العمل
على ان تكون جميع هذه الآثار محفوظة
فى عهدنا فأن من مقتضى ارادتنا
ان تكتبوا بدوريكم الى المديرين
وتنبهوا عليهم تنبيهات مؤكدة
لمنع أى شخص منعا باتا من تحطيم هذه الآثار
 أو اخذ أحجار منها سواء لاستعمالها
فى منشآتهم الخاصة أو فى المبانى الأميرية 
ولترتيب الخفراء اللازمين بالاجرة
فى حالة طلب مصلحة الآثار ذلك "
فى 2 ذى القعدة سنة 1279
21 ابريل سنة 1863
(سجل 526 معية تركى)




وضم اسماعيل الشونة الأميرية
المجاورة للمتحف .. للمتحف
واتعمل حركة تجديدات ودلع واسعة
وبيقولوا متحف بولاق تحديدا عنوانه ومقره
كان ف طريق الكورنيش
ف المنطقة الواقعة بين مبنى التلفزيون
وبين برج وزارة الخارجية حاليا 
وكان بيطل ع النيل مباشرة 




احد زوار المتحف
 وكان مراسل لجريدة فرنسية متخصصة
كتب بالنص عن المتحف وتصميمه الآتى :




" فناءان متصلان يحدان النيل تفصلهما بوابة حديدية الاول تزرع به اشجار جميلة
وهو يضم المقار السكنية



بما فى ذلك مقر مارييت بيه نفسه

وهنا تتمشى بحرية غزالة لطيفة تسمى فينيت
وهى تبحث بلهفة عن اعقاب السيجار
فهى من الملذات المبهجة لها !
وهناك بعض القردة الصغيرة
تلعب فى صحبتها




اما الفناء الثانى 
فهو جزء لا يتجزأ من المتحف
لأنه يحتوى على اثنين من ابو الهول
من الكرنك وثلاثة توابيت رائعة
من البازلت"
انتهى الوصف 



وبيقولوا العمل ف المتحف انتهى
وتم افتتاحه 18 اكتوبر 1863
وكان اول زواره السلطان العثمانى عبعزيز




اللى اسماعيل اتملحسله محلسة السنين 
وعمله شارع بأسمه ف وسط البلد 
عشان يديله الخديوية
ويخلى وراثة العرش ف ابنائه هوه بس




وبيقولوا كمان ان على مبارك
زود مطرح كمان للحديقة عشان المكان يتسع 
ويسمح بوضع التماثيل ذات الحجم الكبير




ويفتح المتحف لكبار الزوار والاجانب
وكمان للغلابة والناس العادية




واسماعيل اللى كان مارييت بيقول
 انه كان مبيحبش يخش قاعة المومياوات
ولا بيخطيش العتبة بتاعتها
كان عامل خطة محترمة 
عشان آل ايه ياكل بيها دماغ اروبا
ويعرف يرستق وضعه .. !
مكنش عارف بقى اللى مستخبيله
وانهم هيبيعوه بعدين 
القصد 
عمل ايه ابو توفيق ؟؟



مارييت ف اطار الترويج لآثار مصر
 ومصر نفسها عرض ع الخديوى يسافروا
بشوية من المعروضات ف متحف بولاق لبرا 
برا فين يا شهرو ؟؟
فرنسا حضرتشك
حيث المعرض الدولى بباريس سنة 1897 




سماعين عجبته الفكرة جدااااا
واتعمل جناح ع الطراز الفرعونى 
وسافر جزء من المعروضات على بلد الجن والملائكة




والمعروضات هبلت الناس




خصوصا مجوهرات الملكة اياح حتب

وتمثال شيخ البلد 



اللى انا كشهروزة سخصياً بحبه جدااا





ومن ضمن اللى اتهبلوا
المخسوفة اوجينى
وطبعا مفيش داعى افكركم
انها ف معزة محمد على عندى كدا
بالضبببببط 




وقالك امبراطورة ونيلة دا البت يا خويا
بدل ما تحترم نفسها وتعمل شبعانة
وعينها مليانة لما شافت شوية مجوهرات
اتشعلقت ف دارع الخديوى 
وقالتله اخدهم يا ابو توفيق
وراحت مسبلّة ومبربشة 
ومطبقة شغل الحريم الفرنصاوى
 اللى انتوا عارفينه
مستغلة بهذا ضعف ابو توفيق قصادها
#جاتها_وكسة
وابو السباع هل بت ما يرفضلها طلب .. ؟ ابضنننن
لكن بحركة صياعة ومعلمة قالها انا موافق
بس لازم تاخدى موافقة 
" رجل أقوى منى فى بولاق "!
وقالها بالبلدى كدا 
خدى موافقة مارييت تبقى المشكلة اتحلت
رمى الكرة ف ملعب مارييت
وطبعا كان عارف كان عارف
انه لما بسلامتها بعتت احدى المقربات م
نها لمارييت عشان تطلب الحاجة ... ايه؟




مارييت طرقلها طبعا !!!
 وقالها لأ بالثُلث
وانتوا ترضوا ناخد مقتنيات من اللوفر؟
وليه متحف بولاق
يتعامل غير كل متاحف العالم ؟!!
واداها واحدة نو فرنساوى معتبرة 



بس يا سيدى ورجعت التحف كلها 

الى بولاق بألف سلامة 
والخديوى مبسوط ومنشكح




 ويستعين اسماعيل بمهارات مارييت

اثناء استعداده لافتتاح قناة السويس






وترجع مواهب الحاج ماريو القديمة
ف تأليف الروايات والرسم
وتصميم الملابس .. الخ 





ويكتب قصة عايدة اللى تتحول لاوبرا 
من وحى التاريخ المصرى القديم 
اللى بيعشقه 




وصحيح ميلحقوش يخلصوها 
فمتتعرضش وقت افتتاح القناة
لكن بعدين تتعرض 
وتنجح وتعيش لحد ما تبقى 
من كلاسيكات الاوبرا ف العالم  





وينال مارييت رضا أفندينا
ويحققله رغباته
وطلباته ف تحسين حال متحف بولاق
واليكم لفرمان جديد 
امر كريم الى محافظة مصر :
" حيث اننا امرنا جران بك بأعمال التعميرات
 الضرورية اللازمة لأنتقخانة بولاق
التى تبلغ مصاريفها سبعة الآف وخمسماية فرنك
 فيقتضى صرف قيمة ذلك من المحافظة
طرفكم بالمخابرة مع البك المومى اليه 
وأصدرنا امرنا هذا لكم لتعلموه وتجروا
مقتضاه كما هو مطلوبنا"
 فى 29 رمضان سنة 1291
 9 نوفمبر سنة 1874
(سجل 2 أوامر عربية)



وييجى الفيضان ف سنة 1878 م

ويكون عالى عن كل وقت فات
المتحف يغرق ومارييت يطلب من افندينا
مبنى جديد بعيد عن النيل ومشاكله 



الخديوى دماغه مكنتش رايقة بالمرة
 لأنه كان خلاص ف قعر قعر المشاكل
والانجليز والفرنساوية عاملين روبطية
وباعتين يفتشوله ف الدفاتر ويغرقوه اكتر!



سماعين حاول يصعد للقاع بأى شكل
لكنه فشل ف النهاية وخلعوه
وجابوا توفيق ابنه بوز القرد وش النكد 
والواد قعد ع الكرسى 
وبقى كل همه ميزعلش اسياده
ف اروبا ليخلعوه زى بابا
قوم الغضب اندلع ف الجيش 
وقامت الثورة العرابية وأيدها الشعب 
ودخل الانجليز مصر بعد شوية صغيرة




مارييت جاتله اوامر من السادة الجدد للبلاد
بضغط النفقات جدااا
وقالوله تعمل ميزانية معرفش ايه
وحسابات ابصر ايه  
ومراجعات مدرك ايه
وتروح فين ومتروحش فين
وقوم امسحلنا الشقة
واعملنا نوم العازب .. #ياختشىىىىىى
قرف القرف 




الراجل ورم منهم
وقضى شهوره الاخيرة ف ترتيب المتحف ومحاولة اعادته لشكله قبل الفيضان والبهدلة وعاوزاكم تسمعوا وصف
احد الدبلوماسيين لمارييت كان ازاى
"انه رجل قوى البنيان عريض المنكبين
يمكن القول انه طاعن فى السن
 اكثر من كونه مسناً يتمتع بجسم رياضى
كأنه قد من كتلة كتلك الأشياء الضخمة
التى كان يشاهدها
وكان وجهه الذى ينطق بالصحة
به تعبير حالم حزين
يمكن ان يعتبره من يشاهده
 من الباشوات الاتراك 
حين كان احد الزائرين يعبر الحديقة
كان هذا المالك يقطب جبينه بغضب وعجرفة
 واعتاد ان يتتبع ذلك الشخص المتطفل
وكأنه عاشق يرى شخصا غريبا
يدخل بيت محبوبته
او كأنه كاهن يرى شخصا غير مؤمن
يدخل المعبد " 
:)





القصد 
قعدوا يقرفوا ف الجدع العاشق الغيور
 على اثارنا اكتر منا





لحد ما مات ف 18 يناير1881
واتعمله جنازة رسمية




واندفن ف حديقة متحف بولاق
واتاخد قرار بأن المتحف لو اتنقل
ف أى مكان اخر هينقلوا رفات مارييت معاه
كأقل واجب يعنى




ومات الجدع ومسك بعده ماسبيرو 
وعملوا محاولات لانقاذ المتحف
وتعلية الارض عشان ميغرقش
كل مرة النيل يفيض بشدة
وبعدين قالوا مينفعشى خلاص 
ولازم مكان جديد
وهنسمع دلوقتى ولأول مرة عن
 متحف الجيزة




اللى كان ف الأصل قصر صغير
اتبنى ف عهد الوالى سعيد
وبعدين ؟؟
جه اسماعيل وقرر يشترى القصر بالأرض
من طوسون بن سعيد
اشتراه وضمله اراضى
وبقى القصر مقام ع الحتة
من عند جنينة الحيوانات دلوقتى 
لحد ميدان الجيزة 
واسماعيل اشترى اراضى 
لحد النيل 




القصر كان تحفة بمعنى كلمة تحفة
 كان بيشغل مساحة 30 فدان
اسماعيل هد القصر القديم وبنى سراية
وفرشها على ذوقه العالى 
وجاب متخصصين ف تنسيق الحدايق
وجنب الشجر النادر والزهور
واكشاك الجلوس المتميزة
كان القصر بما حوله بهجة للناظرين بحق




وتقريبا كدا هوه هد القصر القديم



وعمل واحد جديد تمامااااا

ويكفى اقولكم انه تكلف وقتها
مليون و393 الف و74 جنيه




بينما قصر عابدين بجلالة قدره
اتكلف 665 الف و570 جنيه !!!
فيعنى لكم ان تتخيلوا المنظر




المهم قرروا ينقلوا الآثار لسراى الجيزة 






سنة 1890 هينقل المتحف 
من بولاق للجيزة 




وتملى الأثار 90 اوضة منه
وبعد شوية القصر تتداعى حتت منه 
#مقاولين_حرامية_يوك 
فيصدر قرار بأن يتم هدمه
ونقل قطع منه - القصر- لعدة اماكن
طب والآثار يا اخواننا ؟!!!!




الحقيقة ان عباس حلمى التانى
هيوصل للحكم بعد موت ابوه توفيق
ابو العبابيس هييجى ف اول ابريل 1897
ويحط حجر الأساس لبناء الانتكخانة الجديدة
بميدان الأسماعيلية




وبيقولوا الخديوى حط شوية حاجات
ف صندوق
ايه ؟؟؟
هيعمل عمل للمتحف دا ولا ايه ؟؟؟
حط ايه سيادته ف الصندوق ؟؟
قالك
" بعض المواد التذكارية منها وسام من النحاس 
وبعض العملات المصرية المستخدمة انذاك 
ونسخا من الجرائد العربية 
والأفرنجية الصادرة فى مصر وقتها "
ايوه صح قولنا
هوه عمل عشان العكوسات يا عيال 




اتعملت مسابقة عالمية فاز فيها
 المشروع الذى تقدم به الأخ الفرنسى
مارسيل ديروين 





وبدأ العمل








على قدم وساق









والناس الصراحة اجتهدت





وخلصت ف وقت قصير 
من 1897 - 1902



وينقلوا الآثار من متحف الجيزة 
ويرصوها ف القاعات 





الأحجار والتوابيت 
والقطع الكبيرة ف اول دور 




والدور التانى
 للحاجات الخفيفة والمومياوات .. الخ




ويبعتوا لأفندينا

عشان ييجى يفتتح بقى 




بس لما الأول يحطوا التتش النهائى
 ف شوية حاجات




اولهم
السور اللى حوالين المتحف 



واللى هيبعتوا يجيبوه من سراى الجيزة
 اللى هتتهد 1903




وعاوزين يكرموا مارييت الجميل
وكانت الفكرة انه يتحط تمثال
 لمصرى قديم زى الصورة الموضحة ادناه 




وبعدين قالوا 
لأ 






نعمل تمثال لمارييت نفسه 

  

وهيبعتوا ينقلوا رفات مارييت

عشان يسكن جنب الآثار اللى اداها الكثير
 على ضريح من رخام أبيض وجرانيت



وييجى افندينا فعلا 
ف حفل بهيج يفتتح المطرح





والناس امعنت ف وصف قاعات
المتحف الجديد وامكانياته





 لكن محدش قال اتكلف كام بالضبط #للأسف 



لكن الاكيد انه





كان على مساحة 12 ألف متر




ومقتنياته بمرور السنين
عدت ال150 ألف قطعة




وسافروا ببعضها للخارج 
عشان العالم كله يتفرج  



والقطع فضلت تتكدس ف القاعات والمخازن
وتزحم المكان لحد المتخصصين
ما قالوا جااااااااى



انقلونا من هنا

واعملوا متحف اكبر يا جماعة !! 




وقع ف ايدى مقالة لهنرى راغب
احد مديرى المتحف المصرى عبر تاريخه
بيطلب ان المتحف يتوسع
او يتنقل
عشام معروضاته تظهر بشكل اشيك
واحدث زى باقى متاحف العالم
سنة كام يا شوشو المقالة دى ... ؟؟
1974







المهم ... محدش يهتم ولا يدفع
لحد ما سنة 2002
الحرامى وامه عارفة انه حرامى
موبارك الـ مع الاعتذار للكلب
اصدر قرار بانشاء متحف جديد ف طريق الفيوم
بعد ما شحت اكتر من نص تمنه 
من اليابان الشكيك
 وطبعا دا تمهيدا لنقل الآثار لهناك
وسرقة اكبر عدد منها ف السكة اكيد يعنى 
#مفهومة
و كفاية نور زاهى نخاس علينا وشكرا 




القصد المتحف الجديد
المفروض يفتتح 2015
وف ظل اللى بيحصل من سرقات 
واهمال ودقن توت غنخ امون 
وشيل المومياء زى ما يكون جريح حرب ..الخ 
اما نشوف اخرتها  




واخيرا انا تقريبااااا خلصت

وفاضل كام ملحوظة
واستحملونى والنبى انا زى والدتكم يعنى



اول ملحوظة واهم ملحوظة
فكرونى الثورة الجاية نعرف مين
اللى اختار لون بياض المتحف الشفتشى
 بتاع اوضة نوم العروسة دا
عشان نسأله هو والسادة المسئوليييييين 




بقى دا لون تقابلوا بيه ربنا ؟
هوه مفيش رحمة
مفيش انسانية
مفيش نتفة ذوق
مفيش أى دم 
مفيش مراعاة لنظرنا اللى ضاع طيب ؟!!



المؤسف انهم ف مرحلة ما 
دهنوه بالأصفر ... 
يا جماعة هوه انتوا معندكوش اخوات بنات ؟!!




كان ماله لونه القديم
لون الحجر نفسه ومتشكرين قوى
 ليه كدا التشويه دا ؟
اعرفولنا اسمه عشان نطخه بالنار
#بس_بقول




تانى ملحوظة 
انا كشهرو بحب الباب بتاع المتحف جدااا






وبحب شكل آثارنا ف الصور والكروت البوستال 
ونفسى ف العرض تبقى بنفس البهجة 
تتحط ف اضاءة مناسبة وجو مناسب 
مش المنظر الحالى 




تالت ملحوظة بقى
نعتب على اللى بيتاجر ف اثارنا برا ليه
واحنا الحرامية من جو دارنا ؟؟
لما بلاقى حد بيصرخ ويقول الحقوا 
قلبى بيوجعنى عليه وابقى عاوزة اقوله
لا حياة لمن تنادى
طول ما فيه حكام زى محمد على وسلساله
همه التكويش وبس
مفيش فايدة 





مارييت اللى مات بلقب باشا اخده 
عن استحقاق من الخديوى اسماعيل 
وعموله حفل تأبين مفتخر
سنة 1890





ف قصر الجيزة
وبعدين حطوا اسمه على الشارع 
المواجه للمتحف المصرى 
 لكن متهيألى ان تكريمه الحقيقى
كان وجوده جنب المتحف




والاجمل العبارة اللى كتبت على قبره 

"مارييت باشا : عرفانا من مصر "




الراجل اشتغل سبع صنايع

وأدى للبلد اكتر ما اللى حكموها عملوا 
وبالعكس دول اخدو منها وباعوها 
وهوه وأى حد عدى على مصر واخلصلها
 ينطبق عليه مقولة نجيب محفوظ التى لا تخيب أبدا
 "المصرى هو من يحب مصر" 






ملحوظة كمان
طريقة العرض ف المتحف بائسة بؤس السنين
لو مكنتش تعرف أى معلومات
او معاك مرشد هتزهق بعد ربع ساعة لف #حقيقة 









موقع المتحف ف ميدان التحرير
 ميدان السادات - ميدان الأسماعيلية سابقا
 خلاه بيظهر ف الكروت البوستال والصور دايما 





شايفين كم الخضرة يا عيال 
لحظة ابكى 




واختيار موقعه يقولك قد ايه الناس دى
كانت بتشتغل بضمير
اختارت حتة ولا اقرب
من وسط البلد وحتى القاهرة الفاطمية




حتة يروحها أى حد ويعرف يوصلها




مش اللى رايح يرميه ف اول طريق صحراوى
 وبيتلكك بالمساحة




وبمناسبة المساحة ومبنى الحزِن الوطنى اللى هيهدوه
وبيستميتوا ولن يسمعوا لأى كلام
ومستغربين قوى ليه الأصرار
بكرة هنعرف هوه مين لما ياخد الارض
ويبنى عليها ساعتها هنعرف مقدار قوته
وازاى ضغط كدا عالله ميكونش الجيش !!




   


المتحف بالأبيض والأسود 




متحف الجيزة بعد هدمه اتنقل سقفه لقصر عابدين
 وجزء من السور 
وجزء تانى راح للمتحف المصرى



اما الارض أغلبها بقت تبع 
 جنينة الحيوانات 





وبيقولوا ان الأرض اللى فيها زلط دى 
ف الجنينة




 هيا من بقايا القصر القديم #هاحييييح



متحف بولاق وفحص مومياء تم اكتشافها 
ف عهد الخديوى توفيق




عمر الشريف يا عيال 
وليلة ف المتحف 
:)




المتحف عندى 
زمان وانا عيلة 
الفسحة والفرجة والانبهار 
لما كنت بشوفه انضف واوسع !



المتحف حتة من ايام يناير 




المتحف وليلة محاولة حرقه 
المتحف ولقطة دخول الجمال والحصنة 
يوم موقعة الجمل 





المتحف وكشوف العذرية 
واول لطمة بدرى بدرى من العسكر 
المتحف وكاميراته اللى طمسوا تسجيلاتها 
زى ما طمسوا كل حاجة نضيفة حاولت الثورة تعملها 
المتحف وكل شهيد بتخيله 
وهوه بيتلقى رصاصة وبيموت جنبه 
حكاية المتحف اهداء له ولكل حد نفع البلد دى 
ومحدش قدره كفاية 




واخيرا 
مصادر القصة النهاردة كانت من الآتى
 1) اوربا والاثار المصرية
 * بيتر فرانس
2) الاصول التاريخية لمؤسسات الدولة
 والمرافق العامة لمدينة القاهرة
*فتحى حافظ الحديدى
3) مصر فى عهدى عباس وسعيد
*زين الدين شمس الدين نجم
 4) اسماعيل كما تصوره الوثاق الرسمية
 *جورج جندى بك
5) وجه مدينة القاهرة من ولاية محمد على
 حتى نهاية حكم اسماعيل
*محمد حسام الدين اسماعيل





واخيرا يا عيال سؤال المشاهدين ف المنازل
 بيقولوا ان المتحف المصرى ف ميدان التحرير
هو اول بناء ف العالم ينشىء خصيصا
عشان يكون متحف اذ انه
جرت العادة قبل هذا التاريخ ان المتاحف
كانت بتبقى قصور وسرايات وتتأيف
وتبقى متحف بينما متحفنا احنا كان الألفة
فما حقيقة هذا القول أفيدونا


وتوتة توتة
 تصبحوا على ألف خير


----------------------


E ‏@lollita91 
 لا هو كان قايل انه عاوز يخلصنا من المماليك
وانه مبيعاديش السلطان العثماني :)


memento mori ‏@MDamarani 
 ابو بلاش كتر منه


Arminuis ‏@amrsaleh88 
 اراها آثار امك يا محمد


zz ال مُريدْ zz ‏@ahmed_alkashif   
 في كتاب اسمه نهب آثار وادي النيل في العجب العجاب
 بخصوص التنقيب و السرقة ال حصلت
 في شخص اسمه بلزوني كان من اشهر ناهبي الاثار
ف العصر دا الكتاب تقريبا اغلبه بيحكي عنه
وعن سرقاته المقننة بفرمان الوالي

zz ال مُريدْ zz ‏@ahmed_alkashif 
 سقن رع دا جد احمس قاهر الهكسوس


Heba ‏@HappyGeddan  
روحت اللوفر لقيت معبد كامل هناك


Kozba ‏@AhmadKozba  
 يعني الراجل الخواجة غيران علي آثارنا أكتر من الخديوى

Heba ‏@HappyGeddan
 حالم حزين !
دا شكلة مرعب

Kozba ‏@AhmadKozba  
 تحسيه مبني من الماضي الشيوعي الغابر



 بمليم واحد عقل يارب ‏@MunaElMasriya 
 انا بحب اللون ده ف المتحف
 وع فكرة مباني العصر الشيوعي لا لون لها
 ولا طعم ولا رائحة ولا اي شئ

Ibrahim Mohamed@Ebrahim_Muhamed 
هو لون المينى باشوفه فى متاحف كتير اوى بره
بس القبه البينك دى  مشكله
و لا دا خداع بصر، متحف موسكو الحربى 


 بمليم واحد عقل يارب ‏@MunaElMasriya  
زمان كنت كل ماشوف اثارنا ف متحف ف اوروبا اتقهر
عشان "سرقوها" دلوقتي 
بقول ياريت كانو"سرقو" الباقي
بيحافظو عليها ويدرسوها


 WTHend ‏@HendZayed  
انا بزعل قوى من إزاز السقف المكسر
 والمترب بشكل بشع!
ونرجع نقول فين فلوس الصيانة
وفين الكرش اللي بيبلع الكرش



 بمليم واحد عقل يارب ‏@MunaElMasriya   
 طب يعملو بداله حديقة عشان الناس تتنفس
بس طبعا "اشتراه" بيه 
هايرفعه برج ومول ويكسب ألماظ


 ahmed zain ‏@ahmedzain82    
 احنا كنا بنلزق في اي مرشد معاه جروب
وكان اوقات بيبصلنا بقرف
 وكاننا هناخد منه سبوبه بس كنا بنرخم
 ومنمشيش لغاية منعرف
 والظابط الوحيد النضيف اللي قابلته فحياتى
 كان فالمتحف كنا لسه طلبه وممعناش فلوس
وكنا عايزين نشوف توت والموميات جينا
 ندخل منعونا شافنا واقفين بنطلع فلوس بنعدها
علشان نشوف التذكره قالنا واقفين ليه كده
قولناله زعل وقالنا دا حقكم ودخلنا ببلاش



هناك تعليقان (2):

Related Posts Plugin for WordPress, Blogger...
"حقوق الملكية والملوخية والمهلبية ... الخ
محفوظة للست شهرزاد وإياك حد يسرقها ويحاول يزعلها آغجر .. مفهوم ؟ "