السبت، 15 أغسطس، 2015

مـوســى الـوالــى والكراهــة ف الأركــــان





الحكاية الليلة دى عباسية
 :)
 ف زمن العباسيين يعنى
وفيها ثورة .. وولاة .. وخلفاء بذات نفسيتهم
 آه .. احنا حلوين قوى مش أى كلام 




وقالك ايه يا سيدى 
وفلاش باك لورا شوية
 آل لما قرر عمرو بن العاص يطلعها ف دماغ الخليفة
 عمر بن الخطاب وأقنعه يفتح مصر .. فوافق
وفعلا يدخل عمرو مصر ويستف اموره
وينجح ف السيطرة عليها ويستقر ويبنى الفسطاط
عشان تبقى اولى العواصم الأسلامية لمصر
ويبقى الأمير
 حلو ؟



 لا مش حلو ... عشان الخلافة الراشدة يا نضرى
مش هتقعد كتير وهوبا ينقتل 3 خلفاء من مجموع 4
وييجى معاوية على أسنة رماح 
وسيوف الدم يقطر منها
ويحكم بن أبى سفيان بالحديد والنار
ويورث "الخلافة" لأولاده واحفاده
وعلى الباغى تدور الدوائر
وف لحظة فارقة من عمر الزمن
يظهر ابو العباس الملقب بـ "السفاح"
عشان يقضى على حكم الأمويين ويوريهم الهنا كله !




الشهادة لله
 السفاح كان اسم على مسمى
 الجدع مسبش حد تبع الأمويين كبير ولا صغير
 الا ومرمطه وعبث بقبور الأموات منهم كمان !
القصد .. دخلنا ف حقبة زمنية جديدة
وغالبا من بدايتها كدا باينة انها سودة .. وشكرا
قوم ايه ؟؟ 
مصر كالعادة كانت اقطاعية لمن يحكم ويورث





وزى ما عدى عليها ولاة مبعوتين
من قبل الخليفة الراشدى .. أو الخليفة الاموى
 اتبعتلها كمان ولاة من الخليفة العباسى
وف الغالب اللى كان بيتجوز امى ى ى ى
بنقوله يا عمى
 اللى كان بييجى يحكم نقوله آمين
 فيما عدا حالات .. مكنش ينفع يتقالها كدا
 زى قصة النهاردة




المؤرخين اتفقوا ان مصر ف عهد العباسيين
 ف مدة تعدى الـ 100 سنة وشوية فكة
عدى عليها ولاة ياماااااا يا إيسامة
اسامى كتير وكل واحد ييجى ميلحقش يقعد !
ليه يا شهروزة كانوا حاطين ف الكرسى مسامير
 ولا الجاى كان دايما بيشتكى م البواسير ؟؟
 لأ الحقيقة انه الخليفة 
أى كان مين
 كان عنده عرف متبع وميسلاهوش
انه ميقعدش حد ع الكرسى مدة طويلة ليستريح
وينجعص فيه وميعرفش يقومه !!؟؟
 فكان غالبا يبعته يظبط مصيبة او حاجة
اول ما يحصل المراد 
 يروح شايله علطول !!
فيما عدا الناس اللى ماتت بقى قبل ما تنعزل
وكانوا قلة قليلة مندسة الغالبية مشيت
 ومنهم اللى كان بيستعجب لأنه معملش حاجة ... ؟!
بس اهو غلاسة كدا




المهم .. الولاة دول 
كانوا بينفذوا سياسات الدولة
اللى غالبا كانت مستبدة وفقط
فهل بت ما الشعب المصرى كان بينحكم وساكت ؟
 لأ طبعا
كان ف أوقات كتير بيثور ويقوم ع الوالى
 واللى يتشددله كمان !!
تقصدى مين يا شوشو بلى " يتشددله" دى ؟؟؟
 أقصد الخليفة نفسه 
آه ولا يهمنى




سنة 784 م كان والى مصر
 الموفد من الخليفة العباسى هو :
إبراهيم بن صالح بن عبد الله بن العباس
والراجل كان ماشى كويس 
لحد ما طلعله خازوق مغرّى
كان ايه الخازوق دا يا شهروزة ؟؟
 دا يبقى الأستاذ المبجل :
دحية بن المعصب بن الأصبغ بن عبد العزيز بن مروان
 وركزوا ف الأسم كويس جدااااا




عشان دحية دا يبقى حفيد الأصبغ
 ابن عبدالعزيز بن مروان
اللى مسك ولاية مصر ف عهد الامويين
 أبو الخليفة .. عمر بن عبد العزيز
دحية قرر فجأة يثور ويجمع أنصاره
وقال مصر دى تاعتى أنا وأنا الاولى بيها من أى حد
 ولو كان الخليفة العباسى نفسه !
 بس كدا والموضوع كبر يا جماعة




ساعتها كان الخليفة العباسى .. المهدى
 طبعا وصله الكلام والتحدى
قام ومقعدشى وبعت لواليه ف مصر
 وقاله تجيبلى رقبته الولد دا فوراااااا
إبراهيم بن صالح متعرفوش ماله
مكنش واخد دحية بجدية
والاخ سليل الامويين لم الأتباع
وبيقولوا انه ملك الصعيد كله تقريبا 
فالمهدى اتشال واتهبد
وقرر يعزل ابراهيم بن صالح اللى تراخى
 لحد الامور ما وصلت لهذا الحد
 وراح باصص ف وسط رجالته لقى واحد اسمه
 موسى بن مصعب الخثعمى
 ماله بقى ؟



سى موسى كان ماسك الموصل
والمهدى مبسوط من شغله قام ندهه
وقاله تنزل على مصر وهتبقى واليها
ولملى دحية دا والعيال اللى معاه .. وكدهون
موسى مخدش وقت كتير وطيراااان على مصر
 والكندى ف (ولاة مصر) اللى بيقول
 " ثم وليها موسى بن مصعب،
 من قبل المهدي ،على صلاتها وخراجها"



ولما وصل عرف ان ابراهيم الوالى السابق
 خد ف وشه ومشى
برستيجه ناقح عليه الظاهر ولا ايه ؟!!
راح باعت رجالته جابوه من الطريق 
ورجعوه تانى !
ليه ؟
عشان يقلبه ويطلع المستخبى طبعاااا
" وكان المهدي قد أمره بإصفاء أموال إبراهيم
وأخذ عماله. فإستخرج منهم ثلاث مئة ألف دينار"
وكمان ..
" ولم يزل إبراهيم مقيماً بمصر حتى لم يبق
 له عامل إلا صار في يدي موسى بن مصعب
 ثم كتب المهدي يأذن لإبراهيم في الانصراف إلى بغداد"
الصياعة أدب برضو الاول اخدوا منه كل حاجة
يقدر يمشى بيها ثم رستقوا امورهم مع رجالته
 وبعدين سابوه
وقالوله ... 





وبس دخل موسى بن مصعب على دار الامارة
ف مدينة ... العسكر 
تانى العواصم الأسلامية لمصر
والراجل يا خويا متعرفوش جاى كارهنا ليه ؟؟؟؟
يعنى بدل ما يخش علينا بسلامو عليكو وازيكم
 وانا عهدى هيكون فاتحة خير ان شاء الله
 عمل العكس تماما
وبن تغرى بردى ف النجوم الزاهرة اللى بيقول
"وجعل على شرطته عسامة بن عمرو
وأخذ موسى في أيام إمرته
 على مصر يتشدد على الناس
 في استخراج الخراج
 وزاد على كل فدان ضعف ما كان أولا "




ومش بس اخد الضعف 
دا نكد ع الناس بالكوم 
"ولقي الناس منه شدائد وساءت سيرته
وارتشى في الأحكام " 
وايه كمان اتحفنا يا عم تغرى ؟؟
" ثم رتب دراهم على أهل الأسواق وعلى الدواب "
يا لهوى
مخدش ضرايب كمان ع الطير ف السما
والسمك ف النيل بالمرة ؟!!! 




بس والشعب ضج منه ومن قرفه
 الشعب بس يا شهرو ؟؟
 لأ والجند كمان !
 " فكرهه الجند وتشغبوا عليه ونابذوه " 
تغرى اللى بيقول ما الكندى بقى بيقول
 "وأظهر الجند لموسى الكراهة والشنآن "
الراجل عمل كراهة ف الأركان على رأى شفيق يا رااااجل
والشنآن دى بعيد عنكم كدا يعنى البغضاء والحقد
وموسى مش حلو يا ام موسى .. #ليه كدا ؟
يعنى جاى ف ايه حضرتشك ؟
 لا هو انتا جاى تحارب دحية سليل الامويين
ولا جاى تنكد على اللى جابونا احنا ؟؟



 القصد دحية هيستغل الموقف احسن استغلال طبعا
الوالى الجديد مكروه من اول شهر
والعساكر شايلين ف قلبهم منه
ودخل ع الخط قبايل عربية
كان جت ظماااااان من شبه الجزيرة واليمن
 اسمهم القيسية واليمانية
القبائل دى جت جزء مع الفتح العربى
وجزء بعده والقيسية تحديدا جم ف زمن الامويين
وولائهم الكبير لهم
وكانوا طول الوقت ف خناقات مع العباسيين ف مصر
وجاتلهم الفرصة عشان يعملوا منظر 
قوم كلهم عملوا قعر مجلس
 واتفقوا جمعاااااااء انهم يقفوا قصاد والى الخليفة
والخليفة نفسه
ويحصلوا على استقلالهم 
وعندهم وريث جاهز اموى مأصل



أبو المقاريز .. المقريزى زكريا بيقول :
 " وثارت قيس واليمانية وكاتبوا أهل الفسطاط
 فاتفقوا عليه "
آه عملوا روبطية 
 واخدوا عهد من الجند بمساعدتهم ع الوغد دا
وبعتوا للأخ دحية ف الصعيد يطمنوه
 ان الأمور تمام واحنا معاك يا حاج
الراجل مفكرش كتير وخد بعضه وجيشه
 وراح ع الحوف الشرقى وتمركز




الحوف الشرقى دا ايه يا شهرو ؟؟
 دا حضرتك لما تركب اتوبيس شرق الدلتا
 يبقى هوه المنطقة بين الأرض الزراعية في الدلتا
وشبه جزيرة سيناء
واللى هيا دلوقتى الحتة اللى فيها محافظات الشرقية
والدقهلية والقليوبية والسويس
والإسماعيلية وبورسعيد
القصد
راح دحية ف الحوف الشرقى وقعد وتحصن
وسانده الشعب ف ثورته


موسى بن مصعب وصله الخبر
منظره بقى ويحش قوى يا ثامح 
وقرر يتحرك لملاقاة الخصم !
وراح منادى واحد من قواده
واداله 5 الآف نفر وبعته الشرقية
يا دوب وصل هناك كان دحية عدى النيل للغربية
واحتل اكتر من مكان هناك .. !
الخليفة المهدى وصلته الاخبار
 راح مبعتر كرامة موسى بن مصعب
 وقاله بتعمل ايه عندك اطلع بنفسك على راس الجيش
 وهاتلى راس دحية دا وإلا ... !



موسى لم عساكره واللى قدر يجمعه
واخد بعضه واللى معاه ونزلوا على حتة ف الحوف
بيكتبوها .. الغيراء او الغريراء 
الأتنين شغالين ... وحاولت الاقى مكانها ع الخريطة 
لم أتمكن الحقيقة !!!
طب ودحية ؟
الكندى هيحكى اهو من طقطق لسلامو عليكو
 "ومضى موسى بن مصعب في جند مصر كلهم ،
وفيه وجوه الناس. فساروا حتى نزلوا الغُيراء
وأقبل إليهم أهل الحوف يمنها وقيسها فلما اصطفوا
ونشبت بينهم الحرب، انهزم أهل مصر بأجمعهم
 وأسلموا موسى ابن مصعب" 



" اهل مصر" 
هنا معناها الجند اللى جم مع موسى الوالى
 واللى تقاعسوا عن نصرته
وسابوه يحارب مع نفسه
وتقريبا كدا سلموه تسليم أهالى ... حرفيا
"فبقي في طائفة يسيرة ممن كان قدم بهم
فلم يثبت معه أحد من أهل مصر
 إلا خالد بن يزيد بن إسماعيل التجيبي
وكان صاحب أمره والمستولي عليه"
وبس يا شوشو خلاص أسروا الوالى ودراعه اليمين
وسلموه لدحية اللى أكيد هيساوم بيه
 او يعمل بيه أى مصلحة وكدا ؟؟
 أبضننننننننن
 انتم ناس طيبين قوى





دول بيقولوا انهم .. القيسية واليمانية يعنى
 اخدوه وواحد فيهم قتله هوه والتجيبى مساعده
 وسط مباركة من الجميع زعماء ومشايخ ومقاتلين  
اللطيف بقى ف الحدوتة ان جيش موسى الوالى
 لما رجع .. جالهم حالة خرس عجيبة
 " وعاد أهل مصر إلى الفسطاط لم يُكلم منهم أحد"
 سبحان الله 
جالهم احتيكان ف الزور جماعى  !!
الناس تسألهم فين موسى وايه اللى حصله 
يعملوا من بنها !!
 تغرى بردى بيحكى
"ولم يتكلم أحد من أهل مصر لأجله كلمة واحدة "
طب يا ولاد محدش أنقذه ؟
 محدش اتوسطله ؟
محدش قال ندفع فدية ؟
محدش قال صلوا ع النبى ونتفاوض ؟
واستهدوا لحد ما نلاقى حل والخليفة يتدخل ؟
 أى حاجة ؟؟؟!
 أبضنننننن
الناس ما صدقت اصلا .. وخلصوا منه
 بعد ما حكم مصر 10 شهور ورى فيها الشعب
 الهنا أشكال وألوان لدرجة ان تغرى بردى 
قال عنه ...
" وكان موسى هذا من شر ملوك مصر 
كان ظالمًا غاشمًا "





الليث بن سعد من اشهر فقهاء مصر
 وفكرونا نحكى عنه مرة يا ولاد
كان بيحضر صلاة الجمعة مرة
وكان موسى بيطلع المنبر 
ويمسك الميكرفون ويديها بقى !!
ويبقى ظالم الناس ومبهدلهم ومطلع عينيهم
 وفجأة بكل براءة يخطب
ويقول هذه الآية : 
(إنّا أعْتَدْنَا لِلظّالمِينَ نَاراً أحَاطَ بِهِمْ سُرَادُِقُهَا)
الليث بن سعد لحظتها مقدرش يمسك روحه
 وراح قايل بصوت اتسمع للجالسين
 " اللهم لا تقه منها "
 :)



وَلَكِنّ أهْلَ الحَوْفِ للهِ فِيهِمِ
 ذَخائِرُ إنْ لا يُنْفِدِ الدّهرُ تُعرَفِ
..............
دا بيت قيل ف مديح أهل الحوف
 والشجاعة اللى أظهروها ف القتال





قصره ...
طيب احنا كدا خلصنا من بوز الاخص دا
ومن شره 
ورمينا وراه ألف قُلة 
ومبسوطين وفرحانين وشاكرين مهللين
 هل بت ما الخليفة المهدى هينشكح زينا كدا
 ولا هيزعل يا ترى؟؟




لأ طبعا دول هيبلغوه
 ان واليه ف مصر شخصيااااا انقتل
 فيقعد يزعق ويهدد ويقول
" ولأفعلن بأهل الحوف كذا وكذا"
ويقول





 المهدى هيسيب ممتلكاته تروح 
والمصررين يبعتروا كرامته 
ويتقال فيهم شعر كمان ... !!!
لأ طبعا 
هيبعت أمر بتولية
عسامة بن عمرو المعافري
 اللى كان ماسك الشرطة ف زمن المخسوف
يعنى وزير داخليته بقى الوالى وتخيلوا بقى
عسامة كان داهية .. لم تعابينه
ومحبش يبقى ف الواجهة فقرر يبعت بكار أخوه
 يبقى ف وش المدفع بداله !
 دحية بقى ع الطرف الآخر قرر ميسكتشى
وقرر بما ان الانتصار حليفهم انه يبعت واحد
من حلفائه اسمه .. يوسف
وامره يمشى من الشرقية للفسطاط
آه نخش الفسطاط وبعدها العسكر .. وماله ؟



وبكار الموفد من .. عسامة الوالى الجديد
 ويوسف الموفد من .. دحية وريث الامويين
 يتقابلوا الاتنين ف الطريق 
ويقرروا يتواجهوا راجل لراجل !
كان اقتراح يوسف الحقيقة اللى قال لبكار :
 " ابرز إليّ وأبرز إليك 
فأينا قتل صاحبه كان الفتح له"
 الجوز وافقوا
عشان يحقنوا الدماء .. طب #اخلاق والله




ويظهر هنا السؤال التاريخى
 مين اللى بج بطن التانى الاول .. رشا ولاّ وائل ؟؟ 
لأنه هذا ما قيل :
 " فبرز بكار، فوضع يوسف الرمح في خاصرته،
ووضع بكار الرمح في خاصرة يوسف
فقتل يوسف بكاراً، وقتل بكار يوسف" 
#ياحللولى
بس يا سيدى وقالك ايه ؟؟؟
" ورجع الفلّ من الجيشين جمعاء"
 لا حد انتصر ولا انهزم
 قوم ايه ؟؟
وصل الخبر للمهدى اللى عزل عسامة
بعد 3 شهور ولاية بس 
وبعت والى جديد فورااا .. اسمه
الفضل بن صالح بن عليّ بن عبد الله بن عباس
والجدع كان وشه حلو يا دوب
وصل بالجيش مصر كان الخليفة المهدى مات
 :)




ومسك بعده موسى الهادى
اللى بعت امدادات للفضل وأقر ولايته على مصر
 الفضل كان متهيب الموقف
 " وقدم مصر يضطرب من أهل الخوف
 ومن خروج دحية "
لكن الظاهر الخوف كانت نتيجته ايجابية بالنسبال
 لأن اللى حصل هوه
" فسير العساكر حتى هزم دحية ،
وأسر وسيق إلى الفسطاط  فضربت عنقه"
وبيقولوا انه لم التعابين مع الناس
وحاول يكون كويس ودا اللى ساعده ف القضاء
على دحية ومفتش وقت بسيط الا
وجاله أمر بالعزل !! #جزاء_سنمار
الراجل بقى يضرب كف بكف !
ويقول للى حواليه :
" أنا أولى الناس بولاية مصر، لقيامي في أمر دحية،
 وقد عجز عنه غيري " 



مش كدا وبس دا حضرته كان ..
صاحب الامر ببناء (مسجد العسكر)
عشان يكون المسجد الأساسى
 للخلافة العباسية ف مصر
جامع عمرو ف الفسطاط كان مغضوب عليه بقى
ومزحوم وكدا يعنى الراجل حاول يعمر ويبنى
ف خلال شهور بسيطة قضاها
وطبعا دا معجبش اولى الامر
وارجعوا لأول الحدوتة وحكمة هذا العصر
كل ما تقعد وتشتغل بضمير والناس تحبك
كل ما فرصتك ف العزل تزيد




وبيقولوا انه ..الفضل يعنى
" فعزل وندم على قتل دحية
والفضل هو الذي بنى الجامع بالعسكر
 في سنة تسع وستين ، فكانوا يجمعون فيه."
بس يا عيال وتفرق انصار دحية
وكله بيتك بيتك
 واتشالت الضرايب اللى عملها المخسوف
 موسى بن مصعب من على كاهل الخلق
 وجه والى جديد بدل الفضل




الوالى الجديد .. 
عليّ بن سليمان كان متشدد
ومتعصب وهدم كل الكنايس المقامة حديثا !!
ثم مات الخليفة الهادى وجه بعده ... هارون الرشيد
هارون اكتشف ان والى مصر عنده تطلعات للخلافة
 فعزله وجاب غيره
و... بس قعدنا كدا يا مؤمنين نتحكم ويولوا علينا
 لحد ما انتهت الدولة العباسية
ودخلنا ف حقب غيرها 
والقصة خلصت ...
 ولى عدة ملاحظات قبل ما أمشى




1) العباسيين دول كانوا حدوتة
يعنى مثلا من سنة 784- 789
 يعنى ف 5 سنين بس
حصل الآتى ...
تواتر على مصر 
5 ولاة منهم واحد انقتل 
3 خلفاء واحد فيهم مات متغاظ مننا 
 ثورة ومعارك وجيوش رايحة جاية وافلام كدا




2) ايه الحلاوة دى .. بجد
لما حد ظالم قرفنا ف عيشتنا اتكاترنا عليه
واتفقنا وخلصنا منه اهو مكنش ساكتين 
وخلوا بالكو دا الوالى
 يعنى كان أتخن راس ف مصر ساعتها




3) اللطيف بقى ان الراسين اللى اتناطحوا
الأتنين ملهمش أى حق ف البلد
 لا الاموى ولا العباسى
 الأتنين واخدينها غصب وسرقة ابا عن جد !!




4) فقهاء مصر كان فيهم ناس محترمة قوى
 الليث بن سعد وغيره افتوا ببناء الكنايس
مطرح اللى اتهدت ف عهد على بن سليمان
مش بس كدا دول اعتبروها ..
جزء من تطبيق لأوامر الله بشأن إعمار الأرض
وبما ان هذه الأرض (مصر) فيها أقباط
 فمن حقهم الطبيعى بناء كنايس
ومن واجب المسلم اعانتهم على هذا
وشوفوا بقى الراجل الجميل دا مقارنة بالأشكال الضالة
 بتاعت دلوقتى اللى تقولك النصارى
والكفرة
ومتعيدش عليهم 
ومتكلش من أكلهم 
ولن نترك لهم مصر لتضيع كما ضاعت الاندلس
 والهطل دا ..!!!



5) احنا عاوزين راجل زى الليث بن سعد والنبى
 مش بس عشان ينضف العقول
ويعلى من قدر الأنسانية والدين
لأ .. دا عشان يدعيلنا ع الحكام الظلمة كمان
 :)
دعواته كانت مستجابة
 اوعدنا يارب




6) واخيرا ملحوظة كل حكاية وكل زمن وكل حديث
البنى آدم سيرة
 لو يعرف بس كان اتقى الله ف الناس
لأنه راحل زائل ويبقى عمله فقط
لكن البعض لا يستحقون النعمة دى والله 
فعلا !!!


 تصبحوا على ألف خير


--------------------------



سعدية سليم @sa3deaselim 
 رايحين يدوروا على الاندلس ما فلسطين أقرب
 "ولا هو الشيخ البعيد منزار"




ماريان Marianne @MarianneEZZ 
قالوا واحد اتنين تلاتة 
و بجوا بطن بعض في نفس الوقت


wailzuher @wailgood 
 قال في خطبته المشهورة انا السفاح
ونثر الذهب للناس واخرج سيفه دليل القوة والسلطة



hanan alaa eddin @hananalaaoden 
بلاش ياشهروزا هيتمنع 
ويعينو ع المسجد شيخ ليواء 




ليست هناك تعليقات:

إرسال تعليق

Related Posts Plugin for WordPress, Blogger...
"حقوق الملكية والملوخية والمهلبية ... الخ
محفوظة للست شهرزاد وإياك حد يسرقها ويحاول يزعلها آغجر .. مفهوم ؟ "