الأربعاء، 9 سبتمبر 2015

الأقصـــر فى باريـــس : رحـــــلة المســــلة ...... (2)




وقفنا الجزء الاول 

عند وصول المسلة أخيرا
الى باريس تمهيداً لنصبها ف مكانها الجديد
بأرض الفرنسيس
 فهل بت ما كان مرحب بيها وكدا ولا لأ ؟





الحقيقة ان المسلة اللى مصروفاتها
من شيل وحط وترتيبات سابقة ولاحقة
 قربت ع التلتربع مليون فرنك
فهل فيه ناس كانت مبسوطة بيها
وشاكرين مهللين ؟
لأ اكيد ..
فيه ناس استنكرت مجييها من الأساس
وشافوها منظرة فارغة ولا ليها لزوم من أصله
 ناس تانية دماغها أنضف
شافتها سرقة علنى ومحض هراء
والجرايد بقى اشتغلت ف حروب كلامية
وسجالات مع المسئولين والمهتمين
والمهللين لوجود المسلة
وعصف ذهنى زى
بتاع قناة الصويص الجديشدة كدهون تمام


احد الشعراء قال :
" لا شىء له قيمة الا حينما يوضع
فى موضعه الخاص ووسط أرضه
وتحت ظل سمائه ويوجد أرتباط متبادل
وتآلف حميم بين الصروح والبلاد التى اقامتها
ويجب ان تتجاوز المسلات مع أعمدة المعبد
 وعبادة الشمس ويجب ان تكون وسط الصحراء"





فشامبليون رد عليه بإنه

" لن يكون ضارا ان نضع تحت أعين امتنا
 صرحاً بمثل هذه المنزلة حتى نجعلها تنفر
 من الدمى التافهة والزينات الرخيصة "
شيمبو كان شايف ان الهدف تثقيفى
ولرفع لمستوى الذوق العام
وكمان حفاظا عليها من الاندثار 
واهو فرنسا الاولى وكدا
وطبعا كان فيه معارضة للملك الجديد
 بتهاجم أى حاجة من ناحيته ودا منطقى
لكن اللطيف بقى ف وسط كل هذا
ان من ناحية مصر فيه حد هيستنكر هذا الحدث
قولوا مين يا عيال ؟؟


عم رفاعة الطهطاوى .. الجدع الكومل الأصيل

 اللى كان راجع لسه يا دوب من باريس
 سنة 1832
ومكنش مبسوط بحكاية لطش المسلة
طبعا مكنش فيه جرايد ف مصر ساعتها
 ينشر فيها رأيه ويخالف ولى النعم .. الله يجحمه
 لكن ف روايته "ذهب باريس" المنشورة 
1834 كتب رأيه ف سطور
" بما ان مصر قد تبنت اذا الحضارة
حسب نموذج بلاد أوروبا
فهى جديرة بالإحتفاظ بزينتها
 والاعمال التى أورثها لها اسلافها "
وايه كمان يا رفاعة قول


وقال 

"وسلبها قليلا ما هو الا طريقة تشبه
سلب البعض مصوغات غيرهم
فهى عملية نهب واضحة لا يلزم لها أثبات"
 الله يفتح عليك يا عمنا
ويطلب رفاعة تخصيص مكان لجمع الآثار
وصوته هيتسمع بعدها بشوية بسيطة
 سنة 1835 لما يتعمل اول نواة للمتحف المصرى
 .. ف الازبكية






القصد ..
حصل معارك كلامية كتير على المسلة شعبيا
وكمان رسميا
 شيمبو كان عاوز يحط المسلة ف مكان
والملك عاوز يحطها ف ميدان الكونكورد
الكونكورد كانله سمعة مرتبطة بذكريات دموية
 من ايام الثورة الفرنسية
واعدام ناس كتير عدوا الألف شخص فيه 
منهم الست مارى انطوانيت بتاعت البيسكوى
هيا وجوزها لويس 
قوم فيه ناس اعترضت



وناس تانية منهم الملك ردوا ان المسلة

أثر ملوش دعوة بأى حاجة
وكأنه رمز حيادى كدا يحقن أى خلافات
لا تمجيد لنابليون ولا غيره 
دا حاجة عن بطولات فرنسا ف مصر .. وبس
  

شامبليون كان من معارضى اقامة المسلة

 ف الكونكورد لكن الملك الحالى طنشه
ومات شيمبو ورغبته لم تنفذ
لما وصلت المسلة
وقتها كان الملك .. لوى فيليب
والراجل كان صايع بحر
 قرر يعمل نسحتين كرتون مقوى من المسلة
وحط كل نسخة ف مكان 
وخلى الناس تتخانق وتتجادل وتعمل أفلام
وف النهاية قرر نصبها ف الكونكورد برضو
 زى ما السيسى بيعمل
ف مجلس الشعب كدا تمام 
:))

وقتها اتعين الأخ
جاك إينياس هيتورف
عشان يكون مهندس الكونكورد
واللى مع لوبا هيشوفوا ازاى تقام المسلة
والخطوات والترتيبات والاحتفالات الخ


ولحد دلوقتى مسلة الأقصر قابعة ف الباخرة

بتاعتها على ضفة نهر السين
مستنية يزحزحوها
وبيقولوا اتعرضت لتخريب من مجهول
بس المخرب ملحقش يقعد وقت كبير
وهرب بسرعة تحت ستار الليل
والمسلة كانت مزعلاهم مش عارفة ليه
 ايش حال ما كانوا واخدينها ببلاش !!!



القصد ..
لوبا وهيتورف قعدوا يفكروا ف نصب المسلة
وطبعا دخول الحمام مش زى خروجه
اسقاط المسلة كان حمادة
واقامتها حمادة تانى خااااالص
والفكرة ازاى ترفع الكتلة الضخمة دى
من على الأرض وتمنعها تتمرجح
أو تقع ف الاتجاه التانى
فكان فيه اقتراح يعملوا الة تشتغل بالبخار
 لكن لغوها
ورجعوا تانى للفكرة الابسط
والأسلوب التقليدى اليدوى



ودرسوا ازاى لما تم نقل مسلة روما مثلا

سنة 1586 من مطرحها القديم لمطرحها الحالى
ف ميدان سان بيير
 عملوا حاجة اسمها قصر فونتانا 
طريقة كدا




وقصر فونتانا دا 
عشان موجعش دماغكم
ازاى تغلف المسلة بالخشب وروافع وشغلانة
 ويتم زحزحتها ورفعها بالطريقة اليدوية
وبالحبال الخ



المهم .. لوبا وهيتورف اتفقوا 
انها أنسب حاجة
مع بعض التعديلات
وبدأ الشغل بسحب المسلة من الباخرة
 لحد مطرحها ف الكونكورد
وعمل لوبا شوية حاجات ورافعات
واستعان بــ 420 جندى من المدفعية
(مش بالسخرة والكرابيج)
وبعد اجراءات وحسابات معقدة
 تم ربط المسلة وجرها
ولوبا الخبير بقى بيقول
" ان عدم فهم أحد الاوامر الصادرة
أو رباطا غير جيد أو مسمار معوجا
يمكن ان يؤدى الى كارثة رهيبة 
ففى حالة سقوط الجهاز ستتحطم المسلة
وتضيع ملايين الفرنكات
ولاجدال ان اكثر من مائة عامل سيسحقون "
وقرروا يعملوا تجربة اولية كدا
اثناء اليوم دا رافعة انجرفت على الطريق
وخدت ف وشها احد التجار ومات
وعوضوا ارملته بفلوس
 بس الحادثة سمّعت 
وناس قالت المسلة دى شؤم
لوبا مكنش ناقص اعتراضات وهجوم اكتر
 وسرع ف اتمام الأختبارات
وف اليوم الموعود اتجمع الخلق
ف ميدان الكونكورد للفرجة 


فى 25 اكتوبر 1836

كان الميدان معدى الـ 200 ألف نفر متجمعين
رغم ان لوبا كان يتمنى عدم وجود ناس
 خوفا من أى مفاجأت وحوادث وكدا
وشوف يختشى الناس الرايقة
قالك على ناصية احد الشوارع
وقفت اروكسترا عددهم 100 فنان
تعزف قطعة "اسرار ايزيس الخفية" لموزار 
بيقلدوا سليم سحاب وكدا
قلدوين قوى!!



وطبعا كبار رجال الدولة
وأى حد عاوز يظهر ف الصورة وينول الرضا
 حضر المشهد
وبيقولوا الجو كان ملبد بالغيوم 
بس ممطرتش
وعلى الضهر كدا لما ظهر الملك
واسرته ف الشرفة الرئيسية
ادى لوبا اشارة البدء لرجاله
وبدأ جنود المدفعية مسيرتهم الموزونة
على نغمات البوق


وقيل :
" وبدأت الروافع تدور حول محورها
والحوامل تنتصب وتجذب المسلة
وفجأة سمعوا صوت الطقطقة أثارت القلق
توقفت العملية على الفور"
لوبا عمل مشاورات مع رجالته ومساعديه
لقوا مفيش حاجة والمسلة زالفل
راحوا مكملين وخلال 40 دقيقة .. بس
وقفت مسلتنا شامخة ف وسط الكونكورد
وسط هتافات حوالى 200 الف نسمة
لأ وقالك ايه ...
 وطلع 4 رجالة يحطوا العلم الفرنسى
وغصون نبات الغار 
ووقف الملك لوى فيليب يحييى الجماهير
 من الشرفة ... وهيصوا يا ولاد ... يلا
والحلوة جاية ببلاش 
وفلوس كتير مكلفتناش 
مسلة بإتنين ونص 
وتعالى بص 
واللى ما يشترى يتفرج 



وبيقولوا ان يومها ..
 المجد كله كان للهندسة الميكانيكية
اللى قدرت بعقول دارسيها
 تنقل حجر بهذه الضخامة
وتقيمه ف مكان أخر بلا خساير 
ولوبا اتدلع آخر دلع
محدش ركز ولا افتكر شامبليون خالص
ف اليوم دا
الوحيد اللى لاقى الثناء كان لوبا
اللى اتعشى مع الملك ليلتها ف االقصر
وهوه ماشى ادوله 3000 فرنك
عشان يديها لمساعديه والعمال وكدا
طب هوه فين عرقه يا جماعة ؟؟ 
بعدين .... بعدين


بعدها بأسبوعين وزير الداخلية هيبعتله

ويسلمه مبلغ 4000 فرنك نظير خدماته
وتقديرا من الدولة 
وبقى لوبا حديث المدينة
وعملوا بيت صغنن ف الميدان مخصوص
 لحارس المسلة المتواجد دايما
واللى كان راجل عجوز محارب قديم ف الجيش
 اسمه .. جوتييه 
والناس وقتها قعدت تتريق على مين
اللى هييجى ياخد المسلة ويمشى دا .. ؟!!
معلش أصلهم مسمعوش عن الونش 
:)


لوبا بقى .. هيتعين ف نفس السنة

 مدير لمتحف البحيرية وياخد الميدالية الذهبية
 من لويس فيليب
وبعد 12 سنة هيدخل مجلس الادميرالات
وبعدين يطلع معاش مبكر
ويمضى وقته ف القراية والدراسة
ويسكن جنب الكونكورد
ويعمل نزهات يتفقد فيه مسلته 
وأمر على الكونكورد كونكورد ليلى .. وكدا 
ويموت عن عمر 76 سنة 
وبعد موته يحطوا على مقبرته
 مسلة صغننة كدا للتذكير بعملته الحلوة
 زيه زى شاملبيون لما حطوا على قبره مسلة
 برضو ... اشمعنى هوه يعنى !!
أما ... 
قائد السفينة فيرنيناك
هيتنطط ف المناصب البحرية
 لغاية ما يبقى أدميرال
ويتعين محافظ للمبانى الفرنسية ف الهند
ويموت عمره 79 سنة
اما الباخرة الأقصر هترجع لوزارة البحرية
وتتباع بعض اداوتها بالمزاد العلنى
 وتحتفى الباخرة من الساحة بعد شوية
وتختفى اخبارها !
اما "ابو الهول" الباخرة اللى قطرت الأقصر
 فبيقولوا انها اتكسرت على سواحل الجزاير
سنة 1845 


الملك لوى فيليب بقى قامت عليه ثورة

ودخلوا عليه سنة 1848
وقدموله ورقة تنازل عن العرش
وقالوله امضى يا أشول فمضى
ومضى 


اللى من يمتنا بقى

 ابراهيم باشا ابن محمد على سنة 1841
يسافر باريس يتعالج
ويشوف المسلة مزينة الكونكورد
عاتشى خالص
ويفضل يناكف ف ابوه سنين وسنين
ويستنى موته .. عشان يقعد مطرحه
انه يموت
أبضنننن
فيسافر تركيا ياخد الأوكيه بالحكم 
غتاتة ولوى دراع
التراكوة هيغلسوا ف الاول
 وبعدين لما يعرفوا حالته الصحية
وانه مش هيعيش كتير يدوله الفرمان
 ويرجع ابراهيم بيه ويموت بعدها بشهور قليلة
 #احسن



سنكفولة بقى اللى كان عمال يوزع ف مالنا

كان عامل حساب قوى لفرنسا
وبيهاديها ف مسلات وزرافات 
هنا 



فرنسا ضحكت عليه
 وبعتتله هدية ساعة .. سكّة
لأنه بعد ما علقها ف مسجده
 اللى بيتم انشائه ف القلعة
 اشتغلت شوية
ووقفت بعدها للأبد
:)


وأروبا ومن ضمنها فرنسا وقت الجد
 اتلموا عليه وقصقصوا ريشه
ورجعوه يقعد ف قصره وينام م المغرب
 لا مسلات نفعت ولا زرافات يا حبيبى
وادى اخرة خدمة الغز 





مسلتنا بقى يا عيال ...
الكتاب مليان تفاصيل عنها
وعن المكتوب عليها
واللى كله مدح ف الفرعون
 وجمال الفرعون وشياكة الفرعون 
وأُم امُين الفرعون .. الخ 




المسلة اتعملها قاعدة مخصوص
 لأن قاعدتها الأصلية كان عليها قرود 
الظاهر مش لابسين بوكسرات وكدا 
فقالوا نشيلها ف المتحف 
عشان منخدش حياء بعض المارة وكدا !!
#يختشى _على _فرنسا_وهيا_بتنكسف




القاعدة الجديدة بقى
الجنب الغربى 
اتكتب فيه كلام
عن الملك لوى فيليب ولوبا
وتاريخ نصب المسلة ف الكونكورد



الجنب الشرقى
 ذكر فيه مصر
وازاى انتزعت المسلة من جبانة طيبة
كذكرى شعار ومجد تم الحصول عليه
 بوساطة السلاح على صفاف النيل 
#حقها_ولا_مش_حقها



الجنب الجنوبى
عليه رسوم للوبا يتوضح العملية الهندسية
اللى تمت لحد ما المسلة وصلت باريس
اما الجنب الشمالى
فذكر فيه فيرنيناك قبطان السفينة الأقصر
وحدش وقتها جاب سيرة شامبليون خاااااااالص
 ولا بسطر يتيم حتى
لكن بعديييين هينكتب اسمه على قمة المسلة
ف الهُريم



الهريم دا لوحده قصة

 الفرنساوية غرقانين تفاصيل والله
 أل ايه اول ما جت المسلة كان الهريم متكسر 
وشكله يقرف الكلب الحزين 
قوم ايه ؟؟؟
قالوا لازم نعملها هريم جديد
قوم فيه ناس قالتلك لأه
أصلا المسلات زماااان مكنش فيها هريم
أه والله قالوا كدا !!! 



وقالوا ان احد الرحالة زمااااان
قال انه شاف مسلة المطرية مفيهاش حاجة
على قمتها واستنتجوا ان الهريم دا
اتعمل بعدين كشكل تجميلى ونفاق لحكام ما


المهم قالوا نعملها هريم برونز
وبعدين قالوا لأ
وبعدين قالوا آه
 وبدأ العمل فيه فعلا
ومن تانى محاولة لصهر هُريم
وقف العمل 
وقالوا هنملاه بالملاط
اللى هوه الجبس او الاسمنت او المونة
ونعمله من نفس شكل المسلة
 وقريب للونها وخلاص



بس بعدييييين بعد ييجى 100 سنة

فكرة الهريم المعدنى هترجع للنور تانى
عن طريق واحدة من عالمات الآثار
والأقتراح الستاتى اللى كان ف محله
كان ان الهريم يتعمل من الدهب ..
والفكرة راقت للمسئولين وقتها
بس الحرب العالمية التانية قامت 
واتأجلت 



وروح يا زمان وتعالى يا زمان
 وف اطار الاحتفال بمرور 200 سنة
على رحيل الحملة الفرنسية 
(من ناحيتنا)
و200 سنة على رجوع الحملة منتصرة
(من ناحيتهم )
مبارك الوغد راح فرنسا
وأهو يطلع من السفرية بأى سبوبة ومرّمة
وكان فيه ترتيبات لوضع هريم الدهب
على قمة المسلة فعلا 


وف حضور وزير الثقافة وقتها جاك شيراك

وعلى ماهر سفير مصر ف فرنسا
اتحط الهريم بواسطة منطاد
ودا كان 14 مايو سنة 1998


الكونكورد بما انه ميدان الثورة

حضر اغلب احداث واحتفالات الفرنسيين
على مدار تاريخهم
 وبالتالى كان للمسلة نصيب وافر منها



سنة 1840 مثلا شهدت المسلة رماد نابليون
وهوه جاى على عربة جنائزية يجرها 16 حصان
 عشان يندفن ف تراب بلده
بدل المنفى


سنة 1848 لما يتنازل لويس فيليب عن العرش

 بعدها هيهرب من قصره ف سرداب
يؤدى للميدان والمسلة تشوفه
وهوه بيعمل فرار زى الفار 



وكل الاحتفالات اللاحقة بقى
هتلاقوا المسلة متزينة ومتجهزة
لأستقبال المدعوين



وبتشارك ف الأحداث وبتتفرج 


كان فيه دعوات لنقل المسلة من مطرحها الحالى
 لأى مكان تانى
لكن بمرور الزمن اتعود الناس على وجودها
 وخبت تلك الصيحات رويدا رويدا



والمسلة التانية اللى قاعدة ف الأقصر
محدش جاب سيرتها
لأنهم دخلوا ف الحرب السبعينية
 وانشغلوا لشوشتهم
 ف الابقاء على المستعمرات 


سنة 1979 جت مومياء صاحب المسلة

 الملك رمسيس التانى
 للعلاج من فطر جالها من سوء التخزين
ف المتحف المصرى
 قوم ايه ؟ 
الحاج رمسو ركبوه الطيارة
وعدى المتوسط لحد ما نزل مطار لوبورجى
واستقبله حرس شرف
وكأنه رئيس دولة تمام ولسه ف عزه 



وقبل ما يوصلوه لمتحف الانسان
ادوله لفة ف الكونكورد حوالين المسلة
مع موتسيكلات الشرطة
وعملوا غُرز و حصان ... روقوه يعنى 



سنة 1993 احدى الحركات الناشطة

 قامت بوضع واقى ذكرى بينك
على المسلة بمناسبة اليوم العالمى للإيدز 
#ياخرااااشى



سنة 1999 طلع واحد
 متأنثر آووووى بسخصية سبايدر مان
وتسلق المسلة
وبعدين البوليس مسكه
:) 


والمسلة بقت جزء لا يتجزأ
من حياة الباريسيين اللى بيعدوا ف هذا المكان 


والمسلة اللى مفروض انها جزء

من تاريخنا وثقافتنا وحياتنا
بقت عند ناس تانية مصدر للبهجة
والدخل والفخر وكل حاجة 


بقت ف الكروت البوستال
 رمز للجمال



وبقت من معالم باريس الراسخة
وتترسم ف اللوحات


بيستخدموها ف السياحة

والترويج لفرنسا 
وبقت جزء من معالمها


والعملات التذكارية اللى بتمجد الحدث




والطوابع 



ولحد دلوقتى المسلات عموما ..
تحفة بيشتريها السياح ويعرفوا قيمة هذا الأثر
ابو شكل غريب ووظيفة اغرب 
 عشان عالم بتقرى وبتحاول تعرف 
وتحترم التاريخ بجد



سفيرتنا ف باريس 

استمتعوا بالصور يا ولاد 
هنا 
وانا تقريبا خلصت عرض الكتاب الممتع
لروبير سوليه اشتروه
 بجد ممتع ومغرق بالتفاصيل الجميلة
 بس فاضل أقول حاجة اخيرة


يقال ان مصر كان فيها مسلات بالهبل
بكافة الأحجام والأطوال لكن مبقيش منهم
عبر الزمن الأغبر الا ..17 مسلة فقط
حول العالم وف مصر
المسلات دى منهم 4 ف مصر
 4 ف أيطاليا
واحدة ف انجلترا
واحدة ف امريكا
واحدة ف تركيا
والباقى اندثر


وتتراوح اطوال المسلات مش كلهم زى بعض

لكن أطولهم على الإطلاق .. مسلة حتشبسوت
اللى طولها فوق الـ 29 متر 


دى مسلة ابرة كليوباترا




اللى راحت امريكا


ابرة كليوباترا 

وهيا بتتنهب علنى 
وعلى عينك يا تاجر 


مسلة المطرية

واللى يقال انها تقريباً 
أقدم المسلات المصرية اللى صمدت



ومتهيألى انتوا مش محتاجين
تسمعوا أى ملاحظات منى
لأن القصة بكل تفاصيلها
مليانة ألف ملاحظة وملاحظة .. تحزّن
جنب المبهجات



المبهج ان أثر من عندنا 

يلاقى هذا التكريم والاحترام 
ويكون سفيرنا ف باريس 
وبيعبر عن مصر البهية
اللى كانت حضارتها قمة الجمال والعظمة
وان كان عندنا شعب يوما ما 
بيعمل بناء مبهر محكم يصمد لقرون 
ف وقت الباقيين فيه
كانوا اخرهم يحطوا طوبة على طوبة
وتقع بعد شوية ... 



بس المبكيات قديما وحديثا 
إنه اذا كان ف زمن غابر
كنا بنتنهب وغيرنا يسرقنا
 فدا لاننا معرفناش قيمة هذه الأشياء
الا متاخر لما اتعلمنا ومخنا دخلته الكهربا
واذا كان المصريين زمان بيبصوا للأثار
على انها تراث الكفرة عابدى الأصنام والبشر الخ
 وناخدها نبيعها افيد
فدلوقتى الوضع اختلف
والمفروض النظرة كمان تختلف
ونعرف ان اللى ملوش ماضى ملوش بكرة 
وان احترامك لتاريخك جزء من حاضرك 
واللى جاى 


لكن للأسف الشديد لسه فيه مخلوقات عجيبة

الشكل والعقيدة بتشوف الحاجات دى حرام
 وكسرها واجب وبيعها احسن .. زى داعش
 واللى على شاكلتهم كدا
قوم يارب نبص بصة كدا بسيطة
ليه ناس اتقدمت واتحضرت
عشان احترمت الماضى اللى يستحق الاحترام 
فاتمدنوا وبقوا بشر بحق 
ومسلمين بلا اسلام 
وبيستقبلوا لاجئينا كمان
بينما احنا لسه فينا ناس تقبع ف عصور الظلام
 ف أسفل حتة وعاوزين يشدونا معاهم
ويدعوا ان دا من الدين ويرضى ربنا


 
الواحد يتمنى ان الآثار دى
تلاقى الاهتمام والاحترام الذى تستحقه
وحتى يأتى هذا اليوم
لا يأس ابدا وهنفضل نحكى عنها 
وتوتة توتة ..  خلصنا الحدوتة


 تصبحوا على ألف خير


----------------------------



سعدية سليم @sa3deaselim 
 واتمختري يا حلوه يا زينة 
يا جايه من مصر علينا

 Nahla Moustafa.@loulounana 
 لا .. غنوا تسلم الايادى 
تسلم يامدفعيه بلادى

 SepNelli @NGeorgos 
 استعملوا اسلوب الفراعنة
 في سرد الاحداث بالرسوم الجدارية 
:)


 محمد رفعت ‏@MohamedRfaat  
 واقع مرير


Amal Soliman ‏@SolimanAmal  
أول أكتوبر ف مزاد جديد ع قطع جديدة بانجلترا
 والوزارة تعليقها" عارفين"


 سعدية سليم ‏@sa3deaselim  
بس لسه فيه ناس عايشه بلمبة الجاز
والكهربا ما دخلتش دماغها

ليست هناك تعليقات:

إرسال تعليق

Related Posts Plugin for WordPress, Blogger...
"حقوق الملكية والملوخية والمهلبية ... الخ
محفوظة للست شهرزاد وإياك حد يسرقها ويحاول يزعلها آغجر .. مفهوم ؟ "