الأحد، 4 أكتوبر 2015

عيــــد وفـــــاء النيـــــل




كبروا الصورة واستمتعوا بتفاصيلها الخليج المصرى - حى باب الشعرية 


طب قبل ما نبتدى 
عاوزة أرقع زغروطة
وأعلن انشكاحى الشديد
وعظيم الفرحة والبهجة بخروج sana2@
ست البنوتات
اذ انها من متابعات الحساب وشهروزة تفتخر
ثانيا
حكاية الليلة اهداء للعزيز"M7mdMansor@ "
 اذ انه زمان ف العصور الوسطى كدا
 سأل عنها وشهروزة وعدته بذلك
والصبر طيب وطولة البال تنول الامل





وكان ياما كان .. فيه بلد غلبان
ربنا أراد له يكون متميز من فجر التاريخ
قام اداله خير يجرى ف أرضه اسمه نهر النيل
وجدودنا بقى مكنوش زينا كدا
عك وربك يفك وأى حاجة ف المتسابة
 لأ دى ناس عرفت قيمة النعمة اللى ف ايدها 
وصانتها كما ينبغى
فتلاقيهم يا نضرى كدا
كانوا مش بس بيحترموا النيل ويقدسوه
دول عملوله احتفال مخصوص كل عام
عشان يهيصوا بالفيضان والخير الجاى من وراه





ومفيش داعى امسك الخرزانة واعدل البونية
 واعيش ف جو مدرسة الجغرافيا ف تالتة تالت
واقول ان النيل زمان كان له اوان بيفيض فيه
 وييجى محدش يصده لحد ما اتبنى السد
وانه وقت ما كان بييجى عالى
الفرحة كانت بتعم وتفيض زى مياهه
 اما لو جه شاحح وأقل من المرجو
كانت بتبقى ايام فحلوقى





وشوف يا مؤمن من كتر الجمال
كانوا بيقولوا ع المناسبة دى لما تحصل انه
 النيل بيوّفى
 لهذا حكايتنا النهاردة عن .. عيد وفاء النيل
وانتوا عارفين المصرى القديم
كان تمركزه الأساسى ف الجنوب ومقر الحكم وخلافه
لهذا كان قياس ارتفاع النيل 
وكمان الاحتفالات ف الجنوب





والمصرى القديم كان بيقدس النيل
ومسميه (رب الرزق الوفير)
(والد الارباب)
(خالق الكائنات)
ومدلع أيما دلع يعنى 
وفيه تفسيرات للآية الكريمة (موعدكم يوم الزينة) بتقول
 ان سيدنا موسى عليه السلام واجه سحرة فرعون بمعجزاته
 ف يوم وفاء النيل 
هذا والله أعلم





واحنا دلوقتى بنتكلم عن عيد
 من أقدم الاعياد المصرية واجملها
ولما كل حاجة حلوة ف مصر زمان كانلها رمز أو اله
 النيل اللى ملوش نفس مثلا؟!! 
له طبعا
النيل كانله رمز بيعبر عنه ف شكل شخص ازرقانى
 مكلبظ حبة كدا وصدره كبير
 كأنه بيمد الأرض بالخير الوفير وكدهون 




وكانوا مسمينه "حابى"
ومعرفش ليه يا جماعة اللخبطة دة
لأنه شكلا لا حصل راجل ولا حصل ست
وحولتونا كدا .. بس معلش 




المهم.. الحاج حابى
هتلاقوه على الجدران بتاعت اجدادنا مزينها
وهما بيحكوا عنه
وعن احتفالات وفاء النيل بالدقة والتفصيل 




وف أغسطس من كل عام
 كان الاحتفال لما النيل يوفّى بوعده
 للأرض الطيبة اللى منتظراه بشوف ولهفة
قوم الفرعون ينزل للشيعب




وقتها كان شط النيل من منف لحد اسوان
مليان قصور لرجال الفرعون وكبار المسئولين
وحاجة فخامة وابهة والكل بيستعد للحدث
بيقولك زى ما بنعمل ف رمضان كدا ونعلق زينة
المصرى زمان كان بيتزين لهذه المناسبة غنى وفقير
الاغنياء والكبار كانوا بيجهزوا قصورهم بشكل خاص
لأيه يا شوشو ؟
لأستقبال الفرعون طبعا
اذ ربما الحاج الكبير يحب ينزل من مركبه الفخيم
ف أى حتة
 يفك حصر يقيل ساعتين يتغدى ويتمشى ..كدا
يبقوا هما مستعدين 






الراجل بيتعب نفسه وينزل من قصره
ويتنزه ف النيل ف المناسبة دى
وكان الامراء وكبار الموظفين بيعملوا زيه
والشعب كمان كل واحد ومقدرته





فسفينة الفرعون مثلا 
كانت من اربع طبقات .... وأستك
 كل طبقة ارتفاعها بتاع 10 اقدام
الا يطلعوا كام متر دول يا ثامح ؟؟؟ 






اما سفن الامراء وحكام المديريات وقادة الجيش
 فكانت مراكبهم من 3 طبقات
كل طبقة 9 اقدام
 ومكنتش مدهبة زى بتاعت الفرعون 
اما مراكب الكهنة والضباط والاعيان
 فقد كانت من طبقتين كل طبقة 8 اقدام
ومتزوقة ومتلونة
وتلاقيهم كانوا بيعلقوا يافطة مكتوب عليها تحيا مصر
 أكيد ..!





واخيراا تأتى مراكب عامة الشعب
 ويا غلابة من يومنا يا سيد كانت من طبقة واحدة
ومن لون واحد لا يتغير
عينى علينا





بس بقى والاحتفال يبدأ
لما ييجى الراجل الغامض بسلامته .. الفرعون
 ينزل مركبته وينطلق ف النهر وراه المراكب التانية 
وبيقولوا ان المصريين كانوا بيرموا ف النيل تمائم
 وتعاويذ وفاكهة ووز ورسايل بالأمنيات
وحاجات كتير كدا
 ابتهاجا وكأنهم بيردوا الهدية للنهر 



وتأتى أسطورة عروس النيل الخالدة
 اللى بالبحث والتمحيص تبين انها مجرد أسطورة
 ومحدش كان بيرمى بنت عذراء ف المية ولا بتاع 
الشاهد على ذلك جدران المعابد والبرديات
اللى حكت تفاصيل الاحتفالات دى بالدقة
 ومحدش جاب سيرة العروسة خااااالص
 الا بعد الفتح الاسلامى لمصر





القصد عاوزة اقول المصرى القديم كان بيقدس الحياة
مش زى الأيام دى
فكان تقديم قرابين بشرية دا مبيحصلش
ولهذا عروسة النيل اسطورة ف الخيال وبس
فيه ناس بترجع انهم كانوا بيرموا تماثيل
 ولهذا اختلط الامر على البعض
لكن ف النهاية حتى شكل العروسة دى
مترسمش ف أى مكان ولا شوفناها
قصره .. الاحتفالات كانت عظيمة وحاجة اخر فشخرة
وتبارى المصريين ف سرد احداثها
وكتابة الشعر ف حب النيل والأغانى والأناشيد الخ
 وشكرا





قوم ف يوم من ذوات الليالى
الاخ سنوسرت الثالث قرر يحفر قناة تربط بين البحرين
المتوسط والاحمر 
عشان تساعد ف النقل والتجارة الخ
 حلو
قوم اتحفرت " قناة سيزوستريس" على اسمه
كما ينطقه الأغريق وفتحوها
وعملوا هوليلة وحفلة وفتة والقناة بقت فلة وشغالة 
اتعرضت للأهمال شوية
ثم ف عهد سيتى الأول تم اعادة حفرها بذمة
الكلام دا سنة كام يا شهروزة ؟
 1310 ق.م 
ثم جاء الفرس والقناة شغالة يونيفرسال
الراجل .. ملك الفرس وقتها
 كان عاوز يكون فيه خط امداد متواصل بين فارس ومصر
عن طريق البحر الاحمر
 والقناة دى كانت هيا الرابط دا 
حلو



جه الاسكندر ومن خلفوه وف اثناء الحكم الروماني لمصر
 تحديدا ف عهد الإمبراطور الروماني "تراجان"
القناة اتوسعت واتدلعت قوى
 وسموها على اسمه !
وبقى اسمها قناة تراجان والكلام دا سنة 117 ق.م
وروح يا زمان وتعالى زمان
ونحن نرزح تحت ظلم الرومان
 وقرر العرب فتح مصر أو غزوها .. اللى يعجبكوا
عشان الخناقات بقى 




ساعتها عمرو بن العاص الداهية
انتبه لأهمية القناة دى
 لأنه هتربطه بشبه الجزيرة العربية 
والقناة بفعل الاهمال كانت مردوم كتير منها 
فأعاد حفرها
وهيحفر القناة من الفسطاط لحد القلزم
(البحر الاحمر عند السويس)
 وهيسميها خليج امير المؤمنين بعد ما كانت قناة تراجان
#انا هسميه حاتم




ونركز بقى عشان احتفالات وفاء النيل
اللى كانت طول عمرها متمركزة ف الجنوب
حيث سكن الفرعون 
ويتم اقامتها على مدد النهر لحد الشمال
بعد الفتح العربى هتنتقل للشمال بكاملها 
عند الخليج





تحديدا عن نقطة التقاء الخليج مع النيل ..
فين يا شوشو الحتة دى ؟
جنوب شارع القصر العينى عند حتة فم الخليج "حاليا"





ونركز ف الخريطة يا ولاد
الخط الاحمر هوه خليجنا اللى هنحكى عن الاحتفالات
 اللى كانت بتقام عنده كل عام ف أغسطس
المصريين عموما والعرب خصوصا
فكروا ف القناة دى لأنها
 كانت ممر مائى تجارى مهم صحيح
لكن كمان كانت مصدر للشرب مهم جدا
ودى رقم واحد عن التجارة
لأن زمان يا ولاد مكنش فيه مية توصل للبيوت بحنفيات
وكان المصرى بيملى المية بنفسه بجرار وقرب
او عن طريق السقا 
والمناطق البعيدة عن النيل كانت بتعانى 
وجود التفريعة دى كانت مهم جداااا
لحصول السكان البعيدين عن النيل على مية ترويهم
وتروى اراضيهم وبهايمهم .. الخ 
ودا اللى خلى بعدين الناصر بن قلاوون
يحفر تفريعة تانية اتسمت الخليج الناصرى
 عشان يكتر عدد المستفيدين
 انظر الخط النيلى 




القصد .. العرب بعد دخولهم مصر محبوش يرخموا على المصريين بقى ف أعيادهم ووفاء النيل تم زى معاده
وتانى تعود سيرة عروسة النيل للمشهد وانه ..
عم الحاج المؤرخ عبدالرحمن بن عبدالحكم
 فى كتابه فتوح مصر والمغرب
 ذكر راوية ان المصريين راحوا لعمرو بن العاص
 يقولوا هنرمى عذراء ف النيل وكدا
والا النيل يشح
 قام عمرو استنكررر جدااااا
وبعت للخليفة عمر بن الخطاب يسأله
فرد عليه بأنه يرمى خطاب ف النيل
وميرميش بنات تانى بعد كدا ودا اللى حصل
الراوية مشكوك فيها لأن بن عبدالحكم رواها
بعد ييجى قرنين من دخول العرب مصر
يعنى مشفش بعينه حاجة




 ثم ان الرحالة اللى زاروا مصر محدش جاب سيرة
ناس زى هيرودوت وتيودور الصقلى
وبلوتراك وكليمان السكندرى وغيرهم
كانوا حاضرين الاحتفالات دى اثناء زياراتهم
ومحدش شاف بنت بتترمى ولا حاجة !
زائد انه زى ما قولنا .. مشوفناش ف المعابد
 أى ذكر للتفصيلة دى
 والمصريين كانوا بيحكوا كل حاجة وبرخامة يعنى !





القصد نكمل الاحتفال ف عهد العرب
الاحتفالات انتقلت الى الحتة اللى قولنا عليها
وبسبب طبيعة الحكام كانت بسيطة ومفيهاش بهرجة
 لحد ما جه الفاطميين
وايوااااا بقى اوعى ى ى ى انتوا عارفين الفاطميين
يموتوا ف الفرح والهيصة
والاحتفال بوفاء النيل أياميهم كان فراولة وتفاح
 ولوز العنب






المصريين كانوا بيقيسوا النيل
وارتفاعه ف الجنوب وعلى مدد النهر لحد الشمال
 ف عهد العرب خصوصا ف زمن بنى آمية
 اتبنى مقياس معتبر






ثم جاء المتوكل الخليفة العباسى
 وأمر ببناء مقياس الروضة ف الجزيرة
اللى بتواجه نقطة التقاء الخليج مع النيل 





وبيقولك ايه يا سيدى ؟
ان المقياس كانله قاضى مخصوص
 شغلته يراعى المكان
ويبلغ الخليفة عن ارتفاع النيل أول باول 
ومع قرب معاد الفيضان يكون اتحدد الارتفاع
وغالباااا مجرد ما يوصل لـ 16 ذراع
 يبقى كدا النيل وفى وكفى 
وهيا نحتفل به يا عيال





المقياس كان هدفه الأساسى تحديد الأرتفاع
 لسبب اهم من المعرفة
 وهوه انه بناء على القدر هيكون الضرايب
اه 
اوعوا تكونوا فاكرين حد بيعمل حاجة لله !
يعنى النيل وصل لـ 16 دراع
يبقى كدا دى كمية مناسبة لرى الأراضى
ومحدش يبقاله حجة يفلفص من الضريبة
 اما لو قل فكانت الضريبة تقل 
انما على مين ؟؟؟
فيه حكام ولاد نصابة كان النيل بييجى منخفض
 وكانوا برضو يقولوا رقم الـ 16
عشان يحصلوا الضرايب برضو
وساعتها كانت الناس بتقول جاااااااااااى
لأن الواقع غير اللى بيتقال 
القصد .. 
قاضى المقياس ف هذه الأيام الاولى من أغسطس
 كان بيبلغ الخليفة الفاطمى أول باول عن الزيادة ومقدارها
وأول ما يعدى الـ16 ذراع يبقى شكرا





الخليفة كان بيامر القاضى بالمبيت ف المقياس
هوه ورجال الدولة والمشايخ الخ
ويبعتلهم أكل مخصوص من قصره





وبيقولك ايه يا سيدى
ان شيوخ الجوامع الكبرى ف القاهرة والفسطاط
 كانوا بيروحوا المقياس ويقيدوا الشموع 
ويقروا قرآن
الغلابة كمان وكل من له حاجة
كانوا بيستغلوا الليالى المفترجة دى
ويروحوا يقيدوا شموع ويدعوا
زى ما بنعمل وقت المطر
 :))





تطلع الشمس فيخرج الخليفة من القصر الشرقى
بالقاهرة الفاطمية ويمر ف شارع المعز
 ويتجه ف طريقه للسيدة زينب حيث شارع السد 
ومن السيدة يكمل للفسطاط
ومن هناك ياخد سفينته المخصوصة وينزل ف النيل
 شكلها ايه السفينة دى يا شوشو ؟؟؟
 استنواااا هقولكم اهو






بيقولك انه يا سيدى مركبة الخليفة كان فيها
" بيت انيق حوائطه من عاج الابنوس
وفوقه قبة من خشب دقيق الصنع
ومكسوة بصفائح الذهب والفضة "
 آحلولى
ويمشى الخليفة بالمركبة ف الخليج
 لحد ما يوصل عند المقياس
ويدخل يصلى هوه والوزير بتاعه
 وبعدين ياخدوا اناء
فيه ايه ؟؟
 قالك الإناء فيه مسك وزعفران مضافا اليهما ماء الورد 
#اخراشى
 يناولهم الخليفة بإيده لقاضى المقياس سخصيا
 ليه يا شهرو ؟؟؟





قالك عشان ينزل القاضى لحد تحت
 ويمسح العامود بالمسك والزعفران ومية الورد
 يوغتى والله ناس كومل واخلاق
وخلاص روقنا العامود ومسكناه وزعفرناه الخ
يرجع الخليفة على قصره
وتانى يوم قاضى المقياس يروحله القصر
عشان يبلغه بتمام الزيادة
وبيقولوا انه ف الزيارة دى بياخد
"خلعة مذهبة يؤمر بلبسها وتصرف البشارة من نقود
 وخلع له ولاهله حمولة عدة بغال"
 ليه .. كان عمل ايه بسلامته ؟
قصره يخرج القاضى من عند الخليفة ف موكب مهيب
 والناس تتفرج وتعرف ان النيل خلاص وفىّ
وتبدأ الاستعدادت لكسر الخليج 
او جبر الخليج كما كان يقال
كسر الخليج دى جاية من انه كان بيتعمل سد كدا
يمنع المية مؤقتا لحد ما تعلى وراه
وف يوم الاحتفال كان بيكسروا السد دا
 فتندفع المية ف الخليج





المهم انه الناس وقتها بتبدأ تنصب خيام على الشطين
 وتستعد للاحتفال والخليفة نفسه كان عامل "منظرة"
حاجة زى منصة كبيرة حواليها زرع يا ولاد للفرجة
العزيز بالله الفاطمى 
حبيبى الراجل دا قوى
 كان عامل منظرة السكرة .. اسمها كدا والنبى
المقريزى حكى واتحاكى عنها 
قائلااااااااا 
وخدوا بالكم
" وقد وقعت المبالغة فى تعليقها وفرشها وتعبئتها
وقدم بين يديه الصوانى الذهب التى وقع التناهى فيها
 من كل الجهات من أشكال الصور الادمية
والوحشية من الفيلة والزرافات ونحوها
المعمول من الدهب والفضة والعنبر المشدود
والمظفر عليها والمكلل باللؤلؤ والياقوت والزبرجد 
وعليه عدة من الرجال عليهم اللبوس تشبه الزرديات
وعلى رؤوسهم الخوذ ويايديهم السيوف المجردة والدرق
 وجميع ذلك فضة 
ثم صورة السبع المصنوعة من العود
وعيناه ياقوتتان حمروان"
 يا لهوى غطينى وصوتى ياما !
 العزيز بالله دا كانت ايامه فيها خير لا يعد ولا يحصى
طيب المنظرة وهيقعد فيها الخليفة يبتمنظر
ويتفرج على الاحتفالات
 ملوش خيمة الغلبان دا يقعد فيها من نقحة الشمس عليه ؟
 له طبعا 
وخيمة معتبرة
كانت أكبر الخيام حجما ومهندسين هما اللى ينصبوها
واسمها "القاتول"
ليه كدا يا ولاد ؟
 قالك اصل اول مرة اتنصبت
وقع وتد على 2 عمال قتلهم .. فخدت الأسم دا !




بس ويخرج الخليفة الفاطمى تاااانى من قصره
"موكب كامل يتقدمه اربعون نافخا للأبواق الذهبية والفضية
على الخيول يتبعهم راجلون بأبواق نحاسية"
ويوصل لخيمة القاتول ويقعد فيها
الاول يقروا قرآن ف وجوده
 واللى عنده شعر يتمحلس بيه يقوله
ويتمد سماط الاكل والحلوى 
وجو من الأنس والبهجة
 ثم يقوم الخليفة يروح المنظرة
هذا وقد تفضل جلااااااالته ...
ويروح كدا واقف ف المنظرة
ويشاور بإيده للعيال
العيال تروح كاسرة السد ..
 النيل يتدفق ..
وهيصة وزغاريد وهييييه






وطبعا مفيش داعى أقول انه اثناء الاحتفالات دى
 بتمد موائد عامرة بكل ما لذ وطاب
وينول الغلابة منه جانب كبير
 زائد الفلوس اللى بتنثر ع الرؤوس



وراحت أيام الفاطميين وراح عزهم
وجه الأيوبيين صلاح الدين كان منشفها
وجو اجيبلكم منين والبلد بتحارب الصليبيين
وهتاكلوا مصر يعنى !!!
بس كل من تبعه حافظ على الاحتفال السنوى بقدوم الخير
 لحد ما جه الصالح أيوب
وبيقولوا ان النيل حول مجراه لوحده كدا ناحية الغرب
 ليه ...  حد زعله لازم !
المهم الصالح أيوب هيسكت ؟
 لأ طبعا
 راح مادد الخليج لحد المطرح الجديد
وحافظ على الاحتفال كمان هو
 دهن عامود المقياس 
كسر الخليج 
نثر الدهب 
البهجة والاحتفاء .... الخ




وراح زمن الأيوبيين وجم المماليك
والظاهر بيبرس اهتم بالبلد واحوالها
وبنى قنطرة ف السيدة يمر عليها الناس
 من جهة للتانية عليها .. 
ايه ؟
عليها اسدين زى بتوع كوبرى قصر النيل كدا
 بس من الحجارة وسموها "قنطرة السباع"
فضلت موجودة لحد ما السباع واحد لعب فيها خرشمها
 اسمه صائم الدهر
الراجل دا "صايم الدهر"هوه اللى بينسبوله
 واقعة كسر مناخير ابو الهول #المقريزى_بيقول
 مش نابليون اللى عملها كما هو شائع 




القصد
 المماليك حافظوا على الاحتفالات كما هى
 لحد ما راح زمنهم وجم وش الخراب .. العثمانيين
واللى ف عهدهم الأسود شح الخير والفرح
ويقال ان الاحتفالات كان اغلب المستفيدين فيها
هما رجالات الدولة والامراء وخلافه
اما الشعب العادى فكان مطحون
 ومبيلحقش يفرح اساساااا





وقعدنا ف أيام العثمانلية السودة منقطة بكحلى دى
 لحد ما بوطيانهم خلونا لقمة سائغة للمحتل
 اللى هييجى من فرنسا سنة 1798 
الشهادة لله الفرنساوية كانوا حريصين أشد الحرص
 على الاحتفال بأى حاجة تخص المصريين
عشان يعملوا أى وضع 
ويفرضوا نفسهم غتاتة غلاسة كدا
اول وفاء للنيل ف عهد الفرنسيس
 كان بعد دخولهم بأسابيع قليلة




نابليون قال لأعضاء الديوان انا جاى أحتفل معاكو
 ويوم 18 اغسطس 1798
 لبس بونابرتة الحتة الزفرة
وراح ع المقياس وسط أركان حربه وجنرالاته وعساكره
 اللى اصطفوا ع الجانبين ومزيكا وأفلام انتوا عارفينهم 
ف انتظاره كان أعضاء الديوان واغا الانكشارية
واعيان المصريين وكتخدا الباشا وقاضى المقياس
واطلقت مدافع لتحية بونابرتة
ثم اشار بإيده جاك كسر ايده ..بكسر السد
وفتح الخليج بعدها رموا عروسة نيل خشب
ثم نثر سعادته عملات فضية ودهبية ف النيل ...




مؤرخوا الحملة الفرنسية بيقولوا
 ان المصريين فرحوا قوى بنابليون
وانه جه يخلصهم من الظلم وبتاع
لكن الجبرتى بيقول العكس ان الاحتفال كان فاكس
بيقولك نصا :
"وأﻣﺎ أﻫﻞ اﻟﺒﻠﺪ ﻓﻠﻢ ﻳﺨﺮج ﻣﻨﻬﻢ أﺣﺪ ﺗﻠﻚ اﻟﻠﻴﻠﺔ ﻟﻠﺘﻨﺰه
فى المراكب على اﻟﻌﺎدة ﺳﻮى اﻟﻨﺼﺎرى اﻟﺸﻮام واﻟﻘﺒﻂ
والافرنج البلديين ونساءهم وقليلا من الناس البطالين
 الذين حضروا فى صبحها "
 يالهوى ع الجبرتى وتعصبه
غير المسلمين عموما كانوا عاملينله هسس
 يلا







القصد سنة 1799 كان نابليون رجع فرنسا
وجه مكانه كليبر اللى محضرش الاحتفال
لأنه كان بيقتل ف مصريين ف حتة تانية ومش فاضى
 قوم بعت دوجا حاكم القاهرة
وعمل زى المعتاد راح المقياس
وأشار بكسر السد ونثر الذهب
والجبرتى النوبة دى كان شايل ومعبى
 وقال انه حصل هتايك كتير وخلاعة ومجون الخ 
"ذهبوا تلك الليلة الى بولاق ومصر العتيقة والروضة واكثروا المراكب ونزلوا فيها وصحبتهم الآلات والمغاني 
وخرجوا في تلك الليلة عن طورهم ورفضوا الحشمة
 وسلكوا مسلك الامراء سابقا
 من النزول في المراكب الكثيرة المقاذيف
وصحبتهم نساؤهم وقحابهم وشرابهم
وتجاهروا بكل قبيح من الضحك والسخرية والكفريات
 ومحاكاة المسلمين وبعضهم تزيا بزي امراء مصر
 ولبس سلاحا وتشبه بهم وحاكى الفاظهم
 على سبيل الاستهزاء والسخرية وغير ذلك
واجرى الفرنساوية المراكب المزينة وعليها البيارق
 وفيها انواع الطبول والمزامير في البحر
ووقع في تلك الليلة بالبحر وسواحله من الفواحش
 والتجاهر بالمعاصي والفسوق مالا يكيف ولا يوصف
 وسلك بعض غوغاء العامة وأسافل العلام ورعاعهم
مسالك تسفل الخلاعة ورذالة الرقاعة
 بدون ان ينكر احد على احد من الحكام او غيرهم
 بل كل انسان يفعل ما تشتهيه نفسه وما يخطر بباله
وان لم يكن من امثاله
واكثر الفرنسيس في تلك الليلة وصباحها
 من رمي المدافع والسواريخ من المراكب والسواحل
وباتوا يضربون انواع الطبول والمزامير
وفي الصباح ركب دوجا قائممقام
وصحبته اكابر الفرنسيس واكابر اهل مصر
وحضروا الى قصر السد وجلسوا به
واصطفت العساكر ببر الروضة وبر مصر القديمة
باسلحتهم وطبولهم وبعضهم في المراكب
 لضرب المدافع المتتالية
الى ان انكسر السد وجرى الماء في الخليج فانصرفوا "





وبس كدا شكرا يا عمنا
 عرفنا انه الفرنساوية بوظوا اخلاقنا ع الآخر ...
وهيا شوية والبلد ولعت .. مقتل كليبر
وثورة القاهرة التانية والغرامات اللى اتفرضت ع الخلايق
الناس كانت مرعوبة ورغم ن اللى خلف كليبر
كان لين الطبع شوية عنه .. مينو أقصد
النيل على الحظ فاض بزيادة سنة 1800
والجبرتى مجبش سيرة أى احتفالات ف النكد دا
 واكتفى بقوله :
 " في هذه السنة زاد النيل زيادة مفرطة لم يعهد مثلها 
فيما رأينا حتى انقطعت الطرقات وغرقت البلدان
 وطف الماء من بركة الفيل وسال إلى درب الشمسي
وكذلك حارة الناصرية
 وسقطت عدة دور من المطلة على الخليج
ومكث زائدا إلى آخر توت"





 والسنة اللى بعدها على ما جه أغسطس
كان الغزاة رحلوا والحمدلله وجبروتا بيقول
"ركب محمد باشا المعروق بأبى مرق
المرشح لولاية مصر فى صبح هذا اليوم الى قنطرة السد
وكسروا جسر الخليج بحضرته وفرق العوائد
 وخلع الخلع وننثر الفضة والذهب " 
وشكراااا
وذهب الفرنسيس وعاد العثمانلية وكام والى
وأقلب
واخدها على حجره .. محمد على سنكفولة
 حبيبى وروحى روحى روحى كدا 
انتوا هارشينه اكتر منى بقى المفروض
الراجل بتاع احتفالات وانبساط
وفلوس تترمى ف الأرض كدا
ومترجعلوش اضعاف مضاعفة ؟
 بتهرجوا 
الراجل قال اشتغلوا وازرعوا وادفعوا ضرايب
 وساهموا ف حسياب تحيا مصر
وهتدفعوا هتدفعوا
 والاحتفالات تبقى ع الضيق اجيبلكوا منين 
مفييييش



الملخص احتفالات عيد وفاء النيل ف عهد محمد على
 ومن جاء بعده من ابناء واحفاد
كان ف اطار رسمى بحت
وفضل كدا منشى ورخم وسقيل زى وشهم كلهم
محافظة القاهرة كانت قبل وجود راديو وبتاع
بتلجأ للطريقة القديمة انها تبعت منادين يلفوا الشوارع
يعلنوا ان النيل وفى 
والبحر زاد 
وزفة وكدا
المراسم كانت رسمية قوى





جرنال الاهرام ف بدايات عهد الخديوى عباس حلمى التانى
 نشر الأتى عن احتفالات وفاء النيل قائلا 
1892 الكلام دا
"كان مهرجان جبر الخليج مساء امس
 قرة لعيون المصريين ومسرة لخواطرهم
 التى ألفت عادة هذه الحفلة وتتوسم فيها الخير للعام كله
فلم تكاد الساعة تبلغ الثامنة حتى اخذ المدعوون
 يتوافدوان على السردقات البديعة التى اعدت
 كالمألوف على دكة فم الخليج
من الحرير الملون المعلقة فيها المصابيح
والثريات الباهرة وكانت المراكب فى البحر غاصة
 بالجماهير " 




والعادة قعدت كام سنة بهذا المنظر
 ثم ..قناة السويس كانت شغالة بقالها مدة
وغطت حكاية التجارة والمراكب
وتم إنشاء شركة مياه القاهرة
اللى مدّت أنابيب المياه النقية لأحياء كتير
بقت الحاجة لهذه التفريعة شبه معدوم
 خصوصا ان الناس الساكنة على الخليج
 بدأت تهمل فيه وبقى مصدر للأوبئة
 وتحول لمستنقعات 
عادتنا ولا هنشتريها





قوم طلع قرار من الحكومة
 اللى راكبها الانجليز ومدلدين
بضرورة ردم الخليج المصرى دا
لحسن مبقالوش عازة خلاص وفعلا حصل 
وسنة 1897 طلع الخديوى مرسوم بردم الخليج المصرى
والسنة اللى بعدها كان تم المراد
وتم تسيير اول ترام ف القاهرة كلها ف هذا الشارع ..!






سنة 1899 الكلام دا لما اتعمل ترام
 يربط بين أحياء غمرة وباب الشعرية
والسيدة زينب وقصر العيني



وروح يا زمان وتعالى يا زمان
 وجم الظباط الاحرار
والبغدادى اللى بقى محافظ القاهرة
فعمل حركة تغييرات كبرى ف الشوارع
 منها شارعنا اللى كان قناة
واتغير اسمه من شارع الخليج المصرى
الى شارع بورسعيد تيمنا ببطولات المدينة الباسلة
 اللى لاقت الشدة ف العداون الثلاثى 1956





ونركز بقى كويس عشان الحتة دى
 اتغير اسمها مرارا وتكرارااااا
 الاول كان اسمها قناة سيزوسترس
 ثم قناة تراجان
 ثم خليج امير المؤمنين
ثم الخليج الحاكمى نسبة للحاكم بامر الله
ثم خليج اللؤلؤة لوجود قصر عظيم على شطها اسمه كدا
 ثم اخيرا بقى .... الخليج المصرى 
واتردم وبقى .... شارع الخليج المصرى
واخيرااااا ... شارع بورسعيد 




والاحتفالات قعدت لحد ما اتبنى السد العالى
اللى حجز المية وراه ومبقيناس منتظرين معاد بعينه
ولا مستنيين كام دراع ينقص ولا يزيد
ولا حاجة تغرق ف سكة الفيضان ولا حاجة
واقتصرت الأحتفاء على مظاهر بسيطة
يشغلوا اغانى ف الأذاعة والتليفزيون
يعرضوا فيلم عروسة النيل 
يشغلوا النافورة اللى ف النيل قرب الدقى دى
وشكرا ... 
لحد ما تلاشت بمرور السنين المناسبة دى
من خريطة الاعياد اللهم الا الذكرى
وفقط 
ووفاء ... وفااااء ... وفااااااء 
راحت وفاء





 وانا خلصت ويتبقى اخر كام حاجة ..
 منهم ان الخليج المصرى كان ف توقيت ما
هو سكن علية القوم والأغنياء 
خصوصا ايام المماليك وما بعدها 
وف لوحات الرحالة والفنانين اللى فتنوا بجمال الخليج
 والبيوت المطلة عليه
وكأننا بنشوف فينيسيا يا عيال
 :)) 



شارع بورسعيد .. الخليج المصرى سابقا
اللى كان قناة طولها معدى الـ 46 كيلو متر
 وعرضها من 5 - 15 متر ف بعض المواضع
الشارع يقال انه أطول الشوارع طولااااا 
وهتلاقوا فيه شوارع متعلقة بالحدث .. 
شارع السد - شارع السد البرانى - فم الخليج
قنطرة الدكة .. الخ



الخليج المصرى كمان اتبنى عليه قناطر ف كذا مكان 
عشان الناس تعدى منها من جهة للتانية 
سواء كان موسر ومعاه فلوس حابب يعمل خير
زى الامير موسك .. صاحب قنطرة الموسكى 
 او حد ف الحكم   زى بيبرس وقنطرة السباع 
وكتييييير عملوا كبارى صغننة تعدى منها الناس
ويمر من تحتها النهر 





ويتبقى اخر ملاحظاتشى

 1) المصرى القديم كان بيرمى فاكهة
ووز وتماثيل ورسايل بأمنياته ف النيل
كدا احنا اول ناس بدعنا الرسايل 
بس مش ف ازايز
 :)





2) حد ملاحظ ان النيل من فوق يشبه زهرة اللوتس
 اللى كانوا بيرسموها كتير زمان ؟!
 يكونش العالم دى كانت واصلة علميا لكدا ؟ 






3) على رأى سعدية @sa3deaselim
زمان كانوا بيحطوا ف النيل زعفران ومسك
واحنا دلوقتى بنرمى فيه بلاوى زرقا ... !







4)  حوار عروسة النيل دا كان عاملى هسس
 الحمدلله انه اسطورة
محمود مختار عملها تمثال
ولا اجمل





وفقط لكن ميمنعشى أعلن محبتى
لاجمل عروسة نيل ف الدنيا




اجمل قصة بينها وبين بتاع الجاز :) 




ويقال ان النيل هوه اللى كان العريس
 اما عروسته فهى الأرض
اللى بفيضانه عليها بتعيش وتثمر
رشدى أباظة يا جماعة ... مش هتكلم كتير







5) منطقة فم الخليج اللى كانت ف الرسومات 
حاجة حلوة وتشِرح القلب 






بقت مزبلة حرفيا 


واخير دا بوست غلبان على قد حالاته
 كتبته زمان عن عروسة النيل .. هنا 
عله يعجبكم
ولا انا هدخل بإيدى فاضية على الاحتفال كدا 



الحكاية النهاردة من :
(1)
القاهرة شوارع وحكايات 
 حمدى أبو جليل 
(2)
الحملة الفرنسية وخروج الفرنسيين من مصر
محمد فؤاد شكرى 
وعديد من المقالات ف مختلف المواقع ع النت 



وتوتة توتة .. تصبحوا على ألف خير


==================




Dr.Ahmad Farouq @unbeatable_thun 
 بلد النيل و الخير الوفير ..
 العرب حين يصفون مصر ... قديما 
:)


4/26 .. @rtcr2222 
 الوردة الذهبية 


سعدية سليم @sa3deaselim 
وفيه أقاويل ان يوم الزينة يوم شم النسيم


ibrahim abdelmeguid @ibmeguid 
 وفيه اقاويل ان مافيش موسي اصلا
ولا جه مصر ولا حاجة 
 ههههههه


سعدية سليم @sa3deaselim 
 احنا الأيام دي بنقدس النكد والهم
والحياة دي اخر حاجة بنفكر نعيشها صح


معنديش صحة أتناقش @AShohdy67 
وانا اقول الكساء الشعبي مرجعيته التاريخية ايه ؟؟
كنا بنلبس كلنا شبه بعض في حلوان


سعدية سليم @sa3deaselim 
 بذمتك في حد حكم مصر ومانصبش على الشعب؟


سعدية سليم @sa3deaselim 
الراجل ده كان عنصري 
ده ناقص يقول مصر للمسلمين فقط


Mohamed Osama @M7mdMansor 
مش فاكر قريت فين إن أبن العاص بنى مقياس الروضة
 وعمله بطريقة مختلفة عن اللى متعودين عليه
عشان حوارات الضرايب برده


Mohamed EL-Boghdadi @m_elboghddadi 
انتى ست العارفين النيل دلتا النيل شكلها اختلف
 بسبب ردم المستنقعات وباقى فروع النيل
والتمدد العمرانى والزراعى
 :)



سعدية سليم @sa3deaselim 
أحلى بتاع جاز
:)))))))



Ghada Badrawy @Ghada75 
 فيلم مهما أشوفة ماشبعش منه


WTHend ‏@HendZayed   
 شهادة المتوفي وقت الحساب تبدأ بـ
"اقسم بأنني لم ألوث ماء النيل"



 HEMA ‏@hema_abdella  
 قدماء المصريين كانوا عفاريت في الجيولوجيا 
و الطوبوجرافيا
متستبعديش

هناك تعليقان (2):

  1. لازم تبقي وزيرة تعليم عشان لو التاريخ اتدرس للأطفال بالبساطة والتشويق دا هيبقي ليهم مستقبل بجد

    ردحذف
  2. شكرا على المقال الرائع. للتوضيح لقد أجمع المؤرخون أن المصريين على مر العصور كانوا يرمون الى النيل بقربان على شكل دمية أو سمكة أو غير ذلك طليا للفيضان فأراد عمر بن الخطاب أن يبعدهم عن الشرك بالله وهذا أقرب الاحتمالات

    ردحذف

Related Posts Plugin for WordPress, Blogger...
"حقوق الملكية والملوخية والمهلبية ... الخ
محفوظة للست شهرزاد وإياك حد يسرقها ويحاول يزعلها آغجر .. مفهوم ؟ "