الثلاثاء، 8 مارس، 2016

قـــالــــوا فى المثــــل .... 3







مساء الخير يا عيال
 وعودة يارب علها لا تنقطع تانى
 لأنكم وحشتوناااااا .... جدا







رغى النهاردة هيكون اقتباسات من كتاب
"الأمثال العامية"
 واللى جمعه ورتبه الحاج أحمد تيمور باشا 


نبتدى ...






"آخر خدمة الغُز علقة" 
والغز هنا يعنى الغزاة
والمقصود بيهم الأتراك اللى طلعوا عين الشعب المصرى
 من اول ما حطوا رجلهم فيها
والمثل دا مش احنا اللى نقوله
يقوله كل واحد خدم حد بعينه عشان فاكر انه هينجو
فإذا بيه بياخد فوق نافوخه ف النهاية 
وقولوا بقى اسامى للصبح




"ست وجاريتين على قلى بيضتين"
وبيتقال للى بيعمل هيصة ويلم هوليلة
على حاجة بسيطة 
ومتستاهلش كل الدوشة دى يعنى !




" سلم من الدب وقع فى الجب "
 ودا مثل ينطبق على مصر حرفيااااااا
كل ما نخرج من مصيبة نخش ف كارثة 
ويا قلبى لا تحزن 





" السنة السودة خمستاشر شهر "
دا بقى التقويم المصرى بتاعنا
 :) 




" ابن الكبة طلع القبة وابن اسم الله خده الله"
 الكبة هى الورم الناتج عن الطاعون
والمثل بيقول انه ممكن 
جدا كان حد عفش و"غير متوقعله" يعلى ف المقام 
هوه اللى يعلى واللى كان متوقعله هوه اللى يخسر 
عادى




" اتغندرى وقولى مقّدرى "
 دى بتتقال عن كل واحدة قررت 
تمشى ف السكة البطالة
وتكمل فيها
 وتتحجج بأنه النصيب والمقسوم والمقدر 
والوعد والظروف الخ الخ





"سيدنا موسى مات ناشف طرى هات"
 دا من امثال اليهود
وبينضرب للى ما صدق خلص من التزام ما كان خانقه
وبيخربها بقى ويعيث فسادا وميهموش حاجة تانى





" شامتة ومعزية "
دحنا ف توتير لما حد مؤذى ربنا يفتكره ويخلصنا
فنقعد نعدد ف سيئاته
بس نقول الله يرحمه
:) 




"شنق ولا خنق قال كله فى الرقبة "
المثل دا بيفكرنى بأيام استنخابات الرياسة
وهما بيسألونى مقاطعة ليه .. ؟!!!




" صحن كنافة وجنبه آفة "
 دا يتقال لأى "اع لامى" لامؤاخذة 
فجأة افتكر يعارض النظام
 وبيطلع يتكلم عن الثورة والحق والعدل
اللى هوه ايه .. مالك ان شاء الله .. ؟!!




"اطلب الهين يضيع الحق البين"
 دا إحنا لما حسبناها غلط ف بداية الثورة
وعملنا زى ما هيكل قال .. طلعنا القمر وطلبنا كباب
:((



"العار اطول من العمر"
 آه يا كل ولاد الوارمة وعيشوا قد ما تعيشوا
الخطايا لزقت فيكم
والتاريخ كتبها خلاص



"عامل لمونة فى بلد قرفانة "
 بشوفهم كتير ع النت وافى الواقع
هولاء الاخوة المنظرين اللى مش عاجبهم حاجة
وهما بس اللى فاهمين والباقى كلهم غلط وحمير وكدا




" عتبة زرقة تيجى فرقة تروح فرقة "
ودى بتتقال عن ناس قِرفتها بتبقى فحلوقى
 ووشهم شرارة كدا 



والعتبة الزرقة ليها قصة 
انتوا عارفين ان العتبة الخضرا كان اسمها الأول
 " العتبة الزرقا"
لأن احد البيوت الكبيرة زمان كانت سلالمه لونها ازرق



قوم اشتهرت الحتة دى بكدا لحد ما جه الوالى
"عباس حلمى الاول" ومكنش بيحب الازرق
وبيتشاءم منه جدااااا 
قوم ايه ؟
راح مشترى البيت دا ومغير لون عتبته للأخضر
ومن يومها اتغير الإسم للعتبة الخضرا
وبقت تتقال للى تتوسم فيه الخير والحظ
وزمان مكنوش بيحبوا الأزرق
ولما حد يحب يأذى يقولك نشتغلوه فى الازرق .. !
 :)



"عرايا مقفقفين جابوا بعشاهم ياسمين"
 دى تتقال للمخفى اللى ماشيلنا على سجادة بألاف مؤلفة
 وطالع يكلمنا عن التقشف والبلد مش مستحملة 
قول لنفسك .. !




" العقربة اخت الحية "
دى تتقال لكل حد إتلم على حد بدون مناسبة
فبقوا زى بعض حتى لو اختلف شكلهم
لكن النوايا والأهداف بيتلاقوا





" طوّل الغيبة وجه بالخيبة "
دى حاجة زى فيلم عودة الإبن الضال كدا 




" صرصار الششمة والقبقاب عملوا عينا اصحاب "
الششمة يعنى المرحاض
والمثل دا بيفكرنى بالبرلمان وأطيافه وائتلافاته
واللى بيدعوا فيه الاختلاف لكن كلهم عجينة واحدة
وكلهم ملمومين على خرابنا 




" ضرب الحاكم شرف "
 المثل دا بشع قوى انتشر ايام المماليك
واضح ان المذلة ف البلد لها جذور عميقة .. للأسف
 :(


" اشترى بدرهم بلح بقاله فى الحى نخل "
 المثل دا بفتكره كل ما حد اخوانى او اسلامجى
يتكلم عن ثورة يناير بحرقة 
ويقول مكلمين فيها وهننتصر للثورة بتاعتنا وكدا








" غسّله واعمّله عمّة قال انا مغسل وضامن جنة ؟ "
ودا بيتقال للى بيطلب تأكيد لحاجة ف علم الغيب
 ومحدش يقدر يضمنها ...





"الفشر والنشر والعشا خُبيزة "
 دى بقى تتقال عن أى تصريح
 لسيات اللوا"مهاب مفيش"عن قنات السويز الجديشدة





" الفقير لا يتهادى ولا يتدادى 
ولا تقومله ف الشرع شهادة " 
مثل بيعكس حقيقة الطبقات الاجتماعية ف مصر 
واللى متغيرش للأسف
الغلبان ف البلد دى ملوش دية
 :((




"اضرب الطينة ف الحيطة ان ما لزقت علمّت "
ودا تقريباً اول درس بيتعلموه اع لاميو الزمن الحالى
و فن الأفتراء وترويج الشائعات




"اعمل حاجتى بايدى ولا اقول للكلب يا سيدى "
 ودا عكس المثل بتاع
"ان كانلك عند الكلب حاجة قوله يا سيدى"
حلوة التعددية ف الأراء دى 
:)




" أقوله آغا يقولى ولاده كام؟"
الاغا مبيخلفش يا عيال عشان شالوا منه الأشياء
ودا اخو المثل بتاع
"نقول تور يقول احلبوه"




" اكمن ابوك سنجق داير ف حل شعرك "
السنجق دى ايام المماليك كان زى حاكم مديرية كدا
 وبتتقال لأبن صاحب السلطة لما بيستغل نفوذ ابوه






"قرد وحارس وبياع مكانس "
دى تتقال على كل واحد كانله شغلانة
وبيفتح ف سبوبات تانية ملوش فيها
وافتحوا القوس واكتبوا اسامى للصببببببببح






" لا يفوته فايت ولا طبيخ بايت "
دا المبرشط اللى راشق ف أى مصلحة 




امثال كريستان ديور بقى
"لبس البوصة تبقى عروسة "
" لبس الخشبة تبقى عجبه "
" لبس الخنفسة تبقى ست النسا " 



" من باعك بيعه وارتاح من قهره
وان كنت عطشان لا تورد على بحره "
تمام كدا
مضبوط



" اللى قيدنى بيفتلك "
وأكلت يوم أكل الثور الأبيض
ونخلى بالنا ويعنى نحاول نتعلم من دروس التاريخ شوية 




الامثال المقرفة بقى
" اللى يتف تفه ميلحسهاش "
 ودى تتقال عن الوعد اللى يخرج منك
ومترجعش فيه .. الا كدا يجيلك مغص وترجيع وشغلانة 




" اللى يعمل ايده مغرفة يصبر على ضرب الحلل "
 المثل دا بيفكرنى بالثورة
واننا مهما حصل لازم نتحمل ... ونكمل 
لازم 


" اللى يعمل ريس يجيب الريح من قرونه "
دا بيتقال على ريس المركب اللى مجبر يمشى سفينته
ويتحمل المسئولية ميقولش مش قادر
ودا يتقال لبتوع النحنوح اللى تقولهم يتحاسب
يقولولك اصله واخدها خرابة ويعمل ايه يعنى .. !!




" اللى يكدب يوم الوقفة يسود وشه نهار العيد "
ودى بتتقال لكل اللى سرحوا بينا
زى "الكدب ملوش رجلين" كدا 





" امه عياشة وعامل باشا "
وهتعمل بنت ناس بنت بياعة الجزر 
جاية الحارة عفشها على عربية كارو وكله معروووف
ايوه .. مش علينا يعنى
كل واحد معروف أصله وفصله وهارشينه 


" انا فيك بدادى وانتا بتقطع اوتادى "
ليه بس يا بنى .... ؟ 



" ان كان بدك تنكيه اسكت وخليه "
تنكيه جاية من النكاية يعنى غيظه وأسكت ومتعبروش
قوم يتفرس أكتر
وعلى رأى الشاعر
اذا نطق السفيه فلا تجبه .. فخير من اجابته السكوت
#اتعلم_الكيد




" ان كنت ع البير اصرف بتدبير "
 المثل دا يتقال للنظام الموكوس المتعوس الفلحوس
 اللى الدولار ف عهده بقى بعشرة جنيه
ولسه ...




"ان لبسوا الكلب الكشمير ومشوه ف النقارة
 مينساش قولة كشكش ولا نومه ف الخرارة "
ملقتش صورة أوقع .. الخرارات بتجيب بعضشيها



" هاتوا من المزابل حطوا على المنابر "
يا لهوى على حكمة المصريين
واضح ان من زمان شيوخ الفتة موجودين وقاهرينا ..




" يا واخدة جوز المرة يا مسخرة "
ودى مثل من قبيل الحرب النفسية والاعلامية
 اللى تشنها كل زوجة اولى على الزوجة التانية 




" من رادك ريده ومن طلب بعادك زيده "
 آه والله
 آه والله
 آه والله



"علامة القيامة لما تشرب من الحيط
وتشوف النور فى الخيط"
والمثل دا قيل قبل احتراع الحنفية والكهربا
عرفوا ازاى
ركبوا آلة الزمن دول  ولا ايه ... ؟؟ 




"عامل زى القنفد .. لا ينحضن ولا ينباس "
ودا يتقال للناس اللى مهما تحبهم مبينفعشى
ويسيبوك ويمشوا ف النهاية
وتبقى عاوزتقولهم ... 







" تاكله يروح تفرقه يفوح "
ودا بيتقال عن الاحسان للغير وكأنه عبير ومسك
وفى مثل آخر " اللى عند الله ميضعش"





" جندى ما عجب شيع طرطوره "
دا بفتكره لما النظام يبلطج 
ويبرشط على أى جنازة شعبية
 واللى هيا رزالة وتلقيح جتة واهو غلاسة كدا 




" جيب اتاجر ف الكتان ماتت النسوان "
دا اخو مثل 
" جيت ابيعك يا حنة كترت الأحزان "
 وانتا اللى اصلا وشك فقر 
وبتموت زباينك المحتملين نعملك ايه ؟؟؟





" خواتم ترصف فى ايدين تقرف "
 معرفش ليه المثل دا فكرنى بفيفى عبده وأحلام
وما شابه .. ؟!! 




والمثل دا إلى كل محبى الكيرفى
والظاهر دول من زمان يا ثاااامح
" الراجل زى الجزار ميحبش الا السمينة "





" راحت الناس وفضل النسناس "
دا يتقال لكل الشهدا
ولكل الناس النضيفة اللى اختفت من المشهد
 بينما الفلول اللى قاعدين ف وشنا يقرفونا
وزى " ما يقعد ع المزاود غير شر البقر "




" خراب يا دنيا عمار يا مخ "
وفى قول آخر
 "ياكش تولع"



" باب الحزين معّلم بطين "
ودى المفروض يكتبوها على يافطة الدخول
 من مطار القاهرة
بدل " ادخلوها باذن الله آمنين" 




واخيراااا 
المثل دا تقريبا كدا بيلخص قصة حياتشى .. فى جملة
" عمل ولا ما عمل متعوس وخايب الامل" 



 تصبحوا على ألف خير

--------------------------


 Hany Zaky ‏@Hany_Zaky  
 لا يا طمطم، الغز من صنوف المماليك
 كما يقال "الغز والديلم" والديلم دول صنف تانى



سعدية سليم @sa3deaselim
 وجيت أشتغل مسحراتي خلص رمضان



حازم الصعيدى @HazemElsaidi 
 العيش مخبوز والميه في الكوز
جات الحزينه تفرح ما لقيت مطرح
عمشه وعامله مكحله
الطلقه اللي ما تصبش تدوش
العروق تجمع بعضها
 النار ولا العار
يوضع سره في اضعف خلقه
عامل من الحبه قبه


 سعدية سليم ‏@sa3deaselim 
 فيه مثل تاني بيقول
" عريان الط** يتأمز أميز ويقول باب الخماره فين "


 الزُّمُر ‏@elzomor13  
 كان فيه كذا مدرسة للأمثال واضح كده :"D


 Ayman Hantish ‏@aymanhantish 
 الراجل مميز في الفشر حقيقي


 كالحياة انا متناقضات ‏@redrose1973  
الموضوع تخطى الفشر
الموضوع انه وصل لقمة الهرتلة والكلام الفارغ


Mohamed Emam @memam8 
"عامل زى القنفد..لا ينحضن ولا ينباس..ولا يتلعب بيييه "


Ayman Hantish @aymanhantish
ملحوظه مميش الوحيد من مجلس طنطاوي
اللي موجود في الصورة


Heba @HappyGeddan
 الهدمة النضيفة تخللي الخدامة مضيفة



 Heba ‏@HappyGeddan 

 دا بيلخص حياه شعب 
😂


Emmy Az Az ‏@EmmyAzAz  
يا واخدة القرد على ماله ...

يروح المال و بفضل القرد على حاله..... 

ليست هناك تعليقات:

إرسال تعليق

Related Posts Plugin for WordPress, Blogger...
"حقوق الملكية والملوخية والمهلبية ... الخ
محفوظة للست شهرزاد وإياك حد يسرقها ويحاول يزعلها آغجر .. مفهوم ؟ "