الاثنين، 4 أبريل 2016

مصــــر فى صــــور .... 13




مساء الخير عليكم 
 مصر .. ف حبة صور 
الصور النهاردة ..مصرية صحيح 
لكنها تحمل الجنسية الامريكية
أينعم .. 
أصلها اتخدت ف مصرزماااااااان 
لكن بعدين سافرت على امريكا
واستوطنت فى احد المتاحف .. فى مدينة نيويورك 





ولأن المصور أو مجموعة المصورين 
كانوا مجهولين .. للأسف 
فقد عرفت مجموعة الصور دى 
بـ "مجموعة متحف بروكلين"


 


 ايه بروكلين دى ومتحفها 
وايه حكايته يا شهرو 
هنقول اهو




متحف بروكلين للفنون
 The Brooklyn Museum of Art 




وبيقولوا انه اتبنى سنة 1895 يا عيال 




وزى ما هو واضح من اسمه كدا 
اتبنى عشان يختص بجمع مقتنيات فنية
مش بس امريكية لكن من العالم كله 




يعنى هتلاقوا فيه مجموعات نادرة ومعتبرة 
من اعمال وفنون الشرق الأوسط وأفريقيا
 والمحيط الهادى والأمريكتين 



وطبعا بما ان مصر حضارتها من اقدم الحضارات
 ف الشرق .. والعالم 
ليها قسم خاص ف متحف بروكلين 
حاجة كدا مفتخرة 




ويحضرنى ف هذوها المناسبة اقول .. 
ان متحف بروكلين للفنون 
يعد تانى أكبر متحف ف نيويورك 
بعد ... 


 

المتحف الامريكى للتاريخ الطبيعى
  American Museum of Natural History 




دا اللى اتعمل فيه فيلم .. Night at the museum
بأجزائه المتعددة 
الناس اللى بتعرف تقدر الجمال والثقافة 
وتروج للتاريخ وتحبب فيه البشر يعنى #بس_بقول 




المهم
كل الرغى دا عشان نوصل لاحد المقتنيات ...
مجموعة الصور بتاعت مصر فى اوائل القرن الماضى 
وما قبله كمان بشوية بسيطة
اشمعنى دول يا شهرو ؟
معرفش 
بحبهم جدا جدا



وأصلهم معمولين بطريقة الشرائح
 Lantern Slide
معرفش اسمها بالعربى البتاعة دى
كان عندى منها واحدة زمان
اشترتها من معرض الكتاب 
بس راحت لصاحب نصيبها بقى 




اللى يعرفوها .. فاكرين ازاى الصورة بتبقى صغننة
وتحطها ف بتاعة كدا 

 

توجهها ناحية الشمس او اضاءة قوية 
فتشوف الصورة جميلة ومبهجة 


 


مجموعة الصور اللى جاية 
كلها متاخدة بالكيفية دى 


 


هما اتاحوها الكترونى
شالله يخليهم الحاج بروكلين 
وينجحله المقاصد 
يارب
لأنها تحفة تحفة لأبعد حد يا ولاد 
نبتدى 




جامع عمرو - مصر القديمة 
الواجهة 



جامع عمرو - مصر القديمة 
الميضة
مكان الوضوء يعنى 



جامع عمرو - مصر القديمة 
الاعمدة 
وبئر.. طبعا مبقاش موجود دلوقتى أكيد ! 


البئر موجود بس فتحته متساوية بالأرض و مغطينه بزجاج و في ناس بتيجي تدعي عنده و تتبارك بيه






كوبرى قصر النيل - 1 




كوبرى قصر النيل - 2 




كوبرى قصر النيل - 3 






كوبرى قصر النيل - 4 





قلعة صلاح الدين - القاهرة 




مسجد محمد على - القلعة 




صحن مسجد محمد على - القلعة 
واحد اشهر اساميه برضو 
 " مسجد المرمر" 



باب العزب - القلعة 
الباب اللى انقفل من جوا  ف وش المماليك
 يوم المدبحة يا ولاد 
فمعرفوش يخرجوا يا ضينايا


منهم من هرب قفزا من السور...






فندق شبرد - 1




 


فندق شبرد - 2
البهو 





فندق شبرد - 3 
المقهى الشهير فى الشرفة الامامية
بيبص على شارع ابراهيم سابقا - شارع كامل سابقا 
شارع الجمهورية حاليا 





فندق نيو هوتيل - ميدان الأوبرا
اللى اتهد .. معرفش ليه ؟
وبنوا مكانه .. فندق الكونتينتال .. برضو معرفش ليه ؟


نفسي افهم لية !!!! كان مبني من اجمل مباني القاهرة

دة احتمال بس واضح من تصميم المكان والمساحة حولية انهم كانو ممكن يكبروة ويحافظو علي التصميم الاصلي




  1. كان لاعادة تخطيط الميدان دة كان سبب الهدم



 

اسكنكرية الماريا  ...
احد شوارعها للأسف مكتبوش اسمه



دا شارع فؤاد اقدم شوار ع المدينه والعالم-دك منذ البطالمه-والى الان للشارع وقع وحضور خاص


تقريبا بنسبة 80%شارع فؤاد




  1. ده تقريبا احد شوارع النبي دانيال


 



عامود السوارى - 1 




عامود السوارى - 2 






عامود السوارى -3 







مسلة كليوباترا - اسكندرية 
او ابرة كليوباترا كما اشتهرت دوما 





مسلة كليوباترا - ابرة كليوباترا - اسكندرية 
ومقرها الآن بأمريكا .. يا ويكا 




تمثال محمد على 
 ميدان القناصل سابقا - ميدان المنشية حاليا  






جنينة الأزبكية - 1 




جنينة الأزبكية - 2 




جنينة الأزبكية - 3




شارع المعز 
الصورة دى بحبها بشكل مش عادى ! 


هو شارع المعز عشق فعلا ❤



 



سوق الحمير- الزمالك 
ايام ما كانت بتاعت الغلابة



 


سوق المواشى - 1




سوق المواشى - 2 




حمّل ع السوق خلينا نبيع يا وِلد





بيقولوا ... أسيوط 


 

اسيوط ... تانى 


 


اسيوط ... كمان وكمان






وبيقولوا .. احد شوارع عابدين ! 





وسائل المواصلات اتجمعت ف الصورة دى ..
حمار وجمل ومركب 
:) 




البدو




شارع فى بولاق 


 


ركزوا ف التفاصيل يا ولاد 
المشربيات .. البيوت ... المحلات .. الشجر ...
الحجر ... الناس اللى ماشية ... كلها ممتعة
ومبهجة للعين والقلب




فندق مينا هاوس - الهرم 




متحف الجيزة اللى اتعرضت فيه الأثار
 لحد ما اتبنى المتحف المصرى ونقلوها هناك 
اتهد .. للأسف 
تخيلوا التحفة دى اتهدت !! 
اخدوا منها بعض الحليات حطوها ف سقف قصر عابدين 
والسور الحديد اللى حطوه عند المتحف المصرى

  1. قصر الجيزة اللى أتهد وبقى جنينة الحيوانات وكلية هندسة وجنينة القصر بقت حديقة الأورمان والأسطبل بقى كلية فنون تطبيقية



قلبي مليان بالقسي علي هيدا البلد 😔









قصر الجزيرة - الزمالك 
فندق عمر الخيام سابقا 
فندق الماريوت حاليا 





مينا وشط بولاق





المشربية .... ولا تعليق بالمرة 
#هاحيييييح




سد أسوان 




حوارى عابدين 




محطة القطار - اسماعيلية 
اتهدت روخرا 



قناة السويس الحقيقية 
مش التفريعة الخسرانة اياها



قناة السويس 





مناظر طبيعية - 1 





مناظر طبيعية - 2





مناظر طبيعية - 3








مناظر طبيعية - 4





مسجد ابن طولون .. 
اخر ما تبقى من القطائع احدى عواصم مصر الأربعة 
واخر ما تبقى من أثر الدولة الطولونية 





مقابر المماليك  -1





مقابر المماليك - 2




جامع السلطان حسن - 1 




مسجد السلطان حسن - 2 






بوابة بطليموس التالت - معبد الكرنك 




معبد فيلة - 1




معبد فيلة - 2




مسجد قرب جزيرة فيلة





معبد فيلة - 3




معبد كوم امبو 
الصورة متاخدة 1880 تقريبا 
لما كان مدفون اغلبه ف الرملة .. ! 




مدخل هرم خوفو 




تمثال رمسيس التانى - الأقصر 





احد تماثيل طريق الكباش - الأقصر 





معبد دندرة 






حجر السلسلة ... ؟
الصورة ملفتة جداااا 
مرة هشوف ايه حكايته دا ؟!!! 





واجهة معبد أبو سمبل - 1
قبل الشمس ما تزعل وتحلف ما تتعامد عليه 





واجهة معبد ابو سمبل - 2 




يا لهوى ع الجمال والشموخ والشياكة 
وكل حاجة .. ! 





المهابة حجر .. وبشر





عظمة على عظمة والله 





يا ريت عارفين قيمتها 





ودا غالبا 
كان تمثال مزعل التمثالة مراته
او خطبيته او حبيبته .. فنال ما يستحق


 


هرم خوفو 


 

الاهرامات -1 


 


الاهرامات - 2

 

الاهرامات - 3


أهل إجيبتوس كلها بتحييكي وبتقولك أنها أبئس بمراحل




واخيراااا 
الناس .. البشر ... اللى أهم من كل ما فات






مستنى مين 
ولا بتفكر ف ايه يا شقاوة انتا ؟!! 




عساكر وخيام ف معسكر للجيش - وادى حلفا





يا عسكرى الدورية ... هااااااااااااامين هناك 



الأمشجى ... السايس اللى بيوسع الطريق قصاد العربية



هو ده الامشجى بتاع ريا وسكينه



 

تعالى ... عاوز تروح فين يا حاج ..؟؟





السقا 





السفرجية والخدم 




بدو من اسكندرية 





لأ احنا بعد الـ  95 ما بنعدش .. عشان الحسد 




اللى ع الشمال شكله مخبر قوى 
ميدان الاوبرا 
وجنينة الأزبكية ف الخلفية 


لا دا مباحث :)



هي جنينة الأزبكية دي إللي في العتبة حاليا؟ 😱




 


مالى الجبة والفقطان
 وعتِرة واخر حلاوة




شاب من النوبة 




صورة جميلة. لكن طراز المبنى والملابس ليست نوبية




 

من قبايل جنوب مصر



 


فلاحين ف طريق المريوطية -  الهرم 

 



الغلابة 





اقفوا يا عيال جنب بعض
 عشان تطلعوا كلكم ف الصورة 




مش محلاها عيشة الفلاح 


 


دول كانوا مطلعين عينه



 


وخيره لغيره دايما 




ادينى بقشيش 
وفى الخلفية صحن جامع عمرو 
طبعا المصوارتى اجنبى وشكله مقِرش جريوا عليه 
التسول ف مصر اتبنى قبل الهرم 


التسول. في العالم كله مس في مصر بس


 11 hours ago
لان الفقر موجود من قبل الهرم






حزمة فجل ايه يادلعدى اللى بالسحتوت
 اللى من ايام سيدنا عكروت ؟!!
انشالله ما اتاكل ! 

 


اللى على الشمال دى تنفع تبقى موناليزا مصرية 
قعدتها وشكلها يدى والله 




واخيرا
 نختم بالجمال الصابح
 تقفيل بلاده 
المصرى أصلى 





وبذمتكم عندى حق أحب الصور دى بالذات
دونا عن غيرها ... ولا معنديش ؟!!
هاه 




 تصبحوا على ألف خير


---------------------------------


ليست هناك تعليقات:

إرسال تعليق

Related Posts Plugin for WordPress, Blogger...
"حقوق الملكية والملوخية والمهلبية ... الخ
محفوظة للست شهرزاد وإياك حد يسرقها ويحاول يزعلها آغجر .. مفهوم ؟ "