الثلاثاء، 12 أبريل، 2016

الفنكــــوش فى حكــــم قــراقـــــوش








حكاية النهاردة عنوانها ينسب فضله
الى العزيزة فطومة 



الفنكوش فى حكم قراقوش :)


مقتش عنوان الطف منه الحقيقة
وشهروزة بتحذركم مسبقا
انها قد لا تعجب البعض
رأيى الخاص فيها يعنى
والأخوة بتوع يا شيعية يا عدوة الاسلام الخ ..
ينوكسوا وكدا
والليلة دى الكلام عن شخصية
اقترن ذكرها بالإفترا الجبروت
وآل لما يعترضوا ع الظلم يا خويا ..
يقولك هوه كدا


وإن كان عاجبك 
مين قراقوش دا بقى 
وايه اللى خلى حكمه رزل كدا ... ؟!!
عنقول اهو



 


طبعا انتوا فاكرين زماااان لما حكينا
عن الحاج ابو صلاح ابن الناظر .. الأيوبى
لما جه مصر مع عمه اسد الدين شيركوه
كان فيه خناقة بين وزيرين ف الدولة الفاطمية
شاور وضرغام
 والعاضد الخليفة
كان كيس جوافة مش قادر يعمل حاجة
والصليبين بيدهسوا ف البلد وهيحتلوها وش
قوم ايه





صلوحة جه مع عمه شيركوه
والعاضد الخليفة وقع ف عرضهم يساعدوه
وتم المراد بعد حوارات وحكايات قولناها قبل سابق
وشيركوه بقى الوزير والكل ف الكل
شوية ومات
وقيل انهم سممونى مش سمونى
 القصد اتوزر بداله صلاح الدين ابن اخوه
ليه يا شهرو
جدعنة يعنى وفرد عضلات
ابضضضن
العكس تماما




الامراء وقتها اعترضوا عليه لكن ف النهاية وافقوا
عشان قالوا دا عيل وضعيف
 وممكن نقلشه ف أى وقت
ميعرفوش بقى ان هوه اللى هيلبسهم الخازوق الكبير
وهيبتدى بالعاضد سخصيا
لما هيحبسه ف مقعده ويمنعه من أى مهام
 ويخليه بدل ما كان كيس جوافة 
بقى اكياس اكياس متكومة ف الفسحة
ويفضل يحسرّه لحد ما يموت مقهور يا #نضرى
وبعدين ياخدها هوه ويبقى سلطان البلاد
رسمى فهمى نظمى
ويندار بقى ع الامراء الفاطميين نفر نفر يبهدلهم
 ويمرمطهم ممرمطة السنين
هما والخدم والعبيد الخ




ثم
ف اطار محاربة الصليبين هيوسع ف رقعة الحكم
 ويفتح بلاد ويبعت اخواته يفتحوا ببااد
وف النهاية يورث الممالك دى لولاده واخواته من بعده
والجدع الصراحة رغم كل تحفظاتى عليه
الا انه كان عسكرى كويس 
ورجل حكم 
ومؤسس دولة
محدش يقدر ينكرها دى
وف وسط كل هذه الهلُمة 
هيظهر جليا اسم الأخ قراقوش
عشان يكون جزء من مسيرة صلاح الدين







وقراقيشو بقى هينقسم الى شخصين ف التاريخ
واحد حقيقى المؤرخين بتتشكر فيه
وواحد هزوء الروايات الشعبية بتمسخره
والاتنين ف رأيى لا ينفصلوا
الشق الواقعى المذكور ف المصادر
بيقول انه حضرته كان مجرد فتى وقع ف الأسر
ويكتب انه
"الأمير بهاء الدين قراقوش
(بن عبدالله) الأسدى الخادم الخصى"
" بن عبدالله " دى عشان ميعرفولوش أسم أب
اما "الأسدى" فنسبة الى أسد الدين شيركوه سيده ومولاه
"الخادم" .. لفظة ووظيفة اقترنت بأسمه حتى بعد العتق
ثم بعد العتق ترقى لحد ما بقى "أمير"
" الخصى" دى طبعا معروفة
بس ساعات كانوا يكتبوا " الفحل الخصى"
ومعرفش ازاى يبقى فحل وخصى ف نفس الوقت
بس نعديها ..
مش هنحرجه يعنى
اما بقى قراقوش نفسها كـ كلمة
فمعناها بالتركى عقبال عندكم كدا .. النسر الأسود
قرا : يعنى اسود
قوش : يعنى طائر العقاب






والواد اتخطف من اهله ف أسيا الصغرى
وبلاد تشيله وبلاد تحطه و يتباع ف السوق
ومن ايد لإيد وصل لعمنا أسد الدين شيركوه
وبقى من اخلص خدامهو
بحكم قربه من شيركوه قرب كمان من صلاح الدين 
وسافر معاهم مصر
ولما استوز شيركوه ومن بعده صلاح
كان الخادم قراقوش تحت النظر والرضا





صلاح الدين كان عنده مشكلة كبيرة بعد موت العاضد
 الحاشية بتاعته
زى كدا ما تشيل مبارك ويفضل نظامه
 وكأنك ما عملتش حاجة
الجدع فطن لذلك جدااا
وكان مصّر يقضى عليهم قضاءاااااان مبرمنننننننن
ويقطع دابرهم عشان يبنى أساس ملكه الجديد
قوم يجيبلهم مين يطلع ترابنتينهم يا ترى ؟!!
بهاء الدين قراقوش طبعا
دى عاوزة كلام ؟






والظاهر الراجل كانت ايده تقيلة قوى قوى
وهزاره ماسخ
بهدلهم ياما بهدلة
والمقريزى حكى المسخرة دى
" استبد صلاح الدين بالامراء وقواد الجيش الفاطمى
ومنهم الامراء المصريين المنضمين للجيش
مع انه ف اول الامر بذل لهم المال فاحبوه واطاعوه
بعد ما تملك عمل على انقاص اقطاعهم
 ثم قبض عليهم فى ليلة واحدة وانزل اصحابه فى دورهم
 وفرق اقطاعتهم عليهم
...
وايه كمان اشجينى يا عم مقريزى






بيقولوا انه أمر قراقوش يدخل على قصور الخليفة
 ويلملم كل اهله
وكانوا فوق الـ 100 نفر غير العيال
وفرق بين الستات والرجالة عشان ميخلفوش وكدا
ثم
فضل حاططهم تحت الاقامة الجبرية طول مدة حكمه
هوه ومن جاء بعده من ولاده ...
والخدم والاتباع جزء اتباع وجزء انضم لجيش صلاح الدين




زعلانة عليهم يا شهرو ؟؟؟
دول كانوا مستبدين ف زمانهم .. فلول وكدا
لأ مش زعلانة
لكن ما حدث بعد ذلك هوه اللى يزعل
 عشان ابو صلاح استن سنة مهببة
لما لم الأقطاعيات والأراضى كلها ووزعها على اهله
وقواد جيشه وفقط
والمقريزى بيقول
"ومنذ  كانت ايام صلاح الدين الى يومنا هذا
فان اراضى مصر كلها كانت تقطع للسلطان
 وامراءه واجناده
اذ كان معظمهم من جاء معه من التركمان والكرد
وكان الرجل  منهم اذا استحسن دارا اخرج سكانها
ونزل فيها بحيث ان معظم اهل القاهرة
كانوا يبكون من الاستبداد.. "
وشكرا
بس كدا خلصت
!!!





طاه الراجل وكان بينفذ أوامر سيده 
 ملزم وان كانت ايده كانت تقيلة حبتين عشر حبات
يعنى معملش حاجة عدلة يا شوشو ف البلد ؟
عمل طبعا
"وهو الذى بنى قلعة الجبل بالقاهرة والسور على مصر والقاهرة
والقنطرة االتى عند الاهرام وغير ذلك  "





القلعة وعرفنا سبب انشائها
عشان يعرف يتحصن فيها السلطان
ويشرف على القاهرة من اعلى



مش جو قصور الخليفة اللى ف بين القصرين
و ف وسط الزحمة دى
خصوصا ان القاهرة الفاطمية كانت سكن الامراء
وكبار دولة الفاطميين وصلاح طبعا
ميأمنش يقعد وسطهم 
اما السور اللى كان بانيه بدر الدين الجمالى
 ايام المستنصر الخليفة الفاطمى 
فكان بيعانى من التهدم والبؤس
قراقوش بنى سور جديد 
واضاف على القديم لحماية القاهرة
والقاضى الفاضل كتب لصلاح الدين بعد بنا السور
يتشكر ف الموضوع
وقال :
"والله يحيي المولى حتى يستدير بالبلدين نطاقه ،
ويمتد عليهما رواقه
فما عقيلة كان معصمها ليترك بغير سوار ولا خصرها
ليتحلى بغير منطقة نضار والآن قد استقرت خواطر الناس
 وآمنوا من يد تتخطف ومجرم يقدم ولا يتوقف "





والقناطر بتاعت الجيزة دى آشهرو
 ايه حكايتها روخرا ؟!!
انتوا عارفين زمان النيل كان عند الهرم عاتشى خاااالص
قراقوش حب يستفيد بالمية
 ويسيطر وقت اللزوم يفتح القناطر أويقفلها
واستعان بقى ف كل هذه الأبنية الضخمة 
قلعة وقناطر وسور
باحجار من الاهرامات الصغيرة
 والمتوسطة اللى ف الجيزة
#يهدك





انتوا عارفين ان العرب
 كانوا بيبصوا للأهرامات والتماثيل
 اللى سموها البرابى والمساخيط  بصة مش اللى هيا
انها اصنام وكدا
فعادى تتهد سو وااات ؟
بس المشكلة مكنتش ف هدها اكتر
 م كانت ف اللى بيهدها ..!
بيقولوا قراقوش استعان بالأسرى من الحروب الصليبية
اللى سافرلها صلاح الدين الشام
لكن الأسرى دول هيطلعوا كام ألف يعنى ؟!!
طبعا اضطر يكمل عليهم بعمال وناس من مصر ..
والظاهر ايده كانت تقيلة عشرميت حبة يا ثاااامح
وحصل ظلم كتير





ف هذوها الأثناء صلاح الدين كان ف الشام بيحارب الصليبين
قوم اناب عنه قراقوش يدبر امور البلاد فى مصر
ولما لقاه شطورة كدا ف البناء والعمارة بعتله
ابو صلاح كان بالفعل دخل عكا وقرر يعملها تحصينات
قوم بعت لقراقيشو ييجى بمهندسينه
 سنة 584 هـ الكلام دا




كان جزء كبير من اسوار قلعة عكا اتهدم
 ولازمله تحصينات
وتعالى يا قشقش رممه
عينى يا ابو يوسف حاضر
وبيقولك ايه بقى .. آل صلاح الدين لما سالوه
اشمعنى قراقوش
قالهم نصا :
"ما أرى لكفاية الأمر المهم، وكف الخطب الملم،
 غير الشهم الماضي السهم
والمضيء الفهم، الهمام المحرب،
 النقاب المجرب، المهذب اللوذعي
 ، المرجب الألمعي، الراجح الرأي، 
الناجح السعي، الكافي،
 الكافل بتذليل  الجوامح وتعديل الجوانح
وهو الثبت الذي لا يتزلزل
والطود الذي لايتحلحل،
بهاء الدين قراقوش الذي يكفل جأشه 
بما لا تكفل به الجيوش”





يا سلااااااااااااا
يا حلاوة يا ولاد 
اتارى الطود الراسخ دا من زمان بقى
واحنا منعرفشى ...
#طب_احنا_اسفين_يا_اسمك_ايه







طب يا خويا على راحتك
بس اللوذعى الطود اللى أبصر ايه ميت ألف حاجة 
فوق بعضيشهم دول
وبتقول فيه الدرر
 هيقعد فعلا ف عكا يصلح ف اسوارها
لحد ما يهجموا تانى الفرنجة
:))
وهيبقى منظرى ويحش قوى يا ثامح





ولنا ... هنا ... وقفة
عشان فيلم صلاح الدين كان فيه سقطات تاريخية كتيرة
منها حكاية عكا دى
اللى اتهموا واليها بالخيانة
والاخوة مجاذيب صلاح الدين قالولك والى عكا كان قراقوش
وقراقوش عمره ما كان خاين
والحقيقة ان الأتنين غلط
الفيلم .... والمجاذيب





عشان اولا ... عكا قعدت تحت الحصارقرب السنتين
شافت فيهم الحامية والاهالى الويل وسواد الليل
لحد ما غزاها الصليبين تانى
غصب
وليس بالخيانة






ثانيا بقى
قراقوش عمره ما كان والى عكا ف هذه الأثناء
وابو المحاسن بن تغرى بردى بيقول فى
 النجوم الزاهرة
الآتى
" فى السنة التاسعة عشرة
من ولاية صلاح الدين بن يوسف بن ايوب على مصر
وهى سنة خمسة وثمانين وخمسمائة
فيها ولى السلطان صلاح الدين على عكة 
حسام الدين بشارة
وولى على عمارة سورها الخادم بهاء الدين قراقوش "
يعنى قراقوش كان زى وزير اشغال كدا
اما الوالى فكان شخص آخر 





وهما استلموها وبدا الشغل وهوب الفرنجة هجموا
وحاصروا عكا وبعدين انتوا عارفين الباقى
اللعنة ع الأبراج
ألف ألف لعنة
المقريزى زكريا بيقول اللى بيحكى :
"أستولى عليها الفرنجة فى وقت الظهر
 يوم الجمعة 15 شعبان سنة 589 هلالية
 وكانت مدة الحرب سنتين وشهر و15 يوم"




وبعد افلام وحوارات كدا 
"واسرالفرنجه كل من فيها من الجنود والأمراء
 مثل الأمير سيف الدين أحمد , وبهاء الدين قراقوش
ويعقوب الأمرى وغيرهم من كبار الفرسان"
اتأسر كمان ...
الطود الذى لا يتحلحل !
صلوحة كانت عينة ويحشة !






وابو المقاريز بيقول ان صلاح الدين 
حاول يفتدى الأسرى
 والفرنجة رخموا ورفضوا
لكن ابن تغرى بردى بيقول
انه حصل ...
بس بعد مفاوضات الظاهر
"ولمّا افتتح عكّا من الفرنج سلّمها إليه؛
 ثم لمّا استولوا عليها
 أخذ أسيرا ففداه صلاح الدين بعشرة آلاف دينار؛
وقيل بستين ألف دينار"





بس وصلاح قاله ارجع مصر بقى يا قراقيشو
شوف الأحوال هناك
 عشان انا عندى شوية حروب على ما قُسم 
هنا مع الصليبين
ودى كانت آخر مرة يشوفوا فيها بعض
عشام صلوحة هيقابل وجه كريم سنة  589 هـ
 بعد ما يكون موزع ملكه على ولاده واخواته الخ
ومصر وقعت ف قرعة .. العزيز عثمان






والملك العزيز عثمان بن صلاح الدين يوسف بن أيوب
 مستغناش عن خدمات قراقوش
وعينه نايب له
لما يسافر يكون مكانه وكدا
وقراقوش كان مخلص تماما
ولما حصلت خناقات ومطامع بين الاخوات وامراء الأسدية
والعادل اخو صلاح الدين وافلام وقصص 
قراقوش استعان بكل خبرته ف لم الدسائس دى
وحفظ الحكم لابن سيده ..
اللى وصاه على ابنه .. المنصور
 اللى العرش هيكونله من بعده
وهيعينه اتابك
اتابك يعنى الوصى على الملك (الطفل)





والحاج الشهادة لله هيعمل بالوصية كما يجب
ولما يموت العزيز عثمان  595 هـ
هيمسك مكانه شكلا .. المنصور
وموضوعا .. قراقوش






وطبعا الكلام مش هيعجب امراء الأسدية
اللى راسهم براس قراقوش
 وبعض ولائهم للملك العادل .. اخو صلاح الدين
هيقلبوا الدنيا
ويقولوا لأ .. سورى
والمقريزى بيقول هيتهموه علنا كدا انه :
" بأنه  مضطرب الرأى ضيق الفطن لا يصلح للأمر"
وتعالى يا العادل يا اخو صلاح وامسك مصر يا حبيبى
قوم ايه




العادل اللى عينه فيها من يوم موت اخوه .. هييجى
وكله حماسة يعزل المنصور
ويقول لقراقوش عند امك يا ادهم
مع السلامة روح لماما عشان هنرش مية
وهيسمع الراجل الكلام
ويستخبى ف الدرة
ويموت كما قال ابن تغرى بردى
" السنة الاولى من ولاية العادل
توفى الامير بهاء الدين قراقوش (بن عبدالله) الأسدى
الخادم الخصى المنسوب اليه حارة بهاء الدين بالقاهرة
 داخل باب الفتوح"





طاه يا شوشو .. جت منين حكاية حكم قراقوش دى
 والمهزأة اللى الراجل صبح فيها ؟؟
اقولكم تسمعوا عن ابن مماتى ؟؟




الأخ كان حسبما تقول المصادر قبطى من اعيان أسيوط
ودخل ابوه ف الاسلام
ثم توزر  ف عهد العاضد
او قبل كدا ...
القصد كان ماسك ديوان الجيش
لما جه صلح الدين مصر 
وبقى الوزير لقى ابن مماتى شاطر
 وييجى منه وحطه تحت رعايته
ولما راح ملك الفاطميين وعزهم
فضل ابن مماتى ف شغلانته





صلاح الدين زى ما بيقول بعض المؤرخين
 كان راجل عسكرى
 وحكومته غالبااا
زى حالاته كلهم لواءات عرر زى ما احنا هارشين
ولا بيفمهوا ف البتنشجان
فالراجل بما انه عنده شوية مخ يعنى ربنا صارفهموله
فهم ان البلد محتاجة ناس تكنوقراط يعملوا استقرار
جنب العسكريين 
زى قراقوش بتوع حاضر وتمام يا فندم
اللى ممكن يودوه ف داهية




ابن ممات بقى .. مصرى أصلى
دم خفيف وشاعر وأديب وابن الصعيد وعزوته
 وكرامته فوق مناخيره
وبيقول ولا يهموش
قوم لما شاف قراقوش بيحكم قرر يمسخره
والف كتاب ف ذمه وبعترة كرامته .. 
مذيلا المقدمة بسبب الكتاب
انه بينصح الحاكم عشان مصلحة المسلمين
 ويمكن صلاح الدين يتبع النصيحة
ويشيله !




وخد عندك نص المقدمة "
...
“لما رأيت عقل بهاء الدين قراقوش
مخرمة فاشوش،
قد أتلف الأمة والله يكشف  عنهم كل غمة
لا يقتدي بعالم، ولا يعرف المظلوم من الظالم،
والشكية عنده  لمن سبق، لا يهتدي لمن صدق،
ولا يقدر أحد من عظم منزلته أن يرد على كلمته
ويشتط اشتطاط الشيطان
 ويحكم حكماً ما أنزل الله به من سلطان،
صنفت هذا الكتاب لصلاح الدين
 عسى أن يريح منه المسلمين”





مخرمة فاشوش ... اسم الله على مقام السامعين
فاشوش : يعنى ضعيف الرأي والعزم
انخرم عقلُه : يعنى ضاع
طاه الجدع بيقول عليك خرفان 
ومخك مفّوت يا قرقوشة
مجراش حاجة نساع بعضشينا 
دى منافسات بين الوزراء
#عاتشى





المضحك انه داخل الكتاب
 بيحكى قصص على لسان قراقوش
تهزىء السنين
وكان ممكن يحط اسم حركى مثلا
او يرمزله بأى اسم
انما دا ذكره وش
مثلا ...




واحد اشتكاله من بياع بيغش اللبن بالمية
قراقوش نده للبياع وسأله
البياع قاله دنا بغسله
قراقوش قاله انتا راجل نضيف
عفا عنه
وحبس اللى اشتكى !




قراقوش عدى يوم على سفينة 
كان فيها جماعة محششين
أول ما شافوه خافوا ليتحبسوا 
فعملوا حركات بإيدهم ف الهوا
سألهم بتعملوا ايه
قالوله بننسج ألبسة .. هدوم يعنى
قالهم هيا فين مش شايفها !
قالوله دى معمولة من قماش يشوفوه ولاد الحلال 
لكن ولاد الحرام لأ
قالهم طيب هايل انا هبقى اشترى منه والبسه
وسابهم ومشى !




ومرة كان قراقوش ناشر قميصه على الحبل 
والهوا وقعه
قراقوش اتصدق بالمال 
وقال الحمدلله مكنتش لابسه
والا كان زمانى وقعت انا كمان ... ومت !





ومرة كان بيسابق احد الامراء والامير سبقه
اتغاظ وقال للسايس امنع الاكل عن حصانى 3 ايام 
عقاب له
قالوله هيموت كدا
قالهم خلاص اكلوه بس من ورايا
بس متقلولوش انى عارف !






وحاجات من دى كتييييير
بس ألطف قصة ...
 اللى عملها احمد زكى ف معالى الوزير
فاكرينه المشهد دا يا عيال !
لما واحد غنى اولاده انتهزوا فرصة مرضه 
وقالوا ندفنه
عشان نورثه ونخلص
وماشيين بجنازته الراجل قام من الكفن 
ونده على قراقوش
الحقنى يا عمنا
قراقوش سأل اهله والناس الماشيين ورا الجنازة
اللى هما موالسين مع عيال الراجل
فقالوا إن الراجل ميت فعلا 
قال خلاص ادفنوه
" وقال: لا نعرف أكثر منهم"





الكتاب كله ماشى على هذا المنوال
وطبعا صلاح الدين مقرهوش ولا فرق معاه
قراقوش هوه اللى اكيد قراه ووصلته اخباره
وعمل من بنما .. قصدى بنها
وكل نفر مشى ف سكته
الأيوبيين مشيوا ف طريق هدم الدولة الفاطمية
 بكل أركانها ومذهبها وشخوصها
وابن مماتى فضل ف شغلته وحرفته
 وتجريسه لقراقوش على افعاله




ويقال ان القراقوز .. كلمة محرفة من قراقوش
من كتر ما المصريين اتريقوا عليه ومسخروه




معرفش دقة المعلومة دى الصراحة !
بس اللى متأكدة منه ان جملة هوه "حكم قراقوش"
فضلت تستعمل حتى يومنا هذا
لكل واحد بيفرض حاجة فيها غصب وافترا وبلا منطق




وف وسط الفكاهة والطرافة واللذاذة دى
طبعا فيه ناس طلعلتنا زى الخازوق كدا ..
عشان تقولنا ازاااااى تغلطوا ف الحاكم العادل الهايل
اللى معرفش ايه
واعتبروا التجريس دا اهانة للإسلام 
ورجاله وابطاله ... الخ
واستندوا الى اقوال المؤرخين زى
ابن إياس في "بدائع الزهور" لما قال :
“كان قراقوش القائم بأمور الملك، يسوس الرعية
 في أيامه أحسن سياسة، وأحبته الرعية
ودعوا له بطول البقاء”



وابن كثير:
"الأمير بهاء الدين قراقوش الفحل الخصي
 أحد كبار كتاب أمراء الدولة الصلاحية كان شهماً شجاعاً
 فاتكاً تسلم القصر لما مات العاضد
لما مات العاضد، وعمّر سور القاهرة"




وعن كتاب الفاشوش كتب
ابن خلكان :
"وفيه أشياء يبعد وقوع مثلها منه، 
والظاهر أنها  موضوعة،
 فإن صلاح الدين كان معتمدا في أحوال المملكة عليه،
 ولولا وثوقه  بمعرفته وكفايته، ما فوضها إليه”



وقال العماد الحنبلي:
“الأمير الكبير الخادم بهاء الدين الأبيض
 فتى الملك أسد الدين شيركوه
 وقد وضعوا عليه خرافات لا تصح،
ولولا وثوق صلاح  الدين بعقله لمّا سلّم إليه عكا وغيرها،
 وكانت له رغبة في الخير وآثار  حسنة”
كل دول اتشكروا ف سى قراقيش
كما عادة ناس زمان اللى لازم تفخم 
وتعظم ف الميتين 
وبس ؟





لأ طبعا
دول هيمرمطوا ف سيرة بن مماتى
قال القفطي عن ابن مماتي :
" كان من أقباط مصر في عصرنا، وكان جده جوهريا
يصبغ البلور صبغة الياقوت 
فلا يعرفه إلا الخبير بالجواهر
وهذا يعني أنه  كان يدلس،
،فلا غرو ولا غرابة أن يمتهن حفيده مهنته
 في تزييف الحقائق
 عن بعض  الرجال، ومن يشابه أباه فما ظلم "
يا سلااااااااا



العيب كان ف الكاتب وفيه كل العبر
انما محدش جاب سيرة الظلم والقهر
 والقرف اللى شافوه المصريين والفاطميين من الأيوبيين
ع الأقل ف بدايات عهدهم ف مصر
ومحدش جاب سيرة الأهرام اللى اتكسرت بالسخرة
لبناء القلعة والسور وغيرهم
ومحدش جاب سيرة ارض البلاد
 اللى بقت ملك العسكر وفقط
ومحدش جاب سيرة خير الفاطميين اللى قعد الايوبيين
 يبيعوا فيه عشر سنين متواصلة 
ويحطوه ف جيبهم
لتوطيد ملكهم مش ف جيب مصر واهلها
ومحدش جاب سيرة مكتبة دار الحكمة اللى اتبهدلت
واتباعت كتبها النفيسة اللى تقدر
 بأكتر من مليون ونص كتاب
واللى بعضها اكيد كان بيمجد المذهب الشيعى
لكن غيرها لأ
وكل دا اتباع برخص التراب 
وضاع علينا كنوز لا تعوض
وكأن حد يقولك حرقنا المتحف المصرى
 تماثيله كلها
 عشان اصنام مثلا
فتعتبر دا عادى .. !
وملناش دعوة يا موهيى !!





وانا خلاص خلصت يتبقى الملاحظاااااااات





1)   ليه الناس بتاخد نقد الأشخاص على صدرهم كدا
ويعتبروا ان صلاح الدين هو الاسلام والمذهب السنى
وأى غلطة له تبقى افتراااااء تجنى من خصومه 
وميصحش كدا ..... ؟





2)  
امتى نتعلم ان الحاكم بيتقاس بالانجازات والاخفاقات
وحسب الكفة ما تميل نقول كان كويس ولا زفت
وان فيه غلطة احيانا ممكن تجب كل الكويس ..
فمنفتكرش الا الغباوة وبس ... !




3) 
قراقوش ليه مفترى عليه ؟
هل اعتماد صلاح الدين عليه يبقى معناه
 انه فلة شمعة منورة
وزالفل مثلا ؟
هل تحصينه لعكا (اللى سقطت) يخليه منزه ؟
وحتى انجازاته العمرانية معلش يعنى
ما ناس جت قبله وبعده وعملت زيها واكتر ... !
ايه الفظيع الشنيع المريع اللى حققه
واللى يخلينا نوطى راسنا كدا ومنتريقش
على جناب الست والدته لو حابين .... ؟!






وهذا يقودنا الى رقم
4)
هوه ايه المشكلة لما واحد يشوف 
وزير بيستهبل ويغلط فينتقده ..؟
أى واحد ف منصب عام بيشتغل عند الناس 
من حقه يعجب أو ما يعجبشى البعض 
يقولوا اللى عاوزينه 
ايه العيبة ف كدا يعنى
دا سلو بلدنا يا غجر





هوه احنا لما بتريقأ على مرسى كنا بنغلط ف الدين
ولا بنشاور على خطأ ف سياسته ف الحكم ؟؟



ولما بنتريقأ على السيسى ..
 نبقى بنغلط ف الجيش والبلد
ولا بنشاور على سياسته ؟
ولما نتريقأ على احد ف منصب عام
ايه المشكل ؟؟؟؟




5) اللى يعرف المصريين يفهم كويس 
ان التريقة ف دمهم
ومحدش يقولنا بتغلطوا ف الدين ولا البلد 
ودا أمن قومى
وعشان مصر ومتقوليش ..... 




) حوار ان التاريخ بيظلم بعض الشخصيات دى
شهروزة مش بالعاه
ابضضضضضضن
يعنى المصريين هيفتروا على قراقوش تحديدا ليه ؟؟
اشكمعنى هوه يعنى ؟؟




بيفكرنى بجمال الغيطانى
ف كتابه القاهرة فى ألف عام
 كان بيدافع عن الحاكم بأمر الله
وبيقول انه التاريخ تجنى عليه 
والراجل كان حمش وجامد شوية
 بس مش للدرجة دى يعنى !
وان تشويه صورته كان حركة منظمة من خصومه
طب بتوع السنة وخرشموا سيرته عشان المذهبية
طب مبهدلوش ابوه ليه 
ولا أى حاكم فاطمى تانى وبنفس الكيفية
 اشمعنى دا اللى اختاروه .. الا اذا كان يستاهل فعلا
والتاريخ اداله ما يستحق من تجريس
زى ما ادى لغيره ما يستحق من تكريم





وهذا هيقودنا الى اخيرا
7)
احنا شعب لعين يا اخى
 وبنحب نهزأ حكامنا .... هه
انتوا مالكوا ؟
دحنا محيلتناش الا التريقة والضحكة 
عشان نتحمل كل المرار اللى بنشوفوه
بقى كل حاكم ييجى يقرفنا ف عيشتنا 
ويفقرنا 
ويطلع عينا
وتقولنا متسخروش
لأ ... دحنا نسخر
ونجيب ناس تسخر




و اللعنة على الأبراج
وكمان اللعنة على الـ ملهمش ف النكتة
اللى محيلتناش غيرها 
ومصبرانا على كل الهموم
 وعلى ظلم ورخامة وتقل دم
 كل اولاد الوارمة




وتصبحوا على ألف خير



-----------------------------------------



هو الفكرة اننا في مجتمع نادرا لما تشوفي حد بيتكلم فيه عن اي حاجة بتجرد او موضوعية والغالب ان في اي نقاش بيبقي في طرف بيهاجم وطرف بيدافع فكرة النقاش في حد ذاتها وواحد يقول رايه
او معلوماته منغير ما يكون هدفه اثبات شئ ما نادرة فدايما الحوار صدام سواء بقي نقاش في الدين او في التاريخ
او في السياسة فكرة تبادل الاراء والمعلومات في المطلق ومناقشتها ضعية جدا





التاريخ بيتكتب على يد المنتصر حتى لو كاذب ..للاسف



هو الأراجوز "يمكن" يكون فاطمي لكن خيال الظل عامة أقدم من كده بكثير..معتقدش


ده غير ان السينما شوهت التاريخ

وانشراح كمان تسخر :)



-ما ورقك سليم أهه، أيه وجه أحتجاجك؟ -الجنازة، دي جنازة تليق بوزير؟ فين أصحابكم في النادي ؟ أنا رافض أندفن




بالشكل ده كده يبقى راجل إبن نكته:)



الهيئة الهندسية تليق عليه :)




دافع عن عكه دفاع مستميت اللي كتب السقطه دي يوسف شاهين والفيلم ده اصلا اسقاط على عبدالناصر مش صلاح الدين



أه بس الحصار طوّل و قعد شهور طويلة الناس كلت فيها كلاب و فران و قطط. كانت ملحمة بصراحة.


بس عرفت و حدفهم من شبابيك القلعة الفيلم دا انا دخلته قبل كدة



الاول بيتاجر بالدين والتانى بيتاجر بالوطنية والاتنين ليهم خرفانهم اصل ماينفعش ديكتاتور من غير خرفان





ليست هناك تعليقات:

إرسال تعليق

Related Posts Plugin for WordPress, Blogger...
"حقوق الملكية والملوخية والمهلبية ... الخ
محفوظة للست شهرزاد وإياك حد يسرقها ويحاول يزعلها آغجر .. مفهوم ؟ "